Author: ATVLive

Zëdhënësi i Komisionit Qendror të Zgjedhjeve, Valmir Elezi, thekson se sot pasdite ka nisur numërimi i votave për kandidatët për deputetë në qendra komunale të numërimit në Prishtinë, Lipjan, Obiliq dhe Partesh. Ndërsa për komunat tjera të Kosovës, ai ka theksuar se po bëhen tw gjitha përgatitjet dhe numërimi pritet të nisë nga dita e nesërme (e mërkurë).

Në një konferencë për media, Elezi ka nënvizuar se brenda pak ditësh pritet të përmbyllet ky proces. Ndërsa, ka shtuar se për herë të parë, numërimi i votave për kandidatët për deputetë po bëhen në qendrat komunale të numërimit, dhe se secila komunë ka një qendër të tillë. Po ashtu ka shtuar se çdo gjë do të jetë transparente.

“Sot KQZ po fillon me procesin e numërimit të votave të kandidatëve për deputetë të cilët janë pjesë nga votimet në vendvotimet e rregullta të zhvilluara me datë 9 shkurt 2025 në 2 mijë 533 vendvotime në të gjithë Kosovën. Në qendrat komunale të numërimit përveç procesit të numërimit të votave të kandidatëve për deputetë do të bëhet verifikimi i votave të subjekteve politike nga formularët të cilët janë plotësuar në vendvotime pas numërimit të votave për subjektet politike. Ky verifikim është paraparë me aktet nënligjore që janë miratuar nga KQZ qysh para shpalljes së datës së zgjedhjeve, dhe sigurisht se kjo do të heq të gjitha dilemat që janë krijuar gjatë problemeve në publikimin e rezultateve preliminare për subjektet politike. Fillimisht procesi i numërimit është planifikuar të fillojë në qendrat komunale të numërimit, në komunat, Prishtinë, Obiliq, Lipjan dhe Partesh. Ndërkaq lidhur me numërimin e votave me kusht, të personave me nevoja të veçanta, dhe atyre jashtë Kosovës do të bëhet në një fazë të mëvonshme në qendrën e numërimit dhe të rezultateve, pasi të përfundojnë numërimet në qendrat komunale të numërimit. Për numrin e votave me kusht dhe votave të personave me nevoja të veçanta, së shpejti do të kemi të dhënat për gjitha komunat veç e veç”, tha Elezi.

Para gazetarëve, Elezi ka folur edhe për votat nga diaspora, i cili tha se sipas të dhënave preliminare numri i votave në përfaqësitë diplomatike është 15 mijë e 352. Derisa shtoi sejanë pranuar 68 mijë e 712 pako me fletëvotime nga diaspora.

“Sipas të dhënave preliminare numri i votave në përfaqësitë diplomatike është 15 mijë e 352 nga 20 mijë e 324. Lidhur me pjesën tjetër përmes postes, janë pranuar 68 mijë e 712 pako me fletëvotime…Është vështirë të parashikohet se sa do të zgjasë numërimi i një vendvotimi, kjo varet nga disa faktor, nga pjesëmarrja e votueseve në një vendvotim, me numër më të madh marrin më shumë kohë për t’u numëruar në krahasim me ato që kanë pjesëmarrje më të ulët….Do të vëzhgohet nga vëzhguesit e subjekteve politike, nga mediat e akredituara dhe vëzhguesit e organizatave joqeveritare. Besojmë se brenda pak ditë do arrijmë të përmbyllim këtë proces”, ka shtuar Elezi.

Ai ka thënë se nga dita e nesërme pritet të fillojë në komuna tjera procesi i numërimit të votave për kandidatët për deputetë në qendra komunale.

“Natyrisht se meqenëse është një ndërmarrje jashtëzakonisht komplekse sidomos edhe sa i përket aspekteve të organizimit të transparencës natyrisht se është dashur edhe pak kohë. Por, që nuk është ndonjë vonesë e madhe fillimi i numërimit të kutive të votimit, të fletëvotimeve, të votave të kandidatëve për deputetë. Edhe në komunat tjera pritet të fillojë gjatë ditës së nesërme”, përfundon Eelzi.

