Author: ATVLive

Mbi 23 mijë e 600 nxënës do t’i nënshtrohen sot pjesës së parë të testit të arritshmërisë.

Me këtë rast, ministrja e Arsimit, Arbërie Ngagavci u ka uruar suksese nxënësve. Ndërkohë që ka dhënë detaje lidhur me testimin.

“Në ditën e parë të këtij testi, 23 632 nxënës do të vlerësohen për arritjet, njohuritë, shkathtësitë dhe aftësitë e fituara gjatë shkollimit të tyre. Testi do të mbahet në 176 qendra të testimit ku në këtë pjesë, nxënësit do t’i nënshtrohen testit në lëndët Gjuhë Amtare, Gjuhë Angleze, Histori dhe Gjeografi. Pres respektim të rregullave në mënyrë që të kemi rezultate reale”, ka shkruar ajo.

Ndryshe, pjesa e dytë e testit të arritshmërisë do të mbahet më 11 korrik, në lëndët Matematikë, Informatikë, Fizikë, Kimi dhe Biologji.

Kryetari i Aleancës për Ardhmërinë e Kosovës, Ramush Haradinaj, ka uruar Shtetet e Bashkuara të Amerikës me rastin e Ditës së Pavarësisë.

Haradinaj, në urimin e tij ka publikuar një fotografi të selisë qendrore të AAK-së, me flamurin amerikan i vendosur në ballë të saj. Ndër të tjera, Haradinaj theksoi se do të ishte nder për Kosovën që 4 korriku, Dita e Pavarësisë së Amerikës të shpallet festë shtetërore.

Urimi i plotë i Haradinajt:

Amerikë, urime ditëlindjen! Je gjithmonë inspirim për ne. Do të ishte në nderin e Kosovës që 4 Korriku të shpallet festë shtetërore.

Kryeministrat e Holandës dhe Luksemburgut i kërkuan të hënën Serbisë dhe Kosovës të veprojnë për të ulur tensionet që tentojnë ta shtyjnë Ballkanin drejt destabilimit, në një kohë kur Evropa përballet me agresionin e Rusisë në Ukrainë, thanë kryeministri hollandez Mark Rutte dhe homologu i tij nga Luksemburgu, Xavier Bettel, të hënën, më 3.07., pas një takimi me presidentin e Serbisë, Aleksandar Vuçiç, në Beograd.

Rutte dhe Bettel udhëtojnë të martën në Kosovë për takime me zyrtarët e lartë të atjeshëm. “Ne nuk mund të theksojmë sa e rëndësishme është që Serbia dhe Kosova ndërmarrin hapa drejt de-përshkallëzimit dhe përfundimisht normalizimit të marrëdhënieve të tyre nëpërmjet dialogut të udhëhequr nga BE,” tha Rutte.

“Kjo është vendimtare për vetë dy vendet, së pari dhe para së gjithash, por edhe për të gjithë rajonin dhe Evropën në tërësi,” shtoi ai. “Me një luftë të tërbuar midis Rusisë dhe Ukrainës në kontinentin tonë, është më e rëndësishme se kurrë që të veprojmë së bashku.”

Presioni ndaj palëve

SHBA dhe BE po i bëjnë presion Serbisë dhe Kosovës që të ndërmarrin hapa për uljen e tensioneve. Normalizimi i marrëdhënieve është kushti kyç për të dy vendet për të ecur përpara në përpjekjet e tyre për t’u bashkuar me BE. Edhe kryeministri i Luksemburgut Bettel u bëri thirrje të dy palëve të veprojnë. “Fjalët janë të mira, veprimet janë më të mira,” tha ai. “Dhe ne duhet të avancojnë në këto tema, edhe për të treguar se ekziston një vullnet për ulje tensionesh”.

Vuçiç shprehu shpresën se vizita e dy kryeministrave në Serbi dhe Kosovë do të ndihmojë: “Unë premtova se Serbia do të bëjë gjithçka që mundet për të ruajtur paqen dhe stabilitetin,” tha ai.

Në fund të javës krerët e shteteve të BE-së e kishin kërcënuar Kosovën dhe Serbinë me masa ndëshkuese nëse ato nuk bëjnë përpjekje për shtensionim. Kancelari gjerman Olaf Scholz, një javë më parë pat thënë se falë angazhimit të shumë vendeve shpreson se të dyja palët do të bien dakord për marrëdhënie të mira fqinjësore.

Anëtarët e NATO-s pritet të bien dakord sot për të zgjatur mandatin e Sekretarit të Përgjithshëm Jens Stoltenberg për një vit tjetër, sipas katër diplomatëve të intervistuar nga Reuters.

