Author: ATVLive

Të premten në Kazermën “Skënderbeu” në Ferizaj është mbajtur ceremonia përmbyllëse dhe u shpallën rezultatet e garës ndërkombëtare “Ushtari më i mirë 2024” që u realizua nga data 22-26.04.2024, me pjesëmarrjen e 51 konkurrenteve, 29 nga ta ishin pjesëmarrës ndërkombëtarë ndërsa 22 pjesëtarë të Forcës së Sigurisë së Kosovës.

Sipas njoftimit të FSK-së, pas shumë testimeve dhe sfidave që kaluan gjatë kësaj jave, rezultatet më të larta i arriti OR3 Sead Veseli nga Regjimenti i tretë i Këmbësorisë( R3K) i cili fitoi vendin e parë dhe njëherit u shpall “Ushtari më i mirë 2024” nga FSK-ja, i dyti u radhit OR3 Lavdim Ibishi R3K, ndërsa vendi i tretë i takoi OR2 Endrit Shartolli R1K.

Tutje thuhet se në radhët e ndërkombëtareve vendin e parë e fitoi nënoficeri nga Jordania, ËO Mohammed Yousef Ahmad, i cili njëherë u shpall “ushtari më i mirë ndërkombëtar 2024”, i përcjellë nga Sergeant Salameh Maddallah Salameh i cili u radhit i dyti po ashtu nga Jordania, ndërsa i vendi i tretë i takoi nënoficerit nga Mali i Zi, OR2 Zoran Marijanoviç.

Në ceremoninë përmbyllëse të garës së ushtarit më të mirë morën pjesë, zëvendës ministri i Mbrojtjes, Shemsi Syla, Komandanti i Komandës së Doktrinës dhe Stërvitjes, gjeneral brigade Jeton Dreshaj, zëvendës komandanti i KDS-së kolonel Ilir Shyti, Rreshter majorët e FSK-së dhe vendeve partnere, si dhe oficerë e nënoficerë të FSK-së, dhe të partnerëve ndërkombëtarë dhe të regjionit.

Me një fjalë rasti të pranishmit i përshëndeti zëvendës ministri i Mbrojtjes Syla i cili falënderoi pjesëmarrësit në garën e ushtarit më të mirë 2024, dhe me këtë rast theksoi “kjo ngjarje është bërë tradite dhe vit pas viti po kulmon me rezultate, dhe jo vetëm që kemi fituar në fushat me të cilat merremi dhe përballemi çdo dite por edhe në shumë aspekte tjera të afrimit, shoqërimit, krijimit të shoqërive për të njohur kulturat traditat dhe për ti materializuar ato në vlera të përbashkëta në misionin e përbashkët që kemi”.

“Në garën “Ushtari më i mirë 2024” morën pjesë garues nga Kosova, Shtetet e Bashkuara të Amerikës, Shqipëria, Kroacia, Maqedonia e veriut, Mali i zi, Jordania, Kanada dhe Latvia. Pjesëmarrësit garuan në disiplinat : testi fizik, gjuajtje me armë të gjata dhe të brezit, navigim tokësor, kalimi i poligonit të besueshmërisë, hedhja e granatës, ndihma e parë, vëzhgimi i terrenit dhe marshimi”, thuhet në njoftim.

“Pjesëmarrja e garuesve nga ushtritë e vendeve partnere dhe të rajonit në këtë garë dëshmon shkallën e lartë të bashkëpunimit me vendet partnere, që FSK e ka krijuar me disiplinë, përkushtim dhe profesionalizëm”.

Institucioni i Avokatit të Popullit ka mbajtur një tryezë diskutimi me rastin e shënimit të Ditës Kombëtare të Personave të Pagjetur.

Bajram Çerkini nga Qendra Burimore për Personat e Zhdukur, u bëri thirrje liderëve shtetërorë që të punojnë më shumë në zbardhjen e fatit të personave të zhdukur, duke thënë se dhimbja nuk i lë të flenë.

Në fjalën e tij, Çerkini tha se edhe pas 25 viteve nuk po gjendet gjuhë e përbashkët edhe pse është nënshkruar marrëveshje të na zbutet pak dhimbja.

