ATV

Author: ATVLive

  • Gjendet pa shenja jete një burrë në veturën e tij në Gjakovë, mjeku konstaton vdekjen

    Gjendet pa shenja jete një burrë në veturën e tij në Gjakovë, mjeku konstaton vdekjen

    Një ngjarje e rëndë ka ndodhur sot në rrugën “Gasper Karaqi në Gjakovë, ku një person është gjetur pa shenja jete në veturën e tij, raporton Gazeta Sinjali.

    Mësohet se viktima është i moshuar dhe akoma nuk dihen rrethanat në të cilat ka humbur jetën.

    Vdekjen e tij e ka konfirmuar ekipi mjekësor që ka dalë në vendin e ngjarjes, ku pas ekzaminimeve për shenja vitale e ka konfirmuar se viktima ka ndërruar jetë.

    Ndërkohë kanë intervenuar edhe njësitet policore që kanë bërë ekzaminimet e nevojshme, teksa trupi i pajetë shumë shpejt pritet të tërhiqet për t’u dërguar në Institutin e Mjekësisë Ligjore për obduksion.

    Rasti është konfirmuar për Sinjalin edhe nga Policia, me ç’rast është bërë e ditur se me urdhër të Prokurorit të Shtetit kanë nisur hetimet.

  • Autoritetet ukrainase: Gati 700 trupa ruse u vranë të dielën e Pashkëve

    Autoritetet ukrainase: Gati 700 trupa ruse u vranë të dielën e Pashkëve

    Ukraina ka dhënë përditësimin e saj të përditshëm mbi humbjet e vlerësuara ruse që nga fillimi i luftës.

    Autoritetet ukrainase pretendojnë se janë vrarë rreth 179 mijë trupa ushtarake të Rusisë.

    Nga 178,820 që raportohet se kanë vdekur që nga shkurti i vitit 2022, rreth 670 mendohet se janë vrarë vetëm në 24 orët e fundit.

    Gjithashtu janë shkatërruar 3637 tanke, 18 anije dhe 292 helikopterë dhe shumë pajisje të tjera ushtarake.

    Theksojmë se vlerësimet e Ukrainës kanë qenë vazhdimisht më të larta se ato të ofruara prej burimeve zyrtare ndërkombëtare.

    Ndryshe, Rusia ka nisur pushtimin e pajustifikueshëm të shtetit ukrainas më 24 shkurt të vitit të kaluar duke shkaktuar mijëra viktima në radhët e civilëve dhe dëme të mëdha në infrastrukturë.

  • Rritja e energjisë elektrike, LDK: Paaftësia e Qeverisë Kurti po na kushton shtrenjtë

    Rritja e energjisë elektrike, LDK: Paaftësia e Qeverisë Kurti po na kushton shtrenjtë

    Lidhja Demokratike e Kosovës ka kritikuar Qeverinë Kurti për paaftësi në menaxhimin e energjisë elektrike.

    Përmes një shkrimi në “Facebook” theksohet se, blloku A5 i Termocentralit Kosova A është lënë jashtë funksionit që 8 muaj.

    “Nëse nuk do të ishte zvarritur remonti i këtij blloku nga pushteti, nuk do të kishte ngritje të çmimit të rrymës prej 15%”, thuhet tutje në shkrimin e tyre.

  • Mbahet manifestimi përkujtimor “Eksodi Bllaca 99”

    Mbahet manifestimi përkujtimor “Eksodi Bllaca 99”

    Në Han të Elezit u mbajt sot manifestimi përkujtimor “Eksodi Bllaca 99”, me ç’rast, “Shoqata për Kthimin e Shqiptarëve të Shpërngulur nga Trojet e Veta” ndau çmimin “Hasan Prishtina” për 24 komuna, bashkësi lokale, shoqata humanitare, organizata joqeveritare e mediume nga RMV, që ndihmuan refugjatët kosovarë gjatë kohës së luftës të vitit 1998-99.

    Kryetari i Shoqatës për kthimin e shqiptarëve, Jahja Lluka u shpreh se është obligim i të gjithëve për ta mbajtur gjallë Bllacën e viteve të 99-ta.

    Lluka theksoi se Qeveria e Kosovës duhet të bëjë me shumë për mirëmbajtjen e memorialit, pasi siç tha ai, pas një kohe mund të mos ekzistojë.

    “E kemi për obligim ta mbajëm gjallë Bllacën e viteve 99-të, 440 mijë njerëz kanë kaluar nëpër Bllacë. Më e mira e Bllacës 99-të është pas fitores se pas UÇK-së është fitorja e refugjateve shqiptarë. Prishtina e ka për obgligim t’i ndihmojë Hanin e Elezit, memorialin, sepse Prishtina ka buxhet, të cilin nuk mund ta harxhojë, kështu që, është më mirë të harxhohet për një të mirë të përbashkët. Qeveria e Kosovës pa marrë parasysh kush vjen kryeministër, duhet të ketë interesim më të madh për mirëmbajtjen e memorialit, ashtu siç kerkon shteti të mirëmbahet njëjtë kërkon edhe memoriali, sepse ndoshta pas një kohe nuk mund të ekzistojë”, tha Lluka.

    Kryetari i komunës së Hanit të Elezit, Mehmet Pallazhi, në një fjalë rasti tha se Bllaca do të jetë përherë pjesë e historisë së Kosovës.

    Pallazhi shtoi se si kryetar i komunës çdoherë është i gatshëm te ndihmojë për gjitha projektet për Bllacën e viteve të 99-ta.

    “Bllaca është simbol i tragjedisë së shqiptarëve, por njëkohësisht dhe simbol i qëndrueshmërisë. Me angazhimin tonë Bllaca 99-të do të jetë përherë pjesë e historisë tonë, sepse vetëm duke i kujtuar do ta mbajmë gjallë ndjenjen e atdhedashurisë”, tha Pallazhi.

    Ndërkaq, me rastin e 24 vjetorit të çlirimit dhe 60-vjetorin e fillimit të fotografisë të Asllan Krasniqit, ai nxori nga arkivi i tij për herë të parë pas 24 vitesh dhe hapi ekspozitë me 24 fotografi të “Eksodit’99 në Bllacë, Stenkoc dhe Çegran” Ekspozita u hap në Qendrën Përkujtimore Bllacë në Han të Elezit.

    Po ashtu, në Bllacë u mbajt Orë letrare me poezi konkurruese të zgjedhura nga komisioni për “ 24 poet – 24 poezi – 24 vjetorin” përcjellur me Program artistik nga Ansambli shtetëror i këngëve dhe valleve “Shota” Prishtinë.

    Sot, do të shënohet 24-vjetori i eksodit të shqiptarëve të Kosovës, kur gjatë luftës në 1998-1999, ata janë detyruar nga forcat serbe të shpërnguleshin në Maqedoni. Përveç të shpërngulurve në Shqipëri dhe Maqedoni, mijëra shqiptarë kanë kaluar kufirin edhe me Malin e Zi, ndërsa qindra mijëra janë zhvendosur nga shtëpitë e tyre për të gjetur strehim në malet e Kosovës. Ata kanë qenë fëmijë, gra dhe të moshuar, të dhunuar, të torturuar dhe të masakruar. Eksodi, apo dëbimi shqiptarëve me dhunë nga vatrat e tyre, ka arritur kulmin pas fillimit të bombardimeve të NATO-s kundër pikave ushtarake dhe policore të ish-Jugosllavisë (Serbisë dhe Malit të Zi).

    Para dy vitesh, për të kujtuar ditët e shpërnguljes më dhunë të shqiptarëve nga shtëpitë e tyre dhe vuajtjet e tyre nga regjimi serb në Qendrën Përkujtimore “Bllaca ‘99” në Han të Elezit është inauguruar monumenti “Muri i Kujtesës” si dhe parku “Hasan Prishtina”.

    Monumenti “Muri i Kujtesës” është një mozaik që simbolizon sakrificën e nënës shqiptare, bashkë me emrat e disa prej personaliteteve të shquara botërore që kanë kontribuuar në çlirimin e Kosovës, një vepër kjo artistike-monumentale që shpreh më së miri kujtimin dhe respektin për të gjithë ata që sollën lirinë dhe pavarësinë e shumëpritur. Eksodi i shqiptarëve shënohet edhe në Kukës, çdo 16 prill.

  • Futbollisti e grushtoi gjyqtarin dhe u arrestua nga Policia

    Futbollisti e grushtoi gjyqtarin dhe u arrestua nga Policia

    Dhuna në futbollin kosovar është rikthyer në fundjavë që shkoi.

    Më saktësisht, skena të turpshme u panë pas ndeshjes mes Deçanit dhe Dukagjinit.

    Deçanasit e fituan lojën me rezultat 5:2, por pas përfundimit të saj ndodhi një incident.

    Një futbollist i skuadrës gjakovare e sulmoi fizikisht gjyqtarin pas përfundimit të lojës.

    Në fakt, futbollisti në fjalë doli nga banka rezervë duke u futur në fushë për ta goditur referin, i cili më pas mori edhe tretman mjekësor.

    Futbollisti u arrestua, siç e konfirmon edhe Policia e Kosovës, përmes raportit 24 orësh.

    “Deçan 09.04.2023 – 16:50. Është arrestuar i dyshuari mashkull kosovar pasi që ka sulmuar fizikisht viktimën mashkull kosovar. Viktima ka pranuar tretman mjekësor. Me vendim të prokurorit, i dyshuari është liruar dhe rasti shkon në procedurë të rregullt”, shkruan në raportin policor.

    Pas tensionimit të situatës, e cila ka mundur edhe të eskalonte në stadiumin “Ruzhdi Ramosaj” në Deçan, intervenoi policia, e cila me këtë rast e arrestoi futbollistin, kurse gjyqtari përfundoi në spital.

    Pra, futbollisti gjakovar është liruar, ndërsa e ngarkon vepra penale “Lëndim i lehtë trupor”.

  • Hasaj: Trusti po funksionon pa një mur mbrojtës ndaj goditjeve

    Hasaj: Trusti po funksionon pa një mur mbrojtës ndaj goditjeve

    Blendi Hasaj nga instituti GAP ka reaguar në lidhje me konkursin e fundit për anëtarët e bordit të Trustit.

    Sipas tij, ky konkurs është shpallur vetëm në uebfaqen e Trustit dhe në një portal anonim.

    Tutje, ai ka thënë se për gjashtë pozita në të cilat zakonisht emërohen shtetas të Kosovës, janë pranuar vetëm 21 aplikime; nga të cilat 5 ose 6 kanë qenë të vetë anëtarëve të bordit të fundit.

    Në anën tjetër, shkruan Hasaj në Facebook, anëtarët e komisionit që e përzgjedhin bordin e Trustit pensional, ndonëse i mbanin tri pozita kyçe në vend, e kanë shpërfillur për mbi një vit plotësimin e bordit të Trustit.

    Sipas tij, ata nuk e kanë marrë mundin as të komunikojnë rregullisht mes vete dhe të sigurohen që konkursi i fundit (që përfshinte të gjithë bordin vendimmarrës, 7 pozita) të shpallet në dakordim me britanikët, të plasohet siç duhet, të hapen aplikimet e pranuara pa humbur kohë, të njoftohet Kuvendi për zhvillimet rreth këtij procesi, etj.

    “Aktualisht, Trusti po funksionon pa një mur mbrojtës ndaj goditjeve (në investime)”, përfundon ai.

  • Në Kosovë rreth 33 për qind e qytetarëve janë duhanpirës

    Në Kosovë rreth 33 për qind e qytetarëve janë duhanpirës

    Inspektorati Sanitar në Agjencinë e Ushqimit dhe Veterinarisë, ka thënë për Radio Kosovën se ligji kundër duhanit është zbatuar që nga miratimi i tij, por sfiduese për ta ka qenë pasi që inspektoratet e tjera nuk u kanë ndihmuar që ta bëjnë zbatimin e këtij ligji.

    Ndërsa nga zyra e OBSH-së në Kosovë kanë thënë për Radio Kosovën se fillimi i zbatimit të ligjit është një hap pozitiv për mbrojtjen e shëndetit të qytetarëve të Kosovës.

    Në Kosovë rreth 33 për qind e qytetareve janë duhanpirës, dhe ajo çka është me shqetësuese është sepse pirja e duhanit nga gjinia femërore është rritur kohët e fundit në krahasim me të kaluarën. Ndërsa fillimi i konsumit të duhanit fillon nga të rinjtë e moshës 17 vjeçare dhe me theks të veçanet niset nga femrat dhe kjo, është tejet shqetësuese, ka thënë për Radio Kosovën kryeinspektori Sanitar në Agjencinë e Ushqimit dhe Veterinarisë, Ibrahim Tërshnjaku. Ai thotë se Ligji për Kontrollin e Duhanit, është zbatuar në maksimum, por që nuk patën përkrahjen e inspektorateve të tjera.

    “Por një ndër sfidat më të mëdha është kur mbetesh vetëm. Është jashtëzakonisht problematike, sepse inspektoratet e tjera nuk na ndihmuan që ta zbatojmë këtë ligj dhe ta fuqizojmë. Ta rrisim vetëdijen shoqërore të kësaj shoqërie duke pasur për bazë edukimin bazik shëndetësor i cili është parametri kryesor për ta funksionalizuar një ligj”, ka thënë Tershnjaku.

    Tershnjaku, tutje thotë se aktualisht i ka 49 inspektorë aktivë në gjithë territorin e Kosovës, dhe se kanë bërë kërkesë për rritjen e inspektorëve sepse janë në mungesë të tyre. Ndërsa Oleksandr Martynenko, udhëheqës i zyrës së Organizatës Botërore të Shëndetësisë në Kosovë, ka thënë për Radio Kosovën se Kosova duhet ta zbatojë ligjin kundër duhanit në hapësira publike, në mënyrë që të mos ketë pasoja shëndetësore për qytetarët.

    “Një zhvillim tjetër pozitiv që ka ndodhur rishtazi është fillimi i zbatimit të ligjit për parandalimin e duhanit në hapësira publike. Ky ligj ekziston që 10 vite. Ky ligj është shumë i rëndësishëm që të zbatohet dhe të mos pihet duhani në hapësirat publike, në mënyrë që të mos ketë pasoja shëndetësore si për ata që e pinë duhanin, po ashtu edhe për ata që nuk janë konsumues të tij, që të mos sëmurën nga kanceri dhe të kenë një jetë të shëndetshme”, ka thënë Martynenko.

    Sipas Ligjit kundër duhanit, nëse tymoset duhan në hapësirat ku është e ndaluar me ligj, për subjektet afariste gjoba është nga njëmijë deri në tre mijë euro, derisa për personin fizik 30 deri në 50 euro.

  • Pavarësisht krizës energjetike, Gjermania mbyll tri centrale bërthamore

    Pavarësisht krizës energjetike, Gjermania mbyll tri centrale bërthamore

    Gjermania mbyll tre centralet e saj të fundit bërthamore. Për të Gjelbrit është një ëndërr e realizuar. Në Azi, energjia bërthamore po përjeton një rilindje.

    Në fund të marsit, në Berlin, ministrja gjermane e Mjedisit, Steffi Lemke (Të Gjelbrit) i dha fund me pak fjalë një grindjeje që e kishte mbajtur vendin në pezull për shumë vite: “Rreziqet e energjisë bërthamore në fund të fundit nuk janë të kontrollueshme dhe kjo është arsyeja pse braktisja graduale e energjisë bërthamore e bën vendin tonë më të sigurt dhe shmang mbetjet e reja bërthamore”.

    Një tjetër zgjatje e shkurtër e mbajtjes së centraleve bërthamore

    Më parë, energjia bërthamore u bë edhe njëherë objekt mosmarrëveshjeje. Në fakt, koalicioni qeveritar i përbërë nga SPD, të Gjelbrit dhe FDP kishte rënë dakord të respektonte braktisjen e energjisë bërthamore në Gjermani, të vendosur në vitin 2011. Termocentralet e fundit bërthamore do të mbylleshin në fund të vitit 2022. Por lufta e Rusisë kundër Ukrainës ndryshoi gjithçka, pasi furnizimet me gaz rus në Gjermani u ndërprenë dhe ekzistonte frika e mungesës së energjisë. Kancelari Olaf Scholz e imponoi vendimin e tij: Zgjatje e periudhës së funksionimit të centraleve bërthamore deri në mes të prillit 2023.

    Një mosmarrëveshje që ka zgjatur me dekada

    Pak mosmarrëveshje i kanë polarizuar njerëzit, veçanërisht në Gjermaninë Perëndimore, për shumë dekada sa ajo për energjinë bërthamore. Më 17 qershor 1961, një central bërthamor gjerman, Kahl në Bavari, furnizoi për herë të parë me energji rrjetin publik. Sot, tre termocentralet e fundit gjermane ende në shërbim, e ndërpresin përfundimisht furnizimin për rrjetin më 15 prill. Midis këtyre dy datave kanë kaluar 22596 ditë dhe shumë debate të gjalla. Ndërkohë, 19 blloqe centralesh bërthamore gjermane kanë furnizuar deri në një të tretën e energjisë elektrike të vendit, herën e fundit rreth 20 vjet më parë.

    Në Republikën e vjetër Federale Gjermane, përpara bashkimit gjerman, kundërshtimi i energjisë bërthamore nxori në rrugë qindra mijëra të rinj, kryesisht në vitet 1970 dhe 1980. Fatkeqësia e Çernobilit në Bashkimin Sovjetik dukej se konfirmonte paralajmërimet për rreziqet e energjisë bërthamore. Por partitë politike në pushtet (CDU, CSU, SPD ose FDP) kanë mbështetur fuqimisht përdorimin e energjisë bërthamore për shumë dekada.

    Energjia bërthamore në Evropë

    Vendet e tjera evropiane kanë qenë më të shpejtë për të braktisur gradualisht energjinë bërthamore. Suedia ishte e para që vendosi t’i jepte fund energjisë bërthamore menjëherë pas Çernobilit. Italia gjithashtu vendosi në atë kohë të mbyllte dy termocentralet e saj të fundit bërthamore. Italia iu përmbajt vendimit të saj, ndërsa Suedia e anuloi vendimin e saj në vitin 1996. Sot, atje gjashtë termocentrale bërthamore prodhojnë rreth 30 për qind të nevojave për energji elektrike.

    Vende të tjera evropiane si Holanda ose Polonia po planifikojnë një zgjerim të furnizimit me energji bërthamore, Belgjika po e shtyn mbylljen e planifikuar. Me 57 reaktorë bërthamorë, Franca ka qenë gjithmonë prodhuesi kryesor i energjisë elektrike bërthamore dhe kështu do të mbetet. 13 nga 27 vendet e BE-së duan të përdorin energjinë bërthamore në vitet e ardhshme apo edhe të rrisin kapacitetin. Por shumë ekspertë dyshojnë se kjo do të ndodhë.

    Braktisja e parë gjermane në vitin 2002

    Në Gjermani, Jürgen Trittin, asokohe ministri i Mjedisit i të Gjelbërve, e imponoi vendimin e parë për të hequr dorë nga energjia bërthamore në vitin 2002. Ky vendim u zbut më vonë nga qeveritë pasuese, por fatkeqësia e tmerrshme bërthamore në Fukushima në Japoni në 2011 vulosi përfundimisht fatin e centraleve bërthamore gjermane. Kancelarja e asaj kohe, Angela Merkel (CDU), vendosi fundin e energjisë bërthamore në Gjermani. Trittini është edhe sot deputet i të Gjelbërve në Bundestag, dhe në një intervistë për DË për datën aktuale të mbylljes përfundimtare thotë: “Po, është një ditë e rëndësishme, sepse shënon fundin e një historie, atë të përdorimit civil të energjisë bërthamore. Por ky nuk është fundi i energjisë bërthamore në Gjermani, ne kemi të bëjmë akoma me mbetjet më të rrezikshme të botës, që do të na duhet t’i ruajmë në mënyrë të sigurt për një milionë vjet”.

    Çfarë thonë mbështetësit e energjisë bërthamore?

    A është vërtet ky fundi i energjisë bërthamore në Gjermani? I pyetur nga DË, grupi gjerman i interesit për teknologjinë bërthamore “KernD” tha se heqja e energjisë bërthamore në tërësi nuk ishte një ide e mirë për shkak të krizës energjetike: ” Edhe në funksion të politikës klimatike dhe evolucionit shumë të pafavorshëm të prodhimit të energjisë elektrike vitin e kaluar, për shkak të rritjes së mprehtë të prodhimit të energjisë elektrike nga qymyri, mbyllja e tre termocentraleve bërthamore në punë që prodhojnë pak gazra të efektit serë, nuk është i kuptueshëm”. Dhe shtojnë: “Po të marrim parasysh sigurinë e furnizimit, mbrojtjen e mjedisit dhe klimës, si dhe konkurrencën së bashku, do të ishte më e mençur të prodhohej më shumë energji elektrike nga burimet bërthamore sesa aspak.”