Vendimi është sinjalizuar gjerësisht në javët e fundit, por ambasadorët në NATO pritet të miratojnë zyrtarisht zgjatjen gjatë një takimi të martën, thanë diplomatët, të cilët folën të hënën në kushte anonimiteti.

Stoltenberg, 64 vjeç, është një ish-kryeministër i Norvegjisë. Ai do të përfundonte mandatin e tij si civili kryesor në aleancën transatlantike të sigurisë në fund të shtatorit, por tani ka të ngjarë të qëndrojë për 12 muaj të tjerë.

Përfaqësues të partive opozitare në Kosovë thonë se duhet të gjejnë mënyra për t’iu kundërvënë politikave të kryeministrit të Kosovës, Albin Kurti, të cilat, sipas tyre, po e izolojnë vendin.

Ata pranojnë se për rrëzimin eventual të Qeverisë me mocion mosbesimi, tash për tash, nuk kanë vota.

Komentet vijnë në kohën kur Qeveria e Kosovës po përballet me trysninë e bashkësisë ndërkombëtare për të shtensionuar situatën në veri të vendit.

Në këtë zonë të banuar me shumicë serbe, tensionet janë të larta qysh në fund të majit, kur kryetarët shqiptarë të komunave kanë hyrë në zyrat e tyre, përkundër rezistencës së banorëve lokalë serbë.

Protestat e tyre kanë kulmuar edhe në përleshje të dhunshme, me dhjetëra të plagosur – në mesin e të cilëve edhe ushtarë të misionit të NATO-s, KFOR.

Bashkimi Evropian, ashtu si edhe Shtetet e Bashkuara, kanë ndërmarrë tashmë masa ndëshkuese për Kosovën – përfshirë pezullim fondesh, stërvitjesh ushtarake dhe takimesh të nivelit të lartë – për shkak të, siç është thënë, mospërfilljes së kërkesave të tyre për shtensionomin e situatës.

Sipas disa përfaqësuesve opozitarë, këto masa e izolojnë Kosovën

“Të merremi vesh me pushtetin ose ta rrëzojmë Qeverinë”

Xhavit Haliti, deputet i Partisë Demokratike të Kosovës në opozitë, thotë për Radion Evropa e Lirë se ndikimi i partive opozitare te Qeveria, për të gjetur një shtegdalje nga situata e krijuar, është tejet i vogël.

Sipas tij, këtë e pengojnë në masë të madhe “inatet” mes kryeministri Kurti dhe figurave të caktuara opozitare, në lidhje me, siç pretendon, gabimet e njëri-tjetrit.

Haliti thotë se opozita dhe pushteti duhet ta gjejnë mënyrën e “bisedimit të sinqertë për të ardhmen e vendit”.

“Tani, në variantin tjetër të idesë që të rrëzohet Qeveria, kuptohet që opozita nuk i ka numrat. Mesa kam parë, opozita nuk është e interesuar që të fillojë ndonjë lëvizje me protesta dhe me çështje të tjera, për t’iu kundërvënë politikave të Qeverisë. Kështu që, rruga e vetme është që të merremi vesh [me pushtetin]. Nëse jo, atëherë varianti tjetër është që të na ndihmojnë të tjerët për t’i bërë numrat [e votave], që të bjerë Qeveria”, thotë Haliti.

Megjithatë, shton ai, rrëzimi i Qeverisë së Kurtit nuk është zgjidhje në këtë moment, sepse krijimi i institucioneve të reja, pastaj, do të marrë tre-katër muaj kohë.

Aktualisht, Lëvizja Vetëvendosje e Kurtit ka 56 deputetë në Kuvendin e Kosovës me gjithsej 120 ulëse.

“Opozita t’i bashkohet nismës së LDK-së”

Kryetari i Lidhjes Demokratike të Kosovës në opozitë, Lumir Abdixhiku, paralajmëroi “idenë e nisjes së artikulimit të një mendimi të përbashkët”, për t’iu kundërvënë “politikave përplasëse të Qeverisë së Kosovës me aleatët historikë”.

Siç tha vetë Abdixhiku, në takime do të ftohen përfaqësues të shoqërisë nga të gjitha fushat, përfshirë edhe partitë politike, për t’i njoftuar dhe biseduar me ta për “planin e LDK-së për kapërcimin e izolimit dhe krizës’.

Nënkryetari i LDK-së, Lutfi Haziri, thotë për Radion Evropa e Lirë se kjo iniciativë ka për qëllim të dëshmojë se populli i Kosovës është dhe do të mbetet pro-evropian dhe pro-amerikan, pavarësisht se Qeveria e tij “po i dëmton raportet me partnerët perëndimorë”.

“Ne besojmë shumë që, në këtë rrafsh, opozita duhet t’i bashkohet kësaj iniciative të kryetarit të LDK-së dhe të vazhdojmë bashkë të ecim në këtë drejtim”, thotë Haziri.

Haziri, po ashtu, shfaq dyshime për suksesin e një mocioni eventual të mosbesimit ndaj Qeverisë.

“E pamundur të bëjmë më shumë”

Ramush Haradinaj, kryetar i partisë tjetër opozitare, Aleancës për Ardhmërinë e Kosovës, doli me idenë e mocionit të mosbesimit qysh në fillim të qershorit, duke e cilësuar atë si “zgjidhje të duhur”.

Qëndrim të ngjashëm shprehu edhe më 2 korrik, duke thënë se “mocioni për shkarkimin e Albin Kurtit sot është interes kombëtar”. Ai e ftoi opozitën, por edhe deputetët e pushtetit që t’i bashkohen.

Time Kadrijaj, deputete e Aleancës për Ardhmërinë e Kosovës, thotë se opozita është e vetëdijshme se pa ndihmën e deputetëve nga pushteti, mocioni i mosbesimit ndaj Qeverisë së Kurtit nuk mund të jetë i suksesshëm.

“Mund të organizojmë debate, mund të organizojmë tryeza, një front opozitar… Ndoshta janë alternativë edhe protestat, por ende nuk ka ndonjë përcaktim të tillë. Opozita nuk ka heshtur, por e keqja është se kjo Qeveri i ka votat në Kuvendin e Kosovës dhe, përderisa i ka votat, është e pamundur të bëjmë diçka”, thotë Kadrijaj për Radion Evropa e Lirë.

Maliqi: Opozita në grackë politike

Njohësi i proceseve politike në Kosovë, Agon Maliqi, thotë se partitë opozitare ndodhen në situatë të vështirë, sepse konteksti politik është “grackë politike” edhe për to.

“Kjo veçanërisht është problematike, në rast se vazhdojnë thirrjet për rrëzimin e Qeverisë. Për shkak të numrave [të votave], nëse shikohet matematika, do të jenë të nevojshme edhe votat e Listës Serbe [partisë më të madhe të serbëve të Kosovës]. Në këtë kontekst, opozita është në dilemë të madhe dhe në një situatë të rrëshqitshme në aspektin politik”, thotë Maliqi për Radion Evropa e Lirë.

Megjithatë, ai vlerëson se opozita, për çdo eventualitet, duhet të përgatitet për zgjedhje të parakohshme, në rast se Qeveria mendon se ka nevojë për mandat të ri – qoftë për kursin e saj ekzistues, qoftë për një kurs që çon drejt kompromiseve.

Në një situatë të tillë, shton Maliqi, opozita duhet të jetë gati dhe të shkojë në zgjedhje me platformë të përbashkët për mandat teknik dhe me kandidat të përbashkët për kryeministër.

“Mendoj se [opozita] është e pafuqishme me numrat që i ka. Është e pafuqishme për shkak të dominimit dhe hegjemonisë që e ka kryeministri Kurti në opinionin publik, veçanërisht rreth temës së veriut dhe negociatave. Por, mendoj se nuk është krejtësisht e pafuqishme nëse punon bashkë dhe bashkëpunon edhe me elemente që mund të jenë të pakënaqura brenda shumicës ekzistuese. Në atë kontekst, opozita ka hapësirë manovruese për të diktuar rrjedhën e zhvillimeve”, thotë Maliqi.

Kurti i cilësoi si “të padrejta” masat ndëshkuese të komunitetit ndërkombëtar për Kosovën.

BE-ja dhe SHBA-ja kërkojnë prej tij që t’i tërheqë kryetarët shqiptarë nga objektet komunale në veri dhe të organizojë zgjedhje të reja. Nga Serbia, ndërkaq, kërkojnë të sigurojë pjesëmarrjen e serbëve në zgjedhjet eventuale.

Deri më tash, nuk ka asnjë hap drejt përmbushjes së këtyre kërkesave.

Kurti këmbëngul se nuk mund të bëjë kompromise me kushtetutshmërinë e vendit.

Sipas tij, zgjedhjet e 23 prillit, nga të cilat kanë dalë kryetarët shqiptarë, por të cilat janë bojkotuar nga komuniteti serb, kanë qenë të ligjshme.

Ish-komandanti i UÇK’së për Zonën Operative të Llapit, Rrustem Mustafa – Remi, i është dalë në përkrahje kryeministrit të Kosovës, Albin Kurti.

Sipas tij, Kurti “i duhet mbështetja jonë dhe duhet mbështetur”. Reagimi i tij vjen pasi BE-ja ka marrë disa masa ekonomike dhe politike ndaj KOsovës, pas zhvillimeve në veri të vendit.

“Kryeministrit të Qeverisë të Republikës së Kosovës i duhet mbështetja jonë, dhe duhet mbështetur! E kaluara jonë është dëshmitare që ne gjithnjë jemi bashkuar në kohë të vështira dhe si të tillë kemi dalë fitimtarë. Kryeministri Kurti duhet të mbështetet maksimalisht në këto kohë krizash, gjithandej. Jemi një popull i vogël, por gjithnjë zemër mëdhenj në përballje me rreziqet. Gjithmonë kemi synuar paqen, por nuk ju kemi frikësuar as luftërave”, shkroi ai në Facebook.

Megjithatë, Remi pati disa fjalë edhe për partitë opozitare, të cilat po kërkojnë zgjedhje të reja dhe shkarkimin e Kurtit nga pozita e kryeministrit.

Mustafa u shpreh se opozita nuk është e koordinuar dhe “nuk ka ndonjë rrugëdalje për të tejkaluar situatën e krijuar”.

Mirëpo, ai u shpreh se Kurti është në rrugë të drejtë për ta shtrirë pushtetin në tërë territorin e Kosovës.

“Një gjë jam i sigurtë, se pavërsisht se çfarë opinioni prodhojnë mediat, analistët apo edhe opozita, Kryeministri Kurti është në rrugë të drejtë në synimin e tij për të shtrirë pushtetin në tërë territorin e Kosovës. Në veriun e vendit tonë, deri tani kishte gjithçka, por mungonte substancialisht rendi dhe ligji. Cilësimi i dy organizatave ilegale të veriut si terroriste nga ana e Qeverisë së Republikës së Kosovës nuk besoj të jetë bërë pa konsulta me aleatët dhe miqtë tonë”, tha ai.

“Kam miq të huaj gjithandej, e në veçanti nga SHBA që punojnë e veprojnë në Kosovë që nga viti 1996 e deri më sot. Ata ende vazhdojnë të përkrahin e mbështesin Kosovën si më parë, dhe këtë e konfirmojnë gjatë bisedave që zhvilloj me ta rregullisht. Përpjekja e Qeverisë për të vënë rend dhe drejtësi në gjithë vendin do ta ketë përkrahjen nga unë në çdo kohë, strategjia për shtrirjen e sovranitetit nga qeveria dotë ketë suksesë në ruajtjen rendit dhe ligjit, analistet dhe mediat që po gozhdojnë pandershëm misionin për rend dhe ligj do të perfundojne pandershëm”, shtoi ai.

“Që të gjithë, pa dallim dhe pa përjashtim përkrahin vendimet e institucioneve të vendit tonë, dhe mbështesin fuqishëm përpjekjet e aparatit shtetëror në vendosjen e sundimit të ligjit në secilin cep të Kosovës, duke përfshirë veriun. Politika kosovare pa dallim duhet të jetë unike përballë këtyre stuhive, sepse vetëm kështu rezulton fitimtare. Jam i sigurt se po na presin kohë të mira, ne jemi në rrugën e drejtë, kemi kapacitetet dhe mundësitë që të bëjmë më të mirën për Kosovën dhe për regjionin në përgjithësi”.

Ish-presidenti i Shteteve të Bashkuara të Amerikës, Bill Clinton në fjalimin e tij para kryeministrisë, ndër të tjera ka treguar një ngjarje që i ka lënë shenjë dhe e ka emocionuar.

Clinton tha se taksa ndodhej në një restorant në SHBA së bashku me 12 persona të tjera, kamarieri që erdhi për të marrë porosinë, pasi pa kush ishte, uli tabakanë dhe iu ul në gjunë duke i thënë “falë teje familja ime është gjallë”.

Ai tha se menjëherë e kuptoi që ishte shqiptar i Kosovës.

“Pasi kam lënë Shtëpinë e Bardhë me kanë ndodhur dy gjëra. Isha në një restorant, kamarieri erdhi të merrte porosinë, pa kush ishte, hoqi tabakë dhe mu ul në gjunjë dhe më tha, “falë teje familja ime është gjallë”. Ata që ishin me mua nuk e kuptuan, unë i thash është shqiptar nga Kosova” tha Clinton. /abcnews.al.