Përfaqësuesi i lartë të Bashkimit Evropian, Josep Borrell informoi për fillimin e takimit me kryeministrin Albin Kurtin, me ç’rast u shpreh se synojnë të gjejnë zgjidhje për de-përshkallëzimin e situatës.
“Situata në veri të Kosovës vazhdon të jetë shumë e tensionuar. Sot, ne synojmë të gjejmë zgjidhje për de-përshkallëzimin e menjëhershëm dhe për rrugën përpara. Takimi me kryeministrin Albin Kurti ka filluar.”, shkroi Borrell në Twitter.
Mbrëmjen e së mërkurës, kryeministri Albin Kurti ka konfirmuar se do të udhëtojë për në Bruksel për takimin e radhës të nivelit të lartë, në kuadër të dialogut Kosovë-Serbi. Ai është shprehur se atje do të insistojë për lirimin urgjent dhe pa kushte të tre policëve të rrëmbyer nga Serbia, transmeton KP.
Zëdhënësi i Bashkimit Evropian, Peter Stano ka deklaruar po të mërkurën se nuk mund të konfirmojë datën për takimin në mes të kryeministrit të Kosovës, Albin Kurti dhe presidentit serb, Aleksandar Vuçiq. Megjithatë, Stano ka shtuar se nuk ka kohë për të humbur dhe duhen veprime konkrete.
Situata në veri të Kosovës është tensionuar prej 26 majit kur kryetarët e zgjedhur janë detyruar të shkojnë në vendet e tyre të punës nën asistimin e Policisë së Kosovës.
Para ndërtesave komunale janë duke qëndruar protestues serbë, të cilët po kundërshtojnë kryetarët shqiptarë.
Protestuesit në veri, në mesin e tyre edhe të tillë me maska, kanë sulmuar pjesëtarë të Policisë së Kosovës, KFOR-it si dhe gazetarë, të cilët po raportojnë nga pjesa veriore e vendit.
Autoritetet e Kosovës kanë arrestuar disa prej sulmuesve, në mesin e tyre edhe organizatorin e sulmeve ndaj KFOR-it, Millan Millenkoviq-Llune.
Ndërsa, forcat serbe kanë rrëmbyer tre policë të Kosovës, brenda territorit të vendit tonë, të cilët janë duke u mbajtur në Serbi.
Sekretari i Përgjithshëm i NATO-s, Jens Stoltenberg, dhe presidenti i Malit të Zi, Jakov Millatoviq, kanë ftuar Kosovën dhe Serbinë që të ulin tensionet mes tyre dhe të përqendrohen në kalimin e kësaj situate përmes dialogut.
Këto komente ata i bënë në Bruksel gjatë vizitës së parë të presidentit të ri të Malit të Zi Millatoviq në selinë e NATO-s, ku u takua me Stoltenbergun dhe biseduan edhe për situatën në Kosovë.
Stoltenberg tha se pas rritjes së tensioneve në veri të Kosovës, NATO ka shtuar praninë e saj dhe përmes misionit të saj paqeruajtës në Kosovë, KFOR, angazhohet për të siguruar një mjedis të sigurt për të gjithë.
“I ftoj palët të ulin tensionet dhe të kthehen në dialogun e ndërmjetësuar nga BE-ja. Kjo është kyçe për qetësinë në Kosovë dhe për stabilitetin e gjithë rajonit”, tha shefi i NATO-s.
Stoltenberg u shpreh se aleanca ushtarake perëndimore mirëpret përpjekjet e BE-së për të shtensionuar situatën në Kosovë.
Me qëllim që të shtensionojë situatën, BE-ja më 22 qershor do të mbajë takime në Bruksel me liderët e Kosovës dhe Serbisë.
