Tag: Ballina

Organet e Marrëveshjes së Stabilizim Asociimit nuk do të bëjnë asnjë hap përpara.

Pos punës së tyre, si masë ndaj Kosovës, Bashkimi Evropian pezull la edhe programimin e fondeve për vendin ballkanik në kuadër të ushtrimit programor IPA 2024.

Me to, BE-ja përgatit shtetet e Ballkanit Perëndimor për integrim.

Me projektet që parashiheshin në kuadër të tij, sipas një ish zëvendësministri të Financave, Kosovës veç aktualisht i pezullohen 300 milion euro, shumë kjo që mund të rritet shumëfish.

Para do të vinin edhe përmes projekteve në kuadër të Kornizës së Investimeve të Ballkanit Perëndimor, ku Kosova s’dorëzoi hiç propozimet.

Sipas BE-së, masat ndëshkuese të vendosura ndaj Kosovës janë: suspendimi i përkohshëm i punës së trupave të krijuara në bazë të Marrëveshjes së Stabilizim Asociimit; mosftesa e Kosovës në takime të nivelit të lartë; suspendimi i vizitave bilaterale, përveç atyre që fokusohen në adresimin e krizës në veri të Kosovës në kuadër të kornizës së dialogut të lehtësuar nga BE-ja si dhe; ndaljen e programimit të fondeve për Kosovën nga IPA 2024 (Instrumentet e Para-Anëtarësimit).

I dërguari i Bashkimit Evropian për dialogun Kosovë-Serbi, Miroslav Lajçak, ka treguar se dy ditët e fundit ka qenë në Bruksel, për të disktutuar për situatën që po mbretëron në veri.

Lajçak, ka thënë se pavarësisht nga hapat e ndërmarrë situata po vazhdon të mbetet e brishtë në veri.

“I kalova dy ditët e fundit në Bruksel, ku ekipi im dhe unë kemi punuar ngushtë me partnerët tanë ndërkombëtarë për të koordinuar hapat tanë të ardhshëm në adresimin e krizës së vazhdueshme në veri të Kosovës. Fatkeqësisht, pavarësisht nga ekzistenca e hapave të qartë për të ulur me sukses tensionet, situata mbetet e brishtë”, shkroi Lajçak.

“I gëzuar për interesimin e anëtarëve të Komisionit të Punëve të Jashtme të Parlamentit Evropian, të cilët më ftuan së bashku me Drejtorin e Përgjithshëm të DG-NEAR Gert Jan Koopman për një diskutim të përbashkët rreth situatës, zhvillimeve të fundit në Dialog dhe përpjekjet tona për të ulur tensionet në terren në veri të Kosovës”.

Theksojmë se javë më parë Lajçak takoi në takime të ndara kryeministrin e Kosovës, Albin Kurti dhe Presidentin e Serbisë, Aleksandër Vuçiq.

Deputeti i Lëvizjes Vetëvendosje, Enver Dugolli, njoftoi se ka pranuar letër nga Zyra e Prokurorit të Specializuar (ZPS), lidhur me shkresën që i kishte nisur këtij institucione, për të kryer hetime mbi masakrën e Dubravës.

Ai e publikoi të dielën në Facebook letrën e ZPS-së, derisa tha se kërkesa e tij do të shqyrtohet. Deputeti i partisë në pushtet tha se shpreson që autoritetet e larta serbe të dënohen për krimet e kryera, derisa kërkoi që Dhomat e Specializuara të sqarohen nëse janë njëetnike.

“Dua t’ju informoj se ditë më parë, kam pranuar një letër nga Prokuroria e Specializuar në Hagë. Letra konfirmon se Prokuroria ka marrë shkresën që i kam dërguar me postë më 29 prill, në të cilën kërkova nisjen e hetimeve të krimeve të kryera gjatë planifikimit dhe ekzekutimit të masakrës së Burgut të Dubravës. Letra e Prokurorisë po ashtu njofton se kërkesa ime do të shqyrtohet nga ana e tyre”, thuhet në njoftimin e tij.

Dugolli, njëherësh i mbijetuar i masakrës së Dubravës, i ka ofruar fakte ZPS-së lidhur me krimet e Serbisë në Burgun e Dubravës më 1999.

Shefja e Grupit Parlamentar të Vetëvendosjes, Mimoza Kusari-Lila, tha se Kosova ka treguar gatishmërinë që të bashkëpunojë në mënyrë që edhe veriu të funksionojë si çdo pjesë tjetër e Kosovës.

“Qeveria e Kosovës ka gatishmëri të lartë për të bashkëpunuar që edhe veriu të funksionojë si çdo pjesë tjetër e Kosovës, a do shfaroset krimi, natyrisht që jo pasi ka edhe në vende të tjera, por të paktën liria e lëvizjes, pjesëmarrja në zgjedhje, punësimi, të mos jenë të diktuarat nga bandat e drejtuara nga Beogradi për t’u bërë presion serbëve në veri”.

Por këtë, sipas saj, po e ndalon presidenti i Serbisë, Aleksandar Vuçiq.

“Raporti i fundit ka treguar se presioni kryesor ndaj tyre nuk bëhet nga qeveria, por nga Beogradi, ndaj është Vuçiqi ai që duhet të kritikohet e jo Kurti. Ne nuk ishim agresori, duhet të ndalojmë së mbajmë me të mirë një ish-agresor duke besuar se ai u bë demokrat. Ai e tregoi se çfarë agresori është, ata hynë lidhën tre pakicë kufitar të Kosovës dhe i rrëmbyen”,tha Kusari-Lila për Euronews Albania.

Masat ndëshkuese të Bashkimit Evropian ndaj Kosovës, të vendosura të shtunën, ish- Ambasadori i Shqipërisë në OKB, Agim Nesho i ka vlerësuar të palogjikshme, ndërsa ka theksuar se Evropa “po zgjedh rrugën më të lehtë”.

“Dëshira e saj në shumë raste vë dhe sanksione të tilla të palogjikshme, se e ka më të lehtë në dy drejtime. Ne jemi dashamirës ndaj perëndimit dhe në shumë raste bëhemi qesharak me pranimin e çështjeve që ata shtrojnë dhe këtu kemi një element për herë të parë Osmanin dhe Kurtin, të cilët kanë dhënë gjoksin dhe nuk pranojnë presione të tilla dhe për çështjen kombëtare është më se e sigurt që duhet të mbash qëndrime të tilla dhe nuk mund të bësh kompromis për çështjen kombëtare”, tha Nesho.

Propozimin e kryeministri shqiptarë, për mbylljen e liderëve të Kosovës e Serbisë në një konferencë deri në zgjidhjen e situatës, Nesho e konsideron të rrezikshme.

“Çështja e konferencës nuk ishte nga padituria ose mënyra për të shprehur diçka origjinale gjë që gjithmonë kryeministri shqiptar e ka bërë. Projekti i fundit edhe deklarata e Ramës që të mbyllen në një konferencë është tepër e rrezikshme për t’ju dhënë mundësi serbëve për të ridiskutuar çështjet historike tashmë të mbyllura”, tha Nesho.

Lidhur me Projektin e propozuar për asociacionin e komunave me shumicë serbe, Nesho thotë se Rama “nuk ka aftësi intelektuale” të jetë i përfshirë në projekte të tilla.

“Çështja e projektit të asociacionit të paraqitur nga Rama, është thjesht dhënia oksigjen Vuçiqit, i cili kërkon të realizojë projekte të tij, por jo t’i zgjidhi as çështjen e normalizimit të marrëdhënieve me Kosovën, as të bëhet pjesë e perëndimit. Çështja e Asociacionit është gozhda që Vuçiqi kërkon për të destabilizuar dhe të mbajtur një konflikt artificial në veri të Kosovës”, tha Nesho.

Prej 26 majit situata në komunat më veriore të Republikës është tensionuar, ndërsa gjatë kësaj kohe kemi parë një rol shumë aktiv të kryeministrit të Shqipërisë, Edi Rama, në zgjidhjen e kësaj situate, ndërsa ka pasur mospajtime të hapura me kryeministrin Albin Kurti. /atvlive.tv

Edicionin Qendror të lajmeve në ATV e gjeni në videon më poshtë:

Masat që BE-ja, I vendosi karshi Kosovës, Kryeministri I Kosovës Albin Kurti I ka konsideruar të pa drejta.

Kurti, ka thënë se do të vazhdojnë më zbatimin e programit qeveritar dhe se shpresojnë se këto masa të përkohshme do të jenë shumë të shkurtra.

“Këto nuk janë sanksione, por është e vërtetë se janë masa të përkohshme, por të padrejta, për shkak se Kosova dhe Qeveria saj janë edhe shteti dhe ekzekutivi më demokratik, më pro-evropian, progresist. Në anën tjetër kemi një përballje të vazhdueshme me format e ndryshme të agresionit të Serbisë që është shtet edhe autokratik, pro Rusisë, i pa ballafaquar me të kaluarën kriminale në hapësirën e ish Jugosllavisë ku i shkaktuan katër luftëra. Sido që të jetë, ne e bëjmë punën tonë, por le të mos harrojmë se nuk mundemi të bëjmë kompromis as me sundimin e ligjit, as me kushtutshmerinë në e vendin tonë. Andaj, ne do të vazhdojmë më zbatimin e programit tonë qeveritar dhe shpresojmë se këto masa të përkohshme do të jenë shumë të shkurtra, ashtu që edhe mbështetja, ndihma evropiane të jetë e plotë, mbase edhe të rritet për shkak se Kosova është një vend që ka nevojë për mbështetje në zhvillimin e saj”, tha Kurti.

Derisa Kurti ka vlerësuar se Kosova është e gatshme dhe e interesuar më shumë se Serbia për normalizim me njohje de-facto në qendër, ndër masat e BE-së është edhe ajo që përfshijnë pezullimin e ftesave për pjesëmarrjen e Kosovës në ngjarjet e nivelit të lartë dhe vizitave dypalëshe nga Bashkimi Evropian dhe vendet anëtare.

Masë tjetër ndëshkimore pritet të përfshihet edhe puna e përbashkët e grupeve që ekzistojnë mes Kosovës dhe BE-së, e të cilat janë krijuar në bazë të Marrëveshjes së Stabilizim Asociimit (MSA).

Për këto masa kanë reaguar edhe krerët të partive opozitare në Kosovë.

Kryetari I Partisë Demokratike të Kosovës, Memli Krasniqi, tha se Kryeministri Albin Kurti po e izolon Kosovën nga jashtë, duke i sjellë edhe sanksione nga aleatët kryesorë, dhe po e vështirëson mirëqenien dhe jetën e qytetarëve.

Në anën tjetër edhe I pari i Aleancës për Ardhmërinë e Kosovës, Ramush Haradinaj, ka thënë se Kosova me këtë kryeministër po hyn në një rrugë pa krye, para pak ditësh kërkova mocion për shkarkimin e Albin Kurtit.

Këto masa ndaj Kosovës, sipas kryetarit të LDK-së janë avancim për Serbinë. /atvlive.tv

Edicionin Qendror të lajmeve në ATV e gjeni në videon më poshtë:

Në Parlamentin Europian po shtohen deputetët që kritikojnë qasjen e Miroslav Lajçak ndaj Kosovës.

Përfaqësuesi i Bashkimit Europian për dialogun akuzohet se po favorizon Serbinë në krizën e fundit, ndërsa po bën përgjegjëse vetëm Prishtinën.

Fakti që ai vjen nga një shteti si Sllovakia, që nuk e njeh pavarësinë e Kosovës, po ngrihet gjithashtu si shqetësim.

Eurodeputeti holandez, Thijs Reuten, nga partia laburiste, tha në një intervistë për Euronews Albania se BE nuk është duke reaguar në mënyrë e duhur ndaj qëndrimit autokrat të presidentit Aleksandër Vuçiç në lidhje me Kosovën prej 10 vjetësh.

Sipas tij, Vuçiç është një politikan autokrat dhe këtë e ka dëshmuar jo vetëm me qasjen ndaj Kosovës, por edhe me politikën që ndjek brenda vendit të vet, që siç tha është demokraci vetëm në letër.

“Kemi qenë shumë kritikë ndaj qasjes së përgjithshme të BE dhe Lajçak, ajo që BE nuk po arrin të bëjë është të shikojë çfarë ndodhi në fund të majit në Veri. Po merremi për më shumë se një dekadë me një president autokrat në Serbi që është duke luajtur me ndërkombëtarët. BE nuk është duke reaguar në mënyrën e duhur ndaj këtij qëndrimi”, tha eurodeputeti.

Bashkimi Evropian ka vendosur disa masa ndaj Kosovës, për shkak se ka konsideruar se nuk janë ndërmarrë veprime për shtensionim të situatës në veri të vendit.

Është thënë se është pezulluar përkohësisht puna në organet punuese në kuadër të Marrëveshjes për Stabilizim Asociim, dhe po ashtu Kosova nuk do të ftohet në takimet të nivelit të lartë dhe vizitat dypalëshe do të pezullohen, përveç atyre që kanë në fokus adresimin e tensioneve në veri.

Madje nga BE-ja kanë deklaruar se për këto masa Qeveria e Kosovës ishte njoftuar më 28 qershor, dhe se të njëjtat mund të tërhiqen mbrapa varësisht nga zhvillimet dhe vendimet e kryeministrit Albin Kurti.

E pas këtij vendimi të BE-së, kanë ardhur reagime të shumta si nga politikanët vendor por edhe ata të huaj. Për paralajmërimet e BE-së për vendosjen e këtyre masave, ka folur edhe kryeministri Albin Kurti.

Kurti gjatë mbledhjes së qeverisë ditë më parë, tha se Bashkimi Evropian tek Kosova e gjen aleatin më të sinqertë e më të qëndrueshëm.

Ai po ashtu theksoi se me raste kanë qenë kritikë ndaj BE-së, por asnjëherë cinikë e të hidhëruar.

“Komisioni Evropian ka prezantuar dje para Parlamentit Evropian një listë të masave kundër Kosovës. Bashkimi Evropian tek Kosova e gjen partnerin e saj dhe aleatin më të sinqertë dhe të qëndrueshëm në rajon të vlerave evropiane, parimeve demokratike dhe interesave afatgjate. Kosova të tillë e ka qeverinë, të tillë e ka popullin. Me raste kemi qenë kritikë ndaj BE-së por asnjëherë cinike e të hidhëruar. E nuk jemi as sot. Vitin e kaluar dorëzuam aplikimin tonë për anëtarësim e atë e bëmë duke besuar se meritojmë që në një të ardhme të parashikueshme të jemi pjesë e këtij unioni”, ka thënë Kurti.

Reagime ka pasur edhe nga opozita në Kosovë, të cilët kanë kritikuar kryeministrin Kurti për qasjen e tij ndaj BE-së dhe SHBA-së.

Nënkryetarja e PDK-së, Vlora Çitaku ka thënë se nuk janë shumë të rëndësishme vlerat e humbura nga sanksionimi sa është i madh dëmi që i është bërë Kosovës në raport me ndërkombëtarët.

Përmes një postimi në Facebook, Çitaku ka thënë se

“Kosova sot është e përçarë nga brenda, dhe e sanksionuar nga aleatët. Ky është rezultati i qeverisjes së Albin Kurtit. Vlerat monetare të humbura nga ky sanksionim janë pakrahasimisht më të vogla se dëmi që i është bërë kredibilitetit të Kosovës në arenën ndërkombëtare”, ka shkruar ajo.

“Unë e di që Kurtit nuk i bëhet vonë as për MSA e as për IPA. Tek e fundit ai dhe VV nuk kanë votuar për ratifikimin e MSA në Kuvend. Por, Kosova nuk i takon një njeriu”, ka shkruar Çitaku.

Edhe kryetari i LDK-së, Lumir Abdixhiku ka reaguar duke thënë se Albin Kurti dhe politika e tij nuk e bën dot Kosovën shtet evropian.

Abdixhiku ka shkruar në Facebook se Kosova nuk ka qenë kurrë më keq ndërkombëtarisht se sa sot, derisa ka shtuar se Serbia nuk ka pasur kurrë më shumë përkrahje se sa tani.

“Pezullim i fondeve të BE-së; Pezullim i MSA-së, Pezullim i takimeve të nivelit të lartë, Pezullim i vizitave bilaterale. Sanksione Kosovës, avancim për Serbinë. Si qenka kjo fitore për ne? Teksa ne përjashtohemi nga programet ushtarake me NATO-n; Serbia vazhdon misionet paqeruajtëse me ta”, ka shkruar Abdixhiku.

Ai thotë se “Albin Kurti dhe politika e tij nuk e bën dot Kosovën shtet evropian. Kosova nuk ka qenë kurrë më keq ndërkombëtarisht se sa sot. Serbia nuk ka pasur kurrë më shumë përkrahje se sa tani. Koha e fundit për një rrugë të re pa Kurtin dhe politikën e tij të izolimit”, ka shkruar Abdixhiku.

Në anën tjetër, kryetari i AAK-së, Ramush Haradinaj ka thënë se masat e BE-së ndaj Kosovës dhe paralajmërimet e ShBA-së, e dëshmojnë se sa e rrezikshme është gjendja.

