Author: ATVLive

Militantët nga Rripi i Gazës kanë hedhur raketa të mërkurën pasi forcat izraelite u tërhoqën të martën nga qyteti Xhenin, pas përfundimit të operacionit më të madh ushtarak të kryer për vite të tëra në Bregun e pushtuar Perëndimor.

Në përgjigje, avionët izraelitë goditën një ndërtesë nëntokësore për prodhimin e armëve, tha ushtria, por ende është e paqartë nëse do të ketë ndonjë përshkallëzim të mëtejmë të tensioneve, shkruan REL.

Izraeli kishte nisur operacionin e tij ushtarak në Xhenin në orët e para të 3 korrikut.

Dymbëdhjetë palestinezë, prej tyre të paktën pesë luftëtarë dhe një ushtar izraelit, janë vrarë.

Operacioni, që sipas ushtrisë së Izraelit synonte shkatërrimin e infrastrukturës ushtarake dhe armëve në kampin e refugjatëve në Xhenin, nisi me sulme me dronë dhe mbi 1.000 trupa u dislokuan.

Pasi trupat izraelite u tërhoqën, banorët që ishin larguar nga kampi kur nisën luftimet, u kthyen në kamp.

Kampi ku hetojnë rreth 14.000 persona gjendet në një sipërfaqe prej gjysmë kilometri katror. Ky kamp ka qenë një prej pikave kyçe të valës së dhunës që ka përfshirë Bregun Perëndimor në më shumë se një vit dhe që ka rritur shqetësimin ndërkombëtar.

Disa orë pasi forcat izraelite nisën tërheqjen, militantët palestinezë në Rripin e Gazës lëshuan pesë raketa drejt Izraelit, tha ushtria. Raketat u penguan dhe nuk ka raportime të menjëhershme për viktima.

Një përshkallëzim i mëtejmë ndodhi më 4 korrik, pas një sulmi me makinë dhe thikë në Tel Aviv, që la të plagosur tetë persona. Grupi militant palestinez Hamas mori përgjegjësinë për këtë sulm.

Kryeministri Albin Kurti theksoi se shumë shpejt kur bashkatdhetarët të kalojnë nga Merdarja në Prishtinë, do shohin se edhe në Kosovë mund të bëhet mirë, drejt, e njësoj. Rruga e mërgatës, siç e quajti ai, ka filluar të rregullohet e zgjerohet, për të siguruar që koha në vendlindje do të jetë e këndshme. Kështu u shpreh ai në adresimin e tij para kabinetit qeveritar, ku shtoi se rikthimi në atdhe shënon moment të veçantë për të gjithë.

Kryeministri Albin Kurti ka falënderuar bashkatdhetarët për përkushtimin e tyre në ruajtjen e traditave dhe rolin e rëndësishëm në zhvillimin ekonomik, social e politik.

“Si çdo herë kur çel vera, Kosova pret me krahë të hapur, me zemrën plot dhe me mall të madh më të dashurit tanë që gjenden larg nesh. Të dashur mërgimtarë, mirë se vini në shtëpinë tuaj. Rikthimi juaj në atdhe, në shtëpitë tuaja në Kosovë shënon një moment të veçantë për të gjithë ne, pasi shpreh lidhjen e përjetshme e cila tejkalon kufijtë dhe kohën. Edhe këtë vit të përjetojmë së bashku bukuritë e natyrës dhe trashëgimisë sonë kulturore. Le t’i lidhim gjeneratat e reja me tokën e tyre e le të mësojmë prej më të moshuarve. Në gjuhën tonë qëndrojnë mrekullisht dy fjalë për vendlindjen: mëmëdheu dhe atdheu, toka e nënës dhe e babait. Prandaj edhe lidhja juaj me Kosovën është më e thellë”, tha Kurti.

Teksa u uroi mirëseardhje qytetarëve nga Kosova, Kurti tha se “le të jetë kjo verë një kohë e bashkimit tonë”.

“Ecja jonë e shpejt drejt zhvillimit dhe forcimit të vendit është më e lehtë, kur në mendjen tonë e dimë që kemi mbështetjen tuaj. Prandaj kontributi juaj ndihet në gjithë sektorët e vendit dhe ne u jemi pafundësisht falënderues për angazhimin dhe rolin tuaj të vazhdueshëm për zhvillimin e vendit”, shtoi Kurti.

Shefi i ekzekutivit theksoi se në javën në vijim, Ministria e Punëve Jashtme dhe Diasporës, përmes platformës “Shijo Kosovën” do të përcjellë të gjitha udhëzimet dhe informatat që ndërlidhen me aktivitetet verore.

