Plot 3 miliardë e 314 milionë euro, parashihet t’i ketë shteti në dispozicion për vitin e ardhshëm. Në ditën e fundit të afatit ligjor, Qeveria ka miratuar projektbuxhetin për vitin 2024.
Me buxhetin e ri, siç tha Ministri i Financave Hekuran Murati, do rritet edhe koeficienti i pagës, siç edhe kishte paralajmëruar më herët qeveria.
Situate e sigurisë shtyri ekzekutivin që të mendojë më shumë për institucionet e sigurisë, ku edhe ndau më shumë buxhet për to.
Rritja tha se nuk mungon as në fushat e tjera, përfshirë arsimin, shëndetësinë, e megjithatë edhe investimet kapitale.
I pyetur për projektet e premtuara, Murati u përgjigj që të gjitha do të përfundohen brenda mandatit të parë të kësaj qeverie.
Jo në shoqërimin e inspektorëve të tregut, por të stafit të tij personal, Ministri i Mjedisit, Liburn Aliu, nisi vizitat nëpër markete të mëdha të Kosovës, për të parë nëse e kanë filluar së zbatuari udhëzimin administrativ për qeset plastike.
Ai u prit ngrohtësisht nga stafi i njërit nga marketet më të mëdha në Prishtinë, i cili sipas ministrit, ka nisur së zbatuari vendimin e tij për qeset plastike.
“U siguruam një herë që prodhuesit munden dhe janë duke i prodhuar qeset si duhet. Tash mbetet t’i vizitojmë zinxhirët e marketeve të mëdha, pastaj marketeve të vogla. Barra e këtij udhëzimi administrativ bie te marketet…”, tha Aliu.
Aliu nuk pret që udhëzimi administrativ të nisë së zbatuari në mënyrë të menjëhershme, por thotë se është i palëkundur në vendimin e tij.
“E shoh që akoma jo mirë ka filluar të zbatohet, ky është një tranzicion i pakthim”, tha Aliu.
Paraprakisht, Ministri vizitoi disa fabrika në nivel vendi, që bëjnë prodhimin e qeseve plastike, për të cilat tha se jo të gjitha kanë arritur ta respektojnë në tërësi udhëzimin.
“Dy prej të cilëve janë më të vegjël të cilët nuk arrijnë me prodhu atë mbi 50 micron, por e prodhojnë këtë qesen e hollë dhe atë nga 25 deri në 50. Dhe tre të tjerat i prodhojnë të gjitha. U siguruam një herë që prodhuesit munden dhe janë duke i prodhuar qeset si duhet”, tha ai.
Por ky lloj i qeseve plastike ende nuk ka arritur të vihet në përdorim, në disa bizneseve të vogla në kryeqytet.
“Ne nuk kemi filluar t’i shesim qeset e plastikës ende, ani pse ka nga ata që porsa të dalin nga maketi e hedhin qesen, por po na vjen keq për një produkt t’ju shesim qese”, tha Mustafë Krasniqi, pronar.
Por pavarësisht njoftimeve të ministrit, qytetarët vazhdojnë të mos pajtohen me vendimin, që qesen duhet ta paguajnë 5 deri në 10 centë.
“Unë jetoj në Bregun e Diellit, po ka filluar nga pjesa jonë ligji për shitjen e qeseve të plastikës, mua s’po më duket i arsyeshëm ky ligj”, tha Bekim Vitia, qytetar.
“Për dikë janë shumë 5, 10, 15 centë kur grumbullohen çdo ditë, sepse sa e blen një qese i shfrytëzon për diçka tjetër”, tha Kujtim Lahu, qytetar.
Përveç rëndësisë së inspektimeve, ministri Aliu kërkoi nga qytetarët që të ngrenë nivelin e ndërgjegjësimit, në mënyrë që të mos i hedhin qeset e plastikës në ambiente të hapura, duke dëmtuar kështu ambientin.
Deputetët e Komisionit për Ekonomi u mblodhën në pritje të ministres së Ekonomisë, Artane Rizvanolli, e cila pritej të raportonte rreth gjendjes në ndërmarrjen ‘’Trepça’’.
Ajo nuk erdhi, meqë ishte jashtë vendit, ndërsa Valon Perbreza i cili qe përfaqësues i saj në takim, nuk u mirëprit nga deputetët e opozitës.
Megjithatë, me ftesë të deputetëve të partisë në pushtet, një grup minatorësh erdhën nga miniera në Kuvend.
Përfaqësuesit e minatorëve grevistë kërkuan shkarkimin e kryeshefit të ndërmarrjes.
