Author: ATVLive

Përgatiti: Pranvera Krasniqi

Për ta rritur vetëdijesimin për rëndësinë e mamografisë, Komuna e Prishtinës ka veshur një autobus të linjës 4 me ngjyrë rozë.

Të gjithë pacientët që do të bëjnë shërbimin e mamografisë do të pajisjen me një biletë të veçantë që do t’ua mundësojë atyre të udhëtojnë falas me transportin publik, gjatë muajit tetor.

Po ashtu, falas shërbimi i mamografisë do të ofrohet në tri Qendra të Mjekësisë familjare në kryeqytet.

“Qëllimi ynë është që bashkërisht të promovojmë autobusin rozë në Prishtinë i cili ka për qëllim promovimin dhe vetëdijesimin e grave për bërjen monografisë. Prishtina këtë vit i është bashkëngjitur 140 qyteteve në botë, si ‘Prishtina 2023’, e cila ka filluar në vitin 1983 si aktivitet, do të bëhet në QKMF, lagjen “Dardania” dhe në QMF “Veternik”, tha drejtori i shëndetësisë në Prishtinë, Izet Sadiku,.

Derisa muaji i ardhshëm njihet ndryshe edhe si muaji i ndërgjegjësimit për kancerin e gjirit, udhëheqësja e aktiviteteve, Kristale Rama, u ka bërë thirrje grave e vajzave t’iu nënshtrohen kontrolleve, pasi, sipas saj, janë shumë të rëndësishme.

“Ne duam gjithashtu t’i inkurajojmë gratë që t’i marrin seriozisht sportet dhe ushtrimet e përditshme, sepse janë pjesë e kujdesit shëndetësor dhe po bëjmë gjithçka që mundemi për t’u siguruar që gratë të jenë të shëndetshme dhe po japim një shembull të mirë për vajzat”, tha Rama.

Iniciativa e Komunës së Prishtinës është mirëpritur edhe nga qytetarët.

“Shumë mirë, është rregull për të gjithë, sidomos për gratë e tjera është e përsosur, po duhet bërë kontrolle me rregull. Ato duhen bërë me vetëdëshirë se nuk bën, po ne e lëmë pas dore”, tha Rajmonda Pera, qytetare.

Sipas të dhënave të fundit, gjatë këtij viti për 10 % është rritur numri i rasteve me kancer të gjirit.

Edicionin Qendror të lajmeve në ATV e gjeni në videon më poshtë:

Përgatiti: Armand Hoti

Nga 184 milionë në 251.5 milionë. Investimet e huaja direkte në Kosovë, në katërmujorin e parë të vitit 2022, u rritën për afro 70 milionë euro, krahasuar me katërmujorin e parë të vitit që lamë pas.

Referuar të dhënave të Bankës Qendrore të Kosovës, Gjermania prin me investime të huaja direkte në Kosovë dhe ndiqet nga Zvicra dhe shtete të tjera ku jetojnë një numër i konsiderueshëm i shqiptarëve.

Në raportin e Vlerësimit të Ekonomisë për tremujorin e parë të vitit 2023, sipas BQK-së, një pjesë e madhe investimeve të huaja direkte në Kosovë, janë të orientuara në sektorin e patundshmërisë, i cili pasohet nga sektori financiar dhe ai i sigurimit.

Konstatimin e BQK-së e mbështet eksperti i ekonomisë, Safet Gërxhaliu.

“Vetë fakti që sot investimet e huaja direkte po quhen shumë më shumë investime të diasporës në patundshmëri sesa që janë investime konkrete që gjenerojnë vende të reja të punës, që përmirësojnë bilancin e pagesave, përmirësojnë imazhin e Kosovës. Investime të tilla po mungojnë”, tha Gërxhaliu.

Profesori universitar, Fidan Qerimi, thotë se Kosova duhet të shfrytëzojë sektorë të tjerë, në mënyrë që të nxisë rritje ekonomike të qëndrueshme dhe të joshë investitorë të jashtëm.