“Siç mund ta dini, kemi filluar rregullimin, zgjerimin dhe shtrimin e rrugës Prishtinë-Podujevë. Kjo nuk është rrugë vetëm për qytetarët e Llapit, por kjo në të vërtetë është rruga e mërgatës. Shumë shpejt kur të kaloni nga Merdarja në Prishtinë e nëpër shtëpitë tuaja gjithandej vendit, rruga do të jetë vetëm njëra prej gjërave që do e shihni se edhe këtu mund të bëhet mirë, e drejt, njësoj sikurse edhe në vendet ku ju jetoni e veproni. Për të siguruar që koha juaj në vendlindje do të jetë vërtetë e këndshme, Ministria e Punëve të Jashtme dhe Diasporës ka hartuar një listë të gjatë të aktiviteteve të dedikuara veçanërisht për ju. Duke përfshirë fushën e sportit, kulturën dhe ndërlidhjen e gjeneratave të reja me vendin e tyre, përmes kampeve verore, eksperiencave kulturore, artistike dhe natyrore”, vijoi Kurti. /kp

Këshilli i Prindërve i Kosovës ka shprehur indinjatë ndaj mbajtjes së Testit të Arritshmërisë, duke e quajtur të “keqprojektuar, keqmenaxhuar dhe ku kopjimi është sinonimi për të”.

Këshilli ka thënë se Testi i Arritshmërisë dhe i maturës duhet të pezullohen dhe ka paralajmëruar se vitin e ardhshëm do të ketë organizim për bojkotimin e tyre.

“Ndërsa i gjithë sistemi arsimor i Kosovës e çoi dëm edhe një vit për t’i shërbyer mbi 300 mijë fëmijëve, testi i maturës dhe arritshmërisë vazhdojnë bindshëm të jenë aktet më të kota, më të pavlera e më të dëmshme për fëmijët tanë. Ato teste janë shembuj konkret se si nuk duhen bërë projekte të tilla. Janë dëshmia e vendimeve dhe veprimeve pa përdorur rezonin e arsyes shkak-pasojë. Janë ‘paushalli’ i politikbërjes për arsimin që po vazhdon në Kosovë”, thuhet në reagimin e këshillit.

Tutje ka shprehur indinjatë edhe ndaj sistemit arsimor, për të cilin Këshilli i Prindërve ka thënë se po rrënon shpresën e prindërve për të rritur fëmijët në vendin e vet.

“Ky sistem arsimor është edhe i skaduar edhe i dëmshëm (në tërësinë e tij)! Duhet një plan kombëtar, me pajtim të të gjitha palëve, për ta ringjallur, përditësuar dhe reformuar në palcë sistemin arsimor parauniversitar në Kosovë”.

Një deklaratë e Kryetares së Komisionit për Politikë të Jashtme në Parlamentin britanik, Alicia Kearns bëri bujë dhe vuri KFOR-in e Kishën Ortodokse serbe në lëvizje.

KFOR ka thënë se janë duke verifikuar faktet dhe se do të japin një përgjigje sa më shpejt që të jetë e mundur, lidhur me deklaratën e cila ka thënë se ka armë që po kontrabandohen nga Serbia në Kosovë, përmes autoambulancave dhe po shkarkohen në kishat ortodokse.

“Ne jemi duke verifikuar faktet dhe do të japim një përgjigje gjithëpërfshirëse sa më shpejt të jetë e mundur”- kanë thënë shkurt nga KFOR-i për Kallxo.

Kerns tha se KFOR-i britanik është në dijeni për këtë.

“Qeveria është e vetëdijshme, me Fusilierët që sapo janë kthyer nga shërbimi në KFOR, se ka armë që kontrabandohen përtej kufirit nga Serbia në kishat ortodokse me ambulanca. Kur trupat tona janë vënë në dijeni për këtë dhe janë përpjekur të marrin leje për të shkuar dhe për t’i marrë ato, procesi i lejes zgjati shumë. Në momentin kur kishte leje– ndodhi e papritura– një ambulancë veçse kishte shkuar në kishë dhe i kishte nxjerrë jashtë përsëri të gjitha armët”- ka deklaruar Kearns.

Deputetja britanike këto deklarata i kishte thënë dje gjatë një diskutimi në kuadër të “Javës së Përkujtimit të Srebrenicës”

Dioqeza Rashkë-Prizren (KOS) thotë se e ka pranuar me shqetësim të thellë deklaratën e deputetes britanike, Alicia Kerns, të bërë në Parlamentin Britanik.

“…Qeveria është e vetëdijshme, me Fusilierët që sapo janë kthyer nga shërbimi në KFOR, se ka armë që kontrabandohen përmes kufirit nga Serbia në kishat ortodokse me ambulanca. Kur trupat tona bëhen të vetëdijshme për këtë dhe përpiqen të marrin leje për të shkuar dhe për t’i marrë ato, lejet zgjasin shumë. Deri në momentin që ka leje – çuditërisht – një ambulancë është paraqitur në kishë dhe ka nxjerrë përsëri të gjitha armët”.

