Tag: Ballina

Kohëve të fundit qytetarët po përballen me rritje të çmimit të biletave për udhëtimin me autobus nga një qytet në qytetin tjetër.

E lidhur më këtë ka ardhur reagimi nga Stacioni i Autobusëve.

Në reagim thuhet se vendimi për përcaktimin e çmimeve të biletave është kompetencë ekskluzive e operatorëve privatë të transportit.

Reagimi i plotë:

Në lidhje me raportimet e fundit në media për rritjen e çmimeve të biletave të udhëtimit, sqarojmë për opinionin publik se vendimi për përcaktimin e çmimeve të biletave është kompetencë ekskluzive e operatorëve privatë të transportit.

Stacioni i Autobusëve (SAP) nuk merr pjesë në vendimmarrjen për çmimet e biletave dhe nuk ka rol në përcaktimin apo ndryshimin e tyre.

Prandaj, çdo ndryshim i çmimeve reflekton vendime të operatorëve të transportit, bazuar në politikat dhe kostot e tyre operative.

Shqipëria dhe Kroacia janë pajtuar për ta thelluar bashkëpunimin në fushën e mbrojtjes, në kuadër të një deklarate trepalëshe mes tyre dhe Kosovës, që e kanë arritur më herët.

Ministri i Mbrojtjes i Shqipërisë, Ermal Nufi, e ka zhvilluar një takim me homologun e tij kroat, Ivan Anushiq, të mërkurën në Zagreb, gjatë të cilit ata konfirmuan gatishmërinë e shteteve të tyre për zhvillimin e përbashkët të kapaciteteve dhe të industrisë ushtarake.

Në këtë kuadër, sipas njoftimit, deklarata trepalëshe mes Shqipërisë, Kosovës dhe Kroacisë synon të nxisë jo vetëm koordinimin strategjik, por edhe zhvillimin ekonomik, me theks të veçantë te industria e mbrojtjes.

“Diskutuam tema me interes të përbashkët që lidhen me paqen, sigurinë dhe stabilitetin në Evropën Juglindore, si dhe mundësitë konkrete për të thelluar bashkëpunimin në fushën e mbrojtjes. Deklarata trepalëshe ka si qëllim nxitjen e bashkëpunimit ekonomik dhe zhvillimin e industrisë së mbrojtjes.”, ka thënë ministri Nufi.

Kurse, Anushiq, ka thënë se Kroacia dhe Shqipëria ndajnë interes të përbashkët për paqen, sigurinë dhe stabilitetin në Evropën Juglindore.

“Ka kaluar kamotshëm koha kur dikush i tregonte Kroacisë, tashmë shtet sovran dhe anëtar i NATO-s dhe BE-së, çfarë të bëjë dhe si ta drejtojë politikën e vet. Ajo kohë nuk do të kthehet më kurrë!”, ka thënë Anushiq, duke iu referuar drejtpërdrejt pretendimeve të Vuçiqit.

Takimi i tyre vjen në të njëjtën ditë kur presidenti serb, paralajmëroi se Beogradi do të blejë armatim të ri pasi gjoja po përballet me trysni nga shtetet fqinje.

Vitin e kaluar, Kosova dhe Shqipëria e Kroacia kanë nënshkruar marrëveshje për thellim të bashkëpunimit në fushën e mbrojtjes dhe të sigurisë përmes një deklarate të përbashkët.

Që të tri vendet kanë thënë vazhdimisht se deklarata trepalëshe mes tyre nuk është e drejtuar kundër askujt.

Kryeministri i Kosovës, Albin Kurti, do të presë nesër në një takim zyrtar zëvendëskryeministrin dhe ministrin e Punëve të Jashtme të Belgjikës, Maxime Prévot.

Takimi pritet të mbahet në ndërtesën e Qeverisë së Kosovës, duke filluar nga ora 13:30, ndërsa mediat do të kenë mundësi të marrin pamje në oborrin e Qeverisë para nisjes së këtij takimi, ka njoftuar zyra e kryeministrit.

