Një grua ka raportuar se është dhunuar seksualisht përmes kanosjes dhe shantazhit.
Rastin e ka bërë të ditur Policia e Kosovës, përmes raportit 24-orësh.
Po aty thuhet se pas veprimeve të njëjta policore, të martën është arrestuar i dyshuari dhe se i njëjti është dërguar në mbajtje.
“Kaçanik Shkurt-Maj 2023. Viktima femër kosovare ka raportuar se, nga i dyshuari mashkull kosovar përmes kanosjes dhe shantazhit është dhunuar seksualisht gjatë periudhës së cekur kohore”, thuhet në raport.
Kryeministri i Albin Kurti deklaroi sot se e ka lutur faktorin ndërkombëtar që të mos përsëritet 23 prilli. Ai shtoi se të njëjtit i kishin premtuar që nëse pranohet aneksi i zbatimit në Ohër dhe zgjatja e afatit të regjistrimit të partive, Lista Serbe do të marrë pjesë në zgjedhje. Shefi i ekzekutivit shtoi se ndërkombëtarët nuk e kanë mbajtur premtimin ndaj tij dhe se kjo parti është duke rrëshqitur në paligjshmëri. Kurti deklaroi se nuk ka faj Lulzim Hetemi që është kryetar në Leposaviq, por Beogradi.
Në takimin e djeshëm me emisarin e BE-së për dialog, Miroslav Lajçak, kryeministri Albin Kurti tha se kanë diskutuar për deeskalimin dhe për normalizimin. Ai tha se ky takim ishte pozitiv, për çka shtoi se edhe Lajçak ka dalë me të njëjtat përshtypje.
“Sa i përket deeskalimit, unë i kam siguruar jo vetëm zotëri Lajçak dje, por edhe të dielën pasdite zotëri Borrell se qeveria kurrsesi nuk kontribuon në eskalim asnjëherë. Ne duam polici për zbatim ligji dhe për siguri publike që s’e përjashton askënd. Ndërkaq, në anën tjetër gjithashtu i kam siguruar që policët e Republikës së Kosovës që janë nëpër ndërtesat të komunave në veri të vendit tonë, nuk janë duke zhvilluar operacione në rrethimin e atyre ndërtesave. Sepse komunikatën, të cilën e pati lëshuar zotëri Borrel nga Moldavia kur po mbahej atje samiti i Komunitetit Politik Evropian thoshte që në afërsi të ndërtesave të mos ketë operacione të Policisë së Kosovës. Unë edhe një herë ua konfirmova se nuk ka pasur dhe nuk ka operacione të tilla. Gjithashtu, sipas kërkesës së tyre kam shprehur gatishmërinë tonë për zgjedhje të parakohshme në veri, sepse këto zgjedhje të parakohshme në ato komuna janë e vetmja mënyrë se si të bëhet ndërrimi i pushtetit. Ndërrimi i pushtetit nuk mund të bëhet me dhunë, ndërrimi i pushtetit nuk mund të bëhet, duke plagosur ushtarët e NATO-s, policët e Kosovës apo gazetarët, por vetëm me zgjedhje të parakohshme”, deklaroi Kurti.
Për zgjedhjet e parakohshme, siç shtoi Kurti, Ligji për Vetëqeverisje Lokale përcakton se si duhet të fillohet me mbledhjen e 20 për qind të elektoratit si nënshkrime të një peticioni, që e nisin procesin për zgjedhje të parakohshme.
Kurti tha se nga emisari evropian Lajçak, kërkoi që marrëdhëniet normale me Serbinë të bëhen, duke mos i braktisur vlerat evropiane.
