Author: ATVLive

“Vendin tënd në shtëpi nuk e zëvendëson askush”, janë fjalët e vajzës së policit të vrarë dje në Veri të Kosovës, Afrim Bunjaku, të cilat i tha në mbledhjen komemorative në nderim të veprës së tij.

Arbenita Bunjaku, 25 vjeçarja tutje vazhdoi duke thënë se “Ti flijove vetën për liri për këtë vend që ne dhe Kosova të jemi krenar me ty”.

Polici i vrarë pas vetes ka lënë përveç vajzës edhe dy djemë dhe gruan.

Ambasadori gjerman në Kosovë, Jorn Rohde, i është drejtuar Listës Serbe, duke pritur një rreshtim të tyre kundër sulmit të djeshëm terrorist në Kosovë.

Nga ky sulm terrorist mbeti i vdekur polici i Kosovës, Afrim Bunjaku, ndërkaq u plagos një dhe u lënduan dy persona.

“Sikurse krejt bota, edhe Kisha Ortodokse Serbe dënon ngjarjet e djeshme: Athua a do ta ndërpresë heshtjen e saj Lista Serbe dhe të na bashkohet në qëndrimin tonë të qartë kundër këtij sulmi vrastar ndaj Policisë së Kosovës?”, ka shkruar Rohde në platëformën “X”.

As the whole world incl. SOC is shocked and condemns yesterday’s events: I wonder whether also Srpska Lista will stop its silence and join us all in our clear stance against this murderous attack on @Kosovo_Police.

— Ambassador Jörn Rohde (@GermanAmbKOS) September 25, 2023

Policia e Kosovës edhe gjatë ditës së sotme është duke punën në hapësirat e Manastirit në Banjskë dhe për rreth saj, raporton gazetari i ATV-së, FATLUM Jashari, në një lidhje të drejtpërdrejtë në emisionin A LIVE në ATV, nga vendi i ngjarjes.

Informacionet jozyrtare na thonë se Policia gjatë kryerjes së hetimeve sot ka hasur sërish në një makinë me armatim, por që saktësisht nuk e dihet lokacioni i makinës që është gjetur me armatim dhe municione.

Paraprakisht, Policia e Kosovës mbrëmë deri orët e vona ka vazhduar punën për bartjen e automjeteve nga Banjska në drejtim të kampit të njësisë speciale në Mitrovicë të Jugut në kampin Belvedere, atje ku më vonë do të bëhet ekspozimi i të gjitha mjeteve të konfiskuara, të cilat janë përdorur nga grupi terrorist në sulmin ndaj Policisë së Kosovës.

Në mesin e tyre janë parë edhe në fotografi që janë shfaqur, është një autoblindë, një mjet i blinduar që është i tipit policoro-ushtarak, por në këtë rast ngjan më shumë në atë të policisë edhe për shkak të ngjyrës së kaltër që ka.

Po ashtu janë edhe një mori automjetesh të njohura si xhip, të cilat janë bartuar nga Banjksa dhe janë dërguar në bazën e njësisë speciale.

Njësoj do të bëhet prezantimi i tyre bashkë me një sasi armatimi dhe municioni të cilat janë gjetur në Manastirin e Banjskës dhe hapësirat për rreth dhe po ashtu edhe armatimi dhe municionet që janë gjetur dje në afërsi të fshatit Rudar, bashkë me radiolidhjet, me ç’rast ishin arrestuar katër persona të cilët ishin duke i bartuar ato mjete e që dyshohet se të njëjtit janë të ndërlidhur me grupin terrorist që kanë sulmuar Policinë e Kosovës. /atvlive.tv

Ministri për Komunitete dhe Kthim në Qeverinë e Kosovës, Nenad Rashiq ka folur për sulmet e së dielës ndaj policisë së Kosovës, në Banjskë të Zveçanit.

Rashiq në TV Nova theksoi se nata në Banjskë ka kaluar e qetë.

