Author: ATVLive

Kryetari i AAK-së Ramush Haradinaj tha se partia që ai drejton është e hapur nëse edhe partitë e tjera opozitare dëshirojnë të gjejnë rrugë për konstituimin e Kuvendit që ta votojnë kryeparlamentarin nëse ndryshohet emri i propozuar nga LVV-ja.

Albulena Haxhiu ka dështuar dy herë të merr votat e mjaftueshme për kryetare dhe Glauk Konjufca sot nuk e hodhi si propozim në vazhdimin e katërt të seancës për konstituimin e legjislativit të nëntë, duke thënë se situata e krijuar kërkon marrëveshje politike.

“Edhe në të kaluarën ka pasur negocim për kryeparlamentar. Nëse duhet vota e opozitës që ka ndodhur për të bashëkvotuar gjithë parlamenti për kryetarin, ka logjikë për të diskutuar me opozitën edhe kandidati. Një kandidat më koncensual se Haxhiu. Ne kemi dhënë disa mendime, po të ishte ndonjë kandidat tjetër për ta votuar. Jemi të hapur nëse opozita dhe partitë tjera dëshirojmë të gjejnë një rrugë për të kaluar përtej konstituimit të Kuvendit që të fillojë koha për qeverinë, edhe ne si Aleancë jemi të hapur”, ka thënë Haradinaj, raporton KosovaPress.

Vazhdimi i pestë i seancës për konstituimin e Kuvendit është thirrur për datën 23 prill, në ora 10:00. /kp

Deputetja e Lëvizjes Vetëvendosje Arbërie Nagavci pas dështimit të seancës së katërt për konstituimin e Kuvendit, tha se ishte e qartë se opozita nuk do të merrte pjesë në votimin e kandidates së kësaj partie Albulena Haxhiu.

Nagavci u bëri thirrje partive opozitare që ta votojnë kandidaten e LVV-së dhe të vazhdohet me konstituimin e legjislativit të nëntë.

“Ishte e qartë se opozita nuk do të merr pjesë në votimin e Haxhiut, ndonëse është kandidatja grua që ka marrë më së shumti vota dhe është propozim i Lëvizjes Vetëvendosje. Ne bëjmë ftesë që partitë opozitare të votojnë kryetaren e Kuvendit që pastaj të votohen nënkryetarët dhe të konstituohet Kuvendi dhe të vazhdohet tutje”, tha Nagavci.

Glauk Konjufca, në emër të LVV-së si parti fituese e zgjedhjeve të 9 shkurtit, nuk propozoi sot emrin për kryetarin e ri të legjislativit, duke pasur parasysh qëndrimin kundër të opozitës.

Albulena Haxhiu nuk ka marrë votat e mjaftueshme në dy tentime për zgjedhjen e kreut të ri të legjislativit. Opozita ka këmbëngulur se do ta votojnë kundër, ndërsa AAK-ja ka propozuar si emra të mundshëm për këtë post Saranda Bogujevci dhe Shqipe Selimin, që të dyja këto pjesë e Lëvizjes Vetëvendosje.

Vazhdimi i pestë i seancës për konstituimin e Kuvendit do të mbahet të mërkurën, më 23 prill, duke filluar nga ora 10:00. /KP

Kryetari i Lidhjes Demokratike të Kosovës, Lumir Abdixhiku pas dështimit të seancës konstituive tha se Lëvizja Vetëvendosje “duhet ta kuptojë se për ta zgjedhur kryetarin e Kuvendit duhet të kenë kompromis dhe shumicë parlamentare”.

Abdixhiku tha se LDK se në asnjë rrethanë nuk do të ketë kompromis me LVV-në.

“Lëvizja Vetëvendosje duhet të kuptojë që për të zgjedhur kryetarin e Kuvendit duhet kompromis dhe shumicë sepse kështu ka vendosur qytetari i Kosovës… Natyrisht se jo, në asnjë rrethanë LDK-ja nuk gjen kompromis me LVV-në”, tha Abdixhiku.

Lëvizja Vetëvendosje ka kërkuar arritjen e një marrëveshje politike për zgjedhjen e kryetarit të Kuvendit.

Deputeti i zgjedhur, njëherësh nënkryetari i LVV-së, Glauk Konjufca tha se ata propozojnë sërish për kryetare të Kuvendit, deputeten Albulena Haxhiu.

Mirëpo meqë e njëjta nuk ka marrë votat në seancën e kaluar, ai tha se zgjedhja e saj pa marrëveshje politike nuk duhet të hidhet sërish në votim.

Pas kësaj, kryesuesi i seancës, Avni Dehari, ndërpreu seancën e sotme dhe u vendos që seanca të vazhdojë të mërkurën në orën 10:00./KP

Kryetari i Nismës Socialdemokrate, Fatmir Limaj, pas ndërprerjes së seancës konstituive të Kuvendit të Kosovës, e cilësoi vendimin për shtyrjen si të nevojshëm dhe korrekt në situatën aktuale politike, raporton ATV.

“Nganjëherë në situatën që është, ju duhet të gjeni rrugë për të ecur tutje,” u shpreh Limaj para gazetarëve, duke përmendur nevojën për bashkëpunim mes partive.

Ai shtoi se vendimi për të shtyrë seancën ishte një hap i drejtë për të afruar qëndrimet dhe për të shmangur tensionet e mëtejshme politike.

“Shpresoj që nga sot do të bëhen përpjekjet për me u afru dhe vendit t’i japim institucionet,” përfundoi Limaj. /atvlive.tv

Deputetja e zgjedhur e LDK-së, Hykmete Bajrami, ka kritikuar Lëvizjen Vetëvendosje për mënyrën se si po e menaxhon procesin e zgjedhjes së kryetarit të Kuvendit, duke thënë se është shkelur sërish Rregullorja e punës së këtij institucioni, raporton ATV.

Në një prononcim për gazetarët pas ndërprerjes së seancës konstituive, ajo tha se procedura është devijuar që në fillim.

“Lëvizja Vetëvendosje ishte e autorizuar vetëm të propozojë emrin e kandidatit, ndërsa duhej të procedohej menjëherë me votim,” tha ajo.

Sipas Bajramit, krahasimi që po bën Vetëvendosje mes procesit të zgjedhjes së kryetarit dhe nënkryetarëve të Kuvendit është i pasaktë.

“Kryetari përfaqëson të gjithë Kuvendin dhe jo vetëm një grup politik, ndërsa nënkryetarët janë përfaqësues të grupeve parlamentare dhe votohen në pako,” sqaroi ajo.

Duke komentuar kërkesën për kohë shtesë, Bajrami u shpreh skeptike se ka ndonjë përpjekje të sinqertë për marrëveshje.

“Nëse duan marrëveshje, duhet të ulen me partitë dhe të diskutojnë për një emër të pranueshëm. Por nëse nuk e ndryshojnë emrin e kandidatit, çfarë marrëveshjeje është kjo?” deklaroi ajo.

Bajrami shtoi duke konfirmuar qëndrimin e LDK-së: “Kemi votuar kundër dhe do të votojmë sërish kundër, si për zonjën Haxhiu, ashtu edhe për çdo kandidat tjetër të propozuar nga LVV.” /atvlive.tv

Deputeti i zgjedhur i Lëvizjes Vetëvendosje, Hekuran Murati, tha se partitë opozitare po vazhdojnë me taktika bllokuese, duke penguar konstituimin e Kuvendit të Kosovës, raporton ATV.

Sipas tij, Kushtetuta është e qartë – zgjedhja e Kryesisë së Kuvendit është përgjegjësi e të gjitha partive parlamentare, jo vetëm e partisë fituese.

“Gjykata Kushtetuese ka interpretuar se të gjithë deputetët kanë për obligim të marrin pjesë në votim për Kryetarin dhe Nënkryetarët e Kuvendit”, u shpreh Murati në një deklaratë për gazetarë në hollin e Kuvendit, pas ndërprerjes së seancës konstituive.

Ai tha se nuk është e drejtë që partitë opozitare të refuzojnë pjesëmarrjen, duke i lënë institucionet të bllokuara.

“Po të kërkohej që partia fituese të siguronte shumicën edhe për Kryetarin e Kuvendit, atëherë as opozita nuk do t’i kishte 61 vota për të zgjedhur nënkryetarët e saj,” tha ai.

Murati shtoi se, sikurse ndodhi me raportin e verifikimit të mandateve, opozita fillimisht e votoi kundër, por pastaj ndryshoi qëndrim.

“Na humbën katër ditë dhe dy seanca, e tani po ndodh e njëjta edhe për Kryetarin e Kuvendit”, u shpreh ai. /atvlive.tv