Kandidati për kryeministër nga Koalicioni për Kosovën Fituese, Ramush Haradinaj sërish ka ftuar qytetarët që të dalin për të votuar në zgjedhjet e sotme parlamentare.
Ai në konferencën për medie të dielën, tha se deri tani ka një dalje të respektueshme të votuesve, derisa shtoi se organizimi i zgjedhjeve deri tani është në nivel, raporton KP.
“Është dita më e rëndësishme për katër vitet që po vijnë. Sot me votë vendosi ju për Kosovën dhe duke qenë se të gjitha kushtet janë si duhet, moti është i mirë, ditë me diell dhe aspekti organizativ është në nivel….Ju bëj thirrje dilni me votu, ka një dalje të respektueshme por ju bëj thirrje të gjithëve dilni me votu se kjo është dita juaj, vendimi i juaj për Kosovën. Kjo jo vetëm për përfaqësuesit e juaj në parlament, por edhe për ata që do të jenë në qeverinë e ardhshme. Me votën e juaj ju e drejtoni Kosovën”, tha Haradinaj.
Më shumë detaje i gjeni në Edicionin Special të ATV-së për Zgjedhjet Parlamentare 2025, në videon më poshtë:
Komisioni i Pavarur i Mediave (KPM) tha se është duke vazhduar me monitorimin e Ofruesve ë Shërbimeve Mediale Audiovizuele (OSHMA) edhe gjatë ditës së heshtjes zgjedhore.
Përmes një komunikate, KPM u ka bërë thirrje dhe një herë mediave që të respektojnë obligimet lidhur me procesin zgjedhor, respektivisht heshtjes zgjedhore, duke shmangur çfarëdo raportimi i cili mund të bie ndesh me rregullat e heshtjes zgjedhore dhe mund të dëmtonte procesin e votimit.
“Respektimi i heshtjes zgjedhore nga ana e OSHMA-ve, përveç që është obligim ligjor, i ndihmon votuesit që të ushtrojnë lirshëm të drejtën e tyre ligjore dhe kushtetuese të votës. Prandaj, çdo thyerje e heshtjes zgjedhore nga ana e OSHMA-ve, në këtë periudhë shumë të rëndësishme zgjedhore, mund të ndërhyjë në vullnetin dhe orientimin e qytetarëve për ushtrimin e të drejtës së votës sipas përcaktimit të tyre të lirë dhe demokratik”, thuhet në komunikatën e KPM-së.
Njoftimi i KPM-së:
KPM fton të gjithë të licencuarit (OSHMA) që të zbatojnë obligimet ligjore nga Kreu VIII i Ligjit për Zgjedhjet e Përgjithshme Nr. 08/L-228 dhe Rregullorja KPM-2024/03 për obligimet e mediave gjatë fushatës zgjedhore.
Neni 52, paragrafi 1 dhe 2 i Ligjit për Zgjedhjet e Përgjithshme, ”Ndalimi i Përfshirjes në Media” përcakton se:
1. Asnjë person ose medium nuk transmeton ose publikon çfarëdo materiali që i takon aktivitetit të fushatës, gjatë periudhës që fillon me hapjen e vendvotimeve deri në mbylljen zyrtare të tyre.
2. Në Kosovë nuk bëhet asnjë publikim ose transmetim i rezultateve të hulumtimit të opinionit publik që ka të bëjë me fushatën e zgjedhjeve, duke përshirë daljen në votime, gjatë periudhës që fillon njëzet e katër (24) orë para mbylljes zyrtare të vendvotimeve dhe deri në përmbylljen e procesit zgjedhor”.
Respektimi i heshtjes zgjedhore nga ana e OSHMA-ve, përveç që është obligim ligjor, i ndihmon votuesit që të ushtrojnë lirshëm të drejtën e tyre ligjore dhe kushtetuese të votës. Prandaj, çdo thyerje e heshtjes zgjedhore nga ana e OSHMA-ve, në këtë periudhë shumë të rëndësishme zgjedhore, mund të ndërhyjë në vullnetin dhe orientimin e qytetarëve për ushtrimin e të drejtës së votës sipas përcaktimit të tyre të lirë dhe demokratik.
