Author: ATVLive

Një shqiptare nga Durrësi, Mira Dreaj, u martua dje në Leposaviq me serbin Dejan Slavkoviq.

Ata u martuan në Kishën Ortodokse në Soçanicë, pasi që shqiptarja para pak kohësh ishte konvertuar në Ortodokse, raporton Kosovo Online.

Pas dasmës në kishë, ata kanë shëtitur nëpër rrugët e Leposaviqit, madje edhe pranë ndërtesës së komunës ku po vazhdojnë protestat e serbëve dhe ku është duke qëndruar edhe kryetari i komunës, Lulzim Hetemi.

Mira tha se ajo tani ndihet serbe, dhe se sipas saj ka shumë shqiptarë me origjinë serbe, që nuk e dinë një gjë të tillë.

‘’Unë u martova me Dejanin për dashuri, ne u takuam në Durrës. Njohja dhe shoqërimi ynë zgjati gjashtë muaj. Unë jam e lumtur që po kthehem në besimin e të parëve të mi. Tani ndihem serbe. Ka shumë njerëz në Shqipëri qe kanë origjinë serbe, dhe nuk e dinë, ose deri tani ata ishin të ndaluar ta dinin’’- tha Mira.

Ndërsa dhëndri, Dejani, tha se Mira i ka thënë se do t’i lindë fëmijët e tyre si ortodoksë, në Kosovë.

“Faleminderit Mira që pranove të bëhemi një. Edhe nëse Mira nuk do të kishte pranuar besimin tim, unë nuk do të isha zemëruar. Kjo ishe dëshira e saj. Kjo më tha mua- Unë dua t’i lind fëmijët e tu si ortodoksë në Kosovën tënde- dhe kjo më gëzoi shumë’’- tha serbi, Dejan.

Këtë fjalim serbi e dha teksa kaloi pranë pengesave ku po qëndrojnë trupat e KFOR-it, pranë ndërtesës së komunës ku po qëndron kryetari i ri tash e 16 ditë.

Ish-komandanti i Forcës së Sigurisë së Kosovës, Kadri Kastrati, e vlerëson se situata në veri të vendit është e rëndë. Sipas tij, Policia e Kosovës nuk duhet të zmbrapset deri në arrestimin e të gjithë serbëve që kanë marrë pjesë në sulmet ndaj pjesëtarëve të KFOR-it.

Në një intervistë për KosovaPress, gjeneral Kastrati thekson se duke marrë parasysh praninë e trupave paqeruajtëse, nuk pritet përshkallëzim i situatës pas aksionit të sotëm.

“Situata në veri është mjaft e tensionuar, ka qenë të hënën e kaluar, para një jave e më tepër ka qenë shumë kritike sepse sipas disa informacione që kanë dalë, serbët kanë qenë të përgatitur edhe për të vrarë policë të Kosovës dhe KFOR-i ka pasur këto informacione dhe për këtë arsye ka dalë në vijë të parë, kur janë lënduar mbi 30 pjesëtarë të KFOR-it. Për këtë arsyeje sepse KFOR-i në situata të jashtëzakonshme ka edhe mision qe të jetë reagues i parë, të jetë përgjegjësi kryesor për ruajtjen e rendit dhe qetësisë në gjithë territorin e Kosovës, e posaçërisht në mbrojtjen e sovranitetit dhe integritetit territorial. Është situatë mjaft e rëndë, Policia e Kosovës në asnjë moment nuk duhet të zmbrapset, që t’i arrestojë të gjithë ata që janë identifikuar që kanë marrë pjesë në sulmin e asaj të hëne”, thotë Kastrati.

Kastrati shton se serbët në veri po rezistojnë ndaj aksioneve të Policisë me qëllim që mbrojnë kriminelët.

“Çdo herë e kemi parë edhe në të kaluarën që çdo herë kur Policia e Kosovës është munduar që të shtrijë ligjin në gjithë territorin e Kosovës, e posaçërisht në atë pjesë, kanë hasur në rezistencë. Ata dalin dhe mbrojnë, sepse krimineli e mbron kriminelin. Dhe gjithë këta kriminelë kanë jetuar si në ‘bahqen e babës’, kanë bërë kontrabanda, janë marrë me gjithë ato sene që nuk janë ligjore për tu pasuruar dhe normalisht që atyre u prishet ajo rehati dhe ata kanë rezistuar çdo herë. Ata janë të përkrahur nga vet presidenti Vuçiq në Beograd dhe nga strukturat politike të Serbisë dhe janë të mbrojtur. Unë kam informacione që këtu kanë qenë të implikuar edhe njerëzit e BIA-s edhe ish-policisë që kanë eksperiencë të jashtëzakonshme në luftërat e ish-Jugosllavisë, kemi dy njerëz në burg, njeri ka qenë në luftë në Koshare, njëri ka qenë serb i Sllovenisë, tjetri serb i Bosnjës “, shton Kastrati.

Sipas tij, nuk do të ketë përshkallëzim të situatës në komunat veriore, për shkak të pranisë së trupave paqeruajtëse.

“Unë mendoj që nuk do të ketë përshkallëzim, kjo është e çastit, e momentit, është arrestuar një kriminel atje. KFOR-i e ka marrë shume seriozisht, i ka sjell 500 trupa të njësive elite të Turqisë, njësi me eksperiencë të jashtëzakonshme, sidomos në luftërat dhe konfliktet urbane. Ata do të stacionohen atje dhe një batalion rezervë është në gjendje gatishmërie që mund të vije kurdo që kërkohet”, përfundon ai.

Ai kërkon nga institucionet që veprimet të jenë të koordinuara me KFOR-in dhe partnerët tjerë ndërkombëtarë.

Gjatë ditës së sotme, ministri i Punëve të Brendshme, Xhelal Sveçla, ka njoftuar se Policia e Kosovës ka arrestuar një nga organizatorët e sulmeve ndaj pjesëtarëve të KFOR-it në veri, Milun Milenkovic- Llune. Gjatë arrestimit janë lënduar tre zyrtarë policor. /KP

Një pjesë e njësiteve të Policisë së Kosovës me autoblindat e tyre nga udhëkryqi në lagjen e boshnjakëve, përkatësisht rreth 300 metra larg protestuesve në Mitrovicën e Veriut, janë nis në drejtim të jugut të Mitrovicës. Ndërkohë, aty kanë mbetur një pjesë tjetër e pjesëtarëve të Policisë.

Kjo lëvizje, siç raporton ekipi i KosovaPress-it, erdhi pas diskutimeve që kanë zgjatur rreth 5 minuta, në mes majorit të Policisë së Kosovës dhe kolonelit të KFOR-it amerikan.

Një numër më i vogël i protestuesve po vazhdon të qëndrojë te udhëkryqi afër shkollës teknike në veri të Mitrovicës.

Më herët, Policia e Kosovës ka arrestuar një nga organizatorët e sulmeve ndaj pjesëtarëve të KFOR-it në veri, Milun Milenkovic- Llune.

Ministri i Punëve të Brendshme, Xhelal Sveçla ka njoftuar se gjatë arrestimit të tij, janë sulmuar tre zyrtarë të Policisë së Kosovës.

“Policia e Kosovës sot ka arrestuar Milun Milenkovic- Llune, një nga udhëheqësit e formacionit kriminal “Mbrojtja Civile” dhe prijësin e bandave kriminale që ndër vite kanë terrorizuar qytetarët tanë, kanë sulmuar pjesëtarët e Policisë së Kosovës dhe institucionet e Republikës së Kosovës. I njejti ka qenë edhe organizatori kryesor i sulmeve ndaj forcave të KFOR-it dhe Policisë së Kosovës në Zveçan. Gjatë arrestimit të tij, janë sulmuar zyrtarët e Policisë së Kosovës me ç’rast tre nga ta janë të lënduar lehtë”, shkruan ai.

Menjëherë, serbët lëshuan alarmin dhe ishin me qindra që u tubuan afër shkollës teknike në veri të Mitrovicës.

“Llune”, “tradhti”, Vuçiq peder”, ishin brohoritjet e tyre.

Drejtori i Zyrës për Kosovën në Qeverinë e Serbisë, Petar Petkoviq, ka deklaruar se Millun Millenkoviq-Llune – i arrestuar të martën nga Policia e Kosovës – nuk është kriminel dhe se Policia e Kosovës nuk ka prova për akuzat që rëndojnë ndaj tij.

