ATV

Author: ATVLive

  • Kurti kritikon heshtjen e ndërkombëtarëve ndaj sulmit të Natasa Tomaniqit

    Kurti kritikon heshtjen e ndërkombëtarëve ndaj sulmit të Natasa Tomaniqit

    Përgatiti: Benita Zeneli

    Në fjalimin e tij hyrës, në mbledhjen e qeverisë, kryeministri Albin Kurti pati kritika ndaj bashkësisë ndërkombëtare.

    Fillimisht kritikoi heshtjen ndaj djegies së një prone private të nënkryetares së komunës së Zveçanit, Natasha Tomaniq, më 8 mars.

    “Sa vjen e bëhet edhe më shurdhuese. Një heshtje e tillë është sa dekurajuese aq edhe inkurajuese. Dekurajuese për njërën palë, viktimën, inkurajuese për palën tjetër agresore”, tha Kurti.

    2 ditë pas, më 10 mars u publikua një fotografi në të cilën shihet ambasadori i Serbisë në ShBA, Marko Gjuriq, dhe ish-nënkryetari i Listës Serbe, Millan Radoiçiq, i kërkuar nga drejtësia ndërkombëtare. Kjo nuk ishte e rastësishme, sipas kryeministrit.

    “Sulmi ndaj nënkryetares Tomaniq nuk ndodhi në vakum, njësoj si pamjet e kriminelit, terroristit Millan Radoiçiq duke terrorizuar komunitetin serb dhe pastaj takim me ambasadorin serb në SHBA që nuk ndodhën në vakum”, tha Kurti.

    Kritika po vazhdon të ketë edhe se Serbia nuk është përballur me asnjë pasojë për përfshirjen e saj direkte në sulmin terrorist në Banjskë.

    “Se përfshirja e saj direkt është bërë publikisht dhe botërisht”, tha Kurti.

    Pas fjalimit të kryeministrit në mbledhjen e 193-të të ekzekutivit u vendos edhe për blerjen e objekteve për nevojat e misioneve diplomatike në Romë, Paris, Otavë e Ankara.

    Gjithashtu, u mor vendim për të ndarë 520 mijë euro për renovimin e kulmit dhe hapësirave të brendshme të objektit të Institutit të Mjekësisë Ligjore pas dy zjarreve në këtë objekt.

  • “Së bashku për autizëm” – organizohet turneu i madh nga Ujë Rugove në CS2

    “Së bashku për autizëm” – organizohet turneu i madh nga Ujë Rugove në CS2

    Korporata Rugove ka vazhduar me aktivitete e saj, ku kësaj radhe kanë organizuar një turne të madh në CS 2.

    Ujë Rugove së bashku me Federatën Esports Kosova kanë organizuar një turne të madh që do të zhvillohet më 23 dhe 24 mars të këtij viti.

    Ky turne është organizuar në mbështetje të fëmijëve me autizëm përmes ‘Turneut Bamirës Rugove CS2 2024’. Në këtë event do të sigrohen fonde për Asociacioni Nacional i Autizimit në Kosovë, derisa realizohet nga XPortal Esports.

    Vlen të theksohet se Ujë Rugove tashmë ka ndarë 1000 euro për Asociacionin Nacional të Autizmit në Kosovë. Gjithashtu, gjatë turnirit çdo donacion tjetër që shtohet do të shkojë direkt për ANAK për të mbështetur fëmijët me Autizëm.

    Vendi i parë në këtë turne do të marrë shpërblim prej 1000 eurove, derisa për vendin e dytë ka dhurata nga Korporata Rugove.

    Xhirollogaritë për donacione:

    Asociacioni Nacional i Autizmit ne Kosove, Adresa: Rrustem Statovci, nr.41 Prishtinë,

    Banka Ekonomike 1401000001748216,

    ProCredit Bank 1180003412000197,

    BKT 1970879220031157.

  • Rritja spetakolare e çmimit të Bitcoin/ Niveli më i lartë në historinë 15 vjeçare të tij

    Rritja spetakolare e çmimit të Bitcoin/ Niveli më i lartë në historinë 15 vjeçare të tij

    Nga Adrian CIVICI

    Bitcoin sapo mbushi 15 vjeç. Krijuesi i saj misterioz, Satoshi Nakamoto, e projektoi bitcoin në fund të vitit 2008 si “një sistem monetar që nuk menaxhohet nga një bankë qendrore ose një autoritet sovran, por ku shkëmbimet vërtetohen nga subjekte të barabarta, të regjistruara në një arkiv të përhapur, por jo të ruajtur nga çdo institucion publik, i quajtur “blockchain”. Bitcoin, që shpesh ka ndarë në pro dhe kundra opinionin publik dhe ka sfiduar skeptikët, sapo ka arritur një kulm historik. Në vitin 2024, Bitcoin është ngritur në radhët e gjigantëve, duke u bërë aktivi i 8-të më i kapitalizuar në botë, me një vlerësim që kalon 1.3 trilion dollarë. Ky është një sinjal i fortë dërguar botës së financave tradicionale. Në qendër të vëmendjes është më shumë se kurrë kjo kriptomonedhë e cila sapo ka arritur cmimin 70,000 dollarë. Perspektiva : optimistët dhe ata që besojnë në këtë sistem vlerësojnë se shpejt cmimi mund të arrijë e tejkalojë 100000 usd, ndërsa skeptikët vlerësojnë se është një spekullim dhe një flluckë që do shpërthejë shpejt!

    Si ndikon Oferta dhe kërkesa për Bitcoin?

    Në përgjithësi, oferta dhe kërkesa varen nga një sërë faktorësh – kushtet ekonomike, duke përfshirë luhatjet në tregjet e aksioneve dhe obligacioneve, si dhe ngjarje të caktuara globale, si pandemia e Coronavirus dhe lufta e Rusisë kundër Ukrainës – që mund të ndikojnë të gjitha në ofertën dhe kërkesën e mallrave, përveç cikleve të rregullta ekonomike, të cilat përfshijnë fazat e inflacionit, stagnimit dhe recesionit, të cilat kërkojnë që qeveritë dhe institucione si Bankat Qendrore të ndërmarrin veprime për të ruajtur vlerën e një monedhe. Por ndryshe nga monedhat fiat, të cilat i nënshtrohen politikave monetare të Bankave Qëndrore, ekosistemi Bitcoin është një sistem monetar plotësisht i decentralizuar. Kjo do të thotë se asnjë autoritet qendror nuk e rregullon monedhën dhe se krijimi i Bitcoin është një protokoll i integruar në një proces të quajtur mining.

    Që nga krijimi i bllokut të parë, të gjitha transaksionet në rrjetin Bitcoin kanë qenë pjesë e një procesi të saktë dhe të pandryshueshëm. Minatorët krijojnë blloqe të reja duke zgjidhur një enigmë matematikore dhe Bitcoin të rinj hidhen në qarkullim. Cilësimi i vetëm në protokollin e Bitcoin që përfshin një ndryshim është shuma e shpërblimit të bllokut që minatorët marrin përmes procesit të quajtur përgjysmimi i Bitcoin. Vlera e shpërblimit të bllokut përgjysmohet çdo 210,000 blloqe ose afërsisht çdo katër vjet. Qëllimi i përgjysmimit është të zvogëlojë sasinë e monedhave të reja që hyjnë në rrjet. Përgjysmimet mund të ndikojnë në çmimin e Bitcoin. Ndërsa shpërblimet përgjysmohen, Bitcoin-et e reja bëhen të pakta. Dhe kjo mungesë zakonisht rrit çmimin. Çmimi i Bitcoin varet gjithashtu nga faktorë të tjerë të ofertës dhe kërkesës si dhe nga ngjarjet kryesore në perceptimin masiv dhe interesi i përgjithshëm për kriptovalutat dhe teknologjinë blockchain.

    Pse çmimi i Bitcoin është i paqëndrueshëm?

    Bitcoin ka vëllimin më të lartë të tregtimit nga të gjitha kriptovalutat, por është ende një treg i vogël në krahasim me tregjet e tjera globale. Kjo do të thotë që çmimet rriten ose bien më shpejt me më pak para në rrezik. Nëse Bitcoin do të kishte të njëjtin vëllim tregtar si ari, sjellja e tij do të ishte shumë e ngjashme në aspektin e paqëndrueshmërisë. Meqenëse ka vetëm një numër të kufizuar të Bitcoin-ve në qarkullim dhe krijimi i Bitcoin-ve të rinj ndjek rregulla strikte me një kthim vazhdimisht në rënie (për shkak të uljes së shpërblimeve për minatorët), kërkesa pritet të ndjekë evolucionin deflacionist të Bitcoin për të ruajtur teorikisht stabilitetin e çmimeve.

    “Lajme që dëmtojnë ose lavdërojnë reputacionin e Bitcoin, pasiguria në lidhje me vlerën e brendshme të së ardhmes së kriptomonedhës si një rezervë vlere, rreziqe që lidhen me luhatjet e monedhës për mbajtësit e mëdhenj të Bitcoin në lidhje me likuidimin, si dhe se shkeljet e sigurisë, mund të ndikojnë në çmimin e Bitcoin”. Për Bitcoin, inflacioni i lartë nuk është i mundur pasi Bitcoin nuk mund të krijohen në mënyrë arbitrare dhe prodhimi i tyre fiksohet në një sasi të caktuar. Shkaqet që mund të ndikojnë në rënien e çmimit të Bitcoin janë : presioni politik, dështimet teknologjike dhe çdo mbulim mediatik që mund të përhapë potencialisht “frikë, pasiguri dhe dyshim”, etj. Faktorët teknikë dhe rregullatorë dhe një kontekst makro më i favorshëm për asetet e rrezikshme shpjegojnë bumin aktual të bitcoin.

    10 kapitalizimet më të mëdha botërore të vitit 2024

    Asetet më të kapitalizuara në botë janë ato me vlerën më të madhe të tregut, qofshin ato kompani, fonde, monedha apo mallra. Këto asete përfaqësojnë një pjesë të konsiderueshme të pasurisë globale dhe shpesh konsiderohen si tregues të fuqisë ekonomike dhe financiare të vendeve ose sektorëve që i mbajnë ato. Bitcoin, që disa e identifikojnë si “ari dixhital”, së fundmi iu bashkua Top 10, në pozicionin e 8-të, të aseteve me kapitalizimin më të madh në botë.

    • Ari (XAU): 13,695 miliardë dollarë kapitalizim;
    • Aksionet e Saudi Aramco: kapitalizimi 7.66 trilion dollarë;
    • Aksionet e Microsoft: kapitalizimi 2.99 trilionë dollarë;
    • Aksionet e Apple: kapitalizimi 2,630 miliardë dollarë;
    • Aksionet e Nvidia: kapitalizimi 2.15 trilion dollarë;
    • Aksionet e Amazon: kapitalizimi 1.81 trilion dollarë;
    • Stoku i Alphabet (Google): kapitalizimi 1,650 miliardë dollarë;
    • Bitcoin: kapitalizimi 1,310 miliardë dollarë;
    • Argjendi (XAG): 1,275 miliardë dollarë kapitalizim;
    • Meta action (Facebook): kapitalizimi 1,250 miliardë dollarë;

    Megjithëse kapitalizimi i Bitcoin përfaqëson ende vetëm një të tretën e kapitalizimit të aksioneve të Microsoft ose pak më pak se gjysmën e aksioneve të Apple, pozicionimi i kësaj kriptomonedhe në renditjen e 10 aktiveve që dominojnë botën e financave është një sinjal i fortë për investitorët institucionalë.

    Tre vendet që mbajnë më shumë bitcoin janë: Shtetet e Bashkuara, me rreth 1.9 milionë BTC, ose 10.6% të totalit. Rumania, me rreth 1.2 milionë BTC, ose 6.7% të totalit. Kina, me rreth 1.1 milion BTC, ose 6.1% të sasisë totale.

    Tani që është e vështirë të nënvlerësohet apo të kundërshtohet rëndësia dhe roli i Bitcoin në tregjet financiare e monetare, le të përpiqemi të krahasojmë kapitalizimin e 5 kriptomonedhave më të mëdha (bitcoin, Ether, BNB, Solana, XRP) me kapitalizimin e GAFAM-it të famshëm (Google, Apple, Facebook, Amazon dhe Microsoft). Gjatë dekadës së fundit, sytë janë drejtuar nga GAFAM, madje mund të thuhet se 5 aksionet kryesore të teknologjisë kanë diktuar një pjesë të madhe të tendencave të tregut të aksioneve nga 2010 deri në 2020. Më 6 mars 2024, kapitalizimi kumulativ i GAFAM përfaqësonte 10,330 miliardë dollarë amerikanë. Kjo është më shumë se PBB-ja e Francës, Italisë dhe Gjermanisë së bashku.

    Arsyet e rritjes spetakolare të cmimit të Bitcoin

    Analistët dhe ekspertët e tregjeve të kriptomonedhave, duke analizuar rritjen spetakolare të cmimit të Bitcoin-it në ditët apo javët e fundit identifikojnë disa arsye apo faktorë fondamentalë që kanë ndikuar e vazhdojnë të ndikojnë në cmimin e tij që tashmë është 70000 usd me një perspektivë rritje të mëtejshme më të lartë. Shumë muaj më parë, mjedisi i kriptomonedhave ishte mjaft i lëkundur e me pikëpyetje të mëdha: viti 2022 u shënua nga kriza e FTX (një nga platformat kryesore të shkëmbimit), me një mashtrim kolosal të bërë nga themeluesi i saj. Viti 2023 filloi me një mijë e një të panjohura, shpresa e dyshime, me interesin e investitorëve por me çmimet e kriptove në rënie. Aktualisht, tregu i monedhave dixhitale po përjeton një pranverë të re dhe Bitcoin, po kalon dhe rekordin e saj historik. Në 9 mars 2023 bitcoin vlente vetëm 20000 usd, ndërsa sot vlen gati 70000 usd, niveli më i lartë i të gjitha kohërave. Përse?

    Ekspertët e tregjeve të kriptomonedhave identifikojnë disa arsye të mundshme për këtë rritje:

    Fluksi i kapitalit në ETF-të e bitcoin

    Një rritje në numrin e ETF-ve (exchange-traded fund) të lidhura me kriptomonedhën. Që nga miratimi i SEC (U.S. Securities and Exchange Commission) për ETF-të që gjurmojnë çmimin e bitcoin në Shtetet e Bashkuara, kanë parë një fluks kapitali, me afro 7.9 miliardë dollarë. Ekspertët e SEC evidentojnë faktin se flukset e deritanishme prej 7.7 miliardë dollarësh në ETF-të e bitcoin tejkaluan hyrjen rekorde të mëparshme prej 5.2 miliardë dollarësh, të realizuar në vitin 2021. Megjithatë, akoma shumë investime apo fonde të mëdha hezitojnë të përfshihen në këtë treg.

    Shtimi i ETF-ve të reja

    Faktori tjetër që shpjegon rritjen e çmimit të kriptomonedhës është përhapja e ETF-ve të reja të aseteve dixhitale. Në SHBA, autoritetet rregullatore kanë dhënë miratimin e tyre për nisjen komerciale të ETF-ve të lidhura me Ethereum, kriptomonedha e dytë më e rëndësishme mbas Bitcoin. “Bota e kriptomonedhave po evoluon drejt institucionalizimit më të madh me ardhjen e lojtarëve tradicionalë financiarë në treg”, deklaron Deutsche Bank. Duke vepruar kështu, hyrja në treg “nga dera kryesore” e lojtarëve institucionalë të rrinj që përqafojnë teknologjinë ndihmon për t’i dhënë asaj besueshmëri dhe për ta bërë atë një kategori më të besueshme asetesh. Kësaj i shtohet një vëmendje më e madhe e interesit për ETF-të të ekspozuara ndaj kriptomonedhave dhe teknologjisë “blockchain”, duke i bërë ato instrumente shumë të njohura e të vlerësuara.

    “Efekti i mungesës” ose përgjysmimit (efekti halving)

    Viti 2024 pritet të karakterizohet nga një përgjysmim i numrit të bitcoin-ve që mund të minohen. Ky efekt i mungesës së shkaktuar artificialisht rezulton në një reduktim të numrit të aktiveve, të cilat pritet të absorbohen lehtësisht dhe të kundërbalancohen pikërisht nga ardhja e ETF-ve. Minierat e Bitcoin përfshijnë përdorimin e një sasie të madhe të fuqisë kompjuterike për të zgjidhur problemet që shpërblehen me alokimin e bitcoin. Ky reduktim në numrin e bitcoin-ve të alokuara për minatorët do të thotë se efekti i mungesës pritet të nxisë një rritje të çmimit të kriptomonedhës. “Duke pasur parasysh natyrën shumë të pritur të këtyre ngjarjeve, nëse një rritje çmimi do të ishte e sigurt, investitorët racionalë bëhen aktivë në treg duke blerë paraprakisht, duke e rritur çmimin përpara se të ndodhë përgjysmimi”.

     

    Një mjedis i favorshëm për asetet e rrezikshme

    Interesi i ripërtërirë për bitcoin stimulohet edhe nga një kontekst makro ku investitorët janë më të prirur drejt aseteve më të rrezikshme por me norma fitimi të larta. Rënia e inflacionitpothujase në shumicën e vendeve të botës dhe perspektiva e normave bazë të interesit më të ulëta të bankave qëndrore është një mbështetje e fuqishme për aktivet me rrezik. Bitcoin duke qenë një nga aktivet financiare me fluktuacion të lartë ka më shumë shanse që të vazhdojë të ketë cmim të lartë me perspektivë që të rritet shpejt e në përmasa akoma më të mëdha në të ardhmen e afërt.

    Një kontekst rregullator që po stabilizohet cdo ditë e më tepër

    Në Evropë, rregullorja e aseteve dixhitale – MiCA për “Tregun në Crypto-Assets” – ka hyrë gradualisht në fuqi që nga viti i kaluar me objektivin e vendosjes së rregullave unike në të gjithë BE-në për sa i përket transparencës, informacionit, autorizimit dhe mbikëqyrjes së transaksioneve. E gjithë paketa rregullatore pritet të zbatohet deri në fund të këtij viti. Në Shtetet e Bashkuara, ndërhyrja nga autoritetet ka ndodhur përmes fillimit të procedurave ligjore kundër platformave të tregëtimit të kriptomonedhave si Binance ose Coinbase Global. Sipas Deutsche Bank : “Krijimi i një kuadri që lejon zhvillimin e menaxhimit pasiv në botën e kriptoaseteve përbën një faktor mbështetës për çmimin e bitcoin dhe kriptomonedhave të tjera” dhe të ndihmojë në uljen e paqëndrueshmërisë.

     

  • Zhvillimet e fundit në Kosovë dhe raportet me SHBA-në/ Kjo është biseda e plotë e Gabriel Escobar-it me gazetarët

    Zhvillimet e fundit në Kosovë dhe raportet me SHBA-në/ Kjo është biseda e plotë e Gabriel Escobar-it me gazetarët

    I dërguari i Shteteve të Bashkuara për Ballkanin Perëndimor, Gabriel Escobar, e ka quajtur “katastrofik” dhe “jokompetent” vendimin e autoriteteve të Kosovës për të zbatuar rregulloren e Bankës Qendrore të Kosovës që përcakton euron si valutën për kryerje të pagesave me para të gatshme.

    Kështu është pamundësuar përdorimi i dinarit serb në komunat me shumicë serbe në Kosovë.

    Ai i ka bërë këto deklarata në Bruksel gjatë një bashkëbisedimi të hapur me gazetarë.

    I pyetur për pasojat e mundshme ndaj Kosovës dhe Serbisë për moszbatim të marrëveshjes së Ohrit, Escobar ka thënë se Prishtina zyrtare duhet të nisë punën drejt formimit të Asociacionit të komunave me shumicë serbe, ndërsa Serbia t’i konsiderojë si obligative zotimet e bëra.

    Sipas tij, pasojë e mospërmbushjes së zotimeve të marrëveshjeve do të jetë ngadalësimi në rrugën e integrimeve evropiane.

    Escobar e ka pranuar se ekziston një çarje në komunikimet diplomatike mes SHBA-së dhe Kosovës.

    “Partneriteti në mes të Shteteve të Bashkuara dhe Kosovës, mes popullit amerikan dhe atij të Kosovës, nuk depërton përmes një njeriu në Kosovë, apo një partie. Mirëpo, më duhet të them që aktualisht kemi probleme në komunikim me kryeministrin [e Kosovës, Albin Kurtin]. Dhe jo vetëm SHBA-ja, është problem që e ka Kosova edhe me BE-në, NATO-n, Mbretërinë e Bashkuar dhe më shumë partnerë, përfshirë Shqipërinë dhe Maqedoninë e Veriut”.

    Ai ka thënë se komunikimi me Kosovën ka qenë shumë i mirë në të kaluarën dhe shpreson që e njëjta situatë do të jetë edhe në të ardhmen.

    Bisedën e plotë të Gabriel Escobar-it me gazetarët e gjeni në videon më poshtë:

  • Lokalet e gastronomisë kritikohen për “menytë e ramazanit”

    Lokalet e gastronomisë kritikohen për “menytë e ramazanit”

    Përgatiti: Pranvera Krasniqi

    Çdo ramazan, rrjetet sociale mbushen me reklama mbi ofertat e restoranteve të ndryshme për iftar. Shpesh, “Menytë e Ramazanit” janë të sponsorizuara me qëllim që konsumatorët të njihen me ofertat.

    Nëpër restorantet e Prishtinës, nga 10 e deri në mbi 26 euro janë çmimet më të zakonshme të menysë së Ramazanit për person.

    Por, qytetarët janë të zemëruar.

    Madje, ka qytetarë të cilët për shkak të çmimeve të larta, iftarin do ta hanë vetëm në shtëpi.

    Ndërkaq, për Shoqatën e Gastronomeve, kundrejt konkurrencës çmimet janë të arsyeshme.

    “Ka shumë konkurrencë dhe risi, ka plot restorante që po hapen natyrisht që do të lëvizin me çmime…”, tha Arian Vranica nga Shoqata e Gastronomeve.

    Por, shfrytëzimi i Ramazanit për përfitim të bizneseve, sipas ekonomistit Safet Gërxhaliu, nuk arsyetohet.

    “Është muaj i shenjtë për myslimanët, kur nevoja për produkte ushqimore dhe sofër të begatshme shtohet, bizneset nuk duhet të përfitojnë nga ky muaj me ngritje çmimesh”, tha Gërxhaliu.

    Megjithatë, nëse rritja e çmimeve është vendim kolektiv, kërkohet ndërhyrje nga qeveria.

    “Çfarë nuk po më pëlqen në këtë aspekt është se nëse ka bashkëpunim mes bizneseve, gjë që është vepër penale, duhet të inspektohen dhe të ndalohen”, tha Vranica.

    Për më tepër, siç kupton ATV-ja shumë prej restoranteve në kryeqytet nuk ofrojnë mundësi të tjera ushqimi jashtë menysë së përgatitur enkas për iftar.

  • Qeveria përsëri paguan punëtorët e “Trepçës”

    Qeveria përsëri paguan punëtorët e “Trepçës”

    Përgatiti: Armand Hoti

    Pagat i morën dy ditë me vonesë, përkundër marrëveshjes së nëntorit, e cila bëri që minatorët e Stan Tërgut të tërhiqeshin nga greva dhjetëditëshe.

    “Si pasojë e vonesës, te minatorët ka ndikuar negativisht dhe duke pasur parasysh edhe inflacionin dhe rritjen e çmimeve, kjo vonesë e pagave është e papranueshme dhe nuk duhet të ndodhë tutje”, tha Destan Kërleshi, sindikalist.

    Sipas nënkryetarit të sindikalistëve të minierës më të madhe në Kosovë, udhëheqësia e ndërmarrjes ka shkelur marrëveshjen që ndali grevën.

    Por, edhe pse vonë, “Trepça” përsëri nuk arriti t’i paguajë punëtorët e vet.

    Kryeshefi i ri i ndërmarrjes, Bashkim Kurti, tha se pagat e punëtorëve u siguruan me ndihmën Qeverisë përmes subvencionimit.

    “Pagat janë ekzekutuar me përkrahje nga Qeveria përmes subvencionit, me vlerë prej një milion eurosh”, tha kryeshefi i “Trepçës”, Bashkim Kurti.

    Tash “Trepça”, sipas Kurtit, po përballet edhe me çmime të ulëta të metaleve në berzë.

    Sipas tij, punëtorët e njësisë veriore të “Trepçës” duhet të presin akoma për t’i marrë pagat, meqë edhe rreth 400 mijë euro taksa të qytetarëve, nuk janë transferuar ende në xhirollogari të “Trepçës”.

    Ministria e Ekonomisë kishte ndarë rreth dy milionë e 800 mijë euro në formë subvencioni për gjigantin metalurgjik, edhe gjatë muajit dhjetor.

    Mjetet u shpenzuan për mbulimin e pagave të punëtorëve, energjisë elektrike, ujit si dhe obligimeve të tjera.

    Ndërkaq, është bërë mbi një javë, që kur furnizimi me derivateve e eksploziv i minierës së “Trepçës” në Stan Tërg, është ndërprerë. Edhe flotacioni në Tunelin e Parë, nuk ka reagenca.

  • Shkalla e dytë e Gjykatës Komerciale vendos në favor të Ministrisë së Bujqësisë

    Shkalla e dytë e Gjykatës Komerciale vendos në favor të Ministrisë së Bujqësisë

    Përgatiti: Krenare Mulliqi

    Këto shërbime nuk dihet edhe sa gjatë do t’i japë.

    Kjo pasi ky vend shumë shpejt duhet të lirohet për ndërtimin e objektit të Ministrisë së Bujqësisë.

    Këtë vendim nuk e komentoi pronari i kompanisë, duke thënë se nuk është në dijeni për këtë vendim.

    Ndërkaq, sipas aktvendimit të Gjykatës Komerciale të shkallës së dytë, të siguruar nga ATV-ja, është arsyetuar ankesa e Ministrisë së Bujqësisë dhe refuzuar si e pabazuar kërkesa e paditësit “PATRONI”.

    “Dhomat e shkallës së dytë, nisur nga kjo gjendje e çështjes, vlerëson se përfundimi dhe qëndrimi i gjykatës së shkallës së parë nuk është i drejtë dhe si i tillë nuk mund të pranohet, pasi që aktvendimi i atakuar është i përfshirë me shkelje të dispozitave të procedurës kontestimore te nenit 181, par. 1, e lidhur me nenin 182, par. 2, pika të LPK-së, për shkak se aktvendimi i atakuar përmban të meta pasi që nuk janë dhënë arsye për faktet vendimtare, ndërsa arsyet e dhëna janë të paqarta dhe kontradiktore”, thuhet në Aktvendimin e Gjykatës Komerciale.

    Vendimi u mirëprit edhe nga Ministri Faton Peci, i cili e konsideroi fitore dhe tha se angazhimi i tij në kthimin e pronave të tjera nuk do të ndalet.

    “E përshëndes vendimin e Shkallës së dytë të Gjykatës Komerciale, i cili hedh poshtë vendimin amatoresk e joprofesional të shkallës së parë, karshi kontestit për lirimin e pronës së Ministrisë së Bujqësisë, e cila po shfrytëzohet pa marrëveshje kontraktuale nga operatori ekonomik “Patroni”!”, thuhet në reagimin e ministrit Peci.

    Përpos kësaj, janë edhe disa prona të tjera të uzurpuara që i takojnë Ministrisë së Bujqësisë.

    Në fshatin Stankaj të Rugovës janë evidentuar 41 parcela të uzurpuara, me sipërfaqe prej 90 hektarësh ku janë ndërtuar 26 vila banimi, për të Prokuroria në Pejë ka ngritur aktakuzë.

    Edhe për një pjesë të objektit që ndodhet në rrugën “Dëshmorët e Kombit” në kryeqytet, është pronë e Ministrisë së Bujqësisë, ndërkaq edhe për të kanë nisur hetimet.

  • Faturat e fryra për 40.8 milionë euro, ZRRE-ja po i analizon opsionet për kompensim

    Faturat e fryra për 40.8 milionë euro, ZRRE-ja po i analizon opsionet për kompensim

    Përgatiti: Fatlum Jashari

    Ani pse përmenden disa opsioneve, i ndërlikuar vlerësohet procesi i kompensimit të konsumatorëve nga 34 komuna për dëmin e shkaktuar nga faturat e fryra të energjisë elektrike, si mbulim për katër komunat në veri në periudhën 2012-2017.

    Pasi pranoi aktgjykimin e Gjykatës Kushtetuese, Zyra e Rregullatorit për Energji po i sheh opsionet për zbatim.

    “ZRRE-ja është duke e analizuar këtë aktgjykim dhe do të shqyrtojë të gjitha opsionet e mundshme ligjore, që i ka në dispozicion në lidhje me këtë rast. Pavarësisht që ky aktgjykim është mjaft kompleks, ZRRE-ja do t’i kryejë detyrat e saj, konform mandatit ligjor dhe për të gjitha veprimet që do të ndërmerren, opinioni publik do të njoftohet me kohë”, thuhet në reagimin e ZRRE-së.

    Aktgjykimi i Supremes, tashmë i vërtetuar nga gjykata më e lartë në vend, obligon ZRRE-në të detyrojë KEDS-in të kompensojë konsumatorët në vlerë të totale 40.8 milionë euro.

    Por, meqë periudha e kompensimit përfshin vitin 2012, para privatizimit të distribucionit dhe furnizimit, mund të ketë implikime dhe për KEK-un.
    Në KESCO, KEDS dhe KEK nuk u deklaruan lidhur këtë temë.

    Duke i dhënë rëndësi edhe kontekstit politik të problemit, eksperti i energjisë Naim Bujupi përmendi tri opsione për kompensim.

    “Forma e parë është që kjo të bëhet përmes subvencionimit nga Qeveria e Kosovës. Forma e dytë është që të bëhet përshtatje në tarifa, që nënkupton se duhet të zbriten kostot për investime kapitale. Dhe, mënyra e tretë është t’i kërkohet KESCO-s të mbulojë këtë kosto nga fitimi i saj, që kam dyshimet e mia sepse ajo nuk do ta pranojë”, tha Bujupi.

    Kompensimi përmes buxhetit të shtetit, respektivisht taksave, sipas gazetarit të ekonomisë Zekirja Shabani, nuk duhet të pranohet në asnjë rast.

    “E vetmja formë e pranueshme dhe e obligueshme do të ishte që KESCO dhe KEDS-i, bashkërisht të gjejnë formën që t’i kompensojnë qytetarët direkt në faturat e energjisë elektrike. Për shkak se ne e kemi paguar njëherë energjinë elektrike, KESCO-ja ka fituar prej taksave tona, duke na faturuar më shumë energjinë elektrike, të shpenzuar nga qytetarët serbë në komunat veriore dhe çfarëdo forme tjetër, do të ishte e papranueshme për shkak se KESCO, KEDS, i ka marrë paratë dhe duhet t’i kthejë”, tha Shabani.

    Aktgjykimi i Gjykatës Supreme, i vërtetuar nga Kushtetuesja, ka klauzolën e detyrimit në zbatim brenda 15 ditësh nga hyrja në fuqi.

    Nga Shkurti 2012 e deri në fund të Tetorit 2017, konsumatorët nga 34 komuna, përmes faturave të fryra të energjisë, paguan për qytetarët në Mitrovicë të Veriut, Zveçan, Leposaviq dhe Zubin-Potok. Kjo ndryshoi më 2017, kur barra i kishte kaluar KOSTT-it.

    Në një llogaritje jozyrtare, një konsumator i cili gjatë kësaj periudhe ka paguar mesatarisht 30 euro në muaj, mund të kompensohet në total rreth 70 euro.

  • Ende nuk dihen shkaktarët e zjarrit në Fabrikën e Plastikës

    Ende nuk dihen shkaktarët e zjarrit në Fabrikën e Plastikës

    Përgatiti: Sara Shehu

    Më shumë se 24 orë nuk u kanë mjaftuar zjarrfikësve të komunës së Drenasit dhe Skenderajt për ta shuar tërësisht zjarrin në fabrikën e plastikës në Parkun e Biznesit të Drenasit.

    Derisa zjarri u lokalizua mbrëmjen e së hënës, puna për ta shuar tërësisht atë ka vazhduar gjatë gjithë ditës së martë.

    Komandanti i zjarrfikësve në komunën e Drenasit, Afrim Gjeli, tha se prodhimet e plastikës të kësaj fabrike ua kanë vështirësuar edhe më shumë punën.

    “Është masa plastike që na ka vështërsu lokalizimin e zjarrit. Jemi duke përdorur ujin si materie për shuarjen komplet të këtij zjarri, kemi përdorur edhe shkumë. Rreziku është i madh nëse hymë në objekt, për shkak se është dëmtuar në masë të madhe, ka llasra që janë të varura dhe mund të bijnë poshtë, mi dëmtu zjarrfiksat. Nuk ka rrezik në pjesën e jashtme, vetëm brenda. Operacioni s’e di sa mund të zgjasë, mund të zgjas ndoshta 3 orë, ndoshta edhe 5 orë, por ndoshta edhe 7 orë”, tha komandanti i Zjarrfikësve në Komunën e Drenasit, Afrim Gjeli.

    Pronari i fabrikës, as të martën nuk ka pranuar të flasë për media, megjithatë atij mbështetje i ka shprehur agjencia KIESA që funksionon në kuadër të Ministrisë së Industrisë, Ndërmarrësisë dhe Tregtisë.

    “Ne si e kemi marrë lajmin kanë ardhë kolegët në vendin e punës, është një nga fabrikat e para në Drenas që nga viti 2010 ka shumë punë në këtë fabrikë, gjithsesi është një rast mjaft i vështirë për neve, si institucione, ne jemi në mbështetje të bizneseve”, tha kryeshefi i Agjencisë Kiesa në kuadër të MINT-it, Zef Dedaj.

    Kryetari i Drenasit, Ramiz Lladrovci, tha se rrethanat e zjarrit mbetën ende të paqarta.

    “Ende nuk dihen shkaktarët e zjarrit, sepse organet e policisë po e kryejnë detyrën e vet. Zjarri shumë i madh, zjarr ka edhe sot. Vlerësimi do të bëhet nga ekspertët e çështjes, falënderoj zjarrfikësit për punën e tyre….”, tha Lladrovci.

    Ta kontaktuar nga ATV-ja Policia dhe Prokuroria Themelore në Prishtinë thanë se janë ende në fazën e hetimeve fillestare, për të kuptuar nëse ka elemente të veprës penale.

    Nga kompania “Plastika” që merret me përpunimin e plastikës, është thënë se dëmi nga zjarri në tri objektet e fabrikës vlerësohet të jetë rreth 10 milionë euro.

  • Aeroporti i Prishtinës me linja të reja direkte

    Aeroporti i Prishtinës me linja të reja direkte

    Përgatiti: Benita Zeneli

    Aeroportit të Prishtinës “Adem Jashari” do t’i shtohen disa linja të reja fluturimi.

    Qytetarët do të mund të udhëtojnë direkt në dy destinacione që nga fundi i këtij muaji, në Luksemburg e Frankfurt.

    Përveç tyre, linja të tjera të reja do të nisin edhe në muajin qershor.

    “Muajin qershor kemi të konfirmuara për Heraklion Bulgas për Gothenburg, dhe të tjera që janë paraparë gjatë këtij sezoni. Ajo që vlen të përmendet është se gjatë këtij viti do ta kemi edhe kompaninë “Skandinavia airlines”, që është një kompani me renome të gjerë botërore”, zëdhënësja e Aeroportit Ndërkombëtar të Prishtinës “Adem Jashari”, Valentina Gara.

    Shtimi i linjave po mirëpritet nga udhëtarët.

    “Po, shumë mirë. Është më pak e lodhshme edhe më ekonomike. Nuk kemi nevojë me u ndalë në vende tjera. Unë erdha tash me dy ndalesa, aspak mirë”, thotë një qytetar.

    Ndërkohë, këtë vit, në krahasim me vitin e kaluar, aeroportit të Prishtinës i janë shtuar edhe numri i udhëtarëve.

    Ndërkaq, që nga fillimi i këtij viti janë regjistruar mbi gjysmë milion udhëtarë, vajtje-ardhje.