Mijëra qytetarë janë mbledhur për t’i dhënë lamtumirën e fundit, policit të vrarë, Afrim Bunjaku, dje në veri të Mitrovicës.
Varrimi i heroit më të ri të Kosovës do të bëhet në fshatin e tij të lindjes, Samadrexhë të Vushtrrisë, dune nis nga ora 16:00. Ndërkohë, është parë edhe Rifat Jashari, si përfaqësues i familjes Jashari.
Po ashtu, në këtë varrim po marrin pjesë edhe ambasadori amerikan Jeffery Hovinier, shefi i zyrës së BE-së në Prishtinë, Tomas Szunyog, si dhe përfaqësues të tjerë.
Drejtori i Policisë së Kosovës, Gazmend Hoxha, ka thënë se operacioni i djeshëm i Policisë në veri ka qenë më i suksesshmi që nga paslufta, raporton Ekonomia Online.
Ai ka treguar edhe për rrjedhën e sulmit terrorist, ku mbeti i vrarë polici Afrim Bunjaku, u plagos një polic dhe u lëndua një tjetër.
Hoxha ka thënë se Policia është koordinuar me EULEX-in dhe KFOR-in, e se vazhdimisht kanë kërkuar dorëzimin e sulmuesve. Hoxha, ka thënë se në mesin e të dyshuarve ka qenë edhe Milan Radojçiqi.
“Unë do t’i jap disa prej të dhënave që ndërlidhen me operacionin e djeshëm, operacioni më i madh dhe i suksesshëm që nga paslufta deri më tash. Dje me datë 24.9.2023 një ekip i policisë me të arritur te ura e fshatit të njohur Banjsëk, ka hasur në një bllokim të rrugës nga dy kamion pa traga të braktisur. Ekipi i policisë deri sa po raportonte për bllokim të rrugës të njejtit janë sulmuar nga persona të pa identifikuar me arme të zjarrit dhe mjete shpërthyese. Të dyshuarit janë larguar në drejtim të fshatit Banjskë…”.
“Menjëherë pas sulmit terrorist, ekipet e policisë në koordinim të vazhdueshëm me EULEX-in dhe KFOR-in kanë ndërmarr të gjitha veprimet për lokalizimin e përgjegjësve për sulm terrorist”.
“Gjatë monitorimit të pamjeve brenda manastirit janë vërejtur edhe disa persona civil të cilët nuk janë lejuar që të largohen nga personat e armatosur, duke ngritur dyshimin e bazuar që personat civil do të përdoren nga grupi i armatosur si pengje”.
“Policia në mënyrë të vazhdueshme ju ka bërë thirrje të dyshuarve të armatosur që të dorëzohen, të njëjtit në vazhdimësi kanë shtënë me armë zjarri të kalibrave të ndryshëm edhe me raket-hedhës në drejtim të policisë”, ka thënë Hoxha, pas prezantimit të armatimit që u gjet në Manastirin e Banjskës.
“Në një nga automjete Mercedes G-klas me targa BG-1107YY është gjetur një dokument i aplikimit të lejes së armës së personit Milan Rajdoqiq. Njëherit nënkryetar i Listës Serbe i dyshuar për përfshirje në shumë raste kriminale në Kosovë, dokumenti është i lëshuar nga autoritete serbe, dhe kjo ngrit dyshimet që në mesin e personave të armatosur dhe të uniformuar ka qenë edhe vete Milan Rajdoçiq”.
Një ditë pas zhvillimeve në veri të Kosovës, Policia ka thirrur konferencë për media, ku do të prezantohet një arsenal armësh të llojeve dhe kalibrave të ndryshëm, uniforma dhe pajisje logjistike të konfiskuara gjatë aksionit policor.
