Në ditën e Fitër Bajramit, Policia e Kosovës shqiptoi gjithsej 784 gjoba trafiku.
Po në këtë ditë, sipas të dhënave të policisë, u regjistruan 51 aksidente, një me fatalitet, 23 me lëndime dhe 27 me dëme materiale.
Katër persona u arrestuan, ndërsa tre u dërguan në mbajtje.
Policia ka njoftuar se personi që vdiq dje afër Ferronikelit në Drenas ka qenë roje sigurimi.
Rasti po hetohet.
“HETIM I VDEKJES- Gllogoc / 30.03.2025 – 07:21. Viktima mashkull kosovar (roje sigurimi) derisa ishte në detyrë në një fabrikë, dyshohet se është rrëzuar në vendin e punës dhe ka mbetur pa shenja jete. Vdekjen e viktimës e ka konstatuar ekipi mjekësor. Rasti është duke u hetuar.”
Propozimi për rritjen e çmimit të energjisë elektrike 15 për qind ka ngjallur shqetësim te bizneset në Kosovë, të cilat thonë se kjo barrë e re do të ndikojë drejtpërdrejt në prodhim dhe konsum, raporton Ekonomia Online.
Përfaqësuesit e sektorëve të ndryshëm të ekonomisë thanë për Ekonomia Online se kjo rritje e çmimit të energjisë do të ketë ndikim edhe në rritjen e çmimeve të produkteve dhe kërkojnë masa lehtësuese nga qeveria, përfshirë heqjen e përkohshme të TVSH-së për energjinë elektrike.
Ahmet Kuçi, pronar i fabrikës së këpucëve “Solid” në Suharekë, e cilëson këtë rritje si tepër të rëndë për prodhuesit, sidomos duke marrë parasysh standardin ekonomik të Kosovës.
“Ne të gjithë e dimë se çka do të thotë 15 për qind. 15 për qind e kemi rritjen në shpenzime. Derisa në fitimet tona si kompani e prodhimit të këpucëve ne nuk kemi ndonjë marzhë tejet të madhe, 15-20 për qind. Unë kam dëgjuar nëpër vende të tjera se si shkon dy- tre për qind, po në një stad të thuhet 15 për qind mua më duket është tepër ngarkesë, sidomos për prodhuesit. Duke marrë për bazë standardin e Kosovës, se thonë rryma më e lirë në Gjermani e ku ta di unë. Po, por ku është standardi gjerman e ku është standardi i Kosovës”, ka thënë Kuçi.
Ai shtoi se kjo rritje e çmimit të energjisë elektrike do të reflektohet menjëherë edhe në çmimet e produkteve.
“15 për qind është tejet e ngarkuar dhe normale që do të ketë edhe ngritje të çmimeve. Ne ashtu kemi mbetur me disa çmime, meqë nga pandemia aty e kemi një mangësi në çmim sa ne kemi pretenduar, normale që do të ngrihet çmimi. Sepse edhe çmimi i lëndës së parë është ngritur. Kjo unë mendoj, është tejet e ngarkuar. Ne kërkojmë si popull, por edhe si prodhues, që të paktën të hiqet TVSH-ja në një afat të caktuar. Kjo do të kishte qenë një ndihmesë”, ka thënë Kuçi.
Nga ana tjetër, Suad Berisha, pronar i kolegjit “Universum”, u shpreh se kjo rritje do të ndikojë më së shumti tek qytetarët dhe bizneset, duke qenë se prodhimtaria është e varur nga energjia elektrike.
Ai përmendi edhe një aspekt pozitiv, atë të liberalizimit të tregut të energjisë në Kosovë.
“Kisha shprehur shqetësimin që te qytetaret e Kosovës kjo sigurisht do të ketë ndikim më të madh. Ndërsa, normale edhe te bizneset, sepse prodhimtaria varet, kryesisht nga energjia elektrike. Ajo çka pakëz ju jep një lehtësi bizneseve është që më në fund pas 25 vjetësh ZRRE-ja, gjegjësisht qeveria e Kosovës ka vendosur që ta liberalizojë tregun e energjisë elektrike dhe ta eliminojë edhe ndikimin e monopolit që ka zgjatur për 25 vjet. Çka nënkupton kjo në tregun e lirë? Nënkupton që tash e tutje ekonomia e Kosovës nuk varet vetëm nga një furnizues si ka qenë KESCO, që ka blerë kryesisht nga KEK-u dhe industria kosovare nuk ka pasur alternativë tjetër dhe është detyruar që të furnizohet nga KESCO”, ka thënë Berisha.
