Author: ATVLive

Prokuroria e Shtetit ka bërë të ditur se ka ndaluar 8 persona për veprat penale kundër të drejtave të votimit.

Sipas njoftimit Prokurori i Shtetit ka bërë të gjitha përgatitjet e nevojshme për të realizuar mbrojtjen e votës.

“Rreth 100 prokurorë dhe numër i mjaftueshëm i personelit të sistemit prokurorial kanë punuar dhe ende janë duke punuar me qëllim të mbarëvajtjes së procesit zgjedhor. Gjatë ditës së sotme Prokurori i Shtetit ka pranuar disa informata dhe pas verifikimit të tyre deri në mbyllje të procesit të votimit, janë hapur katër raste, kundër tetë personave, kurse informatat tjera janë duke u trajtuar”, thuhet në njoftim.

Këto janë rastet:

·Prokuroria Themelore në Mitrovicë pas informatave të pranuara nga qytetarët, ka iniciuar dy raste të ndryshme që ndërlidhen me veprat penale kundër të drejtave të votimit.
Në rastin e parë ka ndaluar katër persona, për shkak të dyshimit të bazuar se të njëjtit me veprimet e tyre kanë kryer veprën penale: “Cenimi i përcaktimit të lirë të votuesve”, nga neni 210 i Kodit Penal të Republikës së Kosovës.

Ndërkaq, në rastin e dytë ka ndaluar një person, për shkak të dyshimit të bazuar se i njëjti me veprimet e tij ka kryer veprën penale: “Cenimi i përcaktimit të lirë të votuesve”, nga neni 210 i Kodit Penal të Republikës së Kosovës.

·Prokuroria Themelore në Prishtinë, ka iniciuar dy raste të ndryshme që ndërlidhen me veprat penale kundër të drejtave të votimit.
Në rastin e parë ka ndaluar një person, për shkak të dyshimit të bazuar se i njëjti me veprimet e tij ka kryer veprën penale: “Sulm ndaj personit zyrtar”, nga neni 402 i Kodit Penal të Republikës së Kosovës.

Ndërkaq, në rastin e dytë ka ndaluar dy persona, për shkak të dyshimit të bazuar se të njëjtit me veprimet e tyre kanë kryer veprën penale: “Parandalimi i ushtrimit të së drejtës për të votuar”, nga neni 209 i Kodit Penal të Republikës së Kosovës.

“Prokurorët e shtetit do të vazhdojnë të kujdestarojnë edhe gjatë numërimit të votave në vendvotime deri në dërgimin e tyre në qendrat komunale. Me këtë rast Prokurori i Shtetit falënderon qytetarët e Republikës së Kosovës, mediat dhe shoqërinë civile për bashkëpunimin e treguar me Prokurorin e Shtetit me qëllim parandalimin dhe ndjekjen e suksesshme të veprave penale lidhur me këto zgjedhje”, thuhet në njoftim.

Historiani Ibrahim Gashi, në emisionin CONTEXT në ATV, tha se ka pritur një mbështetje më të madhe për kandidatin e PDK-së, Bedri Hamza, duke thënë se ai ka qenë tepër bindës në prezantimin e programit të tij.

Sipas Gashit, fushata e zhvilluar nga PDK dhe LDK ka qenë përmbajtjesore dhe e fokusuar në programe konkrete, ndryshe nga ajo e Vetëvendosjes.

“Këto dy parti kanë bërë një fushatë të përmbajtjeshme, me programe të qarta dhe analiza të detajuara për mënyrën e sigurimit të mjeteve. Sidomos zoti Hamza ka qenë tepër bindës”, u shpreh ai.

Gashi shtoi se, për shkak të qasjes së tij gjatë fushatës, ka pritur që Hamza të kishte një mbështetje më të madhe nga votuesit.

“Ndoshta jam pak subjektiv, por kam pritur që ai të marrë më shumë mbështetje. Besoj ende se shifrat janë në favor të PDK-së, sepse Hamza është një nga liderët e vetëm që ka tingëlluar besueshëm në temat kryesore”, tha ai.

Deklaratën e plotë të Ibrahim Gashit në emisionin CONTEXT mund ta ndiqni në videon më poshtë:

Deklaratën e plotë të Medain Hashanit në CONTEXT, e gjeni në videon më poshtë:

Profesori i Ekonomisë, Medain Hashani, në emisionin CONTEXT në ATV, tha se Kosova mund të përballet me zgjedhje të reja brenda një viti, nëse nuk arrihet të zgjidhet Presidenti i vendit.
Sipas Hashanit, Vetëvendosje nuk e ka synuar domosdoshmërisht fitoren në këto zgjedhje, pasi mund të jetë duke kalkuluar për zhvillime të mëdha ndërkombëtare.

