ATV

Author: ATVLive

  • BE-ja stregon nëse do të ketë takim sy me sy Kurti- Vuçiq

    BE-ja stregon nëse do të ketë takim sy me sy Kurti- Vuçiq

    Përgatiti: Driton Sadiku

    Kryeministri Albin Kurti të enjten do të qëndrojë në Bruksel, në vazhdën e dialogut me Serbinë, të ndërmjetësuar nga Bashkimi Evropian.

    Por ende nuk është konfirmuar nëse do të ketë takim sy më sy me presidentin serb Aleksandar Vuqiq, apo vetëm takime të ndara me ndërmjetësuesit.

    Një gjë e tillë nuk u bë e ditur as nga ftuesi i takimit, Bashkimi Evropian.

    Sidoqoftë, nga njohës të fushës në Kosovë ka fare pak shpresë që të ketë një takim trelateral.

    “Unë kam pritje minimale prej këtij takim, së pari nuk do të ketë takim sy më sy, do të ketë vetëm takime të ndara, e dyta takimi do të jetë sipërfaqësor, ka me qenë një tendencë për të krijuar njëfarë momentumi të ri tash pas përfundimit të pushimeve dhe kthimit në vlugun e punës, mirëpo gjendja në terren është jashtëzakonisht e tensionuar, ndonëse nuk ka trazira fatmirësisht”, tha politolog, Fitim Mulolli.

    Sido që të jenë takimet, përparim në dialog nuk besohet të ketë.

    “Nuk mund të presim një përparim të madh, ajo që mund të pritet është që të ritheksohet pajtimi për mbajtjen e zgjedhjeve, por topi mbetet në anën e Serbisë sa i përket pjesëmarrjes në zgjedhje dhe pritet që të ketë një përkushtim nga Beogradi, që subjektet serbe të marrin pjesë në zgjedhje”, tha profesori, Seb Bytyqi.

    Megjithatë, një mesazh para takimit, përfaqësuesve në dialog ua dha ambasadori gjerman në Kosovë, Jörn Rohde.

    “Takimi i nivelit të lartë më 14 shtator vjen në një moment kritik. Ne kemi nevojë për angazhimin e plotë të të dyja palëve për de-eskalimin, dialogun e ndërmjetësuar nga Bashkimi Evropian dhe demokracinë pjesëmarrëse. Marrëveshja e Ohrit duhet të zbatohet TANI. Jo më me lojëra faji. Hiqni pengesat për përparim. Koha për të vepruar për të mirën e të gjithëve”, tha Rohde.

    Hera e fundit që Kryeministri Albin Kurti e presidenti serb Aleksandar Vuqiq, udhëtuan për në Bruksel, ishte në fund të qershorit, por nuk patën takime sy më sy, vetëm ndaras me ndërmjetësuesit e Bashkimit Evropian.

  • Kosova imporon 87 milionë euro më pak nga Serbia

    Kosova imporon 87 milionë euro më pak nga Serbia

    Përgatiti: Pranvera Krasniqi

    87 milionë euro më pak, Kosova ka importuar në vitin 2023 nga Serbia.

    Sipas të dhënave zyrtare të Doganës së Kosovës, për 9 muaj, janë shpenzuar në total 154 milionë euro për blerjen e artikujve të ndryshëm, të cilat janë importuar nga shteti fqinj.

    Në rënien e importit, vlerësohet të ketë ndikuar vendimi i 14 qershorit për ndalimin e hyrjes së mallrave serbe në Kosovë.

    “Vendimi i Qeverisë ka qenë për ndalimin e futjes së mallrave serbe në territorin e Kosovës, për produktet nga vendet e tjera jemi duke bërë vazhdimisht kontrolle në cilësinë e ushqimit”, tha zëdhënësi i Agjencisë së Ushqimit dhe Veterinarisë, Lamir Thaçi.

    Mirëpo, sipas njohësit të ekonomisë, Safet Gërxhaliu, ndalimi i produkteve nga Serbia nuk është zgjidhje e duhur. Ai thotë se Kosova varet shumë sa i përket lëndës së parë.

    “Në rend të parë sa më pak importe, vihet në pyetje buxheti i Kosovës, në rend të dytë për shkak se ne importojmë shumë produkte të lëndës së parë është goditje direkt dëmton edhe eksporton, po ashtu jemi duke jetuar në kohën e inflacionit çmimet janë tu u rritë e inflamacioni po eksperimentohet në dëm të qytetarëve të Kosovës”, tha Gërxhaliu.

    Gërxhaliu, po ashtu, thotë se stabiliteti politik mes dy shteteve duhet të jetë primar, pasi që, sipas tij, ngushtë lidhet me interesimin e investitorëve të huaj.

    “Si mund të rriten investimet, kur investitorët në këtë mënyrë shohin këtë situatë, pasi emëruesi i përbashkët i zhvillimit ekonomik është stabiliteti politik, kur e kemi këtë jostabilitet dhe këto masa, imazhi i Kosovës po dëmtohet me të madhe”, tha Gërxhaliu.

    Në anën tjetër, Kosova ka rritur importin me Shqipërinë, për 28 milionë euro më shumë se në periudhën e njëjtë të vitit të kaluar.

  • Kosova përkujton viktimat e sulmit të 11 shtatorit në SHBA

    Kosova përkujton viktimat e sulmit të 11 shtatorit në SHBA

    Përgatiti: Sara Shehu

    Krerët e institucioneve të Kosovës kanë nderuar viktimat e sulmit terrorist të 11 shtatorit të vitit 2001, në Shtetet e Bashkuara të Amerikës.

    Gjatë homazheve te pllaka përkujtimore “Kosova Kujton”, kryeministri Albin Kurti së bashkë me Ministren e Jashtme, Donika Gërvalla, dhe zëvendësambasadoren e SHBA-së, Alyson Grunder, është thënë se që nga ajo kohë cilësori “terrorizëm” u bë një nga fjalët kyçe të fillimshekullit XXI.

    Në nderim të viktimave edhe liderët e partive opozitare kanë përkujtuar sulmin e 11 shtatorit.

    “Populli i Kosovës, misionet, të zgjedhurit e Kosovës, shqiptarët kudo që jeni, bashkëndjejmë me popullin amerikan, jo vetëm në këtë ditë. Përvjetori i sulmeve terroriste në tokën amerikane, një tokë e lirë e që mbrojti lirinë tonë dhe demokracinë në gjithë botën. Edhe unë bashkë me kolegë ashtu si të gjithë në këtë ditë vazhdojmë të qëndrojmë dhe qëndrojmë përjetë me Amerikën”, tha kryetari i AAK-së, Ramush Haradinaj.

    Veç homazheve, gjatë së hënës në Kosovë janë organizuar edhe disa aktivitete.

    “Prej vitit 2001 ne si shoqatë, jo vetëm si shoqatë, por si pjesëtarë të popullit të Kosovës, pjesëtarë të popullit shqiptar, kemi bërë veprime, respekte, solidarizime me popullin mik, aleat, me mikun tonë strategjik, Shtetet e Bashkuara të Amerikës. Në këtë mënyrë, kemi dashur të dërgojmë mesazhe së pari për popullin amerikan dhe institucioneve që populli i Kosovës, në veçanti populli shqiptar, është falënderues, nuk i harron veprimet e tyre dhe presim shumë përkrahje në të ardhmen. E dimë që keni bërë shumë edhe ekonomikisht, politikisht dhe ushtarakisht, mirëpo ne në emër të shoqërisë civile kërkojmë që të bëni pak më shumë. E di që herë pas here s’kemi qenë në nivelin e detyrës, mirëpo, kërkojmë nga ju dhe nga institucionet e juaja qendrore, sepse e dimë që keni forcë dhe mundësi dhe të loboni pak më shumë dhe të detyroni pesë vendet evropiane ta njohin shtetin e Kosovës ”, tha kryetari i shoqatës “Miqtë e Amerikës”, Agim Rexhepi.

    “Dua t’ju falënderoj për atë që keni bërë të gjithë këtu dhe për vëmendjen e mediave për këtë, të rinjtë, dhe përsëri ju falënderoj shumë, ju nuk e keni harruar kurrë premtimin tuaj, ndaj faleminderit”, tha Edward Anderson, drejtor i Departamentit për Sigurinë dhe Sigurinë Publike në OSBE.

    Në shenjë solidariteti zjarrfikësit në Prishtinë për disa minuta rresht aktivizuan sinjalizuesit.

    “Ne paraprakisht jemi përgatitur për këtë ditë, për 11 shtator. Në nderim të viktimave të rënë, por edhe falënderim për shtetin e Amerikës. Siç dihet një shtet i cili na ka përkrahur në kohët më të vështira, duke përfshirë këtu edhe një falënderim për ish-presidentin, Bill Clinton. Aktivitetet tona kanë qenë sot në orën 08:30 në mëngjes, e kemi bërë pastrimin e platesë dhe të shtatores të ish-presidentit Bill Clinton. Kemi bërë edhe ndërrimin e flamurit, ndërsa në orën 10:55, katër automjete të zjarrfikësve edhe me 20 trupa të zjarrfikësve kemi marrë pjesë në këtë manifestimin për 11 shtator”, tha Abdusamed Shkodra nga Brigada e Zjarrfikësve në, Prishtinë.

    22 vjet më parë, 3 mijë njerëz kanë vdekur nga sulmet terroriste, në Kullat Binjake në Nju Jork, në Pentagon dhe në një fushë në Pensilvani.

  • Kuvendi me seancë plenare, të enjten

    Kuvendi me seancë plenare, të enjten

    Përgatiti: Driton Sadiku

    Seancën e parë të sesionit vjeshtor, deputetët e Kuvendit do ta mbajnë të enjten.

    Kjo u vendos në mbledhjen e kryesisë, teksa u diskutuan edhe pikat që do të shqyrtohen.

    Megjithatë, në pjesën e dytë të ditës, seanca do të vazhdojë me diskutime për çështjen e teksteve shkollore, që opozita e kishe thirrur derisa ishin në pushim.
    Sidoqoftë, qysh në start vijuan kritikat ndaj pozitës, siç thanë, për mungesë vullneti për mbajtjen e seancave.

    Ndërkaq, nga agjenda legjislative për këtë sesion tashmë është hequr projektligji për zyrtarët publikë, pas vendimit të Gjykatës Kushtetuese se ka mangësi në këtë projektligj.

  • Në vitin 2024, planifikohet ndërtimi i tualeteve publike në Prishtinë

    Në vitin 2024, planifikohet ndërtimi i tualeteve publike në Prishtinë

    Përgatiti: Sara Shehu

    Tualetet publike në Prishtinë mungojnë prej vitesh.

    Në mungesë të tyre, qytetarët nevojat fiziologjike me raste i kryejnë në hapësira joadekuate.

    Një gjendje e tillë është edhe te mbikalimi në afërsi të shkollës së mesme të mjekësisë “Ali Sokoli”.

    Si rrjedhojë, qytetarët thonë se për shkak të kundërmimit nuk mund të përdorin këtë mbikalim.

    “Nuk e përdori mbikalimin se era është shumë e keqe, aty kryhet turlifarë nevoje personale që krijon aromë të keqe…”, thotë një qytetare.

    Mirëpo, qytetarët rrallëherë i përdorin edhe tualetet private, për të cilat duhet të paguhet 30 centë.

    “Mungesa e tualeteve po krijon situatë të keqe, sepse s’po ka ku me i kry njeri nevojat e tij fiziologjike. Nuk i përdori tualetet private, janë me pagesë, s’kom nevojë”, thotë një qytetare tjetër.

    “Duhet me pas tualete publike, sepse çështja e mungesës së tyre është bërë e bezdisshme…”, tha një qytetar.

    Por, shumë shpejt do të bëhet një zgjidhje për këtë telash të kryeqytetit. Tashmë komuna ka ndarë një shumë të mjeteve që do të adresohet për çështje.

    “Çështja e tualeteve publike pritet të zgjidhet në vitin 2024, këtë vit kemi buxhetuar 150 mijë euro për ndërtimin e tyre, megjithatë kostoja mund të arrijë deri 450 mijë, por jemi duke shikuar lokacionet se ku do të fillojë ndërtimi i tyre…”, tha drejtori i Shërbimeve Publike në Prishtinë, Ilirik Musliu.