Më shumë detaje i gjeni në Edicionin Special të ATV-së për Zgjedhjet Parlamentare 2025, në videon më poshtë:
Kryetari i Kuvendit të Kosovës, Glauk Konjufca, i ka bërë thirrje të gjithë qytetarëve të dalin për të votuar në zgjedhjet parlamentare të 9 shkurtit.
Ai ka votuar në qendrën e votimit në Fakultetin Ekonomik në Prishtinë.
Konjufca tha se sot është një ditë shumë e rëndësishme për demokracinë e shtetit. Ai shtoi se gjëja më e rëndësishme sot është që zgjedhjet të jenë të lira dhe të ndershme.
“Sot është një ditë shumë e rëndësishme për demokracinë e shtetit tonë. Është dita e zgjedhjeve. Pra, prej këtij procesi do të konstituohet legjislatura e ardhshme e Kuvendit të Republikës së Kosovës. E pastaj ajo legjislaturë pritet ta zgjedhë edhe qeverinë e re të Republikës së Kosovës. Unë do ta shfrytëzoja rastin që së pari që zgjedhjet të jenë të lira dhe të ndershme. Kjo është gjëja më rëndësishme për republikën tonë. Që zgjedhjet të jenë të drejta, që të kalojnë si është më së miri, pa incidente e pa probleme. Tjetra është që në demokraci flet populli dhe ashtu që zëri i popullit të jetë sa më i fuqishëm. Bëjmë thirrje që të dalin sa më shumë qytetarë që të jetë e mundshme, ta shfrytëzojnë këtë të drejtë të tyre, sepse vetëm në këtë mënyrë bëhen pjesëmarrës të drejtpërdrejtë të vazhdimësisë së ndërtimit të institucioneve tona shtetërore dhe të konsolidimit të mëtutjeshëm të demokracisë tonë”, tha Konjufca, raporton KP.
Numri i qendrave të votimit të cilat janë në dispozicion të qytetarëve është 941, prej të cilave 903 për votimin e rregullt, me gjithsej 2 mijë 533 vendvotime, dhe 38 qendra të votimit për votimin me kusht (nga një për çdo komunë), me gjithsej 56 vendvotime.
Për herë të parë në historinë e zgjedhjeve në Kosovë, qytetarët me të drejtë vote kanë mundësinë që në këto zgjedhje parlamentare të zgjedhin një subjekt politik dhe deri në dhjetë kandidatë për deputetë, ndryshe nga votimet e kaluara kur mundësia ishte të zgjidheshin vetëm deri në pesë kandidatë.
Zgjedhjet e sotme parlamentare të 9 shkurtit po monitorohen edhe nga mbi 100 vëzhgues të Bashkimit Evropian.
Më shumë detaje i gjeni në Edicionin Special të ATV-së për Zgjedhjet Parlamentare 2025, në videon më poshtë:
E ngarkuara me punë në Ambasadën amerikane në Kosovë, Anu Prattipati, është duke vizituar në këto momente qendrën e votimit “Vik Karaxhiq” në Zveçan.
Qytetarët e Republikës së Kosovës sot ushtrojnë të drejtën e votës – në zgjedhjet e para të rregullta parlamentare që prej shpalljes së pavarësisë më 2008.
Numri i qytetarëve me të drejtë vote në vendvotime, sipas të dhënave të Komisionit Qendror të Zgjedhjeve, është 1 milion e 970 mijë e 944 votues.
Për herë të parë votojnë mbi 125 mijë të rinj, raporton KosovaPress.
Ndërkaq, numri i qytetarëve që janë regjistruar për të votuar jashtë vendit, është 104 mijë e 924.
Më shumë detaje i gjeni në Edicionin Special të ATV-së për Zgjedhjet Parlamentare 2025, në videon më poshtë:
Eman Rrahmani nga Koalicioni për Familjen ka votuar sot në Prishtinë në shkollën “Nazim Gafurri”.
Rrahmani tha se është një ditë shumë e rëndësishme për vendin dhe familjen e fëmijët e Kosovës, prandaj u ka bërë thirrje qytetarëve që ta shfrytëzojnë të drejtën e votës.