“Situata në Kosovë dëshmon se prania e NATO-s është e rëndësishme. Ne do të jemi besnikë ndaj mandatit që kemi sipas rezolutës së OKB-së dhe kemi rritur praninë tonë në Kosovë si përgjigje ndaj rritjes së sfidave të sigurisë. Prania jonë është për të siguruar lirinë e lëvizjes dhe mjedisit të sigurt për të gjithë qytetarëve në Kosovë. Në këtë drejtim, ne mbështesim edhe dialogun [midis Kosovës dhe Serbisë] dhe ftojmë palët që të përmbahen nga veprimet e njëanshme të cilat mund të përshkallëzojnë situatën”, tha ai.
Ndërkaq, presidenti i Malit të Zi, Jakov Millatoviq, tha se për shtetin e tij stabiliteti i rajonit të Ballkanit Perëndimor ka një rëndësi të veçantë dhe angazhimi i përbashkët i NATO-s dhe BE-së e forcon sigurinë e tërë rajonit.
Që nga fundi i majit, tensionet në veri të Kosovës u rritën pasi kryetarët e rinj shqiptarë të komunave në veri, me asistimin e Policisë së Kosovës, hynë në ndërtesat komunale, mes kundërshtimeve nga serbët lokalë.
Më 29 maj, serbët lokalë në Zveçan u përleshën me trupat e KFOR-it. Nga përleshjet u lënduan dhjetëra persona nga të dyja palët.
Më 14 qershor, tensionet mes Kosovës dhe Serbisë u përkeqësuan edhe më tej, pas arrestimit të tre zyrtarëve policorë të Kosovës. Serbia tha se ata u arrestuan “thellë” brenda territorit të saj, por Kosova tha se ata ishin duke patrulluar në territorin e Kosovës, pranë vijës kufitare me Serbinë në Leposaviq./REL/
Së fundmi, nga kryetari i komunës së Prishtinës, Përparim Rama, është kumtuar një vendim, i cili ka të bëjë për qentë endacakë. Një subvencionim për të gjithë qytetarët të cilët vendosin të adaptojnë një qen endacakë nga Prishtina, do të jetë së shpejti tashmë edhe i hapur për të gjithë qytetarët.
Drejtor i Drejtorisë për Siguri dhe Emergjenca në Komunën e Prishtinës, Lulzim Fushtica, në një prononcim për ATV-në, tha se vendimi për subvencionimin prej 50 Eurosh për qytetarët që adaptojnë një qen në kryeqytet ka ardhur e rrjedhojë angazhimit të komunës për të zgjedhur problemin me qentë endacakë në Komunën e Prishtinës.
“Ky vendim vie si pasojë e analizës dhe projekteve që i kemi pasur edhe më herët, duke filluar nga viti i kaluar kur realisht jemi marrë seriozisht me këtë çështjen e qenve endacakë, nga dy këndvështrime, nga këndvështrimi i sigurisë publike dhe shëndetit publik, por edhe nga këndvështrimi i mbrojtjes dhe trajtimit human të qenve endacakë që sillen në rrugët e Prishtinës, dhe normal që nuk trajtohen në mënyrë të duhur dhe mënyrë humane. Popullacioni i qenve endacakë është rritur në mënyrë enorme në kryeqytet, realisht në dy vitet e fundit dhe kjo ka paraqitur problem dhe kemi pasur edhe ankesa edhe kërkesa edhe nga qytetarët, nga dy palët e interesit që ta trajtojmë këtë tematikë. Nga viti i kaluar kemi filluar intensivisht të merremi me këtë çështje duke i hapur 25 pika të ushqimit për qentë endacakë, duke filluar me programin e kapjes, sterilizimit, vaksinimit dhe lëshimit në bazë të udhëzimit administrativ, ndërsa ky vendimi i fundit vie vetëm si rrjedhojë i atij planit më të madh për trajtimin e qenve endacakë”, tha Fushica.
Qëllimi kryesor i këtij vendimi, sipas tij, është që të subvencionohen dhe të rritet vetëdija e qytetarëve që të adoptojnë kafshë endacake, që kafshët endacake ta kenë një shtëpi dhe një trajtim human.