“I vetëdijshëm se Kosova me këtë kryeministër po hyn në një rrugë pa krye, para pak ditësh kërkova mocion për shkarkimin e Albin Kurtit”, ka shkruar Haradinaj.

Më tej ai ka thënë se “sanksionet e BE-së ndaj Kosovës dhe paralajmërimet e SHBA-së se Qeveria e Kosovës është në rrugë të gabuar, e dëshmojnë se sa e rrezikshme dhe e pashpresë është gjendja, e cila fatkeqësisht do të shkojë duke u përkeqësuar gjithnjë e më shumë”.

E kritikë ndaj BE-së, për qasjen ndaj Kosovës kanë pasur gazetari gjerman Michael Martens, dhe eurodeputeti gjerman Reinhard Butikofer.

Ata kanë hedhur dyshime në kredibilitetin e përfaqësuesit të Lartë të Politikës së Jashtme të BE-së, Josep Borrell, derisa e kanë quajtur absurde vendimin e BE-së për vendosjen e sanksioneve ndaj Kosovës, por jo edhe ndaj presidentit serb, shkruan telegrafi.

Tensionet në veriun e Kosovës, të banuar me shumicë serbe, nisën më 26 maj, kur kryetarët e rinj shqiptarë të Zveçanit, Zubin Potokut dhe Leposaviqit, hynë në ndërtesat komunale nën përcjelljen e Policisë së Kosovës.

Serbët kundërshtuan këtë dhe që atëherë po zhvillojnë protesta duke kërkuar tërheqjen e kryetarëve të rinj dhe të njësive speciale policore.

Bashkësia ndërkombëtare i ka paraqitur Kurtit tri kërkesa kryesore: qetësimin e situatës në veri, mbajtjen e zgjedhjeve të reja në katër komunat veriore dhe rikthimin në dialogun për normalizimin e raporteve Kosovë-Serbi.

Ndërkaq, nga Beogradi është kërkuar që të sigurojë që serbët të marrin pjesë pa kushte në zgjedhjet eventuale lokale.

Kurti ka paraqitur një plan prej pesë pikash që parasheh edhe mbajtjen e zgjedhjeve të reja, por për mbajtjen e tyre, ai ka thënë se nevojitet shtet ligjor.

Presidentja Vjosa Osmani ka uruar 2 korrikun, me ç’rast ka thënë se Deklarata Kushtetuese e 2 korrikut të vitit 1990, e shpallur nga 114 delegatët e Kuvendit të Kosovës ka hapur rrugën për përmbushjen e ëndrrës shekullore për Kosovën Republikë.

Osmani, siç është bërë e ditur në komunikatë, ka theksuar se Deklarata Kushtetuese e 2 Korrikut është ngjarje emblematike, e cila shënoi kthesën tonë historike për liri dhe pavarësi.

“Delegatët e asaj kohe i gërshetuan këto të tria, duke vërë gurin themeltar të shtetit të Kosovës, i cili u vulos më 17 shkurt 2008. 2 Korriku mbetet një nga datat më të rëndësishme për shtetin tonë, ngase themelet e tij qëndrojnë mbi vendimin e delegatëve të asaj kohe.”, është shprehur Osmani.

Sot mbushen 33 vjet që kur delegatët e atëhershëm të Kuvendit të Kosovës kanë miratuar Deklaratën Kushtetuese të 2 Korrikut. Në këtë ditë historike, Kosova është shpallur njësi e veçantë, në kuadër të federatës së atëhershme jugosllave.

Politikani gjerman, Michael Roth, ka thënë se standardet e BE-së dhe SHBA-së sa i përket Ballkanit Perëndimor “kanë rrëshqitur”.

Roth ka konstatuar se Kosova ka bërë gabime të mëdha, por thotë se gjë e pa mençur të kërcenosh vetëm Kosovën me sanksione, dhe t’i bëhet qortim më i lehtë preisdnetit të Serbisë për provokimet e tij të përhershme dhe që s’po e pengon Dodikun në Bosnje.

“Standardet e BE-së dhe SHBA-së kanë rrëshqitur në Ballkanin Perëndimor. Kosova ka bërë gabime të rënda. Por është e pa mend që të kërcënohet Kosova me sanksione, dhe të ketë qortim të çalë për presidentin Vucic që lejon Dodikun të vazhdojë në Bosnej”, ka shkruar Roth.