Presidenti i Serbisë, Aleksandër Vuçiq, ka reaguar ndaj deklaratës së kryeministrit shqiptar Edi Rama, i cili në emisionin “Context”, në ATV deklaroi se “çdo sulm ndaj Kosovës është sulm ndaj Shqipërisë”.
Vuçiq tha se Serbia nuk ka ndërmend të sulmojë askënd.
“Sot u dëgjua nga një shtet fqinj se nëse dikush sulmon Kosovën, edhe pse nuk e di kush do të sulmonte, Shqipëria nuk do ta lejojë dhe do të jetë në atë anë. Pas një deklarate kaq të tmerrshme, dëgjohej vetëm një heshtje e madhe, aq e fortë saqë heshtja ishte e pakëndshme. Për sa i përket neve, nuk kemi nevojë të sulmojmë askënd dhe nuk do ta bëjmë”, tha Vuçiq gjatë ceremonisë së Ditës së Shtetit.
Vuçiq shtoi se Serbia do të mbrojë marrëdhëniet e saj me Evropën, por edhe se “nuk do t’i shkelë marrëdhëniet e saj me Rusinë, Kinën dhe askënd tjetër”./ATVLIVE.TV/
Gazetari Milaim Zeka, në emisionin CONTEXT në ATV, tha se ikjen nga Kosova e sheh si normale.
Ai thotë se nuk ka të drejtë morale t’iu kërkojë njerëzve që mos ta lëshojnë vendin për një jetë më të mirë, derisa vazhdon ai, edhe dy vajzat e veta është duke i përgatitur për me ikë jashtë vendit.
“Çfarë të drejte morale ose njerëzore kam me iu thënë kushërinjve të mi, njerëzve të mi, familjarëve të mi, mos ikë për një jetë më të mirë, për një punë më të mirë, për një siguroi më të mirë. Unë dy vajzat i kam në Suedi, njëra është mjeke, njëra inxhiniere edhe nuk kam arritë që 23 vjet me iu kriju kushte për me ardhë ato me punu në Kosovë. E kur dy vajzat e tjera që i kam këtu, prej fillimit e kam prognozua edhe i kam përgatitë për me ikë përjashta. Unë si babë jam tu i përgatitë vajzat e mia me ikë prej këtij vendi”, tha Zeka.
Ai thotë se përtej rrogës, janë edhe tri gjëra elementare që i mungojnë këtij vendi.
“Pse me ikë prej këtij vendi? Sepse përtej rrogës, janë tri gjërat elementare që i mungojnë këtij vendi. Një, është shëndetësia. Shkon në spital i sëmurë, kthehesh më i sëmurë. Një kolege mjeke, kurrë nuk e harroj, e kam citu me qindra herë nëpër studio televizive, mjeke briliante, me ka thënë “ne kemi kushte me mbytë pacientë. Këta janë njerëz fantastikë, mjekë fantastikë, profesionistë fantastikë, po ti shkon te këta kontrollohem, më thotë po me vjen keq Milaim, por duhet me dalë me ble këtë, këtë, me ble gjilpëra. Ky s’mundet me t’i dhënë gjilpërat e veta. Dy, mungesë totale e drejtësisë. Në qoftë se ti jeton në një shtet kur një hetues kriminel, hetues policor, është bërë multi milionerë, kur ti pjesën dërmuese të kapitenëve të graduar të Policisë i ke multi milionera, kur një hetues në Pejë duke kontrolluar një biznesmen, djali i ri të Frankfurtit, e marrin dhe ia fusin 20 gramë kokainë në xhep mbrapa, e fusin në listën e Interpolit dhe ia lypin me e heqë nga Interpoli. Normal që duhet me ikë prej këtij vendi. Dhe, e treta, kur e ke një arsim, një sistem arsimor që prodhon doktora të shkencave analfabetë, profesorë analfabetë, mësues analfabetë, të cilët nuk dinë as artin e komunikimit qoftë me nxënës, qoftë me studentë. Cila është arsyeja që Sindikata e Arsimit vazhdimisht proteston edhe thotë që ne nuk mundemi me i futë në provim pranues arsimtarin. Qysh mos me e futë arsimtarin idiot, që s’e dinë matematikën, që s’e dinë anglishten, që nuk e njeh gjuhën shqipe, pse mos me e futë në provim”, tha Zeka. /atvlive.tv
Kryetari i Komunës së Vushtrrisë, Ferit Idrizi, në emisionin CONTEXT në ATV, iu është përgjigjur kritikave të asamblistëve për dekorimin e qyteti të Vushtrrisë për festat e fundvitit ku janë shpenzuar afër 19 mijë euro, për pak drita.
Ai thotë se dekorimin e qytetit e ka bërë për hir të fëmijëve që e presin vitin e ri, për të cilin nuk është bërë ndonjë shpenzim i madh.