Ai përmendi edhe varresat masive për të cilat tha se nuk po bëhet mjaftueshëm gërmime.

“Politikanë të nderuar, kthejuni vetes dhe popullit. Rehatojeni popullin me këtë dhimtë me të cilën nuk mund të flejnë sa duhet. Shumë rrall e përmendi djalin, kur më bie ndërmend për ato nëna që ua kanë marrë në prehër fëmijtë. I kam djepat në zyre të zbrazët e nënat gjallë. A ka gjë më të rëndë se kur të thuhet po i shkelmi të drejtat e njeriut me konventa ndërkombëtare… Me qenë analfabeta që s’dijnë me shkru, kanë ditë vëllezërit, baballarët e stërgjyshërit prej vitit 1912 i kam të pagjetur. Kanë ditur të gjejnë gjuhë të përbashkët me zbutë dhimbjen e këtij populli. U përmendën varrezat masive. Deri kur na themi kemi lavru krejt Kosovën? Aty ku unë besoj që janë tetë vetë, me djalin tim, nuk është germuar ende”, tha ai.

Ndëraq, duke folur për retorikën se po rritet rreziku për luftë të re, Çerkini kritikoi ata që po bëjnë një gjë të tillë.

Ai tha se lufta po përmendet nga ata që së bashku me fëmijët e tyre mund të largohen nga vendi dhe se në rast lufte, ai nuk do të largohej nga Mirovica.

“Na e keni futë një stres të ri se po bëhet luftë. Kush po e lypë atë luftë? Ai që mundet me largu fëmijët prej këtu se unë që nuk mundem me ik dhe ata që më kanë mbetur, pasha Zotin, qaty në Mitrovicë kam me vdekë. Mos ma përmend bre vëlla! E vetmja Mitrovicë shqiptare nuk ka memorial. Në Urë të Ibrit në pjesën e veriut 7 metra memoriali për serbët, 50 për qind nuk kanë qenë në luftë fare. Të gjithë politikanët e dijnë këtë punë”, tha ai.

Pacientët që kanë pasur nevojë për skanimin SPECT/CT/PET, nga tash e tutje nuk do të kenë nevojë të shkojnë për trajtim jashtë vendit.

Kjo pasi Mjekësia Nukleare në QKUK nga donacioni i Fondacionit të udhëhequr nga ish-presidentja Atifete Jahjaga dhe fondacioni filantropik Alwaleed Philanthropies kanë pranuar sot pajisjet moderne SPECT/CT/PET.

Me këtë rast, presidentja Vjosa Osmani ka thënë se kjo teknologji e avancuar nuk është thjeshtë një aparaturë shtesë, por një rilindje për sektorin shëndetësor, duke premtuar shërbime të zgjeruara diagnostikues.

“Po shënojmë së bashku një moment historik pasi me krenari po urojmë pajisjen mjekësore në klinikën tonë të mjekësisë bërthamore brenda Qendrës Klinike Universitare të Kosovës. Kjo teknologji e avancuar nuk është thjesht një aparaturë shtesë, por është një rilindje për sektorin tonë shëndetësor duke premtuar shërbime të zgjeruar diagnostikuese dhe mundësi trajtimi. Deri më tani qytetarëve tanë u është dashur të udhëtojnë në rajon e përtej duke iu nënshtruar sfidave të shumta edhe shëndetësore edhe financiare, andaj kjo pajisje e re simbolizon një pikë kthesë ku njerëzit tanë mund të marrin kujdesin që nevojitet pikërisht këtu në shtëpi të rrethuar nga familja dhe më të dashurit e tyre”, ka thënë Osmani.

Ministri i Shëndetësisë Arben Vitia ka bërë të ditur se për shkak të mungesës së këtij lloji të aparaturës mbi 300 qytetarë brenda vitit kanë kërkuar trajtim jashtë vendit.

“Si ministër i Shëndetësisë nuk ka asgjë më të rëndësishme për mua se sa të sigurojmë gjithë bashkë shërbime të reja cilësore dhe të barabarta për qytetarët e Kosovës, duke iu falënderuar ndihmës së mbretërisë së Arabisë Saudite ky donacion të jetë mundësi dhe shpresë për qytetarët tanë. Janë mbi 300 qytetarë të Kosovës brenda vitit kanë shkuar duke kërkuar jashtë vendit për këtë lloj diagnostikimi. Në çdo skanim që do të bëhet me këtë aparaturë moderne e vetmja në rajon në shëndetësinë publike do të sjellë shpresë në detektimin e hershëm dhe trajtimin adekuat duke shpëtuar shumë jetë”, ka thënë Vitia.

Ish-presidentja Atifete Jahjaga ka theksuar se do të reduktojë edhe ngarkesën financiare të sistemit shëndetësor, duke përmirësuar standardin e përgjithshëm të shërbimeve mjekësore në Kosovë.

“Kjo arritje e jashtëzakonshëm është bërë e mundur mes Fonacionit Jahjaga dhe donacion Alwaleed Philanthropies. Sigurimi i kësaj pajisjeje do t’iu mundësojë mjekëve tanë të zbulojnë dhe diagnostikojnë më saktë dhe në faza shumë të hershme. Për më tepër do të reduktojë edhe ngarkesën financiare të sistemit tonë të shëndetësisë, duke përmirësuar më tej standardin e përgjithshëm të shërbimeve mjekësore në Kosovë. Për pacientët do të ofrohen diagnoza më të shpejta, trajtime më të sakta dhe gjasa më të mëdha për shpëtim jetësh. Kontributi juaj në Qendrën e Klinikës Universitare të Kosovës ka siguruar jo vetëm rezultate të prekshme, por edhe ka dëshmuar se në jetë dhe punë ne duhet të udhëhiqemi nga solidariteti”, ka thënë Jahjaga.

Princesha e Arabisë Saudite, Lamia Bint Majed Saud Alsaud nga Fondacioni Filantropik Alwaleed Philanthropies ka theksuar se prania e tyre në mjekësinë nukleare tregon rolin qendror që Qeveria e Kosovës dhe spitali kanë në prioritetet e tyre për qytetarët.

“Prania jonë në mjekësinë nukleare thekson rolin qendror që Qeveria e Kosovës dhe spitali ka prioritet mirëqenien e qytetarëve të saj, është qenësore për presidenten së bashku me mikën time, ish-presidenten Jahjaga dhe Qeverinë e Kosovës që tregon dedikimin dhe përkushtim për të qëndruar së bashku dhe shërbyer njerëzve të Kosovës,” ka thënë ajo.

Tomografia e kompjuterizuar me emetim të vetëm të fotonit (SPECT) dhe tomografia me emetim pozitron (PET) janë teknika imazherike të mjekësisë bërthamore që ofrojnë informacion metabolik dhe funksional ndryshe nga CT dhe MRI. Ato janë kombinuar me CT dhe MRI për të ofruar informacion të detajuar anatomik dhe metabolik.

Sipas Klinikës amerikane Mayo skanimi me SPECT-PET/CT është një mënyrë efektive për zbulimin e disa sëmundjeve, përfshirë kancerin, sëmundjet e zemrës dhe çrregullimet e trurit. Për kryerjen e procedurës merret një ilaç radioaktiv që tregon aktivitetin metabolik tipik dhe atipik të pacientit.

Pacientët që kanë pasur nevojë deri më tash i janë drejtuar një institucioni privat, ku pagesa shkon deri në 1.400 euro ose kanë dalë jashtë shtetit. Fondi i Sigurimeve Shëndetësore i Kosovës i mbulon këto shpenzime, por pacientët duhet të presin derisa t’i kalojnë të gjitha procedurat për sigurimin e të hollave.

Institucioni i Avokatit të Popullit ka mbajtur një tryezë diskutimi me rastin e shënimit të Ditës Kombëtare të Personave të Pagjetur.

Në fjalën e tij, Avokati i Popullit, Naim Qelaj, tha se edhe pse kanë kaluar 25 vite nga lufta e fundit në Kosovës, ende mbetet i pazbuluar fati i mbi 1 mijë e 600 personave të zhdukur dhe se sipas tij ky është një fakt shqetësues.

Ai u bëri thirrje institucioneve vendore dhe komunitetit ndërkombëtar që të bëjnë presion mbi autoritetet përgjegjëse në mënyrë që të zbardhet fati i personave të zhdukur.

Qelaj tha se vendosja e fatit të personave të zhdukur në tavolinën e dialogut politikë Kosovë-Serbi është i papranueshëm dhe nëse nuk vendoset si kërkesë e qartë për palët dhe të imponohet si detyrim dhe parakusht i çdo iniciative tjetër duke e vlerësuar si prioritet që nuk lejohet të kalohet.

“Kur kanë kaluar më shumë se 25 vite nga përfundimi i luftës në Kosovë ende nuk dihet fati i mbi 1 mijë e 600 personave të zhdukur. Ky është fakt shqetësues dhe pa drejtësi për viktimat. Andaj avokati i popullit bën thirrje institucioneve vendore dhe të gjithë komunitetit që pa kompromis të shtroj presion të detyrojnë autoritetet përgjegjëse të ofrojnë të gjithë mbështetjen dhe të dhënat që të çojnë në zbardhjen e fatit të personave të zhdukur. Vendosja ne tavolinën e dialogut politik dhe qëllimi që të arrihet kompromis me fatet e personave të zhdukur është i pa pranueshëm dhe nëse nuk vendoset si kërkesë e qartë për palët dhe të imponohet si detyrim dhe parakusht i çdo iniciative tjetër duke e vlerësuar si prioritet që nuk lejohet të kalohet”, tha Qelaj.

Ndërkaq, Andin Hoti, Kryetar i Komisionit Qeveritar për Persona të Zhdukur në këtë tryezë tha se për vitin 2024 janë gërmuar 4 lokacione në territorin e Kosovës, ndërsa në vitin 2000/2001 në varrezat masive në Serbi janë gjetur mbi 900 persona të zhdukur.

Ai tha se çështja e personave të zhdukur tashmë është ndërkombëtarizuar.

“Rreth 20 persona apo eshtra të personave që janë të zhdukur ia kanë arrit me i zhvarrosë, kanë arritur me i marrë dhe janë nën procedurat e mëtutjeshme. Shumicën e rezultateve i kemi marr dhe për të tjerat jemi në pritje me ja dërguar familjarëve eshtrat e familjarëve të tyre. Ndërkaq në vitin 2024 deri më tani i kemi gërmuar 4 lokacione me ç’rast i presim edhe 12 lokacione tjera që t’i realizojmë në kuadër të viti 2024. Në numër total janë mbi 2 mijë e 800 lokacione të tjera të gërmuara në Republikën e Kosovës. Kur flasim për territorin e Serbisë është çështje tjetër. U përmend që 950 persona kanë arritur që të gjinden në varrezat masive të Serbisë. 95 për qind nga ta janë gjetur në vitin 2000-2001 në tri varreza masive. Mendoj që Kosovës jo vetëm tashti por edhe në të kaluarën iu ka nevojitur një dokumentim, një hartim i asaj çka ka ndodh nuk nevoja asnjë klasifikim shpikje apo përgënjeshtrim por thjesht një dokumentim i gjithë atyre krimeve një bashkëpunim i tyre krimeve ose një bashkim i atyre dokumenteve në një institucion të vetëm. Kanë punuar pa rreshtuar edhe në forma të ndryshme edhe në kushte të ndryshme megjithatë shteti deri sot nuk është që ka pasur një institucion të qartë se ku dhe si do të ruhen gjitha këto dokumente. Përveç kësaj mendoj jam i bindur plotësisht që delegacioni i Serbisë i ka të gjithë informacionet për Kosovën, thjesht duhet me pas vullnetin, kurajën me i dhënë ato dhe mu përball me drejtësi mandej. Deri sa kjo nuk arrihet natyrisht që kjo do të jetë e vështirë. Natyrisht që ne do të kemi edhe gishtin të drejtuar nga ne sepse është normale përderisa kjo nuk arrihet e kemi shumë të vështirë. Jemi munduar 2 vite, kemi shkuar në Bruksel me ekipin e dialogut dhe kemi futur në kuadër të dialogut personat e zhdukur. E kemi ndërkombëtarizuar çështjen e personave të zhdukur. E kemi ndërkombëtarizuar e kemi ngrit në nivel demokratik në mënyrë që me pas një garancion e ai garancion të jetë BE. Më në fund, më 2 maj kemi arritur ta miratojmë, jo ta nënshkruajmë, deklaratën e personave të zhdukur si rrjedhojë e Aneksit të Ohrit”, tha Hoti.