Sipas tij, liberalizimi i tregut do t’u japë bizneseve më shumë alternativa për furnizim me energji, por ky proces nuk do të jetë i lehtë. Ai kërkon që qeveria të heqë TVSH-në për energjinë elektrike, të paktën për një periudhë të caktuar për të zbutur ndikimin e rritjes së çmimeve.
“Heqja e TVSH-së është një kërkesë e përkohshme, meqenëse me vetë faktin se tash po kalohet j në sistemin e ekonomisë së tregut të lirë ka shqetësime nga komuniteti i biznesit se jo shpejt dhe jo lehtë do të përfshihen në atë treg të lirë. Është një kërkesë për një periudhë, derisa të stabilizohet furnizimi nga tregu i lirë”, ka thënë Berisha.
Në Kosovë sot do të mbretërojë mot kryesisht i vranët, vranësira këto që pritet të sjellin riga shiu.
Temperaturat minimale do të lëvizin nga 4-6 gradë Celsius ndërkaq, maksimalet prej 9-13 gradë Celsius.
Do të fryjë erë nga juglindja me shpejtësi 1-4 metër për sekond.
Donald Trump konfirmon se nuk do të ketë vonesa në vendosjen e tarifave më 2 prill, datë e përcaktuar nga presidenti amerikan si dita e çlirimit.
Në një intervistë për NBC, manjati theksoi se ishte i gatshëm të negocionte vetëm nëse vendet “janë të gatshme të na japin diçka të madhe, përndryshe nuk ka vend për të negociuar”.
“Nuk më intereson nëse prodhuesit e huaj të automjeteve i rrisin çmimet për shkak të tarifave. Shpresoj që t’i rrisin ato sepse nëse i bëjnë, njerëzit do të blejnë makina amerikane, ne kemi shumë prej tyre”, tha Trump, duke mohuar raportet se ai u kishte kërkuar CEO-ve të prodhuesve të automjeteve të mos rrisin çmimet, raporton ANSA.
Presidenti amerikan më pas përsëriti synimin e tij për të fituar Grenlandën: “Ne do ta marrim atë 100%”, tha ai, duke shpjeguar se ka “mundësi” që Shtetet e Bashkuara ta marrin atë “pa forcë ushtarake”, por “asgjë nuk përjashtohet”.
Irani ka refuzuar zyrtarisht çdo mundësi për negociata të drejtpërdrejta me Shtetet e Bashkuara mbi programin e tij bërthamor që po zhvillohet me shpejtësi, njoftoi presidenti i vendit, Masoud Peskov.
Ky është reagimi i parë zyrtar nga Teherani pas letrës së Donald Trump drejtuar liderit suprem fetar të Iranit, Ayatollah Ali Khamenei.
Sipas presidentit iranian, përgjigja e Iranit është përcjellë përmes Sulltanatit të Omanit dhe lë të hapur mundësinë e bisedimeve indirekte me Uashingtonin.
Megjithatë, siç sqaroi ai, këto përpjekje nuk kanë sjellë asnjë rezultat të prekshëm që nga viti 2018, kur Trump tërhoqi në mënyrë të njëanshme SHBA-në nga marrëveshja për programin bërthamor të Iranit.
Përshkallëzimi mes paqëndrueshmërisë rajonale
Situata është përkeqësuar në mënyrë dramatike vitet e fundit, me një sërë sulmesh në det dhe në tokë duke intensifikuar tensionet rajonale. Konflikti midis Izraelit dhe Hamasit në Rripin e Gazës implikoi më tej Iranin, pasi Izraeli synonte figurat kryesore të të ashtuquajturit “Boshti i Rezistencës”, të cilin Teherani e mbështet.