    Mungesë të tualeteve publike kanë edhe në komunat e tjera.

  • Një i vrarë dhe një i plagosur në Podujevë

    Një i vrarë dhe një i plagosur në Podujevë

    Përgatiti: Donisa Fazliu

    Një person është vrarë dhe një tjetër është plagosur, kur disa persona hynë në një market të Podujevës, rreth orës 12:30.

    Viktima V.B., i njohur me nofkën “Dhija”, sipas dëshmitarëve që folën vetëm prapa kamerave, mbeti i vdekur nga plumbat, që u shkrepën afër arkës, brenda marketit, ku ndodheshin edhe shumë persona të tjerë.

    Derisa, bashkë me viktimën ka qenë gruaja e tij, e cila në ikje e sipër mbeti e plagosur. Sipas dëshmitarëve, vrasja ndodhi edhe në praninë e fëmijës së viktimë, i cili më pas është larguar menjëherë nga vendi i ngjarjes, nën asistencën e ekipeve mjekësore.

    I dyshuari për kryerjen e kësaj vepre penale, ndonëse është kapur nga kamerat e sigurisë, ende nuk është identifikuar dhe është në arrati.

    “Ju njoftojmë se me të pranuar informatën nga Policia, prokurori kujdestar nga Departamenti i Krimeve të Rënda, ka dalë në vendin e ngjarjes. Aktualisht, Prokuroria në koordinim me Policinë janë duke i ndërmarrë të gjitha veprimet e nevojshme hetimore, për t’i ndriçuar rrethanat e rastit, si dhe për t’i identifikuar personat e dyshuar”, thuhet në njoftimin nga Prokuroria Themelore në Prishtinë.

    Vdekjen e të riut në vendin e ngjarjes e ka konfirmuar mjeku nga qendra e mjekësisë familjare në Podujevë, Bedri Hyseni. Sipas tij, viktima është qëlluar me plumb në kokë.

    “Në momentin kur kemi arritur në vendin e ngjarjes, personi që ka qenë i shtrirë me gjakderdhje, i plagosur në kokë, ka pasë plagë me armë zjarri”, tha Bedri Hyseni, mjek i ekipit në QMF në Podujevë.

    Ndërkaq, e plagosura menjëherë pas ngjarjes është sjellë në Qendrën Klinike Universitare të Kosovës, ku i është nënshtruar një operacioni.

    “Ajo ka qenë e plagosur në regjionin trokoabdominal, gjendja e saj ka qenë e rëndë dhe momentalisht pacientja gjendet në sallën e operacionit”, tha Avdush Bajgora, shef i Qendrës Emergjente.

    Ngjarja në Podujevë e çon në 3 numrin e vrasjeve të ndodhura, vetëm brenda më pak se dy javëve në Kosovë.

  • Përfundon dëshminë zyrtari i “Human Rights Watch”

    Përfundon dëshminë zyrtari i “Human Rights Watch”

    Përgatiti: Fitim Majkovci

    Ka përfunduar dëshmia e Frederick Abrahams, para Gjykatës Speciale në çështjen ‘’Thaçi & të tjerët’’.

    Zyrtari i organizatës ‘’Human Rights Watch’’, u konfrontua nga mbrojtja për raportimet e pakonfirmuara të organizatës rreth ndalimit të dy gazetarëve serbë nga UÇK-ja.

    Pos pohimit se informacionin e kishin marrë nga mediumi serb ‘’Tanjug’’, Abrahams, para mbrojtjes foli edhe rreth dy takimeve të tij me Thaçin në periudhat 98/99.

    Ndonëse, Thaçi e kishte njoftuar Abrahamsin për krijimin e strukturave civile, sipas mbrojtjes, kështu nuk ishte raportuar nga organizata.

    ‘’Jemi në një situatë që është bërë një gjykim, kur këta persona as nuk ishin ndaluar ende, dhe kjo është bërë nga gjykata ushtarake, sipas njoftimit për shtyp, apo kësaj komunikate tuaj, kjo ka qenë njësi ushtarake. Ndërkohë, Thaçi ju flet juve për strukturat civile dhe se kërkohej kohë që të krijoheshin ato. Për ju, a ishte e qartë para, gjatë apo pas situatës, se askush nuk e kishte të qartë çfarë po ndodhte?’’, tha avokati i Hashim Thaçit, Gregory Kehoe.

    “Kemi dy pjesë mohuese, nuk e kisha të qartë, unë po merrja informacione, po botoja materiale që na jepnin, unë nuk mund të them nëse dokumentet janë të sakta. Unë këtë nuk e di, nuk mund të them, tani në dëshminë time që janë’, tha Abrahams.

    Pas pyetjeve të mbrojtjes së Thaçit, dëshmitari është përgjigjur në pyetjet shtesë nga avokati i Kadri Veselit, Ben Emmerson, lidhur me komunikatën për ndalimin e dy gazetarëve.

    “A është e vërtetë që ju nuk keni pasur asnjë dëshmi të pavarur dhe as nuk gjetët ndonjë dëshmi që vërtetonte ekzistencën e një drejtorie juridike, apo gjykate ushtarake apo prokurorësh ushtarakë, në shtator, tetor, nëntor 1999?
    A mendoni ju se ky është një shembull tjetër, kur UÇK-ja pretendonte se ekzistonin struktura që në fakt nuk ekzistonin në të vërtetë?!”, tha Emmerson.

    “Informacionin e kemi bazuar në atë çfarë na thanë. Por, nuk më kujtohet, edhe mund të ketë qenë kështu”, tha Abrahams.

    Pas përfundimit të dëshmisë së Abrahams, seanca ka vazhduar me dëshminë e dëshmitarit të ZPS-së me kodin 3827, i cili u paraqit përmes video-lidhjes.

  • Procesi BRDO Brijuni, liderët dakordohen t’i dyfishojnë përpjekjet për anëtarim në BE

    Procesi BRDO Brijuni, liderët dakordohen t’i dyfishojnë përpjekjet për anëtarim në BE

    Përgatiti: Nora Luta

    Pas takimeve bilaterale me presidentin e Kroacisë, Zoran Milanović, dhe atë të Maqedonisë së Veriut, Stevo Pendarovski, presidentja Vjosa Osmani po drejtohet drejt sallës ku do t’i takojë edhe liderët e tjerë të Ballkanit Perëndimor.

    Liderët e këtij rajoni u bashkuan në Shkup, në takimin e përvitshëm në kuadër të procesit të Bërdo-Brijunit bashkë me presidentin e Kroacisë, dhe presidenten e Sllovenisë.

    Drejtueseve të këtyre shteteve anëtare të Bashkimit Evropian, presidentja Osmani tha se u bëri të ditur për hapat e suksesshëm që i ka shënuar Kosova drejt integrimit evropian.

    Sipas saj, Kosovës duhet t’i jepet statusi i vendit kandidat nga Bashkimi Evropian.

    Ndryshe, nga viti i kaluar kur Osmani e presidenti i Serbisë, Vucic, u konfrontuan, në këtë takim Osmani tha se ishte atmosfera ndryshe, duke treguar se fokusi kryesor ishte dakordimi për çështjet e integrimit, politikave rreth ndryshimeve klimatike dhe migrimit.

    Ndërsa, rreth sanksioneve dhe situatës në veri, presidentja tha se nuk zuri shumë vend në agjendën e takimit të përbashkët, por përmendi se në takimin bilateral me Zoran Milanoviq, i kërkoi Kroacisë mbështetje në këtë drejtim.

    Se ky takim kaloi në një atmosferë konstruktive, ndryshe nga ai i vitit të kaluar, e tha edhe nikoqiri i këtij takimi, presidenti maqedonas, dhe ai i Kroacisë, i cili bashkë me të parën e Sllovenisë, dolën në një konferencë për media.

    Ata treguan se u dakorduan që t’i shtojnë përpjekjet e tyre për anëtarësimin e vendeve të Ballkanit Perëndimor në BE, e ndërmarrjen e hapave për të ndalur emigrimin e të rinjve.

    Presidenti kroat, Zoran Milanoviq, tha se dialogu mes vendeve të rajonit është i rëndësishëm, duke e përmendur edhe Kosovën e Serbinë, si çështje të hapur në këtë rajon.

    Ndërkohë, më butë në deklaratat rreth Kosovës ndryshe nga viti i kaluar, pas samitit është shprehur presidenti i Serbisë, Aleksandar Vuçiq, duke thënë se diskutimet për Kosovën dhe Serbinë janë lënë për të enjten në Bruksel, kur edhe pritet të zhvillohet takimi i nivelit të lartë, i ndërmjetësuar nga Bashkimi Evropian.

  • ​Një tërmet me magnitudë 6 ka goditur Indonezinë

    ​Një tërmet me magnitudë 6 ka goditur Indonezinë

    Një tërmet me magnitudë 6 goditi Indonezinë të hënën, sipas Shërbimit Gjeologjik të SHBA-së (USGS).

    Epiqendra e tërmetit ishte 38 kilometra (afërsisht 23 milje) në verilindje të Ternate në ishullin verior të Maluku, në një thellësi prej 162.5 kilometrash (100 milje), sipas USGS.

    Nuk pati raportime të menjëhershme për viktima apo dëme materiale.

    Tërmeti erdhi vetëm disa ditë pasi një tërmet me magnitudë 7 goditi Marokun, mijëra kilometra larg në Afrikën e Veriut, në jugperëndim të qytetit të Marrakech, ku la të vdekur rreth 2,500 persona. (AA)

  • Rrëfimi drithërues i burrit nga Kosova, tregon si i vdiq gruaja nga pakujdesia e mjekëve në Shqipëri

    Rrëfimi drithërues i burrit nga Kosova, tregon si i vdiq gruaja nga pakujdesia e mjekëve në Shqipëri

    39-vjeçari nga Kosova, Fisnik Habibi, në emisionin STUDIO A në ATV, ka rrëfyer tragjedinë e të rëndë që i ka ndodhur në jetën e tij.

    Ai aktualisht gjendet në Milano derisa shkuarja e tij atje ishte prej zorit. Gruaja e tij, e cila po sillte në jetë fëmijën e tretë, u operua nga mjekët në Berat të Shqipërisë.

    Operim i cili kaloi me vështirësi dhe mundime, derisa gjendja e gruas pas lindjes vetëm sa shkonte keqësohej. Kështu ata u detyruan të nisen për në Itali, me shpresë që Miljeta Sadushi do të gjente shërim, por për fat të keq ajo nuk arriti të mbijetojë. Miljeta vdiq duke lënë pas bashkëshortin me tre fëmijë të vegjël në shtëpi.

    Fisniku, në një lidhje të drejtpërdrejt në STUDIO A, ka rrëfyer se doktorët nuk ishin transparent dhe se çdo gjë dukej disi e fshehur në raport me shëndetin e bashkëshortes së tij, tashmë të ndjerë.

    “Po na duhet të jemi të fortë për këta tre fëmijë që më la, po për mua, mundimi më i madh është se e çova tamam me shëndetin e mirë, çdo vizitë e ka ba mirë deri në ditën që i erdhi koha e lindjes. Pas lindjes nuk ishte mirë në asnjë minutë me dhimbje, me gjëra. Doktorët filluan që ‘jo se është operim, edhe disa kalojnë dhimbje, jo sot, jo nesër’. U bënë dhjetë ditë, erdhi puna që iu keqësua gjendja, pastaj më thotë doktoresha që duhet operuar edhe një herë. Pastaj nga gjinekologët, filloi puna me ardhë te kirurgu. Në ato momente u operu për herën e dytë se unë premtuam që nuk ka naj diçka të madhe dhe do të rregullohet, edhe me besim të ta, ndërhynë me operimin e dytë. Pas operimit të dytë e pamë që nuk ka përmirësim. Doktoresha vajti me pushime në Amerikë, ma la gruan aty, me gjasë të kalojë te doktorët tjerë në përgjithësi”, tha Fisniku. /atvlive.tv

    Rrëfimin e tij të plotë e gjeni në videon më poshtë:

    Emisionin e plotë e gjeni në videon më poshtë: