Author: A.M.

Franco Mastantuono ka regjistruar një arritje të jashtëzakonshme në futbollin evropian, duke u bërë argjentinasi më i ri që realizon het-trik në një prej pesë ligave kryesore të Evropës.

Talenti 18-vjeçar ishte protagonisti kryesor i fitores së Fiorentinës ndaj Venezias me rezultat 4-2, duke shënuar të tre golat e skuadrës së tij dhe duke i siguruar pikët e para të sezonit.

Mastantuono shpërtheu në pjesën e parë, duke realizuar dy gola brenda vetëm 90 sekondash, rreth minutës së 30-të. Argjentinasi e kompletoi paraqitjen e tij fantastike pak para fundit të ndeshjes, kur shënoi edhe golin e tretë personal.

Me moshën 18 vjeç e 28 ditë, Mastantuono ka thyer rekordin që mbahej nga Lionel Messi.

Ylli argjentinas i Barcelonës kishte realizuar het-trikun e tij të parë në La Liga në mars të vitit 2007, kur ishte 19 vjeç e 259 ditë.

Kështu, Mastantuono jo vetëm që hyri në historinë e futbollit argjentinas, por u bë edhe lojtari më i ri në histori që realizon het-trik me Fiorentinën.

Me këtë rekord, ai tashmë ka lënë pas disa emra të mëdhenj të futbollit argjentinas.

Jose Mourinho duket se ka identifikuar problemin kryesor të Real Madridit pas fitores së vështirë ndaj Interit në Ligën e Kampionëve. Trajneri portugez kërkon më shumë kontroll në mesfushë dhe zgjidhjen e sheh te Bernardo Silva.

Sipas “Marca”, Mourinho dëshiron të nxjerrë versionin më të mirë të mesfushorit portugez, i cili deri tani nuk ka arritur të ketë ndikimin e pritur te “Los Blancos”.

Real Madridi e vuajti ndjeshëm mungesën e Bernardo Silvas ndaj Interit, pasi portugezi ishte i suspenduar. Në një ndeshje që u zhvillua me ritëm të lartë dhe shumë hapësira, madrilenët patën vështirësi për ta kontrolluar lojën.

Pikërisht për këtë arsye, Mourinho beson se Bernardo mund të jetë një nga çelësat për ta zgjidhur problemin.

32-vjeçari iu bashkua Real Madridit si lojtar i lirë pas largimit nga Manchester City, por deri tani nuk është shndërruar në një prej futbollistëve kryesorë të skuadrës.

Megjithatë, Mourinho nuk dëshiron të kërkojë domosdoshmërisht një zgjidhje të re në merkato. Trajneri portugez beson se e ka atë brenda skuadrës.

Real Madridi dështoi të transferonte Rodrin gjatë verës dhe tashmë përgjegjësia mund t’i besohet më shumë Bernardo Silvas.

Përvoja, qetësia me topin dhe aftësia për ta mbajtur posedimin janë cilësi që Mourinho i konsideron të rëndësishme për një skuadër që synon të dominojë ndeshjet e mëdha.

Kështu, sfida e radhës për Bernardo Silvan është të bindë Mourinhon se mund të jetë lideri që i mungon mesfushës së Real Madridit.

Gjykata Penale e Parisit ka dënuar me nëntë vite burg Ilyas Kherbouch, i njohur me nofkën “Ganito”, për rolin e tij në grabitjen e dhunshme të Gianluigi Donnarummas dhe partneres së tij, Alessia Elefante, në korrik të vitit 2023.

Kherbouch, 21-vjeçar, është shpallur fajtor për organizimin e operacionit kriminal dhe krahas dënimit me burg, është urdhëruar të paguajë edhe një gjobë prej 80 mijë eurosh.

Ngjarja kishte ndodhur në banesën e Donnarummas në Paris, në kohën kur portieri italian ishte pjesë e Paris Saint-Germainit.

Donnarumma dhe Elefante u përballën me një natë tmerri, pasi u sulmuan dhe u neutralizuan nga grabitësit. Autorët arritën të largoheshin me sende me vlerë rreth 1 milion euro, përfshirë ora luksoze, bizhuteri, para të gatshme dhe çelësa të automjeteve.

Në atë kohë, Alessia Elefante ishte shtatzënë dhe pak kohë pas ngjarjes pësoi një abort, duke e bërë edhe më të rëndë pasojën e grabitjes.

Dënimi nuk ishte i njëjtë për të gjithë të akuzuarit. Moktar Diop është dënuar me pesë vite burg, ndërsa dy prej tyre janë pezulluar. Në anën tjetër, Khyan Mamouni, të cilin prokuroria e kishte cilësuar si një prej organizatorëve kryesorë, është shpallur i pafajshëm dhe është liruar.

