Author: ATVLive

Ish-kryetari i Komunës së Mitrovicës, Agim Bahtiri, ka dhënë lajmin e hidhur për vdekjen e nënës së tij.

Përmes një postimi në rrjetin social Facebook, Bahtiri tha se nëna e tij vdiq në moshën 93-vjeçare, teksa bëri të ditur se ceremonia e varrimit do të mbahet të shtunën në orën 12:30 në varrezat e fshatit Gushavc.

“Mungesa jote, nanë, do të më përcjellë tërë jetën, e këshillat e tua, amanetet e fjalët e mira do t’i mbaj gjithmonë në zemër, si vlerën më të çmuar. Faleminderit stafit mjekësor që bënë të pamunduren për shpëtimin e jetës së nënës sime, faleminderit të gjithëve për telefonatat e pafundme por ky është caktimi i Allahut. Ceremonia e varrimit mbahet nesër (23.09.2023) në varrezat e fshatit Gushavc, me drekë (12:32)”, shkroi Bahtiri.

Mjekët nga Turqia, në bashkëpunim me stafin e mjekëve dhe infermierëve nga klinikat e Qendrës Klinike Universitare të Kosovës (QKUK), kanë kryer 12 operacione kardiokirurgjike tek fëmijë dhe 26 raste në sallën e kateterizimit në kuadër të Klinikës së Kardiologjisë.

Operacionet dhe ndërhyrjet e tjera po vazhdojnë edhe gjatë ditës së sotme.

Drejtori i përgjithshëm i ShSKUK-së, Elvir Azizi, gjatë ditës së sotme ka pritur ekspertët nga Turqia, të cilët i ka falënderuar për punën e shkëlqyer që kanë bërë dhe po bëjnë në trajtimin e fëmijëve kosovarë.

“Gjatë takimit me mjekët dhe stafin tjetër nga Turqia, ata kanë shprehur kënaqësinë e tyre që patën mundësi t’i trajtojnë fëmijët nga Kosova, duke shprehur falënderimin edhe për stafin vendor të klinikave që janë treguar shumë bashkëpunues”, thuhet në njoftimin e QKUK-së.

Ekipi i mjekëve po qëndron në Kosovë në bashkëpunim dhe mbështetje të organizatës Muntada Aid, Kabir Miah, kurse koordinimin punës e ka bërë dr. Ramush Bejiqi.

Sipas njoftimit një delegacion tjetër i mjekëve dhe ekspertëve nga Shtetet e Bashkuara të Amerikës, pritet që në muajin shtator të vijë në Kosovë, për të operuar fëmijë të tjerë që kanë probleme me zemër.

“Këto bashkëpunime po mundësohen në kuadër të planit që ka Ministria e Shëndetësisë dhe ShSKUK për trajtim të fëmijëve dhe zhvillim të shërbimeve që lidhen me ofrimin sa më cilësor të shërbimeve për qytetarët”, thuhet në njoftim.

Zëvendësshef i seksionit për bashkëpunim të BE-së në Kosovë, Alessandro Biancardi ka deklaruar se sanksionet e vendosura nga Bashkimi Evropian për Kosovën, do të largohen pasi qeveria të japë përshkallëzimin në përputhje me rekomandimin e BE-së.

Ai në konferecën e Ministrisë së Ekonomisë, me rastin e lansimit të “Thirrjes publike për subvencionim të pajisjeve efiçiente për ngrohje” të financuar nga Bashkimi Evropian (BE).

“Stabiliteti politik është kyç për të siguruar prosperitetin e Kosovës. Situata aktuale politike na bën thirrje të gjithëve që të fokusohemi në de-përshkallëzimin e tensionit në veri. Në këtë kontekst, BE-ja ka miratuar një sërë masash për të bërë të qartë një mesazh dhe ka pezulluar dispozitën për ndihmën e re financiare për Kosovën. Kjo është thënë, dua të theksoj sërish, se ky është një hap i kthyeshëm dhe shkalla jonë e plotë e ndihmës financiare dhe angazhimit politik do të rifillojë sapo qeveria të japë përshkallëzimin në përputhje me rekomandimin e BE-së. Ne sinqerisht shpresojmë se do të jemi në gjendje t’i lëmë pas shumë shpejt të gjitha këto dhe do të kthehemi në fokusin tonë, në reformat që janë kritike për afrimin e Kosovës drejt BE-së.”, u shpreh ai.