“Po takohemi dy orë para se t’ia japim lamtumirën e fundit heroit Afrim Bunjaku që u vra nga terroristët e dirigjuar nga Beogradi dhe Vuçiqi. Ata nuk ishin civilë, por njësi speciale, të mbështetura nga Serbia. Ata përveç aftësive dhe armatimit, kanë pasur edhe mjetë të rënda. Falë profesionalizmit të PK, plani i tyre ka dështuar. Në shkëmbimin e zjarreve kanë mbetur së paku 3 të vrarë, të gjithë me uniforma, ndërsa janë arrestuar dy të tjerë të uniformuar dhe katër të tjerë. Asnjë person civil nuk është lënduar nga ky aksion. Sipas informatave, gjashtë terroristë po trajtohen në Novi Pazar dhe kërkojmë nga Serbia t’i dorëzojë. Çfarëdo pjesëtari që ka arritur të ikë në Serbi, kërkojmë nga Serbia ta dorëzojë. Në objektet brenda janë gjetur harta dhe plane për organizimin e gjatë dhe të mirë menduar. Ato janë dëshmi që nuk kemi të bëjë me organizime lokale. Edhe nga ekspertë është vërtetuar se për këto organizime duhen së paku disa muaj. Nuk ka të bëjë më organizim të shpejt. Kemi gjetur edhe dokumente të kriminelit Radoiçiq, që dëshmojnë pjesëmarrjen e tij në këtë aksion.”, tha Sveçla.
Ministri i Punëve të Brendshme, Xhelal Sveçla, ka thënë se kanë informacione se 6 terroristë të plagosur po trajtohen në spitalin e Novi Pazarit.
Ai ka kërkuar nga Serbia që t’i dorëzojë ata dhe cilindo pjesëtar që ka arritur të ikë në Serbi.
“Sipas informatave të deritanishme, 6 terroristë të plagosur po trajtohen në spitalin e Novi Pazarit dhe kërkojmë nga Serbia që ata t’i dorëzojnë menjëherë te autoritetet e Kosovës, që t’i përgjigjen drejtësisë për aktet terroriste. Poashtu për çfarëdo pjesëtari I këtij grupi që ka arritur të ikë në Serbi, kërkojmë nga Serbia që ta dorëzojë”, tha Sveçla.
Sekretari amerikan i Shtetit, Antony Blinken, ka thënë se Shtetet e Bashkuara e Bashkuara të Amerikës e respektojnë dhe e njohin rolin e Policisë së Kosovës si reaguese e parë në situata emergjente dhe krize.
Blinken, shtoi se Policia e Kosovës ka përgjegjësi të plotë për zbatimin e sundimit të ligjit në Republikën e Kosovës.
“Policia e Kosovës ka përgjegjësi të plotë për zbatimin e sundimit të ligjit në Republikën e Kosovës. Shtetet e Bashkuara e njohin dhe respektojnë rolin e Policisë së Kosovës si reaguese e parë në situata emergjente dhe krize”, ka thënë Blinken.
Ai gjithashtu dënoi sulmet ndaj Policisë së Kosovës, ku mbeti i vrarë një polic.
“Shtetet e Bashkuara të Amerikës dënojnë ashpër sulmet e koordinuara të dhunshme ndaj Policisë së Kosovës pranë Manastirit të Banjskës më 24 shtator dhe shprehin ngushëllime të thella për familjen e rreshterit të Policisë së Kosovës të vrarë në krye të detyrës”.
Sekretari amerikan i bëri thirrje Kosovës dhe Serbisë që t’i kthehen dialogut.
“Autorët e këtij krimi duhet të mbajnë përgjegjësi nëpërmjet një procesi hetimor transparent. Ne i bëjmë thirrje qeverive të Kosovës dhe Serbisë që të përmbahen nga çdo veprim apo retorikë që mund të nxisë tensionet dhe të punojnë menjëherë në koordinim me partnerët ndërkombëtarë për të de-përshkallëzuar situatën, për të garantuar sigurinë dhe sundimin e ligjit dhe për t’u kthyer në dialogun e lehtësuar nga BE-ja”.
