Author: A.M.

Trajneri i Real Madrid CF, Alvaro Arbeloa, ka bërë jehonë deklaratave të presidentit Florentino Perez, i cili akuzoi se klubit po i grabiteshin titujt e La Ligës dhe se gjyqtarët dyshohet se favorizonin FC Barcelona për shkak të skandalit Negreira.

Dje (e martë), Perez mbajti një konferencë për shtyp ku kritikoi gazetarinë për lajme të rreme ndaj klubit dhe akuzoi drejtuesit e La Liga për dëmtimin e interesave të Real Madridit. Presidenti përmendi skandalin Negreira dhe theksoi se vetëm gjatë epokës së tij, Real Madridit iu kanë “vjedhur” shtatë tituj të kampionatit, një qëndrim që ndan edhe trajneri Arbeloa.

“Florentino tha që na u vodhën titujt e La Ligës? Sigurisht, të gjithë e dimë çfarë ndodhi”, deklaroi Arbeloa.

Ai shtoi: “Do të ishte mirë nëse çështja Negreira do të zgjidhej. Është e qartë se nuk është as ligjore dhe nuk ka kuptim për ata prej nesh të përfshirë në futboll”.

“Është e pabesueshme që vetëm futbolli mbron ligjshmërinë. Është një ndjenjë që e ndajnë të gjithë tifozët e Madridit”, përfundoi trajneri i Real Madridit.

Real Madrid CF vazhdon të monitorojë situatën e Rodri, por deri më tani nuk ka bërë asnjë lëvizje zyrtare për mesfushorin e Manchester City F.C..

Prej muajsh është përfolur për një interesim të mundshëm të klubit madrilen për fituesin e Euro 2024, megjithatë raportimet e fundit tregojnë se nuk ka pasur kontakte konkrete mes dy klubeve.

Kjo situatë i ka dhënë mundësi Manchester Cityt të veprojë shpejt për të siguruar të ardhmen e një prej lojtarëve më të rëndësishëm në skuadrën e drejtuar nga Pep Guardiola.

Sipas specialistit të merkatos Matteo Moretto, drejtuesit e klubit anglez po punojnë prej javësh për rinovimin e kontratës së Rodrit dhe dëshirojnë ta mbyllin marrëveshjen sa më shpejt të jetë e mundur.

Mesfushori spanjoll ka tashmë një ofertë në tavolinë dhe vendimi i tij pritet në ditët e ardhshme. City synon të shmangë çdo spekulim gjatë merkatos së verës dhe ta mbajë liderin e mesfushës për të paktën edhe një sezon tjetër në “Etihad”.

Rodri ka zhvilluar 31 ndeshje dhe ka shënuar dy gola këtë sezon me kampionët e Premier League, duke mbetur një nga lojtarët kyç në skemat e Guardiolës.

Ndërkohë, Real Madrid CF vazhdon ta ndjekë situatën nga afër, por pa ndërmarrë hapa konkretë. Nëse rinovimi me Manchester Cityn finalizohet, klubi spanjoll pritet të orientohet drejt alternativave të tjera për repartin e mesfushës.

Presidenti i Real Madrid, Florentino Perez, mbajti të martën një konferencë për media, gjatë së cilës bëri disa deklarata të forta lidhur me çështjen “Negreira”, duke shkaktuar reagim të menjëhershëm nga Barcelona.

79-vjeçari sulmoi mediat spanjolle dhe konfirmoi shpalljen e zgjedhjeve të reja në klub tre vjet para afatit, por vëmendjen më të madhe e morën komentet e tij ndaj Barcelonës dhe gjyqtarëve spanjollë.

Perez pretendoi se Real Madrid dhe ai personalisht “janë vjedhur” nga shtatë tituj kampionë për shkak të çështjes “Negreira”, duke shtuar se nuk do të qëndrojë i heshtur ndaj asaj që e cilësoi si favorizim të Barcelonës nga disa gjyqtarë.

Ai zbuloi gjithashtu se klubi madrilen po përgatit një dosje me prova dhe analiza mbi trajtimin që, sipas tyre, ka favorizuar klubin katalanas ndër vite, dosje që synon ta dërgojë në UEFA.

Pas këtyre deklaratave, Barcelona reagoi përmes një komunikate zyrtare, duke bërë të ditur se departamenti juridik i klubit ka nisur shqyrtimin e deklaratave të Perezit për të vlerësuar mundësinë e ndërmarrjes së hapave ligjorë.

“Në lidhje me konferencën për media të presidentit të Real Madridit, Florentino Perez, ju njoftojmë se departamenti ynë juridik po i shqyrton me kujdes deklaratat dhe akuzat e tij”, thuhet në reagimin e klubit katalanas.

“Deklaratat po analizohen dhe po vlerësohen hapat e ardhshëm. Do të japim më shumë informacione për qëndrimin tonë dhe për çdo vendim të marrë në momentin e duhur”, vazhdon komunikata.

Marrëdhëniet mes Barcelona dhe Real Madrid konsiderohen aktualisht ndër më të tensionuarat në historinë e rivalitetit mes dy klubeve. Deklaratat e fundit të Perezit pritet ta rrisin edhe më shumë tensionin, sidomos pasi katalanasit fituan së fundmi “El Clasicon” me rezultat 2-0 dhe siguruan titullin e La Liga.

Manchester United po shqyrton një lëvizje surprizë për mesfushorin e Real Madrid, Federico Valverde, ndërsa e ardhmja e tij në “Santiago Bernabeu” po bëhet gjithnjë e më e paqartë.

Sipas raportimeve nga “The Mirror”, reprezentuesi uruguaian është lënë në “akull” te Real Madridi pas një përplasjeje të bujshme në stërvitje me bashkëlojtarin Aurélien Tchouaméni, incident që ka rritur mundësinë e largimit të tij gjatë afatit kalimtar veror.

27-vjeçari, i konsideruar prej vitesh si një nga shtyllat kryesore të mesfushës së “Los Blancos”, me 371 paraqitje në total për klubin madrilen, raportohet se ka humbur mbështetjen e drejtuesve pas konfrontimit fizik në stërvitje.

Raportimet tregojnë se incidenti me Tchouamenin ishte aq serioz, sa Valverde ka pasur nevojë për trajtim spitalor për shkak të një tronditjeje.

Edhe pse mesfushori uruguaian publikoi një deklaratë publike dhe kërkoi falje, marrëdhënia e tij me klubin duket se është dëmtuar ndjeshëm.

Sipas mediave angleze, drejtuesit e Real Madrid janë të pakënaqur me situatën dhe thuhet se kanë mbajtur anën e Tchouamenit, duke shtyrë idenë që Valverde të largohet gjatë verës.

Në këtë situatë, Manchester United po monitoron nga afër zhvillimet dhe po konsideron një ofertë të rëndësishme për uruguaianin, teksa synon të rindërtojë repartin e mesfushës për sezonin e ardhshëm.

Presidenti i Real Madrid, Florentino Perez, ka mohuar zërat për dorëheqje dhe ka njoftuar shpalljen e zgjedhjeve të reja në klub, tri vjet para përfundimit të mandatit të tij aktual.

Klubi madrilen njoftoi të martën pasdite se Perez do të paraqitej në një konferencë për media pas mbledhjes së bordit drejtues, pa bërë të ditur paraprakisht arsyen e daljes së tij para gazetarëve.

Gjatë konferencës, Perez reagoi ashpër ndaj raportimeve për largimin e tij nga drejtimi i klubit.

“Unë nuk do të jap dorëheqje, po thërras zgjedhje. Ka fushata kundër meje. Por unë jam ende këtu dhe jam president. Njerëzit thanë se kam kancer, kjo është krejt e sajuar. Nuk jam i lodhur”, deklaroi Perez.

Ai sulmoi edhe mediat spanjolle, duke përmendur konkretisht gazetën ABC dhe artikujt që, sipas tij, kanë përhapur informacione të pavërteta për gjendjen e tij dhe situatën në klub.

“ABC ka shkruar se jam i lodhur… si mund ta thoni këtë? A është ky gazetar këtu?”, u shpreh ai.

Perez theksoi se vazhdon të punojë me intensitet maksimal dhe rikujtoi sukseset e arritura gjatë presidencës së tij.

“Unë punoj ditë e natë si kafshë. Me mua president, kemi fituar 76 tituj. Ndoshta duhet t’jua kujtoj. Po, këtë vit s’kemi fituar asgjë, por mos harroni”, deklaroi ai.

Presidenti madrilen bëri të ditur se bordi aktual do të kandidojë sërish në zgjedhjet e reja dhe sfidoi hapur kritikët që të garojnë kundër tij.

“Po thërras zgjedhje të reja për bordin, dhe ky bord, me mua në krye, do të garojë në këto zgjedhje. Kushdo që po na kritikon dhe po i shpërndan këto thashetheme për mua, mund të garojë kundër meje”, tha Perez.

Ai mohoi gjithashtu pretendimet për krizë brenda klubit, duke insistuar se po krijohet një narrativë e rreme për kaos në Real Madrid.

“Po thonë se Real Madridi është në rrëmujë, se është kaos, se është katastrofë. Janë të gjitha gënjeshtra. Ky është klubi më prestigjioz në botë”, theksoi ai.

Në fund, Perez deklaroi se zgjedhjet po organizohen për të mbrojtur interesat e anëtarëve të klubit dhe se nuk ka ndërmend të largohet nga drejtimi.