Sipas Dioqezës Rashkë-Prizren, kjo deklaratë e deputetes britanike “paraqet një akuzë tejet të rrezikshme që kriminalizon Kishën Ortodokse Serbe dhe tashmë po shfrytëzohet nga disa media kosovare me qëllim të nxitjes së urrejtjes fetare dhe etnike”.

“Këto akuza përbëjnë gjithashtu një kërcënim të drejtpërdrejtë për klerin, manastiret dhe vendet fetare”, thuhet në këtë reagim.

Dioqeza Rashkë-Prizren (KOS) thotë më tej se “ka kundërshtuar qartë çdo formë të dhunës përmes veprimeve dhe deklaratave të saj gjatë tridhjetë viteve të fundit, si para dhe pas” luftës në Kosovë.

Dhuna, thuhet më tej në deklaratë, “është në kundërshtim me parimet themelore të Ungjillit dhe me misionin e Kishës. Prandaj, dëshirojmë ta trajtojmë këtë çështje me seriozitet dhe përgjegjësi të plotë”.

Tutje, thuhet se akuzat e deputetes Kearns duhet të verifikohen urgjentisht.

“Prandaj, ne kërkojmë publikisht, përmes kësaj deklarate, që misioni i KFOR-it, në të cilin ishte vendosur njësia e lartpërmendur britanike (Royal Fusiliers), t’i bëjë të ditur publikut nëse mund të konfirmojnë pretendimet e deputetit të MB-së. Është e pamundur që ushtarët e Mbretërisë së Bashkuar në KFOR ta kenë këtë informacion dhe të mos ua komunikojnë eprorëve të tyre në komandën e KFOR-it. Nëse këto pretendime rezultojnë të vërteta, çdo zyrtar(ët) i kishës që zbulohet se është i përfshirë në keqpërdorimin e supozuar të ambienteve të KOS-it dhe shërbimit kishtar për transportin ose ruajtjen e armëve do të përballet me dënimet më të rënda të kishës dhe nuk do të jetë në gjendje të vazhdojë shërbimin e tyre publik. Mirëpo, nëse KFOR-i nuk mund të konfirmojë vërtetësinë e këtyre pretendimeve, Dioqeza Rashkë-Prizren do të kërkojë një falje publike nga deputetja e lartpërmendur përmes ambasadës britanike në Prishtinë, për shkak të pretendimeve të saj nxitëse dhe të pasakta që kanë pasoja të rënda”, thuhet në deklaratën e Dioqezës Rashkë-Prizren.

Në videon e siguruar nga The Geopost shihet qartë një autoambulancë duke iu afruar , Civilna Zastites dhe duke iu treguar se ku jane armët.

Komisioni për të Drejtat e Njeriut, Barazi Gjinore, për Persona të Pagjetur, Viktimat e Dhunës Seksuale të Luftës dhe Peticione do të mblidhet sot.

Anëtarët e këtij komisioni shqyrton Projektligjin për parandalimin dhe mbrojtjen nga dhuna në familje, dhunën ndaj grave dhe dhunën në baza gjinore.

Mbledhja do të mbahet në ora 10:00.

Zëvendëskryeministrja e Kosovës për Çështje të Pakicave dhe të Drejta të Njeriut, Emilija Rexhepi, ka zhvilluar vizitë zyrtare dyditore në Bosnjë dhe Hercegovinë, me ftesë të Grupit Parlamentar të Partisë për Veprim Demokratik (SDA) dhe me kërkesë të deputetit Shemsedin Mehmetoviq.

Sipas kryeministrisë, gjatë kësaj vizite, Rexhepi përveç takimit me Shemsedin Mehmetoviq, deputet në Parlamentin e Bosnjë dhe Hercegovinës, është pritur në takim edhe nga Dino Konaković, ministër i Punëve të Jashtme të Bosnjë-Hercegovinës, Zukan Helez, ministër i Mbrojtjes së Bosnjë-Hercegovinës, si dhe Benjamina Karić, kryetare e komunës së Sarajevës.

“Tema kryesore e takimeve gjatë kësaj vizite të Zëvendëskryeministres Rexhepi ishte ratifikimi i Marrëveshjes për Lëvizjen e Lirë me Letërnjoftime në Ballkanin Perëndimor dhe njohja e dokumenteve të identifikimit, si pjesë e Procesit të Berlinit për vendet e Ballkanit Perëndimor”, tha ZKM-ja.

“U bisedua edhe për mundësitë e forcimit të lidhjeve kulturore dhe arsimore ndërmjet Republikës së Kosovës dhe Bosnjë e Hercegovinës”.