“Jemi në fazën përfundimtare të miratimit të vendimit, që me këtë do të formatizohet çështja e adoptimit të qenve endacakë dhe motivimi dhe ngritja e vetëdijes qytetarë që qentë endacakë janë kafshë që duhet të trajtohen mirë, duhet që të kujdesemi për to, por në anën tjetër të sigurohet lëvizja e lirë e qytetarëve nëpër shehseht, nëpër rrugët e Prishtinës duke pasur parasysh numër të madh të sulmeve që kanë ardhë si rrjedhojë e saj. Nga viti i kaluar deri më tani, kemi pasur janë numër shumë të madh të ankesave nga qytetarët e kryeqytetit, për fat të keq kemi edhe padi ndaj komunës nga qytetarët, por vetëm një fakt i vogël që e ilustron krejt problematikën, vetëm stacioni i jug i Policisë së Kosovës që e mbulon vetëm një pjesë të kryeqytetit na ka raportuar që vetëm nga janari deri në qershor të këtij viti i kanë pasur 31 raste të sulmeve të qenve endacakë ndaj qytetarëve që i bie afër 6 sulme në muaj vetëm në një pjesë të qytetit. Është problematikë që të shikohet nga të dy këndet, jo vetëm nga këndi i adoptimit apo subvencionit. Subvencioni është vetëm një metodë apo mënyrë se si t’i motivojmë qytetarët dhe të zgjedhim këtë problematikë” u shpreh Fushica.
Ai tha se ende nuk është vendosur numri përfundimtar deri në sa qen mund t’i adoptojë një familje, por për këtë janë në konsultime me Agjencinë e Veterinës dhe Ushqimit dhe se shpejti do të merret një vendim.
“Numri përfundimtar ende nuk është caktuar. Ne jemi në fazën përfundimtare të hartimit të rregullores dhe numri do të caktohet pas konsultimit me Agjencinë e Veterinës dhe Ushqimit të cilët janë specialistë, janë ekspertë të fushës, dhe me propozimin e tyre do të vendoset se cili do të jetë numri, do të jetë një, dy apo tre, varet se sa ata e përcaktojnë dhe se sa një familje mund të kujdeset në mënyrë të duhur dhe në mënyrë që të mos ketë keqtrajtime të kafshëve. Për çdo qen do të ndahet nga 50 euro në muaj dhe kryeqyteti do të lidh kontratë me qytetarët ku do të përcaktohen obligimet që do t’i ketë qytetari kundrejt kontratës, por edhe kryeqyteti”, tregoi Fushica.
Ai tha se në rast të mos respektimit të kontratës siç mund të jenë keqtrajtimi apo lëshimi i qenit endacak nga adoptuesi, parashihen edhe gjoba të cilat sipas tij do të jenë të larta.
“Në kontratë do të parashihen edhe gjoba në rast se qytetari keqtrajton apo e lëshon qenin endacakë, duhet të parashihen gjoba monetare që janë realisht gjoba të larta. Pra do të ketë edhe një obligim dhe një mekanizëm i sigurisë që të mos keqtrajtohen kafshët. Sa i përket monitorimit, duhet të bëhet nga Agjencia e Veterinës për arsye se ata i kanë inspektorët e veterinës dhe inspektorët sanitarë, për shkak se komuna nuk ka, por ne si drejtori do të kujdesemi në koordinim edhe me shoqatat e mbrojtës së kafshëve që të kemi një koordinim të mirë dhe monitorim të kësaj situate”, theksoi Fushica. /atvlive.tv
Gjendja e rëndë ekonomike, braktisja e shkollës dhe dhuna në familje janë disa nga arsyet për martesat e hershme në Kosovë, e që më së shumti i prek vajzat e komuniteteve rom, ashkali dhe egjiptian.
Për këtë temë sot në bibliotekën kombëtarë “Pjetër Bogdani” organizohet një diskutim publik me qëllim parandalimin e këtyre martesave.
Zyrtarja për program në organizatën “Zëri i romëve, ashkalive dhe egjiptianëve”, Amandë Toska, në emisionin ALARM në ATV, tregoi se në këtë diskutim publik do të ketë panelistë, po ashtu edhe pjesëtarë të komuniteteve rom, ashkali dhe egjipta, komunitetet e tjera që jetojnë në Kosovë, si dhe të gjithë qytetarët e Republikës që kanë dëshirë me qenë pjesë e këtij diskutimi publik, ku do të trajtohet tema për parandalimin e martesave të hershme.
Ajo tha se edhe në vendin tonë ka një numër të martesave të përkohsme, disa prej të cilave janë trajtu nga Policia e Kosovës dhe organet kompetente, ndërsa synimi i këtij aktiviteti, por edhe aktiviteteve të tjera nga kjo organizatë ka për synim që të ulën martesat e përkohshme në Kosovë.
“Prej informatave që i kemi marrë nga Policia e Kosovës ka raste që raportohen, ka raste që janë trajtuar. Munden me pasë edhe raste aktive realisht për të cilat ata nuk janë në dijeni. Por sa është numri i saktë i rasteve në tri vitet e fundit ose edhe gjatë një periudhe më të gjatë, nuk kemi diçka konkrete ose zyrtare që kishim mujt me e potencu. Edhe ne si organizatë nuk është se kemi diçka konkrete, por nga hulumtimet në terren ose të dhënat që ne i marrim prej pjesëtarëve nga komunitetet nga takimet që kemi konstant me ta, sepse ne e mbulojmë tërë regjionin e Kosovës me programet dhe aktivitetet që i realizojmë në kuadër të projekteve tona, thuhet që ka numër të martesave të hershme, të braktisjes së shkollimit dhe për këtë arsye ne si organizatë, synimi i jonë i kësaj kampanje është që të ulën rastet e mundshme të martesave të hershme”, tha Toska. /atvlive.tv
Ish-kryeministri Ramush Haradinaj, ka kërkuar përgjigje nga PDK-ja e LDK-ja lidhur me mocionin, për rrëzimin e Qeverisë.
Ai tha se “veç Kosova përfiton” nëse mocioni kundër Qeverisë Kurti kalon.
“Pse ju lutna ka hezitime për mocion? Ku e keni problemin ju që po hezitoni për mocion? A është e vërtetë që kanë filluar ndëshkime dhe a është e vërtetë që kemi filluar të dobësohemi. Pse nuk po deklaroheni? Ku e keni problemin kolegë opozitarë PDK dhe LDK që po mendoni hala se kush po përfiton prej mocionit. Veç një përfitues është: Kosova dhe interesi ynë. Unë nuk shoh më detyra të zakonshme në këtë parlament derisa ju nuk deklaroheni pse nuk e keni guximin”, tha Haradinaj.
Sipas Haradinajt, ndëshkimet ndaj Kosovës tashmë kanë filluar.
“A ka dikush në këtë sallë që nuk e di se kanë fillua ndëshkimet ndaj Kosovës. Ndëshkimet si në politikë, si në ekonomi, si në siguri”, shtoi tutje ai.
Policia e Kosovës ka njoftuar se përkohësisht do të bllokohet rruga Prishtinë-Gjilan, për shkak të protestës që është paralajmëruar nga serbët sot në Graçanicë.
Policia njofton se do ta ridrejtojë trafikun në këtë pjesë deri në përfundim të protestës.
“Me qëllim të mbarëvajtjes së protestës së paralajmëruar, që do të mbahet sot në Graçanicë, duke filluar nga ora 11:30 e deri në përfundim të protestës, do të ridrejtoj trafikun për automjetet që qarkullojnë nga Prishtina në Gjilan dhe anasjelltas. Rruga kryesore në Graçanicë nuk do të jetë e qarkullueshme për trafik deri në përfundim të protestës. Andaj për të përballuar sa më lehtë rrethanat që do të paraqiten në qarkullimin rrugor, kërkojmë ndihmën dhe mirëkuptimin e të gjithë pjesëmarrësve në trafik”, thuhet në njoftim e policisë.
