Tag: Ballina

Deputetja e Kuvendit të Kosovës nga radhët e AAK-së, Time Kadrijaj ka konfirmuar sërish qëndrimin e partisë së saj se nuk do të votohet asnjë emër kandidat për president nga LVV.

Kadrijaj tha se Aleanca për Ardhmërinë e Kosovës do të konsideronte votë për president vetëm nëse propozohet një figurë konsensuale me bagazh historik dhe kombëtar.

“Pa dalë një emër në publik, ne nuk mundemi me diskutu se a do e përkrahim apo jo. Për momentin AAK nuk ka votë për kandidatët e Lëvizjes Vetëvendosje dhe nuk do të ketë votë për kandidatët e LVV, vetëm në rast se është ndonjë figurë tepër konsensuale dhe me një background historik dhe kombëtar atëherë ulemi dhe bisedojmë, por në këto kushte dhe në këto rrethana AAK nuk ka votë për presidentin”, tha Kadrijaj në një prononcim për KlanKosova.tv.

Ndërkohë, nga Lidhja Demokratike e Kosovës kanë bërë të ditur se nuk ka asnjë marrëveshje me partinë në pushtet lidhur me çështjen e zgjedhjes së presidentit. Në anën tjetër, Partia Demokratike e Kosovës sot mban mbledhjen e grupit parlamentar, nga e cila pritet të dalë një qëndrim zyrtar për këtë temë.

Kujtojmë se data e fundit për zgjedhjen e presidentit të ri të Kosovës është 28 prilli sipas aktgjykimit të fundit të Gjykatës Kushtetuese.

Kryeministri i Kosovës, Albin Kurti sërish nuk ka komentuar shumë rreth çështjes së presidentit.

Kurti tha tha sot se, me kryetarin e LDK- së, Lumir Abdixhiku janë në komunikim dhe kur të kenë rezultate do t’i bëjnë publike.

“Më shumë se gjysmë ore jam vonë për takim, jemi në komunikim kur të kemi rezultate do tua komunikojmë” , tha ai.

Këto komente Kurti i bëri shkurt për media pas pjesëmarrjes në Tryezën e Dialogut Ndërfetar “Bashkëjetesa ndërfetare ndër ne, virtyt hyjnor apo domosdoshmëri shoqërore?” E cila po mbahet në Prishtinë.

Sipas vendimit të Gjykatës Kushtetuese, edhe 12 ditë kanë mbetur afat për zgjedhjen e presidentit të ri nga Kuvendi i Kosovës.

Kuvendi i Kosovës ka më pak se dy javë kohë për të zgjedhur presidentin e ri të vendit para se vendi të shkojë në zgjedhje të parakohshme.

Partitë parlamentare, pavarësisht diskutimeve, nuk kanë arritur të gjejnë konsensus për emrin e të parit të vendit, teksa opozita akuzon Lëvizjen Vetëvendosje për mungesë të konsensusit.

Partia Demokratike e Kosovës sot do të mbajë mbledhje të Kryesisë ku do të diskutohet kjo çështje si dhe do të dalë me qëndrim rreth çështjes së presidentit menjëherë pas përfundimit të mbledhjes.

Zyrtarë të kësaj partie, publikisht kanë thënë se nuk do të takohen me LVV-në pa pranuar një ftesë zyrtare specifike për temat që do të diskutohen. E partia e kryeministrit Albin Kurti ende nuk i ka dërguar një ftesë së tillë.

Ministria e Mjedisit dhe Planifikimit Hapësinor e Kosovës dhe Ministria e Mjedisit e Shqipërisë kanë nënshkruar një Memorandum Mirëkuptimi për forcimin e bashkëpunimit në menaxhimin e qëndrueshëm të segmentit ndërkufitar të Lumit Drin.

Sipas njoftimit thuhet se marrëveshja synon mbrojtjen dhe përmirësimin e cilësisë së ujërave, parandalimin e ndotjes ndërkufitare, si dhe ruajtjen e ekosistemeve dhe biodiversitetit në zonat përkatëse të lumit.

Po ashtu, dokumenti parasheh promovimin e përdorimit të qëndrueshëm të burimeve ujore, si dhe organizimin e aktiviteteve të përbashkëta për monitorimin dhe pastrimin e Lumit Drin.

“Në kuadër të këtij memorandumi do të krijohet një Grup i Përbashkët Pune Kosovë–Shqipëri për Lumin Drin, i cili do të koordinojë aktivitetet dhe politikat ndërinstitucionale në këtë fushë. Bashkëpunimi do të përfshijë gjithashtu shkëmbimin e të dhënave, ekspertizës teknike dhe ndërtimin e kapaciteteve institucionale”, thuhet në njoftim.

Ky bashkëpunim vlerësohet se do të kontribuojë edhe në avancimin e procesit të integrimit evropian të të dy vendeve, veçanërisht në fushën e mjedisit dhe ndryshimeve klimatike, si një nga prioritetet e përbashkëta rajonale.

Ministri për Punë dhe Familje, Andin Hoti, e ka pranuar raportin final për trajtimin e rastit të familjes së pesëvjeçarit nga Janjeva e Lipjanit nga ana e Qendrës për Punë Sociale.

Ky raport është pranuar, vonë pasditen e së mërkurës nga Divizioni për Inspektimin e Shërbimeve Sociale dhe Familjare.

Ministri Hoti e konfirmoi për KosovaPress se në gjetjet e këtij raporti, konstatohet se në këtë rast është fajtore QPS-ja, por edhe institucione të tjera, andaj paralajmëroi masa ndëshkuese për të gjithë që janë evidentuar për mostrajtim të duhur të rastit.

“Raportin çuditërisht e kam pranuar sot. Njëra prej të gjeturave të raportit thotë që në vendimin e Gjykatës të vitit 2023 i ka obliguar Qendrën për Punë Sociale për monitorimin e familjes në raport me fëmijët. Pra, e ka obliguar Qendrën për Punë Sociale në raport edhe me prindërit për shëndetin mendor të tyre, që QPS-të nuk merren me shëndetin mendor, janë Qendrat për Shëndetin Mendor që merren me shëndetin mendor, jo QPS-së. Sidoqoftë, është nën hetim prej Prokurorisë. Çka mund të ndërmarrim tjetër ne është një propozim ndaj kryetarit të komunës së Lipjanit që me i qit në masa disiplinore të gjithë stafin e Qendrës për Punë Sociale që është në Lipjan dhe këtë do ta bëjmë nesër, sepse sot është jashtë afatit të punës dhe të shqyrtohen nëse ata vërtetë i kanë ndjekur masat”, shtoi ai.

Ministri Hoti në këtë intervistë është pyetur edhe për shkeljet tjera që ka konstatuar ky raport, për çka është rezervuar në përgjigje.

“Nuk mund t’i them të gjitha shkeljet që konstaton për shkak se është nën hetim prej prokurorisë. Por, të tregova çka konstaton raporti, një është që çështje ndërministrore, problemi nuk është vetëm te QPS-ja, por edhe te disa institucione tjera. A ka shkelje prej zyrtarëve komunal të QPS-së ose neglizhencë, mund ta konfirmoj që po, por më shumë nuk mund të flas në këtë aspekt. Këto dy veprime do të ndërmerren prej meje, neve, kërkesën për ta ftuar Donika Gërvallën që të ftojë këtë grupin koordinues dhe e dyta që t’i propozohet kryetarit të komunës që të ndërmerr masa disiplinore zyrtarëve aty. Licencën ndaj shefes së QPS-së, menaxheres së rastit, ne e kemi përgatitur dhe jemi për të ja tërhequr, por për një gjë të tillë na duhet koordinim ndërministror e ndoshta edhe prokurorisë…Jo qendrës, menaxheres së rastit dhe shefes së QPS-së nëse 100 për qind vërtetohet që nuk i kanë ndërmarrë veprimet që i ka obliguar gjykata në vitin 2023”, ka thënë Hoti.

Ai paralajmëroi se do të ftohet grupi ndërministror dhe po ashtu do të kërkohet nga kryetari i Lipjanit që të vendos masa disiplinore ndaj stafit të kësaj qendre.

“Po, raporti mua më ka ardhur, ju e dini që ky rast është nën hetim edhe nga Prokuroria e Kosovës, kështu që unë do të rezervohem shumë për të gjeturat e raportit. Dy gjëra që mund t’i tregojë që do t’i bëjmë është që t’i propozojmë koordinatores kombëtare, që në këtë rast është Donika Gërvalla që me thirr takimin e grupit koordinues ndërministror për mbrojtjen nga dhuna në familje. Sepse, e përmenda më herët Departamenti për Shërbime Sociale (QPS), politikat për to i bëjmë ne. Por, Qendrat e Shëndetit Mendor janë në kuadër të Ministrisë së Shëndetësisë. Policia e Kosovës është në kuadër të Ministrisë së Punëve të Brendshme, kështu që nevojitet një koordinim ndërministror në këtë rast për të parë se çfarë veprime do të ndërmerren dhe ku saktë është problemi”, deklaroi ai.

Për këtë vendim, Hoti tha se janë në pritje të disa hapave që po ndërmerren edhe nga institucione të tjera.

“Jemi në pritje sepse janë edhe disa hapa duke u ndërmarrë Inspektorati, në këtë rast janë duke ndërmarrë një verifikim me Policinë e Kosovës. Disa herë po them që nuk po dua të tregojë më shumë detaje në këtë raport, sepse nuk e di se çka mund të më bëjë mua pastaj. Por, në momentin që bëhen koordinimet me Policinë e Kosovës dhe verifikohet kjo që thash, po. Unë nuk mund të mos e marrë sepse një fëmijë sot është në spital, me gjymtyrë të dëmtuara, për faj të dikujt. Kështu që dikush këtu duhet të marrë përgjegjësi”, përfundon ai.

Një muaj më parë, ngjarja e pesëvjeçarit e ka tronditur vendin. Për shkak të keqtrajtimit nga prindërit, ai mori trajtim mjekësor në Kujdesin Intensiv Pediatrik.

Për dy prindërit e tij, me vendim të Gjykatës Themelore të Prishtinës ishte caktuar masa e paraburgimit. Ndërkaq, gjashtë fëmijët të kësaj familje janë marrë nën përkujdesje nga Qendra për Punë Sociale të Lipjanit. /Kp/

1 cent më lirë se ditën e djeshme do të shitet një litër naftë në Kosovë.

1.76 ishte çmimi të mërkurën, kurse sot do të jetë 1.75 euro.

Sipas njoftimit të Ministrisë së Industrisë, Ndërmarrësisë dhe Tregtisë, benzina do të shitet për 1.43 euro, derisa çmimi i gazit do të jetë 0.88 cent për litër.

Çmimet do të hyjnë në fuqi nga ora 10:00

Ministria e Punës, Familjes dhe Vlerave të Luftës Çlirimtare ka njoftuar se në bashkëpunim me Inspektoratin Qendror të Punës do të fillojë aksionin e jashtëzakonshëm të inspektimeve në të gjithë territorin e Republikës së Kosovës.

“Ky aksion ndërmerret në zbatim të vendimit të Ministrit, me qëllim rritjen e nivelit të sigurisë dhe shëndetit në punë, me fokus të veçantë në sektorët me rrezikshmëri të lartë, si ndërtimtaria dhe aktivitetet e ngjashme”, thuhet në njoftim.

Ministri i Shëndetësisë, Arben Vitia, javë më parë deklaroi se e ka pranuar raportin për mosfunksionalizimin e pishinave për hidroterapi. Por atë e ka demantuar Qendra Klinike Universitare, sipas së cilës dokumenti ende nuk i është dorëzuar ministrit

Qendra Klinike Universitare (QKUK) ka përgënjeshtruar ministrin e Shëndetësisë, Arben Vitia, i cili gati dy javë më parë u shpreh se e ka pranuar raportin e kërkuar nga ky institucion për arsyet e mosfunksionalizimit të dy pishinave për hidroterapi.

Për këtë problem, për të cilin Vitia tha se ishte njoftuar tek pas raportimit të KOHËS, në konferencën e 3 prillit deklaroi se e posedon raportin.

“Po, raporti më është dorëzuar, janë të gjetura arsyet pse ka ndodhur. Janë masat e rekomanduara dhe natyrisht ashtu siç thashë edhe më herët për kolegun e juaj, përmes një emaili në kërkesën e juaj në këtë raport, besoj që shumë shpejt do ta merrni… Sigurisht e keni bërë para se të vijë raporti. Raporti ka ardhur nga mesi i kësaj jave”, pati thënë Vitia.

Po atë ditë, KOHA e ka përsëritur kërkesën me email për qasje në këtë raport. Por, deri të mërkurën, Ministria nuk e ka vënë atë në dispozicion, pavarësisht disa kërkesave që janë bërë.