Mbrëmjen e 9 shkurtit pas mbylljes së qendrave të votimit, Komisioni Qendror i Zgjedhjeve filloi me publikimin e të dhënave mbi rezultatet preliminare, mirëpo më pas filloi të ketë probleme teknik dhe kishte rënë i gjithë sistemi, duke u pamundësuar edhe qasja në platformën e KQZ-së. Lidhur me këtë problem të KQZ-së, Zyra e Kryeprokurorit të Shtetit ka njoftuar se Prokuroria Themelore në Prishtinë, gjatë ditës së djeshme, pasi ka pranuar informacion rreth mos-funksionimit të platformës së KQZ-së, ka kërkuar nga ky institucion marrjen e informatave të nevojshme për të vërtetuar nëse ka elemente kryerjes së ndonjë vepre penale apo jo. Më 9 shkurt qytetarët e Kosovës votuan për të zgjedhur përfaqësuesit e tyre për katër vitet e ardhshme. Ky proces zgjedhor është konsideruar demokratik dhe i qetë.

Shefja e Misionit të BE-së për Vëzhgimin e Zgjedhjeve, Nathalie Loiseau, ka vlerësuar zhvillimin e zgjedhjeve, duke theksuar se dita e zgjedhjeve nw Kosovw ishte e qetë dhe se “votuesit kishin mundësi të votonin në kushte të mira”. Ajo shtoi se këto janë sinjale pozitive që tregojnë përkushtimin e qytetarëve ndaj demokracisë.

Në një konferencë për media, Loiseau ka thënë po ashtu se deklaratat e emisarit të Administratës Trump për Misione të Posaçme, Richard Grenell, ku kritikoi kryeministrin aktual Albin Kurtin, ‘mund të përshkruhet si me diçka me ton jo shumë diplomatik’.

Derisa ka shprehur shqetësimin e saj për gjuhen negative nga partia aktuale në pushtet, LVV kundër mediave dhe gjyqësorit. Loiseau nënvizoi se duhet të ketë transparencë të plotë për ato që nuk po shkojnë si duhet, derisa ka folur për vështirësitë gjatë fazës së numërimit.

“Në përgjithësi dita e zgjedhjeve ishte e qete dhe votuesit kishin mundësi të votonin me kushte të mira. Këto janë sinjale që qytetarët janë të përkushtuar ndaj demokracisë…Numërimi akoma nuk ka filluar në qendrat komunale të numërimit…Fazat kritike të procesit zgjedhor ende mbeten për t’u zhvilluar, përderisa vëzhguesit tanë kanë vlerësuar votimin në përgjithësi si pozitiv, vështirësi në zbatimin e procedurave janë bërë të dukshme gjatë fazës së numërimit. Ne kemi vëzhguar që Komisioni Qendror i Zgjedhjeve ka pasur sfida sa i përket punësimit, trajnimit dhe prokurimit. Kjo mund të ketë shkaktuar vonesa të konsiderueshme të cilat tani janë të pamohueshme. Duhet të ketë transparencë të plotë për ato gjëra nuk po shkojnë si duhet dhe pse. Zgjedhjet, përfshirë edhe në ditën e zgjedhjeve kanë qenë të qeta pa ndonjë incident të dukshëm. Fushata ishte mjaft konkurruese, megjithatë polarizimi dhe ndarja e thellë ishte evidente në retoriken e ashpër të fushatës. Ka pluralitet në listën e vendvotimeve, përfshirë edhe nga komunitet jo shumicë të cilat dua t’i theksoi, por edhe resurse me qasjen në media qojnë në mungesën e një terreni të barabartë”, deklaroi Loiseau.

Para gazetarëve, derisa foli për procesin zgjedhor, ajo ka thënë se gjatë bashkëbisedimit disa raportuan për presion nga anëtarët e Listës Serbe mbi votuesit, duke shtuar se kishte ndërhyrje të vazhdueshme dhe të përsëritur nga Serbia.

Derisa shqetësuese ka thënë për mediat se mbetët gjuha negative nga partia në pushtet.

“Numri i partive të serbëve të Kosovës mund të shihet si diçka pozitive, por prioriteti i mirëfilltë politik është ende larg. Grupet zgjedhore duhet të mbesin të pavarura nga ndikimet politike, megjithatë, ne kemi parë raste të politizimit të komisionit qendror të zgjedhjeve gjatë procesit zgjedhor. Kemi vërejture një shqetësim, bllokimin e KPM-së i cili ja pamundësoj atij të marrë ndonjë vendim gjatë fushatës. Në anën tjetër paneli zgjedhor për ankesa dhe parashtresa, PZAP është përballur me një vëllim të madh të rasteve dhe demonstroi aftësinë e tij për të marrë vendime të shpejta. Ne kemi vërejtur me brengosje gjuhen negative nga partia në pushtet kundër medias dhe gjyqësorit. Bojkotimi i mediumeve specifike dhe debateve po ashtu ka kontribuuar në uljen e mundësive për votuesit që të bëjnë zgjedhje të mira dhe të informuara. Megjithatë, transmetuesit kanë dhënë kohë të barabartë për të gjitha partitë, por kjo nuk është shfrytëzuar nga të gjithë. Fushata në komunat kosovare me shumicë serbe ishte më e përmbajtur krahasuar me komunat tjera. Shumë bashkëbiseduese raportuan për presion nga anëtarët e Listës Serbe mbi votuesit dhe kishte ndërhyrje të vazhdueshme dhe të përsëritur nga Serbia”, ka shtuar ajo.

Ndërsa, Loiseau ka përmendur edhe deklaratat e emisarit special të SHBA-ve, Richard Grenell, sipas saj, “të njëjtat mund të përshkruhen si me diçka me ton jo shumë diplomatik”.

“Po ashtu kemi qenë dëshmitar të ndërhyrjeve nga emisari special i SHBA-ve, Richard Grenell në mediat sociale ku kritikoi kryeministrin Kurti, kjo mund të përshkruhet si me diçka me ton jo shumë diplomatik. Sa i përket pjesëmarrjes së grave, legjislacioni i Kosovës duhet të harmonizohet më tej. Kuota aktuale është respektuar, por nuk ka quar në përmirësim të dukshëm të numrit të grave, kandidate për më tej. Votimi jashtë Kosovës pati përmirësime, por votimi në ambasada u përdor për herë të parë. Ne do të vazhdojmë vëzhgimin tonë deri ën fund të tërë procesit zgjedhor”, nënvizoi Loiseau.

Zgjedhjet parlamentare në Kosovë u mbajtën të dielën, më 9 shkurt. /kp

Në bazë të rezultateve preliminare të Komisionit Qendror Zgjedhor për zgjedhjet parlamentare të 9 shkurtit, Lëvizja Vetëvendosje pritet t’i ketë 47 deputetë në Kuvendin e Kosovës, Partia Demokratike e Kosovës 25, Lidhja Demokratike 20, koalicioni AAK-Nisma me tetë deputetë, si dhe komunitetet jo shumicë 20 deputetë.

Megjithatë, me numërimin e rreth 100 mijë votave nga diaspora dhe atyre me kusht, partia e Albin Kurtit, në koalicion me Guxo dhe Alternativa, konsiderohet se mund t’i fitojë edhe dy deri në tre deputetë më shumë – varësisht prej përqindjes së fitimit të votave nga diaspora.

Pavarësisht kësaj, nga analistët politikë konsiderohet se LVV-ja do ta ketë të vështirë të formojë e vetme qeverinë. Sipas tyre, një koalicion mes LVV-së dhe partive të tjera shqiptare është vështirë i mundshëm. Rrjedhimisht, mund të ketë një ngërç në formimin e qeverisë së ardhshme.

KQZ ka numëruar 99.17 qind për qind të votave nga 2,512 qendra votimi nga gjithsej 2.533, sipas të cilave vazhdon të prijë Lëvizja Vetëvendosje me 40.83 për qind ose 339 mijë 350 vota.

PDK-ja renditet e dyta me 22.15 për qind ose 184 mijë e 40 vota, LDK-ja e treta me 17.59 për qind ose 146 mijë 241 vota, ndërkaq, AAK-NISMA-Konservatorët-Intelektualët-Ideal renditet subjekti i katërt me 7.47 për qind ose 62 mijë e 66 vota.

Hulumtuesi në Institutin Demokratik të Kosovës (KDI), Eugen Cakolli tregon për KosovaPress – në bazë të këtyre rezultateve – sa deputetë mund të marrin partitë politike në Kuvendin e Kosovës.

Ai jep edhe skenarin se si Lëvizja Vetëvendosje mund t’i fitojë 51 deputetë dhe me ndihmën e komuniteteve jo serbe në Kuvend ta formojë qeverinë.