“Sa i përket normalizimit, unë po e vë gjithnjë theksin tek fakti se kemi nevojë për zbatim të marrëveshjes dhe le të mos harrojmë që kemi marrëveshje. Sepse shumëçka që trumbetohet sot në mediat vendore, ato në Serbi edhe ato ndërkombëtare e ka krijuar përshtypjen thua se nuk kemi zgjidhje se nuk kemi marrëveshje. Në fakt nuk kemi zgjidhje, sepse nuk kemi zbatim të marrëveshje dhe këtu Kosova nuk ka kurrfarë faji, për shkak se ne jemi treguar të gatshëm edhe ta nënshkruajmë marrëveshjen dhe më pastaj që ta zbatojmë me shpejtësi. Unë nga emisari evropian Lajçak kam kërkuar që marrëdhëniet normale me Serbinë, ato të fqinjësisë së mirë evropiane do të mund të bëhen duke mos i braktisur vlerat evropiane. Pra, nuk mund të kemi as marrëveshje, as zbatim të saj e marrëveshjen e kemi duke u bazuar në vlerat evropiane, e tillë duhet të jetë edhe zbatimi, me çfarë do ideje të kujtdo qoftë të gjetjes së mesit aritmetikor ndërmjet pozicioneve të dy palëve”, shtoi shefi i ekzekutivit.
Po ashtu, Kurti tha se në takimin që zgjati rreth tri orë me Miroslav Lajçak, i ka përmendur edhe masat ndëshkuese të BE-së.
“Takimin natyrisht e kam filluar me vërejtjen time, me theksimin tim që masat ndaj Kosovës janë të padrejta. Ndonëse, thuhet që janë të përkohshme, meqenëse Kosova nuk mban asnjë faj as për eskalim të gjendjes dhe as për mos normalizim të raporteve”, u shpreh ai.
Shefi i ekzekutivit deklaroi se kryetari i Leposaviqit, Lulzim Hetemi nuk mund të paguajë kosto për destruktivitetin e Beogradit.
“Për zgjedhje të parakohshme ne jemi dakord dhe zgjedhjet e parakohshme e rregullojnë edhe çështjen e kryetarit në Komunën e Leposaviqit. Sepse me zgjedhje largohet kryetari. Me zgjedhje ka ardhur kryetari, me zgjedhje largohet kryetari. Unë nuk mendoj që duhet të ketë mënyra të tjera, të drejta e ligjore për të larguar kryetarët e zgjedhur. Mund të themi që legjitimiteti është i vakët, sepse dolën pak njerëz në zgjedhje e që nuk është faji jonë. Ajo është bullizmi i Beogradit edhe i Listës Serbe, i cili nuk do të duhej të shpërblehet tash duke dhënë dorëheqje kryetari. Dorëheqja në fund të fundit është akt moral, nuk mund t’ja imponosh dikujt dorëheqjen. Ti mund ta bësh shkarkimin, por dorëheqja është akt moral. Nuk ka faj Lulzim Hetemi që është kryetar komune në Leposaviq. Ka faj Beogradi e Lista Serbe që së pari me 5 nëntor me dorëheqje kolektive u munduan që sistemi të implodojë, të krijohet një vakuum që e bën Kosovën jofunksionale. Dështuan. Pastaj, në vend se të marrin pjesë në zgjedhje i bojkotuan ato”, deklaroi Kurti.
Tutje, kryeministri Kurti u shpreh se faktorët evropianë dhe Shtetet e Bashkuara të Amerikës i ka lutur për të punuar bashkë “që të mos shkojmë prej një dështimi, në një dështim tjetër sa i përket pjesëmarrjes qytetare”.
“I kam lutur faktorët ndërkombëtarë, llogarisni pa rezerva, pa kursim në krejt mundësitë e mia që 23 prilli të mos përsëritet në vjeshtë apo në dimër. Sepse, mua më kanë premtuar ndërkombëtarët që po e pranuam aneksin e zbatimit në Ohër me 18 mars dhe po e zgjatëm afatin e regjistrimit të partive për pesë ditë, deri më 22 mars, Lista Serbe merr pjesë. Nuk ka ndodhë. Unë dua pjesëmarrje të serbëve, mirëpo unë nuk mund ta detyroj Listën Serbe të marr pjesë. E në anën tjetër, Lista Serbe është duke rrëshqitur gjithnjë e më shumë në paligjshmëri me deklaratat e tyre dhe me veprimet e tyre….Ndërkombëtarët nuk kanë arritur që ta plotësojnë premtimin ndaj meje për pjesëmarrjen e Listës Serbe kur ajo ka qenë shumë më normale se që është sot, andaj pjesëmarrja e saj, konstruktiviteti i saj në vijim është edhe më i vështirë”, tha Kurti.
