Tag: Ballina

Kryeministri Albin Kurti dhe Presidenti i Serbisë Aleksandër Vuçiq pritet të takohen të enjten në Bruksel në kuadër të dialogut Kosovë – Serbi, që ndërmjetësohet nga Bashkimi Evropian.

Kështu kanë bërë të ditur burime të televizionit, ndërkohë që nuk është konfirmuar akoma agjenda zyrtare.

Duke theksuar se kanë mbetur edhe dy ditë kohë për takim dhe zgjidhje, në konferencë për media të mërkurën, zëdhënësi i BE-së, Peter Stano, përmendi përsëri për pasojat.

“Mjaftueshëm është thënë. Ne kemi folur shumë për pritjet tona, për pasojat e mundshme dhe atë që pason. Gjëja kryesore tani është ta kemi takimin në Bruksel dhe këtu nuk kam lajm për të dhënë, nuk jam në gjendje të jap asnjë datë ende”, tha Stano.

Të hënën në Luksemburg, takohen ministrat e Jashtëm të Bashkimit Evropian dhe në njërën nga pikat diskutojnë për dialogun Kosovë – Serbi.

Nga ky takim, njohës të marrëdhënieve ndërkombëtare presin konfirmim të masave ndaj Kosovës, të përmendura kohëve të fundit.

“Janë përmendur masat: kufizim i qasjes në fonde të BE-së, po ashtu liderëve të Kosovës do t’iu kufizohet qasja në lidhje me takimet e liderëve të 27 vendeve të Bashkimit Evropian, dhe ne takimin e së hënës, pra pres konfirmim të këtyre masave”, tha njohësi i marrëdhënieve ndërkombëtare, Emir Abrashi.

Megjithatë, çdo vendim negativ ndaj Kosovës, vlerësohet i padrejtë.

“Lidhur me mbledhjen e javës së ardhshme të Këshillit të BE-së, ideja e sanksioneve ndaj Kosovës është gjë skandaloze dhe me të vërtetë qesharake që të konsiderohet, sepse çdo vendim i Kosovës ishte i duhuri, dhe ishte Serbia, Aleksander Vuçiqi, ata të cilët u larguan nga marrëveshja e paqes e Ohrit. Të kënaqet Vuçiqi dhe të ndëshkohet Kosova do të ishte tërësisht qesharake. BE-ja nuk duhet ta dënojë Kosovën, sepse çdo veprim i Kosovës në veri të vendit ishte i duhur”, tha eksperti për zgjerimin e Bashkimit Evropian, Gunther Fehlinger.

Një ditë më parë, ministrja e Jashtme tha se nuk ka asgjë zyrtare sa i përket masave ndaj Kosovës, tashmë është në dijeni që shtetet anëtare të BE-së janë duke diskutuar me njëra-tjetrën në këtë kontekst. /atvlive.tv

Edicionin Qendror të lajmeve në ATV e gjeni në videon më poshtë:

“Serbia qartazi don ta militarizojë dhe eskalojë situatën. Po sjell deri afër kufirit të Republikës së Kosovës edhe fluturaket e saj, helikopterë e avionë të prodhimit rus. Nëpërmjet këtyre sulmeve e provokimeve, ku përdoren qytetarë të Kosovës, Serbia provokon konflikt serioz ndërkombëtar”.

Këtë paralajmërim e kishte bërë kryeministri Albin Kurti, në shtator 2021.
Që atëherë, në intervista e fjalime, kryesisht media e forume ndërkombëtare, kryeministri ka përsëritur rrezikun për konflikt.

Së fundmi emisarët e SHBA-së dhe BE-së, Gabirel Escobar dhe Miroslav Lajcak, u shprehën të shqetësuar për mundësinë e përshkallëzimit të tensioneve në veri në një konflikt rajonal.

Shtëpia e Bardhë, ndërkohë, njoftoi vazhdimin e emergjencës kombëtare lidhur Ballkanin Perëndimor, deri në fund të Qershorit 2024 – me arsyetimin se situata aktuale “paraqet një kërcënim të pazakontë dhe të jashtëzakonshëm për sigurinë kombëtare dhe politikën e jashtme të SHBA-së”.

Referuar këtij vendimi, teksa përmend zhvillimet politike dhe të sigurisë në rajon, eksperti i sigurisë, Drizan Shala, thotë se paralajmërimet janë serioze.