“Shtetet e Bashkuara vlerësojnë koordinimin e ngushtë të Policisë së Kosovës me Misionin e BE-së për Sundimin e Ligjit në Kosovë dhe me Forcën e NATO-s në Kosovë, veçanërisht në garantimin e sigurisë së civilëve në vendngjarje. Ne do të vazhdojmë të monitorojmë situatën dhe të koordinohemi me të gjithë të përfshirët”.
Duke komentuar sulmet e formacioneve ndaj Policisë së Kosovës në veri të vendit kryetarja e Lëvizjes Evropiane të serbëve të Kosovës, njëherësh edhe këshilltarja e ministrit për Komunitete e Kthim në Qeverinë e Kosovës, Rada Trajkoviq, ka thënë se në veri po zhvillohet “një luftë e pamëshirshme”.
Trajkoviq, ka shtuar Beogradi nuk ishte i befasuar nga konflikti i 24 shtatorit, që ndodhi në fshatin Banjskë, të Zveçanit (mes policisë dhe formacionit kriminal).
Këshilltarja në Qeverinë e Kosovës ka theksuar se dikush ka negociuar për të nxjerrë atë formacion kriminal prej Kosovës.
“…Është mirë që dikush negocioi dhe punoi për ta nxjerrë atë grup nga Kosova”, ka thënë ajo për “N1“.
Sipas saj, ka shumë gjasa që përfaqësuesit ndërkombëtarë në thelb kanë ndihmuar në nxjerrjen e njerëzve që ishin të vendosur të luftonin deri në fund.
“Përgatitja e policisë së Kosovës është në nivel të lartë, si mendoni se do të dukej Serbia sot po të kishim 30 serbë të vrarë, në anën tjetër shqiptarë të vrarë. “Çfarë do të ishte kjo?” pyeti ajo.
Sipas saj, pjesëtarët e policisë së Kosovës sigurisht që nuk do të punonin në një plan për nxjerrjen e njerëzve që vranë kolegun e tyre.
“Ata mund të jenë vetëm në Serbinë qendrore dhe të merren nga autoritetet e sigurisë – BIA, policia, gjyqësori, në mënyrë që të kryhen procedura që do t’i thërrasin këta njerëz në përgjegjësi”, ka thënë Trajkoviq, duke theksuar se shteti përgjegjës duhet të përcaktojë kush qëndron pas tyre.
Trajkoviq ka thënë se në veri të Kosovës po zhvillohet një “luftë e pamëshirshme” dhe se Beogradi nuk ishte i befasuar nga sulmi i së dielës, por e pa se “aksioni nuk ishte i përgatitur sa duhet dhe se do t’i shkaktonte një goditje të madhe Beogradit”.
“Prandaj kishte heshtje, prandaj të gjithë hoqën dorë nga serbët nga Kosova, fjalë për fjalë i lanë të vetëm”, citohet të ketë thënë Trajkoviq për ngjarjet në veri të Kosovës në fshatin Banjskë
“Sot kemi tre serbë të vrarë, ka zëra për më shumë, kam informacione që thonë se ka më shumë”, citohet të ketë thënë më tej ajo.
Ish-kryetari i Prishtinës, Shpend Ahmeti, ka komentuar takimin e presidentit të Serbisë, Aleksandar Vuçiq me ambasadorin e Rusisë në Serbi, Bocan-Harchenko, një ditë pas sulmit terrorist ndaj Policisë së Kosoëvs në veri të vendit.
Ahmeti ka treguar dy skenarët e mundshëm që janë diskutuar në takimin e Vuçiqit me ambasadorin rus.
Ahmeti ka thënë se skenari i parë është se janë diskutuar humbjet ose fitimet e “një plani të dështuar”.