Kryeministri Albin Kurti konfirmoi se do të ketë takime me përfaqësues të NATO-s dhe komandantin e KFOR-it në lidhje me raportimet për armë të kontrabanduara nga Serbia në Kosovë.
“Për zgjedhjet e parakohshme dakord, por duhet përgatitje. Tjetra, për ta larguar kryetarin nga ndërtesa në Leposaviq, kjo bëhet me zgjedhje. Pra, pika e parë e kryen edhe të dytën. Ndërkaq, sa i përket pikës së tretë, policia jonë është në ndërtesë, sepse ju e dini se çfarë gjetëm në Zveçan, arsenal për luftë. Ose tash kemi këto informacionet se veturat e ambulancës, autoambulancat janë përdorur për të bartur armatim. Dhe unë sot do ta kem një takim edhe me përfaqësues të NATO-s për këtë gjë. Do ta takojë edhe komandantin e KFOR-it dhe pas gjithë atyre takimeve edhe me organet tona tona të sigurisë, do të mund ta japim fjalën përfundimtare. Tash jemi duke grumbulluar të dhëna, informacion.”, tha ai.
Para gazetarëve, Kurti shtoi se për pjesëmarrjen e lirë në zgjedhje ndihmon shumë largimi nga shoqëria i ekstremistëve të dhunshëm.
Pas mbledhjes së qeverisë, ku u miratua projektligji i ri për pensione, Kurti theksoi se kjo arritje i shtohet listës që të tjerët nuk arritën ta zgjidhin për 20 vjet.
Pavarësisht gurëve që hedhin në rrugë, siç u shpreh Kurti, ai tha se do të përmbushin gjithçka që kanë premtuar deri në fund të mandatit.
“Duke ndryshuar ligjin, i cili do të mundësojnë fitimin e së drejtës që të përfitojnë nga kontributet e tyre edhe ata që për shkak të largimit të dhunshëm nga puna nuk arritën që të përmbushin kushtin prej 15 vitesh kontribut. Kjo arritje i shtohet listës së çështjeve dhe problemeve që të tjerët nuk arritën t’i zgjidhin për 20 vite, e ne po i rregullojnë që në mandatin e parë, madje në gjysmë të mandatit. Kemi ende shumë punë para vetës, por me durim e përkushtim do të arrijmë të përmbushim gjithçka që e kemi premtuar deri në fund. Pavarësisht sfidave, pavarësisht pengesave, e gurëve të cilët çdo ditë na i hedhin në rrugë, ne nuk ndalemi, i mbajmë dhe i përmbushim zotimet e dhëna ndaj qytetarëve tanë”, shtoi Kurti.
Edhe ministri i Financave, Punës dhe Transfereve, Hekuran Murati u shpreh se me këtë ndryshim të ligjit, dikush që ka pasur dhjetë vjet përvojë pune në 1990 dhe është larguar nga puna, atyre do u njihet periudha nëntë vjeçare prej kur janë larguar nga puna.
Ai po ashtu u pyet edhe për mungesën e punëtorëve në sektorin privat, me ç’rast tha se ka një mospërputhje mes aftësive që kërkohen nga tregu i punës, mosofrimi i kushteve të nevojshme nga bizneset./KP
Emisari i Bashkimit Evropian për dialogun Kosovë-Serbi, Miroslav Lajçak do të takohet edhe me zëvendëskryeministrin, Besnik Bislim.
