ATV

Tag: Situata në veri

  • Miratohet rezoluta, Kuvendi dënon sulmin terrorist në Banjskë

    Miratohet rezoluta, Kuvendi dënon sulmin terrorist në Banjskë

    Kuvendi i Kosovës me 97 vota për ka miratuar rezolutën që dënon sulmin terrorist ndaj Policisë së Kosovës më 24 shtator në Banjskë të Zveçanit, ku mbeti i vrarë rreshteri policor, Afrim Bunjaku.

    Pas koordinimit ndërmjet pozitës dhe opozitës, tekstin e rezolutës e paraqiti kryetari i Kuvendit, Glauk Konjufca, ku mes tjerash kërkohet nga faktori ndërkombëtar të ballafaqojë Serbinë me rolin e saj në raport me organizimin dhe mbështetjen që i ka bërë këtij grupi.

    Aty i ofrohet mbështetje Policisë së Kosovës për ushtrimin e detyrave të saja në tërë territorin e Kosovës.

    Po ashtu i bëhet thirrje Qeverisë së Kosovës që të punojë me aleatët ndërkombëtarë, si dhe kërkohet nevoja për një hetim ndërkombëtar ndaj Serbisë në lidhje me organizimin e aktiviteteve terroriste.

    “Duke marrë për bazë gjendjen e sigurisë që po kalon vendi pas sulmit terrorist të organizuar nga Republika e Serbisë ndaj sovranitetit shtetëror dhe integritetit territorial të Kosovës, duke vlerësuar rëndësinë e ruajtjes dhe mbrojtjes së sovranitetit shtetëror dhe integritetit territorial të Kosovës si dhe përcaktimin dhe angazhimin tonë shtetëror për t’i kontribuar paqes dhe stabilitetin në rajon, të vendosur që Republika e Kosovës që të jetë vend i lirë dhe demokratik dhe atdhe i qytetarëve të saj të cilëve iu garantohen të drejtat, liritë dhe barazia ndaj ligjit. Të përkushtuar për të luftuar dhe parandaluar me mjete kushtetuese dhe ligjore çfarëdo veprimi dhe përpjekje që cenon, rrezikon dhe sulmon rendin kushtetues të Kosovës, Kuvendi i Kosovës e dënon me termat më të ashpër sulmin terrorist mbi Policinë e Kosovës me datë 24 shtator 2023, si dhe kërkon nga faktori ndërkombëtar që të ushtrojë ndikimin e tij për ta ballafaquar Serbinë me rolin e saj në raport me organizim dhe mbështetjen e çfarëdo llojshme që i ka bërë grupit terrorist për sulmin në veri të Republikës së Kosovës. Vlerëson punën dhe angazhimin e rezultateve të jashtëzakonshme të institucioneve të sigurisë së Kosovës dhe institucioneve partnere të sigurisë EULEX dhe KFOR për t’i zmbrapsur dhe asgjësuar sulmet terroriste të organizuara nga Serbia”, tha Konjufca.

    Në këtë rezolutë po ashtu theksohet nevoja për pluralizëm politik në komunitetin serb në Kosovë.

    REZOLUTA E PLOTË:

    – Duke marrë për bazë gjendjen e sigurisë nëpër të cilën po kalon vendi pas sulmit terrorist të organizuar nga Republika e Serbisë ndaj sovranitetit shtetëror dhe intergritetit territorial të Republikës së Kosovës;

    – Duke vlerësuar rëndësinë e ruajtjes dhe mbrojtjes së sovranitetit shtetëror dhe intergritetit territorial të Republikës së Kosovës si dhe përcaktimin dhe angazhimin shtetëror për t’i kontribuuar paqes dhe stabilitetit në rajon;

    – Të vendosur që Republika e Kosovës të jetë vend i lirë, demokratik, paqedashës dhe atdhe i qytetarëve të saj, të cilëve ju garantohen të drejtat, liritë dhe barazia para ligjit;

    – Të përkushtuar për të luftuar dhe parandaluar me mjete kushtetuese dhe ligjore çfarëdo veprimi dhe përpjekje për të cënuar, rrezikuar apo sulmuar rendin kushtetutes të Republikës së Kosovës;

    Kuvendi i Republikës së Kosovës

    1. DËNON me termat më të ashpër sulmin terrorist të organizuar nga Republika e Serbisë mbi Policinë e Kosovës më datën 24 shtator 2023, si dhe kërkon nga faktori ndërkombëtar që të ushtroj ndikimin e tij për ta ballafaquar Serbinë me rolin e saj në raport me organizimin dhe mbështetjen e çdo llojshme që i ka bërë grupit terrorist për sulmin në veri të Republikës së Kosovës;

    2. VLERËSON punën, angazhimin dhe rezultatet e jashtëzakonshme të institucioneve të sigurisë së Republikës së Kosovës dhe të institucioneve partnere ndërkombëtare të sigurisë (Eulex dhe KFOR), në aksionin e përbashkët për të zmbrapsur dhe asgjësuar sulmet terroriste të organizuara nga Serbia në veri të vendit;

    3. OFRON mbështetjen e plotë dhe të pa rezervë për Policinë e Kosovës në ushtrimin e përgjegjësisë për ruajtjen e rendit dhe sigurisë publike në tërë territorin e Republikës së Kosovës.

    4. KËRKON nga të gjitha institucionet e Republikës së Kosovës që të vazhdojnë punën e përbashkët për integrimin e plotë dhe bashkëjetesën mes të gjitha komuniteteve pa dallim që jetojnë në Republikën e Kosovës;

    5. INKURAJON dhe MBËSHTET pluralizimin politik në radhët e komunitetit serb në Kosovë, zhvillimi i të cilit mundëson progresin demokratik dhe rrit transparencën e llogaridhënien para këtij komuniteti dhe jetëson promovimin e interesave reale të tij në Republikën e Kosovës.

    6. KËRKON nga Qeveria e Republikës së Kosovës që të bashkëpunoj me aleatët ndërkombëtarë, veçanërisht me SHBA-të, për të fuqizuar Shtetin e së Drejtës dhe vlerat e përbashkëta euro-atlantike;

    7. KONSTATON nevojën për hetim ndërkombëtar ndaj Republikës së Serbisë lidhur me organizimin e aktiviteteve terroriste dhe vazhdimin e ekzistencës së kampeve stërvitore të grupeve terroriste në territorin e Serbisë.

  • Kështu ishte planifikuar gjithçka nga terroristët serb, detajet e planit i tregon gazetari Jashari

    Kështu ishte planifikuar gjithçka nga terroristët serb, detajet e planit i tregon gazetari Jashari

    Fshati Banjskë në Komunën e Zveçanit është hapur dje për qarkullim, pas përleshjes së armatosur që ndodhi atje të dielën, më 24 shtator, mes Policisë së Kosovës dhe një grupi të armatosur, terrorist serb, me ç’rast mbeti i vrarë rreshteri i Policisë së Kosovës, Afrim Bunjaku dhe dy pjesëtarë tjerë mbetën të lënduar. 

    Mirëpo, pesë ditë pas këtyre ngjarjeve, situata në veri të Kosovës po raportohet e qetë, ani pse, gjurmë të shumta kanë mbetur pas në këtë fshat. Ishte pikërisht Manastiri Ortodoks i Banjskës dhe objektet përreth tij, që u përdor si vendstrehim nga grupi terrorist, pasi vranë policin Bunjaku.

    Autoritetet e Kosovës kanë thënë se nënkryetari i Listës Serbe – partisë më të madhe të serbëve në Kosovë – Millan Radoiçiq i ka organizuar sulmet dhe ka qenë pjesë e tyre. Ato madje e kanë publikuar një pamje me dronë, dhe aty pretendohet se shihet Radoiçiq i armatosur, në mesin e një grupi burrash, po ashtu me armë në duar dhe të veshur me uniforma, i cili po ashtu kërkohet nga autoritetet e Kosovës, për disa vepra penale.

    Gazetari i ATV-së Fatlum Jashari në një lidhje direkte për emisionin “A LIVE”, ka treguar detajet e planit të këtij sulmi./atvlive.tv/

    Raportimin e plotë të gazetarit Jashari e gjeni në videon e mëposhtme:

     

  • Elshani: Policia s’pati qëllim ta vrasë askënd por vetëm çlirimin e këtij vendi nga kriminelët

    Elshani: Policia s’pati qëllim ta vrasë askënd por vetëm çlirimin e këtij vendi nga kriminelët

    Veton Elshani, ka thënë se Policia nuk ka pasur qëllim ta vrasë asnjërin nga sulmuesit në Manastirin e Banjskës, raporton Ekonomia Online.

    Elshani, në një konferencë për medie nga veriu i vendit, ka thënë se qëllimi i Policisë ka qenë vetëm ruajtja e territorit dhe çlirimi i vendit nga kriminelët.

    Tutje, ai ka thënë se hetimet nuk do të përfundojnë për një kohë të gjatë e se zona rreth Manastirit do të qëndrojë e mbyllur nën dyshimet se ka ende mjete të paeksploduara.

    “Hetimet nuk do të përfundojnë edhe një kohë të gjatë sepse edhe për neve është interesante pse është zgjedhur ky vend për sulm dhe cili ka qenë qëllimi i këtyre njerëzve të armatosur. Ndoshta, për shkak që është afër kufirit”.

    “Bastisja ka përfunduar. Ne konsiderojmë që kemi bërë një punë të mirë. Nuk lejohet lëvizja e qytetarëve sepse kemi gjetur shumë mjete të paeksploduara dhe ka mundësi të ketë ende”.

    “Do të kemi njësi tjera speciale. Por, konsiderojmë që rreziku ende nuk ka kaluar”.

    “Ne nuk kemi pasur qëllim t’i vrajmë 30 vetë. Nuk kemi pasur qëllim me e vra asnjë njeri. Qëllimi jonë është që ta ruajmë territorin tonë dhe që ta çlirojmë vendin nga grupet kriminale këtu dhe nëse gjatë këtij procesi ka të vrarë, nuk kemi çfarë të bëjmë”.

    “Fshatarët e këtij fshati nuk kanë qenë të rrezikuar as nuk ka dëme anësorë. I kemi bërë planifikimet tona dhe kjo për neve është çudi”.

    “Do të jetë pjesë e hetimeve nëse kanë bashkëpunuar edhe qytetarët, por nuk mund të them asgjë për këtë. Armatim ka pasur në çdo vend, ka pasur shumë armatim, në zonat e jashtme, rreth shtëpive”.

  • DASh:Kosova e Serbia të bashkëpunojnë me partnerët ndërkombëtarë për depërshkallëzimin e situatës

    DASh:Kosova e Serbia të bashkëpunojnë me partnerët ndërkombëtarë për depërshkallëzimin e situatës

    Departamenti amerikan i Shtetit ka konsideruar se bashkëpunimi me partnerët ndërkombëtarë për depërshkallëzimin e situatës në Kosovë është i nevojshëm.

    Zëdhënësi i DASH-it, Matt Miller, në një konferencë për media të mbajtur të martën ka thënë se për ta qetësuar situatën në veri është e nevojshme që të gjitha palët të punojnë në koordinim me partnerët ndërkombëtarë.

    Kështu u shpreh ai derisa u pyet për qëndrimin e SHBA-së lidhur me propozimin që NATO-ja përmes KFOR-it të marrë kontrollin e plotë mbi veriun e Kosovës për ta parandaluar përshkallëzimin e mëtejshëm.

    “Mendojmë se është e rëndësishme që të gjitha palët të punojnë menjëherë në koordinim me partnerët ndërkombëtarë për të depërshkallëzuar situatën, për të garantuar sigurinë, sundimin e ligjit dhe kthimin në dialogun e ndërmjetësuar nga BE-ja”, ka thënë Miller.

  • The Guardian: Qasja e BE-së për Kosovën s’po funksionon, Borell të mbajë përgjegjësi

    The Guardian: Qasja e BE-së për Kosovën s’po funksionon, Borell të mbajë përgjegjësi

    Gazeta britanike “The Guardian” ka dhënë pikëpamjen e saj për sulmin terrorist në veri, siç i referohet për pikën e nxehtë të Ballkanit, që rezultoi me të vrarë, të plagosur, arrestime e gjetjen e një sasie të konsiderushme armësh e municioni. Në një editorial të publikuar, të ilustruar me fotografinë e kryeministrit Kurti, “The Guardian” konstaton se strategjia e BE-së ndërmjetësuese nuk po funksionon.

    Qasja e shefit të politikës së jashtme Josep Borrell nuk po funksionon shkruan “The Guardian” kur përmend luftimin e ndikimit të Rusisë në Ballkanin Përendimor, pas luftës që ky shtet e nisi në Ukrainë.

    Si rrjedhojë, media britanike duke iu referuar Asociacionit, konstaton se nuk është befasuese që pas zhvillimeve në Ukrianë kryeministri Kurti te këtë dyshime për t’i dhënë “pushtet” serbëve të Kosovës me prirje separatiste në veri.

    “Brukseli dhe Uashingtoni duket se i kanë dhënë përparësi nevojës për të mbajtur Z. Vuçiç në krah, duke pasur parasysh ndikimin rajonal të vendit dhe lidhjet e rëndësishme me Rusinë. Duke vepruar kështu, ata rrezikojnë të neglizhojnë nevojën për të mbrojtur Kosovën nga makinacionet e një fqinji ngacmues dhe shumë më të madh që beson se nuk ka të drejtë të ekzistojë”.

    Editoriali i plotë i “The Guardian”:

    Tensionet në rritje midis Prishtinës dhe Beogradit kanë kulmuar në dhunë. Strategjia ndërmjetësuese e Bashkimit Evropian nuk po funksionon

    Në fundjavë, kryeministri i Kosovës, Albin Kurti, foli i dëshpëruar në lidhje me bisedimet dekadëshe për normalizimin e marrëdhënieve me Serbinë, e cila vazhdon të refuzojë të njohë statusin e pavarur të vendit të tij. Në një intervistë për The Guardian, Kurti pohoi se negociatat e ndërmjetësuara nga Bashkimi Evropian rrezikojnë të arrijnë në një qorrsokak. Menjëherë pas publikimit, pati një konfirmim ogurzi se me të vërtetë është arritur një nadir(pika më e ulët). Në një përshkallëzim serioz të tensioneve, pesë persona, përfshirë një polic kosovar, u vranë pas një prite nga njerëz të armatosur të paidentifikuar pranë kufirit me Serbinë.

    Për BE-në dhe shefin e saj të politikës së jashtme, Josep Borrell, pasojat e dështimit diplomatik shtrihen shumë përtej fatit të skajit verior të Kosovës, me popullsinë e saj shumicë serbe. Në vazhdën e pushtimit rus të Ukrainës, BE-ja ka dyfishuar përpjekjet e saj për të ankoruar Ballkanin Perëndimor brenda orbitës së saj dhe për të luftuar ndikimin e Moskës. Por të shtënat e së dielës tregojnë se në këtë pikë të nxehtë ballkanike, qasja e tij nuk po funksionon.

    Një marrëveshje e dukshme përparimi pranverën e kaluar e detyroi Serbinë të njohë kombësinë e Kosovës në këmbim të fuqive gjysmë autonome për komunat me shumicë serbe në veri. Presidenti i Serbisë, Aleksandar Vuçiq, turpësisht ende nuk e ka nënshkruar marrëveshjen dhe është mburrur publikisht për këtë. Në prill, qeveria e tij kundërshtoi ofertën e Kosovës për anëtarësim në Këshillin e Evropës. Z. Kurti nuk ka ofruar vetë-menaxhimi politik në zonat me shumicë serbe të Kosovës. Ai ka antagonizuar vendasit përmes vendosjes së njësive speciale të policisë dhe kryesoi zgjedhjet lokale të dështuara atje, në të cilat një bojkot çoi në një pjesëmarrje prej 4%.

    Kështu, një vallëzim i përpunuar diplomatik rrezikon të shndërrohet në dhunë serioze. Por për këtë, z. Borell mund të duhet gjithashtu të marrë disa përgjegjësi. Z. Kurti pohon se rënia e besimit në palën kosovare ka rezultuar nga “neutraliteti i humbur” nga ana e të dërguarit special të BE-së, Miroslav Lajčák. Këtë verë, një grup politikanësh të lartë perëndimorë theksuan pothuajse të njëjtën pikë në lidhje me “politikën e Perëndimit në qendër të Beogradit për Ballkanin”.

    Brukseli dhe Uashingtoni duket se i kanë dhënë përparësi nevojës për të mbajtur Z. Vuçiç në krah, duke pasur parasysh ndikimin rajonal të vendit dhe lidhjet e rëndësishme me Rusinë. Duke vepruar kështu, ata rrezikojnë të neglizhojnë nevojën për të mbrojtur Kosovën nga makinacionet e një fqinji ngacmues dhe shumë më të madh që beson se nuk ka të drejtë të ekzistojë. Duke pasur parasysh rrethanat dhe historinë e kohëve të fundit në Ukrainë, nuk është befasuese që z. Kurti të ketë dyshime për t’u dhënë më shumë pushtet serbëve të Kosovës me prirje separatiste në veri. Ndërkohë në sfond, Rusia ka bërë çmos për të nxitur dhe shfrytëzuar paqëndrueshmërinë, ndërsa presidenti serb zakonisht manipulon krizën për të mbështetur mbështetjen nacionaliste në vend.

    Disa shtete të BE-së theksojnë se edhe zoti Kurti ka bërë gabime. Ai ka nxitur në mënyrë të pamatur pakënaqësitë në veri, ku autonomia më e madhe do të jetë në mënyrë të pashmangshme pjesë e çdo zgjidhjeje të suksesshme. Por kjo është një çështje e statusit përfundimtar që duhet të shkojë paralelisht me lëvizjet reale nga Beogradi. BE-ja gjithashtu duhet të rregullojë shtëpinë e saj. Pesë anëtarë të BE-së deri më tani nuk e kanë njohur Kosovën për shkak të një ekuivalence të rreme midis rrethanave të pavarësisë së saj dhe çështjeve të tyre të pakicave. Një Evropë më e bashkuar do të ishte një ndërmjetës më autoritativ dhe efektiv në një rajon të trazuar dhe jetik.

  • Franca dënon sulmin ndaj Policisë së Kosovës: I papranueshëm, autorët të dalin para drejtësisë

    Franca dënon sulmin ndaj Policisë së Kosovës: I papranueshëm, autorët të dalin para drejtësisë

    Franca ka dënuar sulmin ndaj Policisë së Kosovës në veri të vendit, ku mbeti i vrarë rreshteri Afrim Bunjaku.

    Përmes një reagimi, Ministria e Jashtme e Francës ka bërë thirrje që autorët e këtij sulmi të dalin para drejtësisë.

    “Franca dënon ashpër sulmin e papranueshëm ndaj policisë së Kosovës që ndodhi më 24 shtator, duke lënë të vdekur një polic dhe dy të tjerë të plagosur. Franca shpreh ngushëllimet e saj për familjet e viktimave dhe bën thirrje që autorët të dalin sa më shpejt para drejtësisë”, është theksuar në reagim.

    Tutje, Parisi zyrtar ka deklaruar se dialogu i ndërmjetësuar nga Bashkimi Evropian është e vetmja mënyrë “për normalizimin e marrëdhënieve në mes të dy vendeve”.

    “Rëndësia e këtyre ngjarjeve nënvizon nevojën urgjente që Serbia dhe Kosova të veprojnë me përgjegjësi për të ulur tensionet dhe për t’u riangazhuar me mirëbesim në Dialogun e lehtësuar nga BE-ja, i cili është e vetmja mënyrë për të pasur sukses në normalizimin e marrëdhënieve midis dy vendeve dhe t’i lejojë ata të bëjnë përparim drejt BE-së”, është thënë në reagim.

    Në orët e para të mëngjesit të ditës së diel është vrarë rreshteri i Policisë së Kosovës, Afrim Bunjaku, ndërsa janë plagosur edhe policë të tjerë.

    Ngjarja e rëndë ka ndodhur në fshatin Banjskë të Zveçanit ku terroristë serbë kanë sulmuar patrullën policore.

    Katër sulmues kanë mbetur të vrarë ndërsa janë arrestuar gjashtë persona.

    Institucionet e Kosovës kanë deklaruar se aksioni në kërkim të sulmuesve është duke vazhduar.

  • Kurti: Policia në veri tregoi profesionalizëm, u parandalua një skenar kriminal dhe terrorist

    Kurti: Policia në veri tregoi profesionalizëm, u parandalua një skenar kriminal dhe terrorist

    Kryeministri Ablin Kurti, tha se rreshteri Afrim Bunajku, është hero i Kosovës, raporton Ekonomia Online. Sipas tij, të dielën Policia e Kosovës ka treguar profesionalizëm, duke parandaluar një skenar kriminal dhe terrorist.

    Kurti në akademinë komemorative kushtuar Bunjakut, tha se ligjshmëria, kushtetutshmëria, paqja dhe siguria do të jenë gjithmonë dhe çdo herë për gjithsecilin dhe pa dallime.

    “E diela 24 shtatorit na ka mbledhur sot këtu dhe shpirtërisht me gjithë Kosovë për të nderuar jetën dhe veprën e rreshter Afrim Bunjaku”.

    “Dita e sotme është ditë zie në vendin tonë për shkak të pikëllimit për Afrim Bunjakun. Por, e sotmja është edhe dita kur do t’i bëhen nderimet edhe më të mëdha për Afrimin, për Policinë tonë që me veprimet e saj profesionale dhe të guximshme e parandaloi një skenar kriminal dhe terrorist”.

    “Afrim Bunjaku u vra gjatë një sulmi nga një grup terroristësh. Nga dje asgjë nuk mund të jetë më njësoj, faktet dolën , për të parë të vërtetën e rajonit”.

    “Ky reagim i institucioneve tona profesionalisht ka qenë në përputhje me shtetin tonë demokratik dhe perëndimore. Sot përballë fotografisë së portretit të Afrim Bunajkut përkulemi me nderime dhe respekt si dhe zotohemi për drejtësi dhe kujtesë. Ligjshmëri dhe kushtetutshmëri, paqe dhe siguri për të gjithë dhe secilin pa dallim”, tha Kurti.

  • Sarrazin kërkon zgjidhje për zbatimin e Marrëveshjes së Ohrit

    Sarrazin kërkon zgjidhje për zbatimin e Marrëveshjes së Ohrit

    Emisari gjerman, Manuel Sarrazin, tha se duhet ecur përpara në gjetjen e një zgjidhjeje për implementimin e Marrëveshjes së Ohrit.

    Sipas tij, është shumë e rëndësishme situata e sigurisë në veri dhe reagimi për një gjë të tillë duhet të jetë i qartë, raporton Ekonomia Online.

    Sarrazin shtoi se nëse kërkohet zgjidhje për veriun, duhet pasur një dialog të suksesshëm.

    I pyetur në atë se sa është e mundur që dialogu të vazhdojë, Sarrazin tha se nuk ka ndonjë informatë, por që thotë se duhet të punohet nga të dyja palët.

    “Ne mundohemi të bëjmë më të mirën tonë, që të tregojmë se në fund, ne jemi miq të Ballkanit Perëndimor, de duam tu ndihmojë të gjashtë vendeve të Ballkanit Perëndimor në Bashkimin Evropian, dhe kjo është një rrugëtim që do të udhëhiqet nga dialogu. Kancelari im ka qenë i qartë kur vizitoi Prishtinën para një viti e tre muajsh, por sigurisht kultura politike dhe vendimmarrja politike nuk mund të bëhet nga Gjermania, ne mundemi vetëm t’i mbështesim miqtë tanë në marrjen e këtyre hapave. Siç e thash më parë, kjo nuk është dita për të biseduar për këto çështje, por është për të shprehur solidaritet”.

    Dialogu, mund sigurisht të vazhdojë, dhe është e rëndësishme që ne të qëndrojmë në rrugën e të arriturit të implementimit të marrëveshjes së Ohrit. Çka unë dëgjoj në Beograd dhe në Prishtinë është se marrëveshja e Ohrit është një gurthemel që mund të qojë në një drejtim shumë pozitiv të marrëdhënieve. Por siç e shohim, për momentin nuk është duke u implementuar në mënyrë të suksesshme dhe mendoj se ky nuk është momenti që të ndalojmë së përpjekuri që kjo marrëveshje të implementohet në mënyrë të suksesshme. Nuk kam informacion që mund të ndaj me ju, por mendoj se sa kapitali politik do të investoj në dialog do tregojë sa ky dialog do jetë i suksesshëm”.

  • Lajçak shkruan për domosdoshmërinë e dialogut, s’e përmend faktin se sulmuesit e Policisë ishin terroristë serbë

    Lajçak shkruan për domosdoshmërinë e dialogut, s’e përmend faktin se sulmuesit e Policisë ishin terroristë serbë

    Ndërmjetësuesi i BE-së për dialogun, Miroslav Lajçak ka bërë edhe një deklarim tjetër mbi zhvillimet e djeshme në veri ku nga grupet terroriste serbe, mbeti i vrarë një polic kosovar.

    Por, duke mos përmendur fare faktin se sulmi ndodhi nga grupet terroriste të palës serbe, Lajçak flet për domosdoshmërinë e dialogut parandalues të dhunës.

    ’’Me t’u kthyer nga Nju Jorku këtë mëngjes, më takoi lajmi tronditës për një sulm ndaj policëve të Kosovës në veri të Kosovës. Një akt i tillë frikacak i dhunës është thellësisht shqetësues dhe është në kundërshtim me vetë parimet e paqes dhe bashkëpunimit. Zemra ime është për viktimat, familjet, miqtë dhe kolegët e tyre. Ky sulm i tmerrshëm thekson më tej domosdoshmërinë e diplomacisë dhe dialogut parandalues, nënvizuar gjatë javës së kaluar, kur mora pjesë në javën e nivelit të lartë të Asamblesë së Përgjithshme të OKB-së në Nju Jork. Në margjinat e nivelit të lartë, fola me drejtues dhe kolegë të shumtë nga e gjithë bota. Në një mënyrë apo tjetër, ne të gjithë theksuam rëndësinë e dialogut dhe bashkëpunimit.

    Takova gjithashtu gjashtë presidentët nga Ballkani Perëndimor dhe zyrtarë të lartë të OKB-së, për të diskutuar mbi dinamikat rajonale. HR/VP Borrell organizoi gjithashtu një drekë tradicionale të Ballkanit Perëndimor për të harmonizuar mesazhet tona për këtë javë në skenën globale.

    Për të gjetur një rrugë përpara në rajon dhe në veçanti në Dialog, mbajta diskutime strategjike me partnerët tanë amerikanë.

    Këtë vit e vlerësova veçanërisht darkën me ish-kryetarët e Asamblesë së Përgjithshme dhe Presidentin aktual të sesionit të 78-të të Asamblesë së Përgjithshme të OKB-së.

    Ishte e mrekullueshme të kthehesha në OKB, por pas një jave të “takimit të shpejtësisë globale” ishte koha për t’u kthyer në Bruksel. Në ditët në vijim, do të fokusohem plotësisht në gjetjen e një rruge përpara’’, ka shkruar ai.

  • Granata dore e zollë, detaje nga sulmi në veri ku mbeti i vrarë një polic

    Granata dore e zollë, detaje nga sulmi në veri ku mbeti i vrarë një polic

    Në orët e para të mëngjesit të ditës së sotme (e diel) është vrarë një polic i Kosovës, ndërsa një tjetër ka mbetur i plagosur. Lajmi është dhënë nga kryeministri Albin Kurti përmes rrjeteve sociale. Ngjarja e rëndë ka ndodhur në fshatin Banjska të Leposaviqit ku është sulmuar patrulla policore. Policia ka dhënë detaje se si ka ndodhur ngjarja.

    Sipas kronologjisë, ngjarja ka rrjedhur kështu: Gjatë realizimit të detyrave policore, sot rreth orës 02:34 në Mitrovicë Veri, njësia për ndërhyrje të shpejtë e policisë kufitare ka vërejtur se në hyrje të fshatit Bajnskë, në urë janë vendosur dy mjetet të rënda kamion, pa targa, dhe hyrja në këtë fshat përmes urës nuk mund të bëhej, pasi e njëjta ishte bllokuar.

    Njësitë e rendit të Stacionit Policor Zveqan, pas pranimit të informacionit i janë përgjigjur rastit dhe janë nisur me tri njësi në drejtim të lokacionit dhe posa kanë mbërri në afërsi të vendit ku është raportuar bllokada, njësitë policore kanë hasur në rezistencë ku nga disa pozicione të ndryshme janë gjuajtur me arsenal armësh të zjarrit, përfshirë këtu edhe me granata dore dhe zollë, ku si pasojë e gjuajtjeve janë qëlluar me armë zjarri dy zyrtarë policorë.

    Njësitet policore në vetëmbrojtje i janë përgjigjur sulmit dhe kanë arritur që ta zmbrapsin sulmin fillestar për të krijuar kushte për dhënien e ndihmës dhe tërheqjen e kolegëve të qëlluar me armë zjarri.

    Zyrtarët policorë të plagosur janë tërhequr nga lokacioni dhe janë transportuar në Spitalin Rajonal në Mitrovicë Jugu, ku nga mjeku kujdestar është konstatuar vdekja e njërit nga zyrtarët policor të plagosur rëndë, ndërsa dy zyrtarë të tjerë, njëri i plagosur dhe tjetri i lënduar, sipas mjekëve janë jashtë rrezikut për jetë dhe të njëjtit janë transportuar në SHSKUK për trajtim të mëtutjeshëm mjekësor.

    Policia njofton se të gjitha njësitë policore relevante sipas profileve janë aktivizuar në teren, të njëjtat kohë pas kohe janë duke u sulmuar me armë zjarri nga pozicione të ndryshme, nga grupe të organizuara dhe të armatosura.

    “Policia e Kosovës në bashkëpunim dhe koordinim me institucionet kompetente dhe organet e drejtësisë, po ndërmerr veprimet e saja me qëllim të ruajtjes së rendit dhe sigurisë publike si dhe sjelljes para organeve të drejtësisë së kryerësve të sulmeve ndaj zyrtarëve policor”, thotë policia.