I dërguari i Shteteve të Bashkuara të Amerikës (SHBA) për Ballkanin Perëndimor, Gabriel Escobar shpreson se të paktën në mënyrë bilaterale, Shtetet e Bashkuara të mund të punojnë me Kosovën për të gjetur një mënyrë për t’i hequr ato masa në vitin 2024.

“Nuk do të thosha masa. Do të thosha pasoja. Tani, ju them se pasojat, me të cilat ballafaqohet Kosova, është se nëse ata refuzojnë të angazhohen me Bashkimin Evropian, Bashkimi Evropian nuk do të angazhohet për ndihmë shtesë dhe masa shtesë për integrim. Shikoni, unë mendoj se këto masa janë duke pasur ndikim në Kosovë dhe në ekonominë e Kosovës. Shpresoj që të paktën në mënyrë bilaterale, Shtetet e Bashkuara të mund të punojnë me Kosovën për të gjetur një mënyrë për t’i hequr ato masa në vitin 2024. Kështu që, ne do të vazhdojmë të punojmë me Kosovën për ta afruar me Bashkimin Evropian. Por, ne do të kishim dëshirë të shihnim një vullnet politik dhe lëvizje në atë drejtim, gjithashtu….Jo, jo… Kjo është për keqardhje. Pra, dua të them, këto masa janë të pacaktuara derisa të ketë një lëvizje drejt progresit si në [Marrëveshjen e] Ohrit, ashtu edhe në një plan shtensionimi”, ka thënë sot ai.

Përfaqësuesi i komunitetit egjiptian, ish-deputeti Veton Berisha po pretendon se në një libër shkollor në Kosovë ka përmbajtje ofenduese e raciste.

Reagimi i tij ka të bëjë me librin “Shoqëria dhe mjedisi” e klasës së katërt e botuar nga shtëpia botuese ‘Albas’, e cila, sipas tij, u referohet tri komuniteteve jo-shumicë në Kosovë, rom, ashkali dhe egjiptian, si komunitet RAE.

“Si ka mundësi një ministri siç është ajo e Arsimit, një shtëpi botuese sic është ajo ‘Albas’ dhe një autor sic është Vllaznim Balidemaj, mos me pas njohuri që termi famëkeq RAE që është ofendues kur i referohet edhe komunitetit egjiptian bashkë me ata rom dhe ashkali”, tha Berisha, njofton klankosova.tv.

Ai theksoi se “dihet shumë qartë se komuniteti egjiptian është komunitet i veçantë i cili jeton tradicionalisht në Kosovë, ka identitet të tij dhe është kategori kushtetuese dhe ligjore në Kosovë”.

Berisha kërkon nga Ministria e Arsimit, Shkencës, Teknologjisë dhe Inovacionit që deri në korrigjimin e tij, ta largojë atë libër nga përdorimi.

Edhe pse Komuna e Prishtinës kishte paralajmëruar që sot ne “Dita pa Makina” për 5 orë, sheshi i kryeqytetit do të zgjatej deri tek rrethi me flamur, duke ndaluar qarkullimin e veturave deri në orën 15:00, megjithatë biçikletat dhe trotinetet filluan të largohen nga ora 12:00.

ATV ka siguruar pamjet nga vendi i ngjarjes ku po hiqeshin biçikletat dhe trotinetet, të destinuara për t’u përdorur pa pagesë nga qytetarët me rastin e shënimit të “Ditës Pa Makina”.

Deri më tani, nuk është bërë asnjë njoftim zyrtar lidhur me arsyen e largimit të tyre të parakohshëm. /atvlive.tv