Author: ATVLive

Dorëheqjet vullnetar nga Policia e Kosovës (PK) po shihen si fenomen shqetësues dhe po kërkohet që të merren hapa të menjëhershëm për parandalimin e këtij fenomene. Vetëm nga fillimi i këtij viti janë 60 dorëheqje nga ky institucion, ka konfirmuar për Ekonomia Online, kryetari i Sindikatës së Policisë së Kosovë, Imer Zeqiri.

Ai ka shtuar se këto dorëheqje mund të ndalen vetëm atëherë kur pushteti merr hapa për përmirësimin e mirëqenies se PK-së dhe plotëson kërkesat e kamotshme të tyre.

Zeqiri tha se PK-ja përveç kërkesës për shtesat e rrezikshmërisë ka kërkuar që të hartohet edhe Ligji për pensionimin e hershëm në të cilën parashihet rregullimin i pensionit, pasi sipas tij, policët pas pensionimit marrin vetëm 100 euro të cilat nuk dalin as për ilaçe.

“Policia e Kosovës do të duheshin që t’i plotësoheshin disa kushte shumë më herët jo vetëm pse ndodhi rasti i fundit, po në realitet PK ka treguar rezultatet dhe suksese në vazhdimësi që nga themelimi. Mirëpo kur jemi të mirëqenia definitivisht është për keqardhje që mungojnë shumë gjëra, jo vetëm shtesa për rrezikshmëri e cila kjo tani më nuk po ekzekutohet që nga implementimi i ligjit të pagave. Ne kemi pasur kërkesa të tjera shumë më prioritet një institucion i sigurisë në vend pa sigurim shëndetësor dhe jetësorë. Është e pa kuptim pse nuk punohet dhe nuk është punuar deri më tani për sigurimin shëndetësorë dhe jetësorë. Kemi pas kërkesa konkrete drejtuar qeverisë, kemi pas edhe plan konkret se si mund të bëhet ajo, vetëm duheshin mjetet. Kjo nuk po ndodh”, tha ai.

“Kemi edhe ligjin për pensionim në moshën 55 vjeçare shpesh herë po përmendet që nuk është ligj i parakohshëm është ligj në moshën 55 vjeçare. Ky ligj në këtë moshë në shumicën e shteteve të botës polici pensionohet në këtë moshë. Polici për punën që e kryen, e kanë paraparë edhe ekspert të ndryshëm që deri në moshën 55 vjeçare mund të jetë i freskët që të ju dal zot të gjitha atyre autorizimeve ligjore dhe detyrat që i kryen një policë. Në këtë ligj nuk është vetëm kjo, por zyrtari policor pas përfundimit të karrierës arritjes së moshës 65 vjeçare atëherë kur pensionohet është pa pension, merr një pension prej 100 eurove që nuk është as ndihmë sociale që nuk i mjafton ndoshta shumicës prej tyre as për barna për ilaçe. Është vërtet tepër nënçmuese në fund të karrierës pas gjithë këtyre sfidave me 100 euro”, tha ai.

E për shkak të gjitha këtyre kërkesave dhe mos realizimit të tyre, kryetari i kësaj Sindikate ka thënë se dorëheqjet vullnetar të policëve nuk janë duke u ndalur, sipas tij, nga fillimi i këtij viti deri më tani janë bërë 60 dorëheqje.

Ai ka theksuar se parandalimi i këtyre dorëheqjeve mund të ndalet vetëm me përmirësimin e mirëqenies se PK-së dhe realizimit të kërkesave të tyre.

“Dorëheqje ka pasur vazhdimisht, çdo vit ka pasur dorëheqje, që nga themelimi i policisë kemi mbi 2200 dorëheqje vullnetare, mirëpo e irritoj pak, e rriti pakënaqësinë të PK-ja kur u hoq edhe shtesa për rrezikshmëri, duke i pasur parasysh edhe shumë kushte të tjera dhe kemi ardhur në atë pik që kemi dorëheqje diku deri më tani rreth 60 dorëheqje vetëm për këtë vit dhe kemi paralajmërime për dorëheqje. Ndoshta gati për çdo ditë kemi nga një dorëheqje që është e tepërt dhe i vetmi parandalim i dorëheqjeve vullnetare është përmirësimi i mirëqenies se PK-së. Dorëheqjet janë bërë shqetësuese, zyrtarët policore janë të dëshmuar me përvojë dhe profesionalizëm. Prandaj po dëmtohemi, jo vetëm polici por po dëmtohet edhe vetë shteti”, tha ai.

Zeqiri ka folur edhe në lidhje me raportimet për mungesë të veshmbathjeve të PK-së, ku sipas tij, ka mungesë dhe se PK-ja nuk qëndron mirë më veshmbathje.

Ai ka thënë se kjo është duke ndodhur për shkak të mos funksionimit për një kohë të Bordit të Organit Shqyrtues të Prokurorimit dhe për shkak të tenderëve, raporton EO.

“Në realitet shkaku i ngecjeve të disa tenderëve të cilët në njëfarë faze kanë pas kryer të gjitha procedurat e tenderimit po një kohë të gjatë, gati rreth një vit nuk ka funksionuar Bordi i Organit Shqyrtues të Prokurorimit dhe deri në polici kemi pasur 24 projekte dhe ato kanë ngecur për shkaka se nuk funksion bordi i OShP-së mandej, kur filloj të funksionoj disa janë kthyere në pikën zero disa kanë filluar që të përmirësohen. Ka mungesa, ende nuk jemi mirë me veshmbathje, me uniforma të Policëve të rendit, mos të marrim pesën e njësive speciale të cilët janë të kompletuar me të gjitha pajisjet e nevojshme. Por pjesa tjetër që janë shumica e zyrtarëve policor ka mungesa të veshmbathjeve e krejt është shkaku i këtyre disa tenderëve që po rikthehen po refuzohen, s’po ka ofertor kualitativ e shumë probleme të tjera që nuk i dijë detajet” tha ai për EO.

Gjykimi në mungesë në rastet e krimeve të luftës po vlerësohet se do të jenë me shumë sfida dhe që nuk do të kenë efektin e duhur nga Fondi për të Drejtën Humanitare.

Sipas tyre, kjo formë bien në ndesh me të drejtat e të akuzuarve që të mbroj vetveten, pavarësisht se ai përfaqësohet nga një avokat. Sipas këtij Fondi, edhe nëse dikush dënohet në mungesë sipas ligjit në momentin që ai arrestohet për të vuajtur dënimin, ai ka të drejtë automatikisht që të kërkojë rigjykim.

Bekim Blakaj, drejtori i Fondit për të Drejtën Humanitare, në një intervistë për Ekonomia Online ka thënë se Fondi që nga fillimi nuk ka përkrahur gjykimet në mungesë, kjo pasi sipas tij, kjo formë ka edhe probleme në praktikë.

Ai tha se kjo formë nuk do të jap efektin e duhur sepse edhe nëse ata dënohen në mungesë, përgjegjësit nuk e mbajnë dënimin.

“Që në fillim Fondi për të Drejtën Humanitare në Kosovë nuk e ka përkrah gjykimin në mungesë për shumë arsye. Janë ato arsye sepse bien në ndesh me të drejtat e të akuzuarve me mbrojt vetveten, pra me qenë prezent në gjykatë. Nga ana tjetër ka edhe probleme praktike me ato që janë ballafaquar edhe prokuroritë në Kroaci të cilat në fakt kanë ngritur aktakuza, janë zhvilluar gjykimet në mungesë edhe shumë prej tyre kanë përfunduar para Gjykatës Evropiane për të drejta e njeriut dhe shteti i Kroacisë i ka humbur ato. Nuk besoj që do të ketë një efekt të duhur tek e fundit edhe në rast se prokurori sjell prova të mjaftueshme edhe në mënyrë meritore të pandehurit dënohen në mungesë prapë ata nuk janë që përgjigjen para drejtësisë, respektivisht nuk e mbajnë dënimin e tyre edhe pse në fillim do të duket si lehtësim për familjet e viktimave”, tha ai.

Sipas Blakajt ndër sfidat që do ta përcjellin këtë proces janë mos dhënia e deklaratave të të pandehurit.

Sipas tij, ligji parasheh që në çfarë do rrethane nëse dikush dënohet në mungesë në momentin që ai arrestohet ka të drejtë automatikisht që të kërkoj rigjykim, e kjo do të konsumonte kohë, resurse dhe mund të sjell probleme.

“Sfidat e para me të cilat do të ndeshtë gjyqësore është se nuk mund ta marrin një deklaratë nga të pandehurit, pra nuk do të japin deklaratën ata vetë. Nuk do të kenë mundësi as të deklarohet të fajshëm apo të pa fajshëm. Nga ana tjetër ndoshta Prokuroria do ta ketë të lehët të sjell dëshmitarë të ndryshëm të cilët nuk do të sfidohen nga mbrojtja e të pandehurve edhe pse ata do të kenë një avokat në detyrë zyrtare, mirëpo sigurisht mbrojtja efektive nuk është e njëjtë me avokatë sipas detyrës zyrtare. Përfundimisht të pandehurit nuk mund të parashtrojnë pyetje, as të ofrojnë alibi në këtë proces”.

“Çështja tjetër është se ligji e parasheh që në çfarë do rrethane nëse dikush dënohet në mungesë në momentin që arrestohet për me mirëmbajt dënimin, ai ka të drejtë automatikisht që të kërkoj rigjykim. Pra do të zhvillohet gjykimi nga fillimi. Konsumohet tepër kohë edhe resurse dhe kjo mund të sjell probleme. Përfundimisht nëse aktgjykimi në prezent të akuzuarve përsëritet procesi do të jetë i ndryshëm më atë në mungesë atëherë kjo do të tregojë që ekziston mundësia që dikush të dënohet edhe pa qenë fajtor”, tha ai.

Ai tha se deri më tani nga Prokuroria Speciale janë dorëzuar gjashtë aktakuza ku sipas tij, shumica dërrmuese prej të akuzuarve janë shtetas serb, raporton EO.

“Nëse nuk gaboj deri më tani janë të dorëzuar gjashtë aktakuza nga Prokuroria Speciale e Kosovës në atë Dhomën Speciale pranë Gjykatës Themelore në Prishtinë, pra gjashtë aktakuza nëse nuk gaboj bëhet fjalë për gjashtë persona. Ne nuk e dimë saktësisht identitetin e tyre sepse ende janë me iniciale mirëpo po supozojmë që shumica dërrmuese prej tyre janë serbë”, tha ai.

Përgatiti: Pranvera Krasniqi

Therje me thika, rrahje e vjedhje janë disa nga rastet e shënuara në raportet e Policisë, vitin e kaluar, në disa shkolla në Ferizaj.

Me qëllim evitimin e rreziqeve dhe përhapjes së dukurive negative mes nxënësve, Drejtoria e Arsimit në Komunën e Ferizajt, në bashkëpunim me Policinë, kanë dyfishuar numrin e sigurimit fizik.

“Duke e parë të nevojshme dhe duke analizuar situatën nëpër shkolla, ne kemi rritur numrin e sigurimit fizik dhe kjo po ndikon pozitivisht, pasi po ndalohet edhe futja brenda e personave të panjohur, nuk munden as në oborr me hy”, tha drejtori i Arsimit në Komunën e Ferizajt, Afrim Llabjani.

Ndikim pozitiv në zvogëlimin e numrit të incidente pati në shkollën “Zenel Hajdini”.

“Ka ndikuar mjaft shumë se edhe numri i incidenteve të mundshme është zvogëluar, përveç konflikteve verbale që mund të ndodhin prej keqkuptimeve të nxënësve”, tha Abdulllah Imeri, drejtor në shkollën “Zenel Hajdini”.

Mirëpo, në disa shkolla tjera, sipas prindërve, niveli i sigurisë duhet përmirësuar.

“Në shkollën këtu mbrapa ka shumë parregullsi, nxënësit e shkollave tjera hyjnë e dalin, oborri shfrytëzohet madje si park…”, tha një prind.

Sipas qytetarëve, pajisja e nxënësve me uniforma, do ta lehtësonte edhe më shumë identifikimin e nxënësve të shkollës përkatëse, pasi shumica e shkollave në Ferizaj nuk kanë.

“Mungojnë uniformat për t’i dalluar nxënësit, mos me hy në shkollë nxënësit të cilët nuk janë të asaj shkolle, kishte ndihmuar shumë edhe kjo”, tha një tjetër prind.

Përveç shtimit të sigurimit fizik në shkolla, Policia e Kosovës po mban ligjërata për vetëdijesimin e nxënësve në parandalimin e rreziqeve të mundshme në objekte shkollore.

Përgatiti: Sara Shehu

Në Repartin e Hemodializës në Spitalin e Gjakovës “Isa Grezda”, vazhdon ofrimi i shërbimeve mjekësore në kushte të vështira. Hapësira e ngushtë dhe infrastruktura e dobët janë problemet kryesore që po e rëndojnë punën në këtë repart.

E që nga viti 2021 ekziston një projekt për ndërtimin e një reparti të ri të hemodializës, por që asnjëherë nuk është realizuar.

Ushtruesi i detyrës së drejtorit të spitalit, Hilmi Shala tha se nëse institucionet më të larta shëndetësore, japin dritën jeshile për nisjen e ndërtimit të objektit të ri, pacientët në dializë do të obligohen që këtë shërbim ta marrin në Qendrën e Hemodializës në Rahovec, deri në përfundimin e punimeve.

“Kemi një plan për rregullimin e objektit të ri, por që i kalon mundësitë tona buxhetore. Nëse institucionet vendosin që të ndërtohet ky objekt, atëherë gjatë kohës së ndërtimit, pacientët duhet ta marrin dializën në qendrën e hemodializës në Rahovec. Aktualisht kemi 68 pacientë në dializë, përfshirë 9 nga Shqipëria”, tha Shala.

Megjithatë, disa nga pacientët që i drejtohen spitalit për t’iu nënshtruar dializës, thonë se nuk kanë mundësi financiare të udhëtojnë deri në Rahovec.

“Spitali i ka fajet se u dashtë me këqyr ma herët, qe 20 e diçka vjet. Plus transportin me siguru, dikush s’ka kerr. Ss pensioni s’po m’del, 160 pension i luftës m’del po s’mjafton. boll shqetësuese për këta që s’kanë e ai që s’ka vdes, s’ka qysh shkon”, tha Avdyl Kastrati, pacient.

“Duhet m’u ba zgjidhje, me u ba dializa këtu e jo me shku në Rahovec me marr. Është larg për neve të sëmurët. Është problematike”, tha një tjetër pacient.

Nga ana tjetër, Hemodializa në Rahovec, aktualisht është jashtë funksionit për shkak të punimeve që pritet të zgjasin deri në fund të muajit tetor.

ATV-ja ka dërguar pyetje edhe në Ministrinë e Shëndetësisë dhe në Shërbimin Spitalor Klinik Universitar, nëse do të bëjnë një zgjidhje për ta lehtësuar trajtimin mjekësor për pacientët në dializë në Gjakovë, por askush nuk ka kthyer përgjigje.

Në Hemodializë të Spitalit të Gjakovës punojnë 11 infermierë dhe 1 mjek.

Përgatiti: Donisa Fazliu

Mishi që po largohet nga ky lokal prej inspektorëve të ushqimit, dyshohet të ishte arsyeja që mbi 100 qytetarë të Malishevës, të helmohen e të kërkojnë ndihmë mjekësore.

Njëri prej tyre është edhe Fatmir Hoti me bashkëshorten e tij.

“Para dy ditë i kemi marrë dy donerë, aty gjithmonë kemi marrë donera nuk kemi pasë problem. Gruan e kam që 3 ditë në spital me këto simptoma barkqitje, ethe e që të njëjtat simptoma i ka edhe gruaja”, tha Fatmir Hoti, qytetar.

Edhe Skënder Shala dyshohet të jetë helmuar nga konsumimi i ushqimit në këtë lokal. Trajtimin mjekësor ai po e merr në Qendrën Kryesore të Mjekësisë Familjarë në Malishevë.

“Para tre dite kom hëngër bukë në këtë lokal, kam pasë bark qitje, dhimbje, temperaturë, ethe. Edhe dje e kam marrë një infuzion në mëngjes herët, gjithashtu edhe sot, pra ka shumë qytetarë që kanë konsumuar ushqim aty dhe janë këtu bashkë me mu, pra tani edhe simptomë tjetër e kam edhe lodhje”, tha Shala.

Në Qendrën Kryesore të Mjekësisë Familjare në Malishevë trajtim kanë marrë rreth 70 persona.

“Kemi pasë një numër të shtuar të pacientëve me helmim, qendra kryesore e mjekësisë familjare nuk është klinikë universitare dhe nuk mban pacientë në trajtim të vazhdueshëm dhe më pasë dërgohet në shtëpi”, tha drejtori QKMF-së në Malishevë, Afrim Krasniqi.

Ndërkaq, 12 qytetarë kanë kërkuar ndihmë mjekësore edhe në Klinikën Infektive të QKUK-së, derisa gjendja e tyre shëndetësore sipas drejtorit të kësaj klinike, është stabile.

“Gjendja e tyre e përgjithshme është stabile, stafi i Klinikës Infektive ka marrë masat për trajtim të shpejtë dhe profesional, pacientët janë jashtë rrezikut për jetë dhe po bëjmë çmos që sa më parë të rikuperohen dhe të lëshohen”, tha drejtori i Klinikës Infektive, Arben Vishaj.

Agjencia e Ushqimit dhe Veterinës ka dalë menjëherë në vend të ngjarjes dhe ka mbyllur lokalin.

“Kemi marrë masa parandaluese për përhapjen e mëtejshme të helmimeve, kemi marrë të gjitha masat që duhet konform ligjit të fuqi dhe është bërë mbyllja e lokalit deri në një vendim të ardhshëm dhe janë marrë mostrat”, tha Durak Zyraku, koordinator i Zyrës Rajonale të AUVK-ut në Prizren.

Përpos inspektorëve të Agjencisë së Ushqimit të cilët morën mostrat, në lokal erdhi edhe pronari i lokalit ndaj të cilit është caktuar masa e ndalimit.

Për rastin është deklaruar edhe ministri i Shëndetësisë, Arben Vitia.

Vitia ka përmendur vetëm 68 qytetarë të helmuar duke shtuar se përpos QKUK-së edhe 9 persona po trajtohen në Spitalin e Përgjithshëm të Prizrenit.

Përgatiti: Krenare Mulliqi

Gati tre muaj pasi dha verdiktin, Gjykata Themelore në Ferizaj ka përpiluar Aktgjykimin në plot 88 faqe për dy të dënuarit Dardan Krivaqa dhe Arbër Sejdiu për vrasjen e Marigona Osmanit.

Sipas arsyetimit të Trupit Gjykues i cili vrasjen e Marigonës e ka konsideruar makabre, motivi për vrasje u konstatua të ishte xhelozia e paarsyeshme nga tashmë i dënuari me burgim të përjetshëm, Dardan Krivaqës.

Në aktgjykim thuhet se rendësi më e veçantë ju dha dëshmisë së prindërve të viktimës dhe konkluzioneve të ekspertit të mjekësisë ligjore të cilat u dëshmuan edhe me prova materiale.

“E ndjera ka pasur lëndime përreth syrit të majte, të djathte, përgjatë fytyrës dhe mjekrës, gjoksit, nënsqetullës, për gjatë abdomenit, kofshës se majte dhe te djathte, për gjate krahut te majte dhe te djathte, në nofullën e poshtme, ka pasur thyerje te unazës se pare dhe të dyte te qafës ne mes tyre edhe këputje parciale e palcës se qafës dëmtime në zgavrën e gojës kah nofulla e poshtme e thyer ne dy vende”, thuhet në Aktvendimin e Gjykatës Themelore në Ferizaj.

Sa i përket të dënuarit tjetër me 15 vjet burgim, Arbër Sjediu në aktgjykim thuhet se deklarata e tij e dhënë në gjykatë nuk ishte e besueshme meqë në video incizim shihet qartë se ka ndihmuar Krivaqën në kryerjen e veprës penale.

Në aktvendim gjykata nuk ka gjetur asnjë rrethanë lehtësuese për të dënuarin kryesor derisa si rrethana rënduese, gjykata mori parasysh, moshën e re të viktimës dhe mënyrën si u vra.

“Veprën penale i akuzuari e ka kryer me paramendim, moshën e re të të ndjerës, e cila veç sa e kishte arritur moshën 18-vjeçare. Mënyrën dhe rrethanat në të cilat është kryer vepra penale- në mënyrën më barbare me privimin gradual nga jeta në një ambient të mbyllur në banesë, ku e ndjera ka qenë krejtësisht e pambrojtur”, thuhet më tej në Aktvendimin e Gjykatës Themelore në Ferizaj.

Për vrasjen e Marigona Osmanit, Krivaqa e Sejdiu u dënuan më 4 gusht të këtij viti.

Përgatiti: Arton Hamit

Arsenalit të armëve të sekuestrua që nga sulmi terrorist i 24 shtatorit në Banjskë të Zveçanit, Policia e Kosovës, të premten ua shtoi edhe një sasi tjetër të municionit dhe pajisjeve ushtarake.

Me urdhër të gjykatës, Policia bastisi shtatë lokacione, katër në Mitrovicën e Veriut, dy në Zveçan dhe një në Banjskë.

Pjesë e municionit të sekuestruar ishte edhe një minë kundër këmbësorisë e tipit MRUD, me llojin e së cilës dyshohet se u vra rreshteri Afrim Bunjaku.

Sipas zëvendësdrejtorit të Policisë për rajonin e veriut, bastisjet si kjo e së shtunës, janë në kuadër të hetimeve për sulmin në Banjskë.

Në lokacionet e bastisjeve janë parë edhe pjesëtarë të KFOR-it dhe EULEXI-it. Ndërkaq, në lidhje me armatimin e sekuestruar deri më tani nuk ka të arrestuar.