Author: ATVLive

Në Blagoevgrad u mbajt një ceremoni zyrtare për dërgimin e një kontingjenti të Komandës së Brigadës së Tretë, e cila do të merr pjesë në Forcën Rezervë Operacionale të Forcës Stabilizuese të NATO-s në Kosovë.

Priftërinjtë shërbyen me lutje solemne për shëndet dhe kthim të suksesshëm nga misioni, ndërsa fjalimet u mbajtën nga kryetari i komunës së Blagoevgradit Metodi Bajkushev dhe guvernatori i rajonit të Blagoevgradit, Georgi Dinev, transmeton KP.

Ushtria bullgare kontribuon në sigurinë dhe stabilitetin e Ballkanit Perëndimor, tha gjatë ceremonisë shefi i mbrojtjes admirali Emil Eftimov.

Ai vuri në dukje se 120 persona do të dërgohen nga Komanda e Brigadës së Tretë të Blagoevgradit në zonën e misionit për të paktën tre muaj.

“Jam i kënaqur me përgatitjen dhe gatishmërinë. Urdhri ka ardhur të premten, të mërkurën tashmë po i dërgojmë, që do të thotë se certifikatat që kanë kaluar më herët dhe gatishmëria që e ruajnë kanë qenë në nivelin e duhur dhe ne mund të reagojmë brenda afateve të përcaktuara”, ka theksuar Eftimov.

Ai falënderoi zëvendëskomandantin e Forcave Tokësore dhe Komandantin e Komandës së Brigadës së Tretë në Blagoevgrad.

“Është hera e parë që marr pjesë në një mision të tillë, nuk kam asnjë shqetësim, ndihem mirë e përgatitur dhe e motivuar”, tha Anelia Petrova nga Komanda e Brigadës së Tretë.

Ceremonia u mbyll me një marshim të personelit ushtarak, raporton BTA

Komisioni Qeveritar për Personat e Zhdukur beson se emisari i Bashkimit Evropian për dialogun Kosovë-Serbi, Peter Sorensen, do ta trajtojë me seriozitet çështjen e personave të zhdukur si dhe do ta shtyjë përpara zbatimin e Deklaratës së përbashkët për personat e zhdukur.

Kështu thotë kryesuesi i këtij komisioni, Andin Hoti i cili gjatë ditës së djeshme ka takuar emisarin Sorensen, gjatë vizitës së këtij të fundit në Kosovë.

Hoti tha se nga diplomati danez i është premtuar se shumë shpejt do të zhvillohet takimi i Komisionit të përbashkët në mes delegacionit të Kosovës dhe atij Serbisë, takim ky i cili dështoi të mbahet në janar.

“Takimi ka qenë konstruktiv, mund të them se Sorensen ka premtuar se do të merret seriozisht me çështjen e personave të zhdukur e në veçanti me zbatimin e Deklaratës për Persona të Zhdukur e cila është në fushë të BE-së edhe po ashtu edhe me fillimin e takimeve gjë që nuk ka ndodhur deri tash për shkak të refuzimit të Serbisë, të Komisionit të Përbashkët, që është paraparë të mbahet më 15 janar. Sipas zotëri Sorensen pritet që shumë shpejt, që sapo të kthehet në Bruksel do të caktojë datën se kur do të mbahet takimi i radhës i Komisionit të përbashkët. Nuk di nëse do të jetë takim brenda këtij muaji, por unë besoj që do të jetë shumë shpejt”, u shpreh ai.

“Pak më mirë se që ishte, do të jetë“, tha Hoti kur u pyet se cilat janë pritshmëritë e tij pas takimit me emisarin evropian.

Ndërsa, qasja e plotë në arkivat serbe, qasja në lokacione e Serbisë e veçanërisht në Batajnicë, ishin disa nga kërkesat që kryesuesi i Komisionit Qeveritar për Personat e Zhdukur ia kishte shtruar në takim përfaqësuesit të Bashkimit Evropian për dialogun Kosovë-Serbi.

“Kjo është përshtypja ime, se ai do të merret seriozisht me këtë çështje. Nuk dua t’ua ngris asnjë lloj shprese familjarëve, se kjo varet prej takimeve të radhës, prej qëndrimeve të Bashkimit Evropian, por varet edhe prej Serbisë. Por, unë besoj që pak më mirë se ishte, do të jetë. Është e vërtetë që ne kemi dy dokumente të rëndësishme të realizuara në kohën kur ka qenë zotëri Lajçak në pozitën e këtij tash, por të dyja dokumentet nuk kanë prodhuar ndonjë rezultat, gjetje të personave të zhdukur. Dhe të dyja dokumentet nuk kanë arritur ta bindin Serbinë, pavarësisht që ajo vetë i ka pranuar se duhet të zbatohen. Po mendoj se Sorensen, me aq sa diskutuam dje do ta shtyjë këtë agjendë përpara zbatimin e plotë të Deklaratës për personat e zhdukur, qasjen e plotë në arkiva, qasjen e plotë në lokacione në territorin e Serbisë dhe në veçanti e ceka Batajnicën sepse kemi shumë interes të rikthehemi në Batajnicë”, theksoi ai.

Hoti për KosovaPress deklaron se takimi i tij me Sorensenin është përgjigja e përfaqësueses së Lartë për Punët e Jashtme të BE-së, Kaja Kallas karshi letrës që Hoti ia kishte dërguar javë më parë.

“Unë mendoj se zotëri Lajçak, Komisionin e Përbashkët që e kemi themeluar bashkë ai dhe të tjerët e ka lexuar ndryshe, e ka interpretuar ndryshe, Komisioni i Përbashkët e ka një fuqi shumë të madhe sepse udhëhiqet nga BE-ja dhe ka qenë një tendencë e vogël që t’i ulët, zbritet vlera që e ka. Mendoj se takimi im me zotëri Sorensen është përgjigje e zonjës Kallas. Duhet të thekosjmë se zotëri Lajçak, pavarësisht bashkëpunimit në Bruksel ose takime të ndryshme, ka qenë disa herë në Kosovë gjatë 4 viteve të fundit dhe asnjëherë nuk është takuar me Komisionin Qeveritar për Personat e Zhdukur. Dhe mendoj se takimi i parë i zotëri Sorensen në Kosovë krahas liderëve të vendit me Komisionin Qeveritar për Personat e Zhdukur e tregon rëndësinë e vetë dhe përgjigjen e zonjës Kallas”, tha ai.

Në Kosovë vazhdojnë të jenë të pagjetur 1.600 persona të zhdukur me dhunë nga forcat serbe gjatë luftës së fundit.

Emisari i BE-së për dialogun Kosovë-Serbi, Peter Sorensen ka marrë detyrën në shkurt të vitit 2025, duke pasuar ish-emisarin e BE-së për dialog, Mirosalv Lajçak.

Në kuadër vizitës së tij të parë në Kosovë, emisari evropian u takua edhe me krerët shtetëror dhe liderët e partive opozitare.

Ai vizitoi edhe Institutin e Mjekësisë Ligjore prej ku tha se zbardhja e fatit të personave të zhdukur është prioritet ne dialogun që ai do ta udhëheqë./kp

Thesari i Kosovës ka implementuar projektin për Regjistrimin dhe Përcjelljen e Faturave, me qëllim të rritjes së transparencës financiare dhe llogaridhënies në menaxhimin e financave publike.

Në një njoftim të Ministrisë së Financave, Punës dhe Transfereve thuhet se nga data 4 mars 2025, operatorët ekonomikë mund të ndjekin procesin e faturës së tyre nga momenti i dorëzimit tek institucionet përkatëse deri në finalizimin e pagesës nga Thesari i Kosovës.

Ministria u bën thirrje të gjithë operatorëve ekonomikë që në momentin e dorëzimit të faturës për pagesë në organizata buxhetore, të kërkojnë nga organizata buxhetore konfirmimin e dorëzimit të faturës, i cili gjenerohet nga SIMFK-ja pas regjistrimit të faturës dhe u shërben për të ndjekur statusin e pagesës, transmeton KosovaPress.

Bisedimet për armëpushim në luftën Rusi-Ukrainë do të vazhdojnë të dielën në Jeddah, tha i dërguari i posaçëm i Trump, Steve Witkoff.

Presidenti i Ukrainës, Volodymyr Zelensky, njoftoi se do të bisedojë sot me homologun e tij amerikan Donald Trump, gjatë një konference të përbashkët për shtyp me presidentin finlandez Alexander Stubb në Helsinki.

Pas një telefonate mes Trump dhe Putinit, ai deklaroi se Rusia ka rënë dakord për ndalimin e sulmeve ndaj infrastrukturës energjetike dhe objektivave në Detin e Zi, ndërsa Ukraina ende nuk e ka pranuar marrëveshjen.

Ndërkohë, forcat ruse sulmuan Ukrainën me raketa Iskander-M, S-300 dhe 145 dronë, shkruan ANSA.

Trump mohoi të ketë diskutuar për ndihmën ushtarake për Ukrainën, ndryshe nga pretendimet e Kremlinit. Presidenti Zelensky njoftoi se “do të bisedojë me Trump sot”, ndërsa shefja e diplomacisë së BE-së, Kaja Kallas, theksoi se ndalimi i ndihmës ushtarake do të favorizonte Rusinë.

Kremlini akuzoi Kievin për mungesë reciprociteti në ndalimin e sulmeve ndaj infrastrukturës energjetike dhe kritikoi Ukrainën për refuzimin e marrëveshjes. Liderët e BE-së, Ursula von der Leyen dhe Antonio Costa, theksuan se paqja duhet të jetë e drejtë dhe e qëndrueshme, duke konfirmuar mbështetjen për Ukrainën, transmeton KosovaPress.

Të enjten pritet të bëhet varrimi i 59 viktimave që humbën jetën nga tragjedia e 16 marsit në klubin “Pulse” në Koçan.

Lamtumira e fundit to t’u jepet viktimave në vendet e tyre të lindjes, por shumica janë nga Koçani.

Ministri i Shëndetësisë Arben Taravari, njoftoi se transportimi i trupave të pajetë do të bëhet në koordinim me familjet, nëse duan t’i transportojnë privatisht apo me organizim të shtetit.

“Unë kam informatë se në mjekësinë ligjore kanë mbaruar të gjitha autopsitë dhe besoj se në mënyrë si kanë kërkuar familjet e atyre që kanë të vdekur nga ky rast, privat apo do të ketë organizim prej shtetit në bazë të koordinimit me ato, ashtu do të veprojmë”, tha Arben Taravari – Ministër i Shëndetësisë.

Në Koçan tashmë janë hapur varret. Nga Kisha Ortodokse Maqedonase, për Alsat njoftuan se varrimi pritet të bëhet në mesditë.

Në mesditë në Shkup, përkatësisht në Lisiçe dhe Butel pritet të bëhet varrimi edhe i një pjese të anëtarëve të grupit muzikor DNK, të cilët ishin në mesin e 59 viktimave.

Ceremoni varrimi nesër do të bëhen në Koçan, Shtip, Vinicë, Zërnoc, Makedonska Kamenicë, Çeshinovë- Obleshevë, Probishtip dhe në Shkup. Varrimi pritet të bëhet me nderimet më të larta shtetërore./ Alsat.mk

Një sulm i armatosur ka ndodhur të martën në një qendër shitjeje të automjeteve Tesla në qytetin e Las Vegasit, duke lënë disa automjete të dëmtuara, ndër të cilat të paktën dy kanë shpërthyer në flakë. Autoritetet besojnë se autori i veshur me të zeza, përdori koktej molotov dhe armë zjarri për të realizuar sulmin rreth orës 2:45 të mëngjesit, sipas kohës lokale.

Ndihmëssherifi Dori Koren nga Departamenti i Policisë Metropolitane të Las Vegasit (LVMPD) tha në një konferencë për shtyp se të paktën pesë automjete Tesla u dëmtuan gjatë “të paktën tre raundeve” të të shtënave.

Ai gjithashtu shtoi se fjala “rezisto” ishte shkruar me spërkatës në dyert e përparme të objektit të biznesit. Gjatë hetimit, një koktej molotovi i pandezur u gjet në një nga automjetet e dëmtuara.

Koren e përshkroi këtë incident si një “sulm të shënjestruar”, por shtoi se autoritetet besojnë se ishte një rast i izoluar dhe nuk ka ndonjë kërcënim të mëtejshëm për publikun e gjerë.

Ai theksoi se si masë paraprake, është rritur prania e policisë në lokacionet e ndryshme të Teslas.

Shefi Ekzekutiv i Tesla-s, Elon Musk, e ka dënuar ashpër sulmin, duke e cilësuar atë “të çmendur dhe thellësisht të gabuar”.

Musk shtoi se Tesla, si prodhues i automjeteve elektrike, “nuk ka bërë asgjë për t’i merituar këto sulme të liga”.

Ky sulm është pjesë e një vale sulmesh që kanë synuar objektet e Teslas, të cilat janë nxitur nga reagimet kundër aktiviteteve politike të Musk, përfshirë rolin e tij në Departamentin e Efikasitetit të Qeverisë (DOGE) nën administratën e ish-presidentit Trump.

Në reagim, Presidenti Donald Trump ka premtuar të etiketojë dhunën e tillë si terrorizëm të brendshëm dhe ka kërcënuar autorët me pasoja të rënda.

Për më tepër, javën e kaluar, Prokurorja e Përgjithshme Pam Bondi lëshoi një paralajmërim për vandalët që mund të synojnë Tesla-n, duke thënë: “Nëse do të prekni ndonjë Tesla, shkoni në një pikë shitjeje, bëni ndonjë gjë, më mirë kini kujdes sepse ne po ju ndjekim”.

Prokuroria Speciale e Republikës së Kosovës ka ngritur aktakuzë ndaj një shqiptari me inicialet M.I, për shkak të dyshimit të bazuar mirë se ka kryer veprën penale: “Krim i luftës kundër popullsisë civile”, raporton KosovaPress.

Hetimet kanë vërtetuar se i pandehuri, gjatë periudhës 1998-1999 në fshatin Osek Hylë të Komunës së Gjakovës, duke vepruar në bashkëkryerje me pjesëtarë të forcave policore serbe, ka kryer vrasje, dhunime, arrestime dhe keqtrajtime ndaj popullsisë civile shqiptare që nuk ishin të përfshirë në luftë.

“Prokuroria ka propozuar mbajtjen e gjykimit në mungesë, konform dispozitave të KPPK-së, për shkak se i pandehuri gjendet në arrati. Prokuroria Speciale mbetet e përkushtuar në ndjekjen dhe sjelljen para drejtësisë të të gjithë personave përgjegjës për krimet e luftës në Kosovë”, thuhet në njoftim të prokurorisë.

Një delegacion i madh i Partisë Demokratike të Kosovës sot ka vizituar familjen Thaçi për t`i shprehur ngushëllimin për ndarjen nga jeta të Haxhi Thaçit, babait të ish-presidentit Hashim Thaçi.

Në këtë vizitë, kryetari i PDK-së, Memli Krasniqi, ka qenë i shoqëruar nga qindra zyrtarë të lartë të partisë, anëtarë të Kryesisë, deputetë, kryetarë komunash dhe aktivistë të partisë.

Në njoftimin për media të PDK-së është thënë se përfaqësuesit e PDK-së shprehën dhembjen dhe solidaritetin e tyre me familjen Thaçi.

“Në këtë vizitë ngushëllimi, përfaqësuesit e PDK-së shprehën dhembjen dhe solidaritetin e tyre me familjen Thaçi, duke kujtuar figurën e Haxhi Thaçit si një njeri të urtë dhe të përkushtuar për familjen dhe atdheun. Kryetari Memli Krasniqi vlerësoi kontributin dhe vlerat e larta njerëzore të Haxhi Thaçit, duke theksuar se ai do të kujtohet gjithmonë me respekt e mirënjohje. PDK qëndron pranë familjes Thaçi në këtë kohë zie”, është thënë në njoftimin e PDK-së.

Komisioni Qendror i Zgjedhjeve pezulloi dy partitë politike, Partia Republikane për Ndryshime dhe Shpresa Demokrate, raporton Ekonomia Online.

Këto dy parti politike, sipas njoftimit nga KQZ, u pezulluan pasi deri më 1 mars nuk dorëzuan raportin financiar të vitit 2024.

Afati i fundit për dorëzimin e këtij raporti ishte 1 marsi, por partitë politike nuk i dorëzuan në KQZ as pas 15 ditësh afat shtesë.

Me vendimin për pezullim, këtyre partive u është dhënë edhe një afat shtesë prej 15 ditësh për dorëzimin e raportit të tyre dhe nëse kjo nuk ndodhë, vendimi i radhës i KQZ-së pritet të jetë çregjistrimi i këtyre partive politike.