Ndërsa skenari i dytë, sipas Ahmetit është që “Vuçiq donte të dinte nëse FSB ishte përfshirë në një op. ai nuk e dinte”
Shkrimi i Ahmetit në rrjetin social “X” (ish-Twitter):
Takimi i parë i Vuçiqit sot ishte me ambasadorin rus. Bocan-Harchenko. Vuçiq tha se ka diskutuar për spastrimin etnik të serbëve në Kosovë.
2 skenarë të mundshëm
– diskutuan fitimet/humbjet pas një plani të dështuar
– Vuçiq donte të dinte nëse FSB ishte përfshirë në një op. ai nuk e dinte
The first Vucic meeting today was with Russian Amb. Bocan-Harchenko. Vucic said that he discussed the ethnic cleansing of Serbs in Kosovo.
2 possible scenarios
– discussed gains/losses after a Failed Plan
– Vucic wanted to know if FSB was involved in an op. he did not know of pic.twitter.com/qijslbwy4V— Shpend Ahmeti (@ShpendA) September 25, 2023
Sekretari amerikan i Shtetit, Antony Blinken, tha se SHBA-ja dënon fuqishëm sulmet ndaj Policisë së Kosovës në veri të shtetit, duke u bërë thirrje qeverive të Kosovës dhe Serbisë që të ulin tensionet.
“Autorët e këtij krimi duhet të mbahen përgjegjës përmes një procesi transparent të hetimit”, tha Blinken përmes një deklarate.
Në orët e hershme të së dielës, Policia e Kosovës u sulmua nga një grup i personave të maskuar dhe armatosur, pasi autoritetet e rendit tentuan të largonin barrikadat e vendosura në Banjskë të Zveçanit.
Si pasojë e përleshjeve, zyrtari policor, Afrim Bunjaku, u vra dhe disa të tjerë u plagosën.
Grupi i armatosur më pas u strehua në manastirin e Banjskës dhe gjatë ditës u përlesh me Policinë e Kosovës.
Të dielën, autoritetet thanë se tre sulmues u vranë, ndërkaq më 25 shtator u raportua se është gjetur trupi i pajetë edhe një sulmuesi tjetër të dyshuar. Ndërkaq, gjashtë persona janë arrestuar.
Kryeministri i Kosovës, Albin Kurti, i ka përshkuar sulmuesit e armatosur si “një njësi e organizuar profesionale, që ka ardhur për të luftuar në Kosovë”.
Presidenti i Serbisë, Aleksandar Vuçiq, tha se personat e armatosur ishin serbë lokalë të Kosovës, “të cilët nuk mund të vuanin më terrorin e Kurtit”.
Vuçiq e dënoi vrasjen e policit të Kosovës, duke thënë se ajo “nuk mund të justifikohet”, por mohoi se Beogradi kishte ndonjë lidhje me sulmin.
Një ditë pas përleshjeve në veri, situata në këtë zonë të Kosovës – të banuar me shumicë serbe – raportohet se është e qetë, por qasja për në fshatin Banjskë në Komunën e Zveçanit është ende e mbyllur nga Policia e Kosovës. /rel
Kolegu i rreshterit Afrim Bunjaku, i cili u vra të dielën në detyrë, polici Avni Behrami, tha se të gjithë do ta ndjekin rrugën e kolegut të tij, tashmë i nderuar nga presidentja Vjosa Osmani, me titullin “Hero i Kosovës”, raporton EO.
Behrami, duke treguar për momentet kritike të asaj nate, tha se së bashku me rreshterin Bunjaku kanë qenë kolegë të pandashëm dhe se është pishman që nuk ka qenë së bashku me të në natën që ai është vrarë.
“Ka qenë një epror, një prijës shumë i mirë, shumë i sjellshëm i cili ka kontribuar shumë mirë vendit e ka shprehur atë vullnetin e pastër edhe ndaj kolegëve edhe qytetarëve. Për ne, nuk është lehtë me humb një rreshter si Afrimi, për ne është një inkurajim shumë i madh që e kemi pasur”.
“Ai do të jetë i përhershëm, ne do të ndjekim rrugën e tij, do të vazhdojmë në shërbim të atdheut ne çdo pjesë të Kosovës pa dallim”, tha ai.
Behrami ka dhënë detaje se si ai dhe Bunjaku kanë pasur detyra të ndryshme atë natë, e se “i ka mbetur pikë qysh nuk qëlloi me të në atë moment”.
“Historia e ndërrimit të fundit kemi qenë se bashku deri në orët e vona dhe më është dhënë një detyrë tjetër të ura e Bistricës. Atje kam shërbyer deri vonë. Ndërkohë stacioni ka pranuar një thirrje tjetër që rruga ka qenë e bllokuar. Ai së bashku me disa koleg të tjerë janë nisur në atë drejtim dhe në ballafaqim me ata kriminelë ai ka ra heroikisht aty duke mbrojtur vendin, duke mbrojtur pjesën e Kosovës”.
“Unë kam jetuar më të, kam punuar më të ndoshta edhe kafshatën e fundit bashkë e kemi hëngër. Më ka mbet pikë se qysh nuk qëllova në atë moment, me dhënë atë kontributin edhe unë, ndoshta edhe unë isha shkua më të po të paktën të kisha qëlluar më të”, tha ai.
Avokati Naim Rudari, në emisionin A LIVE në ATV, tha se armatimit të sekuestruar fillimisht do t’i bëhet një verifikim i detajuar, pastaj institucionet do të vendosin nëse ky armatim do të përdoret për nevoja të brendshme apo të shkatërrohet.
“Para se gjithash nevojitet që të bëhet verifikim i detajshëm se nga kanë ardhur dhe më pas besoj se do të vendosin institucionet përkatëse se a do t’i shfrytëzojnë këtë armatim eventualisht në qoftë se është i përdorshëm për nevoja të brendshme apo eventualisht do ta shkatërrojnë, por para se gjithash kjo është mjaft me rëndësi që t’i paraqitet edhe faktorit ndërkombëtar dhe ta shohin se nuk kemi të bëjmë me grupe të formuara rastësisht”, tha Rudari.
Ai tha se mendon që plani i grupit terrorist ka qenë që të rrëmbehet ndonjë zyrtar policor, në mënyrë që të fusin frikë tek policia që të mos i afrohen vijave kufitare.
“Pa dyshim se kjo shërben për kohë të gjatë dhe për një përgatitje më afatgjate, edhe pse unë mendoj se ata ditën e djeshme kanë menduar që ta rrëmbejnë ndonjë zyrtar policor, por duke u përgatitur vazhdimisht ndoshta edhe për të futur frikë tek policia që eventualisht të mos afrohen rreth vijave kufitare, me njësi të tilla speciale. Por, fatbardhësisht që policia e jonë ka qenë pak sa më vigjilente duke e pritur që mund të ndodhë një sulm i tillë dhe ata janë përgjigjur këtij sulmi me mjaft maturi dhe shpejtësi, duke i pasivizuar dhe neutralizuar, e që si duket tani situata është futë nën kontroll dhe është menaxhuar jashtëzakonisht mirë, sepse është e vështirë në situata të tilla se mund të pësojnë shumë njerëz, qytetarë, zyrtarë policorë, por si duket që kemi një rezultat jashtëzakonisht të mirë, duke marrë parasysh që tani për tani evidentohet vetëm dëmi fillestar që u shkaktua, pasoja fillestare zyrtari policor Afrim Bunjaku dhe tjetri Alban Rashiti që është plagosur, eventualisht ndonjë lëndim tjetër, por nuk kemi persona të plagosur nga ana jonë, ndonëse shihet se përballë kanë pasur një arsenal të tërë, por duke mos mohuar edhe përgatitjen e tyre që kanë qenë edhe ata të specializuar për të përdorin këtë lloj armatimi”, tha Rudari. /atvlive.tv