    Energjia bërthamore në botë sot

    Sipas Agjencisë Ndërkombëtare të Energjisë Atomike (IAEA), në mbarë botën janë aktualisht në punë 422 reaktorë bërthamorë, me një moshë mesatare rreth 31 vjeçare. Një raport i fundit i IAEA-s, megjithatë, pohon se nuk mund të flasim për një rilindje të energjisë bërthamore. Për prodhimin e energjisë elektrike nga termocentralet bërthamore në botë, mund të lexojmë: “Në vitin 1996 u arrit maksimumin me 17,5 për qind, por në vitin 2021 kjo vlerë ra nën dhjetë për qind, për herë të parë në katër dekada”. Dhe Jürgen Trittin thekson se askush nuk dëshiron të investojë në një shkallë të madhe “në energjinë bërthamore, sepse energjia bërthamore nuk është konkurruese”. Ndërtimi i centraleve të reja bërthamore është shumë i shtrenjtë; shpesh ato janë të bashkëfinancuara nga taksat. Vonesat dhe kundërshtimet ndaj projekteve të reja janë të përsëritura.

    Japonia i kthehet energjisë bërthamore pavarësisht Fukushimës

    Megjithatë, janë kryesisht Kina, Rusia dhe India që duan të ndërtojnë centrale të reja bërthamore. Kina, ku praktikisht nuk ka shoqëri civile që kundërshton projektet e reja, dëshiron të ndërtojë 47 objekte të tjera. Tashmë sot, Kina prodhon më shumë energji bërthamore sesa Franca. Edhe Rusia dhe India udhëheqin me planet e tyre të zgjerimit. Është argumentuar rregullisht se zhvillimi i energjisë elektrike bërthamore mbron klimën, sepse prodhimi praktikisht nuk gjeneron dioksid karboni.

    Edhe Japonia dëshiron t’i kthehet energjisë bërthamore, pavarësisht nga tërmeti i vitit 2001, i cili shpërtheu disa reaktorë bërthamorë njëri pas tjetrit. Në atë kohë, të gjitha termocentralet bërthamore u mbyllën. Por pak nga pak, disa reaktorë u rikthyen në shërbim. Qeveria japoneze ka marrë tani një vendim: Japonia, e varfër në lëndë të para, dëshiron të ndërtojë reaktorë të rinj dhe t’i lërë të vjetrit të funksionojnë deri në 70 vjet. “Ne duhet të shfrytëzojmë plotësisht energjinë bërthamore”, tha si moto kryeministri Fumio Kishida. Në sondazhe, ai gëzon mbështetje në rritje të publikut pas periudhave të gjata në opozitë. /DW

  • Simboli i eksodit gjatë luftës, si duken sot nëna me foshnjën në gji

    Simboli i eksodit gjatë luftës, si duken sot nëna me foshnjën në gji

    Fotografia e nënës nga Kosova, me foshnjën në duar, e shkrepur në vitin 1999 gjatë rrugëtimit të kolonave me njerëz drejt kampit të Bllacës në Luftën e Kosovës, bëri bujë në mediat më të mëdha botërore të asaj kohe. Nëna me vajzën ‘e vdekur’ në gji, u shndërruan në simbol të luftës dhe sakrificës.

    Fotografia e famshme u shkrep nga një korrespondente e gazetës ‘Time’ në fshatin Ivajë të Kaçanikut, në hyrje të Maqedonisë më 3 shtator 1998. Gjatë kësaj periudhe, lufta në Kosovë kishte marrë përmasa të mëdha pas ngjarjes së Prekazit dhe luftimet në front të UÇK-së kundër ushtrisë serbe sa vinin e shtoheshin.

    Një pjesë e madhe e burrave i ishin bashkuar Ushtrisë Çlirimtare të Kosovës, duke lënë bashkëshortet e tyre me të moshuarit dhe fëmijët. Ndër to ishte dhe Sherife Luta, në atë kohë vetëm 22 vjeçe, shtatzënë, vetëm pak javë para lindjes.

    Sherife Luta nuk di ta thotë me saktësi datën, se kur u shkrep fotografia që e shndërroi atë dhe të bijën, Besën, në simbolin e eksodit të refugjatëve kosovarë të luftës që u strehuan në Maqedoni në kampin e Bllacës.

    ‘Nuk e mbaj mend nëse ka qenë data 3 apo 4 prill i vitit 1999. Por momentin e shkrepjes së fotografisë e kam të freskët si të ishte sot. Atë ditë kishte shumë kameramanë dhe fotografë. Madje më kërkuan që edhe të jepja intervistë, por nuk pranova pasi isha shumë e lodhur’, rrëfen Sherife Luta për Deutsche Welle.