Kjo është konfirmuar nga kryeministri Albin Kurti, duke shtuar se në këtë takim do të diskutohet për uljen e tensioneve në veri dhe për raportet mes Kosovës dhe Serbisë.
Ndërsa për sa i përket takimit të tij me emisarin Lajçak, Kurti tha se ka qenë takim pozitiv.“Ai do të takohet edhe me zëvendësin tim dhe kryenegociatorin, Besnik Bislimi”.
Ministri i Financave, Hekuran Murati ka folur për mungesën e punëtorëve në vend, raporton Ekonomia Online.
Sipas tij, ka mospërputhje ndërmjet aftësive që kërkojnë bizneset dhe aftësive që i posedojnë të rinjtë; dhe se bizneset s’po krijojnë kushte të mira për punëtorët.
Murati tha se po marrin masa dhe tha “në vazhdimësi kemi shtim të masave” për ta zgjidhur këtë problem. Murati tha se Qeveria ka mbështetur trajnime apo kurse të IT-së dhe “trajnime të tjera për sa i përket fushave të tjera”.
Madje sipas tij, se bizneset e kanë rritur profitin së fundmi, andaj tha se “duhet të rriten edhe pagat e punëtorëve”.
“Ka një mospërputhje mes të aftësitë që kërkohen nga tregu i punës dhe të atyre që shumica e të rinjve tanë i kanë. Pra, ka vende pune për programer, mirëpo duhet kohë që të trajnohen dhe të shkollohen programer të rinj me paga të larta. Kemi edhe problemin e mosofrimit të kushteve nga bizneset”.
Kryeministri i Kosovës, Albin Kurti ka konfirmuar se do të takohet me përfaqësues të NATO-s dhe me komandantin e KFOR-it, raporton EO.
Kurti tha se ka informacione se veturat e ambulancës në veri të Kosovës janë përdorur për të bartur armatim.
Ai është shprehur se do të takohet edhe me organet e sigurisë dhe të jepet fjala përfundimtare për këtë. Ai gjithashtu ka folur edhe për diskutimet e tij për deeskalimin e situatës në veri ku ka konfirmuar se është pajtuar për zgjedhje të parakohshme.
“Për ta larguar kryetarin nga ndërtesa në Leposaviq, kjo kryhet me zgjedhje. Pika e parë e kryen edhe të dytën, sa i përket pikës së tretë, policia jonë është në ndërtesë sepse ju e dini çfarë gjetëm në Zveçan, arsenal për luftë ose tash kemi këto informacionet se veturat e ambulancës janë përdorur për të bartur armatim dhe unë sot do ta kem një takim edhe me përfaqësues të NATO-s për këtë gjë, do ta takoj edhe komandantin e KFOR-it gjeneral majorin Risstuccio dhe pas këtyre takimeve edhe me organet tona të sigurisë do të mund ta japim fjalën përfundimtare, jemi duke grumbulluar të dhëna, informacion dhe nuk është mirë të jap informacion për informacionin e padetajuar. Sot kam një takim ku do të shtrohet edhe kjo temë dhe në këtë mënyrë unë besoj që kemi treguar gatishmërinë dhe interesimin tonë për deeskalim”.
Përderisa KFOR-i tha se bëhet fjalë për një ngjarje të vitit 2022, derisa tha se nuk kanë gjetur dëshmi. Po ashtu, KFOR tha se përgjegjësia për kontrabandë i takon “organizatave të Sigurisë së Kosovës”.
“Ngjarja e përmendur nga deputetja britanike i referohet vitit 2022 kur Batalioni Mbretëror Fusilier u dërgua në veri të Kosovës në mbështetje të misionit të KFOR-it. Prezenca e supozuar e armëve ilegale është raportuar në Shtabin e KFOR-it, por pas hetimeve të mëtejshme për konfirmuar këtë, nuk ka dalë asnjë provë për atë që është raportuar. Nuk ka asnjë dëshmi edhe në lidhje me kontrabandën e supozuar të kryer përmes vijës kufitare administrative ndërmjet Kosovës dhe Serbisë në kishat ortodokse me autoambulanca. Për një informim të plotë, ky lloj aktiviteti i takon sundimit të ligjit, që është nën përgjegjësinë e Organizatave të Sigurisë së Kosovës”.
