Author: ATVLive

Përgjysmimi i çmimeve të qumështit në ferma në krahasim me vitin e kaluar nxori sot në protestë blegtorët e Lushnjës dhe Fierit.

Blegtorët janë nisur me traktorët e tyre nga Kavaja, Vlora, Berati, Fieri dhe Lushnja drejt rreth-rrotullimit të Savrës, ku rreth orës 12:00 është bllokuar autostrada Lushnjë-Fier.

Me pankarta në duar “Bojkotoni qumështin serb”, “Respektoni prodhimin vendas” dhe “Duam subvencion si gjithë Evropa”, blegtorët po protestojnë për çmimet e ulëta të qumështit dhe për mungesën e subvencioneve. Vitin e kaluar, një litër qumështin në fermë kushtoi rreth 140 lekë, ndërsa tani, më pak se 70 lekë, teksa importet e këtij produkti janë rritur ndjeshëm në tre muajt e parë të vitit.

Blegtorët pohuan se, shteti përveçse nuk jep subvencione për bujqit shqiptarë, nuk mbron prodhimin vendas nga çmimet e importit. Blegtorët pohojnë se asnjë nga institucionet e shtetit, përkatësisht, Autoriteti i Konkurrencës, Drejtoria e Përgjithshme e Tatimeve, Drejtoria e Përgjithshme e Doganave dhe Ministria e Bujqësisë dhe e Zhvillimit Rural nuk po bëjnë detyrën për të nxitur dhe për të mbrojtur prodhimin vendas.

Prodhuesit dhe blegtorët pohojnë se kostot në zinxhirin e blegtorisë janë të larta pasi shteti nuk subvencionon sektorin. Me heqjen e përjashtimit të TVSH, duke kthyer edhe një herë nivelin 20%, situata e përkeqësua më tej. Çmimi i qumështit në fermë aktualisht është 40% deri në 80% më i lartë se në BE dhe Rajon.

Në Shqipëri, vitin e kaluar blegtorët që kishin mbi 10 krerë lopë morën nga 98 euro për kokë me dy këste, ndërkohë që në Serbi pas grevës së blegtorëve vitin e kaluar, subvencioni për një lopë qumështi është 365 uro dhe për çdo litër blegtori merr mbrapsht 0.16 cent.

Kjo diferencë në çmime po o orienton fabrikat shqiptare drejt importit të qumështit nga jashtë, çka do të thotë se është një presion i shumëfishtë për blegtorët që tashmë vuajnë nga kostot e larta të lëndës së parë, mungesa e fuqisë punëtore dhe braktisja e fshatit.

Nga ana tjetër, Shqipëria nuk ka një konsum të shpërndarë në mënyrë të qëndrueshme në të gjithë muajt e vitit. Vitin e fundit pati një kërkesë jo të zakonte në tre muajt e verës për shkak të fluksit të lartë të turistëve. Pas festave të dhjetorit, tani në tre muajt e parë të vitit 2024, shitjet kanë rënë ndjeshëm pohojnë përpunuesit.

Deformimet në treg dhe konsumi me hope dëmton fermerët. Blegtorët shqiptare nuk ka kapacitete depozituese, nuk kanë mundësi të përballojnë kostot e transportit, nuk janë të përfaqësuar me sindikata dhe janë “viktima” të ndryshimeve të çmimeve sipas nevojave të tregut.

Në vende të tjera të Europës këto luhatje eliminohen nga subvencionet. Në të gjithë vendet fqinjë subvencionet ndaj blegtorëve u rritën me tej pas kostove që krijoi lufta në Ukrainë, duke rritur më tej konkurrencën më vendin tonë.

Instituti i Shëndetit Publik në Maqedoninë e Veriut ka bërë të ditur të hënën se në javën e kaluar janë regjistruar 50 raste të reja me kollën e keqe.

Numri më i madh i të sëmurëve në periudhën 29 mars – 4 prill është regjistruar në Shkup, por raste janë raportuar edhe në Manastir, Tetovë, Gostivar, Kratovë, Veles dhe Gjevgjeli.

Në total, këtë vit jane regjistruar 399 raste me kollën e keqe.

Kolla e keqe është sëmundje që shkaktohet nga bakteri ‘bordetella pertussis’, dhe përhapet lehtësisht nga personi në person përmes spërklave nga kollitja ose teshtitja e personit të infektuar.

Fillimisht simptomat ngjajnë me ato të një ftohjeje të zakonshme, duke përfshirë teshtitjen, rrjedhjen e hundës, temperaturë të ulët dhe një kollë të lehtë, kanë theksuar nga Instituti i Shëndetit Publik, duke përmendur se një person gjatë jetës mund të preket disa herë nga kjo sëmundje.

Në bazë të të dhënave të Institutit të Shëndetit Publik, 239 raste gjegjësisht 59.9 për qind e të infektuarve nga kolla e keqe nuk i kanë marrë dozat e vaksinës nga kjo sëmundje ose nuk kanë dëshmi të vaksinimit.

Prandaj ky Institut ka bërë thirrje që prindërit t’i vaksinojnë fëmijët e tyre, duke thënë se vaksinat janë të sigurta dhe nuk ka vend për dyshim rreth sigurisë së tyre.

“Problemi më i madh mbeten dezinformuat, të cilat shpërndahen për sa i përket sigurisë së vaksinave. E dyta ka të bëjë me neglizhencën e prindërve që harrojnë afatin se kur duhet t’i vaksinojnë fëmijët me dozën e dytë ose tretë të vaksinës kundër kollës së keqe”, ka thënë Zllate Medoviq nga Komisioni për Sëmundje Ngjitëse.

Ai e konsideron shqetësues faktin se kjo sëmundje tani shtrihet dhe në qytetet ku më parë nuk ka qenë asnjë i regjistruar sikurse Dibra, Kriva Pallanka, Gjevgjelia, Kërçova e tjera.

Komisioni për Sëmundje Ngjitëse në mbledhjen e fundit, të mbajtur më 4 prill, ka shqyrtuar gjendjen e krijuar, megjithatë nuk ka sugjeruar masa shtesë për mbrojtje nga kolla e keqe duke theksuar se mbeten në fuqi masat më të hershme që kopshtet për fëmijë të mos i pranojnë fëmijët që nuk i kanë marrë tri doza të vaksinës kundër kollës së keqe.

Kjo masë ka rezultuar me rritje të numrit të të vaksinuarve, veçanërisht pas shpalljes së epidemisë nga kjo sëmundje, më 8 shkurt të këtij viti në Shkup dhe Kumanovë.

Në Maqedoninë e Veriut, mbulimi për vaksinim primar është nën 90 për qind për të gjitha vaksinat – si ajo kundër verdhëzës ose hepatitit B (HepB), për vaksinën kundër gripit ose Haemophilus influenzae tip B (HiB), vaksinën e trefishtë kundër difterisë, tetanozit dhe pertusisit (DiTePer) vaksinën MRP kundër fruthit, si dhe kundër virusit papilloma humane (HPV), e cila regjistron mbulimin më të ulët nga të gjitha vaksinat. /REL

Ministri i Infrastrukturës, Liburn Aliu ka bërë të ditur se janë hapur procedurat e prokuroimit për pastrimin e shtretërve të lumenjve të Kosovës. Sipas Aliut ky projekt do të kushtojë rreth dy milion euro.

“Lajm tejet i mirë, që tani janë hapur procedurat e prokurimit për pastrimin e shtretërve të Lumenjve të Kosovës. Rreth dy milionë euro, parashihet që të jetë vlera totale e projektit”, ka shkruar Aliu në Facebook.

Lumenjtë që do të pastrohen:

Lumi Nerodime – Kaçanik

Lumi Toplluha, Velezha – Prizren

Lumi Sitnica, Gurishta – Vushtrri

Lumi Zhegër, Livoq dhe Përlepnicë – Gjilan

Lumi Verbica, Qubrel, Runik – Drenas dhe Skënderaj

Lumi Janjeva, Godanci, Sitnice – Lipjan

Lumi Kamenica – Novobërd

Lumi Ibër – Leposaviq

“Bashkë dhe secili prej nesh duhet të jetë rojtar i tokës, ujit dhe vendit ku jetojmë, e lufta ndaj mbetjeve do të vazhdojë për ditë, sigurisht me institucione përgjegjëse, projekte konkrete, por edhe me qytetarë vullnetarë të shumtë që e duan një Kosovë sa më të Pastër!”, thotë Aliu.

Grupi për Studime Juridike dhe Politike (GLPS) ka publikuar analizën për qeverisjen tri vjeçare ku ka theksuar ngecjen në politikën e jashtme, reformat në sundim të ligjit dhe luftën kundër korrupsionit. Kurse, sa i përket dialogut Kosovë-Serbi, GLPS konsideron se reagimi i butë ndaj Serbisë dhe qëndrimi agresiv ndaj Kosovës paraqet një gabim strategjik të bashkësisë ndërkombëtare, duke rrezikuar të gjithë procesin e dialogut.

Sipas analizës të realizuar, Qeveria Kurti nuk i ka sjellë vendit asnjë njohje të re, derisa është theksuar nevoja për zgjedhje afatgjate, pasi sipas GLPS-së, zgjidhjet afatshkurta dëmtojnë rrugën integruese të Kosovës.

Njomza Arifi, menaxhere e programeve në GLPS, ka listuar të arriturat dhe ngecjet e qeverisjes tri vjeçare të kryeministrit, Albin Kurti. Ajo ka thënë se viti i tretë i qeverisjes vazhdon të karakterizohet me fenomenin e pozitave të ushtruesve të detyrës duke tejkaluar në të shumtën e rasteve edhe afatet ligjore.

“Në përgjithësi, viti i tretë i qeverisjes, sikurse vitet paraprak, vazhdon të karakterizohet me fenomenin e pozitave të ushtruesve të detyrës duke tejkaluar në të shumtën e rasteve edhe afatet ligjore. Nga 16 institucione gjithsejtë, përfshirë 15 ministri dhe Zyra e Kryeministrit, vetëm katër prej tyre udhëhiqen nga sekretarë me mandatë të rregullt. Ky fenomen vazhdon të dëmtojë funksionimin e administratës publike në Kosovë. Kemi theksuar nevojën për një riformatim të Qeverisë për shkak të mungesës së performancës në disa dikastere. Edhe pse kjo ishte paralajmëruar nga kryeministri Kurti, një gjë e tillë nuk ka ndodhur. Po hyjmë në vitin e katërt dhe të fundit, dhe nevoja për riformatim qe ka qenë e padiskutueshme, nuk është jetësuar gjatë kësaj kohe…Fenomeni i mungesës së transparencës dhe llogaridhënies mbetet ende i theksuar”, tha Arifi.

Sipas saj, reformat në sundim të ligjit kanë vazhduar të jenë në krye të agjendës qeveritare edhe gjatë vitit të tretë, duke shtuar se fokus i veçantë i vlerësimit që kanë realizuar është vënë mbi reformën e vetingut të sistemit të drejtësisë, iniciativën për reforminim e kornizës ligjore për sistemin prokurorial, luftën kundër korrupsionit dhe krimit të organizuar, si dhe strategjinë kombëtare për luftën kundër korrupsion.

Arifi ka thënë se gjatë këtij viti ka pasur kritika të vazhdueshme mbi tendencën e ekzekutivit për të ndërhyrë në sistemin e drejtësisë, përmes deklaratave publike karshi gjyqësorit dhe prokurorisë, për çfarë tha se një nga dokumentet kryesore në fushën e sundimit të ligjit mbetet Strategjia Kombëtare për Sundim të Ligjit 2021-2026.

Ajo po ashtu ka thënë se sa i përket Byrosë për Konfiskimin e Pasurisë së Pajustifikueshme, nuk ka pasur ndonjë lëvizje në këtë drejtim që kur i njëjti projektligj është dërguar në Gjykatën Kushtetuese për vlerësim të kushtetutshmërisë, që tashmë një vit.

Ndërsa, duke folur për luftën kundër korrupsionit dhe krimit të organizuar, ajo tha se Kosova vlerësohet të jetë ende në një fazë të hershme në luftën kundër korrupsionit dhe krimit të organizuar.

“Kosova vlerësohet të jetë ende në një fazë të hershme në luftën kundër korrupsionit dhe krimit të organizuar. Edhe pse legjislacioni i rëndësishëm kundër korrupsionit është miratuar, zbatimi në praktikë mbetet shqetësues. Megjithatë, gjatë këtij viti si shenja pozitive në luftën kundër krimit të organizuar dhe korrupsionit mund të shihen operacionet policore kundër kontrabandës në veri të Kosovës. Gjatë kësaj kohe në komunat veriore u bënë hapa konkret në shkatërrimin e laboratorëve të drogës, rrugëve ilegale të kontrabandimit, laboratorëve të kriptovalutave…GLPS poashtu konsideron se duhet bërë përpjekje të shtuara për të ngritur kapacitetet e brendshme të Agjencisë për Parandalimin e Korrupsionit, duke marrë parasysh zgjerimin e kompetencave me ligjin e ri të aprovuar për këtë institucion. Për shkak të mandatit të zgjeruar, mbetet shumë e rëndësishme që kësaj Agjencie ti ofrohen të gjitha kushtet për ushtrim të duhur të mandatit të saj”, tha ajo.

GLPS po ashtu kërkon zbardhje sa më të shpejtë të skandalit i cili rrodhi në media sa i përket blerjes së rezervave shtetërore gjatë këtij viti të tretë qeverisje.

Në anën tjetër, drejtoresha ekzekutive e GLPS-së, Arbëresha Loxha-Stublla ka kritikuar Qeverinë mbi ndryshim-plotësimet e propozuara për Ligjin për Zyrtarët Publik (LZP).

“Konsiderojmë që këto ndryshime janë në kundërshtim me Kushtetutën dhe parimet e administratës publike. Para së gjithash, Ministria e Punëve të Brendshme (MPB), si institucion sponsorizues i këtij ligji, ndoqi një procedurë të papranueshme, duke e bërë atë të mbyllur për pjesëmarrjen e akterëve të interesuar. Në mënyrë të veçantë, mospublikimi i këtij procesi në platformën e konsultimeve publike shkel rregullat themelore të konsultimeve, duke shkelur parimin e transparencës, por edhe nxit dyshime mbi legjitimitetin dhe qëndrueshmërinë e vendimeve të marra. Me këtë projektligj (LZP), Qeveria edhe një herë dëshmoi preferencën e saj për ushtruesit e detyrës. Me aktin e propozuar, afati i ushtruesve të detyrës është zgjatur deri në 2 vjet, një tregues i qartë për tendencën e Qeverisë për të ligjësuar një fenomen të rrezikshëm që i bën këta zyrtarë më të ndjeshëm ndaj ndërhyrjeve politike të përditshme…Në anën tjetër, Ligji për Pagat vazhdon të has në sfida të njëpasnjëshme në praktikë si pasojë e dështimit të finalizimit të procesit të klasifikimit të vendeve të pjesën dërmuese të institucioneve publike”, tha Loxha-Stublla.

Stublla po ashtu ka thënë se Qeveria Kurtit II, nuk ka arritur të sigurojë ndonjë njohje shtesë apo anëtarësim në mekanizma ndërkombëtarë.

“Duke hyrë në vitin e fundit, Qeveria Kurtit II nuk ka arritur të sigurojë ndonjë njohje shtesë apo anëtarësim në mekanizma ndërkombëtarë. GLPS konsideron se Qeveria Kurti II po dështon të sigurojë një strategji efektive sa i përket politikës së jashtme dhe përpjekjet mbesin jashtëzakonisht të limituara, pa ndonjë rezultat konkret as në sigurimin e njohjeve të reja e as në komunikimin e duhur me pesë shtetet mosnjohëse të BE-së. Me aq sa është parë në vitin e tretë, MPJD duket më shumë e fokusuar në fuqizimin e marrëdhënieve me Diasporën, sesa në përpjekjet për të siguruar një kornizë koherente të politikës së jashtme… Po ashtu GLPS konsideron se tendosja në marrëdhëniet me aleatët ndërkombëtarë, tensionet e vazhdueshme në komunat veriore me shumicë serbe dhe stagnimi në normalizimin e marrëdhënieve me Serbinë vazhdojnë të jenë faktorë kyç që minojnë përpjekjet e politikës së jashtme të Kosovës dhe pengojnë njohjen e mëtejshme ndërkombëtare…Aktualisht qasja dhe politikat e propozuara shfaqin zgjidhje afatshkurtra, duke shkaktuar mungesë të qëndrueshmërisë dhe duke privilegjuar politikat e momentit, ndërsa neglizhojnë synimet afatgjata të zhvillimit të vendit.”, tha Loxha-Stublla.

Mes tjerash, ajo ka thënë se që nga marsi i vitit të kaluar, dhe veçanërisht pas sulmit në Banjska në shtator, dialogu me Serbinë ka konsumuar shumicën e përpjekjeve të politikës së jashtme të kryeministrit Kurti gjatë këtij viti të tretë.

“GLPS konsideron masat e BE-së kanë rezultuar me dëme politike, ekonomike dhe teknike për Kosovën, dhe tregojnë për një qasje asimetrike të BE-së kundrejt dy shteteve në dialog. Procesi i Integrimit Evropian mbetet ende i limituar brenda mekanizmave të Marrëveshjes së Stabilizim Asociimit dhe Agjendës Evropiane për Reforma…Që nga marsi i vitit të kaluar, dhe veçanërisht pas sulmit në Banjska në shtator, dialogu me Serbinë ka konsumuar shumicën e përpjekjeve të politikës së jashtme të kryeministrit Kurti gjatë këtij viti të tretë…GLPS konsideron se reagimi i butë ndaj Serbisë dhe qëndrimi agresiv ndaj Kosovës paraqet një gabim strategjik të bashkësisë ndërkombëtare, duke rrezikuar të gjithë procesin e dialogut. Prandaj, një qasje e ekuilibruar nga BE-ja, është thelbësore që procesi i normalizimit të japë rezultate”, ka shtuar Loxha-Stublla.

GLPS po ashtu thekson se integrimi i qytetarëve serbë të Kosovës mbetet thelbësor, duke shtuar se bie mbi përgjegjësinë e qeverisë për të zhvilluar një strategji që synon integrimin e komunitetit serb të Kosovës, duke ofruar stimuj ekonomikë, socialë dhe politikë. /KP

Ministri i Administrimit të Pushtetit Lokal, Elbert Krasniqi ua uroi të gjithë komunitetit Rom, Ditën Ndërkombëtare të Romëve.

Krasniqi thotë se kultura rome është vlerë e veçantë, ku sipas ministrit është kontributi historik i këtij komuniteti i cili simbolizon përpjekjen dhe përkushtimin e vazhdueshëm drejt një jete më të mirë.

“Për të gjithë miqtë e mi nga komuniteti Rom. Kultura rome është vlerë e veçantë kulturore, ashtu siç është kontributi historik i këtij komuniteti i cili simbolizon përpjekjen dhe përkushtimin e vazhdueshëm drejt një jete më të mirë”, shkroi Krasniqi në Facebook.

“Në ditën e tyre, jemi bashkë, duke përkujtuar figurat emblematike të cilët ishin pjesë e rëndësishme e shtetit tonë”.

Kryesia e Bashkësisë Islame të Kosovës njofton opinionin e gjerë se muaji i madhëruar Ramazan përfundon ditën e martë, më 9 prill 2024.

Manifestimi qendror për festën e Fitër – Bajramit për Republikën e Kosovës mbahet në Xhaminë e Madhe në Prishtinë.

Manifestimi fillon në orën 5:21, me faljen e namazit të sabahut, pas të cilit do të jetë ligjërata tematike kushtuar kësaj feste nga profesori i Medresesë, Shkelzen Hoxha.

Namazi i Fitër – Bajramit falet në orën 06:41 të cilit do t’i prijë kryeimami i Bashkësisë Islame të Kosovës, Vedat ef. Sahiti.

Hytben e Fitër – Bajramit do ta mbajë Myftiu i Kosovës, Naim ef. Tërnava, i cili do t’i drejtohet opinionit të gjerë me mesazhin e kësaj feste.

Me rastin e festës së Fitër – Bajramit, ditën e parë, më 10 prill 2024, Kryesia e BIK-ut, si tradicionalisht organizon pritje përurimi në selinë e Kryesisë nga ora 9:00-12:00.

ANP ‘Adem Jashari’ LKIA po vazhdon suksese të pakufizuara gjatë viteve të fundit ku ka pasur progres të jashtëzakonshëm në numrin e udhëtarëve dhe fluturimeve.

Viti 2023 arriti në përfundimin e tij me 3,424,883 udhëtarë ose 14,37% më shumë se viti 2022, ndërsa numri i fluturimeve ishte 23,278 fluturime ose 7,50% më shumë se viti 2022.

E njëjta tendencë e këtij zhvillimi ka vazhduar edhe në tremujorin e parë të vitit 2024.

Në muajin Janar ka pasur rritje të numrit të udhëtarëve prej 21,84%, dhe 23,25% të numrit të fluturimeve, krahasuar me të njëjtën periudhë të një viti më parë, ndërsa Shkurti ka shënuar rritje prej 37,62% në numrin e udhëtarëve dhe 32,96% në numrin e fluturimeve. Marsi 2024 ka shënuar rritje 29,44% në udhëtarë dhe 22,99% në fluturime.

Tremujori i parë i vitit 2023 pati 649,858 udhëtarë ndërsa viti 2024 shërbeu 839,546 udhëtarë ose 29,19% më shumë. Tremujori i parë i vitit 2023 shërbeu 4256 fluturime, ndërsa tremujori 2024 kishte 5376 ose 26,32% më shumë.

Me këtë rast Kryeshefi Ekzekutiv dhe Anëtari i Bordit të Drejtorëve të Aeroportit Ndërkombëtar të Prishtinës ‘Adem Jashari’ LKIA, Hakan Ozturk tha:

“Jemi të entuziazmuar të dëshmojmë suksesin e jashtëzakonshëm që kemi arritur viteve të fundit. Falenderojmë udhëtarët tanë, partnerët, stafin e përkushtuar dhe të gjithë komunitetin për mbështetjen e tyre të paçmuar. Për më tepër, ne ia atribuojmë këtë sukses angazhimit të palëkundur për të ofruar shërbimet më të mira të mundshme dhe për të garantuar nivelet më të larta të sigurisë për klientët tanë të çmuar. Kënaqësia dhe siguria e udhëtarëve tanë, mbetet prioriteti ynë kryesor”.

Rritja e numrit të udhëtarëve dhe fluturimeve ka rezultuar poashtu në një kontribut të madh për Republikën e Kosovës. Shuma totale e investimit është 120 milionë euro, ndërsa kontributi për Republikën e Kosovës deri në Mars 2024 është mbi 221.32 milionë euro.

Gjithashtu, si përgjigje ndaj rritjes së numrit të udhëtarëve, Aeroporti Ndërkombëtar i Prishtinës ‘Adem Jashari’ LKIA është duke zgjeruar infrastrukturën e tij dhe aktualisht ka të punësuar rreth 850 punonjës.

Projekti i zgjerimit të terminalit është në të dy anët e ndërtesës kryesore në pjesën ajrore. Pjesa veriore është shtesë 615 m2, dhe pjesa jugore është shtesë 630 m2. Dy porta të reja do të shtohen në secilën anë duke bërë 4 porta të reja në total ose do të zgjerohen nga 8 në 12 porta në aeroport. Gjithashtu, edhe 757.45 m2 janë zgjeruar në sipërfaqe nga ana publike.

Duke qenë një nga aeroportet më tërheqëse në rajon, gjatë 2024-ës janë shtuar linja të reja dhe frekuenca të reja shtesë e atyre ekzistuese. Linjat dhe frekuencat shtesë të reja të shtuara për vitin 2024 janë: Luksemburg, Halmstad, Riga, Izmir, Frankfurt Hahn, Burgas, Këln Bon, Oslo, Kopenhagë etj.

Policia e Kosovës ka njoftuar se një qytetar ka raportuar se ka gjetur një shumë parash në vlerë prej 10 mijë euro, të cilat më pas i ka dorëzuar në polici.
Sipas njoftimit të Policisë, paratë e gjetura tashmë i janë kthyer pronarit.