    Vite më pas, gjërat kanë ndryshuar shumë për Kosovën. Tashmë prej 11 vitesh Kosova është e pavarur nga Serbia. Ndërkohë Besa Luta, e cila gjatë eksodit të madh në kohën e luftës së Kosovës ishte vetëm një foshnje, tashmë është një 20 vjeçare, studente e Shkencave Politike dhe jeton në një Kosovë të pavarur.

    Nëse lindjen dhe fëmijërinë i ka dëgjuar si histori të rrëfyera nga mamaja e saj, sot Besa rininë e saj po e kalon në Kosovën e lirë.

    ‘Kosova sot ka shumë probleme, por më e rëndësishme është se tashmë ajo është e pavarur dhe shpresoj që gjërat që për momentin nuk funksionojnë, të përmirësohen me kalimin e kohës’, thotë Besa Luta, e cila kur ishte foshnje, fotoja e nënës së saj Sherifes me të në krahë duke e ushqyer me gji, bëri xhiron e botës, duke u bërë simbol i kalvarit të refugjatëve gjatë luftës së Kosovës.

  • Nesër nis dëgjimi i dëshmitarëve në rastin e ish-krerëve të UÇK-së

    Nesër nis dëgjimi i dëshmitarëve në rastin e ish-krerëve të UÇK-së

    Dhomat e Specializuara të Kosovës në Hagë, kanë bërë të ditur se në rastin ndaj Hashim Thaçit, Kadri Veselit, Jakup Krasniqit dhe Rexhep Selimit, nesër më 11 prill fillon procesi i paraqitjes së provave nga ana e Zyrës së Prokurorisë Speciale, respektivisht me dëgjimin e dëshmitarëve.

    Të gjitha këto seanca pritet të fillojnë në orën 9:30, por se do të transmetohen me 45 minuta vonesë për publikun.

    Për çka po akuzohen Thaçi dhe të tjerët?

    Ndaj ish-presidentit të Kosovës, Hashim Thaçi, ish-kreut të Partisë Demokratike të Kosovës, Kadri Veseli, ish-anëtarit të Shtabit të Përgjithshëm të UÇK-së, Rexhep Selimi dhe ish-zëdhënësit të UÇK-së, Jakup Krasniqit rëndojnë akuzat për krime lufte dhe krime kundër njerëzimit.

    Që nga nëntori i vitit 2020 ata gjenden në paraburgim në Hagë dhe janë deklaruar të pafajshëm për akuzat që rëndojnë ndaj tyre.

    Sipas aktakuzës fillestare, Thaçi, Veseli, Krasniqi dhe Selimi dyshohen për veprat penale që kanë të bëjnë me krime lufte: ndalim të paligjshëm ose arbitrar, trajtim mizor, torturë dhe vrasje të paligjshme dhe krime kundër njerëzimit: burgosje, akte të tjera çnjerëzore, zhdukje me forcë të personave dhe përndjekje, të cilat, sipas Dhomave të Specializuara, janë kryer midis marsit të vitit 1998 dhe shtatorit 1999.

    Krimet pretendohet se janë kryer në disa lokacione të Kosovës dhe në veri të Shqipërisë.

    Më 10 maj, Prokuroria e Specializuar ka paraqitur tri kategori ndryshimesh në aktakuzën ndaj Thaçit dhe ish-udhëheqësve të tjerë të Ushtrisë Çlirimtare të Kosovës.

    Sipas versionit të ndryshuar të aktakuzës, në fshatrat Budakovë dhe Semetishtë të Suharekës, dyshohet që ndërmjet 4 qershorit 1998 dhe shtatorit 1998, të paktën 12 persona janë ndaluar në qendra ndalimi.

    Po ashtu, në aktakuzë thuhet se në fund në fund të qershorit dhe fillim të korrikut të vitit 1999,pjesëtarë të UÇK-së ndaluan “të paktën tre persona pa proces të rregullt ligjor në një seli të UÇK-së, të vendosur në ndërtesën e një ish-shkolle dhe konvikti në Gjilan”.

    Dhomat e Specializuara dhe Zyra e Prokurorit të Specializuar – që ndryshe njihen edhe si Gjykata Speciale – hetojnë krimet e pretenduara të pjesëtarëve të Ushtrisë Çlirimtare të Kosovës, të kryera kundër pakicave etnike dhe rivalëve politikë që nga janari i vitit 1998 deri në dhjetor të vitit 2000.

    Këto krime të pretenduara përmenden në një raport të Këshillit të Evropës, të vitit 2011, autor i të cilit është senatori zviceran, Dick Marty.