Tag: Ballina

Hashim Thaçi, ish-presidenti i Kosovës, dhënë një intervistë për gazetën e njohur gjermane, FAZ.

Ish-presidenti, është pyetur se nëse ‘’ka mbaruar jeta e politikanit’’ për të, ku është përgjigjur se, garën politike e sheh pas vetes, por jo edhe jetën e tij politike.

‘’Ju pyetni nëse jeta ime politike ka mbaruar. Unë e shoh garën politike pas meje, por jo jetën time politike. Si qytetar i lirë i Kosovës, do të vazhdoj t’i shërbej publikut dhe shtetit në të ardhmen. I përulem popullit të Kosovës që më ka treguar besim, respekt dhe mbështetje për vizionin tim politik për dy dekada. Gjithashtu shpreh mirënjohjen time të thellë për partnerët tanë ndërkombëtarë që kanë punuar ngushtë me mua për të realizuar vullnetin e popullit për liri dhe pavarësi. Ndihem i përmbushur në karrierën time politike’’, ka thënë ai për FAZ.

Sheshi i Pejës sot u mbush me studentë dhe qytetarë për të kundërshtuar fyerjen dhe gjuhën e urrejtjes ndaj ish-komandantit të zonës së Dukagjinit, Ramush Haradinaj, pas disa akuzave ndaj tij. Këtë protestë e organizuan studentët e Universitetit të Pejës “Haxhi Zeka” të cilët thanë se nuk do të heshtin karshi shtrembërimit të historisë.

Mes parullave “Unë studioj shqip fal UÇK-së”, “Për UÇK-në, me UÇK-në” e “Larg duart nga UÇK-ja”, studentët synuan të dëgjohet zëri i tyre.

Përfaqësuesi i studentëve, Ardit Bobi e quan të turpshëm faktin që studentët sot po mbrojnë Ushtrinë Çlirimtare të Kosovës nga shqiptarët.

Por, ai shtoi se historia e Kosovës nuk shtrembërohet dhe dinjiteti i vendit nuk preket.

“Është e turpshme të mendojmë se nga kush po e mbrojmë, nuk po e mbrojmë nga serbët por po e mbrojmë nga shqiptarët. Sot nuk jemi mbledhur këtu vetëm në një shesh qytetit sot jemi mbledhur në një moment ku ndërgjegjja e një shoqërie vihet në provë sepse ka raste në histori kur një popull duhet të vendos a duhet të hesht përballë shtrembërimit, apo duhet të ngritët në mbrojtje të së vërtetës. Ne sot kemi zgjedhur të mos heshtim sepse historia nuk është vetëm kujtim historia është themeli mbi të cilin qëndron një shtet dhe kur ai themel fillon të lëkundet nga pasaktësi e harresa atëherë nuk rrezikohet vetëm e kaluara por gjithë e ardhmja. Nuk jemi këtu për të krijuar zhurmë, por jemi këtu sepse ndërgjegjja nuk na lejon të qëndrojmë të heshtur… Historia e Kosovës nuk shtrembërohet dhe e vërteta nuk relativiziohet kujtesa nuk përdhoset dinjiteti i Kosovës nuk preket”, tha ai.

Para studentëve e qytetarëve fjalën e mori edhe rektori i universitetit “Haxhi Zeka”, Armand Krasniqi, i cili këtë protestë e quajti reagim jo të zakonshme dhe sinjal që ky universitet po formon individ që nuk janë indiferente karshi zhvillimeve shoqërore.

Sipas tij institucionet legjislative e ka për obligim të krijojë korniza ligjore që mbron identitetin shoqëror.

“Kjo nuk është një ngjarje e zakonshme është sinjal që duhet kuptuar është dëshmi se universiteti po përmbush një nga funksionet e tij më thelbësore të formoj individ që nuk janë indiferent ndaj zhvillimeve shoqërore, por që reflektojnë dhe veprojnë me përgjegjësi . Ajo që po ndodh sot këtu nuk është një reagim i zakonshëm publik është një moment që kërkon një qasje të balancuar dhe të matur një qasje që kërkon lirin e shprehjes, por njëkohësisht e vendos atë liri përballë përgjegjësisë që ajo bart , një qasje që pranon debat po nuk pranon deformim të vlerave themelore mbi të cilat qëndron shoqëria jonë… Në këtë kuptim roli i institucioneve legjislative bëhet i domosdoshëm sepse ato kanë detyrimin për krijimin e një kornize që mbron dinjitetin shoqëror pa cenuar parimet demokratike”, tha ai.