“Do të organizoj zgjedhje për të mbrojtur interesat e anëtarëve të Real Madridit. Nuk do të më frikësojnë. Madje, më japin shumë energji”, përfundoi presidenti madrilen.

Arsenal është përballur me një goditje të madhe para finales së UEFA Champions League ndaj Paris Saint-Germain, pasi mbrojtësi Ben White do të mungojë deri në fund të sezonit për shkak të një dëmtimi në gju.

Sipas raportimeve, White dyshohet se ka pësuar një dëmtim në ligamentin MCL. 28-vjeçari u pa duke u larguar nga “London Stadium” me një mbajtëse në gju pas fitores 1-0 të Arsenalit ndaj West Ham United.

Klubi londinez ka konfirmuar zyrtarisht se mbrojtësi anglez nuk do të luajë më këtë sezon, ndërsa shpresa mbetet që ai të rikuperohet në kohë për fazën përgatitore para sezonit të ri.

Trajneri Mikel Arteta tashmë përballet me probleme serioze në repartin defensiv, pasi edhe mbrojtësi i djathtë titullar, Jurrien Timber, vazhdon të jetë jashtë fushave për shkak të dëmtimit.

White kishte nisur titullar në pesë ndeshjet e fundit të Arsenalit, përfshirë të dyja gjysmëfinalet e Ligës së Kampionëve ndaj Atlético Madrid, ku londinezët siguruan kualifikimin në finale.

Përforcimi i verës, Cristhian Mosquera, tani shihet si alternativa më e mundshme për pozicionin e mbrojtësit të djathtë në finalen që do të zhvillohet këtë muaj në Budapest.

Dëmtimi i White paraqet gjithashtu një problem edhe për Anglia, pasi mbrojtësi ishte rikthyer në planet e trajnerit Thomas Tuchel për Kupën e Botës këtë verë në SHBA.

Pas paraqitjeve të mira në muajt e fundit, White po konsiderohej si një kandidat i fortë për t’u përfshirë në listën përfundimtare të Anglisë, por ky dëmtim tani e vë seriozisht në dyshim pjesëmarrjen e tij në turne.

Ish-mesfushori i Kosovës U21, Besfort Zeneli, është përfshirë në listën e Suedia për FIFA World Cup 2026, i cili nis më 11 qershor.

22-vjeçari luan si mesfushor dhe aktualisht është pjesë e Union SG. Ai ishte pjesë e Kosovës U21 gjatë periudhës 2022-2024, ku regjistroi gjashtë paraqitje, përpara se të vendoste ta vazhdonte karrierën ndërkombëtare me Suedinë.

Kalimi i tij te suedezët është konkretizuar shpejt edhe në nivelin më të lartë, pasi Zeneli tashmë numëron gjashtë paraqitje me kombëtaren A të Suedisë.

Debutimin e bëri më 22 mars 2025, duke hyrë kështu në planet e trajnerit përpara turneut më të madh të futbollit.

Pavarësisht konkurrencës së fortë në mesfushë dhe pranisë së disa emrave të njohur nga Liga Premier, Zeneli ka arritur të sigurojë një vend në listën përfundimtare të Suedisë për Botëror.

Rruga e Suedisë drejt kualifikimit nuk ishte e lehtë. Në grupin kualifikues ku ishte edhe Kosova, suedezët pësuan dy humbje ndaj “Dardanëve”: 2-0 në Prishtinë më 8 shtator dhe 1-0 në Goteborg më 13 tetor të vitit të kaluar.

Në fund, Suedia e mbylli grupin në vendin e fundit, pas Zvicra, Kosovës dhe Sllovenia.

Megjithatë, falë suksesit në Ligën e Kombeve, Suedia siguroi një shans të dytë përmes fazës “play-off”. Në gjysmëfinale triumfoi 3-1 ndaj Ukraina në Valencia, ndërsa më pas fitoi 3-2 ndaj Polonia, duke konfirmuar kualifikimin në Kupën e Botës.

Në Botëror, Suedia do të garojë në Grupin F, ku do të përballet me Tunizinë, Holandën dhe Japoninë.

Mbrojtësi i Real Madrid, Dani Carvajal, nuk do të jetë pjesë e kombëtares së Spanja për ndeshjet e ardhshme të Botërorit.

Sipas raportimeve nga mediat spanjolle, Carvajal pritet të mbetet jashtë listës së trajnerit Luis de la Fuente, e cila do të publikohet gjatë ditëve në vijim.

Mungesa e mbrojtësit të djathtë konsiderohet një goditje për kombëtaren spanjolle, duke marrë parasysh përvojën dhe rëndësinë e tij në repartin defensiv.

Ende nuk janë bërë të ditura arsyet zyrtare të mosftesës, ndërsa pritet që federata spanjolle dhe trajneri De la Fuente të japin më shumë detaje pas publikimit të listës zyrtare.