Author: ATVLive

Për zgjedhjet për Kuvendin e së Kosovës, që po mbahen sot në vendin tonë Prokurori i Shtetit ka bërë të gjitha përgatitjet e nevojshme për të realizuar mbrojtjen e votës, tha prokurorja, Laura Pula.

“Në tërë Republikën e Kosovës po kujdestarojmë deri në 100 prokurorë në 38 komuna. Është e vërtete se nga ora 7 e mëngjesit jemi gardianë të ruajtjes së votës së sovranit. Po mundohemi të jemi aty në momente kritike specifike e të iniciojmë çdo rast që ka të bëjë me shkelje eventuale kundër të drejtës së votimit që përbën një kapitull të posaçëm nga kodi penal i RKS e që ka hiq më pak se 11 vepra penale, kundër të drejtës së votimit”, tha Pula.

Ajo tha se deri rreth orës 15 janë arrestuar gjashtë persona, në tri raste, të cilët janë në ndalim, me qëllim të mbledhjes së hetimeve.

Pula tha se këto raste nuk mund t’i konsiderojnë të vogla apo të mëdha, por a mund të prishin imazhin.

“Ne mund të themi jo por kanë vepruar kundër ligjit. Për shkak të veprimeve të kundërligjshme do të kenë edhe pasojat për ta. Prokurori i shtetit në këtë mision e ka mision mbrojtjen e votës.

“Në çdo portal që publikohet ndonjë parregullsi që brenda apo jashtë ne mund të veprojmë, ne menjëherë merremi me atë informatë edhe në at rast prokuroria kompetente në koordinim me hetuesinë po merren”, thotë Pula./rtk

Rezultatet prelimintare të zgjedhjeve të sotme parlamentare në Kosovë do të dihen “shumë më shpejt”, për dallim prej herave të kaluara, tha zëdhënësi i KQZ-së, Valmir Elezi në një konferencë për media.

Fillimisht do të bëhet numërimi vetëm i votave për subjektet politike, dhe për këtë shkak, KQZ pret se do t’i japë shpejt rezultatet preliminare.

“Po shpresojmë që, duke pasur parasysh që numërimi i fletvotimeve në vendvotime do të bëhet vetëm për pjesën e fletvotimit ku qytetarët kanë përzgjedhur subjektet politike, do të bëhet më shpejt – sepse nuk do të kemi numërimin e pjesës së fletvotimit ku qytetarët kanë përzgjedhur edhe kandidatët për deputetë, po shpresojmë që brenda një kohe të shpejtë të arrijmë t’i kemi rezultatet preliminare nga vendvotimet për subjektet politike”, tha Elezi.

Për kohën e saktë tha se nuk mund të flasë.

“Sigurisht që do t’ju njoftojmë, por do të mund ta shihni edhe në web-faqen e KQZ-së kur të dhënat nga vendvotimet fillojnë të vijnë e të shfaqen dhe dalngadalë do të mund të shihni përditësimin e tyre dhe votat për secilin subjekt politik garues”, tha Elezi.

Kjo, ai tha se do të varet “nga ecuria e numërimit të fletvotimeve në vendvotime dhe ngarkimit të këtyre të dhënave nga zyrtarët tanë që janë në këto qendra votimi”.

Kryeministri i Kosovës, Albin Kurti, në një postim në Facebook, ka bërë thirrje të fundit për qytetarët që ende nuk kanë votuar, duke i ftuar ata që të shkojnë sa më parë në qendrat e votimit, transmeton ATV.

“Sot është dita D e demokracisë. Kush nuk ka dalur ende të votojë, shkoni tash sa më parë. Pyesni të gjithë të afërmit e miqtë se a kanë votuar dhe ua përcjellni këtë porosi timen që të shkojnë të votojnë menjëherë nëse nuk e kanë bërë. Më pak se dy orët në vijim, deri në 19:00, janë vendimtare për edhe më shumë se katër vitet e ardhshme!”, ka shkruar Kurti. /atvlive.tv

Më shumë detaje i gjeni në Edicionin Special të ATV-së për Zgjedhjet Parlamentare 2025, në videon më poshtë:

Qytetarët serbë në Komunën e Graçanicës shprehin mendime të ndara sa i përket zgjedhjeve parlamentare. Disa nga ata shprehen optimistë se këto zgjedhje mund të ofrojnë punësim dhe kushte më të mira, derisa të tjerët ndonëse e ushtruan të drejtën e tyre të votës shprehen se nuk presin asgjë.

Një qytetar në kushte anonime tha se nuk pret asgjë nga këto zgjedhje.

“Asgjë, çfarë t’ju themi, asgjë, nuk çfarë doni, asgjë, pesë herë asgjë”, thotë ai.

Derisa një tjetër qytetare, e cila po ashtu dëshiron të mbetet anonime, thotë se pret më të mirën, duke përfshirë këtu punësim dhe mirëqenie.