“Ka potencial faktik-real që çështja e veriut ta kaplojë komplet Ballkanin Perëndimor. Sepse, nëse do të kemi vetëm një viktimë, nga njëra apo pala tjetër, de facto zjarri do të ndizej dhe askush nuk e di se si do të përfundonte. Sepse, kanë mbetur shumë çështje pezull në rajonin e Ballkanit Perëndimor: sa i përket Republikës Serbe në Bosnjë, sa i përket mos-formimit të Qeverisë në Malin e Zi – ndikimit të subjekteve pro-serbe, pro-ruse në formimin e saj”, tha Shala.

Duke thënë se Serbia po përpiqet të përshkallëzojë situatën deri në konflikt, përmes strukturave të saj ilegale në Kosovë, Shala thekson se java e ardhshme mund të jetë sfiduese për shkak të Vidovdanit.

“Qeveria duhet t’i thërrasë mendjes dhe veprimet e saj të jenë në koordinim me Shtëpinë e Bardhë, SHBA-në, dhe assesi të mos lejohet që çështjet të kalohen në një grup më të ngushtë, ku situata mund të përshkallëzohet më 28 Qershor”, tha Shala.

Teksa flet për pasojat ekonomike nga përmendja e konfliktit në deklarata të nivelit të lartë, opinionisti Zekirja Shabani thekson se tensionet në veri tashmë nuk janë problem vetëm i Kosovës.

“Është problem i Evropës dhe i SHBA-së, në përgjithësi, që tash duhet të zgjidhet në një nivel shumë më të lartë sesa mes Kosovës dhe Serbisë. Por, duke i pasur parasysh reagimet e ndërkombëtarëve në raport me Kosovën dhe paralajmërimet për masa shtrënguese, Kosova do ta pësojë në afatshkurtër, duke nisur prej investimeve, prej fondeve të BE-së që veç janë ngrirë deri diku dhe pjesëmarrjes në forume me potencial zhvillimi për Kosovën”, tha Shabani.

Situata në katër komunat me shumicë serbe në veri të Kosovës, vazhdon të jetë e tensionuar që nga 26 maji, kur fillimisht përmes protestave të dhunshme, serbët kundërshtuan kryetarët e dalë nga zgjedhjet e 23 Prillit, që ata i bojkotuan. /atvlive.tv

Edicionin Qendror të lajmeve në ATV e gjeni në videon më poshtë:

Konkursi i rihapur më 7 qershor për guvernator të Bankës Qendrore është mbyllur.

Për konkursin i cili u përsërit për shkak të parregullsive, ky institucion nuk ka dhënë detaje, por, siç kupton televizioni, në proces nuk është përfshirë Ambasada e Britanisë së Madhe.

Kjo ambasadë e kishte kritikuar konkursin e parë për parregullsi të shumta.

Në anën tjetër, kryetari i Komisionit parlamentar për Buxhet shpreson që procesi për zgjedhjen e guvernatorit të përfundojë para se Kuvendi t’i përfundojë punimet e sesionit pranveror.

“Zakonisht kjo procedurë i drejtohet Qeverisë për të dhënë mendimin e vet, e cila ka dy javë kohë për të dhënë një mendim, më pas nëse pajtohet me propozime apo jo, të vazhdohet në Kuvend. Ne jemi të interesuar që kjo të përmbyllet para përfundimit të këtij sesioni”, tha kryetar i Komisionit për Buxhet, Armend Muja.

Ndërkaq, transparencë më të madhe në procesin e përzgjedhjes së guvernatorit të ri kërkuan edhe anëtarët e Komisionit për Buxhet, para të cilëve në javën e ardhme, pritet të raportojë ushtruesi i detyrës së guvernatorit, Bashkim Nurboja.

“Është një proces i tejzgjatur, sepse kjo pozitë është më tepër politike, për t’i avancuar njerëzit politikë”, tha anëtari i Komisionit për Buxhet, Pal Lekaj.

Në prill të këtij viti me rekomandim të Komisionit për Buxhet, procesi për përzgjedhjen e guvernatorit u kthye në pikën zero për shkak të parregullsive. /atvlive.tv

Edicionin Qendror të lajmeve në ATV e gjeni në videon më poshtë:

Prokuroria e Specializuar e ka përsëritur disa herë “frikësimin e dëshmitarëve” si një prej argumenteve për ta arsyetuar rëndësinë e procesit të saj dhe mbajtjes në paraburgim të krerëve të UÇK-së.

Por, dje, në një debat të gjatë mes gjyqtarëve, prokurorisë dhe avokatëve, Prokuroria e Specializuar është përballur me një pyetje direkte: Nëse kanë ndonjë rast kur ndonjë dëshmitarë që është paraqitur deri tash në seancën kundër krerëve të UÇK-së, është frikësuar.

Ata kanë thënë shkurt, JO!

Ky ishte diskutimi mes gjyqtarit Charles Smith dhe një prokurori:

Gjyqtari: A keni ndonjë rast të ndonjë dëshmitari që ka dhënë dëshminë, e di që kemi vetëm tre muaj që dëshmojmë çështjen në këtë sallë të gjyqit, por a keni dëgjuar ndonjë rast të ndonjë

dëshmitari të ketë pasuar kanosje pas dhënies se dëshmisë? Çfarëdo lloj kanosje.

Prokurori: Që është frikësuar?

Gjyqtari: Çdo rast…

Prokurori: Jo, nuk mund të tregoj këto çështje individuale

Gjyqtari: Po pyes a keni ndonjë rast?

Prokurori: Jo i nderuar gjykatës, nuk kemi.

Gjyqi ndaj Hashim Thaçit, Kadri Veselit, Rexhep Selimit dhe Jakup Krasniqi ka nisur me 3 prill dhe deri me tash janë dëgjuar vetëm 10 dëshmitarë dhe ata pothuajse në tërësi në seanca private. Kjo ka ngritur kritika të mëdha në publik. Specialja është kritikuar edhe më herët për mbylljen karshi publikut e mbrojtjes, pasi shumë nga provat e saja janë lënë të redaktuara.

Asociacioni i komunave me shumicë serbe nuk mund të krijohet pa një dekret të Qeverisë së Kosovës, vlerësojnë Enver Hasani, profesor i së Drejtës dhe Marrëdhënieve Ndërkombëtare në Universitetin e Prishtinës dhe Dushan Janjiq nga Forumi për marrëdhënie etnike në Beograd.

Presidenti i Serbisë, Aleksandar Vuçiq, më 18 qershor, ka deklaruar se serbët në Kosovë do të marrin “vendime aktive” në periudhën e ardhshme, pa specifikuar se për çfarë bëhet fjalë.

Ai ka theksuar se në kremten ortodokse Shën Vidi (Vidovdan) që shënohet më 28 qershor, serbët “në mënyrë paqësore, do të ndërmarrin hapat e tyre në rrugën drejt lirisë”.

Çka është Shën Vidi?
Festa e Shën Vidit shënohet nga serbët në përkujtim të datës 28 qershor të vitit 1389 kur kishte ndodhur Beteja e Kosovës.

Historia serbe e njeh rezultatin e kësaj beteje mesjetare si fitoren shpirtërore të saj, pavarësisht një humbjeje të madhe të forcave ballkanike nga forcat e Perandorisë Osmane.

Më 17 qershor, e përditshmja serbe “Blic”, duke u thirrur në burime, ka raportuar se serbët në Kosovë do të nisin në mënyrë të pavarur të formojnë Asociacionin e komunave me shumicë serbe.

Sipas këtij mediumi serb, planifikohet që në të ardhmen të mbahet një kuvend i popullit serb në Kosovë, në të cilin do të shpallet Asociacioni dhe do të krijohen organet e tij.

Radio Evropa e Lirë i është drejtuar Qeverisë së Kosovës që të japë një koment lidhur me deklaratat e Vuçiqit, si dhe për pretendimet në mediat serbe se më 28 qershor mund të shpallet njëanshëm formimi i Asociacionit. Por, deri në publikimin e këtij teksti, nuk ka kthyer përgjigje.

Çfarë parasheh Asociacioni?
Asociacioni i komunave me shumicë serbe parashikohet që të mbledhë rreth vetes dhjetë komuna në Kosovë të banuara me shumicë serbe: Mitrovicë e Veriut, Kllokot, Partesh, Ranillug, Graçanicë, Zveçan, Zubin Potok, Novobërdë, Leposaviq dhe Shtërpcë.

Sipas marrëveshjeve, Asociacioni ka për qëllim të përfaqësojë interesat kolektive të këtyre komunave, veçmas në fushën e arsimit, shëndetësisë, planifikimit urban dhe rural si dhe të ekonomisë.

Marrëveshja e vitit 2013 për Asociacionin thekson se ai do të krijohet me statut dhe strukturat e tij, mbi bazën e statutit të Asociacionit të komunave të Kosovës.

Po ashtu thuhet se Asociacioni do të ushtrojë edhe përgjegjësi të tjera shtesë, varësisht se si delegohen nga autoritetet qendrore dhe që do të ketë një rol përfaqësimi tek autoritetet qendrore.

Sipas marrëveshjes së vitit 2015 për parimet për krijimin e Asociacionit, objektivat kryesorë të Asociacionit janë: ushtron vështrimin e plotë për zhvillimin e ekonomisë lokale; ushtron vështrimin e plotë në fushën e arsimit; ushtron vështrimin e plotë për përmirësimin e shëndetësisë lokale primare e sekondare dhe përkujdesjen sociale; ushtron vështrimin e plotë për koordinimin e planifikimit urban dhe rural; aprovon masa për përmirësimin e kushteve lokale të jetesës për të kthyerit në Kosovë; zhvillon, koordinon, lehtëson aktivitete hulumtuese dhe zhvillimore; promovon, shpërndan, dhe avokon për çështjet me interes të përbashkët të anëtarëve të tij dhe i përfaqëson ata përfshirë tek autoritetet qendrore; vendos marrëdhënie dhe hyn në marrëveshje bashkëpunimi me asociacionet tjera të komunave, vendore dhe ndërkombëtare, etj.

BE-ja dhe SHBA-ja: Veprimet e njëanshme të panevojshme
Në debatin e Këshillit të Atlantikut, i cili është mbajtur të martën në Uashington, është ngritur edhe pyetja lidhur me mundësinë që serbët e veriut të shpallin njëanshëm formimin e Asociacionit të komunave me shumicë serbe.

I dërguri i posaçëm i Bashkimit Evropian për dialogun Kosovë-Serbi, Mirosllav Lajçak, ka thënë se veprimet e njëanshme janë burim i tensioneve.

“Si ndërmjetësues i dialogut, dua të dekurajoj fuqishëm të dyja palët që të mos marrin vendime të njëanshme, sepse kemi parë që veprimet e njëanshme prodhojnë më shumë tensione, më shumë konfrontime dhe dhunë”, ka theksuar Lajçak.

Ai ka shtuar se tashmë ekziston dialogu ndërmjet Kosovës dhe Serbisë dhe marrëveshja ndërmjet dy vendeve, duke iu referuar marrëveshjes së Brukselit drejt normalizimit, e arritur më 27 shkurt dhe dakordimit më 18 mars në Ohër, për aneksin e zbatimit të saj.

Kjo marrëveshje parasheh zbatimin e marrëveshjeve të mëhershme të Brukselit, përfshirë edhe atë për formimin e Asociacionit.

“Nëse nuk do të kishte marrëveshje, atëherë palët do të mund të tentonin të bënin diçka vetë. Por, tani ne e kemi një rrugë të qartë drejt normalizimit. Mënyra e vetme logjike është që t’i kthehemi kësaj dhe të vazhdojmë me zbatimin. Asnjë lëvizje e njëanshme me potencial për të destabilizuar edhe më tej situatën mes tyre”, ka përfunduar Lajçak.

Me këtë qëndrim është pajtuar edhe i dërguari i posaçëm amerikan për Ballkanin perëndimor, Grabriel Escobar.

“ Nuk shohim nevojën për veprime të njëanshme”, ka thënë Escobar.

Hasani: Asnjë marrëveshje nuk lejon formimin e njëanshëm të Asociacionit
Përderisa presidenti serb, Vuçiq, nuk i ka specifikuar hapat që do të ndërmarrin serbët në Ditën e Shën Vidit, mbetet e paqartë se cili veprim eventual i tyre mund të pasojë, thotë Enver Hasani, profesor i së Drejtës dhe Marrëdhënieve Ndërkombëtare në Universitetin e Prishtinës.

Por, sipas tij, e sigurt është se pa një dekret nga ana e Qeverisë së Kosovës, Asociacioni i komunave me shumicë serbe nuk mund të formohet, madje as në mënyrë të njëanshme.

“Statuti, i cili është akti themeltar i Asociacionit ose struktura normative më e lartë brenda tij, merr jetë ose frymë me një vendim të Qeverisë. Pastaj, shkon në Gjykatë Kushtetuese për t’u konfirmuar nëse është në pajtim me Kushtetutën. Kjo procedurë figuron në të gjitha marrëveshjet – edhe në atë të fundit në Ohër, në atë të Brukselit të vitit 2013 dhe atë 2015 – dhe nuk ka alternativë tjetër”, thotë Hasani.

Ai shton se strukturat që e përbëjnë Asociacionin, nuk mund të formohen pa marrë fuqi juridike statuti.

Fuqia juridike e statutit të Asociacionit, siç thotë Hasani, mund të sigurohet vetëm me një akt të Qeverisë dhe me “lejen” nga Gjykata Kushtetuese, “ e cila do të nënkuptonte se statuti dhe akti, me të cilin ai hyn në fuqi, nuk janë kundër-kushtetuese”.

Në të kundërtën, siç thotë profesor Hasani, në rast se serbët e shpallin njëanshëm formimin e Asociacionit, kriza do të thellohej edhe më tej.

“Pastaj nuk bëhet më fjalë për strukturë normative vetë-organizuese, por bëhet fjalë për prodhim të një krize, e cila e ka një dimension tjetër prej kësaj që e shohim sot dhe me të cilën duhet të merret Brukseli (BE-ja, si ndërmjetësuese e dialogut Kosovë-Serbi) dhe palët”, thekson Hasani, duke shtuar se megjithatë, nuk beson që pala serbë do të hyjë, siç e quan ai, në “një aventurë të tillë”.

Janjiq: Shpallja e Asociacionit do të ishte farsë
Edhe Dushan Janjiq, drejtor i Forumit për marrëdhënie etnike në Beograd, vlerëson se serbët nuk mund ta formojnë njëanshëm Asociacionin, pa një dekret të Qeverisë së Kosovës dhe se të gjitha marrëveshjet e arritura, qoftë në Bruksel, qoftë në Ohër, nuk e parashohin ndryshe.

Sipas tij, deklaratat e presidentit Vuçiq se serbët “do të ndërmarrin hapat e tyre në rrugën drejt lirisë” në ditën kur shënohet festa e Shën Vidit, më 28 qershor, është vetëm shfrytëzim politik i mitologjisë për retorikë nacionaliste.

Janjiq thotë se shfrytëzimin politik të kësaj mitologjie e kishte bërë edhe ish-lideri serb i dy dekadave të fundit të shekullit të kaluar, Sllobodan Millosheviq, më 28 qershor të vitit 1989, në Gazimestan, për homogjenizimin e serbëve në ish-Jugosllavi.

Më pas, nisën luftërat e përgjakshme në ish-hapësirën e atij shteti, të cilat brenda një dekade rezultuan me shpërbërjen e tij.

Janjiq thekson se deklarata e Vuçiqit është vazhdimësi e asaj politike, e cila, siç thotë ai, ka për interes territorin dhe jo njerëzit që jetojnë aty.

Ai thotë se nuk ka informacion, nëse serbët në veri të Kosovës do të shpallin njëanshëm formimin e Asociacionit të komunave me shumicë serbe. Por, siç thotë ai, nëse e bëjnë këtë, “do të ishte gabim i madh”.

“Në qoftë se do të ndodhte vetë-shpallja e Asociacionit të komunave me shumicë serbe – unë nuk kam informacionet që i ka gazeta Blic – për mua do të ishte një farsë. Kjo nuk është përgjigja e duhur në situatën që është krijuar në veri të Kosovës. Situatën në veri të Kosovës e shoh – së paku, unë e shoh ashtu – si ‘përgjigje vëllazërore’ të (kryeministrit të Kosovës, Albin) Kurtit, të cilit gjithashtu, në veri i intereson vetëm territori”, thotë Janjiq.

Ai shton se Vuçiqi e ka humbur hapin për kthimin e serbëve të veriut në institucionet e Kosovës, të cilat ata i braktisën në nëntorin e vitit të kaluar.

Serbët i braktisën të gjitha institucionet në veri të vendit, në shenjë kundërshtimi ndaj vendimit të Qeverisë së Kosovës për riregjistrimin e automjeteve me targa jolegale të Serbisë, në targa RKS-Republika e Kosovës.

“Serbët do t’i riaktivizojnë komunat paralele”
Kthimi i serbëve të veriut në institucionet e Kosovës, siç thotë Janjq, tashmë nuk është i thjeshtë sepse Qeveria e Kosovës nuk lejon një gjë të tillë me automatizëm, pa u zbatuar procedurat ligjore, e të cilat marrin kohë.

Në këtë pikë, siç thotë Janjiq, Vuçiqi mund të ndërmarrë hapa të tjerë në veri të Kosovës.

“Unë mendoj se ata do të kenë një deklaratë, me të cilën do të shpallet diçka, por të cilën Blic e ka interpretuar si vetorganizim të Asociacionit. Mendoj se kjo nuk do të ndodhë. Një pjesë e komunitetit serb do të shpallë se nuk ka vdekur Këshilli Kombëtar Serb. Ndërkaq, pjesa tjetër (e serbëve) në veri, do të bëjnë një koordinim të ri të komunave (paralele, sipas sistemit serb), të cila tashmë i kanë, por vetëm do t’i aktivizojnë. Ato tashmë i kanë, që nga viti 2015”, thekson Janjiq.

Këshilli Kombëtar Serb ka nisur të funksionojë qysh nga periudha pas luftës në Kosovë dhe qëllimi i saj ka qenë mbrojtja e interesave të serbëve. Ky këshill përbëhej nga politikanë dhe aktivistë të ndryshëm nga komuniteti serb në Kosovë.

Që nga viti 2013, kur u formua Lista Serbe – partia më e madhe serbëve të Kosovës – e cila ka mbështetjen e Beogradit zyrtar, puna e këtij këshilli ishte pasivizuar.

Po atë vit, në kuadër të dialogut Kosovë-Serbi, ishte arritur edhe marrëveshja për formimin e Asociacionit të komunave me shumicë serbe, ndërkaq parimet për të u dakorduan në vitin 2015.

Po atë vit, Gjykata Kushtetuese e Kosovës tha se Marrëveshja mbi parimet për themelimin e Asociacionit nuk ishte në harmoni të plotë me aktin më të lartë juridik të shtetit, por marrëveshja mund të harmonizohet përmes akteve ligjore.

Që atëherë, qeveritë e Kosovës, përfshirë edhe aktualen, në vazhdimësi janë përballur me kërkesën e palës serbe dhe me presionin e faktorëve ndërkombëtarë për formimin e Asociacionit.

Zbatimin e të gjitha marrëveshjeve të arritura në dialogun Kosovë-Serbi, përfshirë edhe formimin e Asociacionit, e parasheh edhe marrëveshja e fundit drejt normalizimit të marrëdhënieve mes palëve, e arritur më 27 shkurt në Bruksel, si dhe pajtimi për aneksin e zbatimit të saj, që u arrit më 18 mars në Ohër.

Bashkimi Evropian ka ftuar Kurtin dhe Vuçiqin për një takim në Bruksel gjatë kësaj jave, në mes të tensioneve të rritura mes dy shteteve.

Presidenti i Serbisë tashmë ka deklaruar se refuzon të takohet me Kurtin, ndërkaq ky i fundit ende nuk ka vendosur nëse do të marrë pjesë në takimin e Brukselit./REL

Koordinatori për Antikorrupsionin në Departamentin amerikan të Shtetit Richard Nephew intervistë me Shefin e Shërbimit shqip të Zërit të Amerikës Arben Xhixho, mbi përcaktimin e kryetarit të komunës së Strugës.

Departamenti i Shtetit shpalli të martën si person ‘non grata’ Ramiz Merkon, kryetar i Komunës së Strugës në Maqedoninë e Veriut, për shkak, siç thuhet në njoftim, të përfshirjes së tij në korrupsion të konsiderueshëm, përvetësim fondesh dhe ndërhyrje në procese gjyqësore, duke dëmtuar besimin e publikut ndaj institucioneve demokratike.

Zëri i Amerikës: Zoti Nephew, zoti Escobar, Departamenti i Shtetit përcaktoi për korrupsion madhor kryetarin e bashkisë së Strugës, Ramiz Merko, duke e shpallur një person ‘non grata’. Siç kemi parë me përcaktime të tilla edhe në të kaluarën, njotimi nuk ka shumë specifika. A mund të ndani me më shumë informacion se përse është marrë ky vendim?

Richard Nephew: Vendimi u mor sepse Sekretari i Shtetit kishte informacione të besueshme që sugjeronin se zoti Merko ishte përfshirë në korrupsion madhor. Dhe kështu sipas ligjeve, kur Sekretari arrin në këtë përfundim, përcaktimi i dikujt është ligjërisht i detyrueshëm, siç ndodhi sot.

Zëri i Amerikës: A mund të ndani me ne mbi çfarë provash konkrete është bërë ky përcaktim?

Richard Nephew: Po, informacioni që u publikua si pjesë e njoftimit për shtyp tregon se bëhet fjalë për përvetësim fondesh dhe ndërhyrje në proceset gjyqësore. Dhe ju e dini, duke pasur parasysh natyrën e përcaktimeve dhe bazën e tyre ligjore, ky është informacioni që ne mund të bëjmë publik mbi këtë rast.

Zëri i Amerikës: A pritet të ketë ndikime politike pas këtij përcaktimi?

Gabriel Escobar: Shpresoj që ky vendim do të ndihmojë qeverinë e Maqedonisë së Veriut të vazhdojë përpjekjet e saj për të luftuar korrupsionin.

Zëri i Amerikës: Kemi parë që përcaktime që janë bërë në të kaluarën kanë ngritur pikëpyetje mbi efektshmërinë e tyre dhe nëse ato i shërbejnë synimit të shpallur?

Richard Nephew: Një nga qëllimet kryesore të këtyre përcaktimeve, synimi kryesor i Kongresit që miratoi ligjin, është për të treguar mbështetjen tonë për sundimin e ligjit për përpjekjet kundër korrupsionit në mbarë botën. Dhe duke i identifikuar publikisht, duke i përcaktuar ata në bazë të ligjit 7031C dhe duke u mohuar mundësinë për të ardhur në Shtetet e Bashkuara, ne mendojmë se ndihmojmë në mbështetjen e parimit të sundimit të ligjit.

Ne po ashtu mendojmë se forcojmë normat kundër korrupsionit në aktivitetet dhe praktikat në mbarë botën. Sa herë që flitet për kufizime vizash, ose sanksione, përherë lind pyetja e efektshmërisë dhe ndikimit të tyre. Në përgjithësi, ne kemi patur rezultate shumë të mira duke ndihmuar shoqëritë civile dhe aktivistë të tjerë, për t’u treguar atyre se nuk janë vetëm, se kur ndeshen me individë të korruptuar ata kanë mbështetjen e komunitetit ndërkombëtar.

Zëri i Amerikës: Në vendimet tuaja, a ka rol fakti që një person që përcaktohet është ose jo në pushtet. Në shumicën e rasteve, ata që përcaktohen janë ish-zyrtarë dhe rrallë njerëz që janë në pushtet.

Richard Nephew: Kjo ka të bëjë me pikëpamjen ligjore. Ligji thotë se kur Sekretari i Shtetit ka informacione të besueshme që tregojnë përfshirje në korrupsiuon madhor, Sekretari është i detyruar të vendosë saknksione duke u mohuar këtyre individëve vizat. Pra nga ana ligjore ne veprojmë kur kemi informacione. Kjo është pjesë e hetimeve, që kryhen për të arritur në përcaktimin e dikujt. Nëse dikush është zytar, apo ish-zyrtar, kjo nuk ka shumë rëndësi për atë që na kërkon ligji për të bërë.

Nga ana praktike, identifikimi dhe reagimi ndaj një ish zyrtari të përfshirë në akte korruptive ka meritat e veta. Një pjesë e arsyes pas veprimeve tona është të mbështesim shoqërinë civile, të mbështesim ata që kërkojnë t’i mbajnë përgjegjës individët e korruptuar. Pra që edhe pasi të jenë larguar nga pushteti të mos jenë në gjendje të përfitojnë nga ato që kanë bërë kur ishin në pushtet.