ATV

Author: ATVLive

  • Qeveria këmbëngul që zgjedhjet në veri do të mbahen vetëm sipas Udhëzimit Administrativ

    Qeveria këmbëngul që zgjedhjet në veri do të mbahen vetëm sipas Udhëzimit Administrativ

    Përgatiti: Arton Hamiti

    Pasi Lista Serbe, në koordinim me presidentin e Serbisë, Aleksandër Vuçiq, ndryshoi qëndrim dhe kërkoi mbajtje të zgjedhjeve në veri, duke premtuar pjesëmarrje, Qeveria e Kosovës insiston se mbajtja e tyre, do të bëhet vetëm përmes udhëzimit administrativ.

    Duke ofruar mbështetje për zgjedhje të lira dhe demokratike, ekzekutivi shtoi se pjesëmarrja e qytetarëve serb të katër komunat veriore është jashtëzakonisht e rëndësishme.

    “Ne kemi ofruar kornizën ligjore që mundëson zgjedhjet e reja në katër komunat në veri të vendit. Udhëzimi administrativ është edhe rezultat i zotimeve tona për deeskalim të situatës por edhe reflektim i bindjes sonë se zgjedhjet e reja atje duhet të nxiten nga vullneti demokratik dhe burimor i qytetarëve. Sulmi paramilitar i 24 shtatorit, në krye më deri atëherë nënkryetarin e Listës Serbe, Milan Radojiçiq na ka rikujtuar rëndësinë jetike të ringjalljes së pluralizmit politik të serbëve në Kosovë”, thuhet në reagimin e Qeverisë së Kosovës.
    Në rast se kryetarët e tanishëm nuk japin dorëheqje duke pritur inicim të peticionit nga qytetarët, për opinionistin Bekim Kabashi, mbajtja e zgjedhjeve është larg.

    Sidoqoftë, pjesëmarrja eventuale e Listës Serbe në zgjedhjet e ardhshme, pas sulmit të 24 shtatorit, për të cilin mori përgjegjësinë ish-nënkryetari i këtij subjekti, Milan Radojiçiq, po shihet me sy kritik.

    Mitrovica e Veriut, Zveçani, Zubin Potoku dhe Leposaviqi, aktualisht udhëhiqen nga kryetarë shqiptarë, sepse serbët bojkotuan zgjedhjet lokale me 23 prill.
    Qytetarët serb kundërshtuan hyrjen me ndihmën e policisë të kryetarëve në ndërtesat komunale, duke sulmuar Policinë e Kosovës, pjesëtarët e KFOR-it dhe gazetarët.

  • ​Franca mobilizon 7000 ushtarë pas vrasjes së një mësuesi: “Sulm i motivuar nga lufta në Izrael”

    ​Franca mobilizon 7000 ushtarë pas vrasjes së një mësuesi: “Sulm i motivuar nga lufta në Izrael”

    Presidenti i Francës Emmanuel Macron ka urdhëruar mobilizimin e shtatë mijë trupave shtesë për të forcuar patrullat e sigurisë, tha zyra e tij sot, një ditë pasi një mësues u vra me thikë në një sulm islamik.

    Franca ka qenë në gatishmëri të lartë që nga e premtja pasi një 20-vjeçar vrau me thikë një mësues dhe plagosi rëndë dy të tjerë në qytetin verior francez të Arras.

    Zyra e Macron njoftoi se ushtarët do të mobilizohen deri në njoftimin e mëtejshëm si pjesë e një operacioni ekzistues për të patrulluar qytetet e mëdha dhe destinacionet turistike.

    Muzeu i Luvrit u evakuua dhe u mbyll sot pasi u raportua për një bombë, njoftoi zëdhënësja e Ministrisë së Brendshme Camille Chaize, duke shtuar se ishin kryer kontrolle për t’u siguruar që nuk kishte rrezik.

    Siguria në Francë është rritur përpara Kupës Botërore të Ragbit në vend, më pak se një vit para fillimit të Lojërave Olimpike, e cila do të përfshijë një ceremoni hapjeje jashtë stadiumit dhe një paradë poshtë lumit Sena.

    Chaize tha se masat e sigurisë në stadiumet për ndeshjet e ragbit janë tashmë në nivelin më të lartë, por rreth tyre do të vendosen patrulla shtesë dhe e njëjta gjë do të jetë edhe në qendër të Parisit. Franca ka qenë shënjestër e sulmeve islamike prej vitesh, më i keqi prej të cilëve ishte ai i nëntorit 2015 kur sulmuesit sulmuan një sallë koncertesh dhe kafene në Paris.

    Ministria njoftoi se një takim të shtunën pasdite do të diskutojë nëse nevojiten masa shtesë, tha Chaize. Ministri i Brendshëm Gerald Darmanin tha sot se sulmi në Arras është i lidhur me ngjarjet në Lindjen e Mesme ku Izraeli po kryen një ofensivë ushtarake kundër Hamasit.

  • ​“Hëngra doner dhe u helmova”, rrëfimi i njërës nga 100 pacientët e helmuar në Malishevë

    ​“Hëngra doner dhe u helmova”, rrëfimi i njërës nga 100 pacientët e helmuar në Malishevë

    Rasti i djeshëm i helmimit të 63 personave nga një lokal ushqimi në Malishevë, deri më sot ka arritur me mbi 100 të helmuar, derisa një nga të helmuarat me ushqim, e cila tashmë është e shtruar në Klinikën Infektive në Prishtinë tregon se nga ushqimi që ka marrë në lokalin më Malishevë i janë paraqitur simptomat me vjellje menjëherë, asaj dhe personave të cilat kanë ngrënë bashkë. Përderisa në Agjencinë e Ushqimit dhe Veterinarisë (AUV) thonë se kanë asgjësuar 64 kilogramë mish në lokalin ku u helmuan qytetarët.

    Pacientja, e cila nuk deshi të identifikohej, ka thënë për KosovaPress se lokali në fjalë ka pasur mungesë të pastërtisë adekuate për ushqim, derisa shton se gjendja e saj shëndetësore sot është më stabile.

    “Të mërkurën e kam ngrënë një doner në ora 19:00. Simptomat janë bërë në ora 23:00 të natës. Prej të mërkurës jam kështu, mbrëmë kam qenë më keq, ethe, temperaturë, vjellje, bark qitje… kështu. Vetëm aty jemi helmuar pronari im, një punëtor dhe një punëtore që kemi ngrënë, të tretë dhe jemi helmuar. Nuk e di, vetëm doner, se çka ka pasur nuk e di. Si e kemi ngrënë atë jemi helmuar, kemi vjellë, tri orë, nuk ka zgjatë më shumë. As bukë, as asgjë nuk kam ngrënë vetëm ujë. Lokal që është midis rruge krejt pluhur bagerat. Ai nuk është lokal. Krejt pluhur në gojë e futim, nuk e di dje jam kanë më keq sot pak më mirë”, tha pacientja.

    Drejtori i Klinikes Infektive, Arben Vishaj konfirmoi se deri më tash janë hospitalizuar 12 persona me simptoma të helmimit nga ushqimi, të cilin e kanë marrë në lokalin në Malishevë. Ai tha se ekipi mjekësor ka intervenuar me masa të shpejta dhe gjendja e tyre tashmë është jashtë rrezikut.

    “Për momentin në Klinikën Infektive gjithsej të hospitalizuar i kemi gjithsej 12 pacientë. Mosha e tyre është 8-vjeç deri në moshën 43-vjeçare. Mosha mesatare është 21-vjeçare. Dje kanë ardhur një gjithsej 11 pacientë, të cilat kanë manifestuar sëmundje në formë të vjelljes, heqjeve të barkut, dhembjeve të barkut, dhe në aspektin e anamnezës 6 deri në 72 orë më parë kanë konsumuar ushqim në një lokal dhe kanë ardhur në manifestime të tilla, të cilët kanë pasur indikacion që të hospitalizohen në Klinikën Infektive. Pasojë e dehidrimit dhe ndryshimeve të vlerave të lehta është e mundur që ndonjëri të ketë manifestime të tilla, por në përgjithësi gjendja është stabile. Janë jashtë rrezikut për jetë dhe po bëjmë çmos që sa më parë të rikuperohen dhe të lëshohen. Në bazë të dhënave klinike bëhet fjalë për një salmanellozë, por rezultatet përfundimtare vijnë nga Instituti Kombëtar dhe me kohë do të informojmë”, tha Vishaj.

    Ai u shpreh se Klinika Infektive ka kapacitete të mjaftueshme për pacientë me raste të tilla, por shpreson që nuk do të përsëritet një gjendje e tillë.

    “Janë simptoma që nënkupton dehidrim dhe ne jemi duke koordinuar terapi dehidruese. Gjendja e përgjithshme është stabile. Janë duke marrë trajtime me kohë dhe shpresojmë në një rikuperim të gjendjes së shpejt të tyre. Klinika Infektive ka kapacitet 125 shtretër, por nuk mendojmë që do të ndodhë një situatë e tillë që të kemi numër më të madh. Deri më tash kemi 12 pacientë të hospitalizuar”, tha Vishaj.

    Ndërsa, zyrtari për informim në Agjencinë e Ushqimit dhe Veterinarisë (AUV), Lamir Thaçi tha se i janë përgjigjur rastit menjëherë dhe bashkë me policinë kanë filluar inspektimin te lokali ku janë shërbyer klientët në të cilin kanë hasur higjienë jo të duhur dhe mos dezinfektim, si dhe produkte pa origjinë.

    “Bashkë me policinë kemi filluar inspektimin dhe kontrollin te lokali i dyshuar ku janë shërbyer, me dyshime. Aty është zhvilluar një inspektim i detajuar përpos kontrolleve teknike sanitare, higjienike të gjitha, hapësirës dhe mjeteve të punës ka vazhduar ende marrja e mostrave të produkteve ushqimore, të cilat kanë qenë prezent aty. Pas mbledhjes së dëshmive që është arritur të sigurohet deri në orën e mesnatës lokali ka qëndruar i mbyllur, i bllombuar dhe inspektimi ka vazhduar edhe sot. 06:25 E para thash se gjendja përgjithshme teknike sanitare, higjienike ka qenë e nivelit jo të mirë. E dyta, nuk kanë pasur libreza sanitare punonjësit që kanë punuar në këtë lokal, që sipas ligjit kërkohet t’i kenë. Nuk ka pasur dezinfektim, deratizimin dhe dezinsektimin që përsëri është kriter që kërkohet që të kryhet. Po ashtu, aty janë gjetur edhe disa produktet që ne i quajmë “pa origjinë”. Ato nuk kanë pasur dokumentacion mbështetës. Ka pasur produktet që janë gatuar brenda saj kuzhine dhe këtu të gjitha janë fakte do të evidentojmë”, tha Thaçi.

    Sipas tij, janë marrë pesë mostra të produkteve ushqimore, dy mostra nga sosat, një mostër nga doneri i përpunuar dhe dy mostra nga mishi i bluar, qoftë të papërpunuar dhe janë marrë 26 strisho nga hapësirat e punës mjetet e punës dhe duart e personelit.

    “Të gjitha mostrat janë marrë sipas procedurës standarde operative dhe janë nisur për laboratorin e IKSHP-së në Prishtinë, ku edhe janë testuar në disa parametra. Ndërsa, pas përfundimit të mostrimit, produktet të cilat nuk kanë poseduar dokumentacion janë asgjësuar. Sasia totale, 64 kg, kryesisht mish produkte mishi. Lokali nga mbrëmë është mbyllur përkohësisht deri në një vendim tjetër të organeve kompetente”, tha ai.

    Përndryshe, siç raportojnë nga Qendra e Mjekësisë Familjare në Malishevë, janë mbi 100 persona që janë helmuar në këtë lokale, e të cilët kanë kërkuar ndihmë mjekësore.

    Sipas Policisë, lidhur me rastin është arrestuar pronari i lokalit dhe me vendim të prokurorit kujdestar, i dyshuari është dërguar në mbajtje. /KosovaPress/

  • Gold Ag arrestohet nga policia greke

    Gold Ag arrestohet nga policia greke

    Këngëtari Arian Agushi, përmes një postimi ka bërë të ditur se mbrëmë është arrestuar në Athinë.

    Agushi ka thënë se në kontrollën e pasaportave u ndalova nga policia greke dhe më mbajtën të mbyllur deri në mëngjesin e sotëm.

    “Mbrëmë rreth orës 1:00 pas mesnate arrita në Athinë. Në kontrollën e pasaportave u ndalova nga policia greke dhe më mbajtën të mbyllur deri në mëngjesin e sotëm. Arsyeja e vetme ishin këngët e mia dhe ma bënë ndalesë hyrjen në atë vend“, tha ai.

    Postimi i plotë:

    Lajmërim për shqiptarët në Greqi

    Mbrëm rreth orës 1:00 pas mesnate arrita në Athinë.Në kontrollën e pasaportave u ndalova nga policia greke dhe më mbajtën të mbyllur deri në mëngjesin e sotëm.Arsyeja e vetme ishin këngët e mia dhe ma bënë ndalesë hyrjen në atë vend.Ju kërkoj falje krejt atyre dashamirëve që do të ishin sonte e nesër prezent në koncertet e mia.Shpresoj që shihemi herav tjera.Kushdo që ka spiunu dua ti them me pak fjalë: Jemi burgos historikisht, kemi vdekë nga rrahjet e torturat ,por emra nuk kemi qit.E tash pa na rreh kërkush e qesim njëri tjetrin në gracka për fitime personale.Jam mësuar se kam s’pari kështu, dhe do vazhdoj se …

    S’JAM FAJTOR SE JAM SHQIPTAR

  • Deputetët e shumicës dhe të opozitës janë duke vazhduar me bllokimin e punës në Kuvend e në komision

    Deputetët e shumicës dhe të opozitës janë duke vazhduar me bllokimin e punës në Kuvend e në komision

    Përgatiti: Benita Zeneli

    Deputetët e pushtetit dhe ata të opozitës nuk po lëshojnë pe.

    Tash e një kohë, të dyja palët janë duke e bojkotuar punën e njëra-tjetrës. Derisa opozita nuk po merr pjesë në votime të projektligjeve, deputetët e shumicës, si kundërpërgjigje nuk po marrin pjesë në seanca e komisione.

    Për monitoruesit e Kuvendit, situata e krijuar është krejtësisht e papranueshme.

    “Nuk duhet të jetë e nevojshme shumica për të filluar debate, por vetëm për votime…..”, tha Naim Jakaj nga Instituti i Kosovës për Drejtësi.

    Seanca e fundit, në të cilën pushtet e opozitë u bënë bashkë, ishte ajo e 28 shtatorit, në të cilën u miratua Rezoluta me të cilën dënoheshin sulmet e 24 shtatorit në Banjskë.

    “Në qoftë se kjo qasje përshkallëzohet për pjesëmarrje, puna parlamentare do ta humbë përveç përmbajtjes, edhe cilësinë. Do të kemi një praktikë ku vetëm pozita merr pjesë dhe rrjedhimisht instrumenti kontrollues që vjen nga opozita mbetet krejtësisht i përmbajtje”, tha Arbër Thaçi nga Instituti Demokratik i Kosovës.
    Përpos deputetëve, në parlamentarizmin e Kosovës për herë të parë ka ndodhur që ministrat e kabinetit qeveritar të mos përgjigjen në pyetje parlamentare. Arsyeje për këtë ishte mosvotimi i marrëveshjeve ndërkombëtare nga dy partitë opozitare, PDK dhe AAK.

    Seanca e 6 tetorit, ndryshe, ishte e para e këtillë ku parashiheshin pyetjet parlamentare për përgjigje me gojë.

  • Një javë pas arrestimit të një 16 vjeçari në Pejë, Prokuroria Themelore atje ka filluar të premten

    Një javë pas arrestimit të një 16 vjeçari në Pejë, Prokuroria Themelore atje ka filluar të premten

    Përgatiti: Nora Luta

    Ndryshe nga ditët e tjera, nxënësit e gjimnazit “Bedri Pejani”, orët e para mësimore, të premten, i filluan me një ligjëratë nga prokurorë të Prokurorisë Themelore të Pejës.

    Ato po sigurohen që nxënësit ta kuptojnë, që pavarësisht moshës për kryerjen e veprave penale, sikurse përdorimi i armëve, e substancave narkotike mund të ndëshkohen.

    Pas rastit të fundit të arrestimit të një 16-vjeçari, nën dyshimet për planifikim të vrasjes së shokëve të tij të klasës, Prokuroria do të vazhdojë me ligjërata edhe javën e ardhshme.

    Fokus do ta kenë edhe vetëdijesimin për përdorimin e rrjeteve sociale.

    Përdorimi i rrjeteve sociale, sipas psikologes së shkollës, paraqet shqetësim. Ergita Zajmi u apelon prindërve t’i monitorojnë në mënyrë të vazhdueshme fëmijët e tyre.

    Sipas Zajmit, që nga viti i kaluar është rritur numri i psikologëve në shkollat e kësaj komune.

    Fundjavën e kaluar organet e sigurisë kanë arritur të parandalojnë një ngjarje që mund të ishte shndërruar, në tragjedi në këtë qytet. Një 16-vjeçar i cili dyshohet se kishte në plan t’i vriste shokët e tij të klasës, tashmë ndodhet në paraburgim. Policia i kishte rënë në gjurmë planit të tij nëpërmjet rrjeteve sociale.

  • Shmanget “takimi i kërkuar”, Kurti shkon në Tiranë e Vuçiq do ta takojë Putinin në Pekin

    Shmanget “takimi i kërkuar”, Kurti shkon në Tiranë e Vuçiq do ta takojë Putinin në Pekin

    Përgatiti: Fatlum Jashari

    Përkundër përpjekjeve ndërkombëtare, përfundimisht janë shuar gjasat për takim ndërmjet kryeministrit të Kosovës, Albin Kurti, dhe presidentit të Serbisë, Aleksandar Vuçiq, në margjina të samitit të Procesit të Berlinit në Tiranë.

    Televizioni merr vesh se ka pasur përpjekje nga Gjermania për organizimin e një takimi të tillë në kryeqytetin shqiptar, por Vuçiq nuk do të jetë në Tiranë.

    Në një adresim në orët e vona të së enjtes, presidenti i Serbisë njoftoi se të dielën do të udhëtojë për në Kinë – ku fillimisht do të ketë një takim bilateral me presidentin Xi Jinping.

    Edhe pse tha se nuk është konfirmuar ende, Vuçiq theksoi se beson se do të ketë një takim me presidentin e Rusisë, Vladimir Putin, në margjina të samitit “Një brez, një rrugë”, që do të mbahet më 17 dhe 18 Tetor në Pekin.

    Ndërsa, në Samitin e Procesit të Berlinit, Serbia do të përfaqësohet nga kryeministrja Ana Brnabic.

    Megjithatë, një takim Kurti-Brnabic nuk pritet të ndodhë.

    Para çfarëdo takimi bilateral me palën serbe, Kosova kërkon ndëshkimin e Serbisë për rolin e saj në atë që është cilësuar akt agresioni, nëpërmjet sulmit terrorist-paramilitar në Banjskë.

    Profesori në Universitetin e Winchesterit në Angli, Seb Bytyçi, vlerëson se Kosova duhet të mos ndryshojë qëndrim në këtë fazë – kur ende nuk është finalizuar hetimi për 24 Shtatorin dhe nuk ka masa ndaj Serbisë.

    “Vetë fakti që Serbia i ka ende dyert e hapura në këto takime rajonale, pas sulmit të 24 Shtatorit, është shumë brengosës për Kosovën dhe paraqet një diskriminim ndaj Kosovës”, tha Bytyçi.

    Profesori përmend edhe zhvillimet e brendshme në Serbi, si arsye shtesë që Kosova të mos nxitojë për t’u rikthyer në tavolinën e bisedimeve.

    “Duhet theksuar se këto takime do të ishin joproduktive apo kundërproduktive, sepse tashmë Serbia është në periudhë zgjedhore dhe duhet të pritet gjithashtu për përfundimin edhe të zgjedhjeve atje”, tha Bytyçi.

    Të hënën, në Tiranë, krerët e gjashtë vendeve të Ballkanit Perëndimor, nën lehtësimin e kancelarit të Gjermanisë, Olaf Scholz, dhe presidentes së Komisionit Evropian, Urusla Von Der Leyen, pritet të nënshkruajnë marrëveshjen rajonale për njohje të ndërsjellë të kualifikimeve profesionale.

    Në Samitin e Procesit të Berlinit, i cili do të zhvillohet për herë të parë në kryeqytetin e një shteti jo-anëtar të Bashkimit Evropian, pjesëmarrjen e ka konfirmuar edhe presidenti i Francës, Emmanuel Macron.

  • Pushteti mungon në Komision, opozita mban dëgjim publik për kërkesat e Policisë

    Pushteti mungon në Komision, opozita mban dëgjim publik për kërkesat e Policisë

    Përgatiti: Krenare Mulliqi

    Pas bojkotit të seancës së jashtëzakonshme, temë diskutimi e të cilës do të duhej të ishte përmirësimi i kushteve të punës për policët, deputetët e pushtetit nuk ishin të pranishëm as në mbledhjen e Komisionit për të Drejtat e Njeriut.

    Para anëtarëve të këtij komisioni, për kushtet e punës të policëve folën kryetari dhe nënkryetari i Sindikatës së Policisë, derisa paraprakisht kishin dorëzuar një peticion.

    Edhe pse nuk pati kuorum, megjithatë kërkesat e policëve u dëgjuan.

    Më i ashpër ishte Avni Hoti, cili kërkoi që deputetët të mos e përdorin policinë për kauza politike.

    Ndërkaq, anëtarët e Komisionit që vijnë nga partitë opozitare, për gjendjen në Polici fajësuan pushtetin.

    Sipas përfaqësuesve të Sindikatës së Policisë, për këtë institucion nuk është bërë asgjë që nga koha e UNMIK-ut.

    Përfaqësuesve të Sindikatës së Policisë iu premtuan se do të ftohen edhe një herë në këtë komision dhe do të kërkohet që i pranishëm të jetë edhe një përfaqësues nga Qeveria.

  • Realizimi i aktiviteteve të ministrive në periudhën janar-gusht, MPB ka më së paku aktivitete

    Realizimi i aktiviteteve të ministrive në periudhën janar-gusht, MPB ka më së paku aktivitete

    Përgatiti: Driton Sadiku

    Ministri i Punëve të Brendshme aktualisht është njëri prej ministrave më të përfolur në vend.

    Por, Ministria që ai drejton, konsiderohet si më dembelja në realizimin e aktiviteteve të saj, të paktën në gjysmëvjetorin e parë të këtij viti.

    Hiç më mirë nuk qëndron as Ministria e Drejtësisë që bashkë me MPB-në, zënë dy vendet e para për mospunë.

    “Nga të dhënat e monitorimit del se MPB-ja nga 12 aktivitete të parapara ka arritur t’i realizojë vetëm 2, ndërsa Ministria e Drejtësisë nga 14 aktivitete të parapara ka arritur t’i realizojë vetëm 6”, tha Albana Hasani, hulumtuese në lëvizjen FOL.

    Ndërkaq, të gjitha ministritë së bashku, nuk kanë arritur ta përmbushin as 50% të asaj që kishin në plan, në këtë periudhë kohore.

    Megjithatë, përtej saj, qeveria së bashku me të gjitha dikasteret, po kritikohet edhe nga njohësit e politikës se nuk kanë punuar si e sa duhet.

    “Ministria e Punëve të Jashtme ka qenë dështim total, gjithashtu edhe Ministria e Shëndetësisë, e po ashtu kemi një gjendje kaotike edhe në Ministrinë e Arsimit. Por kemi edhe dështime të tjera pothuajse në 80 për qind të ministrive, e përfshirë këtu edhe Ministrinë e Financave, e cila nuk ka treguar rezultat në punën e saj”, tha politologu Fidan Ukaj.

    Sidoqoftë, kryeministri i Republikës i kishte paralajmëruar ministrat e tij qysh herët se nuk janë të përhershëm dhe se u duhet të punojnë për të mbetur në ato pozita, por deri më tani në mbi 2 vjet e gjysmë qeverisje, nuk ka shkarkuar asnjë ministër, përveç atyre të shëndetësisë e ministrit të mbrojtjes që e liruan vetë detyrën.

  • Lista Serbe thotë se është e gatshme të marrë pjesë në zgjedhjet e reja në veri

    Lista Serbe thotë se është e gatshme të marrë pjesë në zgjedhjet e reja në veri

    Përgatiti: Arton Hamiti

    341 ditë pas braktisjes së institucioneve të Kosovës, pjesëtarë të komunitetit serb, siç duket e kanë ndryshuar qëndrimin.

    Kryetari i Listës Serbe, Goran Rakiq, të premten, tha se partia më e madhe e serbëve të Kosovës, është e gatshme të marrë pjesë në zgjedhjet e reja komunale në katër komunat veriore.

    Nga Mitrovica e Veriut, kreu i partisë që gëzon mbështetjen e Beogradit, theksoi se ky vendim u mor në koordinim me presidentin e Serbisë, Aleksandar Vuçiq.

    “Këtë herë, ne do ta dëgjojmë këshillën e presidentit Vuçiq dhe sot po dërgojmë një mesazh se jemi gati të marrim pjesë në zgjedhjet në veri të Kosovës dhe kështu të inkurajojmë procesin politik dhe dialogun që do të çonte në përmbushjen e kushteve tona, që i kemi theksuar vazhdimisht deri më tani. Kjo është arsyeja pse ne i kërkojmë Prishtinës të shpallë zgjedhje të parakohshme lokale për kryetarë në katër komunat në veri të Kosovës dhe sa më shpejt të jetë e mundur”, tha Rakiq.

    Rakiq, i cili në nëntor të vitit të kaluar, braktisi postin e ministrit për Komunitete dhe Kthim, shtoi se tani i takon Prishtinës të marrë vendim për zgjedhje të reja.

    “Është e nevojshme që këta kryetarë komunash dhe këta këshilltarë komunalë të rremë, joligjor dhe jolegjitim, që kanë muaj që ngacmojnë qytetarët tanë, të japin urgjentisht dorëheqjen dhe të largohen, për të dalë nga godinat tona, sepse nuk janë përfaqësues të popullit tonë. Qëllimi i tyre i vetëm është t’i ngacmojnë shtetasit tanë”, tha Rakiq.

    Sulmi terrorist i 24 shtatorit, sipas opinionistit Bekim Kabashi, ka ndikuar që Lista Serbe të ndryshojë qëndrim dhe ta kërkojë mbajtjen e zgjedhjeve në veri.

    Mitrovica e Veriut, Zveçani, Zubin Potoku dhe Leposaviqi, udhëhiqen nga kryetarët shqiptarë, të cilët e morën detyrën pas zgjedhjeve të 23 prillit, zgjedhje këto që u bojkotuan nga serbët lokalë. Vendosja e tyre në zyrat komunale u përcoll me protesta të ashpra nga serbët lokalë, teksa sulmuan Policinë e Kosovës, pjesëtarët e KFOR-it dhe gazetarët.

    Pasi ndaj Kosovës u vendosën masa ndëshkuese nga Bashkimi Evropian, ekzekutivi u zotua për riorganizimin e zgjedhjeve, përmes një udhëzimi administrativ, i cili ua mundëson qytetarëve t’i shkarkojnë kryetarët e komunave të tyre përkatëse, përmes një peticioni.

    Bashkësia ndërkombëtare si rrugë më të mirë dhe të shpejtë e sheh dorëheqjen e kryetarëve, por një kërkesë të tillë, ministri i Administrimit dhe Pushtetit Lokal, Elbert Krasniqi, e ka konsideruar si kërkesë të Beogradit.