Kryetari Idrizi thotë se dekorimin e qytetit të Vushtrrisë e kanë bërë edhe për muajin e Ramazanit, për festat e Bajramit, etj.
“Edhe ata duhet me folë diçka, por kushdo që të kish qenë, një dekorim të lehtë, për hir të atyre fëmijëve që e presin dhe tash kjo çështja e vitit të ri ka kuptime të ndryshme në vende të ndryshme. Te na e ka kuptimin që ndërron një vit, vjen viti tjetër dhe është një festë. Tek të tjerët e ka edhe kuptimin e krishtlindjeve, etj. Megjithëse, ne shumica absolute e qytetarëve janë të besimit islam, këtë e bëjmë një dekorim të lehtë, nuk është bërë ku e di ndonjë shpenzim, por për hir të atyre fëmijë që kanë pyet aq shumë, më kanë shkruar edhe qytetarët se a do të ketë dekorim qyteti dhe na dekorim bëjmë edhe për Ramazanin, e kemi bërë, edhe për festat e Bajramit e kështu më radhë dhe nuk është ndonjë shpenzim që kemi bërë tepër”, tha Idrizi. /atvlive.tv
Intervistën e tij të plotë në CONTEXT e gjeni në videon më poshtë:
Kryetari i Komunës së Vushtrrisë, Ferit Idrizi, në emisionin CONTEXT në ATV, tregoi se dje ishte në takim të kryeministrit me kryetar të komunave, por në këtë takim, ai thotë se nuk ka parë kryetarë të komunave të tjera, me përjashtim të dy kryetarëve ku qeverisë Lëvizja Vetëvendosje.
Ai thotë se ka raporte te mira si me ministrat ashtu edhe me kryeministrin.
“Kur është fjala te bashkëpunimi, unë kur e kanë vizituar komunën e Vushtrrisë, i kam pritur në mënyrën më të mirë edhe ministrit edhe kryeministri kur ka qenë vitin e kaluar në përvjetorin e Masakrës së Studimës, edhe nuk kam hezituar asnjë moment as nuk hezitoj me bashkëpunu me ministra, kam komunikimin e tillë, komunikim qysh po kërkojnë nuk kam pasur edhe nevojë me e pas me kryeministrin, asnjëherë nuk kam pasur nevojë as me ministrin e Financave. Kur ka qenë për me e kritiku, unë kam kritiku. Nuk e bëj për me perfitu, por e bëj për hir të institucionit qysh duhet me funksionu në një shtet demokratik”, tha Idrizi. /atvlive.tv
Intervistën e tij të plotë në CONTEXT e gjeni në videon më poshtë:
Kryetari i Komunës së Vushtrrisë, Ferit Idrizi, në emisionin CONTEXT në ATV, tha se komuna që ai drejton ka arritur ta realizojë 92 për qind të buxhetit të paraparë për këtë vit.
“Po këtë vit në Komunën e Vushtrrisë po e përmbyllim suksesshëm, edhe pse ishte një vit vërtet sfidues, një vit me shumë turbulenca, por ia dolëm ta përafrojmë me e përmbyllë. Na kanë mbetur edhe pak ditë derisa të bëhet mbyllja e buxhetit dhe sistemi i pagesave, kështu që deri, deri sot diku ne kemi arritë me realizu buxhetin e 92 të buxhetit me e shpenzu dhe sinqerisht ndihem jashtëzakonisht mirë, sepse ka qenë vazhdimisht ajo frika te investimet kapitale, te mos shpenzimi i buxhetit, por shkak te procedurave që i ofron Ligji i Prokurimit Publik dhe disa procedura burokratike, të cilat i janë ba pengesë vetëm jo vetëm për Komunën e Vushtrrisë, po për gjitha komunat edhe për gjithë vendin”, tha Idrizi. /atvlive.tv
Intervistën e tij të plotë në CONTEXT e gjeni në videon më poshtë:
Eksperti i sigurisë, Nuredin Ibishi, në emisionin CONTEXT në ATV, tha se vlerësimet nga qarqet e ndryshme se në Kosovë ekziston rreziku për kërcënime, janë reale.
“Këto vlerësime që vijnë nga qarqet edhe lokale, nacionale por edhe rajonale, por gjithashtu dhe nga sekretari i Përgjithshëm i NATO-s dhe përgjithësisht liderët e Bashkimit Evropian, sidomos përfaqësuesit për politikë të jashtme dhe siguri e SHBA-ve në veçanti që vlerësojnë situatën, mendoj që ende është një rrezik potencial dhe mirë është edhe lidershipi i ynë pra ka ngritë vëmendjen në kuptim të paralajmërimit të rreziqeve dhe kërcënimeve që janë reale pa marrë parasysh që situata duket që është e qetë dhe stabile”, tha Ibishi.
Sipas tij, presidenti i Serbisë është një promotor dhe pasardhës i Millosheviqit, i cili me ideologjinë e tij të re, po e mban në tension Bosnjë Hercegovinën, Kosovën dhe Malin e Zi.
“Presidenti i një vendi fqinj vazhdon të jetë një promotor, një pasardhës i Millosheviqit në kuptim tash që ky i një ideologjie të re që po mban në sistem edhe Bosnjë Hercegovinën në një sistem tensioni me ekstremist Dodik, por edhe Kosovën me gjithë atë luftën hibride çfarë tentoi ta bëjë me grupin e Rdojiçiqit, por njëkohësisht edhe Malin e Zi me bllokun pro rus”, tha Ibishi.
Ai tha se Serbia po e shfrytëzon politikën e perëndimit për të mbajtur vendet e Ballkanit larg Lindjes, dhe se Kosova në këtë situatë gjendet në një pozicion më të pa definuar.
“Serbia po e shfrytëzon këtë balancë apo këtë mbajtjen në sistem kur e ka shpallë neutralitetin edhe ndaj perëndimit apo NATO-s por edhe ndaj Lindjes, Rusisë, është armatosë gjithandej e ka bërë një debalancë të kuptimit të shtimit të forcave, pajisjeve duke u armatosë edhe sipas standardeve të NATO-s por njëkohësisht edhe nga Lindja, pra Rusia, mandej Kina dhe vende tjera, pra edhe Irani”, tha Ibishi. /atvlive.tv
Kosova ishte në qendër të mesazhit të fund-vitit, të Sekretarit të Përgjithshëm të NATO-s, Jens Stoltenberg, teksa foli për tensionet në Ballkanin Perëndimor. Duke folur për rëndësinë e ruajtjes së paqes në kohën kur, siç tha, bota është më e rrezikshme, Stoltenberg falënderoi ushtarët e KFOR-it.
“Muajin e kaluar, takova trupat e NATO-s në veri të Kosovës. Ndihma në ruajtjen e një mjedisi të qetë dhe të sigurt për të gjithë në Kosovë është çelës i stabilitetit të gjerë, në të gjithë rajonin e Ballkanit Perëndimor”, tha Stoltenberg.
Duke komentuar këtë deklaratë të kreut të NATO-s, profesori Ibrahim Gashi, në emisionin CONTEXT në ATV, tha se kjo dëshmon se po i vie fundit durimit të perëndimit karshi obstruksionit politik që po e bën Serbia ndaj paqes dhe rendit ndërkombëtarë.
“Deklarata e sotme e Stoltenberg që do të thotë edhe takimi i ministrave të Jashtëm dhe vendimet për rritjen të shkalles së angazhimit të KFOR-it në komunat veriore, flasin se tashmë nuk është dhe nuk është që nuk e ka ditur perëndimi se cila është Serbia e vërtetë, por thjeshtë ka qenë politika e tillë e mbajtjes në njëfarë mënyrë të një balance në raportet Kosovë – Serbi e ndonjëherë duke e rënduar stegën nga Kosova, duke e mbajtur Kosovën nën sanksione dhe duke mos nxjerrë sanksione për një agresion të hapur. Mendoj që mund të lexohet edhe se po i vie fundi i këtij lloj durimi të perëndimit karshi këtij obstruksionit politik që po e bën Serbia ndaj paqes dhe rendit ndërkombëtarë në pjesën e Evropës ku ajo është aktive”, tha Gashi.
Ai komentoi edhe zgjedhjet e fundit në Serbi, për të cilat tha janë shumë dekurajuese për bashkësinë ndërkombëtare.
“Sigurisht që zhvillimet e fundit në Serbi janë shumë dekurajuese për bashkësinë ndërkombëtare, për pjesën e shteteve demokratike të Evropës dhe përgjithësisht të botës për shkak se atje kem një proces zgjedhor jo demokratik tashmë të konstatuar si të tillë nga vëzhgues ndërkombëtarë dhe rrjedhimisht mendoj që Serbia çdo ditë e më shumë, në njëfarë mënyrë, politika zyrtare serbe, çdo ditë e më shumë po demaskohet në sy të opinionit perëndimor se nuk po lëvizë drejtë një evolumi pozitiv që do të mund të quhej edhe si rezultat i asaj përkëdhelje që ia ka bërë deri tash bashkësia ndërkombëtare ose të përmbushte pritjet e bashkësisë ndërkombëtare për të ndryshu politika serbe sa i takon proceseve integrative, ruajtjes së paqes në rajon. Mendoj që sa më shumë të vazhdojë kështu, kjo do ta ndërgjegjësojë më shumë perëndimin”, theksoi Gashi. /atvlive.tv
Ish ministri i Brendshëm, Bejtush Gashi, në emisionin CONTEXT në ATV, duke komentuar deklaratën e kreut të NATO-s, Jens Stoltenberg, i cili në mesazhin e fund vitit përmendi edhe Kosovën, vlerësoi se situata e krizës në vend është qetë dhe se nuk ka vend për panik.