Në të njëjtën kohë, sulmet ajrore të SHBA-së kundër rebelëve shiitë Houthi të mbështetur nga Irani në Jemen po ringjallin skenarët e veprimeve ushtarake kundër programit bërthamor iranian.
“Ne nuk i shmangemi dialogut. Ajo që na ka shkaktuar probleme deri tani është shkelja e premtimeve,” tha Pezheskian gjatë një takimi të kabinetit, i cili u transmetua në televizion. “Ata duhet të provojnë se mund të fitojnë besimin tonë ,” shtoi ai.
Qeveria amerikane nuk e ka komentuar zyrtarisht njoftimin e Iranit.
Kryeministri Albin Kurti ka bërë homazhe dhe vendosi kurora me lule pranë varreve të tetë martirëve të lagjes Muliqi, në 26-vjetorin e masakrës së dytë në Abri të Epërme të Drenicës.
Pas masakrës së 26 shtatorit, ku u vranë 23 anëtarë të familjes Deliu, forcat e armatosura serbe më 30 mars 1999, vranë tetë djem e burra të familjes Muliqi. Katër nga ta ishin nxënës të moshave nga 13 deri 17 vjeç.
Sandro Tonali ishte protagonist në fitoren e Newcastle në finalen e “Carabao Cup” kundër Liverpool-it, duke i dhuruar klubit të tij një trofe që mungonte prej 70 vitesh. Një triumf historik që ka ndezur tifozët dhe që për ish-mesfushorin e Milanit është vetëm hapi i parë drejt rikthimit të ekipit në elitën e futbollit europian:
Tudor debutoi me fitore në stolin e Juventusit: Luajtëm me zemër, duhet t’i kënaqim tifozët tanë
“Finalja ishte fantastike. Ta fitonim këtë trofe pas 70 vitesh ishte diçka e pabesueshme, ndoshta shijohej për herë të parë nga shumë tifozë tanët që ishin në ‘Wembley’. Ky sukses është i veçantë për të gjithë qytetin e Newcastle, sepse këtu çdo ndeshje përjetohet me pasion, çdo person e mbështet ekipin me dashuri, qoftë lojtarët, stafin apo çdo anëtar të klubit”.
Tani, fokusi është i kthyer tek sfida e ardhshme, kualifikimi në Ligën e Kampionëve: “Na pret një periudhë e vështirë, sepse çdo ndeshje është e komplikuar, por duhet ta sigurojmë me çdo kusht kualifikimin në Champions. Me pesë ekipe që mund të kualifikohen, kemi një mundësi më shumë, por mbetet mision aspak i lehtë. Kemi vetëm një rrugë, gjithsesi, të kualifikohemi”.
Tonali zbuloi gjithashtu një detaj interesant mbi raportin e tij me rrjetet sociale, duke treguar se i përdor në mënyrë të kufizuar: “I përdor vetëm për familjen time, për asgjë tjetër. I shoh ndoshta pas ndeshjes për të parë ‘highlight’-et, por jo për merkaton. Ka qenë kështu qysh kur isha 17 vjeç, nuk iu kam dhënë kurrë shumë rëndësi thashethemeve”.
Igor Tudor buzëqesh, duke parë mundësinë që ai krijoi dhe çoi në avantazhin e Juves ndaj Genoa. Kjo pasoi me festimin e tij të fortë. “Më doli kështu, nuk e provuam, – shpjegoi kroati për mikrofonat e Dazn. – Jam shumë i kënaqur, sepse Genoa është një ekip serioz që po bën mirë, vrapon, Lufton. Nga ana tjetër, ne kemi kaluar periudhën që të gjithë e dimë. Kemi bërë 2-3 seanca stërvitore, kishte pak entuziazëm. Në 2-3 ditë stërvitje kjo periudhë nuk kalon, si nga ana tekniko-taktike, ashtu edhe nga ana psikologjike. Duhet ta kalosh gjithçka me punë”.
