Author: Ardiana Jashari

Sipas Rashit Qalajt nga Partia Demokratike e Kosovës, kandidati i Lëvizjes Vetëvendosje për të udhëhequr me kryeqytetin, Hajrulla Çeku, e sheh Prishtinën përmes Google Maps.

Sipas Qalajt, kandidati i PDK-së, Uran Ismaili, është kryetari adekuat për të udhëhequr Prishtinën në katër vitet e ardhshme.

“Prishtina, kryeqendra e Kosovës – besoj që janë tre kandidatë, vetëm njëri nga ta është nga Prishtina, i lindur në Prishtinë.
Pra, vetëm Uran Ismaili është një njeri i cili ka lindur në Prishtinë, është rritur në Prishtinë, frymon në Prishtinë, është duke u ballafaquar me nevojat e qytetarëve dhe duke premtuar e duke gjetur mënyra se si ato të realizohen në mënyrën më të mundshme,” deklaroi Qalaj.

I pyetur nëse është standard që një kandidat të jetë i lindur dhe i rritur në qytetin ku kandidon për postin e kryetarit, Qalaj u përgjigj kështu:

“Nuk është standard që një kandidat të jetë i lindur e rritur në një qytet, por është kushti kryesor,” tha ndër të tjera Qalaj.

Për më shumë detaje klikoni videon më poshtë.

Arjeta Rexhepi nga Lëvizja Vetëvendosje ka ironizuar me Rashit Qalën, pasi ky i fundit u deklarua se e gjithë Kosova do të jetë përkrahëse e Partisë Demokratike të Kosovës.

“Nga kolegu dëgjova se krejt Kosova do të jetë me PDK, por e përmendi edhe vetë që nuk e përmendi që qeverisën nga VV, dmth e kanë pranu faktin se do të qeverisen nga VV e në mesin e tyre gjithsesi se do të jetë Shtimja. Sot vij nga Shtimja me një vizitë gjatë fushatës dhe aty kuptoj se gjatë qeverisjes në fillim të mandatit, kur e ka marrë Qemajli, ka gjetur vetëm një çerdhe, sot janë funksionalizuar 6,” tha Rexhepi.

Madje, sipas saj, është mirë që qytetarët e kanë vërejtur keqqeverisjen e PDK-së në Shtime.

“Më vjen mirë që qytetarët e kanë vërejtur se qeverisja e PDK-së ka stërzgjatur dhe është dashtë të largohet shumë më herët. Është mirë që është ndërruar,” deklaroi Rexhepi.

Sipas Rexhepit, është e padiskutueshme që Gjilanin ta fitojë prapë kandidati i VV-së, Alban Hyseni, madje pa balotazh.

Për më shumë detaje klikoni videon më poshtë.

Kryetari i Drenasit, Ramiz Lladrovci që po garon edhe për një mandat tjetër si kryetar në kuadër të iniciativës “Për Drenasin Kampion me Ramiz Lladrovcin”, ka vazhduar t’i takojë banorët e kësaj komune.

Së fundmi ai ka qenë në Gradicë dhe Likoshan, i shoqëruar me Naim Gjelin dhe kandidatët për Kuvendin e Komunës.

Sipas postimit të bërë në Facevook, Lladrovci thotë se cdo ditë po bashkëbisedon me qytetarët rreth arritjeve të pushtetit lokal, projektet në zbatim si dhe për projektet kapitale në të ardhmen.

“Me dëgjimet buxhetore, ne kemi evidentuar nevojat e qytetarëve, projektet me prioritet si dhe ngritjen e cilësisë së jetës, për qytetarët kampionë. Ne nuk do të ndalemi duke i shërbyer qytetarëve me të gjitha mundësitë e përgjegjësitë që i kemi, duke respektuar barazinë para ligjit, gjasat e mundësitë e barabarta “Për Drenasin Kampion”, për 101 arsye. Qytetarët e Gradicës e Likoshanit, me praninë e jashtëzakonshme në tubime, dëshmojnë se janë krenar me kontributin për çlirim dhe shtetndërtim, andaj, meritojnë të gjitha të mirat që i ofron liria e Kosovës dhe pushteti lokal.” – ka shkruar mes tjerash Lladrovci.

Gjatë kësaj jave, përvec Gradicës dhe Likoshanit, Lladrovci ka takuar edhe banorët e Arllatit.

Lladrvoci thotë se në takim me ta, theksoi se qeverisja e tij ishte gjithëpërfshirëse, ka realizuar dhe realizon kërkesat e qytetarëve pa dallim, duke mirëpritur idetë për zhvillimin e mëtejmë të Drenasit, zemrën e Kosovës.

“E kemi pritur që komuna jonë të bëhet mikpritëse e kërkuesve të votës që na vizitojnë vetëm për zgjedhje, kemi qenë dhe jemi bukëdhënës, me nderim i presim e përcjellim, por, më 12 tetor, qytetarët kampionë e kanë adresën me 101 arsye “Për Drenasin Kampion”.”- thuhet mes tjerash në njoftimin e LLadrovcit.

Për më shumë detaje klikoni videon më poshtë.

Hapësira të gjelbra për Prishtinën është njëri prej premtimeve të kandidates për kryeqytet nga Partia SocialDemokrate, Besa Shahini.

Sipas saj në disa pjesë të Prishtinës do të mbjellën 100 mijë pemë.

Një ndër arsyet se këto pemë duhet të mbjellën, sipas kandidatës Shahini është ajri i papastër dhe temperaturat e larta.

Takime me qytetarë ka zhvilluar kandidati i PSD-së, për Kamenicë, Qëndron Kastrati. Në Krilevë ai u takua me disa banorë, ku më pas ai tha se ata e dëshmuan se janë të vendosur për përparim.

Veç tyre, Kastrati ka takuar edhe qytetarë të tjerë të Kamenicës ku dëgjoi hallet për çka tha se në krye me të do t’i zgjidhin ato së bashku.

Për më shumë detaje klikoni videon më poshtë.

Kandidati i Partisë Demokratike të Kosovës, për Prishtinën Uran Ismaili ka takuar disa qytetarë e biznese në Lagjen e Muhaxhereve. Derisa u zotua për mbështetje, tha se Prishtinës i duhet ndryshim.

Po ashtu në ditën e 12-të të fushatës zgjedhore, pas takimit me disa vajza e gra, Ismaili premtoi se 50 % e kabinetit të tij qeverisës do të jenë gra.

Takime elektorale ka zhvilluar edhe kandidati për Drenasin, Petrit Hajdari. Të mërkurën ai vizitoi shtëpinë e Lec Gradicës, mjekut të luftës. Ai vlerësoi lartë kontributin e tij.

Ndërsa nga takimet në Tërdevec, Hajdari tha se me qeverisjen e PDK-së, edhe ky fshat si krejt Drenasi, do të jetë krenar me shërbimet që merr.

1 mijë euro bursë si dhe kurse falas për disa fusha për studentët e rinj ka premtuar kandidati për Gjilanin Riad Rashiti. Sipas tij me programin “Rinia në Punë”, komuna do të subvencionojë krijimin e vendeve të reja të punës për të rinjtë që punësohen për herë të parë.

Një biznes të Istogut e ka vizituar kandidati Ali Nimanaj. Ai tha se me qeverisjen e tij do të ndihmohen bizneset pasi siç tha “aty ku biznesi fuqizohet, edhe Istogu fiton!”

Kandidati për Mitrovicën e Jugut, Arian Tahiri të mërkurën vizitoi Klubin e futbollit Trepça ’89. Sipas Tahirit klubet sportive meritojnë përkrahje.

Tahiri gjatë ditës zhvilloi takime edhe me qytetarë në lagje të ndryshme të qytetit, duke thënë se Komuna do të ketë shërbime më të mira, nëse PDK-ja i fiton zgjedhjet.

E në vizitë një fermeri të Lipjanit i shkoi kandidati Shukri Buja. Ai premtoi mbështetje për bujqësinë duke thënë se do të jetë pikë e fortë e komunës.

Votë për një mandat tjetër në krye të Ferizajt po kërkon edhe Agim Aliu.

Ndërsa bashkpartiaku në Vushtrri përuroi çerdhen në Stanoc të Epërm duke premtuar se arsimit do t’i jap prioritet edhe në katër vjetet e ardhshme.