“Deri tani, reagimi i shpejtë, përforcimi i trupave të misionit të NATO-s në ato komuna, në mënyrë të drejtpërdrejtë kanë ndikuar që tensionet të ulen, të krijohet një situatë më e favorshme për të gjithë ata që jetojnë atje pa përjashtim dhe mbështetur në vendimet që Qeveria e Kosovës ka marrë, për faktin se për kundër lëshimeve që ka pasur në disa procese, situata e krizës në ato pjesë është menaxhuar jashtëzakonisht mirë dhe si rezultat i një bashkëpunimi me misionet ndërkombëtare atje, misionin e NATO-s dhe EULEX-it, aktualisht situata është jashtëzakonisht e qetë dhe mund të themi se nuk ka vend për panik”, tha ish-ministri Gashi.
Megjithatë, deklaratat e fundit për çështjen e sigurisë në Kosovë, sipas tij krijojnë shqetësime tek opinioni publik fillimisht si dhe në rrafshin ndërkombëtar,
“Të gjitha deklaratat që po jepen kohëve të fundit krijojnë një shqetësim në opinionin publik që mund të ketë impakt në ambientin e sigurisë në Republikës së Kosovës. Ky impakt përpos që ka ndikim të drejtpërdrejt të qytetarët, mund të ketë ndikim edhe në rrafshin ndërkombëtar, sepse mund të hezitojnë edhe investitorët potencial që janë të interesuar që të investojnë në Kosovë dhe aty ku nuk ka stabilitet, pastaj mungon interesimi për investimin”, tha Gashi. /atvlive.tv
Deputeti i Lëvizjes Vetëvendosje, Armen Muja, në emisionin CONTEXT në ATV, duke komentuar Asociacionin siç është menduar në vitin 2015, tha ajo çfarë kanë pranuar Isa Mustafa dhe Hashim Thaçi, është me keq se Bosnja.
“Ajo çfarë ka pranuar Isa Mustafa me Hashim Thaçin është më keq se Bosnja. Pse? Sepse, nën një, Serbia e njeh Bosnjën, por nuk e ka njoftë Kosovën. Bosnja nuk është sfiduar si shtet nga jashtë. Në fakt Serbia e ka njohur de-jure Bosnjën, por nuk e ka njohur de facto. Ka dëshiruar me e defunksionalizu nga brenda. Në rastin tonë ka shkuar përtej. Jo vetëm që nuk e ka njoftë de juren, por ka dashur edhe de facton me e defunksionalizu nga brenda dhe kjo është parë në projektin e ndarjes së Kosovës.”, tha Muja. /atvlive.tv
Deputeti i Lëvizjes Vetëvendosje, Armen Muja, në emisionin CONTEXT në ATV, tha se ai vetë nuk e ka parë draft-statusin e Asociacionit, por shtoi se ky draft nuk i prekë kompetencat ekzekutive të shtetit.
“Ajo çfarë mund të them është ajo që edhe pa e parë një draft të tillë, mund të them që ku janë kornizat në të cilat është bërë beteja politike në dy vitet e fundit. Kosova e ka trashëgua një marrëveshje të vitit 2013-2015 e cila ishte shpallë jo-kushtetuese në elementet thelbësore të saj. Gjykata Kushtetuese kishte konkluduar që elementet ekzekutive një etnike, ato duhet të bien ndesh me Kushtetutën e Republikës së Kosovës, mirëpo kishte një insistim edhe nga Vuçiqi, edhe nga Lajçak, në ditët e para, tha që Kushtetuta e Kosovës nuk është bibël dhe ajo duhet të ndryshohet. Mirëpo, në dy vutët e fundit, beteja ka qenë që asgjë, asnjë milimetër e cila i prekë kompetencat ekzekutive të shtetit, nuk mund të preken”, tha Muja.
Ai tha se deri në një konkluzion të këtij procesi, draft-statusi duhet të mbahet i kufizuar te krerët e shtetit.
“Unë nuk e kam parë një draft të tillë. Në fakt ka qenë një kërkesë e ndërmjetësve që derisa të ketë një konkluzion të këtij procesi ose diskutimi lidhur me çështjen, ai duhet të mbahet i kufizuar zakonisht te krerët e shtetit edhe në raste të tilla të ngjashme si me marrëveshjen, ai iu komunikohet edhe liderëve opozitës, mirëpo unë s’e kam parë një draft të tillë”, tha Muja. /atvlive.tv