Është bërë konstituimi i Komisionit Hetimor Parlamentar për procesin e subvencionimit të blerjes së teksteve shkollore dhe mjeteve mësimore për nxënësit e nivelit të arsimit fillor dhe Arsimit të Mesëm të Ulët për vitin shkollor 2023/2024.

Kryesuesi i këtij komisioni, Shemsedin Dreshaj ka thënë se qëllimi i formimit të komisionit është që të shikohet se si ka shkuar procesi për tekstet shkollore.

“Ky komision hetimor veprimtarinë dhe strukturën e ka të aprovuar bazuar në ligjin për hetim parlamentar. Qëllimi tij është të shohim si ka shkuar ky proces, a ka lëshime apo ka qenë çdo gjë në rregull. Kanë qenë informatat në opinion për dështimin me kohë të teksteve mësimore, ka pasur fjalë tjera që janë ndërlidhur rreth kostove dhe mënyrës së blerjeve, shpërndarjes. Ka qenë një opinion për dëmtimin e buxhetit të shtetit gjatë këtij procesi. Ne e kemi bërë një draft-propozim për agjendën që do të punojmë”, tha Dreshaj.

Deputeti nga LVV, Armend Muja ka propozuar që javën që vjen t’i përkushtohen këtij qëllimi dhe të bëhet një plan pune. Ndërsa, deputetja nga Lidhja Demokratike e Kosovës, Vlora Dumoshi është shprehur e shqetësuar me gjendjen aktuale në arsim. Sipas saj, edhe sot shumë nxënës nuk janë të pajisur me libra shkollorë.

“Është e dhimbshme se për tri vjet kjo qeveri ka bërë që procesi mësimor të mos fillojë me kohë, ku rreth 220 mijë nxënës kanë humbur me mijëra orë për shkak të mungesës së librave. Jemi të vetëdijshëm që edhe sot shumë nxënës nuk i kanë librat”, tha Dumoshi.

Ndaj kësaj deklarate ka reaguar deputetja e Lëvizjes Vetëvendosje Arjeta Fejza, e cila tha se ky është konstatim i vetë deputetes.

Dreshaj ka propozuar që ky komision të mbahet të premten në orën 13:30. Me këtë u pajtuan deputetet prezentë. /kp

Deputetja e Partisë Demokratike të Kosovës (PDK) Ariana Musliu-Shoshi ka folur mbi anëtarësimin e Kosovës në Këshillin e Evropës, votimi për të cilin do të mbahet kah mesi i muajit maj.

Ajo në një postim në Facebook ka thënë se aleatët ndërkombëtarë të Kosovës kanë humbur besimin te Qeveria Kurti.

“Kërkesat me ngulm për anëtarësim në KiE tregojnë qartë që aleatët tanë kanë humb besimin në qeverinë Kurti. Ata nuk besojnë në zotime, përfshi letrën e dërguar ku premtojnë implementimin e asociacionit, miratimin e Kodit Civil dhe shumë çështje tjera, nënshkruar nga Vjosa, Albini e Glauku!

Kauzat e Albinit të përdorura vetëm sa me ardhur në pushtet duke mos kursyer asnjë mjet ndaj partive në pushtet, sot po i kthehen bumerang! Pavarësisht kësaj, interesi i Kosovës mbi të gjitha! Kosova dhe qytetarët e saj meritojnë anëtarësimin në KiE! E pafalshme do të jetë humbja e një momentumi të tillë”.