Si veprim i duhur këtë aktivitet e cilësoi dhe studenti Armend Mustafaj i cili për KosovaPress tha se historia duhet të mbrohet.

Para dy ditëve, një person është arretsuar pikërisht në Pejë, pasi kërcënoi dhe ofendoi familjen Haradinaj. /kp/

Komuna e Prishtinës ka vendosur t’i shqiptojë gjobë investitorit dhe përfaqësuesit ligjor në rastin e shembjes së rrugës “Don Shtjefën Kurti” në kryeqytet.

Kreu Përparim Rama tha se investitori nuk ka respektuar vendimin për mbushjen e gropës në Llamellat 4 dhe 5, prandaj është iniciuar procedurë kundërvajtëse, duke u shqiptuar gjobë prej 30,000 € për kompaninë dhe 3,000 € për përfaqësuesin ligjor.

“Deri më sot nuk janë prezantuar vendimet e inxhinierëve mbikëqyrës, prandaj kërkojmë nga Oda e Inxhinierëve të Republikë së Kosovës, inicimin e procedurave për tërheqjen e licencave të inxhinjerëve mbikqyrës!”

Në Kuvendi i Kosovës janë rikthyer sot në procedurë votimi tri projektligje të propozuara nga Lëvizja Vetëvendosje, përfshirë masat e përkohshme për produktet themelore, sigurimet e detyrueshme shëndetësore dhe projektligjin për shtetësinë.

Grupi parlamentar i VV-së kërkoi që këto nisma të futen menjëherë në rend dite dhe të votohen në seancën e sotme, vetëm një javë pas miratimit të tyre në qeveri. Megjithatë, kërkesa për shmangie procedurale nuk mori mbështetjen e nevojshme, duke bërë që futja e tyre urgjente në rend dite të dështojë.

Kundër këtij propozimi u deklaruan paraprakisht edhe partitë opozitare, të cilat kundërshtuan përfshirjen e projektligjeve në seancën e sotme.

Projektligji për çmimet tavan, i njohur si masë e përkohshme për produktet bazë në raste të destabilizimit të tregut, më herët ishte shpallur i pavlefshëm nga Gjykata Kushtetuese e Kosovës në vitin 2023. E njëjta situatë kishte ndodhur edhe me Projektligjin për sigurimet shëndetësore, i cili ishte rrëzuar po ashtu në të kaluarën.

Ka rënë për 2 cent çmimi i shitjes së dizelit në vend për 24 orët e ardhshme.

Lajmin e ka dhënë Ministria e Tregtisë duke bërë të ditur se nafta do të shitet me 1.89 në çmimin maksimal në 24 orët e ardhshme.

Çmimi i benzinës do të jetë i njëjt me 1.47 për litër ndërsa gazi do të shitet me 82 cent për litër.

Indeksi i Harmonizuar i Çmimeve të Konsumit ka shënuar rritje gjatë muajit mars 2026, duke konfirmuar vazhdimin e trendit të shtrenjtimit të jetesës në vend.

Sipas të dhënave të Agjencisë së Statistikave të Kosovës, inflacioni mujor në mars ka arritur në 1.5 për qind, krahasuar me muajin shkurt. Rritja është ndikuar kryesisht nga shtrenjtimi i karburanteve dhe lubrifikantëve për pajisjet e transportit personal, që kanë shënuar rritje prej 25.8 për qind.

Po ashtu, çmimet janë rritur edhe te perimet me 3.7 për qind, pemët me 1.5 për qind dhe mishi me 0.3 për qind, duke kontribuar së bashku me rreth 1.7 për qind në rritjen e indeksit.

Në anën tjetër, një ulje e lehtë është evidentuar te energjia elektrike me 3.7 për qind dhe te lëndët djegëse të ngurta me 2.2 për qind, duke ndikuar në ulje të indeksit me rreth 0.2 për qind.

Sa i përket krahasimit vjetor, inflacioni në mars 2026 ka arritur në 6.7 për qind, krahasuar me të njëjtën periudhë të vitit paraprak. Rritjet më të theksuara janë regjistruar te shërbimet që lidhen me transportin personal me 42.5 për qind, biletat e fluturimeve me 38.4 për qind, si dhe furnizimi me ujë dhe shërbimet e banimit me 31.9 për qind.

Rritje të konsiderueshme janë evidentuar edhe te energjia elektrike dhe karburantet me nga 17.4 për qind, lëndët djegëse me 15.6 për qind dhe pushimet e organizuara me 13.2 për qind.

Ndërkohë, produktet ushqimore kanë vazhduar të kenë ndikim në rritjen e përgjithshme të çmimeve, përfshirë pemët me 13.1 për qind, mishin me 12.4 për qind, si dhe kafenë, çajin dhe kakaon me 7.8 për qind.

Rritje janë shënuar edhe në shërbimet hoteliere, kujdesin personal, shërbimet shëndetësore dhe mallrat për mirëmbajtjen e ekonomisë familjare.

Të dhënat tregojnë se presionet inflacioniste mbeten të pranishme në sektorë të ndryshëm, duke ndikuar drejtpërdrejt në rritjen e kostos së jetesës për qytetarët.

Kosova dhe Serbia kanë drejtuar akuza ndaj njëra-tjetrës në mbledhjen e radhës të Këshillit të Sigurimit të Kombeve të Bashkuara (OKB) për Kosovën, të mbajtur të enjten në New York. Kosova u përfaqësua nga kryediplomati, Glauk Konjufca, ndërsa Serbinë e ka përfaqësuar ministri i Jashtëm serb, Marko Gjuriq.

Kryediplomati kosovar, Glauk Konjufca në fjalën e tij, i ka bërë thirrje Serbisë që të njohë pavarësinë e Kosovës dhe të mos e mbajë peng integrimin e rajonit në struktura euroatlantike.

“I bëjmë thirrje Serbisë që të ballafaqohet me realitetin e vet dhe ta njohë Kosovën si shtet i pavarur dhe sovran, duke mos e mbajtur peng gjithë shoqërinë e rajonin të një hegjemonie të tillë”.

“ Beogradi ka vazhduar të luajë rolin e vet destruktiv duke u përpjekur që të ndërhyjë në zgjedhje duke u përpjekur për ta mbështetur Listën Srpska në zgjedhjet në Kosovë. Ne kemi penguar ndërhyrjet e tilla të huaja dhe kemi arritur ta ruajmë integritetin”, tha ai.

Kryediplomati kosovar potencoi se Serbia është ajo që pengon paqen mes dy shteteve fqinje.

“Jemi shtet paqedashës, asnjëherë s’kemi ndërhyrë në shtetet e tjera apo në politikat e tyre të brendshme. Përkundër agresionit të Serbisë dhe kërcënimeve të tyre hibride ndaj shoqërisë dhe institucioneve të saj, Kosova mbetet e gatshme të normalizojë marrëdhëniet e veta ndërshtetërore, fqinjësore. Megjithatë, pengesa ndaj paqes dhe normalizimit të marrëdhënieve mbetet Serbia që as nuk është e interesuar të normalizojë marrëdhëniet me Kosovën e as ti bashkohet BE-së. Ata përpiqen t’i mohojnë rajonit tonë stabilitetin e integrimin e plotë këtij rajoni në struktura euroatlantike”.

Konjufca po ashtu demantoi pretendimet e kryediplomatit serb Marko Gjuriq për shkeljen e të drejtave e “persekutimin e popullit serb” cenimin e të drejtave të serbëve, duke thënë se Kosova ka mekanizmat më të avancuar në Europë për mbrojtjen e pakicave.

Në fjalën e tij, kryediplomati kosovar potencoi se çelësi për paqe dhe stabilitet në Ballkan mbetet tek njohja e pavarësisë së Kosovës nga të gjitha shtetet anëtare të Bashkimit Evropian dhe NATO’së.

Konjufca ka përmendur njohjet e fundit që i kanë ardhur Kosovës nga katër shtete të OKB’së, derisa u ka bërë thirrje vendeve tjera që pa vonesa ta njohin Kosovën.

“U jemi mirënjohës 121 shteteve anëtare të OKB-së të cilat zyrtarisht e kanë njohur pavarësinë dhe shtetësinë e Republikës së Kosovës. Unë u bëj thirrje shteteve të tjera të OKB-së që pa vonesë të mëtejshme, ta njohin Kosovën si shtet të pavarur dhe sovran, dhe të hapin rrugë për miqësi dhe bashkëpunim të ri për përfitim të ndërsjellë”, ka deklaruar Konjufca.

Serbinë e ka përfaqësuar ministri i Jashtëm serb, Marko Gjuriq, i cili e ka nisur fjalën e tij, duke thënë se Serbia “nuk është pjesë e problemit, por pjesë e zgjidhjes”.

Më vonë, Gjuriq ka thënë në takim se flet “në emër të atyre që mbahen nën presion në Kosovë”, dhe ka pretenduar se për serbët lokalë në Kosovë, identiteti është kthyer në burim të pasigurisë, pasi “nën regjimin” e kryeministrit të Kosovës, Albin Kurti, serbët identifikohen si “të tjerët” dhe që arrestimet, sulmet arbitrare dhe “eksodi i serbëve”, nuk mund të injorohen. Ai nuk i ka mbështetur pretendimet e tij me diçka konkrete.

Sipas Gjuriqit, Ligji për të Huajt ka shkaktuar brenga të mëdha për serbët në Kosovë.

“Ka pasur rrezik real që njerëzit të cilët kanë punuar me dekada, do të trajtoheshin si të huaj, duke humbur të drejtën e tyre për qëndrim apo për të jetuar në shtëpitë e tyre. Masat e tyre jo vetëm që janë të paqarta ligjërisht, por tregojnë për një vazhdimësi të riformimit të situatës. Serbët përballen me pengesa të shumta administrative e ligjore që ua bëjnë jetën më të vështirë, nga qasja në shërbime publike, deri te ushtrimi i drejtave themelore”.

Mes tjerash, ministri serb ka kërkuar që të themelohet Asociacioni i komunave me shumicë serbe, sepse, sipas tij, serbët “kanë mbetur pa kornizën ligjore që u është premtuar”.

SHBA në OKB: Trump pret zotim të qartë nga Kosova dhe Serbia se do të punojnë së bashku

Përfaqësuesja e SHBA-së në Kombet e Bashkuara, Tammy Bruce, në seancën e mbajtur për Kosovën të enjten ka thënë se presidenti amerikan, Donald Trump pret që Kosova dhe Serbia të punojnë së bashku drejt normalizimit.

“Presidenti [amerikan, Donald] Trump dhe amerikanët po dëgjojnë me kujdes që ju të zotoheni qartë për të punuar dhe për të prosperuar së bashku. Ne shpresojmë që të dyja palët do t’i ulin tensionet dhe do të ulen në tavolinë. Ne do të punojmë nga afër me liderë që shohin nga e ardhmja, e jo kah e kaluara. Me dialog të vërtetë dhe jo teatër”, ka thënë zëvendëspërfaqësuesja e Shteteve të Bashkuara në OKB, Tammy Bruce, duke përsëritur se SHBA-ja mbetet e përkushtuar për të mbështetur stabilitetin në Kosovë dhe Serbi, në mënyrë që të ruhet stabiliteti në rajonin e Ballkanit.

“Populli i Kosovës dhe populli i Serbisë janë miqtë tanë. Ata meritojnë të ardhme që përkufizohet nga siguria, mundësitë ekonomike dhe marrëdhëniet fqinjësore, jo me tensione politike apo me probleme të ricikluara”, ka thënë mes tjerash ajo.

Franca dhe Britania kërkojnë që autorët e Banjskës të përballen me drejtësinë

Përfaqësuesja e Mbretërisë së Bashkuar në Këshillin e Sigurimit të Organizatës së Kombeve të Bashkuara, Jennifer MacNaughtan, i ka bërë thirrje Serbisë që ta vë para organeve të drejtësisë, kryeterroristin Milan Radojçiq dhe pjesëmarrësit tjerë në sulmin e Bansjkës, shkruan Reporteri.net.

Ajo i bëri thirrje Kosovës dhe Serbisë që të zbatojnë marrëveshjet ekzistuese dhe të zgjidhin mospajtimet përmes dialogut të lehtësuar nga Bashkimi Evropian.

“Pas më shumë se dy vitesh nga sulmi në Banjska ne përsërisim thirrjen tonë për Serbinë që të vë para përgjegjësisë autorët, përfshirë Radojicicin”, ka deklaruar MacNaughtan.

“Vazhdojmë t’iu bëjmë thirrje Kosovës dhe Serbisë që të implementojnë marrëveshjet ekzistuese dhe t’i zgjidhin mospajtimet përmes dialogut të BE-së”, ka thënë ajo.

MacNaughtan ka bërë thirrje që sa më shumë anëtarë të OKB-së ta njohin Kosovën si shtet, duke thënë se njohja e Kosovës është esenciale për stabilitet afatgjatë.

Këtë kërkesë e pati edhe përfaqësuesi i Francës në Këshillin e Sigurimit të Organizatës së Kombeve të Bashkuara, Jérôme Bonnafon. Ai ka thënë se është e papranueshme që dy vite pas sulmit në Banjskë, autorët janë ende të lirë.

Paraprakisht, edhe Mbretëria e Bashkuar i bëri thirrje Serbisë që ta vë para organeve të drejtësisë, kryeterroristin Milan Radojçiq dhe pjesëmarrësit tjerë në sulm, shkruan Reporteri.net.

“Dy vite pas sulmit në Banjska, është e pranueshëmem që autorët të mos kapen”, ka thënë Bonnafont.

Bonnafont ka folur edhe për mbajtjen e zgjedhjeve të fundit lokale duke thënë se Franca “duartroket” për mënyrën se si janë mbajtur ato.

Ai ka prekur edhe temën e dialogut, duke bërë thirrje për Kosovën dhe Serbinë që të vazhdojnë procesin e normalizimit.

Deputeti i Lidhjes Demokratike të Kosovës, Lutfi Haziri ka thënë se në ciklin e dytë të takimeve mes Kryeministrit Albin Kurti dhe kreut të LDK’së, Lumir Abdixhikut, për çështjen e presidentit, është diskutuar për marrëveshje mes këtyre dy partive.

Sipas Hazirit, takimi i parë ka qenë konstruktiv dhe se bisedimet do të vazhdojnë.

“Abdixhiku ka pas takime me kryetarin e Lëvizjes Vetëvendosje, në rastin e parë është biseduar për një proces konsensual e në rastin dytë po flitet për një marrëveshje LDK-LVV. Takimi i parë ka qenë në frymë konstruktive edhe në mundësi që roli jonë si LDK, si grup parlamentar me u afrua, konfirmon ftesës që Kurti e ka bë. Ftesa e njëjtë është thënë se do t’i përcillet edhe PDK-së dhe cikli i ri i takimeve do të vazhdojnë”, ka thënë Haziri.

Haziri ka thënë se nëse arrihet marrëveshje, LDK e zbaton, por ai ka thënë se insistimi i Kurtit se duhet një marrëveshje me mbi 84 deputetë, tregon për mosbesim të deputetëve brenda Grupit Parlamentar të LVV-së.

“Këtu është një problem i madh, mosbesim në deputetë jo të LDK-së, por brenda grupit më të madh politik. A ka deputet brenda grupit të Lëvizjes Vetëvendosje që janë shpreh kundra një procesi të ndërtuar me LDK-në?”, ka thënë Haziri në Tëvë1.

Ai është shprehur se për një marrëveshje për presidentin është vonë dhe sipas tij kjo do duhej të arrihej në muajin janar.

“ Nëse me pyetni mua, ne jemi vonë. Çështja e presidentit ka mundur të definohet në janar. Na po flasim përtej mandatit ku kemi një ushtrues detyre tani dhe ku ka vullnet politik është dashur të kryhet me grupe politike në janar”, ka thënë Haziri.

Kryeparlamentarja Albulena Haxhiu ka thënë se do ta thërras seancën sapo të krijohen kushtet.

“Tash i kemi më pak se 20 ditë në dispozicion, është shumë e rëndësishme që të përpiqemi të gjejmë zgjidhje. Do ta thërras seancën e Kuvendit, sapo të kemi plotësim të kushteve…Lehtësimin e takimeve mund ta bëjë, por nuk mund të ndërhyjë në qëndrimet e partive politike”, ka deklaruar Haxhiu.

Kuvendi i Kosovës do të mblidhet sot në seancë plenare. Në seancën që pritet të fillojë në ora 10:00, në rend të ditës do të jenë 12 pika.

Seanca do të fillojë me miratimin e procesverbalit nga seanca e mëparshme për të vazhduar me deklarimet jashtë rendit të ditës dhe pyetjet parlamentare.

Në rend të ditës në seancën e sotme do të jetë edhe votimi i Propozim-Rezolutës për rritjen e çmimeve të naftë, mungesa e ndërhyrjes së Qeverisë dhe ndikimi i drejtpërdrejtë në koston e jetesës si dhe stabiliteti ekonomik i vendit, që nxiti debate të ashpra pozitë-opozitë, në seancën e kaluar.

Sot po ashtu pritet të bëhet Shqyrtimi i “Propozim-Rezolutës për mbrojtjen e së vërtetës historike të luftës në Kosovë 1998–1999”.

Rendi i ditës

1. Miratimi i rendit të ditës,

2. Miratimi i procesverbalit nga seanca e mëparshme,

3. Deklarimet jashtë rendit të ditës,

4. Pyetjet parlamentare,

5. Votimi i Projektligjit nr. 10/L-015 për Ratifikimin e Marrëveshjes së Kredisë ndërmjet Republikës së Kosovës, e përfaqësuar nga Ministria e Financave dhe Asociacionit Ndërkombëtar për Zhvillim për Projektin e Zhvillimit të Sektorit Financiar të Kosovës,

6. Shqyrtimi i Projektligjit nr. 10/L-016 për Ratifikimin e Marrëveshjes së Kredisë ndërmjet Republikës së Kosovës dhe Agjencisë Franceze për Zhvillim për Programin e Kredisë të Bazuar në Politika,

7. Shqyrtimi i Projektligjit nr. 10/L-017 për Ratifikimin e Marrëveshjes së Kredisë ndërmjet Republikës së Kosovës, përfaqësuar nga Ministria e Financave, dhe KfW, Frankfurt am Main, për Programin e Kredisë të Bazuar në Politika në sektorin e Energjisë dhe Klimës për Kosovën,

8. Shqyrtimi i Projektligjit nr.10/L-018 për Ratifikimin e Marrëveshjes së Kredisë ndërmjet Republikës së Kosovës, përfaqësuar nga Ministria e Financave dhe Asociacionit Ndërkombëtar për Zhvillim për Projektin “Lehtësimi i Tregtisë dhe Transportit në Ballkanin Perëndimor 2.0,

9. Votimi i Propozim-Rezolutës për rritjen e çmimeve të naftë, mungesa e ndërhyrjes së Qeverisë dhe ndikimi i drejtpërdrejtë në koston e jetesës si dhe stabiliteti ekonomik i vendit,

10. Zgjedhja e 1 (një) anëtari Joprokuror në Këshillin Prokurorial të Kosovës,

11. Shqyrtimi i “Propozim-Rezolutës për mbrojtjen e së vërtetës historike të luftës në Kosovë 1998–1999”,

12. Propozimi i grupeve parlamentare të PDK-së dhe AAK-së për emërimin e deputetëve në komisionet parlamentare.

Vendi: Salla e Kuvendit
Koha: 10:00

Anëtari i Lidhjes Demokratike të Kosovës, Visar Azemi, e ka akuzuar Ministrinë e Industrisë, Ndërmarrësisë dhe Tregtisë bashkë me KEDS-in se po i fshehin provat lidhur me skandalin e njehsorëve elektrikë.

Azemi ka thënë se KEDS-i bashkë me ministrinë kanë dalë në terren dhe i kanë hequr njehsorët që kanë matur gabimisht energjinë elektrike.

Ai më tej ka thënë se me këto veprime, ata po kryejnë vepër penale.

“KEDS-i bashkë me ministrinë po i fshehin provat, kanë dalë në terren me shpejtësi dhe i kanë hequr njehsorët që kanë matur gabimisht, ato prova i kanë dërguar diku ku ne nuk e dimë, në disa njoftime që unë i kam parë të lëshuara në fatura nga KESCO, iu është ndërruar njehsori, shkruan që njehsorin e kanë marrë për ta verifikuar dhe më pas tregojnë nëse u kanë borxh ose jo. Unë fshehjen e gjurmës e njoh si vepër penale. Prandaj, kjo është një prej gjërave që duhet ta ndalin menjëherë këtë fshehje”, ka thënë Azemi në Interaktiv të KTV.