Autoritetet kanë thënë se Millenkoviq ka qenë mbrapa sulmeve ndaj pjesëtarëve të KFOR-it në Zveçan, dy javë më parë.

Petkoviq ka thënë në një konferencë të jashtëzakonshme për media në Beograd se, kryeministri i Kosovës Albin Kurti, në vend që t’i ulë tensionet, ai po dërgon forca të reja policore në veri të Kosovës.

Petkoviq i ka bërë thirrje KFOR-it që të reagojë urgjentisht dhe që t’i largojë forcat speciale nga veriu i Kosovës./rel

Ambasada gjermane në Prishtinë tha se “nuk kemi bojkotuar” pritjen zyrtare të organizuar nga Presidenca dhe Kryeministria për Ditën e Çlirimit më 12 qershor.

Më 12 qershor ambasadorët e shteteve të QUINT-it (Shtetet e Bashkuara, Gjermania, Italia, Franca dhe Britania e Madhe) nuk janë parë në ngjarjen e organizuar nga presidentja e Kosovës, Vjosa Osmani, dhe kryeministri Albin Kurti, për shënimin e 24-vjetorit të çlirimit të Kosovës.

Kurse mediat në Kosovë kanë raportuar se ambasadorët e shteteve të QUINT-it e kanë bojkotuar këtë ngjarje.

“Ambasada gjermane ka pranuar ftesë për të marrë pjesë në këtë ngjarje dhe zyrtarisht në të është përfaqësuar nga zëvendëskreu i misionit, siç ka ndodhur në shumë raste”, thanë për Radion Evropa e Lirë nga Ambasada gjermane në Prishtinë.

Megjithatë, kjo ambasadë nuk pranoi të japë detaje se pse ambasadori gjerman në Prishtinë, Jorn Rohde, nuk mori pjesë në pritjen zyrtare.

Kjo mosmarrje pjesë e ambasadorëve të shteteve të QUINT-it në këtë ngjarje, vjen në kohën kur bashkësia ndërkombëtare po i kërkon Qeverisë së Kosovës të qetësojë situatën në veriun e banuar me shumicë serbe. Deri më tani, ekzekutivi në Kosovë nuk i ka plotësuar kërkesat e partnerëve të tij ndërkombëtarë.

Qytetarë serbë janë mbledhur në veri të Mitrovicës, pasi në mesditë u dëgjuan sirenat në atë zonë.

Sirenat më vonë u ndalën, por qytetarët Akoma po qëndrojnë të mbledhur në një pjesë të Mitrovicës Veriore.

Siç raporton medium serb “Kossev”, qytetarët janë dukshëm të pakënaqur me situatën dhe publikisht shprehin pakënaqësinë e tyre me Listën Serbe dhe brohorasin kundër presidentit serb, Aleksandër Vuciq.

Këto zhvillime ndodhën pas arrestimit të një personi, për të cilin dha detaje Ministri i Brendshëm, Xhelal Sveçla.

“Policia e Kosovës sot ka arrestuar Milun Milenkovic- Llune, një nga udhëheqësit e formacionit kriminal “Mbrojtja Civile” dhe prijësin e bandave kriminale që ndër vite kanë terrorizuar qytetarët tanë, kanë sulmuar pjesëtarët e Policisë së Kosovës dhe institucionet e Republikës së Kosovës. I njejti ka qenë edhe organizatori kryesor i sulmeve ndaj forcave të KFOR-it dhe Policisë së Kosovës në Zveçan”, njoftoi Sveçla.

Policia e Kosovës është sulmuar sot në veri të vendit. Siç shihet në pamjet e siguruara nga ATV, vetura e zyrtarëve policorë së pari është bllokuar, dhe pastaj një person ka gjuajtur me gurë në pjesën e prapme të saj duke e thyer xhamin.

Ndryshe sot në veri është arrestuar një nga organizatorët e sulmeve ndaj pjesëtarëve të KFOR-it, Milun Milenkoviq – Llune, për të cilin ministri i Punëve të Brendshme, Xhelal Sveçla, ka thënë se është një nga udhëheqësit e formacionit kriminal “Mbrojtja Civile”.

Ministri i Brendshëm theksoi se gjatë arrestimit të tij, tre zyrtarë policorë janë lënduar lehtë.