Author: ATVLive

Gjatë ditës së sotme, në Helsinki të Finlandës, bashkatdhetarët shqiptarë kanë protestuar për qasjen e gabuar të ndërkombëtarëve karshi Kosovës.

Organizatori i kësaj proteste, Albi Zogiani, në një lidhje të drejtpërdrejt në emisionin DIREKT në ATV, tregoi arsyet e organizimit të kësaj proteste, duke thënë se Bashkimi Evropian po reagon vetëm për dërgimin e njësisë speciale në veri, ndërsa sipas tij, po heshtë për arrestimin e policëve dhe kërcënimin e vazhdueshëm me luftë nga ana e Serbisë.

“Arsyeja ka qenë arrestimi i tre policëve të Republikës së Kosovës në territorin e Kosovës, provokimet e vazhdueshme të xhandarmerisë serbe të cilët nonstop po i çojnë serbët në kufi dhe po na kërcënojnë me luftë, sulmet ndaj gazetarëve që janë të vazhdueshme dhe reagimi i Bashkimit Evropian po mungon për këto gjëra. Ata po reagojnë vetëm për njësinë speciale që po e çojnë në veri, por për këto tjera gjera po sheshtin”, tha Zogiani. /atvlive.tv

Kryetari i Kuvendit të Republikës së Kosovës, Glauk Konjufca, në kuadër të vizitës zyrtare në Strasburg, ka zhvilluar takime me drejtues të Asamble​së Parlamentare të Këshillit të Evropës (APKE) dhe delegacione të ndryshme pjesëmarrëse në punimet e kësaj asambleje.

Në fillim të agjendës së tij kryetari Konjufca zhvilloi takime me Grupin Aleanca e Liberalëve dhe Demokratëve (ALDE) dhe Kryesuesin e ALDE-së për Evropën, Iulian Bulai.

Kreu i Kuvendit u prit gjithashtu në një takim të veçantë nga Presidenti i APKE-së, Tiny Kox dhe Sekretarja e Përgjithshme të APKE-së, Despina Chatzivassiliou.

Po ashtu kryetari Konjufca zhvilloi takime me Kryesuesin e Komitetit për Çështje Ligjore dhe të Drejtat e Njeriut, Damien Cottier, ministrin e Punëve të Jashtme të Letonisë, Edgars Rinkēvičs, si dhe me Delegacionin Parlamentar të Turqisë në APKE, të kryesuar nga Ahmet Yildiz.

Në këto takime u diskutua lidhur me zhvillimet aktuale në Kosovë, si dhe perspektivën euro-atlantike të Kosovës e të forcimit të subjektivitetit ndërkombëtar të saj.

Në fokus të diskutimeve ishte procesi i anëtarësimit të Kosovës në Këshill të Evropës, për të cilin kryetari Glauk Konjufca kërkoi mbështetjen e të gjithë faktorëve vendimmarrës, në mënyrë që edhe qytetarët e Kosovës të gëzojnë të drejtat që mundëson ky anëtarësim.

Kryetari Konjufca foli po ashtu për zhvillimet e fundit në Kosovë dhe hapat konkretë që vendi ka ndërmarrë në përmbushjen e kritereve për të ecur më shpejt në rrugën e integrimit euro-atlantik, i cili, siç tha kryetari Konjufca, mbetet një objektiv i fortë strategjik i Kosovës.

Në disa prej takimeve kryetari Konjufca shoqërohej nga anëtarë të delegacionit të Kuvendit në APKE, të cilët po qëndrojnë në Strasburg në kuadër të sesionit të pjesës së qershorit të kësaj asambleje.

Vizita e kryetarit Konjufca vazhdon me takime të tjera me udhëheqës të delegacioneve pjesëmarrëse dhe grupe politike të APKE-së.

Tre zyrtarët policorë të rrëmbyer nga Forcat Speciale të Serbisë, një javë më parë, të martën janë vizituar nga shefi i Zyrës Ndërlidhëse të Kosovës në Beograd, Jetish Jashari.

Pjesë nga biseda që shefi i zyrës së Kosovës në Serbi pati me policët veç e veç, me gazetarë në një konferencë për media, ndau kryeministri Albin Kurti.

“Përshkrimi se si ka ndodhur rrëmbimi është i njëjtë. Ata thonë se në momentin e rrëmbimit kanë qenë te tryeza e improvizuar, kanë qenë duke ngrënë drekë. Së bashku, kur 15 persona i kanë rrethuar, i kanë sulmuar dhe i kanë rrëmbyer. Të tre kanë qenë bashkë. Të tre e kanë rrëfimin e njëjtë, kur pyeten ndaras nga ambasadori ynë Jetish Jashari”, tha Kurti.