Kompania Rajonale e Ujësjellësit “Prishtina” bën thirrje që të kihet kujdes me shfrytëzimin e ujit të pijes dhe të mos përdoret në mënyrë të pakontrolluar.
Me anë të një komunikate për media, luten konsumatorët që jetojnë në pika të ulëta të mos e keqpërdorin ujin, në mënyrë që ai të arrijë edhe në pikat e larta.
“Nga ju kërkojmë shpenzim racional të ujit, ndërsa ne jemi duke inspektuar terrenin për kyçje ilegale dhe keqpërdorime të ujit me theks të veçantë nëpër fshatra”, thuhet në kumtesë të KRU Prishtina, duke theksuar se ujin mund ta zëvendësojë vetëm uji dhe se e ardhmja varet nga disa veprime që ne i marrim sot!
Kryetari i Lidhjes Demokratike të Kosovës (LDK), Lumir Abdixhiku ka ftuar në takim opinionistë e gazetarë për të diskutuar për gjendjen politike në vend, me theks të veçantë relacionet e Kosovës me aleatë, raporton Ekonomia Online.
Kësaj ftesë i janë përgjigjur gazetarë e analistë të njohur, mirëpo ky takim ka qenë i mbyllur për medie.
Ky takim ka ardhur pas paralajmërimeve të Abdixhikut se nga e mërkura do të nisë takimet e para me profesionistë të ndryshëm për të nxjerrë propozimet për dalje nga kriza e tanishme izoluese dhe tensionuese e Kosovës.
Sipas tij, nga e mërkura, do të organizojë katër takimet e para me opinionistë, gazetarë, organizata të shoqërisë civile, profesorë universitarë e ish-diplomatë dhe biznese nga sektori privat në vend.
“Në të katër takimet e para, do të shtrojmë jo vetëm nevojën e ndërtimit të një mendimi e rrugëtimi të përbashkët euroatlantik, por dhe propozimet tona për dalje nga kriza e tanishme izoluese e tensionuese. Këto propozime do të përmbajtësohen nga vet pjesëmarrësit; e rruga e re e Republikës, do të lindë natyrshëm nga angazhimi gjithë shoqëror”, kishte paralajmëruar Abdixhiku.
Kryeministri Albin Kurti ka bërë të ditur se nuk do të takohet me homologun nga Shqipëria, Edi Rama, këtë javë në Prishtinë nëse nuk mbahet mbledhja e përbashkët e qeverive të dy vendeve. Rama nis një tur ballkanik në kuadër të përgatitjeve për Procesin e Berlinit dhe ka paralajmëruar një vizitë edhe në Prishtinë.
Mirëpo, Kurti tha se i ka kërkuar Ramës që të mbajnë mbledhjen e përbashkët të dy qeverive që ishte anuluar nga ana e kryeministrit të Shqipërisë e që ishte paraparë të mbahej më 14 qershor në Gjakovë e që për Kurtin nuk kishte arsye për një vendim të tillë.
“Unë miqësisht i kam kërkuar kryeministrit Rama se meqë do të vijë e do të qëndrojë dy ditë e një natë në Prishtinë, që ta mbajmë edhe mbledhjen e dy qeverive e cila u anulua paarsyeshëm, ndonëse ishte paraparë muaj më parë për datën 14 qershor në Gjakovë. Të gjitha përgatitjet i patëm bërë, 13 marrëveshje kanë pasur të nënshkruhen të cilat tash kanë ngelur në sirtar. Në mënyrë që këto marrëveshje të dakorduara të mos ngelen edhe më tutje në sirtar sepse nga to nuk përfitojnë kryeministrat, përfitojnë qytetarët, dhe çdo ditë e humbur e pa i nënshkruar këto marrëveshje, është dëm për qytetarët, unë i kam propozuar kryeministrit Rama që meqë po vjen në këtë javë le ta mbajmë edhe një mbledhje të përbashkët të të dy qeverive tona, t’i nënshkruajmë ato marrëveshje të dakorduara që janë në sirtar dhe në këtë mënyrë t’i operacionalizojmë, t’i funksionalizojmë, t’i zbatojmë një orë e më parë të gjitha ato”, tha Kurti.
Kurti tha se Procesi i Berlini është shumë i rëndësishëm dhe nuk ka në Ballkan lider politik e institucional sikurse ai që e ka mbështetur dhe vazhdon ta mbështesë këtë proces.
Mirëpo, sipas tij, samiti i radhës i Procesit të Berlinit është në mes të muajit tetor ndërsa nuk dëshiron të vonohet më shume me zbatimin e marrëveshjeve Kosovë-Shqipëri.
“Për mua është e nevojshme që ta kemi mbledhjen e dy qeverive, nëse kryeministri i Republikës së Shqipërisë, Edi Rama, insiston në anulimin e mbledhjeve të dy qeverive, atëherë unë ngelem tek qëndrimi që ia kam thënë se për takime të ne të dyve, ne kemi kontakt të drejtpërdrejt, ne takohemi shumë shpesh nëse shikoni gjatë këtyre më shumë se dy viteve që jemi në qeverisje i kam një duzinë takimesh me kryeministrin Rama, nuk lëgon raporti Kosovë-Shqipëri, por edhe demokracia, paqja e siguria në Ballkan, pse nuk takohen kryeministri i Kosovës me atë të Shqipërisë, por për shkak se mbledhjet e dy qeverive tona janë anuluar paarsyeshëm, andaj konsideroj të arsyeshme një mbledhje të përbashkët të dy qeverive por jo takimet të tjera”, tha Kurti.
Për të hequr të gjitha dilemat se nuk do të ndodhë një takim mes tij dhe Ramës pa mbledhje të dy qeverive, Kurti u kujdes që ta mbyllë konferencën e tij duke e përsëritur qëndrimin.
“Pra, edhe njëherë unë jam i gatshëm të takohem me kryeministrin Edi Rama në kuadër të mbledhjes së dy qeverive, jo pa atë mbledhje”, tha Kurti.
Kryeministri Edi Rama kishte anuluar njëanshëm mbledhjen e dy qeverive natën e 13 qershorit me arsyetimin se nuk mund të mabhet një mbledhje e tij në kohën e ngritjes së tensioneve në veri dhe raporteve të acaruara të shtetit të Kosovës me bashkësinë eurotaltinike.
Ai kishte kërkuar një tjetër format me pjesëmarrjen e dy kryeministrave dhe ministrave të Jashtëm e të Mbrotjes.
“E kam informuar kryeministrin Kurti se në kushtet e agravimit me orë të marrëdhënieve të Kosovës me krejt bashkësinë euroatlantike ky takim nuk mund të mbahet në formatin e parashikuar. Dhe pasi kam folur pasdite me shefin e diplomacisë evropiane Borrell, i kam kërkuar Albinit për tu takuar në Gjakovë në një format më të ngushtë, përkatësisht me ministrat e jashtëm dhe të mbrojtjes, për të diskutuar pikërisht për këtë situatë e cila po e çan në mënyrë dramatike Kosovën me bashkësinë euroatlantike, në një pikë të paimagjinueshme, ku kjo e fundit ka vënë gishtin faktikisht në butonin që do të vërë në lëvizje planin e sanksioneve ndaj shtetit që e ka krijuar vet”, pati deklaruar Rama më 13 qershor./KP/
Komisioni për të Drejtat e Njeriut, Barazi Gjinore, për Persona të Pagjetur, Viktimat e Dhunës Seksuale të Luftës dhe Peticione ka shqyrtuar sot projektligjin për parandalimin dhe mbrojtjen nga dhuna në familje, dhuna ndaj grave dhe dhuna në baza gjinore.
Eksperti ligjor, Hilmi Jashari ka thënë se ky ligj ka për qëllim të sjellë pajtueshmërinë, ligji për mbrotjen nga dhuna në familje, me obligime që rrjedhin nga konventa.
“Risia kryesore që sjell konventa është obligimi përpos kordinim ndërinstitucional dhe promovim për mbrotje nga dhuna në familje, dhuna në baza gjinore dhe ndaj grave”, ka thënë Jashari.
Ndërsa, deputetja e VV-së, Arjeta Fejza ka propozuar që paratë e imta t’i ketë Policia e Kosovës, në mënyrë që kur të raportohet rasti i gruas dhe potencialisht të ketë fëmijë me vete, asaj t’i sigurohet qumështi për fëmijë.
Për këtë, është pajtuar edhe kryetarja e Komisionit, Duda Balje, e cila ka thënë se nuk është e logjikshme që Policia të paguajë për viktimat.
Ndërsa, sa i përket kohës për këtë ligj, është vendosur për gjashtë muaj, porse për këtë deputetja nga PDK, Eliza Hoxha, e cila ka thënë se nuk mund të vlerësohet si e saktë kjo kohë.
“Që ndodh pushimi, ndërrohet qeveria, nuk mund të realizohet për tre muaj”, ka thënë Hoxhaj.
Ndërsa, Balje këtë ligj e ka vlerësuar si kompetent dhe të nevojshëm.
“Një prej ligjeve që kemi mbuluar shumë adresa, i cili ka qenë kompetent për të ndihmuar që të dalim me një ligj sa më të mirë, pa marr parasysh votimin e fundit kemi bashkëpunuar shumë mirë. Pas votimit të dytë kemi një punë të madhe për implemtentimin e ligjit, edhe këtu duhet të jepim energji”, ka thënë Balje.
Projektligji në fjalë ka marrë përkrhaje të shkojë në lexim të dytë në Kuvendin e Kosovës.
Ndërkohë, në komision ka hyrë për të raportuar një grua e dhunuar gjatë luftës së fundit në Kosovë, ndërkohë komisioni po vazhdon me dyer të mbyllura./KosovaPress
Kabineti qeveritar ka mbajtur mbledhjen me vetëm dy pika të rendit të ditës. Qeveria ka miratuar plotësim-ndryshimin e Ligjit për Skemat Pensionale të financuara nga shteti, i cili parasheh heqjen e diskriminimit si kusht për 15 vjet stazh pune deri më 1999. Ministri i Financave, Punës dhe Transfereve, Hekuran Murati tha se me këtë vendim do të përfitojnë rreth 70 mijë persona. Në mbledhjen e sotme është miratuar edhe projekt-kodi doganor dhe i akcizave, ku u tha se është në përputhje me direktivat e Bashkimit Evropian.
Ministri i Financave, Punës dhe Transfereve, Hekuran Murati tha se ka përfunduar draftimi i projekt-kodit doganor dhe i akcizave në përputhje me direktivat relevante të BE-së.
“Në raport me Kodin Doganor që është në fuqi është pothuajse gjashtëfish më shumë dhe kodi aktual që është në fuqi, është i miratuar qysh në vitin 2008. Ka tash 15 vjet që nuk ka ndryshuar dhe është koha që të përshtatet me direktivat e fundit të BE-së. Ky projekt-kod doganor i akcizave siguron një kornizë gjithëpërfshirëse për rregullat dhe procedurat doganore dhe përshtatet me zhvillimet e fundit në fushën e tregtisë dhe përdor mjetet moderne të komunikimit, duke siguruar një sistem plotësisht të automatizuar. Ka gjashtë libra gjithsej, pjesë e këtij drafti të kodit janë Ligji i Doganës, Ligji i Akcizës, Ligji për Kundërvajtje Doganore, Ligji për Administratën Doganare, Ligji i Lirimeve si dhe Libri për dispozitat kalimtare”, theksoi Murati.