“Askush nuk e di se çfarë mund të ndodhë më pas. Dje ka pasur një lloj formacioni paraushtarak që veproi në një mënyrë që, së pari, për mendimin tim është absolutisht jonormale. Është e sigurt që hetimet për autorët do të vazhdojnë, ju e dini që ishin rreth tridhjetë të tillë, gjë që më tej çon në faktin se do të ketë tension dhe se qytetarët do të jenë nën presionin jo vetëm afër Banjskës por edhe në të gjitha vendet e tjera ku jetojnë serbët”, tha Rashiq.

Rashiq theksoi se e ka ndjekur dje konferencën për shtyp të presidentit Aleksandar Vuçiq. Sipas tij, Vuçiqi nuk mund të thotë asnjë fjali pa thënë gënjeshtra, insinuata dhe manipulime.

“E pashë për herë të parë dhe u konfirmua edhe një herë që presidenti Vuçiq nuk mund të thotë asnjë fjali të zgjatur pa thënë gënjeshtra të rënda, insinuata dhe manipulime. Nuk ka thënë asgjë, e shihni vetë se çfarë do të thotë, fajëson serbët e Kosovës, distancohet prej tyre. Gjithashtu, ajo që besohet se është informacion i pakonfirmuar dhe e marr me pak kripë, besohet se prej disa muajsh ka një kamp që shërben për të rekrutuar ata të rinj, le ta quajmë, kampe ilegale afër Rashkës. Besohet se janë paguar për këtë, nuk e di kush e ka organizuar, por jam i sigurt se nëse ka një gjë të tillë, jam i sigurt se autoritetet e rendit në Serbi do ta dinin. Ndoshta nuk mund të organizoheni, sepse thuhet se në ato rekrutime, në ato trajnime të policisë ushtarake kanë qenë 300 veta, pa e ditur strukturat e sigurisë në Serbi”, tha Rashiq dhe shtoi se nëse Vuçiq dinte gjithçka, si të mos dinte për ngjarjet në fshatin Banjskë.

Në Kosovë është shpallur ditë zie, vendimi është marrë nga presidentja Vjosa Osmani në shenjë respekti për policin e vrarë në afërsi të Banjskës. Presidentja e Kosovës, në përputhje me kushtetutën, ka vendosur që e hëna e 25 shtatorit të shpallet ditë zie kombëtare për nder të policit Afrim Bunjaku, i vrarë në veri të Kosovës, njoftoi Presidenca e Kosovës.

Gjendja e policit të plagosur në veri, Alban Rashiti është stabile dhe i njëjti gjatë ditës do të lirohet për në shtëpi, raporton EO.

Këtë e ka konfirmuar drejtori i Kirurgjisë Torakale, njëherësh edhe doktori i cili e pranoi në spital, Nazmi Kolgeci.

Sipas tij, pacienti është operuar dhe ka marrë trajtimet e nevojshme në Klinikën e Kirurgjisë, në QKUK.

“Për fat të mirë gjendja është e mirë dhe ne për pak presim ta lirojmë prej spitalit. Dje unë kam qenë në kujdestari dhe e kam pranuar policin, i cili ka ardh me lëndime me armë zjarri, në regjionin e krahun e majtë dhe regjionin e toraksit të majtë”.

“Pas pranimit e kemi bërë edhe intervenimin kirurgjik, ku është bërë heqja e predhës metalike që ka qenë në anën e majtë të gjoksit”.

“Trajtimi kryesor është trajtimi kirurgjik, pastaj është bërë trajtimi me medikamentozë që është akoma duke vazhduar deri tash kur po flasim”.

Me kërkesën e kryetarit të Kuvendit, Glauk Konjufca, mbledhja e Kryesisë, e paraparë për sot, anulohet.

Kjo është bërë sipas vendimit të presidentes Vjosa Osmani-Sadriu, për shpalljen e zisë shtetërore në Republikën e Kosovës, ditën e hënë.

Kuvendi ka hequr nga njoftimet edhe dy komisione të cilat janë paraparë të mbahen sot.