ATV

Tag: Policia e Kosovës

  • Sulmohet një pjesëtar i Policisë së Kosovës në Vushtrri

    Sulmohet një pjesëtar i Policisë së Kosovës në Vushtrri

    Policia e Kosovës në raportin 24-orësh ka njoftuar se një pjesëtarë i tyre është sulmuar fizikisht pas mesnatës, në qytetin e Vushtrrisë.

    Sipas raportit të policisë ky sulm kishte ardhur si pasojë pasi të dyshuarit kishin refuzuar që t’i binden urdhrit të Policisë së Kosovës, ku me ç ‘rast njëri nga të dyshuarit e ka sulmuar një zyrtar policor duke i shkaktuar lëndime.

    “Vushtrri, 08.08.2023 – 00:30. Janë arrestuar 3 (tre) të dyshuar meshkuj  kosovarë,  pasi që nuk kanë përfillur urdhrat e zyrtarëve policor e më pas njëri nga të dyshuarit e ka sulmuar një zyrtar policor”, thuhet në raportin e Policisë së Kosovës.

    Tutje, Policia njoftoi se si pasojë e sulmit viktima ka pësuar lëndim trupor, për çka ka pranuar tretman mjekësor, ndërsa të dyshuarit me vendim të prokurorit janë dërguar në mbajtje.

  • Nga sot fillon zvogëlimi i pranisë së Policisë edhe për 25 për qind rreth komunave në Veri

    Nga sot fillon zvogëlimi i pranisë së Policisë edhe për 25 për qind rreth komunave në Veri

    Nga sot do të fillojë zvogëlimi i pranisë së Policisë edhe për 25 për qind në objektet komunale dhe rreth tyre, në veri të Kosovës.

    Vendimi vjen pas një vlerësimi të përbashkët të Policisë së Kosovës, EULEX-it dhe KFOR-it.

    Në njoftim thuhet se ekipet e Policisë, bashkë me EULEX-in dhe KFOR-in, do të vazhdojnë koordinimin dhe do t’i ndërmarrin veprimet e nevojshme, sipas vlerësimit të rregullt të situatës së sigurisë në komunat veriore.

    Qysh më 13 korrik është larguar 25 për qind e Policisë nga objektet komunale dhe rreth tyre, në veri.

  • Policët e rinj serb në veri vazhdojnë punën përkundër kërcenimeve

    Policët e rinj serb në veri vazhdojnë punën përkundër kërcenimeve

    Policët e rinj të Veriut po i bëjnë patrullat e para bashkë me kolegët me përvojë.

    76 zyrtarët e sapopranuar, 46 prej të cilëve janë të komunitetit serb, në vitin e parë do të trajnohen, për t’u ndarë pastaj nëpër sektorë.

    “Atëherë dihet saktë se për çfarë statusi aplikojnë. A do jenë hetues, a patrullë apo njësi të specializuara…”, tha zëvendësdrejtori i Policisë në Mitrovicën e Veriut, Veton Elshani.

    Meqenëse shumica janë serbë, zëvendësdrejtori i policisë, Veton Elshani, beson në efekt pozitiv.

    “Ajo që ne besojmë që do të ndodhë është rritja e efektivitetit dhe efikasitetit të patrullimeve. Meqenëse policët e rinj kanë më shumë qasje në komunitet, në problemet e tyre dhe në zgjidhjen e problemeve të tyre”, tha Elshani.

    Ndërkohë në rrjete sociale në Serbi, janë bërë publike fotografitë e disa prej policëve të rinj, të cilët veç tjerash konsiderohen si tradhtarë.

    Kërcënimet e tilla, megjithëse nuk kanë ndikuar në punë, do të trajtohen seriozisht.

    “Kemi pasur diskutime me kolegët tanë. Nuk shohin kërcënime serioze. Janë më shumë komente sociale nga shtete tjera. Por, nëse kemi kërcënime serioze, do ta marrim me seriozitet dhe do t’i trajtojmë seriozisht. Dhe do marrim veprime”, tha Elshani.

    Ndërkohë, për këtë çështje kanë reaguar kryeministri i Kosovës, Albin Kurti e ambasadori i Shteteve të Bashkuara, Jeff Hovenier.

    “Fushata në platforma sociale që ka për qëllim kërcënimin e frikësimin, janë të papranueshme, edhe pse jemi të bindur se janë të shpërfillura. Ata janë policë të Kosovës sepse janë profesionistë, sepse janë qytetarë që kanë dashurinë për vendin”, tha Kurti.

    “Ndaj plotësisht këto shqetësime. Kërcënimet dhe frikësimet ndaj individëve që shërbejnë për të mirën e të gjithë qytetarëve të Kosovës janë krejtësisht të papranueshme. Siç e kam thënë edhe më parë, Policia e Kosovës ekziston për t’iu shërbyer të gjitha komuniteteve në Kosovë dhe përbërja e saj duhet të pasqyrojë
    diversitetin e Kosovës”, tha Hovenier.

    Konkurset për pranimin e policëve të rinj, po bëhen në vazhdën e zëvendësimit të policëve serbë që kishin dhënë dorëheqje në nëntor të vitit të kaluar. /atvlive.tv

    Edicionin Qendror të lajmeve në ATV e gjeni në videon më poshtë:

  • Reagon ashpër edhe ambasadori Rohde pas linçimit të policëve joshumicë në veri: Absolutisht shqetësuese

    Reagon ashpër edhe ambasadori Rohde pas linçimit të policëve joshumicë në veri: Absolutisht shqetësuese

    Gjatë ditës së djeshme u mor vesh se në veri të Kosovës do të vendoseshin 74 policë të rinj, prej të cilëve 45 i përkisnin komunitetit serb. Menjëherë nga grupe e persona të pandërgjegjshëm nisi fushatë linçimi ndaj tyre. E ndaj tyre fatmirësisht po ka reagime ndërkombëtare.

    I pari që reagoi ishte shefi i ri i EULEX-it, Giovanni Pietro Barbano i cili i shkroi këto fjalë:

    “Jam shumë i shqetësuar me raportimet mediale sa i përket mesazheve kërcënuese ndaj zyrtarëve policorë të Kosovës nga komunitetet joshumicë. Çdo lloj i intimidimit është i papranueshëm, dhe e theksoj rëndësinë që Policia e Kosovës të reprezentojë gjithë popullësinë e Kosovës.”

    E këtë postim e rishpërndau ambasadori gjerman në Prishtinë, z. Jorn Rohde, që e konsideroi fushatën si absolutisht shqetësuese.

    “Pajtohem plotësisht. Kjo fushatë intimiduese është absolutisht shqetësuese. Duhet të ndalet menjëherë. Policët e rinj nga minoriteti boshnjak, rom, serb dhe turk meritojnë gjithë mbështetjen veçanërisht nga komunat dhe qytetarët ku do të vendosen.” – tha ambasadori gjerman.

    Postimet:

  • ​Serbët mirëpresin punën e policëve të rinj të këtij komuniteti në komunat veriore

    ​Serbët mirëpresin punën e policëve të rinj të këtij komuniteti në komunat veriore

    Ende pa u bërë një vit nga dorëheqja e organizuar e policëve serbë në komunat veriore, rreth 46 serbë kanë filluar punën në Policinë e Kosovës. Nisjen e punës së policëve serbë e ka konfirmuar edhe Veton Elshani nga Policia e Kosovës.

    Në rrjete sociale të medieve serbe, serbët kanë mirëpritur dhe u kanë uruar suksese policëve të Policisë së Kosovës, gjersa dje Kosovapress kishte raportuar për kërcënime në kanalin rus telegram.

    Natasha Pavloviq nga Beogradi shpreson që policët e rinj do të punojnë drejtë, e jo sikurse paraardhësit e tyre.

    “Urime rini, jam e sigurt që do ta bëjnë punën e tyre me ndershmëri, ndryshe nga ata që u pasuruan në ca plantacione e laboratorë dhe tani e bëjnë patriotin me bater, i me xhepa plot!” ka komentuar Pavloviq.

    Njëjtë pothuajse është shprehur edhe edhe Milan Milovanoviq nga Kraleva.

    “Njerëzit le të punojnë, kur nuk iu kishte penguar që intelektualët e Listës Serbe të ishin në qeveritë e tyre, jahte dhe gjëra të tjera, pse kjo do të duhet t’ju pengojë… më mirë sesa me pagë të njëjtë të mbajnë pankarta në mitingjet të Vuçiqit, protestat dhe barrikada për interesa të individëve të pushtetit dhe Listës Serbe” ka shkruar Milovanoviq.

    Ndërsa, Dushan Milenkoviq ka uruar policët e rijnë duke u dëshiruar të gjitha të mirat në punën e tyre.

    Kryeministri i Kosovës, Albin Kurti ka shkruar mbrëmë në Twitter se zyrtarët nga komunitetet joshumicë kanë filluar punën këtë javë në veri të vendit.

    “I falënderojmë për shërbimin e tyre dhe i urojmë suksese”, ka shkruar Kurti.

    Veton Elshani zëvendëskomandant i PK për Rajonin e Veriut ka bërë të ditur policët e rinj serbë në PK janë nga pjesë të ndryshme të Kosovës, përfshirë edhe komunat veriore – Mitrovica, Leposaviqi dhe Zubin Potoku.

    “46 nga oficerët janë serbë, 17 boshnjakë, 8 romë, ashkalinj dhe egjiptianë dhe 3 turq. Të hënën kanë filluar. Tashmë përmes punës praktike aftësohen shtesë për të punuar në patrulla dhe detyra të tjera të nevojshme. Ata do të trajnohen në faza të ndryshme”, ka thënë Elshani për KosovaPress.

    Publikimi e emrave të policëve të rijnë serb është bërë nga kanali serb t.me/BunkerSrb në platformën ruse telegram, të cilat në mbrëmje i dënoi edhe shefi i EULEX-it, Giovanni Pietro Barbano.

  • Policia e Kosovës ka filluar testimet fillestare rreth përdorimit të kamerave të trupit për policët

    Policia e Kosovës ka filluar testimet fillestare rreth përdorimit të kamerave të trupit për policët

    Shumë shpejt pjesëtarët e Policisë do të pajisen me kamera trupi. Të parët që do të pajisen me këto kamera janë policët e trafikut.

    Sipas Policisë, ky projekt ka për qëllim argumentimin e aktiviteteve policore që kryhen gjatë detyrës zyrtare në terren.

    “Policia e Kosovës përmes projektit të pajisjes së zyrtarëve policorë me kamera të trupit, përveç tjerash ka për qëllim që të argumentojë aktivitetet policore që kryhen gjatë detyrës zyrtare në terren. Për t’u finalizuar si i tillë projekti, në bashkëpunim dhe koordinim me institucionet kompetente, fillimisht janë përgatitur dokumentacionet e nevojshme dhe Procedurat Standarde të Operimit”, thuhet në njoftimin e Policisë së Kosovës.

    Eksperti i Komunikacionit, Bekim Ahmeti, tha se pajisja e policëve me kamera të trupit e rrit seriozitetin e punës.

    “Në shumicën e vendeve të botës, policia e komunikacionit ka kamera në trup. Kjo e rrit seriozitetin në radhë të policisë, si dhe i deselekton selektimet që bëhen nga ana e policisë se kujt duhet t’i shqiptohet gjoba e kujt jo”, tha Bekim Ahmeti, ekspert i komunikacionit.
    Ndërkaq, njohësi i çështjeve të sigurisë, Drizan Shala, vlerëson se procesi i monitorimit të kamerave trupore do të mundësojë shmangien e keqpërdorimit të autorizimeve.

    “Procesi për t’i monitoruar veprimet e efektive policore përmes kamerave trupore është një hap tutje drejt mundësisë për të shmangur në njërën anën keqpërdorimin e autorizimeve policore, por edhe deklarimet e rrejshme që qytetaret i bëjnë në raport me punën e zyrtarëve policorë”, tha Drizan Shala, njohës i çështjeve të sigurisë.

    Policia e Kosovës pas fazës testuese, do të njoftojë opinionin për fillimin e përdorimit të kamerave të trupit, përfshirë edhe dhënien e informacioneve më të detajuara të këtij projekti. /atvlive.tv

    Edicionin Qendror të lajmeve në ATV e gjeni ën videon më poshtë:

  • Ushtroi dhunë fizike ndaj nënës së tij, arrestohet një person në Mitrovicë

    Ushtroi dhunë fizike ndaj nënës së tij, arrestohet një person në Mitrovicë

    Një person është arrestuar dje në Mitrovicën e Veriut, pasi dyshohet se ka sulmuar fizikisht nënën e tij.

    Policia njoftoi se viktima ka pranuar tretman mjekësor, ndërsa i dyshuari me vendim të prokurorit është dërguar në mbajtje.

    “Mitrovicë Veri 17.07.2023 – 02:00. Është arrestuar i dyshuari mashkull kosovar, pasi që ka sulmuar fizikisht nënën e tij kosovare. Viktima ka pranuar tretman mjekësor. Me vendim të prokurorit, i dyshuari është dërguar në mbajtje”, thuhet në njoftimin e policisë.

  • ​Policia bën thirrje për shkak të temperaturave të larta: Mos ndizni zjarre

    ​Policia bën thirrje për shkak të temperaturave të larta: Mos ndizni zjarre

    Qytetarët të cilët frekuentojnë zonat malore të rajonit të Pejës, në veçanti Bjeshkët e Nemuna, duhet të jenë të kujdesshëm dhe të përmbahen nga aktivitetet që mund të shkaktojnë zjarre. Kjo për shkak të temperaturave të larta që po mbizotërojnë këto ditë në vendin tonë.

    Kjo është thirrja e Policisë së Kosovës në Pejë ku është theksuar se do të ndërmerren masa ligjore ndaj të gjithë aty që rrezikojnë jetën apo pronën e qytetarëve.

    Në njoftim është theksuar thirrja që qytetarët të shmangin ndezjen e zjarreve dhe të lajmërojnë autoritetet për çdo person të dystuar që mund të jetë i përfshirë në raste të të tilla.

    “Policia e Kosovës do të ndërmerr masa ligjore ndaj të gjithë atyre individëve që në një formë apo tjetër rrezikojnë jetën apo pronën e qytetarëve, qoftë qëllimisht apo përmes pakujdesisë së shfaqur në çfarëdo forme. Apelojmë tё tё gjithë qytetarët të cilët frekuentojnë zonat malore të rajonit tё Pejёs, e nё veçanti Bjeshkët e Nemuna qё maksimalisht tё jenё tё kujdesshëm dhe tё përmbahen çdo aktivitet qё mund tё shkaktoj zjarre gjatё përdorimit si shkrepsa, cigare, grilla, zjarre nё natyrё etj”, është bërë e ditur në komunikatën e Policisë.

  • Diplomon gjenerata e 58-të, 418 kadetë i bashkohen Policisë së Kosovës

    Diplomon gjenerata e 58-të, 418 kadetë i bashkohen Policisë së Kosovës

    Sot në gjeneratën e 58-të të Policisë së Kosovës kanë diplomuar 418 kadetë të rinj, në mesin e tyre, 46 janë femra.

    Në ceremoninë e diplomimit, krerët e shtetit kanë theksuar se Policia e Kosovës është prioritet për Qeverinë e Kosovës, për të cilën kanë premtuar se do të adresojnë çdo sfidë të secilit zyrtar policor.

    Presidentja Vjosa Osmani ka thënë se të diplomosh në Akademinë e Policisë nuk është një arritje e vogël.

    Osmani para kadetëve të rinj, ka theksuar se e kanë përgjegjësi mbrojtjen e kufirit me autoritetet vendore dhe partneret ndërkombëtar.

    “Mos harroni se distinktivi që mbani përfaqëson jo vetëm autoritetin që ju është dhënë, por mbi të gjitha, shpresat dhe aspiratat e qytetarëve tanë…Në këto momente kur ju do të bëni betimin e shenjtë për te realizuar detyrat e përcaktuara me Kushtetutën e Republikës së Kosovës dhe do të bashkoheni kolegëve tuaj për të realizuar me vendosmëri përgjegjësinë për ruajtjen e rendit të sigurisë publikë në tërë territorin e Kosovës si dhe përgjegjësinë për kontrollin e mbrojtën e kufirit në bashkëpunim të drejtpërdrejt me autoritetet vendore si dhe me partneret tanë ndërkombëtar”, ka thënë Osmani.

    E para e shtetit, Osmani është shprehur se është e domosdoshme që Kosova të bëhet anëtare e Interpol-it dhe Europol-it. Ajo ka thënë se është e nevojshme që të ketë më shumë gra e vajza në Policinë e Kosovës.

    Ndërsa, kryeministri Albin Kurti ka theksuar se Policia e Kosovës vazhdon të mbetet një ndër institucionet më të besueshme për qytetarët.

    Derisa ka uruar kadetët e rinj, Kurti ka shtuar se qeveria do t’i mbështesë për të tejkaluar çdo sfidë.

    “Si qeveri që nga marrja e mandatit jemi zotuar për luftë të pa kompromis ndaj korrupsionit, veçanërisht atij që është mirëmbajtur me vite në institucionet tona…15:17 Në mbështetje të parezervë keni një qeveri demokratike e bashkëpunuese, e cila asnjëherë nuk do të synojë të minoj rolin tuaj, e që do të adresojë secilën sfidë që keni para vetes. Sfida juaj është sfida jonë. Policia e Kosovës do të vazhdojë të mbetet në shërbim te të gjithë qytetarëve pa dallim dhe dyert e saj do të jenë gjithmonë të hapura për të gjithë ata që duan të jenë faktor i garantimit të sigurisë dhe ligjshmërisë në vendin tonë”, ka thënë Kurti.

    Ndërkaq, ministri i Punëve të Brendshme, Xhelal Sveçla derisa është shprehur krenar për punën që po realizon Policia e Kosovës, ka theksuar se zyrtarët policorë në muajt e fundit me angazhimin e tyre kanë treguar se nuk bëjnë kompromis me banda dhe krim.

    “Dita ditës ne po i shtojmë dhe forcojmë radhët e Policisë së shtetit tonë e të jemi krenarë për punën që Polica e Kosovës po e bënë në shërbim të të gjithë qytetarëve të vendit pa dallim. Ajo po mbron dinjitetshëm dhe me sukses jetën dhe pronën e të gjithë qytetarëve tanë dhe me përkushtim po zbaton ligjshmërinë në tërë territorin e Republikës….Zyrtarët tanë policorë në vitet e fundit e veçanërisht në muajt e fundit me angazhimin e tyre kanë treguar se nuk bëjnë kompromis me banda e krim”, ka thënë Sveçla.

    E drejtori i Përgjithshëm i Policisë së Kosovës, Gazmend Hoxha ka pasur disa porosi për kadetët e rinj.

    “Gjenerata e 58-të që diplomon sot numëron gjithsej 418 kadet nga sot policë të Kosovës, prej tyre janë 372 meshkuj, 46 femra…20:46 Sot derisa për herë të parë mbani uniformat policore do të bëni betimin për t’i shërbyer shtetit të Kosovës duke zbatuar ligjet e vendit dhe duke mbrojtur ligjshmërinë, rendin dhe sigurinë publike. Kërkoj nga ju që t’i zbatoni me nder dhe me krenari përgjegjësitë dhe obligimet që vinë me profesionin dhe detyrat e juaja si Polic të Kosovës”, ka thënë Hoxha.

    Zëdhënësja e gjeneratës, Marigona Brahimi është shprehur e lumtur që pas të gjitha sfidave gjatë trajnimit, kanë arritur t’i kalojnë me sukses.

    Brahimi ka thënë se njohuritë e fituara gjatë trajnimit, do të shërbejnë që ta bëjnë popullin e Kosovës më të sigurtë.

    “Jemi krenarë që jemi këtu në këtë ditë të veçantë për vendin tonë. Ne kemi kaluar sfida të ndryshme gjatë periudhës të trajnimit dhe kemi arritur që me sukses të kurorëzojmë këtë ditë të rëndësishme, jo vetëm për ne, por edhe për Policinë e Kosovës. Angazhimi dhe njohuritë e fituara gjatë trajnimit, profesionalizmi për punën do të bëjnë shtetin Kosovës dhe popullin tonë më të sigurte”, është shprehur Brahimi./KP

  • Osmani policëve të rinj: Mbrojtjen e kufirit e keni përgjegjësi, anëtarësimi në Interpol e Europol domosdoshmëri

    Osmani policëve të rinj: Mbrojtjen e kufirit e keni përgjegjësi, anëtarësimi në Interpol e Europol domosdoshmëri

    Presidentja Vjosa Osmani, tha se profesioni i polici është një profesion fisnik, prandaj u shpreh e bindur se prestarët e rinj të këtij institucioni që diplomuan të premten do ta kryejnë me nder detyrën, raporton EO.

    Ajo ne ceremoninë e diplomimit të gjeneratës së 58-të të policëve, u tha tyre se e kanë përgjegjësi mbrojtjen e kufirit bashkë edhe me partnerët.

    Më tej e para e shtetit tha se për siguri e paqe në rajon është i domosdoshëm anëtarësimi në Interpol dhe Europol.

    Osmani pohoi se sa më shumë gra në institucionet e sigurisë do të thotë aq më shumë siguri për të gjithë qytetarët tanë pa dallim.

    “Të nderuar ministra, drejtor Hoxha, i nderuar komandant i KFOR-it, të dashur zyrtarë e zyrtarë të Policisë së Kosovës e mbi të gjitha të dashura familje krenare. Sot është një ditë e rëndësishme për të gjithë ne sepse jemi mbledhur për të kremtuar angazhimin tuaj të palodhshëm. Më lejoni t’i shpreh urimet e mia më të përzemërta për të gjithëve prej jush”.

    “Të diplomosh në akademinë e Policisë së Kosovës nuk është e lehtë, por mos harroni se distinktivi që ju mbani përfaqëson mbi të gjitha vlerat dhe aspiratat e popullit tonë. Në këto momente kur ju do të bëni betimin e shenjtë, për të ju bashkuar kolegëve e kolegeve tuaja. Si dhe përgjegjësinë për mbrojtjen e kufirit në partneritet me partnerët tanë”.

    “Është domosdoshmëri që Republika e Kosovës të bëhet anëtare e Interpol dhe Europol. Sa më shumë gra në institucionet e sigurisë aq më shumë siguri për të gjithë qytetarët tanë pa dallim. Ne duhet të punojmë sa më shumë që të rrisim numrin te grave e vajzave e komuniteteve pakicë në Policinë e institucionet tona. Të gjithë ju keni zgjedhur një profesion fisnik prandaj jam e bindur në aftësitë tuaja për të kryer detyrat tuaja”, tha Osmani.