Serbët kanë protestuar edhe gjatë ditës së djeshme në Graçanicë, pas arrestimit të Dragisha Millenkoviq i cili dyshohet për krimet e kryera gjatë periudhës së luftës në Kosovë.
Ndryshe, Prokuroria Speciale e Republikës së Kosovës ka bërë kërkesë për caktimin e masës së paraburgimit pranë Departamentit Special të Gjykatës Themelore në Prishtinë, ndaj Dragisha Millenkoviqin, i cili u arrestua dje në Graçanicë, nën dyshimin për krime lufte kundër popullsisë civile gjatë periudhës së luftës në Kosovë 1998-1999.
Shefi i delegacionit të Bashkimit Evropian në Serbi, Emanuele Giaufret, tha se BE-ja është shumë e shqetësuar për situatën në veri të Kosovës.
Ai deklaroi se qëndrimi i të gjithë anëtarëve të komunitetit evropian është që nëse nuk ka de-përshkallëzimin në terren, do të ketë pasoja të rënda.
“BE-ja ka propozuar një plan për de-përshkallëzimin e situatës, i cili përfshin hapa të shumtë. Pezullimi i operacioneve speciale policore në komuna (në veri të Kosovës), kryetarët duhet të punojnë jashtë ndërtesave të atyre komunave, protestat duhet të ndalen dhe në zgjedhjet e reja në të cilat do të marrin pjesë të gjithë duhet të organizohen në mënyrë që qytetarët të mund të zgjedhin përfaqësuesit e tyre”, tha ai, duke iu përgjigjur një pyetjeje në fillim të “Javës Evropiane të Mundësive” të organizuar nga delegacioni i BE-së në Serbi.
Ai ka shtuar se zyrtarët evropianë kanë qenë të qartë në deklaratat e tyre dhe se nëse nuk ka deeskalim do të ketë pasoja të rënda, por nuk ka specifikuar se çfarë ka dashur të thotë me këtë.
Profesori i Universitetit Johns Hopkins, Daniel Serwer, ka folur për gjendjen aktuale në veri të Kosovës dhe qëllimet e presidentit serb Aleksandar Vuçiq që ta mbajë kontrollin mbi veriun e Kosovës.
Analisti amerikan dhe njohësi i rrethanave të Ballkanit, Serwer, në një intervistë për “N1” tha se Albin Kurti po përpiqet kur të vendosë sovranitetin dhe integritetin territorial të Kosovës, që natyrisht është obligim i tij kushtetues.
Ndërsa për Vuçiqin thotë se me destabilizimin e situatës në veri të Kosovës qëllimi i tij [Vuçiqit] dhe i politikës së tij është të ketë një tjetër ‘Republika Srpska’ në Ballkan, që i gjithë rajoni të jetë gjithmonë në prag të destabilizimit.
“Por, Vuçiq është serioz për Serbinë e Madhe, atë që ai e quan bota serbe, dhe është i vendosur të mbajë kontrollin mbi Kosovën veriore”.
I pyetur se pse po ndodh në këtë moment kjo valë e re tensionesh në veri të Kosovës dhe nëse kjo po ndodhë për shkak se një marrëveshje është shumë afër dhe dikush nuk dëshiron që ajo marrëveshje të arrihet apo të nënshkruhet, Serwer thotë se nuk beson se jemi afër një marrëveshjeje dhe nuk dëshiron të merr një qasje që fajëson njërën palë, transmeton Telegrafi.
“Mendoj se ajo që po ndodh është se Serbia definitivisht ka vendosur të vazhdojë kontrollin e saj mbi veriun e Kosovës, pavarësisht kostos. Kjo është ajo. Dhe Kurti i kundërshton. Duke i kundërshtuar jo vetëm me mjeshtëri, por duke u përpjekur të vendosë sovranitetin dhe integritetin territorial të Kosovës, që natyrisht është obligim i tij kushtetues. Por, Vuçiq është serioz për Serbinë e Madhe, atë që ai e quan bota serbe, dhe është i vendosur të mbajë kontrollin mbi Kosovën veriore”.
Serwer thotë se me destabilizimin e situatës në veri të Kosovës qëllimi i Vuçiqit dhe i politikës së tij është të ketë një tjetër ‘Republika Srpska’ në Ballkan, që i gjithë rajoni të jetë gjithmonë në prag të destabilizimit?
“Po, ai po përpiqet të marrë një ‘Republika Srpska’ tjetër. E kanë shkruar dhe e kanë paraqitur si propozim për dialog. Mendoj se është shumë e qartë me shkrim se propozimi serb për Bashkësinë e komunave me shumicë serbe në veri të Kosovës që do të kishte funksione ekzekutive dhe do të qeverisej në mënyrë të pavarur nga Prishtina”, tha ai.
Ministrja e Punëve të Jashtme, Donika Gërvalla, ka dhënë një intervistë për Der Standard, ku ka thënë se “Kosova nuk mund të bëjë vetëvrasje politike as për miqtë e saj më të ngushtë”.
Ajo disa diplomatë të Perëndimit i ka quajtur si “problematikë”.
Gjatë kësaj interviste e përmendi emrin e emisarit të Bashkimit Evropian për dialogun Kosovë – Serbi, Miroslav Lajçak, për të cilin tha se “i bën jehonë qëndrimeve të Vuçiqit.
“Kosova nuk mund të bëjë vetëvrasje politike as për miqtë e saj më të ngushtë. Ne, si Perëndimi në tërësi, nuk duhet të lejojmë që disa diplomatë problematikë ta fusin rajonin në luftë në një aleancë jo të shenjtë me përfaqësuesin e Putinit, Vuçiç. Në çdo rast ne do ta mbrojmë vendin tonë sepse mbrojmë shtetin ligjor dhe demokracinë. Vuçiqin nuk e ndalon dot as me para, as me qetësim, vetëm me një qëndrim kristal. BE-ja nuk e ka këtë sepse nuk është dakord”, ka thënë ajo.
Gërvalla foli për situatën në Veri, ku tha se është e rrezikshme e që kjo i konvenon Kremlinit.
Ajo tha se Kremlini e dëshiron destabilizimin dhe për këtë Kosova vazhdimisht ia tregon perëndimit.
Kryetari i NISMA’s Socialdemokrate, Fatmir Limaj, në emisionin CONTEXT në ATV, tha se në zgjedhjet e ardhshme, NISMA do të jetë në parlament dhe se për këtë është i sigurt.
“Me masa e administrativit s’kanë me mujt me ndalë vullnetin e popullit. NISMA ko me kanë në parlament, me emër të zotit. A vetë, a me koalicion, ne kemi me qenë në parlament”, tha Limaj.
Ai tha se në zgjedhjet e fundit, kanë qenë 25 mijë vota të cilat nuk janë të përfaqësuara në parlament për shkak të pragut prej 5%.
“Ne edhe LDK, si dy partitë më të mëdha kemi qenë që pragu të jetë 3% për me ua mundësu partive më të vogla, por ka qenë një parti që ka mëndu se ka shumë, nuk e ka kalu pragun, ajo ka insistu që pragu të jetë 5%. Pse e kemi bërë ne këtë, sepse sot janë katër deputetë me votat të NISMA-s në parlament të Kosovës. Katër, tre i ka VV-ja e një e ka PDK-ja, votuesit tanë edhe tash 25 mijë njerëz që kanë votuar, janë të pa përfaqësuar në Parlament të Kosovës dhe nuk është në rregull se Kosova është e vogël. 25 mijë njerëz qato vota, katër deputetë athe ndoshta japin votën dhe i rrahin shuplakë kësaj çka është tu ndodh në veri, e janë votat tona”, tha Limaj, duke shtuar se është mirë që me 10 mijë vota e përpjetë, duhet të ketë përfaqësim në parlament. /atvlive.tv
