ATV

Author: ATVLive

  • NJSI-ja s’heq dorë, nesër proteston sërish para qeverisë

    NJSI-ja s’heq dorë, nesër proteston sërish para qeverisë

    Përgatiti: Driton Sadiku

    Njësia speciale intervenuese e Policisë nuk do të zmbrapset nga kërkesat e saj.

    Kjo njësi elitare të martën do të protestojë përsëri para qeverisë me kërkesa të njëjta.

    Veçse kësaj here, ajo ka thirrur edhe njësitet e tjera për t’iu bashkuar, ndonëse nuk dihet nëse thirrjes së saj do t’i përgjigjen edhe të tjerët.

    Sidoqoftë, që kërkesat e saj të plotësohen, do të duhet medoemos që të ndryshohet ligji për paga në sektorin publik me gjithë shtojcën përcjellëse.

    “Është shtojca d.t.th., ku bëhet kategorizimi i pozitave te zyrtarët publikë, por edhe te të gjitha pozitat që marrin pagë nga buxheti i shtetit, është pjesë përbërëse e vetë ligjit për pagat, kështu që në mënyrë që kjo shtojcë të plotësohet apo të ndryshohet, atëherë do të nënkuptonte që duhet të plotësohet dhe ndryshohet edhe vetë ligji”, tha Ehat Miftaraj nga Instituti i Kosovës për Drejtësi.

    Kërkesa bazë e kësaj njësie është kategorizimi si njësi e veçantë dhe përfshirja në listën e ekspertëve, që rrjedhimisht do ta kishte koeficientin e pagës më të lartë.

    “Janë një kategori e pozitave ekspertë nëpër institucione të ndryshme si në OSHP, prokurori speciale e pozita të tjera, të cilat kanë trajtim më të mirë dhe koeficienti i të cilëve kalon prej 9”, tha Miftaraj.

    Me një koeficient të tillë prej 9.4, i bie që një zyrtar policor i kësaj njësie të merrte 987 euro pagë bazë. E nëse do t’i paguhej edhe rrezikshmëria siç po kërkon njësia, prej 50 për qind e pagës bazë, i bie që një zyrtar policor i njësisë speciale të merrte pagë 1480 euro.

    Mirëpo, me ligjin e ri shtesa për kushte specifike ku hyn edhe rrezikshmëria, nuk mund të jetë më e lartë se 1% e fondeve totale të përdorura nga organizata buxhetore, për pagën bazë të zyrtarëve publikë të organizatës buxhetore në të njëjtin vit financiar. Kësisoj i bie që nga buxheti prej rreth 84 milionë eurosh për policinë e Kosovës, vetëm 840 mijë euro të jenë për shtesa për kushte specifike të punës.

    Megjithatë, Qeveria, të paktën në një javë nga protesta e parë, nuk i mori parasysh kërkesat e kësaj njësie policore.

  • Kurti dhe Aliu nga terreni bëjnë thirrje për shmangien e qeseve plastike

    Kurti dhe Aliu nga terreni bëjnë thirrje për shmangien e qeseve plastike

    Përgatiti: Pranvera Krasniqi

    Pa inspektorë të tregut me vete, kryeministri Albin Kurti dhe Ministri i Mjedisit, Liburn Aliu, të hënën dolën në terren për të parë sa po zbatohet udhëzimi administrativ për qeset plastike.

    Duke i këshilluar qytetarët që të kenë torba me vete, kryeministri Kurti thotë se shumica e bizneseve tashmë po e zbatojnë udhëzimin në fuqi.

    “Shumë qese të panevojshme plastike janë shndërruar në mbeturina, që në mënyrë masive kanë ndotur ambientin. Prandaj, shpresoj në bashkëpunimin e juaj me këtë udhëzim të ri administrativ, me këtë fushatë t’i themi jo qeseve të plastikës”, tha Kurti.

    “Këto qese në pjesën e frutave do të dhurohen pa pagesë, ndërsa ato të tipit 25 deri në 50 mikronë do të ofrohen me pagesë për qytetarët”, tha Aliu.

    Por, ka raste që disa biznese nuk po e respektojnë në përpikëri udhëzimin administrativ.

    Për këtë dilemë Kurti dha një sqarim.

    Mirëpo, qytetarët vlerësojnë se nuk duhet të paguajnë për asnjë qese me logo, pavarësisht mikronit që ka ajo.

    Një qese e plastikës kushton 5 centë, 2 centë shkojnë për buxhetin e shtetit.