“Zhvillimi ekonomik nuk vjen nga ndërtimet, zhvillimi ekonomik duhet të orientohet në prodhim… padyshim Kosova ka resurse natyrore dhe mbitokësore jashtëzakonisht shumë dhe ne nuk i kemi promovuar ato”, tha Qerimi.

Ndërsa, eksperti Gërxhaliu thotë se zhvillimi ekonomik po nxitet më shumë nga sektori privat se sa nga institucionet shtetërore.

“Sot do të isha personi më i lumtur nëse juve do të mund t’ua numëroja pesë investime të huaja në dy vitet e fundit… Ka vërtet sektorë të shumtë që mund të jenë atraktivë. Sot zhvillimi ekonomik është më tepër në mëshirën e sektorit privat sesa institucioneve”, tha Gërxhaliu.

Lidhur me kritikat e ekspertëve, ATV-ja ka dërguar pyetje në Ministrinë e Ekonomisë, mirëpo, nga institucioni nuk kthyen përgjigje. Ndërkohë, partia në pushtet, pas publikimit të këtij raporti u mburr në rrjete sociale me rritjen e investimeve të huaja direkte.

Edicionin Qendror të lajmeve në ATV e gjeni në videon më poshtë:

Përgatiti: Driton Sadiku

Dibran Behrami është ndër të paktët banorë nga Bistrica e Leposaviqit, që nuk e ka lëshuar vendlindjen.

Por ndonëse vendosi të qëndrojë në fshat, mezi ia del të jetojë për shkak të kushteve të rënda ekonomike.

Shtëpinë që ka e ndan bashkë me vëllain, ndonëse thotë se ajo nuk i plotëson kushtet për jetesë.

“Unë këtu jetoj, as nuk kam kuzhinë, banjë nuk kam, në koritë po duhet mu pastru se nuk po kam ku”, tha Behrami.

Shpresa që do t’i ndërtohej një shtëpi e re, thotë se iu rrit kur Ministria e Administrimit të Pushtetit Lokal, hapi thirrjen për aplikim për ndërtimin e shtëpive për pjesëtarët e komuniteteve joshumicë.

Megjithatë, shpresa iu shua kur nuk u përzgjodh nga MAPL-ja, për çka dyshon se kishte parregullsi.

“Dy herë më kanë thanë me apliku, dy herë kam apliku dhe s’kam fitu, ata që kanë pas shtëpi nga 3-4 kat kanë fitu, ndërsa unë që nuk kam shtëpi as në Mitrovicë e as në Bistricë, unë jo, as unë e as vëllai. Ka pas hile a unë gjithmonë këtu kam ndenjtë”, tha Behrami.

Edhe në fshatin Koshtovë, ka disa familje që nuk kanë përfituar nga programi i MAPL-së. Ani pse jo para kamerës, edhe ata pretendojnë se kishte parregullsi në përzgjedhje.

Në një përgjigje përmes telefonit, ministri i MAPL-së, Elbert Krasniqi, tha se kanë dal përsëri në terren për t’i verifikuar aplikuesit.

“E di që komisioni ka dalë edhe një herë në verifikim se kur i dorëzon dokumentet është tjetër, por kur del në vend të ngjarjes e sheh më mirë, dhe e di prej vizitës që e kam pasur në vend të ngjarjes, që kanë ndryshuar rrethanat”, tha Krasniqi.

Në listën e përfituesve të publikuar nga Ministria, figurojnë 57 familje që janë përzgjedhur për ndihmë, ndërkohë që shuma e ndarë nga MAPL-ja për këtë projekt në gjithë Kosovën, është 3 milionë euro, 2 milionë për ndërtim të shtëpive dhe 1 milion për renovime.

Edicionin Qendror të lajmeve në ATV e gjeni në videon më poshtë: