Author: ATVLive

Qeveria në detyrë e Kosovës ka shprehur gatishmëri për të pranuar deri në pesëdhjetë migrantë të dëbuar nga Shtetet e Bashkuara të Amerikës, për një periudhë njëvjeçare. Sipas zëdhënësit Përparim Kryeziu, zhvendosja do të jetë e përkohshme dhe do të bëhet në përputhje me kriteret e rendit publik dhe sundimit të ligjit në Kosovë, raporton ATV.

Gatishmëria e qeverisë në detyrë të Kosovës vjen pasi Departamenti Amerikan i Shtetit ka konfirmuar se vendet e Ballkanit janë përfshirë në kuadër të një strategjie për ndaljen e migrimit të paligjshëm. Administrata e presidentit Trump e cilëson këtë si një prioritet për sigurinë kombëtare dhe rendin publik. /atvlive.tv

Presidentja e Kosovës, Vjosa Osmani, ka caktuar datën 12 tetor për mbajtjen e zgjedhjeve lokale në vend. Vendimi është marrë pas analizës së propozimeve nga subjektet politike dhe në përputhje me afatet kushtetuese e ligjore.

Në njoftimin e Presidencës thuhet se kjo datë u jep kohë të mjaftueshme institucioneve përgjegjëse që të përgatiten për një proces zgjedhor gjithëpërfshirës dhe sipas standardeve më të larta.

Sipas Osmanit, data e caktuar mundëson organizimin teknik dhe logjistik të zgjedhjeve, përfshirë edhe procedurat e votimit brenda dhe jashtë vendit.

Ajo u ka bërë thirrje subjekteve politike dhe shoqërisë civile që t’i qasen këtij procesi me përgjegjësi të plotë, për të garantuar një garë të drejtë dhe demokratike. /atvlive.tv

Në Gjykatën Themelore në Prishtinë po vazhdon gjykimi ndaj tre të akuzuarve për rastin “Banjska”, ku shtatorin vitit 2023 u vra rreshteri i Policisë së Kosovës, Afrim Bunjaku.

Të akuzuarit Vlladimir Tolliq, Bllagoje Spasojeviq dhe Dushan Maksimoviq janë deklaruar të pafajshëm për akuzat për terrorizëm, financim të terrorizmit dhe vepra të tjera të rënda penale.

Në këtë seancë ka dëshmuar edhe polici i plagosur në sulm, Alban Rashiti, i cili ka rrëfyer momentet e përballjes me grupin e armatosur në veri të vendit.

Ndërkohë, përveç këtyre treve, në këtë rast janë të përfshirë mbi 40 të akuzuar të tjerë, shumica në arrati, për të cilët gjykata ka njoftuar se nuk mund të zhvillohet procesi në mungesë.

Sipas Prokurorisë, grupi i armatosur i udhëhequr nga Millan Radojiçiq, nëpërmjet përdorimit të dhunës me armatim të rëndë, ka tentuar që “ta shkëpusë pjesën veriore të territorit të Republikës së Kosovës, respektivisht komunat e banuara me shumicë serbe, dhe këtë pjesë të territorit t’ia bashkojë Republikës së Serbisë”. /atvlive.tv

Avokati Arianit Koci, gjatë protestës së sotme para Kuvendit, ka reaguar për arrestimin e një ish-pjesëtari të Njësisë Speciale nga autoritetet serbe. Ai kërkoi reagim urgjent nga institucionet e Kosovës, përfshirë edhe Presidenten e vendit.

Koci deklaroi se ka qenë vetë në Serbi deri në orët e vona për të ndjekur zhvillimet e këtij rasti, ndërsa theksoi se po mungon çdo interesim zyrtar nga ana e autoriteteve kosovare.

Ka dështuar edhe tentimi i 29-të për konstituimin e Kuvendit të Kosovës, pasi nuk u arrit numri i nevojshëm i deputetëve për të formuar Komisionin për votim të fshehtë.

Kryesuesi Avni Dehari u bëri thirrje subjekteve parlamentare të dorëzojnë propozimet për anëtarë të komisionit, por partitë ish-opozitare refuzuan të përfshihen në këtë proces.

Në sallë ishin të pranishëm 102 deputetë, por vetëm 53 votuan PRO, ndërsa nuk pati asnjë votë kundër apo abstenim.

Seanca u ndërpre, ndërsa përpjekja e 30-të për konstituimin e Kuvendit do të mbahet të mërkurën më 11 qershor.

Para se të nisë seanca e 29-të për konstituimin e Kuvendit të Kosovës, qytetari Fatmir Muçolli ka qëndruar para hyrjes kryesore të objektit parlamentar me një thirrje publike. Ai mbante në duar një letër me mbishkrimin “Lutje që znj. Bogujevci të bëhet kryeparlamentare”, duke kërkuar që deputetët ta mbështesin atë për këtë pozitë.

Muçolli thotë se e ka përzgjedhur Bogujevcin për shkak të përvojës së saj personale dhe përfaqësimit dinjitoz të vlerave të UÇK-së dhe humanizmit në arenën ndërkombëtare.