E dymbëdhjetë ditë pas kësaj deklarate të ministrit Vitia, në QKUK thanë se raporti ende nuk i është dorëzuar ministrit.

“Raporti lidhur me çështjen e mosfunksionalizimit të dy pishinave në Klinikën e Mjekësisë Fizikale dhe të Rehabilitimit tashmë është i përgatitur. Gjatë procesit të hartimit është kërkuar informata shtesë nga komisioni për të siguruar që raporti të jetë sa më i plotë dhe i saktë. Aktualisht, raporti është në procedurë dhe do t’i përcillet Bordit Drejtues, i cili më pas do ta shqyrtojë dhe do t’ia paraqesë ministrit të Shëndetësisë”, thuhet në përgjigjen e QKUK-së.

KOHA ka raportuar në muajin shkurt se dy pishina të destinuara për hidroterapi ishin mbushur me ujë vetëm për ditën e përurimit, më 29 dhjetor 2022, ku pjesëmarrës ishin edhe kryeministri Albin Kurti dhe ministri Vitia.

Vitia tha se për mosfunksionalizimin e tyre prej gati tre vjetësh ishte informuar nga raportimi në media, për çka deklaroi se ka kërkuar përgjegjësi nga drejtori i përgjithshëm i ShSKUK-së dhe Bordi Drejtues.

Pishinat i përkasin Klinikës së Mjekësisë Fizikale dhe të Rehabilitimit dhe u shërbejnë pacientëve për hidroterapi.

Kryeministri i Kosovës, Albin Kurti, do të presë sot në një takim zyrtar zëvendëskryeministrin dhe ministrin e Punëve të Jashtme të Belgjikës, Maxime Prévot.

Takimi pritet të mbahet në ndërtesën e Qeverisë së Kosovës, duke filluar nga ora 13:30, ndërsa mediat do të kenë mundësi të marrin pamje në oborrin e Qeverisë para nisjes së këtij takimi, ka njoftuar zyra e kryeministrit.

Kryediplomati belg, ka bërë të ditur se gjatë këtyre ditëve do të vizitojë Kosovën, Malin e Zi, Serbinë, Maqedoninë e Veriut, dhe Bosnjë Hercegovinën, kurse Shqipërinë, ka bërë të ditur ai, do ta vizitojë në një tjetër fazë, kur do të ketë ‘’kënaqësinë të hap ambasadën’’ belge në Tiranë.

Duke njoftuar për vizitën në vendet e rajonit, kryediplomati belg ka shkruar se është me rëndësi që për gjashtëshen e Ballkanit Perëndimor të ruhet perspektivë e besueshme integrimi.

“Por procesi mbetet i bazuar në merita: presim prej tyre të kenë guximin për të zbatuar reformat e nevojshme, në lidhje me sundimin e ligjit, sistemin gjyqësor, luftën kundër korrupsionit dhe pajtimin rajonal”, ka thënë Prevot.

Deputeti i Lëvizjes Vetëvendosje, Mefail Bajqinofci, ka deklaruar se opozita duhet të dalë me një emër konkret për president, duke kundërshtuar idenë e dhënies së votave pa një kandidat të qartë.

Ai në Debat Plus tha se nuk ka praktikë politike që deputetët të japin nënshkrime apo vota pa e ditur se për kë po votojnë.

“E para askund në botë nuk ka marrëveshje bllanko që mund ti japë nënshkrimet apo votat deputetëve pa emër. Këta kanë kërkuar ju duhet më na dhënë edhe nënshkrimet edhe me na votu, emrin në ua tregojmë. Nuk mundesh me votu dikë kur nuk e dinë se kush është, këtë vetëm PDK e bën”, ka deklaruar ai.

Sipas tij, ka emra brenda opozitës, konkretisht në PDK, që Lëvizja Vetëvendosje nuk do t’i mbështeste, por shtoi se ekzistojnë edhe figura të tjera që mund të jenë të pranueshme për votim.

Megjithatë, ai nuk përmendi emra konkretë.

“Po nuk ka askund marrëveshje politike në botë që duhet me ua dhënë nënshkrimet e votat pa e ditë kë do ta votojmë. Ka emra në PDK që LVV nuk do ti votonte. Por ka edhe persona që janë edhe që mund të jenë figura që mund t’i votojmë, por nuk të japë emra”, ka deklaruar ai.