Në këtë draft, Murati shtoi se përcaktohet se kush janë obliguesit akcizor, si paguhet dhe raportimi në përputhje me direktivat e BE-së.
Kabineti qeveritar ka miratuar edhe projektligjin për plotësimin e ndryshimit të Ligjit për Skemat Pensionale të Financuara nga shteti.
Kurti theksoi se ky projektligj është në linjë me premtimin e bërë, për trajtimin e barabartë për të gjithë dhe rritje të mirëqenies sociale.
“Në përputhje me zotimin tonë e siç kemi paralajmëruar në fillim të këtij viti, po e bëjmë reformën pensionale. Qeveria e Kosovës po ndërton një sistem pensional solidar dhe të barabartë që garanton pensione stabile dhe kujdeset për pensionistët. Kjo skemë e zhduk dallimin dhe margjinalizimin, e u garanton qasje të mira sociale të gjithëve. Këtë duhet ta bëjë Republika dhe këtë po e bëjmë së bashku”, ka thënë ai.
Në anën tjetër, ministri i Financave, Punës dhe Transfereve, Hekuran Murati dha detaje për ndryshimet që parashihen në këtë projektligj. Ai njoftoi se ka pasur diskriminim në pragun e vendosur si kusht për 15 vjet stazh pune.
“Ka pasur një diskriminim në aspektin që është mbajtur pragu si kusht 15 vjet stazh pune, mirëpo nuk janë marrë parasysh rrethanat e largimit të dhunshëm nga puna të atyre që kanë qenë duke punuar që nga viti 1989 dhe më pastaj me hyrjen në fuqi të masave të dhunshme. Dhe si rezultat i largimit të dhunshëm, kanë mbetur shumë persona, shumë punëtor të cilët kanë kontribuar me 14 vite e 11 muaj, por për shkak të largimit të dhunshëm nuk kanë arritur ta plotësojnë kushtin prej 15 vitesh. E me këtë rast, me këtë ndryshim-plotësim të këtij ligji ne po e zhbëjmë atë diskriminim. Sepse do t’u mundësohet që për periudhën që nga koha kur janë larguar nga puna e deri më 1 janar 1999, tu llogaritet drejt plotësimit të kushtit prej 15 vitesh, ndërsa lartësia e pensionit pastaj do të caktohet bazuar në vitet që kanë kontribuar në Fondin Pensional. Hiqet ky diskriminimi i prerjes, ku dikush ndoshta për një muaj s’ka arritur ta plotësojë kushtin, ne me këtë po e heqim këtë diskriminim duke ua mundësuar që ta llogarisin edhe periudhën prej kur janë larguar nga puna”, ka thënë Murati.
Murati shtoi se nga ky plotësim-ndryshim i ligjit parashihet që të përfitojnë mbi 100 mijë persona. Sipas tij, këto ndryshime në ligj për një vit të plot do të kushtojnë rreth 60 milionë euro.
“Parashihet që të përfitojnë rreth 104 mijë persona, që do të plotësonin kushtin. Pra, për të përfituar nga ky ndryshim-plotësim i këtij ligji. Megjithatë duhet të përllogaritet ose duhet të marrim parasysh që disa mund edhe të kenë ndërruar jetë, ose disa mund të mos kenë arritur ende moshën e pensionimit. Vlerësimet tona janë që përafërsisht, aktualisht në skemën e pensionit bazik duhet të jenë rreth 70 mijë persona që marrin nga pensioni bazik, por që realisht do të duhej të kualifikoheshin për pensinonin parcial kontribut pagues të moshës”, shtoi ai. /kp