“Sot është një ditë shumë e rëndësishme për vendin, familjen, fëmijët tonë. I bëj thirrje të gjithë qytetarëve që ta shfrytëzojnë të drejtën e votës dhe të votojnë e të vendosin se kush do ti përfaqësojë dhe për të ardhmen e tyre e cila do të vendoset për katër vitet e ardhshme. Ju bëj thirrje që sa më shumë të dilni të votoni”, tha Rrahmani.
Ambasadori i BE-së në Kosovë, Aivo Orav, ka vizituar një vendvotim në Komunën e Vushtrrisë për të kuptuar më mirë mbarëvajtjen e zgjedhjeve.
Orav ka thënë se populli i Kosovës duhet ta ushtrojë të drejtën e tij për të votuar.
“BE ka vendosur Misionin e Vëzhgimit të Zgjedhjeve të BE-së në Kosovë 2025 për të vëzhguar të gjitha aspektet e këtij procesi. Populli i Kosovës duhet ta ushtrojë të drejtën e tij për të votuar dhe të shprehë lirshëm zgjedhjet e tij”, ka shkruar ambasadori Orav.
Më shumë detaje i gjeni në Edicionin Special të ATV-së për Zgjedhjet Parlamentare 2025, në videon më poshtë:
Mërgimtari Isuf Hyseni, i cili ka votuar me kusht në Zvicër para dy javësh, ka vendosur të vijë në Kosovë për të përjetuar atmosferën e zgjedhjeve nga afër.
“E kam kryer votimin para dy javësh përmes postës direkt në Prishtinë, jo përmes ambasadës. Kam ardhur vetëm për pikë të qejfit, për ta shijuar këtë kohë,” tha ai për ATV-në.
Hyseni arriti në Kosovë mbrëmë pas mesnate dhe pritet të kthehet në Zvicër mbrëmjen e nesërme.
Pavarësisht se ka votuar nga jashtë, ai e konsideroi të rëndësishme të jetë pjesë e këtij procesi edhe fizikisht. /atvlive.tv
Më shumë detaje i gjeni në Edicionin Special të ATV-së për Zgjedhjet Parlamentare 2025, në videon më poshtë:
Në studion e hapur të ATV-së në Gjakovë, e cila po transmeton drejtpërdrejt për zgjedhjet parlamentare 2025 në Kosovë, atmosfera është bërë edhe më e ngrohtë falë një gjesti të veçantë.
Gazetarja Krenare Mulliqi ka sjellë samuna të freskëta për stafin dhe të ftuarit, të përgatitura nga një furrë e njohur vendase.
Moderatori Robert Bojaj, ka pritur mysafirët në një ambient të hapur, duke e shoqëruar diskutimin mbi zgjedhjet me një shije tradicionale gjakovare.
Më shumë detaje i gjeni në Edicionin Special të ATV-së për Zgjedhjet Parlamentare 2025, në videon më poshtë:
Sipas të dhënave të Komisionit Qendror të Zgjedhjeve (KQZ), Prishtina kryeson me numrin më të madh të qytetarëve që kanë votuar deri në orën 11:00. Në kryeqytet, deri në këtë orë, kanë votuar 26,353 qytetarë, duke e vendosur atë në krye të listës për pjesëmarrje, raporton ATV.
Pas Prishtinës, komunat me më së shumti votues deri tani janë:
Ferizaj – 11,660 votues
Prizreni – 10,019 votues
Peja – 10,410 votues
Gjilani – 9, 306 votues
Gjakova – 9,039 votues
Mitrovica – 7,942 votues
KQZ-ja vazhdon të përditësojë të dhënat mbi pjesëmarrjen në votime, ndërsa pritet që fluksi i votuesve të rritet në orët në vijim. /atvlive.tv
Më shumë detaje i gjeni në Edicionin Special të ATV-së për Zgjedhjet Parlamentare 2025, në videon më poshtë:
Deri në orën 11:00, në Komunën e Dragashit kanë votuar vetëm 1.587 qytetarë, që përbën 3.94% të votuesve me të drejtë vote – përqindja më e ulët deri tani në nivel vendi.
Kujtojmë se në këtë komunë kanë të drejtë vote gjithsej 40.263 qytetarë.
Më shumë detaje i gjeni në Edicionin Special të ATV-së për Zgjedhjet Parlamentare 2025, në videon më poshtë:
