Author: ATVLive

Një çarje masive që po thellohet mes për mes Afrikës mund ta ndajë kontinentin në dy pjesë dhe të krijojë një oqean të gjashtë në botë – paralajmërojnë shkencëtarët.

Vendet përgjatë bregut juglindor do bëheshin një ishull gjigand, duke krijuar një det plotësisht të ri nga Etiopia në Mozambik.

E ashtuquajtura çarja afrikano-lindore, është formuar 22 milionë vite më parë, por ka treguar aktivitet gjatë dekadave të fundit dhe çarja është shfaqur edhe përgjatë shkretëtirave në Etiopi në 2005-ën.

Shkencëtarët thonë se ajo po thellohet me afro 3 centimetra çdo vit. Ky është rezultat i lëvizjes larg njëra tjetrës së dy pllakave tektonike, por mekanizmi i saktë nuk është plotësisht i kuptueshëm për momentin, raportoi Top News.

Një studim i publikuar në qershor ka dalë në përfundimin se një nxjerrje masive e shkëmbinjve të nxehtë që vjen nga bërthama e planetit tonë, po e nxit akoma më shumë ndarjen.

Ndërsa Afrika nuk pritet të ndahet të paktën edhe për 5 milionë vite të tjera, Somalia dhe gjysma e Etiopisë, Kenias dhe Tanzanisë, do të krijojnë një kontinent të ri kur kjo të ndodhë.

Asamblistë të Lëvizjes Vetëvendosje në Prishtinë kanë paralajmëruar sot se për disa nga gjetjet e raportit vjetor të auditimit të vitit të kaluar do t’i adresohen organeve të drejtësisë. Ata i kanë bërë thirrje të parit të kryeqytetit, Përparim Rama për reflektim, sepse konsiderojnë se këto gjetura flasin për vepra penale. Asamblistja Violeta Salihu dhe Ermal Osmani kanë prezantuar të gjeturat dhe rekomandimet që ka dhënë Zyra Kombëtare e Auditimit në Raportin Vjetor të Auditimit për Komunën e Prishtinës për vitin 2022.

Asamblistja Salihu ka thënë se opinioni i kualifikuar i Zyrës Kombëtare të Auditimit flet për shkelje ligjore dhe keqplanifikim të mjeteve buxhetore.

“Zyra Kombëtare e Auditimit ka dhënë opinion të kualifikuar për pasqyrat financiare vjetore të Komunës së Prishtinës për vitin 2022. Sipas standardeve të auditimit, opinioni i kualifikuar jepet në rastet kur janë zbuluar keqdeklarime ose mospajtueshmëri, kur e tejkalojnë nivelin e materialitetit për pasqyrat financiare. Baza për opinion të kualifikuar ka rrjedhur: si rezultat i planifikimeve buxhetore të gabuara, ku komuna ka paguar 2 milionë e 453 mijë e 137 euro nga investimet kapitale, shpenzime që për nga natyra u takojnë mallrave dhe shërbimeve. Kjo është një tregues i qartë për një keqplanifikim dhe keqmenaxhim, kur paratë merren nga një kategori e caktuar e shfrytëzohen për një kategori”, ka thënë ajo.

Sipas saj, Zyra Kombëtare e Auditimit ka konstatuar se Komuna e Prishtinës ka pasur mangësi në menaxhimin e të hyrave të tatimit në pronë, që si pasojë e keqmenaxhimit komuna ka realizuar 12 për qind më pak të të hyrave krahasuar me vitin e kaluar.

“Ka pasur subvencionim të OJQ-ve pa thirrje publike, e cila paraqet shkelje të rregullores së Ministrisë së Financave 04/2017 tek neni 2.1 dhe tek neni 6, pika 6.2, ku thuhet se një përfitues fizik apo juridik mund të përfitojë subvencione vetëm një herë në vit, ndërsa këtu kemi një OJQ, e cila ka përfituar tri herë brenda vitit, ndërsa tjetra OJQ dy herë në vit. Kjo paraqet një shkelje ligjore sipas procedurave. Po ashtu, edhe kuzhina qendrore ka përfituar subvencion në vlerë prej 30 mijë euro dhe e cila nuk kishte hartuar raporte kthyese financiare dhe narative në lidhje me shfrytëzimin e mjeteve dhe kjo paraqet shkelje të rëndë të kritereve sipas legjislacionit në fuqi”, ka shtuar ajo.

Në anën tjetër, asamblisti Ermal Osmani ka dhënë detaje për të gjeturat dhe rekomandimet. Ai ka thënë se këto të dhëna tregojnë për shkeljet ligjore të Komunës së Prishtinës.

“Po fillojë me mashtrimin e parë që ka tentuar të bëhet, duke keqklasifikuar në kategoritë ekonomike, ku nga buxheti për investime kapitale janë paguar 2 milionë e 453 mijë e 137 euro shpenzime që për nga natyra nuk i takojnë investimeve kapitale. Prezantim i pasaktë i llogarive të arkëtueshme me taksat e infrastrukturës, ku kemi shumë të mbivlerësuar për 98 mijë e 78 euro dhe të arkëtueshme nga lejet e ndërtimit ishin të nënvlerësuara për 250 mijë e 309 euro. Mosprezantim i saktë i detyrimeve kontingjente në raportin vjetor të financuar, ku si pasojë e dyshimeve ato ishin mbivlerësuar për 11 milionë e 847 mijë e 843 euro”, ka thënë ai.

Osmani ka shtuar se janë evidentuar shkelje edhe në ngritjet në detyrë, me ç’rast ka theksuar se të gjitha këto kanë ndodhur pa u zhvilluar proces konkurrues. Ai ka thënë se pagesat për borxhe e kamate kanë arritur shifrën mbi gjashtë milionë euro, për çka ka paralajmëruar se do t’i drejtohen organeve të drejtësisë.

“Duke i bërë thirrje kryetarit Rama për reflektim në shërbim të drejtë të qytetarëve, po i njoftojmë qytetarët se disa nga këto gjetje do t’i adresojmë te organet e drejtësisë, sepse ka indikacione të veprave penale”, ka përfunduar Osmani.

Në konferencën e asamblistëve të kryeqytetit nga radhët e LVV-së është thënë se ky raport ka rezultuar me 22 të gjetura dhe rekomandime, prej tyre pesë janë të reja, 12 të përsëritura dhe pesë pjesërisht të përsëritura nga vitet e mëhershme. Sipas tyre, këto të gjetura tregojnë për dështimin e Komunës së Prishtinës në adresimin e rekomandimeve nga viti i kaluar. /KP

Ish-ministri i jashtëm i Kosovës Enver Hoxhaj ka kritikuar kryeministrin Albin Kurti, pasi ky i fundit nuk u takua me kryeministrin e Shqipërisë, Edi Rama.

Hoxhaj, përmes një shkrimi në rrjetin social Facebook, ka thënë se Kurti sa ishte në opozitë, fliste për bashkim kombëtar dhe sot nuk mund të bashkohet në takim me Kryeministrin e Shqipërisë, Edi Rama!

“Hipokrizia politike e Albin Kurtit shpërfaqet në sjelljen e tij si të një feudali mesjetar dhe autokrati inatçor, që deri sa ishte në opozitë fliste për bashkim kombëtar dhe sot nuk mund të bashkohet në takim me Kryeministrin e Shqipërisë, Edi Rama!”, ka thënë Hoxhaj.

Mbi 1.600 persona konsiderohen ende të zhdukur nga lufta e fundit në Kosovë.

Çështja e këtyre personave është ngritur edhe në kuadër të dialogut ndërmjet Kosovës dhe Serbisë në vitin 2020, por përveç “harmonizimit të qëndrimeve” të të dyja palëve për atë çështje, nuk ka pasur ndonjë progres konkret.

Së fundi, Kryeministri i Kosovës, Albin Kurti dhe presidenti serb Aleksandër Vuçiq, në kuadër të dialogut në Bruksel, janë dakorduar për Deklaratën për të Zhdukurit, si dhe angazhimin e palëve për zbardhjen e personave të pagjetur nga periudha 1 janar 1998 deri më 31 dhjetor 2000.

Në Deklaratën për Personat e Zhdukur thuhet se jepet qasja e plotë në të gjitha materialet, shënimet, urdhrat, dokumentet, videot, regjistrimet audio dhe të gjitha dokumentet e tjera, përfshirë ato që kanë statusin “konfidenciale” dhe që janë në posedim të institucioneve të Kosovës dhe Serbisë.

Por deri më tani, nuk ka pasur asnjë hap pozitiv apo sinjale se Serbia mund të ndihmojë duke dhënë informacione për vendosdhjen e të pagjeturve.

Të vetmet gërmime që po bëhen janë ato në Kosovë.

Matiqan të Prishtinës, Podujevë, Kamenicë, së fundmi edhe në Kishnicë, janë lokacionet që po bëhet përpjekje për të gjetur trupa të pajetë.

Ndërsa gjatës javës do të fillojnë gërmimet edhe në Dragodan të Prishtinës.

Kështu ka deklaruar për Front Online, kryetari i delegacionit të Kosovës për personat e pagjetur në bisedime me Serbinë, Andin Hoti.

“Po jemi duke gërmuar në dy lokacione. Sot në fakt i kemi ekipet në vendin që quhet Kishnicë dhe shumë shpejt gjatë kësaj jave do të fillojnë edhe në Dragodan për një rast tjetër. Përveç Matiqanit, kemi qenë edhe në Podujevë, kemi qenë edhe në Kamenicë në gërmime”, thotë Hoti.

Në Matiqan, Hoti thotë se janë gjetur eshtra dhe janë në pritje të një përgjigje nga laboratori që i kanë dërguar në Hagë.

E rezultatet, sipas Hotit, mund të vonojnë deri në gjashtë muaj.

“Në Matiqan e kemi gjet një person të zhdukur, i kemi dërgu mostrat në Hagë. Në lokacione të tjera nuk kemi hasë në identifikime ende, por nuk janë përmbyll. Kjo në Kamenicë po vazhdon ende, por po na duhen informata shtesë, derisa në këtë tjetrën në Podujevë kemi me u kthy edhe njëherë. Ne i dërgojmë mostrat në laborator në Hagë, dhe kjo shkon koxha një procedurë e ka deri në identifikimin e personit, nëse është apo jo personi i zhdukur. Nuk besoj se do të kthehen shumë shpejt, sepse atje merr kohë. Herën e fundit që i kemi dërguar, na ka marrë mbi gjashtë muaj kohë”, tha ai.

Andin Hoti: Kemi urdhëresë për të gërmuar edhe në dy lokacione të tjera për të pagjeturit

Kryetari i delegacionit të Kosovës për personat e pagjetur në bisedime me Serbinë, Andin Hoti, në një intervistë ka thënë se në bazë të urdhëresës që kanë marrë janë edhe dy lokacione tjera ku dyshohet për të eshtrat e të zhdukurve gjatë luftës.

Ai ka përmendur një lokacion në fshatin Bizhtazhin të Gjakovës, ndërsa lokacionin e dytë nuk e zbuloi.

“Ne në fakt veprojmë në bazë të urdhëresave, jo informacione të lokacioneve. Urdhëresë kemi edhe për dy lokacione të tjera, njëra është Bishtazhini dhe tjetra nuk po e përmendi emrin. Ndërkaq, nuk kemi lokacione të tjera të Kosovës”, u shpreh ai.

Hoti për “Deklaratën për të Zhdukurit”: Nuk kemi informacione nga BE-ja lidhur me formimin e Komisionit

Kryetari i delegacionit të Kosovës për personat e pagjetur në bisedime me Serbinë, Andin Hoti, në një intervistë për Front Online duke folur për Deklaratën për të Zhdukurit, thotë se ajo nuk është duke u zbatuar.

Ai deklaron se as nga Bashkimi Evropian nuk kanë marrë ndonjë informacion që pritej të formohej një komision i përbashkët.

Hoti shprehet pesimist se do të ketë ndonjë përparim në këtë drejtim, tani për tani, kur Kosova po përballet me një situatë jo të mirë në veri të vendit.

“Pas rasteve të fundit në Kosovë që po ndodhin që nuk kanë të bëjnë me personat e zhdukur me ngjarjet në veri, nuk kemi marrë as nga Bashkimi Evropian ndonjë informacion deri më sot se çfarë po ndodh me formimin e komisionit të përbashkët. Sepse ai komision është garantues në një formë për zbatimin dhe implementimin e këtyre pikave të deklaratës, por duke e pasur parasysh se çfarë është duke ndodhë nuk pres në këtë gjendje që është Kosova dhe Serbia se do të ketë ndonjë përparim në këtë drejtim”, shprehet ai.