Author: ATVLive

Mosnjohja nga pesë shtetet e Bashkimit Evropian, vazhdon të jetë peng për anëtarësimin e Kosovës në këtë institucion.

Parakusht sipas diplomatëve ndërkombëtar është themelimi i Asociacionit të Komunave me Shumicë Serbe.

Ndërkohë në Komitetin për Punë të Jashtme të Senatit amerikan, që u mbajt tre ditë më parë, Escobar potencoi se themelimi i asociacionit ka rëndësi sa i përket raporteve të Kosovës me pesë vendet mos-njohëse.

“Një nga gjërat që këto pesë vende kanë kërkuar është implementimi i plotë i marrëveshjes bilaterale. Për disa arritja e një marrëveshje finale luan rol krucial për synimet e tyre politike. Për t’i hapë rrugë këtij presioni ne duhet të shohim implementim. Dhe nga ana e Kosovës, njerëzit presin që Kosova të implementojë Asociacionin”, tha Escobar.

Megjithatë, analisti Tomor Avdiaj, vlerëson se themelimi i asociacionit, nuk do shënonte hapin kyq që do qonte drejt një njohjeje të shpejtë nga pesë vendet mos-njohëse.

“Kërkesa e atyre është për zbatimin e këtij plani, por nuk mendoj që pas themelimit të asociacionit do të ketë njohje të shpejtë nga këto vende, pasi ato vende presin një raport tjetër. Ato presin që Serbia të jetë dakorduar për shumë gjëra, duke përfshirë këtu edhe një llojë njohje De-Jure”, tha Avdiaj.

Ndërkaq, pesë vendet e Bashkimit Evropian të cilat nuk e njohin ende Kosovë janë Qipro, Greqia, Rumania, Sllovakia dhe Spanja.

Ndërkaq, gjatë mbledhjes së komitetit për Politikë të Jashtme të Senatit Amerikan Escobar dhe Chollet theksuan se nuk përkrahin asnjë formë të Republika Srpskës në Kosovë. /atvlive.tv

Kosova do të jetë nikoqire e organizimit ushtrimit më të madh ushtarak të SHBA-së që nga lufta e dytë botërore.

Në mesin e 25 vendeve të botës, 1300 ushtarë nga Kosova do të jenë bashkë me mbi 22 mijë ushtarë nga shtetet pjesëmarrëse në ushtrimin ndërkombëtar “Defender 2023”.

Ky sipas komandantes supreme të Ushtrisë së Kosovës, është simbol i vendosmërisë kolektive për ta ruajtur paqen dhe stabilitetin në botë.

“Së bashku ne jemi më të fortë kundrejt forcave që kërkojnë të na ndajnë, duke dëshmuar se uniteti e bashkëpunimi ynë janë çelës për një të ardhme më të sigurte e paqësore. Objektivi kryesor është që ta shfaqë aftësinë ushtarake dhe luftërave të ShBA-ve dhe forcave aleate kundër agresorëve të mundshëm. Ky ushtrim është historik në shumë aspekte, veçanërisht për ushtrinë më të re në kontinentin evropian, për forcën tonë të sigurisë”, tha Osmani.

siguria e kontinentit evropian, sipas kryeministrit Kurti është interes jetik i Kosovës, si shtet që beson në atë që e do – të drejtat e njeriut, sundimi i ligjit, paqe dhe demokracinë.

“Defender 2023 po zhvillohet në një realitet të tensionuar 15 muaj pas invazionit rus në Ukrainë, dhe se që si i tillë ka të bëjë drejtpërdrejtë jo vetëm me të ardhmen e Evropës, por edhe mbarë botës, prandaj përgatitja për tu përballë me kërcënime të paparashikueshme është e domosdoshme”, tha Kurti.

Ministri i Mbrojtjes, Armend Mehaj vlerëson se Forca e Sigurisë së Kosovës është e gatshme për të përmbushur cdo detyrë.

“Ngritjen e kapaciteteve tona do t’i bëjmë gjithmonë sipas standardeve të NATO-s. Sepse rruga dhe rrugëtimi ynë është i qartë. Destinacioni ynë është një dhe i vetmi: anëtarësimi në NATO. Prandaj, ne do të jemi përmbushës të çdo detyre, çdo obligimi që kërkohet që ne të bëhemi pjesë e familjes euro-atlantike”, tha Mehaj.

Ambasadori i Amerikës në Kosovë, Jeff Hovenier, përgëzoi Forcën e Sigurisë së Kosovës, për arritjet gjatë këtyre viteve.

“Këtu në pjesën e stërvitjes në Ballkan, na vjen shumë mirë që po e shohim Forcën e Sigurisë së Kosovës si një prej kontribuesve më të mëdhenjtë të këtij ushtrimi me pjesëmarrjen e 1 mijë e 300 vetave. Me siguri më është thënë që kjo është ndërmarrja më e madhe dhe më ambicioze që FSK-ja ka ndërmarrë deri tani. Në më pak se katër vjet prej krijimit të FSK-së, kemi qenë të mahnitur dhe të lumtur me përparimin e FSK-së dhe me mirënjohjet e shumta gjatë historisë së saj profesionale”, tha Hovenier.

