ATV

Tag: Ballina

  • Stërvitja e terroristëve me “Humvee”/ “Pretendim Serioz”, DASH-i për ATV-në: Po e trajtojmë këtë çështje

    Stërvitja e terroristëve me “Humvee”/ “Pretendim Serioz”, DASH-i për ATV-në: Po e trajtojmë këtë çështje

    Shtetet e Bashkuara të Amerikës janë duke i trajtuar seriozisht video-dëshmitë e prezantuara nga Policia e Kosovës, në të cilat grupi terrorist i cili kreu sulmin në Banjskë, shihen teksa kryejnë stërvitje me automjetet amerikane “Humvee” në bazat ushtarake serbe.

    Këtë e konfirmoi Departamenti Amerikan i Shtetit në një përgjigje për ATV-në.

    “Shtetet e Bashkuara e marrin seriozisht secilin pretendim përfshinë pajisjet e dhëna nga SHBA-ja kudo në botë. Ne jemi duke e trajtuar këtë çështje”, i tha ATV-së një zëdhënës i Departamentit Amerikan të Shtetit.

    Në pamjet e stërvitjeve të grupit terrorist të udhëhequr nga Milan Radojicic, të marra nga dronët e konfiskuar, shihen dy automjete “Humvee” të cilat dyshohen se janë donacion i SHBA-ve për ushtrinë e Serbisë. /atvlive.tv

  • LAJMI I FUNDIT: Arrestohet Millan Radojçiq

    LAJMI I FUNDIT: Arrestohet Millan Radojçiq

    Milan Radoiçiq, biznesmeni kontrovers, i cili sipas pretendimeve të tij është organizator i konfliktit të armatosur në Banjskë të Kosovës ku humbën jetën katër persona, është arrestuar sot, njoftoi MPB-ja e Serbisë.

    “Më 3 tetor 2023, punonjësit e policisë së Drejtorisë së Policisë Kriminale kanë kontrolluar banesën dhe lokalet e tjera të Milan Radoiçiqit, i cili është urdhëruar që policia të ndalojë deri në 48 orë. Ai me kallëzim penal është sjellë në Prokurorinë e Lartë Publike në Beograd”, thuhet në MPB.

  • Auditori: 129 punonjës të komunitetit serbë marrin paga pa shkuar në punë fare

    Auditori: 129 punonjës të komunitetit serbë marrin paga pa shkuar në punë fare

    Në Komisionin për Mbikëqyrjen e Financave Publike po shqyrtohet raporti vjetor i auditimit të Buxhetit të Kosovës për vitin fiskal 2022.

    Auditorja e përgjithshme, Vlora Spanca tha se ky raport ka opinion të kualifikuar, meqë vlera e gabimeve të identifikuara në pasqyra financiare ka qenë materiale.

    “Shpenzimet në vlerë rreth 10,400,000€ janë klasifikuar në kategori jo adekuate. Prej tyre, si rezultat i buxhetimit jo adekuat janë keq klasifikuar 5,600,000€, për shkak të vendimeve gjyqësore afër 3,800,000€, ndërsa si të ndikuara nga vetë Organizatat Buxhetore vlera e keq klasifikimeve është afër 1,000,000€; Megjithatë, në raport me vitin paraprak kishte përmirësime në vlerë prej 3 milion euro; Po ashtu, në pasqyrën e shpalosjeve, në shtojcat lidhur me pasuritë kapitale, llogaritë e arkëtueshme, detyrimet kontingjente dhe detyrimeve të papaguara të Raportit Financiar vjetor të buxhetit të shtetit kishte shpalosje të vlerave të gabuara në vlerë materiale. Nënvlerësimi i pasurisë është evidentuar në vlerë rreth 55,900,000€, nënvlerësim i llogarive të arkëtueshme afër 1,900,000€ si dhe mbivlerësim i detyrimeve kontingjente për 16,100,000€”, tha ajo.

    Në Komisionin për Mbikëqyrjen e Financave Publike, Spanca shtoi se janë 129 punonjës të komunitetit serbë të cilët janë paguar vitin e kaluar edhe pa u evidentuar në punë.

    “Kryerja e pagesave në vlerë prej afër 800,000€, për punonjës të komunitetit serb të angazhuar në bazë të Marrëveshjes se Brukselit pa u evidentuar vijueshmëria e tyre në punë; Në krahasim më vitin e kaluar janë ndërmarrë disa masa. (Nga 199 sa ishin në vitin e kaluar, këtë vit kanë mbetur 129 punonjës të shpërndarë në 4 ministri”, shtoi ajo.

    Auditorja e përgjithshme theksoi se borxhi shtetëror në fund të vitit të kaluar ka shënuar rritje për 4 për qind.