“Janë ato tri kërkesa që nuk kanë ndryshuar, kërkesa për realizimin e pagës mujore nga data 6 deri me datën 10, llogaridhënia dhe shkarkimi i menaxhmentit, është po ashtu edhe sigurimi shëndetësor dhe krijimi i kushteve më të mira në punë, minatorët janë të palëkundur në kërkesat e tyre”, tha kryetari i Sindikatës, Ibrahim Januzi.
Kjo kërkesë specifike e minatorëve u përkrah nga opozita.
“Sido që të jetë, për respektin për juve dhe situatën ndiejmë keqardhje. Kërkesat e juaja janë të arsyeshme dhe esenciale. Ndërsa, sa i përket shkarkimit të menaxhmentit, duhet të japë leje mbreti”, tha deputetja e LDK-së, Valentina Rexhepi – Bunjaku.
Megjithatë, greva nuk po konsiderohet aq me vend nga deputetët e shumicës parlamentare.
“Në këtë grevë ju keni hyrë në ditën kur janë ekzekutuar pagat, plotësisht të vetëdijshëm për faktin që pagat janë vonuar se ka qenë data 24, gjithashtu e dimë që ka humbje të mëdha në “Trepçë”, që tregon se ka nevojë për rishikim përmbajtjesor të produktivitetit brenda dhe secila ditë që po shkon janë afërisht humbje 50 mijë euro”, tha anëtarja e Komisionit, Mimoza Kusari – Lila.
Në fund, minatorët morën zotimin e deputetëve të partisë në pushtet se do t’i procedojnë kërkesat e tyre në Ministri të Ekonomisë, ku do trajtohen me urgjencë.
Ndryshe nga deklarata e prerë në Prishtinë, në Beograd presidentja e Komisionit Evropian, Ursula Von Der Leyen, nuk e përmendi njohjen de-fakto të Kosovës nga Serbia.
Duke shmangur termin terrorist, të cilin e ka përdorur Bashkimi Evropian, Von Der Leyen dënoi sulmin në Basnjkë dhe tregoi çfarë duhet të bëjë Serbia në raport me zotimet për planin e ri, më 26 Tetor në Bruksel.
“Kemi nevojë për normalizim ndërmjet Serbisë dhe Kosovës. Sulmi i dhunshëm i 24 Shtatorit në veri të Kosovës, është komplet i papranueshëm, autorët duhet të japin llogari dhe të sillen para drejtësisë. Kjo është absolutisht vendimtare për të dyja, që të angazhohen dhe të shkojnë në rrugën e normalizimit. Lidhur me këtë është e rëndësishme që Serbia ta miratojë statutin e asociacionit, bashkësisë. Kosova duhet ta zbatojë këtë statut. Përveç kësaj, është jetike që Serbia të nisë t’i zbatojë marrëveshjet ekzistuese dhe të mos humbë kohë”, tha Von Der Leyen.
Duke u thirrur në Kushtetutë, presidenti i Serbisë përsëriti qëndrimin kundër njohjes së Kosovës – teksa u zotua për përmbushje të obligimeve nga dialogu.
“Më lejoni të jem tërësisht i hapur. Për ne njohja e pavarësisë së Kosovës nuk është çështje, e kam thënë në disa raste. Nuk jam i turpëruar ta them edhe në prani të Presidentes së Komisionit Evropian. Ne e dimë cilat janë obligimet tona dhe jemi gati t’i përmbushim ato obligime”, tha presidenti i Serbisë, Aleksandar Vuçiq.
Pasi u ankua se Kosova nuk e ka përmbushur marrëveshjen për Asociacionin e Komunave me Shumicë Serbe, Vuçiq tha se draft-statuti ka bazë të mirë.
E pyetur se pse në Serbi nuk e përmendi njohjen de-fakto dhe nëse njohja është kërkesë zyrtare e BE-së, përfshirë pesë shtetet jo-njohëse të Kosovës, Von Der Leyen iu referua marrëveshjes së 18 Marsit.
“Bëhet fjalë për zbatimin e marrëveshjes së Ohrit. Marrëveshja e Ohrit parasheh hapa të ndryshëm, përfshirë njohjen e dokumenteve dhe institucioneve nga Serbia, dhe kjo në anën tjetër shkon përkrah me themelimin e Asociacionit të komunave me shumicë serbe. Kjo duhet të përmbushet nga Kosova. Dhe, kjo do të shtronte rrugën për normalizimin e marrëdhënieve ndërmjet Kosovës dhe Serbisë. Ky është një parakusht i nevojshëm për rrugën evropiane, respektive”, tha Von Der Leyen.
Pas takimeve në Bruksel, në një deklaratë të përbashkët, Gjermania, Franca dhe Italia kërkuan nga Kosova të nisë procedurat për themelimin e Asociacionit dhe nga Serbia të përmbushë njohjen de-fakto për Kosovën.
Pas muajsh të tërë të peripecive politike, Parlamenti malazez ka votuar Qeverinë e re e cila varet shumë nga grupe pro-serbe e ruse, të cilat do t’i bashkohen qeverisë, pas një viti bazuar në marrëveshjen e koalicionit. Qeveria e re do të udhëhiqet nga ekonomisti Milojko Spajiq i lëvizjes Evropa Tani. Disa orë pas votimit në Parlament, ish-kryeministri Dritan Abazoviq ia ka dorëzuar detyrën Spajiqit.
Qeveria e re malazeze, ka 17 ministra dhe pesë zëvendëskryeministra. Nga partitë shqiptare, Nik Gjeloshaj është zgjedhur zëvendëskryeministër për politika ekonomike dhe ministër i Zhvillimit Ekonomik, Fatmir Gjeka ministër për të Drejtat e Njeriut dhe të Minoriteteve dhe Marash Dukaj ministër i Administratës Publike.
Qeveria është zgjedhur në një seancë që ka zgjatur gjatë tërë natës. Votimi është bërë në orët e mëngjesit të së martës. Pro Qeverisë së 44-të të Malit të Zi votuan 46 deputetë, kundër ishin 19 dhe një abstenoi.
Spajiq ka thënë se dëshiron që Malin e Zi ta bëjë “Zvicër e Singapor”. Në fjalimin e tij ka thënë se prioritetet e politikës së jashtme janë anëtarësimi i plotë në Bashkimin Evropian, anëtarësim më kredibil në NATO dhe përmirësimi i raporteve fqinjësore.
Megjithatë, ka skepticizëm se si do t’i arrijë të gjitha këto kjo qeveri, duke marrë parasysh koalicionin me partitë pro-serbe, të cilat i kundërshtojnë të gjitha këto.
Mes tjerash, kryetar i Kuvendit është votuar të jetë Andrija Mandiq.
Mandiqi e mori mbështetjen e 49 deputetëve të shumicës së re parlamentare – Koalicioni Për Ardhmërinë e Malit të Zi (partia e ish-Frontit Demokratik), Lëvizja Evropa Tani, Demokratët, Partia Popullore Socialiste pro-Serbe dhe dy parti shqiptare, gjatë votimit në një seancë të Parlamentit malazez të hënën pasdite.
Mandiqi është udhëheqës i Demokracisë së Re Serbe – anëtare e Frontit Demokratik pro-serb dhe pro-rus – i cili së voni është riemëruar si koalicioni Për Ardhmërinë e Malit të Zi.
Prioritete të politikës së jashtme të partisë së Mandiqit janë heqja e sanksioneve kundër Rusisë dhe tërheqja e njohjes së pavarësisë së Kosovës. Kjo parti, po ashtu, kundërshton anëtarësimin e Malit të Zi në NATO.
Mandiq ka raporte të ngushta edhe me presidentin serb dhe atë të Republikës Srpska. Ai e mohon edhe gjenocidin në Srebrenicë derisa mbështet ideologjinë e lëvizjes çetnike. Titullin simbolik të dukës çetnik e ka që nga viti 2007.
Sidoqoftë me të marrë postin Mandic ka thënë se është i gatshëm të dërgojë mesazhe të reja e të harrojë se çfarë avokonte në të shkuarën.
Njësia Speciale Intervenuese e Policisë së Kosovës mund të mbajë protestë këtë të mërkurë.
Në një dokument, në të cilin kishte qasje ATV-ja, figurojnë detajet e përpjekjes së NJSI-së, për të organizuar tubim publik më 1 nëntor, para ndërtesës së Qeverisë.
Paga dhe shtesat e rrezikshmërisë, janë arsyet që pjesëtarët e kësaj njësie elitare kanë shprehur gatishmërinë për të protestuar.
Ndonëse, i mbështet kërkesat e tyre, Sindikata e Policisë nuk e ka mohuar e as pohuar mbajtjen eventuale të protestës. Megjithatë, konfirmoi se pakënaqësitë brenda këtij institucioni janë mëdha.
“Shtesat e rrezikshmërisë, vlerësojmë se janë të ulëta dhe nuk e arsyetojnë punën dhe rrezikshmërinë në Policinë e Kosovës, prandaj janë të papranueshme për secilën kategori, janë diskriminuese për të gjitha njësitë. Pakënaqësia te të gjithë pjesëtarët e policisë është e madhe, prandaj kërkojmë që në afat sa më të shkurtë të bëhet realizimi i këtyre kërkesave dhe kërkesave paraprake me qëllim të përmirësimit të kushteve dhe mirëqenies në Policinë e Kosovës”, thuhet në përgjigjen e Sindikatës së Policisë.
Ndërkaq, në pyetjen e gazetarëve në lidhje me pakënaqësitë e zyrtarëve policorë, ministri i Financave, Hekuran Murati, refuzoi të përgjigjet.
“Kisha dashtë qe sot me u fokusu vetëm në konferencë, e cila është thirrur për të ju informuar për buxhetin”, tha Murati.
Faktin që Njësia Speciale Intervenuese detyrohet që pakënaqësitë t’i shprehë në këtë formë, për ekspertë të sigurisë është goditje e rëndë për imazhin e Policisë.
ATV-ja përmes burimeve ka mësuar se janë duke u zhvilluar bisedime që të gjendet zgjidhje në mënyrë që protesta eventuale të shmanget.
Ndryshe, pas 9 muajve nga hyrja në fuqi e Ligjit për Paga, pjesëtarët e policisë do t’i marrin shtesat e rrezikshmërisë. Me pagën e nëntorit, varësisht nga kategoria, policët do t’i marrin shtesat nga 45 deri në 150 euro, pos pagës bazë.
Ministri i Financave, Punës dhe Transfereve, Hekuran Murati, në një konferencë për medie pas mbledhjes së Qeverisë, ku është miratuar buxheti për vitin tjetër, tha se prioritet do t’i kushtohet sigurisë dhe mbrojtjes, raporton Ekonomia Online.
Buxheti për këtë kategori ai tha se do të jetë 700 milionë euro, ndërsa koeficienti i pagave pritet të jetë 110 euro.
“Ky buxhet parashihet të jetë 3 miliardë e 314 milionë euro dhe parashihet të ndikojë te qytetari. Gjithashtu pritet të rritet edhe koeficienti i Ligjit të Pagave, nga 105 euro në 110. Pra paga minimale bruto do të jetë mbi 700 euro”, u shpreh Murati.
“Prioritet iu është dhënë sigurisë dhe mbrojtjes, ku MPB-së dhe Ministrisë së Mbrojtjes u është ndarë buxhet mbi 700 milionë euro së bashku këto dy dikastere”.
3 miliardë e 314 milionë euro do të jetë buxheti për vitin e 2024, raporton Ekonomia Online. Kështu ka bërë të ditur kryeministri Albin Kurti në mbledhjen e Qeverisë, Kryeministri Albin Kurti, deklaroi se asnjë Qeveri nuk ka bërë më shumë se qeverisja e tij në mbështetje me masa.
Ndërsa për nivelin komunal, kryeministri Albin Kurti tha se buxheti për komunat e Kosovës do të jetë mbi 700 milionë euro.
“Menaxhuam pandeminë, menaxhuam krizën energjetike dhe mbështetëm qytetarin për tu përballur me inflacionin dhe jo vetëm që i menaxhaum me sukses këto kriza me sukses por gjatë këtyre viteve të vështira ta rrisim ekonominë dhe të hapim vende të reja pune. U shtuan 60 mijë vende të reja të punës dhe si rezultat i masave ekonomike”.
Sekretari amerikan i Mbrojtjes, Lloyd Austin, dhe ai i Shtetit, Antony Blinken, më 31 tetor do të dëshmojnë para Senatit, ku do të kërkojnë që të miratohet paketa e ndihmës urgjente për Izraelin dhe Ukrainën.
Sekretari amerikan i Mbrojtjes, Lloyd Austin dhe ai i Shtetit, Antony Blinken, më 31 tetor do të dëshmojnë para Senatit, ku do të kërkojnë që të miratohet paketa e ndihmës urgjente për Izraelin dhe Ukrainën.
Kërkesa urgjente e administratës së presidentit amerikan, Joe Biden, në vlerë prej 105 miliardë dollarësh për këto dy shtete që janë të përfshira në konfikte, veçse është përballur me pengesa në Kongresin e ndarë amerikan.
Sekretarët Austin dhe Blinken do të avokojnë për ndihmën për Izraelin dhe Ukrainën para senatorëve, shumica e të cilëve, demokratë dhe republikanë, mbështesin ndihmën për këto dy shtete, shkruan Rel.
Por, ata përballen me probleme më të mëdha në Dhomën e Përfaqësuesve që udhëhiqet nga republikanët, ku kryetari i ri, Mike Johnson, ka propozuar ndërprerjen e ndihmës për Ukrainën, në mënyrë që ndihma të përqendrohet vetëm në Izraelin.
Qasjet e ndryshme të republikanëve dhe demokratëve parashikojnë probleme në miratimin e ndihmës për Izraelin dhe Ukrainën.
Presidenti amerikan, Joe Biden, ka premtuar mbështetje për Izraelin, i cili nga 7 tetori po lufton kundër militantëve palestinezë të Hamasit. Por, presidenti amerikan ka thënë se Uashingtoni do të vazhdojë ndihmën për Ukrainën, shtet që po përballet me pushtimin e paprovokuar rus që nga shkurti i vitit të kaluar.