  • Dëmet nga erërat e forta, ndërpritet mësimi në një shkollë në Mitrovicë

    Dëmet nga erërat e forta, ndërpritet mësimi në një shkollë në Mitrovicë

    Përgatiti: Donisa Fazliu

    Një pjesë e kulmit të shkollës fillore “Shaban Idrizi” në Zhabar të Mitrovicës, përfundoi në tokë në mbrëmjen e së dielës, shkaku i erërave të forta.

    Si rrjedhojë, në mëngjesin e së hënën përveç menaxhmentit të shkollës dhe punëtorëve teknikë që po përkujdeseshin për t’i larguar copëzat e kulmit të shpërndara nëpër oborr, askush nga nxënësit nuk erdhi në shkollë.

    “Si shkak i erërave të forta një pjesë e kulmit ka rënë në tokë, dhe si pasojë e saj ka dëmtime shumë të mëdha. Kjo gjendje është shqetësuese pasi që në radhë të parë është siguria e fëmijëve dhe ende nuk e dimë se sa janë pasojat e mëdha brenda shkollës, ka klasë që ka pik edhe shiu”, drejtoresha e shkollës, Saranda Ademi.

    Kësisoj as drejtoresha Ademi nuk është e sigurt nëse mësimi këtu do të nisë të martën.

    “Kemi pasë problem në pjesën e kulmit lart, por me përmasa të mëdha kjo është hera e parë që shkolla ka këto probleme, jemi në kontakt me DKA-në, dhe po presim që të zgjedhin këtë problem emergjent, pasi që është një situatë emergjente”, tha Ademi.

    Megjithatë, Komuna e Mitrovicës thotë se do të përkujdeset për riparimin sa më të shpejtë të dëmeve dhe rinisjen e mësimit.

    “Menjëherë pasi kemi marrë informatën për dëmet e shkaktuara, kemi dalë në terren dhe hapin e parë që e kemi ndërmarrë ka qenë ndërprerja e procesit mësimor për sot, për shkak të sigurisë së nxënësve, kulmi i shkollës do të rregullohet shumë shpejt, në mënyrë që nxënësit të jenë më të sigurt dhe se orët e humbura do të zëvendësohen për të mos humbur asgjë nga plan programi mësimor dhe se nëse fillon mësimi mësimor do t’i njoftojmë nxënësit më vonë përmes drejtorisë, mësimdhënësve, por edhe përmes rrjeteve sociale”, tha Drita Kadriu, DKA në Mitrovicë.

    Përveç dëmeve në këtë shkollë, erërat e forta shkaktuan edhe ndërprerje të energjisë elektrike në qytetin e Mitrovicës.

  • Zëdhënësi i Pentagonit pranon se mijëra civilë u vranë në Gaza

    Zëdhënësi i Pentagonit pranon se mijëra civilë u vranë në Gaza

    Zëdhënësi i Pentagonit, Patrick S. Ryder tha se numri i civilëve që u vranë në Gaza është me mijëra.

    Ai këtë deklaratë e dha menjëherë pasi Ministria palestineze e Shëndetësisë në Gaza, vuri në dukje se numri i të vrarëve në Gaza ka arritur në 10 mijë e 22, duke përfshirë 4 mijë e 104 fëmijë dhe 2 mijë e 641 gra, transmeton klankosova.tv.

    Grupi i të drejtave të njeriut kishte dënuar më parë deklaratat e presidentit amerikan, Joe Biden, dhe administratës së tij, që hodhën dyshime mbi shifrat e publikuara nga ministria.

    Disa vëzhgues kanë thënë se shifrat janë dëshmuar të sakta në luftërat e kaluara në Gaza, raporton Al Jazeera.

  • Hoti: Në mungesë të projekteve, Kurti po i promovon qeset- nuk janë esenciale në aspektin ekonomik

    Hoti: Në mungesë të projekteve, Kurti po i promovon qeset- nuk janë esenciale në aspektin ekonomik

    Deputeti i LDK’së, Avdullah Hoti, ka thënë se është koha kur do të duhej të promovoheshin projektet e kryera gjatë tri viteve në rrugë, arsim, shëndetësi, energjetikë e në ujitje të tokave bujqësore.

    “Është fundi i vitit 2023, që është viti i tretë i qeverisjes majtiste LVV-Guxo. Është koha kur do të duhej të promovoheshin projektet e kryera gjatë tri viteve në rrugë, në arsim e shëndetësi, në energjetikë e në ujitje të tokave bujqësore.”

    Ai ka thënë se kur këto projekte mungojnë, kryeministri Kurti promovon shpërndarjen e qeseve nëpër dyqane.

    “E kur mungojnë këto projekte, atëherë vetë Kryeministri promovon shpërndarjen e qeseve plastike nëpër dyqane, sado e rëndësishme që është kjo për ambientin, por nuk është esencial në aspektin ekonomik dhe jetën e rënduar të qytetarëve.”

    Ish kryeministri Hoti ka shkruar se në tri vjet qeverisje nuk ka pasur orientim zhvillimor.

    “Tri vjet qeverisje pa asnjë orientim zhvillimor, me normë të zhvillimit ekonomik që gati ka rënë në zero. Tri vjet të qeverisjes vetëm duke shpërndarë subvencione e transfere, të cilat kanë shkuar nga 32% në mbi 42% të buxhetit total. Tri vjet qeverisje me rënie të investimeve kapitale nga rreth 23% të buxhetit total sa ishin në qeveritë paraprake, në vetëm 15% të buxhetit total. Kjo lloj qeverisjeje vetëm zhvillim nuk sjell.”

    Kryeministri Kurti bashkë me ministrin Aliu kanë dalë sot në disa dyqane në Prishtinë për të promovuar zvogëlimin e përdorimit të qeseve plastike.

  • Krasniqi pret që Lajçaku t’ua prezantojë krerëve të opozitës draftin e Asociacionit

    Krasniqi pret që Lajçaku t’ua prezantojë krerëve të opozitës draftin e Asociacionit

    Kryetarja e Komisionit për Integrim Evropiane, deputetja e LDK-së Rrezarta Krasniqi, e ka quajtur të rëndësishme vizitën që i dërguari i posaçëm i Bashkimit Evropian (BE) për dialog Mirosllav Lajçak, do ta zhvillojë në Kosovës.

    Krasniqi i tha Ekonomia Online, se pret që emisari evropian krerëve të partive opozitare t’ua prezantojë draftin e Asociacionit, i cili javë më parë i është dhuruar kryeministrit Albin Kurtit nga pesë emisarët.

    Ajo tha se kjo vizitë është e mirëpritur pasi sipas saj, nga ky takimi me emisarin evropian do të mund të dihet se për çfarë draft Asociacioni bëhet fjalë.

    “Dëgjuam përmes mediave që Lajçak do të vije në Kosovë. Unë pres që ai të vije dhe të prezantoj draftin e Asociacionit. Por e rrugës do të ishte që kryeministri Kurti t’i njoftojë partitë opozitare jo Lajçaku. Mirë që edhe ai po vijë, po shpresoj që të del diçka nga ai takim dhe të dimë se për çfarë statuti të Asociacionit po bëhet fjalë”.

    “Është shumë i rëndësishëm çdo takim që vjen nga faktorët ndërkombëtare. Për ne më e rëndësishme do të ishte që Kurti vetë ta prezanton draftin e asaj marrëveshje. Ju e patë atë ditë në Kuvend që nuk e prezantoj. Dhe po presim që tash Lajçak që të prezantoj për partitë opozitare”.

    Lajçaku do të takohet me kryeministrin e Kosovës, Albin Kurti, zëvendëskryeministrin e parë, Besnik Bislimi, si dhe me përfaqësuesit e opozitës në Kosovë, raporton EO.

    Emisari i BE-së vjen në Prishtinë rreth dhjetë ditë pas takimeve të fundit në Bruksel më 26 tetor, ku Kurti dhe presidenti i Serbisë, Aleksandar Vuçiq, u takuan ndaras me liderët e Gjermanisë, Francës dhe Italisë, si dhe zyrtarë të tjerë të BE-së.

  • Zyrtarët amerikanë ende punojnë për të rihapur vendkalimin Rafah për civilët

    Zyrtarët amerikanë ende punojnë për të rihapur vendkalimin Rafah për civilët

    Zyrtarët amerikanë po punojnë ende të hënën në mëngjes për të rihapur portën e Rafahut për civilët që të largohen nga Gaza në Egjipt, tha një burim i njohur me çështjen për CNN.

    Ata janë përpjekur të çojnë civilë të plagosur te porta, tha burimi, pas mbylljes së rrugës nga Hamasi këtë fundjavë pas një sulmi izraelit në një ambulancë. Zyrtarët izraelitë pretenduan se ishte identifikuar si “përdorur nga një celulë terroriste e Hamasit”, transmeton Klankosova.tv.

    Qeveria izraelite nuk e pengon rihapjen e portës për të lejuar largimin e civilëve, përfshirë të plagosurit, tha burimi.

    Kalimi në Egjipt – e vetmja rrugëdalje nga Gaza që kur Izraeli mbylli dy vendkalimet e tij – u mbyll të shtunën dhe nuk u hap të dielën.

    Një përparim u arrit javën e kaluar për të lejuar mbajtësit e pasaportave të huaja dhe një grup civilësh të plagosur rëndë të niseshin përmes Rafah, me grupin e parë që u nis të mërkurën e kaluar.

  • Kurti-qytetarëve: Merrni torba me vete për blerje të gjësendeve, mos përdorni qese të plastikës

    Kurti-qytetarëve: Merrni torba me vete për blerje të gjësendeve, mos përdorni qese të plastikës

    Kurti ka bërë thirrje për qytetarët që të marrin torba me vete, në mënyrë që të mos i përdorin këto qese që kontribuojnë në ndotje të ambientit.

    Pas kësaj vizite, Kurti ka njoftuar se qeset pa doreza janë falas, ndërsa të tjerat 5 centë, ku 2 centë do të shkojnë në buxhet të shtetit.

    “Ne i falënderojmë shumë për bashkëpunimin pronarët dhe menaxherët e marketeve apo vetëshërbimeve siç iu kemi thënë kaherë që ta zbatojmë me përpikëri udhëzimin administrativ dhe i ftojmë qytetarët që kur të shkojnë të blejnë në vetëshërbim në markete t’i marrin torbat me vete. Vetëm këto qeset pa dorëza pa vegëza do të jenë falas dhe këto përdoren për fruta dhe perime, ndërkaq ato qeset prej 25 deri 50 mikronë do të kushtojnë 5 centë, 2 centë shkojnë në buxhet të shtetit. Por është mirë që aso të kemi sa më pak dhe torbat merrini me vete kur blini gjësende nëpër vetëshërbime apo markete”, ka thënë Kurti, raportoi EO.

  • Kosova “u vërshua” me 23 medalje për 10 vite nga sporti i xhudos

    Kosova “u vërshua” me 23 medalje për 10 vite nga sporti i xhudos

    Që Kosova mund të konsiderohet si shtet i xhudos, kjo më nuk ka asnjë dilemë. Ky sport, nga viti në vit, po i sjellë Kosovës medaljet elitare nga kampionate ballkanike, evropiane e botërore, por edhe medalje olimpike.

    Më në krye një trajner si Driton Kuka, dhe tashmë edhe me trajneren Majlinda Kelmendi, trendi i fitimit të trofeve vetëm sa po shkon duke u rritur, raporton kp.

    Emra si Distria Krasniqi, Laura Fazlu, Loriana Kuka, Nora Gjakova, Akil Gjakova e të tjerë, po tregohen ta pandalshme përballë rivalëve të tyre më eminent botëror në sportin e xhudos.

    Si rrjedhoj e punës së tyre të palodhshme, nga viti 2013 deri në vitin 2023, Kosovës i kanë ardhur shtatë medalje të Arta, katër të argjendta dhe 12 të bronzta brenda 10 viteve.

  • Kurti dhe Aliu në terren – promovojnë zvogëlimin e përdorimit të qeseve plastike

    Kurti dhe Aliu në terren – promovojnë zvogëlimin e përdorimit të qeseve plastike

    Kryeministri Albin Kurti dhe ministri i Mjedisit, Planifikimit Hapësinor dhe Infrastrukturës Liburn Aliu kanë vizituar disa dyqane në qendër të Prishtinës, raporton Ekonomia Online.

    Kjo vizitë, është zhvilluar për të promovuar zvogëlimin e qeseve të plastikës.

    Kurti i falënderojë pronarët e marketeve për bashkëpunimin dhe i ftojë qytetarët të marrin torbat me vete. Mandej ai tha se qeset pa doreza janë falas ndërsa të tjerat 5 centë, ku 2 centë do të shkojnë në buxhetin e shtetit.

    “Ne i falënderojmë shumë për bashkëpunimin pronarët e marketeve dhe menaxherët e marketeve apo vetëshërbimeve siç iu kemi thënë kaherë që ta zbatojmë me përpikëri udhëzimin administrativ dhe i ftojmë qytetarët që kur të shkojnë të blejnë në vetëshërbim në markete t’i marrin torbat me vete”.

    “Vetëm këto qeset pa dorëza pa vegëza do të jenë falas dhe këto përdoren për fruta dhe perime ndërkaq ato qeset prej 25 deri 50 gram do të kushtojnë 5 centë, 2 centë shkojnë në buxhet të shtetit. Por është mirë që aso të kemi sa më pak të drejtë aspak dhe torbat merreni me vete kur blini gjësende nëpër vetëshërbime apo markete”.