Rëndësi të veçantë e përkrahje do të kenë gratë e vajzat e Kacanikut, thotë kandidati i PDK-së, Sabedin Vishi. Në takim me to, ai thotë se programi i qeverisjes së tij ka pika të forta për ndryshim dhe arritje.

Ndërsa mbështetje për veteranët e UÇK-së, ka premtuar kandidati për Fushë-Kosovë Rrahim Tërnava.

Për më shumë detaje klikoni videon më poshtë.

Në ditën e 12-të, prizrenaseve iu premtua mësimi gjithë ditor për fëmijët e tyre, nga kandidatja për kryetare të Prizrenit Albulena Balaj Halimaj.

Përmes këtij premtimi Halmiaj, tha se po synon shkolla cilësore për fëmijët.

Në anën tjetër, Bashkpartiaku i saj, që po garon edhe për një mandat tjetër për të qeverisur me Malishevën, votën ua kërkoi banorëve të fshatrave Balinca e LLazica. Për çka tha se mori mesazhe të qarta nga ta se do të fitojnë më 12 tetor.

Xhevahire Izmaku, gruaja e vetme që kandidon për kryetare në komunën e Vushtrrisë, nga radhët e Nismës, është takuar me familjarë të kandidatëve për asamble komunale.

Ajo kërkoi mbështetje nga ta, në zgjedhjet e 12 tetorit.

Në Gjilan ani pse nuk kanë kandidat për të udhëhequr me komunën, të martën në mbrëmjë mbështetje për kandidatët për asamble, shkoi për të kërkuar kryetari i Nismës, Fatmir Limaj.

Para gjilanasve, u prezantua edhe ekipi garues për ulëset në kuvendin komunal, për të cilët u tha se janë të ndershëm e të vendosur, të bashkuar për ta kthyer zërin e qytetit në institucionet komunale.

Bartësi i listës në këtë komunë, Ismet Hajdini, premtoi se lista e tyre do të jetë zëri i cdo lagjeje e familjeje që kërkon përfaqësim dinjitoz dhe vendimmarrje të drejtë.

Për më shumë detaje klikoni videon më poshtë.

“Kryeqytetin do ta brendojmë si qytet i inovacionit dhe rinisë” – ky ishte njëri nga premtimet e bëra nga kandidati i Vetëvendosjes për Prishtinën, Hajrulla Ceku, pas takimit që zhvilloi me përfaqësuesit e një kompanie teknologjike.

“Sipas vizionit tonë, Prishtina 2035 do të jetë me njësi të veçantë për TIK brenda Komunës, e cila i ka digjitalizuar shërbimet duke i bërë efikase dhe transparente.”- ka thënë mes tjerash Ceku.

Premtime për turizëm dhe bujqësi, ka dhënë në ditën e 12-të të fushatës elektorale, kandidati për Gjakovën Ardian Gola.
Derisa lundruan përgjatë lumit të Drinit bashkë me disa deputetë të Vetëvendosjes, Gola tha se synim I tij është shfrytëzimi i këtij potenciali ujor.

Falenderues për mbështetjen ishte kryetari aktual i Podujevës, Shpejtim Bulliqi i cili në takime të ndryshme me qytetarë po premton se do të punojë për të gjithë pa dallim.

Jashtë Kosovës doli për të marrë përkrahjen e bashkfshatarëve, kryetari aktual i Kamenicës, Kadri Rahimaj. Ai thotë se takoi diasporën duke kërkuar kështu mbështetje që të jetë kryetar edhe për katër vjet.

Ndërkaq Alban Hyseni, thotë se do të përkushtohet që çdo sfidë e personave me aftësi të kufizuara të zgjidhet.
Hyseni ndau edhe një video ku tregoi se në fushën e shëndetësisë investoi mbi 2 milionë euro.

Pikat e programit për gratë i shpalosi kandidati për kryetar të Mitrovicës së Jugut, Faton Peci. Në takim me vajza e gratë Peci tha se një nga prioritetet do të jetë banimi i përballueshëm social për nënat vetëushqyese.

Çaj e muhabet gjatë të mërkurës bëri kandidati për Prizrenin Artan Abrashi. Mbështetje për Abrashin kërkoi nënkryetari i Vetëvendosjes, Glauk Konjufca.

Kandidati për Ferizaj, Enver Haliti prezantoi projektin për çerdhe rrethore japoneze.

Veç Arsimit, Haliti premtoi mbështetje dhe zhvillim edhe për fushën e sportit.

Ndërkaq shëndetësia do të jetë prioritet për Taulant KElmendin nëse arrin të bëhet kryetar i Pejës.

Për më shumë detaje klikoni videon më poshtë.

Përparim Rama i cili po synon edhe një mandat tjetër si kryetar i Prishtinës, thotë se do të vazhdojë të punojë në të mirë të qytetarëve, duke ndarë kështu në Facebook punimet e finalizuara tek parku i Ulpianës.

Punësim dhe përfshirje aktive për rininë po premton kandidati i Lidhjes Demokratike të Kosovës për Gjilanin, Arbër Ismajli. Gjatë të mërkurës ai shpalosi programin e tij për rininë e Gjilanit, ku mes tjerash thekson se do t’i mbështesë edhe financiarisht për idetë e tyre kreative.

Në takim me banorë të fshatrave të Istogut, kryetari aktual i cili po synon edhe një mandat tjetër Ilir Ferati tha se edhe në mandatin e ardhshëm planet e përbashkëta me qytetarë do t’i shndërrojmë në punë të dukshme.

Ndërkaq mbështetje të merituar për bizneset, ka premtuar kandidati për Mitrovicën e Jugut Gezim Plakolli. Në ditën e 12-të të fushatës zgjedhori ai vizitoi disa biznese të ndryshme duke premtuar se hallet do t’I zgjidhin së bashku.

Duke i cilësuar si shtyllë të shoqërisë, kryetari që po synon edh 4 vjet tjera në krye të Obiliqit, Xhafer Tahiri, tha se do të vazhdojë t’i mbështesë gratë.

Arsimi do të jetë një nga prioritet e qeverisjes së tij, nëse prizrenasit ia besojnë votën Driton Selmanajt. Përveç se tha se do ta aplikojë mësimin gjithditor ai premtoi edhe “Kuzhinën Qendrore”.

Kandidati për Ferizaj, Visar Azemi ka vazhduar takimet me qytetarë duke premtuar se do të bëjë më shumë hapësira të gjelbra si dhe ujë të pijshëm rregullisht.

E Fatmir Ademaj që po synon të jetë kryetar i Malishevës zotohet se do ta zhvillojë komunën e në çdo projekt do të ketë transparencë.

Tubimin kryesor gjatë të mërkurës, LDK-ja e mbajti në Gjakovë, ku u prezantua plani qeverisës nga kandidati Shefqet Shehu.

Për më shumë detaje klikoni videon më poshtë.

Risi në fushën e arsimit kulturës dhe shkencës premtoi, kandidati për kryetar të komunës së Lipjanit, Ardian Bytyqi nga Lista Guxo, duke u zotuar se me qeverisjen e tij do të formohet një drejtori e veçantë.

“Do të jem kryetari i parë në rajon i cili do të formoj drejtorin për Programim, Kodim dhe Intelegjencë Artificiale. E Ardhmja ndërtohet me dije, teknologji dhe përkrahje reale,” deklaroi Bytyqi.

Përveç kësaj Bytyqi u zotua se do të shpërblejë me bursa nxënësit dhe studentët e të gjitha drejtimeve.

Nxënësi më i mirë i klasës do të shpërblehet me 200 euro, nxënësi më i mirë i vitit 1 mijë euro, 500 euro dhe bursë për studime.Transport falas dhe praktikë me pagesë për përvojë të vërtetë pune, digjitalizimi i plotë dhe databazë unike për të gjithë studentët,” deklaroi Bytyqi.

Bytyqi pati edhe kritika për qeverisjen aktuale.

Sipas Bytyqit që nga pas lufta nuk është investuar në banesat kolektive të qytetit, hyrjet dhe çatitë e tyre janë në gjendje të rënduar dhe banorët janë detyruar që vetë t’i mirëmbajnë.

Edhe bartësja e listës në Prishtinë nga GUXO, Jeta Statovci ka zhvilluar gjatë këtyre ditëve takime elektorale. Ajo ka takuar përfaqësues të bizneseve e organizatave të ndryshme, duke iu premtuar atyre se do të jetë zë i fuqishëm në Asamble të kryeqytetit.

Për më shumë detaje klikoni videon më poshtë.