Piktorja e njohur kosovare Fjolla Ferati, ishte e ftuar të premten në “LIBERO”, ku përmes ekspozitave të saj personale ka shpalosur pjesën e kulturës së vendit tonë.
Artistja ka treguar që deri më sot ka realizuar tri ekspozita të saj personale.
Ndërkohë, ajo përmendi ekspozitën e saj “ANTARIA”, e cila është transmetuar në kulturën shqiptare në Ambasadën e Kosovës në Paris, ku kishte qenë prezente edhe Presidentja e Kosovës, Vjosa Osmani.
“Ekspozitën e parë e kam pasur në Cyrih, pastaj në Gjenevë, në Sofja dhe kjo e fundit në Paris, ku këto punime i kam punuar gjatë gjithë studimeve… Në ekspozitën në Sofje ka qenë prezente edhe Presidentja e Kosovës, Vjosa Osmani. Aty kam pasur mundësinë për të diskutuar diçka më konkrete me të…”, shprehet piktorja Fjolla.
Vlen të theksohet se piktorja Fjolla Ferati, tha se i gjithë mesazhi i këtyre punimeve të kësaj ekspozite “ANTARIA”, në ambasadë ishin veshjet tradicionale shqiptare.
Krahas këtyre, Fjolla theksoi se thellimi brenda vetes ia mundëson asaj, inspirimin për krijime të reja.
Ndryshe, kur arti përdorë çdo mënyrë për të krijuar dhe komunikuar nëpërmjet ngjyrave, atëherë arrihet të reflektohet njohja e vlerave tona kulturore edhe nga të huajt.
Për të shikuar emisionin e plotë, klikoni në linkun më poshtë:
Nutricionistja dhe ish-banorja e “Big Brother Vip Albania”, Diola Dosti, ishte e ftuar të premten si mysafire speciale në “LIBERO”, për të shpalosur shumëçka sa i përket eksperiencës së saj në këtë reality show.
Diola ndau rrëfime nga qëndrimi i saj në “Big Brother”, në program të cilin u eliminua disa javë pasi që u bë pjesë e tij.
“Fjala sfidë është shumë e vogël për ta përshkruar emocionin brenda në “Big Brother”…Kam 10 vite në media, por popullaritetin që ma dha Big Brother, nuk ma ka dhënë ajo eksperienca ime 10 vjeçare”, u shpreh Diola.
Ndërkaq, ajo rrëfeu dhe për vajzat e saj dhe sa e vështirë ishte për të, që të rrinte larg tyre, e sidomos fakti që për një kohë, gjatë divorcit me ish-bashkëshortin e saj, vajzat e saj ishin me babain e tyre.
“Ku do që shkojë sot e kësaj dite, më thonë se nuk mbeti burrë dhe grua shqiptare pa qarë me momentin kur vajzat më vizituan në “Big Brother”, më kanë munguar shumë dhe e kam përjetuar shumë keq…Unë nuk jam vetëm nënë, jam edhe baba”, shtoi ajo.
Mes tjerash, Diola foli edhe për strategjitë e lojës së Luizit, personazhin më të përfolur të “Big Brother Vip Albania”, e për të cilin tha se deshëm apo jo, ai është fitues.
Për të shikuar intervistën e plotë të Diola Dosti, klikoni në linkun më poshtë:
Gazetare mjaft e suksesshme në Shqipëri e në Kosovë, Edlira Qefalija, ishte e ftuar të hënën në emisionin “LIBERO”, në një rrëfim të veçantë bashkë me bashkëshortin e saj, ish-deputetin e Kuvendit të Kosovës dhe gazetarin Milaim Zeka.
Edlira kujtoi kohën kur ishte fëmijë, teksa ndau historinë së si është lindur dhe rritur në kohën e komunizmit të Shqipërisë që të gjithë në atë periudhë ishin ateistë, kohë sigurisht shumë e vështirë për të gjithë.
“… Unë besoj shumë në Zot. Mirëpo, jam totalisht jo fetare, nuk besoj në fe. Ndoshta në këndvështrimin tim fetë janë si partitë politike”, u shpreh Edlira.
Ndërkohë, ajo përmendi edhe një rast kur ka qenë në fillimet e shkollimit, në faqen e parë të abetares shkruante feja është ‘opium për popullin, Zoti nuk ekziston’.
“… Kam pasur fatin që jam rritur në një familje shumë besimtare. Rreth vetes e kam pasur nënën time që më thoshte ti nuk e sheh ajrin por edhe pse nuk e sheh ai ekziston sepse (ti) merr frymë. Kështu që ndoshta Zoti ekziston edhe pse ti nuk e sheh. Pyetja ime për nënën ishte ‘po çka ti them unë mësueses nesër në shkollë?’, thuaj nuk ekziston Zoti se na futin në burg”, tha mes tjerash Edlira.
Megjithatë ajo këto ngjarje i rrëfeu me plotë emocion në emision, se në atë kohë nuk ishte gjendje e mirë emocionale për askënd.
Krahas kësaj, ajo rrëfeu edhe shumë ngjarje të tjera për sa i takon jetës së saj.
Për ta shikuar emisionin e plotë, klikoni në linkun e mëposhtëm:
Të dhënat numerike për fëmijët e braktisur 2000-2022, sipas raportimeve nga Qendrat për Punë Sociale komunale të vendit, të siguruara nga “LIBERO”, tregojnë se 12 fëmijë janë braktisur nga prindërit e tyre në vitin 2022, ndërkohë në vitin 2000 menjëherë pas luftës janë braktisur 67 fëmijë.
Fenomeni i braktisjes së fëmijëve konsiderohet si një ndër fenomenet shoqërore i cili gjen hapësirë edhe te shoqëria kosovare.
Për të diskutuar për këtë çështje, të hënën në emisionin “LIBERO” ishin të ftuar: Remzije Krasniqi – Drejtoreshë për Avokim në SOS Fshatrat e Fëmijëve të Kosovës, Vebi Mujku – Drejtor i Qendrës për Punë Sociale dhe Fata Rexhepi Mehmeti – Koordinatore e Psikologëve në organizatën për fëmijët pa përkujdesje prindërore (OFAP).
Drejtori i Qendrës për Punë Sociale, tha se ka pasur raste kur fëmijët janë lënë edhe pranë kontejnerëve.
“…Kemi pasur raste kur fëmijët janë lënë pranë kontejnerëve, në vendet ku është rrezikuar jeta e fëmijës…”, potencoi Mujku.
Për fëmijët e braktisur një rëndësi tepër të madhe e kanë edhe familjet strehuese, të cilat ofrojnë mbështetje për rritjen dhe zhvillimin e fëmijëve, e në lidhje me këtë çështje, Rexhepi Mehmeti theksoi se komunat prijëse në këtë aspekt janë Gjakova dhe Ferizaji
“…Aktualisht komunat që kanë më së shumti familje strehuese janë Gjakova dhe Ferizaji. Familjet strehuese janë të përgatitura që do të ofrojnë kujdes përkohësisht për këta fëmijë derisa t’iu zgjidhet statusi…”, tha ajo.
Derisa drejtoresha e SOS fshatrave të fëmijëve, potencoi se në SOS pothuajse shumica e fëmijëve kanë ardhur nga familjet biologjike, por që janë privuar nga kujdesi prindëror për arsye të ndryshme.
“… Për arsye të ndryshme nëse prindërve nuk ju ka kthyer zotësia e veprimit si prind, fëmijët mbajnë kontakte me familjarët biologjikë…”, deklaroi Krasniqi.
Vlen të theksohet se në emisionin “LIBERO” në një lidhje direkte është kyçur Fatmire Hoti Musliu – nënë e cila ka strehuar 4 fëmijë të braktisur.
“…Jam familje strehuese prej vitit 2017 dhe deri tani kam pasur 4 fëmijë të braktisur. Për momentin e kam një fëmijë, do të përkujdesem për të derisa t’i zgjidhet statusi…E kam përkrahjen e të gjithëve (të burrit dhe të familjes)…”, u shpreh ajo.
Kujtojmë se sigurimin e përgjegjësisë së prindërve, familjes, organit të kujdestarisë, shoqërisë dhe të shtetit në kujdesin, mbrojtjen dhe zhvillimin e fëmijës bazuar në interesin më të mirë të fëmijës, e garanton edhe Ligji i Kuvendit të Republikës së Kosovës, për Mbrojtjen e Fëmijës, neni 1, pika 1.3.
Sipas Ligjit në Kosovë për mbrojtjen e fëmijës, neni 27, pika 4 “Fëmija nuk mund të ndahet nga prindërit, kujdestari i tij kundër dëshirës dhe vullnetit. Përveç se në rastet kur kjo ndarje është në interesin më të mirë të fëmijës, nëse fëmija është në rrezik, nëse ndarja është e pashmangshme apo nëse kjo ndarje kërkohet nga ligji ose nga një vendim i formës së prerë”
Për ta shikuar emisionin e plotë rreth kësaj teme, klikoni në linkun e mëposhtëm:
Rastet e dhunës në familje, konkretisht ndaj grave në Kosovë, viteve të fundit kanë shënuar rritje. Në periudhën janar – nëntor të vitit 2022, sipas statistikave të Policisë së Kosovës janë raportuar 2471 raste të dhunës në familje.
Ministrja e Drejtësisë, Albulena Haxhiu të premten ishte e ftuar në emisionin “LIBERO”, ku tha se është shqetësuese rritja e numrit të dhunës ndaj grave dhe vrasjeve të tyre, për të cilën gjë tha se janë duke punuar që të ketë dënime plotësuese për dhunuesit.
“…Është hera e parë që një qeveri e ka vendosur si prioritet adresimin e dhunës në familje… Të kthehemi pas dhe të kujtojmë se a ka pasur ndonjë ministër që ka folur më shumë për dhunën në familje, madje unë mendoj se asnjëherë nuk kanë folur, sepse kishte një përpjekje që të mos flitet për këtë për shkak të mentalitetit patriarkal, sepse e kanë konsideruar dhunën në familje si çështje private që ndodhë në mes të bashkëshortëve…”, deklaroi Haxhiu.
Për ta ndryshuar këtë mentalitet, ajo konsideron se duhet një bashkëpunim shumë i madh institucional dhe shoqëror dhe bashkim forcash për të fituar betejën me femicidin.
Haxhiu konsideron se nuk mund ta zhdukim dhunën, por qëllimi i saj gjatë mandatit është që ta minimizojë këtë dukuri.
“…Çdo ditë e imja në mandatin e ministres do të jetë në shërbim të adresimit të këtij fenomeni dhe në shërbim të drejtësisë po ashtu, sepse ne hartojmë shumë politika që kanë të bëjnë me adresimin e dhunës në familje, madje së fundi kemi dërguar në Kuvendin e Kosovës disa ndryshime edhe në kodin penal, ku parashihen dënime plotësuese për ata që ushtrojnë dhunë fizike edhe seksuale…”, theksoi ajo.
Për ta dëgjuar intervistën e plotë të Albulena Haxhiut, klikoni në linkun e mëposhtëm:
Derisa Lëvizja Vetëvendosje ishte në opozitë, si masë kundërshtimi ndaj ngjarjeve të ndryshme që ndodhnin në vend, kanë përdorur edhe të tjera forma, krahas fjalimeve, njëra nga to ishte (edhe) hedhja e gazit lotsjellës në Kuvend.
Në një intervistë ekskluzive për emisionin “LIBERO”, ministrja e drejtësisë, Albulena Haxhiu, periudhën e gazit lotsjellës në Kuvend e cilësoi si një nga momentet më të vështira në politikë.
“…Edhe unë sikurse deputetet e tjera gra, kemi qenë pjesë e aksioneve në Kuvendin e Kosovës sepse besonim se sikurse burrat deputetë ashtu edhe gratë deputete duhet të jemi bashkë në një qëllim të caktuar – qëllimi ishte që t’i ndalnim dy marrëveshje (sot e kësaj dite diskutohet për njërën). Unë jam e bindur se po të mos ishin ato metoda që i kemi përdorur, sot do t’i vuanim pasojat e Zajednicës… Konsideroj se ka qenë një prej periudhave të mia më të vështira…”, deklaroi Haxhiu.
Ajo befasoi derisa tha se e inkurajon opozitën që t’i përdorin të njëjtat metoda sikurse ata.
“…I inkurajoj ata se në qoftë se kanë një Qeveri (Qeverinë tonë), e cila përpiqet që të themelojë një Zajednicë me kompetenca ekzekutive, një Zajednicë etnike (apo siç e përmendi Kryeministri, mono etnike), atëherë le ta bëjnë këtë… Mund edhe t’iu tregojmë mënyra se si e kemi gjetur gazin lotsjellës (sepse ka qenë sekret)… E kanë të gatshëm modelin…”, theksoi ajo.
Kujtojmë se më 19 prill 2013, u nënshkrua marrëveshja mes Kosovës dhe Serbisë, që parashihte themelimin e Asociacionit të Komunave me Shumicë Serbe, e që më vonë u quajt “Zajednicë”.
Që nga ajo kohë e deri më sot, kjo temë vazhdon të diskutohet në vazhdimësi, duke i bërë partitë politike të kenë përplasje të vazhdueshme njëra me tjetrën.
Për ta dëgjuar intervistën e plotë të Albulena Haxhiut, klikoni në linkun e mëposhtëm:
