Gazetari dhe analisti Zekirja Shabani, në emisionin CONTEXT në ATV, tha se për tu mbajtë zgjedhjet e në veri të vendit, së pari duhet të largohen kriminelët, në mënyrë që kandidatët të ndihen të sigurt për të garuar dhe qytetarët për të votuar.
“Për me u realizu kërkesa për zgjedhje të reja, duhet me pasë forca të rendit me e siguru mbajtjen e zgjedhjeve. Do të thotë, duhet me pasë policë, të cilët fillimisht e garantojnë çdo kandidat që me mujt me ba fushatë fillimisht, pastaj kanë me mujt qytetarët me shku te kutitë e votimit edhe me votu. Për me i mbajtë zgjedhjet duhet me i largu kriminelët. Kriminelët largohen tu e shtri sovranitetin, tu e ushtru autoritetin forcat e rendit. Kur flasim për zgjedhjet e fundit, kandidatët që e kanë kundërshtu Listën Serbe, që e kanë kundërshtu direkt Vuçiqin, janë kërcënu dhe janë detyru me u tërhjekë prej gare”, tha Shabani. /atvlive.tv
Analisti Xhevdet Pozhari, në emisionin CONTEXT në ATV, tha se Ata që i kanë bërë kompromise Serbisë, ata na kanë sjellë në këtë situatë, pasi që sipas tij, nënshkrimi i Asociacionit ka qenë kompromisi më i madh, më i dhimbshëm ndaj Serbisë dhe e ka vënë në pikëpyetje funksionalitetin e shtetit.
“Asociacioni ka qenë kompromisi më i madh ndaj Serbisë. Nënshkrimi i Asociacionit ka qenë kompromisi më i madh, më i dhimbshëm ndaj Serbisë që ty ta ka dhënë në pikëpyetje funksionalitetin e shtetit. A si dini cili është argumenti? Që po e lëmë anash që ka gjuajt gaz Vetëvendosja dhe që ka qenë kundër. Sikur të kish qenë Asociacioni diçka e dobishme, s’do t’i vinte rendi që zotri Kurti ta nënshkruante, do të kryhej ajo procedurë më herët. Pse nuk e themeluan e asnjëherë nuk e iniciuan ata që ishin më herët, sepse e dinin shumë qartë se çfarë kanë bërë. Është tjetër ajo çfarë vinë e shesin pallavra këtu në studio tash të pensionuar edhe thonë se ajo ka qenë gjëja më e mirë që ka mundur me i ndodh Kosovës”, tha Pozhari. /atvlive.tv
Ish ministrja e Punëve të Jashtme, Meliza Haradinaj, në emisionin CONTEXT në ATV, tha tani që është ndërmarrë një veprim dhe jemi në një situatë të re të gjendjes në veri të vendit, dhe institucionet e Kosovës nuk do duhej të zmbrapsen pa u plotësuar disa kushte.
“Pikë së pari duhet ta bëjmë të qartë se Qeveria e Kosovës dhe Institucionet e Kosovës janë në të drejtën e plotë të tyre shtetërore. Ne kemi qenë mjaft të durueshëm tash e sa kohë rreth kushtëzimeve dhe ciklit të kushtëzimeve të pafundme të Serbisë dhe bandave kriminale të Vuçiqit në Serbi. Kemi hequr dorë nga targat, kemi hequr dorë nga zgjedhjet në veri një herë, kemi bërë disa koncesione në marrëveshjen e Ohrit, e cila po ashtu e reflekton një asimetri të kësaj qasje ndërkombëtare ndaj Kosovës dhe Serbisë. Prandaj, tani me që është marrë një veprim dhe jemi para një situate të re të sigurisë dhe të gjendjes edhe politike në veri, atëherë nuk besoj se do duhej të zmbrapsej kryeministri Kurti dhe institucionet e Kosovës pa u plotësuar disa kushte. Ato kushte unë besoj se janë në një rishikim strategjik të dialogut, i pjesëmarrjes së Kosovës në këtë dialog , i cili po shihet qartazi se nuk ka dhënë rezultat deri sot, sepse po e shohim si përfundoi”, tha Haradinaj. /atvlive.tv
Deputeti i PDK-së, Xhavit Haliti mbrëmë në emisionin CONTEXT në ATV, duke veprimet e Qeverisë veri të vendit, tha nuk mund të ndërmerret një veprim i tillë pa koordinim me Amerikën.
Ai vlerësoi vendosjen e flamurit në objektet e komunave në veri, mirëpo tha se kur të vendoset flamuri, nuk bën më të hiqet.
“Flamurin kur ta qitsh, nuk duhet me e hjek dhe krejt kjo për me e përmbledh është mosmarrëveshjet, ose jo gatishmëria për t’u sqaru dhe për të marrë miratimin e amerikanëve. Nuk mundesh me e ndërmarrë një veprim të tillë, pa e njoftu një shtet, për shembull. Amerikën a këto shtetet e mëdha evropiane të NATO-s që janë këtu”, u shpreh Haliti.
Ai tha se “ne po mendojmë se jemi të pavarur”, por sipas tij, asnjë shtet Evropës nuk është i pavarur.
“Ti i ke më shumë se 50 ose dikush më tha 80 për qind e italianëve janë kundër dërgimit të armatimit në Ukrainë. A ka ndonjë iniciativë shtetërore që mos me dërgu. Dikush është baba në këtë, po do me hy në valle, ai që e udhëheqë vallen është një, nuk munden shumë me qenë”, tha Haliti. /atvlive.tv
Deputeti i PDK-së, Xhavit Haliti, në emisionin CONTEXT në ATV, tha se nuk do të ketë më luftë, por beteja për Kosovën tani ëhstë qysh me i rregullu raportet me Serbinë dhe qysh me hy në BE.
“Unë dua të ju them juve dhe të gjithë ata që dojnë me dëgju dhe janë realist, s’ka më luftë. Ka përfunduar lufta për Kosovën. S’janë më luftë. U kry lufta në Kosovë. Tash beteja është qysh me i rregullu raportet me Serbinë dhe qysh me hy në BE”, tha Haliti.
Ai tha se beson që marrëveshja mes këtyre dy vendeve, nuk do ta kënaqë asnjërën palë.
“Tani beteja si dhe qysh do të përfundojë marrëveshja, a do të kënaqemi ne a Serbia, apo nuk do të kënaqemi asnjëra, unë besoj se asnjëra nuk do të kënaqen, por do të jetë një marrëveshje, e cila në proces, do t’i ndihmojë të dyja palët”, tha Haliti. /atvlive.tv
Ish-kryeministri i Kosovës, Isa Mustafa, në emisionin CONTEXT në ATV, tha se marrëveshja e 2015-ës ka qenë marrëveshje e vetë zbatueshme, e që sipas tij, nënkupton që Asociacioni nuk bëhet pa u bërë statuti, i aprovuar nga Kuvendi, nga Qeveria dhe me pëlqimin e Gjykatës Kushtetuese.
“Kemi kërkuar atëherë që Bashkimi Evropian t’i sqarojë pozicionet e veta karshi Asociacionit. Sepse ajo që shkruhet në letë është diçka tjetër, ajo që pastaj vazhdon të dialogohet edhe më tutje është çështje tjetër sepse ne kryer atëherë bisedat lidhur me parimet themelore, do të thotë me njëfarë kornize në të cilën do të bëhej statuti i Asociacionit në të ardhmen sepse marrëveshja e vitit 2015 nuk ka qenë marrëveshje e vetë zbatueshme. Që nënkupton që edhe marrëveshja mundet edhe 100 vjet me qenë, por Asociacioni nuk bëhet. Asociacioni bëhet vetëm kur të bëhet statuti, kur ta aprovojë statutin Kuvendi, kur ta aprovojë Qeveria dhe kur ta japë pëlqimin Gjykata Kushtetuese që ai statuti është në harmoni me Kushtetutën”, tha Mustafa.
Ai tha se atëherë kanë pranuar që ta nënshkruajnë marrëveshjen, por se kanë kërkuar nga BE zotimin që pastaj në statutin e Asociacionit edhe në përmbajtjen e fushë veprimit të tij, të mos kemi funksione ekzekutive ose të mos kemi një pushtet të tretë.
“Kot janë mundu atëherë, janë shpenzuar, kemi pasur gjuajtje, kemi pasur dhunë, sepse Asociacioni nuk ishte bërë asnjëherë në bazë të marrëveshjes së 2015-ën pa u kry procedura tjera. Ne për procedura tjera pastaj preokupoheshim që BE të mos provojë me i ndërrua qëndrimet. Kemi thënë në rregull, ne mund ta nënshkruajmë këtë marrëveshje por duhet të kemi zotimin e BE-së që pastaj në statutin e Asociacionit edhe në përmbajtjen e fushë veprimit të tij, të mos kemi funksione ekzekutive ose të mos kemi një pushtet të tretë”, tha Mustafa. /atvlive.tv
Gazetari dhe analisti Zekrija Shabani, në emisionin CONTEXT në ATV, tha se Qeveria nuk po i përkrah qytetarët, por po u jepet ndihma.
Ai tha se qytetarët janë duke e ndjerë varfërinë për shkak të pagave të ulëta dhe çmimeve të larta dhe kjo arsye, sipas tij, po i bënë që këta të mendojnë me ikë prej Kosove.
“Nuk është meritë e Qeverisë direkt, pos punës së qeverisë për me e ulë TVSH-në, për me e ulë akcizën e produkteve të ndryshme që kemi kërkua vazhdimisht. Por
qytetarët, pra ata që janë duke e ndjerë me të vërtetë, është varfëria. Edhe për këtë arsye, qytetarët tash më lehtë mendojnë, me ikë prej Kosove qysh janë edhe tu ba një pjesë e tyre, se sa me e përballu ketë me marrë rroga të ulëta dhe mos me mujt me e përballu jetesën në këtë vend. Ajo çka është shqetësuese se këta njerëz me paga të ulëta me çmime të larta, nuk po përkrahen prej Qeverisë, por po iu jepen ndihma, çka e kanë thënë edhe raportet e më hershme edhe i njëjti tash se njerëzit po bëhen dembelë për shkak se po presin prej Qeverisë me ua zgjidh krejt problemet në aspektin socio ekonomik”, tha Shabani. /atvlive.tv
Administratorja e Agjencisë Amerikane për Zhvillim Ndërkombëtar (USAID), Samantha Power, në një intervistë në emisionin CONTEXT në ATV, tha se pozicioni i SHBA-së është i qartë sa i përket Asociacionit, i cili duhet të jetë në përputhje me Kushtetutës së Kosovës dhe strukturës qeverisëse.
Ajo tha se kompetencat ekzekutive nuk janë diçka që parashihen në marrëveshje.
“Mendoj se SHBA-ja ka qenë shumë e qartë lidhur me pozicionin tonë, e që është se nuk duhet krijuar një nivel shtesë të qeverisjes dhe se kompetencat ekzekutive nuk janë diçka që parashihet këtu. Ajo për çka po flasim janë funksionet komunale, që tashmë ushtrohen në pjesët tjera të Kosovës. Prandaj, e kuptoj sensitivitetin rreth kësaj çështjeje, brengën që ekziston, sidomos kur kihen parasysh disa propozime të bëra paraprakisht. Prapë, sa i përket qëndrimit të SHBA-së lidhur me vendin që ky Asociacion duhet të ketë brenda Kushtetutës së Kosovës dhe strukturës qeverisëse në Kosovë, ai është shumë i qartë”, tha Power. /atvlive.tv
Administratorja e Agjencisë Amerikane për Zhvillim Ndërkombëtar (USAID), Samantha Power, në një intervistë në emisionin CONTEXT në ATV, duke komentuar deklaratën e përfaqësuesit të Lartë i BE-së, Josep Borrell, tha se tani kjo situata siç e quan ajo, ‘e ngrirë’, mund të dëmtojë përparimin e arritur.
“Stabiliteti është i rëndësishëm, në kuptimin që nuk duhet pasur elemente të armatosura që i provokojnë njerëzit në çfarëdo mënyre. Unë mendoj se është një kohë shumë delikate ku një situatë e ngrirë mund të “shkrihet” në mënyra që mund të dëmtojnë përparimin e arritur”, tha Power.
Ajo tha se serbët e Kosovës duhet të kthehen në institucione sepse kjo, sipas saj, do t’ua përmirësonte jetën qytetarëve, do t’i përmirësonte shërbimet, do të përmirësonte ndjenjën e të qenit të përfaqësuar.
Power thotë se ngecja e progresit politik është vetvetiu destabilizuese.
“Kur të kthehem në SHBA dhe të takoj liderë të biznesit të mund t’u them se Kosova është një vend i hapur për biznes, shikoni se çfarë reformash kanë bërë, shikoni ankandin për energji diellore që sapo e shpallëm. Pra, është me rëndësi që të ruhet stabiliteti gjatë kohës që po përpiqemi të arrijmë progres politik, por ngecja e progresit politik është vetvetiu destabilizuese”, tha Power. /atvlive.tv
Administratorja e Agjencisë Amerikane për Zhvillim Ndërkombëtar (USAID), Samantha Power, në një intervistë në emisionin CONTEXT në ATV, tha se pas takimit që kishte me kryeministrin Kurti dhe presidenten Osmani, këta dy të fundit dy ishin shumë të vendosur se Marrëveshja e Ohrit duhet implementuar në tërësi.
“Tani po hyjmë në një faze kritike ku po presim që të dyja palët të dalin me propozime shumë konkrete në mënyrë që të arrihet një pozicion i përbashkët. Mendoj se është me rëndësi të kihet parasysh se po vijmë nga një periudhë ku mendohej se nuk do të kishte diskutime, në radhë të parë se nuk do të kishte dialog pa njohje, megjithëse kjo ishte mjaft kohë më parë. Edhe tani, gjatë këtyre bisedimeve ka një mosgadishmëri për t’u angazhuar rreth Asociacionit”, tha Power.
Megjithatë, ajo thotë se është optimiste fazën e ardhshme pala kosovare do të dalë me propozime konkrete. /atvlive.tv
