Author: A.M.

Real Madridi ka reaguar zyrtarisht ndaj spekulimeve të fundit të merkatos, duke mohuar kategorikisht se ka shfaqur interes për mesfushorin e Chelseat, Enzo Fernandez.

Në një komunikatë zyrtare, klubi madrilen theksoi se nuk ka bërë asnjë tentativë, as të drejtpërdrejtë dhe as të tërthortë, për transferimin e reprezentuesit argjentinas.

“Duke marrë parasysh lajmet dhe deklaratat e publikuara ditët e fundit në lidhje me një interesim të Real Madridit për Enzo Fernandez, klubi dëshiron të sqarojë se nuk është bërë asnjë përpjekje, e drejtpërdrejtë apo e tërthortë, për transferimin e futbollistit dhe se nuk ka ndërmend të procedojë me një transferim të tillë”, thuhet në deklaratë.

Klubi spanjoll shprehu gjithashtu respektin maksimal për Enzo Fernandez, duke e cilësuar atë si një futbollist me cilësi të jashtëzakonshme, por njëkohësisht edhe për Chelsean, me të cilin theksoi se gëzon marrëdhënie të shkëlqyera institucionale.

“Real Madridi dëshiron të shprehë respektin maksimal për Enzo Fernandez, një futbollist i shkëlqyer, karriera dhe cilësitë e të cilit njihen nga të gjithë, si dhe për Chelsean, klub me të cilin kemi një marrëdhënie të shkëlqyer institucionale. Pikërisht për këtë arsye dhe në respekt të parimeve që kanë udhëhequr gjithmonë veprimet e klubit, e shohim të nevojshme t’i përgënjeshtrojmë në mënyrë kategorike këto spekulime, të cilat janë tërësisht të pavërteta”, përfundon komunikata e Real Madridit.

Nënkampioni i Italisë, Napoli, ka prezantuar zyrtarisht Massimiliano Allegrin si trajnerin e ri të skuadrës.

Tekniku italian merr drejtimin e ekipit pas largimit të Antonio Contes, ndërsa rikthehet në pankinë pas përfundimit të aventurës së tij te Milani në fund të sezonit të kaluar.

Allegri ka firmosur një kontratë trevjeçare me Napolin, ku aktivizohet edhe kapiteni i Kombëtares së Kosovës, Amir Rrahmani.

58-vjeçari është një nga trajnerët më të suksesshëm në futbollin italian. Gjatë karrierës së tij, ai e udhëhoqi Milanin drejt titullit të Serie A në vitin 2011, ndërsa me Juventusin fitoi pesë tituj kampionë të Italisë dhe pesë trofe të Kupës së Italisë.

Napoli synon që nën drejtimin e Allegrit të rikthehet në garën për titullin kampion dhe të ketë një paraqitje sa më të suksesshme edhe në arenën evropiane.

Kapiteni i Zvicrës, Granit Xhaka, ka shprehur krenarinë e tij pas fitores ndaj Algjerisë, me të cilën helvetikët siguruan kualifikimin në fazën e 1/16-tës së Kupës së Botës 2026. Mesfushori festoi njëkohësisht edhe paraqitjen e tij të 150-të me fanellën e kombëtares, duke e cilësuar si një nga momentet më të veçanta të karrierës së tij.

“Është një privilegj që e kam veshur këtë fanellë për herë të 150-të. Ky vend, ku linda dhe u rrita, i ka dhënë shumë familjes sime. Shpresoj që kjo të mos jetë ndeshja ime e fundit”, deklaroi Xhaka pas përfundimit të takimit.

Kapiteni zviceran zbuloi se para ndeshjes u kishte kërkuar bashkëlojtarëve ta bënin këtë ditë edhe më të veçantë me një kualifikim.

“Dëshira ime ishte që këtë ditë ta bënim edhe më të veçantë duke kaluar në raundin tjetër. Ekipi bëri pikërisht këtë dhe jam shumë krenar për të gjithë”, tha ai.

Duke komentuar suksesin historik të Zvicrës, e cila fitoi një ndeshje me eliminim direkt në Kupën e Botës për herë të parë që nga viti 1938, Xhaka tha se nuk i kushton shumë rëndësi statistikave.

“Nuk jam adhurues i statistikave. Ne i marrim ndeshjet një nga një. E dimë se çfarë jemi të aftë të bëjmë dhe e dimë gjithashtu se ku duhet të përmirësohemi”, u shpreh mesfushori.

Xhaka vlerësoi veçanërisht paraqitjen mbrojtëse të skuadrës ndaj Algjerisë, duke theksuar se organizimi në mbrojtje ka qenë një nga pikat më të forta të Zvicrës gjatë viteve të fundit.

Në fund, kapiteni zviceran falënderoi tifozët për mbështetjen e vazhdueshme, duke veçuar faktin se shumë prej tyre u zgjuan në orët e para të mëngjesit për të ndjekur ndeshjen.

“Mbështetja e tifozëve tanë ka qenë e jashtëzakonshme. U jemi shumë mirënjohës të gjithëve që na kanë përkrahur dhe besuar tek ne. Shpresojmë t’ua shpërblejmë edhe në ndeshjet e ardhshme”, përfundoi Xhaka.

Cristiano Ronaldo vazhdon të thyejë rekorde dhe të shkruajë histori në futbollin botëror. Kapiteni i Portugalisë ishte vendimtar në fitoren ndaj Kroacisë në fazën e 1/16-tës së Kupës së Botës 2026, duke realizuar nga pika e bardhë dhe duke i siguruar ekipit të tij kualifikimin në çerekfinale.

Ky gol kishte një rëndësi të veçantë për sulmuesin portugez, pasi ishte hera e parë në karrierën e tij që shënonte në një ndeshje të fazës me eliminim direkt në Kupën e Botës, duke vendosur një tjetër rekord personal.

Njëkohësisht, realizimi ndaj Kroacisë e çoi në 976 numrin e golave në karrierën e tij profesionale, duke e afruar edhe më shumë me objektivin historik prej 1.000 golash.

Ronaldo tashmë ka shënuar 11 gola në historinë e paraqitjeve të tij në Kupën e Botës, ndërsa penalltia ndaj Kroacisë ishte goli i tij i parë në fazat me eliminim direkt të këtij kompeticioni.

Në një turne ku po spikasin emra si Harry Kane, Lionel Messi dhe Kylian Mbappe, Cristiano Ronaldo vazhdon të dëshmojë se mbetet një nga futbollistët më të mëdhenj dhe më vendimtarë në historinë e futbollit.

Kapiteni i Kroacisë, Luka Modriç, nuk e fshehu zhgënjimin pas eliminimit dramatik nga Portugalia në fazën e 1/16-tës së Kupës së Botës 2026, duke kritikuar ashpër vendimet e arbitrave dhe përdorimin e sistemit VAR.

Mesfushori veteran tha se Kroacia nuk ishte në nivelin e saj në pjesën e parë, por në të dytën zhvilloi një nga ndeshjet më të mira, duke shtuar se skuadra e tij meritonte të kalonte më tej.

“Mund ta shohim ndeshjen në dy pjesë. Në të parën nuk ishim në nivelin tonë më të mirë, ndërsa në të dytën luajtëm një ndeshje fenomenale. Mund ta kishim mbyllur më herët, por nuk ia dolëm. Mendoj se meritonim shumë më tepër”, deklaroi Modriç.

Ai vuri në dyshim anulimin e golit të Josko Gvardiolit për pozicion jashtë loje, duke theksuar se pamjet filmike nuk tregojnë askund se Igor Matanoviç e kishte prekur topin.

“Gjyqtari tha se Matanoviç e preku topin, por ne i pamë pamjet dhe nuk shihet askund një prekje e tillë. Nëse ai nuk e ka prekur topin, atëherë nuk kishte pozicion jashtë loje”, u shpreh kapiteni kroat.

Modriç reagoi edhe ndaj penalltisë nga e cila Kristiano Ronaldo shënoi golin e barazimit për Portugalinë, duke akuzuar VAR-in për standarde të dyfishta.

“Nuk kishte penallti. VAR-i duhet të ndërhyjë vetëm kur ka një gabim të qartë, jo në raste të diskutueshme. Më duket se në disa raste përdoret në mënyrë selektive, madje edhe në varësi të madhësisë së ekipit. Fatkeqësisht, këto vendime shpesh kanë shkuar në dëm të Kroacisë”, tha ai.

Pas humbjes së dhimbshme, disa lojtarë kroatë, mes tyre Mateo Kovaçiç dhe Ivan Perishiç, nuk i mbajtën dot lotët. Modriç tha se ky reagim tregon sa shumë do të thotë për ta fanella e kombëtares.

“Emocionet e Mateos, Perishiçit dhe të tjerëve tregojnë se sa shumë do të thotë Kroacia për ne. Ne jetojmë për çdo ndeshje, për çdo fitore dhe e dimë sa shumë mbështetje kemi nga populli ynë. Prandaj është e vështirë t’i përmbash emocionet pas një eliminimi të tillë”, u shpreh ai.

Pavarësisht zhgënjimit, Modriç theksoi se skuadra largohet nga turneu me kokën lart, krenare për paraqitjen dhe luftën e treguar, veçanërisht në pjesën e dytë të ndeshjes.

Në fund, i pyetur nëse kjo ishte ndeshja e tij e fundit me fanellën e Kroacisë, legjenda kroate nuk dha një përgjigje të prerë.

“Nuk është koha për të folur për këtë. Do ta mësoni shumë shpejt”, përfundoi Modriç.

Julian Nagelsmann më nuk është trajner i kombëtares gjermane.

Nagelsmann dha dorëheqje me efekt të menjëhershëm,kjo pasi Gjermania u eliminua në mënyrë të turpshme nga Kupa e Botës kundër Paraguajit pas ekzekutimit të penalltive,dhe kjo pas takimit që pati me drejtuesit e DFB-së.

Përndryshe Nagelsmann u vu në qendër të kritikave të ashpra në Gjermani,ku tekniku gjerman u kritikua për mënyrën sesi e menaxhoi ekipin gjatë botërorit.

Në anën tjetër njëri nga emrat që po flitet të marrë drejtimin e pancerëve është Jurgen Klopp,ku ky i fundit u shpreh i hapur për tu rikthyer në zejen e trajnerit,teksa aktualisht ish-trajneri i Liverpoolit dhe Borussia Dortmundit është drejtor i futbollit te Red Bull kurse ka një klauzolë që mund të largohet nëse vije një ofertë nga Federata Gjermane e Futbollit.

Mbetet të sihihet sesi do të rrjedhin gjërat tek kombëtarja gjermane se nëse Klopp do të jetë trajner apo jo.

Kujtojmë që Gjermania u eliminua në 1/16 e finales kundër Paraguajit pas ekzekutimit,duke bërë që gjermanët të eliminohen herët nga Kupa e Botës për herë të tretë me rradhë.

Chelsea ka arritur marrëveshje të plotë verbale me Granit Xhakën për kushtet personale, duke e bërë transferimin një hap larg finalizimit.

Lajmi është bërë i ditur nga gazetari i “Sky Sport Germany”, Florian Plettenberg, i cili raporton se klubi londinez tashmë ka nisur bisedimet zyrtare me Sunderland për të arritur marrëveshjen përfundimtare mes klubeve.

Sipas burimeve pranë negociatave, interesimi i Chelseat për mesfushorin zviceran tregon një ndryshim të qartë të strategjisë në “Stamford Bridge”. Klubi londinez po synon të afrojë lojtarë me eksperiencë të madhe në nivele të larta, duke u larguar pjesërisht nga politika e mëparshme e fokusuar kryesisht te talentet e reja me potencial rishitjeje.

Granit Xhaka, kapiten i Sunderlandit dhe i kombëtares së Zvicrës, shihet si një profil ideal për të sjellë stabilitet, lidership dhe përvojë në mesin e fushës së Chelseat.

Edhe pse Xabi Alonso raportohet se po shtyn për transferimin e tij, Chelsea aktualisht mbetet në avantazh dhe marrëveshja konsiderohet shumë pranë finalizimit, nëse klubet arrijnë akordin përfundimtar mbi kushtet e transferimit.

Manchester City ka nisur lëvizjet konkrete në afatin kalimtar të verës, me objektivin kryesor për të përforcuar repartin e mesfushës. Në krye të listës së City-it është mesfushori italian i Newcastle United, Sandro Tonali.

Sipas raportimeve të mediave ndërkombëtare, City është gati të paraqesë një ofertë prej rreth 70 milionë eurosh, plus bonuse, për të siguruar shërbimet e 25-vjeçarit. Tonali konsiderohet si një nga objektivat kryesorë të trajnerit Enzo Maresca, i cili dëshiron të ndërtojë një mesfushë më dinamike dhe më agresive për sezonin e ri.

Drejtuesit e klubit anglez janë në kërkim të një lojtari me intensitet të lartë, personalitet të fortë dhe përvojë në Ligën Premier – cilësi që Tonali i ka dëshmuar me fanellën e Newcastle. Italiani shihet si futbollisti ideal për të sjellë ekuilibër mes fazës mbrojtëse dhe organizimit të aksioneve sulmuese.

Megjithatë, Newcastle United nuk është i gatshëm të heqë dorë lehtësisht nga një prej lojtarëve më të rëndësishëm të skuadrës. Pavarësisht kësaj, një ofertë që i afrohet 70 milionë eurove, e shoqëruar me bonuse, mund t’i detyrojë drejtuesit e klubit të shqyrtojnë mundësinë e shitjes.

Interesim për Tonalin ka shfaqur edhe Tottenham Hotspur, i cili synon të përfitojë nga situata për të realizuar një marrëveshje. Megjithatë, Manchester City mbetet favorit falë projektit sportiv, garancisë për të luftuar për trofe dhe mundësisë për të qenë pjesë e një skuadre që synon sukses në çdo kompeticion.

Nga ana e tij, Sandro Tonali raportohet se e sheh me interes një transferim në “Etihad Stadium”, duke vlerësuar stilin e lojës së Cityt dhe mundësinë për të bërë një tjetër hap të madh në karrierë.

Nëse bisedimet mes klubeve përparojnë në javët e ardhshme, transferimi i Tonalit mund të shndërrohet në një nga marrëveshjet më të bujshme të kësaj vere në Premierligë.

Cristiano Ronaldo ka shtuar edhe një rekord në karrierën e tij të jashtëzakonshme, këtë herë në një statistikë jo fort të dëshirueshme. Kapiteni i Portugalisë është ngjitur në vendin e dytë në listën e futbollistëve me më së shumti pozicione jashtë loje në historinë e Kupës së Botës gjatë shekullit XXI.

Në ndeshjen e fundit të fazës së grupeve të Botërorit 2026, ku Portugalia barazoi 0-0 me Kolumbinë, Ronaldo u sinjalizua dy herë në pozicion jashtë loje. Me këto dy raste, 41-vjeçari ka shkuar në total në 23 pozicione jashtë loje në paraqitjet e tij në Kupat e Botës.

Më shumë se Ronaldo ka regjistruar vetëm ish-sulmuesi i Holandës, Robin van Persie, me 25 raste, ndërsa pas portugezit renditet legjenda franceze Thierry Henry me 22.

Edhe pse kjo nuk është një statistikë për t’u krenuar, ajo dëshmon rolin që Ronaldo ka pasur për më shumë se dy dekada si pika kryesore e repartit ofensiv të Portugalisë. Prania e tij e vazhdueshme në vijën e fundit të mbrojtjes kundërshtare dhe kërkimi i vazhdueshëm i hapësirave kanë bërë që ai të jetë shpesh në kufirin e pozicionit jashtë loje, duke hyrë kështu edhe në historinë e Botërorëve për këtë tregues.

Lionel Messi ka zgjeruar rekordin e tij si futbollisti që ka shënuar ndaj numrit më të madh të kombëtareve të ndryshme në historinë e Kupës së Botës, pasi gjeti rrugën e rrjetës ndaj Algjerisë dhe Jordanisë gjatë ndeshjeve të Argjentinës në Grupin J.

Kapiteni i Argjentinës tashmë ka realizuar gola ndaj 13 kombëtareve të ndryshme në historinë e Botërorit. Pas tij renditen legjenda si Jurgen Klinsmann, Ronaldo Nazário dhe Miroslav Klose, të cilët kanë shënuar secili ndaj 10 kombëtareve të ndryshme.

Lista e “viktimave” të Messit në Kupën e Botës përfshin kundërshtarë nga disa kontinente dhe shtrihet përgjatë gjashtë edicioneve të turneut. Ai ka shënuar ndaj kombëtareve evropiane si Mali i Zi, Bosnja dhe Hercegovina, Holanda, Kroacia dhe Franca; ndaj përfaqësueseve afrikane si Nigeria dhe Algjeria; ndaj kombëtareve aziatike si Irani, Arabia Saudite, Australia dhe Jordania; si dhe ndaj Meksikës nga Amerika e Veriut.

Ky rekord i ri i shtohet një karriere tashmë historike në Kupën e Botës, ku Messi mban edhe rekordin si golashënuesi më i mirë në historinë e turneut, me 19 gola të shënuar.