Tudor për Juventusin e tij të ri – Trajneri i ri i bardhezinjve, pastaj, tregoi se si ka provuar ta ndryshojë ekipin: “Tani është gjithçka ndryshe, luhet më shumë në drejtim vertical. Paralelisht kërkohet një intensitet tjetër për ta bërë këtë. Jam i lumtur sepse djemtë dhanë gjithçka, është një fitore që e merituam. Jemi të kënaqur veçanërisht për tifozët. Fituam me zemër, tani duhet të pushojmë dhe të fillojmë të punojmë seriozisht, për një javë të plotë, me të gjithë lojtarët në dispozicion”.
Tudor për Yildiz – Trajneri kroat, megjithatë, duhet ta falënderojë Kenan Yildiz, i cili, me golin e tij në minutën e 25-të, iu dha tri pikët bardhezinjve: “Jam shumë i kënaqur për të, ka cilësi të rëndësishme. Më pëlqeu ai, por dhe në mbrojtje ishim të fortë. Në mesfushë bëmë një punë të madhe. Mund të kishim shënuar edhe gola të tjerë, të paktën një tjetër, ndaj na vjen keq, por 1-0 ndonjëherë është më mirë psikologjikisht se 2-0. Kur ndeshja përfundon, megjithatë…”
Tudor për Koopmeiners – Buzëqesh dhe nuk kursen shakatë Tudor, por nuk fshihet për shkakun e vetëm të hidhur: Teun Koopmeiners, ende i paaftë për të ndikur: “Nuk është një moment i madh për të, por ka treguar se është lojtar i fortë këto vite. Nga periudha të tilla dilet vetëm duke punuar fort. Është një djalë i mirë që ka dëshirë, duket mjaft i interesuar, ka një këmbë të shkëlqyer. Është i rëndësishëm për ekipin, por duhet ta rifitojmë me formën optimale”.
Salman Rushdie do të publikojë më 4 nëntor librin e tij të parë artistik pas sulmit me thikë në vitin 2022, një përmbledhje tregimesh me tematikë vdekshmërinë, lamtumirën dhe identitetin. Libri titullohet “The Eleventh Hour” dhe përfshin rrëfime të vendosura në Indi, Britani dhe SHBA.
“Ora e njëmbëdhjetë” – Salman Rushdie, rrëfime
Salman Rushdie boton librin ”The Eleventh Hour”, i pari pas sulmit me thikë.
Salman Rushdie, shkrimtari britaniko-amerikan, i lindur në Indi do të publikojë në nëntor, veprën e tij të parë artistike që nga sulmi me thikë që i kushtoi atij dëmtimin e syrit të djathtë, në vitin 2022.
Libri nën titullin “The Eleventh Hour” (“Ora e njëmbëdhjetë”), është një përmbledhje e pesë tregimeve dhe novelave të vendosura në tre vendet ku ai ka jetuar: vendlindja e tij Indi, Mbretëria e Bashkuar dhe Shtetet e Bashkuara, ku ai tani jeton.
“Tri tregimet e shkurtra në këtë vëllim, të gjitha të shkruara në 12 muajt e fundit, eksplorojnë tema dhe vende që më pushtojnë mendjen – vdekshmëria, Bombei, lamtumira, Anglia, zemërimi, paqja, Amerika”, shpjegon autori 77-vjeçar në deklaratën për shtyp.
“Jam i kënaqur që këto histori, të cilat janë kaq të ndryshme nga njëra-tjetra në mjedisin, narrativën dhe teknikën e tyre, megjithatë arrijnë të dialogojnë me njëra-tjetrën dhe me dy historitë që shërbejnë si prolog dhe epilog për këtë treshe”, shtoi Salman Rushdie.
“Është një koleksion i tregimeve të shkurtra prekëse dhe mjeshtërore që na çon nëpër botë, nga lagjet e Bombeit në universitetet prestigjioze angleze dhe është planifikuar të dalë në treg më 4 nëntor”, tha botuesi.
Autori I librit “Vargjet Satanike”, u sulmua më 12 gusht 2022, në verilindje të Shteteve të Bashkuara, i goditur me thikë nga një libano-amerikan i dënuar në shkurt për tentativë vrasjeje
Irani e ka dënuar shkrimtarin me vdekje mbi bazë të një vendimi fetar më shumë se 30 vjet më parë, duke e konsideruar veprën blasfemuese.