Zyrtarët policorë janë duke qëndruar në Qendrën e Paraburgimit në Kralevë, derisa sipas ministres së Jashtme, Donika Gërvalla, nuk janë keqtrajtuar.

“Gjatë kësaj periudhe 48-orëshe nuk janë keqtrajtuar fizikisht, por nuk u është dhënë ushqim i mjaftueshëm, pra nuk u është dhënë më shumë se një copë bukë. Ata tani janë të vendosur në dhoma të veçanta, tek e tek, dhe nuk kanë qasje as në televizion apo diçka tjetër. Z. Shemë Mustafa ka njoftuar se ende i mungojnë medikamentet bazike që i përdor rregullisht për gjendjen e tij shëndetësore dhe kjo po ia vështirëson gjendjen e tij në burg. Atyre u është thënë se do të mund të vizitohen nga familjarët e tyre të premten”, tha Gërvalla.

Pasi kryeministri Albin Kurti u njoftua për gjendjen e tre policëve kufitarë, tha së është i gatshëm ta takojë presidentin e Serbisë, Aleksandër Vuçiq.

“Unë jam i gatshëm dhe i interesuar që të shkoj në takimin e radhës në Bruksel, në mënyrë që të paraqes hollësisht të gjitha këto të dhëna që i morëm dhe ta kuptojnë që deeskalimi të cilin po e kërkojnë të gjithë, nënkupton lirimin e menjëhershëm dhe të pakusht të tre policëve dhe dënimin e agresionit të Serbisë në Kosovë”, tha Kurti.

Po të njëjtën ditë, është raportuar se shefi i Zyrës Ndërlidhëse të Serbisë, Dejan Pavicevic, ka vizituar serbët e arrestuar së fundi nga autoritetet e Kosovës. Të pyetur nëse vizita e Jetish Jasharit në Kralevë është kushtëzuar me vizitën e Dejan Paviçeviq, Kurti e Gërvalla e mohuan një gjë të tillë.

Shemë Mustafa, Beqir Sefa dhe Rifat Zeka u rrëmbyen më 14 qershor në pjesën veriore në kufirin me Serbinë. /atvlive.tv

Edicionin Qendror të lajmeve në ATV e gjeni në videon më poshtë:

Kryetari i Shoqatës “Konsumatori”, Selatin Kaçaniku, në një intervistë dhënë në emisionin DIREKT në ATV, tha se pas zhvillimeve të fundit në vend, tensionit në veri dhe bllokimi i kamionëve, do të ndikojë në rritjen e çmimeve.

Ai tha se Qeveria nuk duhet të merret me poletizime, por duhet të merret me politika.

“Politika e parë dhe më e thjeshtë që është obligim mandatar i Qeverisë është që ta njoh qytetarin konsumator edhe në formatin e konsumatorit si komponent kryesor socio-ekonimik, por edhe si taksapagues dhe gjenerues kryesor të buxhetit. I ka dy obligime Qeveria, pastaj shohim për të tjerat. Asnjërën prej këtyre dyja, asnjë qeveri, e as kjo e fundit nuk e ka përmbushë dhe natyrisht se ne ndjehemi edhe të frikësuar edhe të indinjuar. Pra, e dyta do të ishte që të na konsultojë. E treta do të ishte që t’i përmbushë premtimet që nga Qeveritë e më hershme që shumicën e prodhimeve të importit t’i zëvendësojë me prodhime vendore duke aplikuar politika stimuluese, përkrahëse që japin vetëbesim te çdo qytetar që ka dell afarist”, tha Kaçaniku. /atvlive.tv

Zëvendëskryeministri i parë në Maqedoninë e Veriut, Artan Grubi ka bërë të ditur se për një vit e gjysmë përpara përfundimit të mandatit në qeveri kanë plotësuar premtimin e tyre zgjedhor për 600 euro pagë mesatare.

Sipas Grubit, paga mesatare neto në muajin prill ka arritur vlerën prej 36.134 denarë dhe është rritur për 14,6 për qind në krahasim me të njëjtin muaj në vitin e kaluar.

“Paga mesatare neto në muajin prill ka arritur vlerën prej 36.134 denarë dhe është rritur për 14,6 për qind në krahasim me të njëjtin muaj në vitin e kaluar. Qeveria mbetet e përkushtuar për të përmirësuar në vazhdimësi standardin jetësor të qytetarëve përmes aplikimit të metodologjisë efikase për rritje të vazhdueshme dhe të qëndrueshme të pagave”, ka shkruar Grupi në Facebook.