Kryediplomati belg, ka bërë të ditur se gjatë këtyre ditëve do të vizitojë Kosovën, Malin e Zi, Serbinë, Maqedoninë e Veriut, dhe Bosnjë Hercegovinën, kurse Shqipërinë, ka bërë të ditur ai, do ta vizitojë në një tjetër fazë, kur do të ketë ‘’kënaqësinë të hap ambasadën’’ belge në Tiranë.

Duke njoftuar për vizitën në vendet e rajonit, kryediplomati belg ka shkruar se është me rëndësi që për gjashtëshen e Ballkanit Perëndimor të ruhet perspektivë e besueshme integrimi.

“Por procesi mbetet i bazuar në merita: presim prej tyre të kenë guximin për të zbatuar reformat e nevojshme, në lidhje me sundimin e ligjit, sistemin gjyqësor, luftën kundër korrupsionit dhe pajtimin rajonal”, ka thënë Prevot.

Lidhja Demokratike e Kosovës e ka cilësuar skandaloze deklaratën e Ministrisë së Industrisë pas shqiptimit të gjobave ndaj KEDS për njehsorët me afat të skaduar.

Anëtari i LDK-së, Visar Azemi, ka deklaruar se ministria po mburret me gjobat, por sipas tij ato janë selektive dhe nuk adresojnë problemin thelbësor.

“Ministria po mburret me gjobat, por po tregohet selektive. Gjobat e vëna përveç selektive janë edhe të manipuluara dhe nuk trajtojnë thelbin kryesor të problemit”, ka thënë Azemi.

Ai ka theksuar se fokusi duhet të jetë kompensimi i qytetarëve që, sipas tij, janë faturuar padrejtësisht.

“Pra, po le ta gjobisin KEDS-in, madje jo me 1,500 euro por me 5,000 euro me gjobën maksimale, por qëllimi kryesor duhet të jetë të kompensohen qytetarët e Republikës së Kosovës, të cilët i kanë faturuar padrejtësisht duke i manipuluar njehsorët elektrikë të tyre dhe duke i fshehur faktet dhe dëshmitë”, tha ai në një konferencë për media.

Azemi ka bërë të ditur se, sipas pretendimeve të tyre, situata në terren vazhdon të jetë problematike.

“Edhe sot në këto momente kur po flasim janë duke ndodhur dy gjëra: E para, në terren KEDS dhe Ministria po i bëjnë ndërrimet e njehsorëve. Dhe e dyta, anëtarët e Lidhjes Demokratike të Kosovës, të cilët kanë qenë pjesë e ekipit tim, janë në prokurori duke dhënë dëshmi për faktet e gjetura tona, të cilat i kemi bërë të njohura”, theksoi Azemi.

LDK ka denoncuar më herët se njehsorët e energjisë elektrike po faturojnë gabimisht, duke aplikuar tarifa më të larta edhe gjatë orëve kur çmimi duhet të jetë më i ulët. Sipas kësaj partie, nga 884 njehsorë të verifikuar, rreth 87 për qind kanë rezultuar me parregullsi në matje.

Raportimet për këto çështje kanë nxitur edhe reagimin institucional, ku Ministria e Industrisë ka formuar një komision të posaçëm për verifikimin e njehsorëve të dyshimtë, ndërsa numri i ankesave nga qytetarët ka kaluar mbi 500.

Në anën tjetër, KEDS ka mohuar këto pretendime, duke ftuar qytetarët që të paraqesin ankesat e tyre për verifikim.

NP “Termokos” ka njoftuar se ka përmbyllur zyrtarisht sezonin ngrohës 2025/2026, pas 191 ditësh furnizimi të pandërprerë me energji termike për mbi 25 mijë konsumatorë në Prishtinë.

Sipas njoftimit, vendimi është marrë në përputhje me rregulloren e ZRRE-së për furnizim me energji, si dhe duke u bazuar në parashikimet meteorologjike për ditët në vijim.

“NP ‘Termokos’ Sh.A. ka marrë vendim që sot të përmbyllë sezonin ngrohës 2025/2026, pas plot 191 ditë furnizimi me ngrohje për mbi 25 mijë konsumatorë”, thuhet në njoftim.

Ky sezon konsiderohet ndër më të gjatët dhe më të suksesshmit në historinë e ndërmarrjes, pasi furnizimi me ngrohje ka nisur tetë ditë para afatit të zakonshëm dhe është zhvilluar pa asnjë ndërprerje.

“Sezoni ngrohës 2025/2026 shënon një nga sezonet më të gjata dhe më të suksesshme, ku për herë të parë furnizimi ka filluar 8 ditë më herët dhe pa asnjë ditë ndërprerje”, theksohet më tej.

Gjatë kësaj periudhe janë prodhuar gjithsej 338.902 MWh energji termike, duke siguruar furnizim të qëndrueshëm dhe cilësor për konsumatorët.

Nga ndërmarrja bëhet e ditur se përmirësimi i shërbimeve dhe aplikimi i faturimit sipas konsumit kanë ndikuar që mbi 60 për qind e konsumatorëve të kenë fatura më të ulëta, ndërsa numri i ankesave është ulur për rreth 70 për qind krahasuar me sezonin paraprak.

“Këto rezultate janë arritur falë menaxhimit efikas dhe angazhimit të vazhdueshëm të stafit”, thuhet në njoftim.

Në përfundim, Termokos ka bërë të ditur se do të vazhdojë me zbatimin e planit aksional veror, me synim përgatitjen për sezonin e ardhshëm ngrohës dhe realizimin e projekteve kapitale për zgjerimin e rrjetit dhe rritjen e numrit të konsumatorëve.

Përfaqësuesi i zyrës ligjore në Institutin Demokratik të Kosovës, Vullnet Bugaqku, tha se Gjykata Kushtetuese në vendimin e fundit të saj e ka bërë të qartë se nëse brenda 34 ditësh nuk zgjedhjet presidenti i ri, Kuvendi shpërndahet automatikisht dhe vendi shkon në zgjedhje të jashtëzakonshme parlamentare.

Bugaqku tha se Kushtetuta e parasheh që pas kalimit të afatit për zgjedhjen e presidentit, zgjedhjet të mbahen brenda 45 ditësh.

“Zgjedhjet e reja duhet të mbahen jo më vonë se 45 ditë nga dita e shpërndarjes së Kuvendit. Nëse nuk ka marrëveshje për zgjedhjen e presidentit dhe vendi shkon në zgjedhje, atëherë ato do të duhej të mbaheshin në mes të muajit qershor, më 7 ose 14 qershor, varësisht se si kalkulohen afatet dhe ditët e mbetura nga momenti kur shpërndahet Kuvendi., tha Bugaqku për rtv21.

Me shtatë vota për, Komisioni për Ekonomi ka miratuar në parim Projektligjin për Energjinë Elektrike. Mbledhja u shoqërua me debate mes Partisë Demokratike të Kosovës dhe Lëvizjes Vetëvendosje, raporton Ekonomia Online.

Ministrja e Ekonomisë, Artane Rizvanolli, prezantoi projektligjin dhe dobitë e tij.

“Projektligji për energjinë elektrike që po prezantojmë sot para jush e avancon kornizën ligjore të sektorit të energjisë në Republikën e Kosovës, duke i përcaktuar në mënyrë më të qartë dhe më të drejtë të drejtat dhe detyrimet e të gjithë pjesëmarrësve në treg, si dhe duke forcuar bazën për një sistem të qëndrueshëm, konkurrues dhe të orientuar drejt tregut. Projektligji e ruan strukturën bazë të ligjit ekzistues, mirëpo zgjerohet më tej në adresimin e zhvillimeve të fundit në tregun e energjisë, integrimin e tij, digjitalizimin dhe tranzicionin energjetik. Së bashku me projektligjin për energjinë që prezantuam dje dhe me projektligjin për rregullatorin që do ta sjellim në Kuvend gjatë këtij viti, përafrohet legjislacioni ynë me kërkesat e pakos së energjisë së pastër të Bashkimit Evropian, duke kaluar nga modeli aktual drejt një kuadri modern, të harmonizuar me Direktivën 2019/944, Rregulloren 2019/943, si dhe Rregulloret 2019/941 dhe 2019/942. Qëllimi kryesor është që të sigurohet furnizim i qëndrueshëm, cilësor dhe çmime të përballueshme për konsumatorët”, tha Rizvanolli.

Ndërsa deputeti i Partisë Demokratike të Kosovës, Ferat Shala, tha se sistemi energjetik i vendit, që nga prodhimi, transmetimi dhe shpërndarja, po shkon kah centralizimi absolut.

“Unë e dëgjova prezantimin e ministres që na e solli ligjin e dytë brenda dy ditësh, një ligj jashtëzakonisht voluminoz, i përshkruar me qindra nene, por që me këtë dinamikë e vetmja arsye që u mundua ministrja të na thotë është që janë nëntë milionë euro donacione që mund t’i përfitojnë. Konsideroj, ministre, që për nëntë milionë euro Republika e Kosovës nuk duhet të prekë substancën e bazës energjetike dhe të legjislacionit në këtë fushë pa ndonjë analizë të mirëfilltë dhe pa ndonjë debat më afatgjatë kohor. Ne këtë nuk e kemi parë dje as sot dhe, mbi të gjitha, sot po e shohim që definitivisht ky ligj po e vërteton atë që thashë dje, që sistemi energjetik i vendit, që nga prodhimi, transmetimi dhe shpërndarja, po shkon kah centralizimi absolut dhe, mbi të gjitha, është shqetësues sistemi i kontrollit. Edhe dje e sot, në asnjërin nga ligjet nuk shohim sistem të mirë të kontrollit të pavarur, por shohim centralizim ekstrem të ekzekutivit mbi sektorin energjetik. Tendencë që e kemi parë moti, por tani po i jepet një vulë edhe me legjislacion”, tha ai.

Ai gjithashtu përmendi ministrin e Infrastrukturës, Dimal Basha, dhe shtoi se KOSTT-i po shkatërrohet nga pushteti.

“Pse ju po ia shkruani ligjin Dimal Bashës? Pse nuk ka kosto financiare ligji? Pse nuk ka analizë? Pse duhet të kalojë KOSTT-i sot? Dëgjoni, po e shkatërroni KOSTT-in. Nëse është interes biznesor i ngushtë me i kap edhe bateritë, në rregull. Nëse është interes i ngushtë…”, tha Shala.

Derisa Shala pati akuza, pati ndërhyrje nga kryetarja e Komisionit nga Lëvizja Vetëvendosje, Rozeta Hajdari.

“Zotëri Shala, të lutem kontribuo për ligjin, sepse sot është në shqyrtim. Je duke bërë sulme politike pa nevojë. Të lutem, kontribuo për ligjin”, tha ajo.

Ministrja Rizvanolli, duke i reaguar deputetit Shala, ia përmendi mënyrën e qeverisjes në kohën e PDK-së.

“I nderuar deputet, zgjidhja që e keni bërë kur e keni vendosur KOSTT-in të raportojë në Kuvend është zgjidhje sui generis, që në asnjë vend tjetër në BE e as në botë nuk e kam parë. Ka përfunduar Kuvendi duke votuar 61 deputetë, duke e ngritur dorën për çështje operacionale të një ndërmarrjeje. Kjo nuk është në asnjë vend tjetër; është bërë në Kosovë si rezultat i nevojës për zbatimin e direktivave të BE-së, duke mos ditur, prej mungesës së njohurive dhe mungesës së angazhimit për të gjetur zgjidhje të duhur, që të mbetet brenda mbikëqyrjes së qeverisë, ka përfunduar në Kuvend”, tha Rizvanolli.