“Si po e shoh situatën, pritet që ai vetë (Albin Kurti) në këto zgjedhje nuk ka dashur t’i fitojë. Ka preferuar të jetë në opozitë për shkak të marrëveshjeve të mëdha që mund të ndodhin në nivel ndërkombëtar. Ai dëshiron të jetë sërish opozitë dhe të luajë gjithmonë rolin e viktimës edhe në zgjedhjet e ardhshme,” tha Hashani.

Ai shtoi se nëse nuk arrihet zgjedhja e Presidentit të Kosovës, vendi do të shkojë sërish në zgjedhje brenda një viti.

“Po supozojmë që pas një viti do të kemi zgjedhje, nëse nuk mundet të zgjidhet Presidenti i Kosovës. Kurti gjithmonë ka dashur ta luajë rolin e viktimës dhe e ka përdorur këtë edhe gjatë katër viteve të qeverisjes së tij,” u shpreh Hashani.

Deklaratën e plotë të Medain Hashanit në CONTEXT, e gjeni në videon më poshtë:

Zëdhënësi i fushatës së Partisë Demokratike të Kosovës, Blerand Stavileci, ka thënë se Republika e Kosovës e ka dëshmuar se është një demokraci e pjekur, “ku qytetarët vendosin me votën e tyre për të ardhmen e vendit”, raporton EO.

Në një konferencë për media pas mbylljes së vendvotimeve, Stavileci ka thënë se dita e zgjedhje është e rëndësishme për demokracinë tonë.

“Kjo është një ditë e rëndësishme për demokracinë tonë. Qytetarët e Kosovës treguan kulturë të lartë politike, duke votuar me përgjegjësi dhe qetësi. Kjo është një fitore për vendin tonë dhe për të ardhmen që të gjithë bashkë po ndërtojmë. Një falënderim i veçantë i shkon kandidatit tonë për Kryeministër, Bedri Hamza, i cili udhëhoqi një fushatë dinjitoze, me ide dhe program të qartë për zhvillimin e Kosovës. Po ashtu, mirënjohje të veçantë për Kryetarin e Partisë Demokratike të Kosovës, Memli Krasniqi, i cili me vizionin dhe udhëheqjen e tij i dha kësaj fushate energjinë dhe unitetin që i nevojitej”, ka thënë Stavileci në konferencë për media.

“Kjo ishte një fushatë që frymëzoi dhe bashkoi njerëzit rreth vlerave të zhvillimit, përgjegjësisë dhe progresit. Një falënderim i përzemërt shkon për çdo votues, aktivist, mbështetës, komisioner dhe vëzhgues të PDK-së, të cilët punuan me përkushtim të madh. Falë jush, kjo fushatë ishte një histori suksesi. Puna juaj nuk ka përfunduar ende – mbrojtja e secilës votë është prioriteti ynë i përbashkët. Ne jemi të sigurt që vullneti i qytetarëve reflektohet më mirë sesa çfarë pasqyrojnë rezultatet preliminare të exit polleve. Prandaj, mbetemi të kujdesshëm dhe të përkushtuar që çdo votë të numërohet me korrektësi dhe transparencë. Siç kemi thënë nga fillimi, ne respektojmë procesin dhe do të presim përfundimin e numërimit zyrtar para se të dalim me qëndrime të tjera politike. Gjatë mbrëmjes, kandidati ynë për Kryeministër, Bedri Hamza, do të mbajë një konferencë tjetër për të ndarë me ju reflektimet dhe vizionin tonë për hapat e mëtejshëm”, u shpreh ai.

Lëvizja Vetëvendosje iu ka kërkuar “vigjilencë dhe përkushtim” vëzhguesve dhe komisionerëve.

Reagimi i LVV-së vjen pak pas mbylljes së vendvotimeve dhe fillimit të numërimit të votave për subjektet politike.

“Të dashur vëzhgues dhe komisionerëve. Ju jeni mbrojtësit e vullnetit popullor andaj vigjilencë dhe përkushtim për mbrojtjen e votës. Punë të mbarë”, ka shkruar kjo parti në Facebook.

Kryetari i Aleancës për Ardhmërinë e Kosovës (AAK), ka thënë se opozita i ka fituar zgjedhjet.