“Po, presim më mirë për të gjithë, duke përfshirë punësimin dhe mbijetesën, fëmijët, për ne të moshuarit, përfshirë të gjithë. Unë pres më të mirën, ndaj do të shohim. Ne e kemi kryer detyrën tonë qytetare dhe tani shpresojmë për më mirë”, tha ajo.

Ndërkaq, komisioni Qendror i Zgjedhjeve njofton se dalja e votuesve në zgjedhje deri në orën 15:00 është 28.32 për qind.

Nga 1.970.944 votues të regjistruar, prej tyre 558 mijë e 246 kanë votuar. Këto të dhëna, u bënë të ditura nga zëdhënësi i KQZ-së, Valmir Elezi. Dalja tregohet të jetë më e ulët sesa në zgjedhjet e vitit 2021 kur më 14 shkurt të atij viti deri në orën 15:00 kishin votuar 32.32 për qind apo 567 mijë e 934 votues nga 1 milion e 794 mijë e 862 me të drejtë vote.

Ndërkaq në zgjedhjet e 6 tetorit 2019 deri në orën 15:00 kanë votuar 29.28 për qind apo 554 mijë e 750 nga 1 milion e 961 mijë e 214 qytetarë me të drejtë vote. /KP

Në Pozheran të Vitisë, pranë shkollës së mesme “Kongresi i Manastirit”, është sulmuar kryetari i fshatit Pozheran, Ilir Zuka.

Zëdhënësi i Policisë së rajonit të Gjilanit, Ismet Hashani konfirmoi për KP, se dy persona kanë sulmuar Zukën, ku akoma nuk dihet shkaku i sulmit. Sipas Hashanit, ai tha se parkingu mund të jetë shkak.

“Është cilësua si lëndimi lehtë trupor nga ana e prokurorit të shtetit. Dy persona fillimisht janë duke u intervistuar në bazë të procedurave ligjore dhe të avokatëve mbrojtës. Nuk lidhet me zgjedhje, është jashtë pikave zgjedhore, nuk ka ndodh në shkollë. Për një parking më duket se janë zënë”, deklaroi Hashani për KosovaPress.

Ndërkohë, është raportuar se personi që ishte shënjestra e sulmit kishte vendosur në veturë e tij një fotografi të njërit prej kandidatëve për postin e kryeministrit.

Policia ka konfirmuar incidentin fizik, por thekson se nuk ka prova që e lidhin atë me procesin zgjedhor, pasi ngjarja ka ndodhur jashtë zonës së qendrës së votimit.

Në Shipol të Mitrovicës, Sanije Sheremeti, nëna e dëshmorit Hamdi Sheremeti, të rënë në Betejën e Koshares, u detyrua të ngjiste shkallët për të ushtruar të drejtën e saj të votës, pavarësisht vështirësive në të ecur.

Gazetari i ATV-së, Arian Hajdaraj, raportoi se fillimisht komisionerët ishin njoftuar për situatën dhe ishte propozuar që votimi të kryhej jashtë qendrës së votimit, por kjo nuk u mundësua.

Si rezultat, Sanije Sheremeti u detyrua të ngjitej vetë deri tek kutia e votimit, duke hasur vështirësi të mëdha.

Në një prononcim për ATV-në, ajo u shpreh se ka ardhur nga Gjermania për të votuar dhe për të dhënë kontributin e saj për Kosovën, për të cilën ka sakrifikuar edhe djalin.

“E kam dhënë djalin për lirinë e Kosovës, e kam varrosur në Koshare. Pavarësisht vështirësive, e kreva obligimin tim qytetar, ishalla kemi fat dhe na bëhet mirë për këtë rini,” tha ajo. /atvlive.tv

ATV gjatë raportimeve nga Madridi i Spanjës kanë hasur në një shqiptar që nuk arriti të ushtrojë të drejtën e tij të votës në zgjedhjet parlamentare të Kosovës, pasi e kishte harruar datën e votimit.

Drini, në një prononcim për ATV-në, tregoi se kishte rezervuar udhëtimin drejt Spanjës dy muaj më parë, pa e kujtuar se data përkonte me zgjedhjet.

“Kemi vendos me ardhë me e pa Madridin, loja u konë dje. Më ka mbet pikë që nuk votova, por herën tjetër, pas 4 vjetëve”, tha ai me humor. /atvlive.tv

Procesi i votimit në Kosovë deri më tani është i qetë dhe po zhvillohet pa probleme të theksuara. Por ankesa se ngjyra materkuluese, që po vendoset në gisht si shenjë që ke votuar po shlyhet shumë lehtë, ka shumë nga ana e qytetarëve.

Qytetarët që po votonin në qendrën e votimit në shkollën “Naim Frashëri” në Prishtinë, provuan për KosovaPress para kamerave për ta vërtetuar këtë gjë.

Sokol Sadiku tha për KosovaPress se “me pas shtëpinë afër e fshin dhe vjen prapë ndoshta”.

“Parregullsi nuk kam vërejtur, vetëm pak shkaku mendoj të numrit të deputetëve ka krijuar pak më kaos përndryshe gjithçka në rregull… Shpresoj, nuk e kanë bërë këtë… Nuk po lypka shumë me u heq… Me pas shtëpinë afër e fshin dhe vjen prapë ndoshta si ne që e kemi afër këtu”, tha Sadiku.

Edhe qytetari tjetër, Agim Luta u shpreh se njeh qytetarë që “iu është shlyer ngjyra”. Ani pse provoi për vete, atij nuk iu largua.

“Është problematike (ngjyra materikuluese), në disa raste po shlyhet, unë provova dhe nuk munda nja dy-tri herë, ndoshta kanë dallime prej vendit, se është problematike nëpër të gjitha raportimet që po bëhen, se ka pasur probleme me identifikimin e këtij shenjëzimit kush ka votuar dhe kush nuk ka votuar, diçka tjetër jo. Kam shumë raste që është shlyer”, u shpreh Luta.

Benjamin Gashi u ankua për pritjen, ndërsa për shenjën në dorë nuk iu heq.

“Pak është dashur të pres (në radhë), por në përgjithësi ka qenë shumë mirë… Nuk e kam provua ende, e provoj tash, mua nuk m’u hoq siç po shihet, por varet”, tha ai.

Edhe qytetari tjetër Bedri Braha tregon se ngjyra në gisht zgjedhjet e kaluara kanë ekzistuar disa broshura udhëzuese, e kësaj radhe ishin brenda prandaj krijonte “tollovi”.

“Në raport me zgjedhjet e kaluara në hyrje kanë ekzistuar disa broshura udhëzuese se kush ku është kësaj here ato ishin vetëm brenda dhe ajo pak krijonte një tollovi, përndryshe çdo gjë ka shkuar në rregull. Nuk e kam provuar deri në këtë moment, nuk më është hequr ende”, theksoi Braha.

Qendrat e votimit janë hapur në ora 7:00 dhe do të mbyllen në 19:00. /KP

Procesi zgjedhor në veri ka nis me disa problem, të cilat ndërkohë janë përmirësuar. Kishte probleme me kompjuter, sistem, votimin me kusht, mungesë të materialit zgjedhor dhe mungesë të zyrtarëve policorë në tri qendra të votimit.

E derisa, një qendër e votimit në Leposaviq, nuk është hapur me kohë, qytetarët thonë se këto zgjedhje nuk janë të barabarta në mes subjekteve politike serbe.

Koordinator i demokracisë në veprim për veriun, Radomir Radakoviq ka treguar për disa probleme që kanë pasur gjatë procesit të votimit.

“Mëngjes kishte problem në Leposaviq, qendra nuk është hapur në orën 7:00, ka probleme me maretiale, ka probleme që përfaqësuesit e partive politike shqiptare nuk ishin në qendrën e votues, tash është rregulluar, në dy tri qendra ka pas problem me policisë, ka problem me kompjuter, ka problem në votimin me kusht. Tri qendra votimit ka problem me policinë, në Bube, Zubim Potok, Dren dhe këtu“, tha ai.

Kurse, Natasha Tomoviq votoi në njërën nga qendrat e votimit në Zveçan. Ajo tha se këto zgjedhje nuk janë të barabarta.

“Besoj se këto zgjedhje nuk janë të barabarta sepse përkrahja e disa serbëve, siç është Lista Serbe nga Beogradi, Partia Demokratike u lëshua në rrugë dhe përgjatë rrugës të luftoj e vetme, e cila dëshiron të mbijetojë dhe të mbetet në territorin e Kosovës, dhe të gjithë të tjerët janë vetëm një rol në politikë, faleminderit”, tha ajo.

Angelina Stojanoviq presin të bëhet më mirë.

“Epo, po të mos prisnim asgjë, nuk do të ishim këtu dhe erdhëm për të ndihmuar, për të rregulluar diçka, për të filluar të paktën nga pika e vdekjes, për të filluar një lloj marrëveshjeje, sepse kjo nuk është një zgjidhje, nuk ngjan në asgjë as për një person të zakonshëm, dhe lere më për dikë pak më të arsimuar se unë, dhe më se tepërmi kemi ardh. Unë mendoj se ky është mendimi im, nuk është i askujt tjetër, për serbët sot është viti 1389, dhe ndoshta diçka do të fillojë të zgjidhet, të jesh apo të mos jesh, kështu që nëse mund të ndihmojmë, nëse do të kontribuojmë në atë përmirësim për të gjithë ne, jo vetëm serbëve, por të gjithë që jetojnë në këtë zonë, ne erdhëm, kjo është gjithçka që mund të bënim”, tha ajo. /kp