Deputeti i Lëvizjes Vetëvendosje, Driton Hyseni, i reagoi deputetit Shala.

Ai tha se e drejta e qeverisë është që të bëjë politikat dhe ligjet në shërbim të qytetarëve.

“Mendoj që kolegu Shala nga opozita fillimisht duhet të fillojë me një qasje të këndvështrimit të tij politik për sektorin dhe mbi çështjet që parasheh ligji, mirëpo më pas tejkaloi edhe gjuhën parlamentare dhe gjuhën kolegjiale dhe filloi me akuza. Unë nuk mendoj që ka nevojë për akuza, sepse mendoj se sillet një ligj nga një ministri e qeverisë që është votuar nga qytetarët me 51.1 për qind në zgjedhje dhe është e drejtë e kësaj qeverie që të bëjë politikat dhe ligjet siç ajo mendon që mund t’u shërbejë qytetarëve të vendit”, tha Hyseni.

Dogana e Kosovës ka publikuar një njoftim lidhur me kufirin e patatueshëm për mallrat që udhëtarët sjellin me vete në bagazh personal gjatë hyrjes në vend, duke sqaruar rregullat dhe limitet që vlejnë sipas legjislacionit në fuqi.

Sipas njoftimit, mallrat në bagazhin personal të udhëtarëve që vijnë nga jashtë Kosovës lirohen nga detyrimet e importit, përderisa ato janë për përdorim personal dhe nuk kanë qëllim tregtar. Në këtë kategori përfshihen vetëm mallrat që kanë natyrë të rastit dhe që nuk lënë dyshime se janë për shitje, ndërsa përjashtohen kontejnerët portabël që mbajnë karburante.

Dogana sqaron se çdo udhëtar është i obliguar të deklarojë mallrat nëse vlera e tyre tejkalon kufirin e lejuar ose nëse ato janë për qëllime tregtare.

Sa i përket limiteve, udhëtarët që hyjnë në Kosovë përmes rrugëve tokësore apo hekurudhore mund të sjellin mallra pa taksa deri në vlerën 300 euro për person, ndërsa ata që udhëtojnë me avion përfitojnë kufi më të lartë prej 430 euro për person. Për fëmijët nën moshën 15 vjeç, kufiri i patatueshëm është deri në 150 euro.

Ky njoftim synon të informojë qytetarët për rregullat në fuqi dhe të shmangë keqkuptimet gjatë kalimit kufitar, duke lehtësuar njëkohësisht procedurat doganore për udhëtarët.

Deputeti i LDK-së, Avdullah Hoti ka kritikuar ashpër projektligjin për çmimet tavan, duke thënë se ai është i papërmirësueshëm përmes amendamenteve dhe se në formën aktuale do të sjellë çrregullime në treg.

Ai thekson se pas analizës së projektligjit, nuk ka hapësirë për përmirësime që do ta bënin atë funksional në kushtet e tregut të lirë.

“PROJEKTLIGJI PËR ÇMIMET TAVAN ËSHTË I PAPËRMIRËSUESHËM PËRMES AMENDAMENTEVE. Projektligji për çmimet tavan, i cili kaloi në lexim të parë me procedura të shkurtuara, është i papërmirësueshëm. Sot, me shumë kujdes e analizuam këtë projektligj për të parë nëse mund të propozohen amendamente për të evituar çrregullimet në treg që pritet të sjellë ky projektligj nëse hyn në fuqi në formatin aktual të propozuar nga Qeveria”, ka shkruar Hoti.

Sipas tij, masat e propozuara nuk e arrijnë qëllimin për mbrojtjen e konsumatorit.

“Vlerësimi i përgjithshëm është se asnjë amendament nuk mund ta sjellë këtë projektligj në linjë me kërkesat dhe parimet për funksionimin e tregut të lirë në kohë të krizave dhe inflacionit, sikurse që po kalojmë tani. Masat e parapara në këtë projektligj nuk do ta mbrojnë konsumatorin. Ato masa do ta dëmtojnë biznesin dhe nuk sigurojnë arritjen e qëllimit për të cilin ndërmerren”, ka deklaruar ai.

Hoti ka kritikuar edhe mungesën e debatit publik për këtë çështje.

“Nuk e kuptoj përse nuk organizohen debate publike me oda ekonomike dhe me organizata të tjera për të marrë vlerësimet e tyre. Nuk e kuptoj përse Qeveria nuk e sqaron publikisht si do të arrihet qëllimi i këtij ligji, që është mbrojtja e konsumatorit, përmes masave të parapara në këtë projektligj”, ka shkruar ai.

Sipas tij, ndërhyrjet në krizë ekonomike duhet të bëhen si në anën e kërkesës ashtu edhe në atë të ofertës.

“Logjika ekonomike në situata të tilla kërkon që ndërhyrjet të jenë në të dy anët e tregut, në anën e kërkesës dhe të ofertës. Në anën e kërkesës duhet ndërmerren masa për të ruajtur grupet më të ndjeshme të qytetarëve, si: punëtorët që marrin pagën minimale, pensionistët, studentët, familjen në asistencë sociale dhe grupe të tjera të ngjashme”, ka shkruar Hoti.

Ai ka shtuar se mbështetja sociale duhet të jetë e përshtatur me kohëzgjatjen e krizës.

“Mbështetja e këtyre grupeve nga buxheti i shtetit mund të jetë e njëhershme nëse kriza është e përkohshme dhe nëse çmimet stabilizohen shpejt. Nëse kriza vazhdon, atëherë mbështetja duhet të jetë e përhershme duke i indeksuar të ardhurat e këtyre grupeve për normën e inflacionit të produkteve të konsumit elementar”, ka theksuar ai.

Duke folur për anën e ofertës, Hoti ka propozuar ulje të ngarkesave tatimore.

“Në anën e ofertës duhet të intervenohet në uljen e kostos për bizneset për ofrimin e mallrave në treg. Në këtë aspekt, masë e menjëhershme është ulja e ngarkesave tatimore, siç janë TVSH dhe akciza. Duke qenë se të hyrat buxhetore rriten në kohë inflacioni për shkak të TVSH-së më të lartë që mbledh shteti, është e natyrshme që ulja e normës së TVSH të ketë efekt minimal ose zero në të hyrat buxhetore”, ka deklaruar Hoti.

Në fund, ai ka kritikuar Qeverinë për mungesë të masave alternative dhe ka përmendur edhe praktika evropiane.

“Prandaj, mungesa e masave të tilla nga ana e Qeverisë së Kosovës është e pakuptueshme se kujt i shërben. Disa nga këto masa janë ndërmarrë nga vendet evropiane. Shembulli më i fundit ishte Gjermania”, ka shkruar ai.

Kur kanë mbetur edhe dy javë nga përfundimi i afatit të vendosur nga Gjykata Kushtetuese për zgjedhjen e presidentit, në horizont nuk po shihet që do të ketë ndonjë dakordim mes partive politike për këtë çështje.

Kryeministri Albin Kurti është pyetur sot nga mediat nëse do të ketë ndonjë takim këtë javë për këtë çështje, mirëpo përgjigja e tij ishte e shkurtër.

“Jemi në konsultime me kryetarët e partive opozitare, kur ka rezultate atëherë ju njoftojmë”, tha Kurti.

Kujtojmë se Gjykata Kushtetuese ka dalë me një aktgjykim, ku ka caktuar 28 prillin si datë të fundit për zgjedhjen e presidentit.

Nëse dështon zgjedhja e presidentit deri në këtë datë, Kuvendi shpërndahet automatikisht dhe zgjedhjet duhet të mbahen brenda 45 ditësh.