Gjatë procesit gjyqësor, i zhvilluar më 10 dhe 11 shtator, pati edhe momente tensioni. Seanca u ndërpre përkohësisht pas fyerjeve dhe kërcënimeve të bëra nga Kherbouch.

21-vjeçari kishte arritur të arratisej nga burgu i Villepinte në mars, por më pas u kap sërish nga autoritetet.

Donnarumma dhe partnerja e tij nuk morën pjesë në procesin gjyqësor.

Barcelona ka nisur të planifikojë të ardhmen dhe në klub duket se kanë një emër të preferuar për stolin pas përfundimit të epokës së Hansi Flickut. Bëhet fjalë për Cesc Fabregasin, aktualisht trajner i Comos.

Sipas raportimeve të “AS”, trajneri spanjoll është kandidati kryesor i drejtuesve katalanas për vitin 2028, kur Flickut i përfundon kontrata me Barcelonën.

Madje, raportohet se kontaktet e para mes palëve tashmë kanë nisur. Një përfaqësues i afërt me presidentin Joan Laporta, Alejandro Echevarria, ka udhëtuar drejt Comos, në një lëvizje që shihet si pjesë e planifikimeve për të ardhmen.

Barcelona thuhet se e ka informuar Fabregasin se dyert e klubit do të jenë të hapura për të në vitin 2028.

Plani është afatgjatë, pasi Flick ka kontratë deri në vitin 2028, me mundësi vazhdimi edhe për një sezon tjetër. Në të njëjtën kohë, edhe kontrata e Fabregasit me Comon përfundon më 30 qershor 2028, çka e bën skenarin edhe më interesant.

Fabregasi mori drejtimin e Comos në korrik të vitit 2024 dhe që prej atëherë ka bërë hapa të mëdhenj në karrierën e tij si trajner.

Sezoni i kaluar ishte historik për klubin italian. Como përfundoi në vendin e katërt në Serie A, duke siguruar pjesëmarrjen në Ligën e Kampionëve. Skuadra regjistroi 20 fitore, 11 barazime dhe vetëm shtatë humbje.

Edhe fillimi i këtij sezoni ka qenë pozitiv. Como grumbulloi shtatë pikë në tri ndeshjet e para të kampionatit, ndërsa në debutimin në Ligën e Kampionëve dhuroi një paraqitje spektakolare, duke mposhtur RB Leipzigun me rezultatin 4-1.

Performancat e Fabregasit kanë bërë që vlerësimi për të të rritet ndjeshëm. Presidenti i Comos, Mirwan Suwarso, madje ka bërë një krahasim të bujshëm, duke e cilësuar ndikimin e spanjollit në klub të ngjashëm me atë që pati Johan Cruyff te Barcelona.

Tashmë mbetet të shihet nëse Fabregasi do të vazhdojë të shkëlqejë në Itali dhe, mbi të gjitha, nëse në vitin 2028 do të rikthehet te Barcelona. Por këtë herë, jo si lojtar, por si trajner i skuadrës së tij të dikurshme.

Gjykata e Arbitrazhit Sportiv (CAS) në Lozanë ka aprovuar ankesën e Agron Zeqirit dhe ka anuluar vendimin e World Aquatics ndaj tij, duke rrëzuar akuzat për diskriminim, racizëm, keqpërdorim të pozitës, nepotizëm dhe favorizim.

Sipas Vendimit të CAS-it 2025/A/11534, paneli nuk ka konstatuar parregullsi në veprimet e Agron Zeqirit dhe të Federatës së Notit të Kosovës (FNK). Përkundrazi, është vlerësuar se procesi i selektimit të zhvilluar nga FNK-ja ishte në përputhje me rregullat në fuqi.

Megjithatë, vendimi i CAS-it nxjerr në pah disa parregullsi dhe mospërputhje në procesin e përzgjedhjes së përfaqësuesve të Kosovës për Lojërat Olimpike “Paris 2024”.

Sipas vendimit, në fazën fillestare të kualifikimeve, Mal Gashi dhe Eda Zeqiri ishin sportistët që plotësonin kriteret sipas rregullave të atëhershme. Në garat e zhvilluara në Fukuoka dhe Doha, Eda Zeqiri kishte grumbulluar 682 pikë FINA, duke qenë përpara Hana Beiqit.

Pas heqjes së kushtit kualifikues nga World Aquatics, në fazën shtesë të kualifikimit Hana Beiqi arriti 695 pikë FINA. Mbi këtë bazë, ajo u përfshi në vendimin e FNK-së për pjesëmarrje në Lojërat Olimpike.

FNK-ja më pas propozoi Mal Gashin dhe Hana Beiqin si sportistë, ndërsa Besart Shalën si trajner. Ky propozim iu përcoll KOK-ut dhe World Aquatics përmes sistemit GMS.

Megjithatë, emrat që përfundimisht u dërguan në Paris ishin Adell Sabovic si sportist dhe Astrit Haliti si trajner.

Sipas konstatimeve të CAS-it, Adell Sabovic nuk ishte propozuar nga FNK-ja. Për më tepër, ai nuk kishte përmbushur disa prej kritereve relevante, përfshirë kushtin e rezidencës trevjeçare në Kosovë, ndërsa nuk kishte qenë pjesë e ndonjë klubi sportiv në Kosovë.

Vendimi thekson se, për rrjedhojë, Sabovic nuk kishte qenë pjesë e sistemit sportiv të Kosovës të menaxhuar dhe njohur nga institucionet kompetente sportive. Gjithashtu, lidhja e tij me Kosovën ishte krijuar në një periudhë të afërt me procesin e pjesëmarrjes në “Paris 2024”, ndërsa shtetësinë e Kosovës e kishte marrë në funksion të pjesëmarrjes në Lojërat Olimpike.

Në anën tjetër, Mal Gashi, i cili ishte një nga sportistët e kualifikuar dhe kishte grumbulluar më së shumti pikë FINA në kategorinë e meshkujve në Kosovë, nuk u dërgua në Lojërat Olimpike.

Parregullsi janë evidentuar edhe në përzgjedhjen e trajnerit. FNK-ja kishte propozuar Besart Shalën, i cili kishte më shumë pikë se Astrit Haliti, por KOK-u vendosi që në Paris të dërgonte Halitin.

CAS ka sqaruar se përgjegjësia për vendimin përfundimtar lidhur me pjesëmarrjen e sportistëve në Lojërat Olimpike i takon KOK-ut, në bashkëpunim me propozimet e federatës përkatëse sportive.

Në këtë rast, sipas konstatimeve të paraqitura në vendim, FNK-ja nuk ishte njoftuar për ndryshimin e emrave dhe nuk i ishte dorëzuar vendimi i Bordit Ekzekutiv të KOK-ut, pavarësisht kërkesave të saj.

Sipas Statutit të KOK-ut, Bordi Ekzekutiv është organi kompetent për të vendosur për sportistët që përfaqësojnë Kosovën në Lojërat Olimpike.

Barcelona duket se e ka të qartë një prej emrave që mund të marrë drejtimin e skuadrës në të ardhmen. Mikel Arteta vazhdon të jetë një nga opsionet e preferuara të klubit katalanas për pasuesin e Hansi Flickut.

Sipas gazetarit Graeme Bailey, në Barcelonë ende besojnë se një ditë mund të ulen në tavolinë me Artetën dhe ta bindin trajnerin e Arsenalit për të marrë drejtimin e skuadrës.

Arteta prej kohësh është përmendur si një kandidat potencial për pankinën e Barcelonës, ndërsa drejtuesit e klubit vlerësojnë veçanërisht filozofinë e tij të futbollit, mënyrën e punës dhe profilin që përputhet me idetë e klubit katalanas.

Megjithatë, për momentin nuk ka asnjë sinjal për një ndryshim në pankinë. Hansi Flick vazhdon të jetë trajneri i Barcelonës dhe drejtuesit e klubit nuk kanë marrë ndonjë vendim për të ardhmen e tij.

Arteta mbetet kështu një emër për të ardhmen, me Barcelona-n që vazhdon ta monitorojë situatën e trajnerit spanjoll te Arsenali.

FIFA ka reaguar pas deklaratave të presidentit të Federatës Marokene të Futbollit, Fouzi Lekjaa, i cili kishte bërë të ditur se Maroku do të presë finalen e Kupës së Botës 2030.

Lekjaa kishte deklaruar se ndeshja për trofeun e madh do të zhvillohej në Marok, në një edicion historik të Botërorit që do të organizohet nga Maroku, Spanja dhe Portugalia.

Megjithatë, FIFA ka hedhur poshtë çdo konfirmim të tillë, duke sqaruar se deri në këtë moment nuk është marrë asnjë vendim zyrtar për stadiumin apo qytetin që do të presë finalen e Kupës së Botës.

Edicioni i vitit 2030 do të jetë i veçantë, pasi turneu do të zhvillohet kryesisht në Marok, Spanjë dhe Portugali, ndërsa tri ndeshjet e para do të luhen në Argjentinë, Uruguai dhe Paraguai, në kuadër të festimeve për 100-vjetorin e Kupës së Botës.

Pavarësisht deklaratave të Lekjaa-s, FIFA ka bërë të qartë se gara për të pritur finalen mbetet ende e hapur dhe se vendimi përfundimtar nuk është marrë.

Nuk është hera e parë që FIFA detyrohet të sqarojë situatën rreth finales së Botërorit 2030. Më herët, institucioni më i lartë i futbollit botëror kishte mohuar edhe raportimet se presidenti Gianni Infantino i kishte premtuar Marokut organizimin e finales në këmbim të mbështetjes politike për rizgjedhjen e tij në krye të FIFA-s.

Për momentin, pra, finalja e Botërorit 2030 mbetet pa një adresë zyrtare.

US Open për femra ka hyrë në aktin e fundit. Në finalen e madhe të turneut të fundit Grand Slam të vitit do të përballen Aryna Sabalenka dhe Elena Rybakina, në një duel që pritet të jetë spektakolar në Nju Jork.

Sabalenka ishte e para që siguroi një vend në finale. Numri një aktual i botës nuk pati shumë probleme ndaj amerikanes Jessica Pegula, të cilën e mposhti në dy sete, 7-5 dhe 6-2.

Bjellorusja do të kërkojë tashmë trofeun, por finalja do të ketë një tjetër rëndësi për të. Pavarësisht se e nis turneun si numri një në renditjen WTA, Sabalenka do ta humbasë kreun e klasifikimit nga e hëna, pasi Rybakina do të ngjitet në majën e renditjes.

Kazakja siguroi finalen pas një përballjeje të fortë me Coco Gauff. Rybakina nuk e nisi mirë takimin, duke humbur setin e parë 3-6, por ndryshoi ritmin në vazhdim dhe fitoi dy setet e radhës 6-4, 6-4, duke përmbysur gjithçka dhe duke prerë biletën për në finalen e madhe.

Tashmë gjithçka është gati për duelin Sabalenka-Rybakina. Dy tenistet do të luftojnë për trofeun e US Open, por përballja e së shtunës do të jetë edhe një duel direkt për supremacinë në tenisin botëror.

Mërgim Pefqeli është shpallur “Ylli i Javës” për xhiron e pestë të Albi Mall Superligës.

Federata e Futbollit e Kosovës, në bashkëpunim me sponsorin zyrtar të Superligës, Albi Mall, ka ndarë çmimin tradicional për futbollistin më të dalluar të kësaj xhiroje.

Pefqeli, që aktivizohet te KF Dukagjini, spikati në fitoren 2:0 ndaj FC Malishevës, ku realizoi edhe një supergol, duke qenë një nga protagonistët kryesorë të suksesit të skuadrës së tij.

Përveç golit të shënuar, mesfushori dha një kontribut të rëndësishëm në lojën e Dukagjinit gjatë minutave që qëndroi në fushë, duke ndihmuar skuadrën të merrte tri pikë të rëndësishme.

Përzgjedhja e “Yllit të Javës” është bërë nga Komisioni i Veteranëve të Futbollit.

Një tjetër vlerësim për paraqitjen e tij të spikatur në xhiron e pestë. Urime, Mërgim Pefqeli!

Trajneri i Fenerbahçes, Ismail Kartal, dha dorëheqjen pas barazimit 1:1 ndaj Romës në Champions League, pasi një tifoz e goditi me shishe në kokë gjatë ndeshjes të enjten mbrëma.

65-vjeçari e bëri të ditur vendimin gjatë konferencës për shtyp pas sfidës në Stamboll, duke deklaruar se po largohej për të mos u kthyer më dhe se e kishte marrë këtë vendim për “t’i hapur rrugë klubit”.

Megjithatë, dorëheqja e Kartalit nuk u pranua nga presidenti i Fenerbahçes, Aziz Yildirim, i cili i dha mbështetjen e tij trajnerit dhe konfirmoi se ai do të vazhdojë të jetë në krye të skuadrës.

“Disa tifozë hodhën një shishe në kokën e trajnerit gjatë ndeshjes. Ai është i shqetësuar për këtë”, deklaroi Yildirim.

“Kam folur me Ismail Kartal. Ai përmendi incidentin me shishen dhe gjithashtu u ankua se është nën presion të madh.”

I pyetur nëse Kartal i kishte komunikuar se do të qëndronte në detyrë, presidenti u përgjigj: “Nuk ka nevojë që ai të thotë se do të vazhdojë. Unë jam eprori i tij. I kam thënë të vazhdojë dhe kaq. Ne jemi një familje”.

Yildirim foli gjithashtu për presionin e madh që po përjetojnë trajneri dhe skuadra, pavarësisht se Fenerbahçe ka arritur objektivin e parë të sezonit, rikthimin në Champions League.

Tashmë mbetet për t’u parë nëse kjo situatë do të ndikojë te Kartal dhe skuadra në vazhdim të sezonit, apo nëse mbështetja e presidentit do të mjaftojë për të qetësuar situatën në klub.