Ai tha se rezultati i AAK-së është dyshifrorë e jo siç është paraqitur në Exit Pollet nga 6 deri 8%.

Ai tha se pres të bashkëpunojë me opozitën për formimin e Qeverisë.

“Ne jemi të sigurt që kemi rezultat dyshifror, këtë do ta vërtetojmë me numërimin e vendit. Ajo që po më gëzo është se opozita i ka fituar zgjedhjet dhe pres me padurim të bashkëpunojmë për formimin e Qeverisë”, ka thënë Haradinaj.

Zëdhënësi i Lidhjes Demokratike të Kosovës (LDK), Besin Mustafa, në një konferencë për media, tha se sipas të dhënave nga vëzhguesit në terren dhe exit poll-i i partisë, LDK ka dyfishuar rezultatin krahasuar me zgjedhjet e kaluara, raporton ATV.

Ai tha se ky është exit poll-i më i madh i realizuar ndonjëherë në Kosovë dhe rezultatet tregojnë një rritje të ndjeshme të LDK-së.

“Exit poll-i ynë, i bazuar në 18 mijë respondentë, tregon se Vetëvendosje ka 34 për qind, LDK ka 24 për qind, ndërsa PDK 22 për qind. Ajo që është e rëndësishme të theksohet është se LDK ka së paku dyfishim të votave nga zgjedhjet e kaluara, pa llogaritur ende votat e diasporës,” tha Mustafa.

Sipas tij, votat e diasporës pritet të përmirësojnë edhe më shumë rezultatin e LDK-së, duke e rritur atë me dy deri në tri pikë përqindjeje.

“Presim një rezultat të shkëlqyeshëm nga diaspora, i cili mund ta rrisë përkrahjen për LDK-në me të paktën dy deri në tri për qind,” shtoi Mustafa. /atvlive.tv

Deklaratën e plotë të Besin Mustafës në konferencën për media, e gjeni në videon më poshtë:

Profesori i Ekonomisë, Medain Hashani, në emisionin CONTEXT në ATV, tha se ndonëse Vetëvendosje ka ende përqindje të konsiderueshme të votave, dëmi i madh për këtë parti është se nuk mund të formojë qeverinë e vetme.

Sipas Hashanit, ndryshe nga zgjedhjet e kaluara, tashmë Vetëvendosje nuk e ka fuqinë e mjaftueshme për të qeverisur pa pasur nevojë për partnerë të tjerë politikë.

“Partia Vetëvendosje, edhe pse në këtë rast ka një përqindje më të vogël të votave, prapë ka dëmin më të madh sepse nuk mund të krijojë qeverinë e vetme”, tha Hashani.

Deklaratën e plotë të Medain Hashanit në CONTEXT, e gjeni në videon më poshtë:

Kryetari i Drenasit, Ramiz Lladrovci, në emisionin CONTEXT në ATV, tha se nuk u beson exit poll-eve, por beson se Partia Demokratike e Kosovës ka shënuar një ngritje të dukshme në komunën e tij.

Ai falënderoi qytetarët e Drenasit për daljen masive në zgjedhje dhe theksoi se kjo tregon një përkushtim të madh qytetar ndaj procesit demokratik.

“Duhet t’i falënderoj të gjithë qytetarët e Drenasit për një dalje masive në zgjedhje. Kanë kryer një detyrim kushtetues në mënyrë jashtëzakonisht të mirë, me një pjesëmarrje prej 26,820 votuesish. Jam shumë i lumtur dhe falënderoj për qetësinë dhe organizimin e tyre, duke dëshmuar edhe një herë që jemi qytetarë kampion, komunë kampione,” tha Lladrovci.

Duke folur për rezultatet e zgjedhjeve, ai theksoi se nuk ka bërë sondazhe dhe nuk i beson exit poll-eve, por rezultatet fillestare tregojnë një fitore të thellë të PDK-së në Drenas.

“Nuk kam bërë sondazhe dhe nuk i besoj shumë exit poll-eve, por nga rezultatet e para që kemi marrë, ne jemi fitues mbi 80 për qind në disa klasë votimi. Kjo nuk do të thotë që e gjithë komuna është vetëm e jona, por besoj se rezultati do të jetë shumë i thellë për PDK-në në Drenas,” tha Lladrovci.

Deklaratën e plotë të Ramiz Lladrovcit në CONTEXT, e gjeni në videon më poshtë: