Author: ATVLive

Vdekja e kreut të Kishës Ortodokse Bullgare është një humbje e madhe për Kishën dhe popullin bullgar, tha presidenti Rumen Radev në një postim në Facebook menjëherë pasi Patrikana njoftoi vdekjen e Patriarkut Neofit.

Ai ishte 78-vjeç. Ai vdiq në spital nga dështimi i shumë organeve pas një sëmundjeje të gjatë.

“Ulë kokën me dhimbje të thellë në kujtimin e Shenjtërisë së Tij Neofit, Patriarkut të Bullgarisë dhe Mitropolitit të Sofjes”, ka shkruar presidenti.

“Me shërbimin e tij shpirtëror të përkushtuar ndaj Zotit dhe Ortodoksisë, Patriarku Neofit u bë një shtyllë e kombit dhe shtetit tonë bullgar. Zoti e faltë dhe i preftë shpirtin! I përjetshëm dhe i bekuar qoftë kujtimi i tij”, thuhet në postim.

Kryeministri në largim Nikolai Denkov shkroi në një postim në Facebook se Patriarku Neofit do të mbahet mend si një udhëheqës shpirtëror i mençur dhe i sjellshëm.

“Me dhimbje të thellë dërgojmë Shenjtërinë e Tij Neofit – Patriarkun e Bullgarisë dhe Mitropolitin e Sofjes – në rrugën e tij qiellore. Ai do të mbahet mend si një udhëheqës shpirtëror i mençur dhe i sjellshëm që u dha besim dhe forcë laikëve edhe kur ai vetë ishte i dobët fizikisht”.

Zëvendëskryeministrja në largim Mariya Gabriel, e cila është kryeministrja e ardhshme e mundshme bullgare, shkroi në rrjetet sociale: “Ne do të kujtojmë udhëzimet e tij për një jetë në besim dhe devotshmëri dhe për të arritur unitet.”

Kryemyftiu në Bullgari shprehu ngushëllimet e tyre për ndarjen nga jeta të Patriarkut Neofit dhe tha se ai do të mbahet mend për ndjeshmërinë dhe respektin e tij ndaj komuniteteve fetare në këtë vend.

“Ai do të mbetet në kujtesën tonë si një njeri jashtëzakonisht i mirë dhe një udhëheqës shpirtëror që kërkoi dialog. Besimi mysliman do ta kujtojë për ndjeshmërinë dhe respektin e tij për komunitetet fetare në vend, duke kërkuar konsensus për hir të marrëveshjes, moralit, edukimit. dhe vlerat tradicionale që i kemi mbrojtur së bashku”, thuhet në një postim në Facebook nga Kryemyftiu./BTA

Diabeti dhe hipertensioni janë ndër shkaktarët kryesor për sëmundjen e veshkave. Te mbi 30 për qind të pacientëve në Kosovë që janë në dializë ose kanë pamjaftueshmëri kronike terminale, faktor kryesor konsiderohen të jenë diabeti tip 1 dhe tip 2, hipertensioni, sëmundjet policistike dhe trashëguese duke përfshirë edhe infeksionet urinare.

Kështu thotë nefrologu në Qendrën klinike Universitare të Kosovës (QKUK), Ibrahim Rrudhani sot në Ditën Botërore të Veshkave, derisa kërkon nga pacientët që të jenë më të përkushtuar në trajtimin e shkaktarëve që po sjellin probleme me veshka.

Për KosovaPress, Rrudhani potencon se kanë shënuar Ditës Botërore të Veshkës me moton “Veshkat e shëndetshme për të gjithë”, për mirëmbajtjen dhe ruajtjen e shëndetit të veshkave.

“Kemi realizuar promovimin e shëndetit këtë rast për mirëmbajtjen dhe ruajtjen e shëndetit të veshkave. Postulati i këtij viti është ‘Veshkat e shëndetshme për të gjithë’, duke pasur parasysh që organizmi është një tërësi, nuk mund t’i ndash veshkën, zemrën, çdo dëmtim i veshkës rrit edhe sëmundjet e zemrës, mëlçisë, trurit…Në botë, sipas OBSH-së 10 për qind e të gjithë njerëzimit, nëse në botë llogariten mbi 7 miliardë njerëz, janë 10 për qind e kësaj popullate është e atakuar nga një sëmundje e veshkave. Pamjaftueshmëritë e veshkës ndahen nga një deri në pesë shkallë. 10 për qind e këtij komuniteti është e atakuar nga një shkallë e pamjaftueshmërisë së veshkave…Shkaktari më i shpeshtë, me mortalitet dhe sëmundje më të madhe është diabeti tip 1 dhe tip 2, ose sëmundja e sheqerit, për shkak të mos trajtimit adekuat ose mostrajtimit të duhur dhe sheqerit. Pastaj vijnë komplikimet primare dhe sekondare që shoqërohen me pamjaftueshmëri të veshkave”, thotë Rrudhani.