“Përbërja e Kuvendit do të jetë e tillë që Lëvizja Vetëvendosje pritet t’i kenë 47 deputetë, pasuar nga Partia Demokratike e Kosovës me 25 deputetë, Lidhjes Demokratike të Kosovës me 20 deputetë, si dhe koalicioni i Aleancës për Ardhmërinë e Kosovës me Nismën dhe disa parti të tjera pritet t’i kenë tetë deputetë. Megjithatë, fakti që kemi rreth 100 mijë vota ende në kalkulim, përfshirë 80 deri 90 mijë vota të cilat janë duke ardhur nga jashtë vendit dhe të paktën 20 mijë vota nga votimi me kusht, rezultati mund të kenë ndryshime por duhet theksuar se do të jenë margjinale. Votat e diasporës në versionin më pozitiv për ndonjë parti, në këtë rast për LVV-në që ka trend më të mirë sesa brenda vendit mund të jetë dy deri të tre deputetë maksimalisht. Madje tre deputetë apo katër për t’i bërë 51 mandate i bie që duhet të fitojë gati 90 apo 100 për qind të votave të diasporës. Kjo është më e pamundur. Në skenarin më realist kur LVV-ja do t’i marrë 60 apo 70 për qind të votave, siç ka bërë rëndom, atëherë numri i mandateve të LVV-së mund të arrijë deri 49. Por kjo nuk është e sigurt, në varësi sesi do të performojnë PDK-ja dhe LDK-ja. Pra LVV-ja në këto zgjedhje do të ketë një rezultat që varion 47-49 deputetë maksimalisht”, thekson Cakolli.

Në anën tjetër, analistja politike, Magbule Shkodra thotë për KosovaPress se fjalori i ashpër i Kurtit në fushatë kundër PDK-së, LDK-së dhe AAK-së, tregon se ai nuk dëshiron koalicion me asnjërën parti.

Sipas saj, rënia në vota e LVV-së dhe mossigurimi i numrave të nevojshëm në Kuvend, mund të sjell vendin në një situatë të paqartë dhe krizë politike.

“Ndonëse Lëvizja Vetëvendosje është fituese e zgjedhjeve me atë çka kam parë nga paraqitjet e zotëri Kurtit dhe veçanërisht në atë në orën 00:00 të natës në ditën e zgjedhjeve, duket se ai nuk dëshiron të bashkëpunojë me opozitën dhe i ka mbyllur derën opozitës dhe dëshiron të qëndrojë i vetëm. Kosova se ka luksin që të shkojë në ndonjë ngërç politik, ku do të mbesim të bllokuar dhe pa qeveri, ndërsa në anën tjetër jemi në një momentum të rëndësishëm. Nëse shohim një fotografi më të gjerë politike se çka po ndodh në botë, ne nuk e kemi luksin që të jemi pa qeveri dhe persona përgjegjës që i prijnë shtetit të Kosovës”, deklaron Shkodra.

Mirëpo, profesori i shkencave politike, Dritëro Arifi thotë për KosovaPress se rezultati i zgjedhjeve të 9 shkurtit është i qartë dhe se krizë politike mund të ketë vetëm nëse partia fituese, Lëvizja Vetëvendosje e dëshiron një gjë të tillë.

Sipas tij, LVV-ja e ka primatin për të formuar qeverinë dhe se numrat i ka në Kuvend që bashkë me pakicat, përfshirë Listën Serbe të themelojë qeverinë.

“Është shumë thjeshtë dhe qartë. Kemi Kushtetutën, janë disa rregulla, ku partia e parë e ka primatin për të udhëhequr lojën dhe numrat janë aty. LVV-ja i ka numrat për ta bërë qeverinë me pakicat dhe Listën Serbe. LVV-ja duhet të bëjë qeverinë dhe duhet të krijohet një standard dhe kur janë numrat aty është edhe më e lehtë. Krizë ka vetëm nëse ne dëshirojmë të shohim krizë. Numrat janë aty, LVV-ja është partia e parë dhe ajo mund të bëjë qeverinë me pakicat, përfshirë Listën Serbe”, thekson Arifi.

Në bazë të rezultateve të deritanishme nuk është mohuar mundësia që partitë opozitare, PDK, LDK, AAK së bashku me komunitetet jo shumicë, të formojnë qeverinë, dhe Lëvizja Vetëvendosje – përkundër fitores në zgjedhje – të mbetet në opozitë.

Gatishmërinë për një gjë të tillë e kanë shprehur në PDK dhe AAK, ndërkaq në LDK kanë thënë se do të dalin me një qëndrim pas diskutimeve me struktura./kp