Në këtë ushtrim ushtarak të SHBA-së, Kosova merr pjesë për herë të dytë, derisa ushtarëtë e FSK-së janë në mesin e ushtrive të shteteve të ndryshme që do të marrin pjesë në këtë stërvitje që do të mbahen në Babaj të Bokës së Gjakovës. /atvlive.tv

Deputetja e LDK-së, Hykmete Bajrami e ka akuzuar Ministrinë e Financave që buxhetin e planifikuar me Ligj për këtë vit e ka 3.2 miliardë euro, por sot e kësaj dite i mbanë të bllokuara 37.5 milionë euro, mjete këto vetanake të komunave.

Bajrami ka shkruar në Facebook se si pasojë, janë qindra projekte kapitale që komunat as nuk mund t’i iniciojnë, sepse ministri i financave, Hekuran Murati, nuk lejon Thesarin ta bëj alokimin e mjeteve financiare.

“Kush i ka fajet”, ka shkruar ajo.

Ministri i Financave, Hekuran Murati, ditë më parë ka thënë se Ministria që udhëheq nuk është duke bllokuar të hyrat vetanake komunale.

Ai në seancën e Kuvendit, e sqaroi edhe gjithë procesin teksa tha se po manipulohet me Ligjin për Buxhetin.

“Po manipulohet se çfarë ka ligji i buxheti, MF-ja nuk ka problem me interpretime të buxhetit aty shkruan shumë mirë se të hyrat vetanake komunale nga viti 2022 barten në vitin 2023, opozita LDK-ja në këtë rast po kushtëzon barti edhe të hyrat e viteve paraprake kështu duke shkelur ligjin pasi kjo nuk parashihet në ligj. Këta pikërisht për këtë e kanë bërë një amendament kur ka qenë votimi në lexim të dytë i ligjit të buxhetit dhe patën thënë që e kanë rregulluar këtë çështje tash po del që s’është ashtu. Unë kërkoj që LDK-ja nëse kërkon të zbatohet duhet të ketë amendament të ligjit, Ministria e Financave nuk është duke e blloku procesin”, tha ai.

Ceremonia e fillimit të stërvitjes “Defender Europe 2023” filloi me antonimin e himnit të Republikës së Kosovës dhe SHBA-së, nga orkestra frymore e Forcës së Sigurisë së Kosovës.

Nga ana e tij, ambasadori amerikan në Kosovë, Jeff Hovenier, deklaroi se është nder dhe kënaqësi të jetë prezent në këtë ceremoni.

Ai tha se kjo ngjarje është arritje e madhe e Kosovës dhe paraqet përforcim të marrëdhënieve mes SHBA-së dhe Kosovës.

“Derisa po shohim pasojat e tmerrshme të luftës së nisur nga Putini në Ukrainë, është shumë relevante një ushtrim i tillë”, tha Hovenier.

Ai u shpreh se “Defender Europe 2023” është një ushtrim shumëkombësh, i hartuar për të rritur ndërveprimin midis SHBA-së dhe 26 shteteve të tjera.

Ai tha se ky ushtrim drejtohet nga komanda e SHBA-së. Hovenier tha se kjo bëhet për të siguruar edhe aleatët dhe për të zmbrapsur ata që rrezikojnë dhe për të mbrojtur kontinentin evropian nga agresioni.

Diplomati amerikan u shpreh se një nga qëllimet është që të demonstrohet përkushtimi i aleatëve dhe partnerëve për të rritur shkallën, kapacitetin dhe ndërveprimin e tyre.

Ai tha se në këtë stërvitje janë mbi 9 mijë pjesëtarë të personelit amerikan të cilët do t’i bashkohen 17 mijë ushtarëve të tjerë.

Kryeministri i Kosovës, Albin Kurti, gjatë ceremonisë së hapjes së “Defender Europe 2023” tha se FSK radhitet e katërta në këtë ushtrim në mesin e 25 ushtrive pjesëmarrëse sa i përket numrit të personelit të angazhuar në këtë ushtrim.

“Kjo dëshmon për vullnetin që kemi për të zhvilluar sistemin tonë të mbrojtjes por edhe për përkushtimin e palëkundur për të qenë pjesë e sistemit të përbashkët të mbrojtjes së vendeve që përqafojnë e përfaqësojnë vlerat demokratike”, tha ai.

“Siguria kontinentit evropian është interes jetik i yni, si shtet që beson në atë që e don, të drejtat e njeriut dhe sundimin e ligjit, paqen dhe demokracinë. Defender Europe 21 ishte më pak se një vit para se Rusia të shpërfaqë në mënyrën më agresive e brutale synimet e kahmotshme për t’u shtrirë dhunshëm në thellësi të Evropës. Defender Europe 23 po zhvillohet në një realitet të tensionuar 15 muaj pas invazionit rus në Ukrainë dhe që si i tillë ka të bëjë drejtpërdrejt jo vetëm me të ardhmën e Evropës, por mbarë botës. Prandaj përgatitja për t’u përballur me kërcënimet e njohura si dhe ato të paparashikueshme është e domosdoshme. Ashtu sic është e domosdoshme rritja e ndërveprimit dhe ngritja e gatishmërisë luftarake, e që janë objektivat kryesore të ushtrimit “Mbrojtësi i Evropës 2023”, deklaroi Kurti.

“Edhe ky togfjalëshi ‘Stronger together’ është veçse variacion dhe jehonë e thënies së famshme të kryeheroit tonë Skënderbeut ‘Bashkimi bën fuqinë’”, tha kryeministri.