Nefrologu Ibrahim Rrudhani thotë se në Klinikën e Nefrologjisë të QKUK-së, dominojnë rastet kur sëmundja e veshakëve shkaktohet nga diabeti.

Ai thekson se një diabet i mirë menaxhuar dhe mirë kontrolluar parandalon edhe komplikacionet sekondare siç janë veshkat, që sipas tij ndikojnë në shëndet dhe kufizojnë aftësitë për punë.

“Edhe në Kosovë po edhe në klinikën tonë dominojnë pamjaftueshmëria e shkaktuar nga diabeti. Nëse 36.5 për qind e të gjithë pacientëve që janë në dializë ose kanë pamjaftueshmëri kronike terminale janë shkaktarë diabeti tip 1 dhe tip 2, ose më shumë tip 2…Pastaj, është hipertensioni është shkaktari i dytë dhe sëmundjet e tjera me radhë që janë sëmundjet policistike dhe sëmundjet trashëguese, pa i lënë pas edhe infeksionet urinare…Një diabet i mirë menaxhuar dhe mirë kontrolluar parandalon edhe komplikimet sekondare siç janë veshkat që të lidhin për aparati ose kufizojnë aftësitë për punë, që i kushton shtetit, familjes, shoqërisë dhe vetë individit…Realisht 10 për qind e të gjithë atyre pacientëve që në Kosovë llogariten 880 pacientë që janë më pamjaftueshmëri”, potencon Rrudhani.

Përveç këtyre, Rrudhani foli edhe barnat esenciale dhe kushtet në këtë klinikë, për çka potencon se janë të mirë furnizuar me ilaçe.

Ndërkaq, sa i përket kushteve thotë se janë optimale, derisa shton se Klinika e Nefrologjisë si qendër e vetme terciare në Kosovë, trajton pacientët me sëmundje me protokoll të veçantë në diagnostifikim, por edhe të atyre terminale.

Rrudhani konsideron se rritja e stafit do të ishte e nevojshme, për shkak se sipas tij përveç mjekimit, duhet bërë edhe promovimi i shëndetit.

“Për shumicën e sëmundjeve, ose mos të them për 100 për qind për material të dializës dhe material të fazës terminale ka, është 100 për qind i garantuar nga shteti. Pastaj për pacientët e posttransplatuar, por edhe për sëmundje tjera ose shkaktarë të tjerë…Barnat për korrigjimin e tensioni janë në listën esenciale dhe realisht ka gjithherë në klinikë. Barna për trajtimin e diabetit ka në klinikë gjithherë, nevojitet një përkushtim pak më i madh i pacientit ta marrë me kohë dhe dozë të caktuar…Kushtet janë mos të them optimale, nuk janë në Kosovë askund, bile tek ne për shkak se ne jemi qendër e vetme terciare në Kosovë ku të gjithë pacientët në fazën qoftë për trajtimin e sëmundjeve me protokoll të veçantë në diagnostikim, por edhe në trajtimin të sëmundjeve terminale. 99 për qind e pacientëve dializën për herë të parë e fillojë në Kosovë…Sa i përket kuadrit mendoj që ka kuadër të mjaftueshëm, jemi 12 nefrologë në QKUK që punojmë…Besoj që ka nevojë më shumë sigurisht sepse nuk është vetëm mjekimi por edhe promovimi i shëndetit “, përfundon Rrudhani.

Ndryshe, 9 Marsi njihet si Dita Botërore e Veshkave, e cila është një ditë e veçantë që festohet për të tërhequr vëmendjen ndaj shëndetit të veshkave dhe për të rritur ndërgjegjësimin në shoqëri.

Veshkat kanë për detyrë pastrimin e substancave dhe ruajtjen e ekuilibrit të lëngjeve. Derisa miliona njerëz në mbarë botën luftojnë me sëmundjet e veshkave, por ato mund të zbulohen herët ose të parandalohen.

Sot, në shënimin e kësaj dite, Klinika e Nekrologjisë, Shoqata e Nefrologëve të Kosovës në bashkëpunim me Komunën e Prishtinës në sheshin “Xhorxh Bush” organizuan aktivitetin me temën: ”Veshkë të Shëndetshme për të gjithë”.

Një 27-vjeçar shqiptar është vrarë me thikë brenda makinës së tij në Londër.

Ai është identifikuar nga autoritetet policore si Bajram Luli me origjinë nga Peqini.

I riu shqiptar u gjet me plagë të rënda me thikë në një makinë të bardhë tip KIA.

Autoritetet policore e dërguan në spital, por nuk mundi t’iu mbijetonte plagëve të marra dhe ndërroi jetë.

Policia britanike ka publikuar foton e autorit të dyshuar dhe po punon për kapjen e tij. /EuronewsAl

Ndërmarrja Publike “Termokos” njofton publikun se për muajin mars do të fillojë kalkulimin dhe shpërndarjen e faturave me matje sipas konsumit për 1.000 konsumatorë.

Këta konsumatorë janë përzgjedhur rastësisht, sipas një mostre reprezentative në ato lagje, ku është i shtrirë rrjeti i ngrohjes, përkatësisht tek një pjesë e konsumatorëve, ku tanimë janë instaluar pajisjet matëse. Këta klientë do t’i marrin dy fatura në pliko, një faturë reale të faturimit sipas sipërfaqes ngrohëse dhe një draft faturë krahasuese sipas konsumit.

Me dërgimin e këtyre faturave testuese fillon edhe fushata sensibilizuese e fokusuar në promovimin e kursimit dhe ndryshimit të shprehive për shfrytëzimin e ngrohjes, njofton “Termokos” nëpërmes një komunikate për medie.

Faturat e dizajnuara sipas konsumit, tashmë janë aprovuar nga Zyra e Rregullatorit për Energji. “Termokos” është në proces të vazhdueshëm të testimit të softuerit dhe komponenteve tjera të projektit “Prishtina Heatsave”. Deri më tani 17.500 banesa kanë përfituar nga pajisjet falas në banesat e tyre, përfshi termokokat moderne, që kontrollojnë nivelin e ngrohjes.

NP “Termokos” apelon tek të gjithë konsumatorët, që në dy javët e ardhshme të kursejnë maksimalisht ngrohjen, në mënyrë që të analizohen dhe krahasohen nivelet e konsumit individual, por edhe kolektiv. Këto 1.000 familje, që do të marrin faturën model do të kenë mundësi t’i analizojnë shpenzimet e veta sipas faturës me metra katrorë dhe asaj sipas konsumit.

“Derisa, të dhënat fillestare analitike dëshmojnë se shumica e konsumatorëve kanë filluar të kursejnë, “Termokos” apelon, që nga sezoni ngrohës 2024/2025 kursimi të jetë shprehi e vazhdueshme. Ngrohja në të ardhmen do të kalkulohet sikurse edhe rryma apo uji, me matje. Sa më shumë kursehet, aq më pak paguhet”, theksohet në komunikatë.

Draft faturat testuese të konsumit, që do të shpërndahen me faturat e zakonshme të marsit kanë një shirit të kuq dhe nuk janë paraparë të paguhen, sqaron “Termokos”.

Projekti “Prishtina HeatSave” përgjatë 18 muaj instalimesh ka arritur të përfundojë objektivin e instalimeve të pajisjeve në 17.500 njësi banesore, të financuar nga agjencia federale amerikane MCC në bashkëpunim me Komunën e Prishtinës. Tashmë është instaluar edhe softueri i faturimit dhe ka filluar procesi i trajnimit të stafit të “Termokos”.

Austria ka urdhëruar dy diplomatë të Ambasadës së Rusisë në Vjenë të largohen nga vendi.

Ministria e Jashtme e Austrisë tha në një deklaratë më 13 mars se dy diplomatët ishin “përfshirë në veprime që nuk janë në përputhje me statusin e tyre diplomatik”, dhe si rrjedhojë janë shpallur “persona të padëshiruar”.

Ajo nuk dha hollësi të tjera për diplomatët, apo për veprimet e tyre të dyshuara. Një zyrtar austriak tha për Associated Press, në kushte anonime, se dëbimi i tyre lidhej me veprimtari spiunimi.

Ambasada ruse në Vjenë tha se asaj nuk iu dha asnjë dëshmi që mbështet dëbimin e tyre, duke e quajtur “të pabazë” vendimin e Austrisë.

Vendet e Perëndimit dhe Rusia ia kanë dëbuar diplomatët njëra-tjetrës në disa raste, prej se Rusia e nisi pushtimin e Ukrainës në shkurt 2022.

Austria, një anëtare e Bashkimit Evropian që mban qëndrim të neutralitetit ushtarak dhe kryeqyteti i të cilës është qendër e disa agjencive të OKB-së, kishte ngurruar fillimisht për të ndërmarrë veprime të tilla, por së fundmi ka dëbuar më shumë diplomatë rusë.

Në prill 2022, ajo i dëboi katër diplomatë rusë, pas trysnisë publike dhe nga BE-ja, si dhe katër të tjerë në shkurt 2023. Para fillimit të pushtimit të Ukrainës nga Rusia, ajo e dëboi një diplomat rus në gusht 2020.

Papa Françesku po përgatitet të botojë autobiografinë e tij, pjesë të së cilës u botuan në shtypin italian. Gazeta Corriere della Sera siguroi sot pjesë të nga autobiografia e Papa Françeskut, e cila do të dalë më 19 mars në Evropë dhe Amerikë.

Papa shkroi autobiografinë e tij së bashku me gazetarin italian Fabio Marchese Ragona.

Duke iu referuar viteve të rinisë së tij, Papa në autobiografinë e tij zbulon se para se të hynte në seminar ishte dashuruar me një vajzë.

“Para se të hyja në seminar, kisha një të fejuar, një vajzë që punonte në industrinë e filmit, shumë e ëmbël, e cila më pas u martua dhe bëri fëmijë. Pastaj një ditë shkova në dasmën e një xhaxhai dhe takova një vajzë.

Ajo ishte aq e bukur dhe e zgjuar. Për një javë, nuk më hiqej nga mendja dhe e kisha të vështirë të falesha. Pastaj për fat kaloi dhe arrita t’i përkushtohem plotësisht thirrjes së Zotit”, shkruan ai.

Papa Françesku thekson se nuk mendon të japë dorëheqjen dhe shton se nëse kjo ndodh ndonjëherë, ai nuk duhet të quhet “papa emeritus” por “peshkop emeritus i Romës”.

Sa i përket Vatikanit Papa Françesku shkruan:

“Disa ishin më të interesuar për politikën, në fushatën zgjedhore duke pritur një konklavë të re.

Është njerëzore, mos u frikësoni. Kur Papa hyn në spital, ka shumë mendime. Ka edhe disa që shfrytëzojnë informacione të caktuara në avantazhin e tyre ose për të përfituar diçka nga publikimi i tyre.

Për fat të mirë, pavarësisht kohëve të vështira, nuk kam menduar kurrë ta lë”.

Ne kuadër te javës se aktiviteteve operacionale sipas planit të rrjetit evropian te policive rrugore ROADPOL, sot, Policia e Trafikut se bashku me zyrtarë nga Ministria e Mjedisit, Planifikimit Hapësinor dhe Infrastrukturës (MMPHI) kanë realizuar një fushatë sensibilizuese për pjesëmarrësit në trafik, gjegjësisht drejtuesit e automjeteve dhe pasagjeret rreth rëndësisë së përdorimit të rripit të sigurisë, me ç’rast bëhet e ditur se pjesëmarrësve në trafik u janë shpërndarë aromatizues me mesazhe sensibilizuese për përdorimin e rripit të sigurisë.

Organet e rendit njoftojnë se Policia e Kosovës do të vazhdojë me aktivitetet e saja në tërë territorin e vendit me qëllim të rritjes së sigurisë në trafikun rrugor dhe në parandalimin e aksidenteve.

Policia apelon të gjithë pjesëmarrësit që të shtojnë kujdesin dhe të respektojnë rregullat dhe dispozitat ligjore në trafikun rrugor.