Author: ATVLive

Kryeministri i Republikës së Kosovës, Albin Kurti, ka thënë se deri në fund të vitit 2025, investimet në e-qeverisje, e-shëndet, digjitalizim në arsim dhe siguri kibernetike në Kosovë do të kalojnë vlerën e 80 milionë euro.

Këto komente Kurti i bëri gjatë hapjes së edicionit të 12-të të Festivalit të Teknologjisë “KosICT”, organizuar nga Shoqata e Teknologjisë, Informacionit dhe Komunikimit në Kosovë (STIKK), me temën qendrore “Zbuloni kufijtë e rinj”.

Duke e cilësuar festivalin “KosICT” një dëshmi të rëndësisë së madhe që ka sektori i TIK-ut në vendin tonë, kryeministri Kurti në këtë hapje nënvizoi se digjitalizimi mbetet prioritet i lartë i Qeverisë së Republikës së Kosovës.

“Deri në fund të vitit 2025, investimet në e-qeverisje, e-shëndet, digjitalizim në arsim dhe siguri kibernetike në Kosovë do të kalojnë vlerën e 80 milionë euro. Në bazë të dokumenteve strategjike që kemi plotësuar, deri në vitin 2027 kjo shifër pritet të arrijë në 130 milionë euro”, tha kryeministri duke shtuar se këto investime përfaqësojnë përkushtimin tonë të palëkundur për të fuqizuar qytetarët dhe bizneset tona, për të nxitur inovacionin dhe për të siguruar që Kosova të kapërcejë në sferën e transformimit digjital.

Sipas tij, vetëm këtë javë, kanë kanë ndodhur disa momente të jashtëzakonshme në rrugëtimin drejt digjitalizimit, duke potencuar miratimin e Strategjisë së re të e-Qeverisjes 2023-2027, një nismë ambicioze që synon të transformojë ndjeshëm shërbimet publike, si dhe Strategjinë e re të Sigurisë Kibernetike 2023-2027, e cila trajton në mënyrë gjithëpërfshirëse të gjitha aspektet e sigurisë kibernetike

Sipas një komunikate të Qeverisë, një arritje tjetër të rëndësishme shënon edhe miratimi nga Qeveria i programit 5-vjeçar me Bankën Botërore, i titulluar “Forcimi i qeverisjes digjitale për ofrimin e shërbimeve”, i cili përfshin një kredi prej 18.5 milionë euro që do të financojë mbi 50% të aktiviteteve në planin 3-vjeçar të veprimit të Strategjisë sonë të re për E-Qeverisje.

“Në këtë sektor premtues, një gurthemel tjetër jetik është edhe programi 5-vjeçar i USAID-it, “Aktiviteti për e-Qeverisje në Kosovë”, me buxhet prej 10.9 milionë dollar, përderisa Qeveria dje miratoi edhe listën e profesionistëve të TIK-ut dhe sigurisë kibernetike të cilët do të kategorizohen si ekspertë përgjegjës për sistemet qeveritare me rëndësi strategjike, si dhe inauguroi Parkun e Teknologjisë Digjitale në Bërnicë me një investim prej 1.2 milionë euro”, tha ai.

Sivjet nga data 13 deri më 14 tetor, festivali “KosICT” do të mbajë aktivitete me diskutime, ide dhe mundësi për rrjetëzim, gjersa e gjitha do të sillet rreth tri temave kryesore: Inteligjenca Artificiale, Siguria Kibernetike dhe Transformimi Dixhital./KP/

Ushtruesi i detyrës së Kryetarit të OVL-UÇK’së, Faton Klinaku ka konfirmuar se Hysni Gucati do të lirohet.

Ai ka thënë se nuk e di formën, pasi për një gjë të tillë duhet parë vendimin.

Klinaku shtoi se nuk mund të japë më tepër detaje, përveç faktit se brenda dy tre muajve mund të ketë vendim të ri për Nasim Haradinajn.

“Gucati është liruar. Unë dje e mora vesh. Nuk e di formën. Për këtë duhet parë vendimin. Ajo që di është se Haradinaj nuk është liruar”, pohoi ndër tjerash për lajmi.net.

Kujtojmë se Gucati është i dënuar me vendim të shkallës së parë të Gjykatës Speciale, ndërsa është i arrestuar që nga viti 2020.

Grupi Parlamentar i Aleancës për Ardhmërinë e Kosovës (AAK) kritikon partinë në pushtet për bojkotimin e seancave parlamentare dhe mbledhjet e Komisioneve në Kuvendin e Kosovës.

Kryetari i GP të AAK-së, Besnik Tahiri në një konferencë për media theksoi se kjo parti ka argumente të plota që e përgënjeshtrojnë qëndrimin e Vetëvendosjes në raport me opozitën dhe veçanërisht me AAK-në për mosvotimin e marrëveshjeve ndërkombëtare.

“Jemi sot këtu për të prezantuar disa argumente të cilat e përgënjeshtrojnë qëndrimin e shumicës në raport me opozitën dhe në veçanti në raport me Aleancën”, theksoi ai.

Deputeti i AAK-së, Pal Lekaj theksoi se është shqetësuese qëndrimi i mazhorancës për të bojkotuar të gjitha kërkesat e opozitës e në veçanti të subjektit tonë të AAK. Për këta ai ka kërkuar nga VV-ja që të jetë kontruktive në Kuvendin e Kosovës.

“Shqetësimi ynë si Aleancë për Ardhmërinë e Kosovës dhe qëndrimi i mazhorancës për të bojkotuar të gjitha kërkesat e opozitës e në veçanti të subjektit tonë të AAK-së. në praktikat parlamentare nuk ka ndodhur që mazhoranca apo shumica të bojkotojë seancat parlamentare, e sidomos edhe Komisionet. Neve po na marrin të vetëm drejtë tonën që e kemi demokratike që me pyetje parlamentare, me formimin e Komisioneve hetimore, në Komisionet e përhershme të Kuvendit të Kosovës që të shfaqim kërkesat e qytetarëve të Republikës së Kosovës dhe mazhoranca duhet të jetë konstruktive dhe jo të na bojkotoj, sepse me bojkotin e tyre po e shemb gurthe melin e shtetit demokratik. Prandaj, ne jemi mjfat të shqetësuar dhe kërkojmë një zgjidhje të kësaj çështje dhe të dominojë arsyeja e interesit të qytetarëve, jo të interesit të subjektit politik që në këtë rast është Lëvizja Vetëvendosje”, theksoi ai.

Ai më tej shtoi se Grupi Parlamentar i AAK-së ka përkrahur fuqishëm marrëveshjet ndërkombëtare.

“Ne si Aleancë për Ardhmërinë e Kosovës me të drejt e themi që i kemi përkrahur fuqishëm marrëveshjet ndërkombëtare dhe ligjet bazike që kanë qenë në favor të qytetarëve të Kosovës. Po numëroj, Grupi Parlamentar i AAK-së ka përkrahur marrëveshjen ndërkombëtare në vlerë prej 830 milionë euro. Dhe ajo që vlen të theksohet, ne kemi përkrahur edhe ligjet bazike që kanë qenë të obligueshme për Kuvendin e Kosovës dhe për qytetarët e Kosovës që përfitojnë nga këto ligje dhe ne pa hezitim i kemi përkrahur. E kemi përkrahur edhe marrëveshjen e Brukselit dhe Ohrit dhe të gjitha qëndrimet e Kosovës që kanë shkuar në favor të shtrirjes së sovranitetit dhe mbrojtjes së integritetit të Kosovës, pa hezitim dhe pa kalkuluar në votë. Andaj, kjo qeveri të gjitha vendimet që po i merr kohëve të fundit më tepër po i merr si vendime elektorale. Kështu që mund të themi që janë të pabaza ato deklarata për mos votimin tonë të marrëveshjeve ndërkombëtare”, tha ai.

Grupi Parlamentar i VV-së nuk ka marrë pjesë të enjten në seancën e Kuvendit të Kosovës për shqyrtimin e Rezolutës në mbështetje të policisë së Kosovës. Po ashtu për herë të tretë ka dështuar të konstituohet Komisioni hetimor për rezerva shtetërore, ku nuk kishin marrë pjesë deputetët e VV-së.

VV nuk mori pjesë as sot në mbledhjen e Komisionit për të Drejtat e Njeriut për shqyrtimin e peticionit të Sindikatës së Policisë së Kosovës.

Katër fëmijë në një institucion parashkollor të Istogut dyshohet se janë helmuar ditën e enjte.

Telegrafi merr vesh se fëmijët ishin në klasë ndërsa papritmas kanë humbur vetëdijen, fëmijët e helmuar janë dërguar urgjent në Spitalin e Pejës, ku edhe po vazhdojnë trajtimin.

Burimet bëjnë të ditur se inspektorët sanitarë do të bëjnë sot inspektimin e vendit.

OKB-ja ka bërë thirrje për ndihmë 294 milionë dollarësh për mbi një milion njerëz në Rripin e Gazës dhe Bregun Perëndimor.

“Thirrja kërkon përafërsisht 294 milionë dollarë amerikanë për 77 partnerë humanitarë për të adresuar nevojat më urgjente të 1,260,000 njerëzve në Gaza dhe Bregun Perëndimor”, thanë nga Zyra e OKB-së për Koordinimin e Çështjeve Humanitare (OCHA) të enjten.

Thirrja bashkon punën dhe kërkesat e financimit të komunitetit humanitar në rajon, duke përfshirë 13 agjenci të OKB-së, 29 organizata ndërkombëtare joqeveritare (INGO), 35 OJQ kombëtare dhe Shoqërinë e Gjysmëhënës së Kuqe Palestineze (PRCS).

“UNRWA (Agjencia e Kombeve të Bashkuara për Ndihmën dhe Punën për Refugjatët Palestinë në Lindjen e Afërt) luan një rol unik në OPT, duke shërbyer si ofruesi kryesor i drejtpërdrejtë i shërbimeve bazë – arsimit, shëndetësisë, ndihmave dhe shërbimeve sociale, mbrojtjes, infrastrukturës së kampeve dhe përmirësimit dhe ndihmës emergjente – për 1.5 milionë refugjatë palestinezë të regjistruar në Gaza”, shtoi OCHA.

“Në Bregun Perëndimor, UNRWA u shërben 1.1 milionë refugjatëve palestinezë dhe personave të tjerë të regjistruar, nga të cilët 890,000 janë refugjatë”, thuhet në deklaratë.

Të premten, OCHA tha se numri i palestinezëve të zhvendosur në Gaza është rritur në më shumë se 423,000 mes luftimeve të intensifikuara.

Në një përshkallëzim dramatik të tensioneve në Lindjen e Mesme, forcat izraelite nisën një fushatë të qëndrueshme dhe të fuqishme ushtarake kundër Rripit të Gazës, një përgjigje ndaj një ofensive ushtarake të grupit palestinez Hamas në territoret izraelite.

Konflikti filloi të shtunën e kaluar kur Hamasi nisi Operacionin ‘Al-Aksa Flood’ kundër Izraelit, një sulm i papritur i shumëfishtë duke përfshirë një breshëri lëshimesh raketash dhe infiltrimesh në Izrael nëpërmjet tokës, detit dhe ajrit.

Hamasi tha se operacioni ishte në hakmarrje për sulmin ndaj xhamisë Al-Aksa në Jerusalemin Lindor të pushtuar dhe dhunës në rritje të kolonëve izraelitë kundër palestinezëve.

Ushtria izraelite më pas nisi operacionin ‘Shpatat e Hekurta’ kundër objektivave të Hamasit brenda Rripit të Gazës.

Përgjigja e Izraelit është shtrirë në ndërprerjen e furnizimit me ujë dhe energji elektrike në Gaza, duke përkeqësuar më tej kushtet e jetesës në një zonë që është përfshirë nga një rrethim gjymtues që nga viti 2007. (AA)