“Me datën 07.04.2024, derisa zyrtarët policorë të Stacionit Policor në Rahovec, ishin duke trajtuar ankesën e një qytetari për humbjen e një shume parash, në vlerë prej 10 mijë euro, ishte paraqitur zoti Himaj nga fshati Gexhë i cili kishte gjetur këto para dhe të njëjtat i ka dorëzuar. Paratë e gjetura i janë kthyer pronarit”, thuhet në njoftimin e Policisë.

“Zoti Himaj përveç që ka treguar një veprim ndershmërie, ky akt reflekton edhe besimin ndaj Policisë së Kosovës”, thuhet tutje në njoftimin e Policisë.

Është nënshkruar marrëveshja për transformimin e tërësishëm të Pallatit të Rinisë.

Ministri i Kulturës, Hajrulla Çeku, ka njoftuar se kanë nënshkruar marrëveshjen e bashkëpunimit më krye shefen e ndërmarrjes publike “Pallati i Rinisë”, Mrika Gashi.

“Sot kemi nënshkruar marrëveshjen e bashkëpunimit me Mrika Gashin, krye shefe e ndërmarrjes publike “Pallati i Rinisë”. Në planin tonë të investimeve parashihen ndërhyrjet për rinovim dhe rivitalizim të sallës së madhe të sportit (salla universale), hapësirave dhe strukturave ndërlidhëse të sportit, sallës së kuqe, ateliesë, amfiteatrit të dytë, atriumit, pllatosë dhe parkingut nën-tokësor”, ka njoftuar ministri Hajrulla Çeku.

Lidhja Demokratike e Kosovës përmes një komunikate i ka quajtur të pavërteta deklaratat e Qeverisë së Kosovës, se Kosova ka përparuar në indekset ndërkombëtare.

Sipas LDK-së Qeveria e Kosovës po mundohet të manipulojë me raportet e publikuara tashmë.

“Lidhja Demokratike e Kosovës ka mbajtur dhe konferencë për medie për të shprehur shqetësimin e saj për Raportin e BE-së, ku Kosova ishte vlerësuar me notën më të ulët “progres i limituar”; pra është niveli më i ulët i progresit. Ky raport është më i keqi ndonjëherë ndër vite. Raporti përveç tjerash theksoi shqetësimet për keqmenaxhimin dhe korrupsionin. Nuk ka se si të ishte më ndryshe, ku në po të njëjtin raport përmenden kontratat sekrete. Pra ka propagandë nuk ka luftë kundër korrupsionit! LDK ripërmend fatkeqësisht, se Kosova për herë të parë në historinë e saj është ende nën sanksione të BE-së. Për këtë raport krenohet kjo Qeveri”, thuhet në komunikatë.

LDK-ja ka përmendur se më parë ka ngritur shqetësimet pas publikimit të Indeksit të Perceptimit të Korrupsionit, ku Kosova sipas tyre ishte vlerësuar vetëm me 41 pikë.

“Sipas Transparency International, Kosova vendin e 83-të e ndau me Burkina Fason, Afrikën e Jugut e Vietnamin. Po ashtu Kosova ishte e renditur pas Malit të Zi e pas Maqedonisë së Veriut. Përveç tjerash, radhitja e shteteve në këtë indeks nuk tregon asgjë sepse vendet mund të ndryshojnë renditje pa pasur asnjë përmirësim. Vetëm gjatë qeverisjes së LDK-së (2014-2017), Kosova u ngrit nga 33 poena, në 39 në Transparency International, që do të thotë se pushteti e mori mandatin me 39 poena dhe nuk e ngriti më shumë se 2. Pra ka propagandë, nuk ka lëvizje në indekset ndërkombëtare”, thuhet tutje.

Ndërkaq LDK bënë me dije se raportet janë publike dhe lehtë të verifikueshme dhe demantojnë çdo propagandë.

“LDK e vlerëson këtë Qeveri si; Qeveri e regresit, propagandës dhe e paaftësisë. LDK po ashtu beson se qytetarët tanë janë të vetëdijshëm të dallojnë propagandën ndaj të gjitha fakteve që po ofrojmë; fakte të publikuara nga institucionet ndërkombëtare e vendore që e demantojnë çdo mashtrim të kësaj Qeverie”, përfundon njoftimi.