    “Borxhi shtetëror në fund të vitit 2022, kishte arritur në vlerë 1,753,200,000€ apo rreth 20% e BPV-së (40% është e lejuar me ligj). Borxhi i brendshëm ishte 1,112,000,000€, ndërsa borxhi ndërkombëtar ishte 641,200,000€. Në raport me vitin e kaluar borxhi i përgjithshëm ka shënuar rritje për 4%. Sfidë mbetet mos efikasiteti në shfrytëzimin e fondeve të marra si hua të jashtme i shkaktuar kryesisht nga problemet me menaxhimin e projekteve infrastrukturore. Niveli i shpenzimit të këtyre fondeve nga borxhi ndërkombëtar mbetet i ulët (për shtatë (7) projekte/kredi në vlerë prej 177,900,000€ të ratifikuara përgjatë viteve 2017 deri 2022, nuk janë tërhequr fare mjetet financiare). Në këtë nivel të ulët të shpenzimit ka ndikuar planifikimi jo i mirë i projekteve, vonesat në procesin e shpronësimeve si dhe mangësi tjera”, tha ajo para anëtarëve të këtij komisioni.

    Spanca tha se shpenzimet për vitin 2022 ishin në vlerë prej më shumë se dy miliardë, ku ka pasur rritje prej 10 për qind.

  • AAK-ja insiston në hetim ndërkombëtar për sulmin në veri – Çeku kërkon ngritjen e kapaciteteve ushtarake e policore

    AAK-ja insiston në hetim ndërkombëtar për sulmin në veri – Çeku kërkon ngritjen e kapaciteteve ushtarake e policore

    Grupi Parlamentar i AAK-së, ka organizuar të martën tryezë diskutimi në lidhje me situatën e sigurisë pas sulmeve terroriste në veri të vendit, raporton Ekonomia Online. Në këtë tryezë kanë marr pjesë ish-kryeministri i Kosovës Agim Çeku, ish-ministra të Sigurisë, ish-drejtor të Policisë së Kosovës, ekspert  të çështjeve të sigurisë në vend si dhe deputet të Kuvendit të Kosovës.

    Para diskutimit të pjesëmarrësve është mbajtur edhe një minutë heshtje në nderim të rreshterit të vrarë, Afrim Bunjaku.

    Kryetari i AAK-së, Ramush Haradinaj, tha se ndodhia e 24 shtatorit është sulm terrorist dhe se sponsor i këtij terrorizmi është Serbia.

    Ai kërkoj që në lidhje me këtë sulm dihet që të ketë hetim ndërkombëtar.

    “Një mundësi e mirë për një diskutim sa më të kujdesshëm që përputhet me situatën e sigurisë që është e ndjeshme. Unë kam tri momente që i kish prezantuar e para është ajo që ka ndodh me 24 shtator është terrorizëm, edhe po ashtu edhe Serbia në bazë të gjitha të gjeturave e kualifikimeve si sponsor i terrorizimit. Është interes i paqes në rajon që bashkësia ndërkombëtare të merr një pozicion të qartë që të ndëshkohet Serbia për sponsorizoi sulmin terrorist. Për këtë duhet një hetim ndërkombëtar. Pjesa tjetër është që Kosova nuk bënë asnjë herë me humb fokusimin nga obligimet e marra pra nga plani franko-gjerman. Nuk duhet me heq dorë nga qëllimi ynë i arritjes së paqes në Kosovë dhe rajon. I përgëzoj institucionet e vendit për punë ë që e kanë bërë në ditën kritike”, tha ai.

    Agim Ceku, ish-kryeministër i Kosovës, tha se sulmi që ka ndodhur me 24 shtator është sulm terrorist i mbështetur nga Serbia.

    Sipas tij, Kosova duhet që të fokusohet në politikën të jashtme si dhe e rëndësishme sipas tij, është ndërtimi i kapaciteteve ushtarake e policore në vend.

    “Ajo çka është deri më tani kemi të bëjmë fjalë me terrorizëm dhe me Serbin si sponsor të terrorizimit. Unë mendoj se sot situatë e sigurisë sot është stabile por na ka ardhur edhe një mundësi që këtë stablitite të shfrytëzojmë. Është më se e qartë se Serbia si sponsor tani është në një pozicion sa ka qenë të dielën, para kësaj ka qenë me e favorshme se sa Kosova. Tani ajo është në fazën defanzive për t’u shfajësuar nga ky veprim terrorist. Ka humbu fuqia e tyre. Mendoj se në anë tjetër ne kemi dalë faqe bardhë fitues, reagimi ka qenë bindës i suksesshëm, fatkeqësisht e kemi humb një policë. Ajo pozitive është se Policia jonë gjatë ballafaqimit pati një veprim ku u përcjell edhe me taktikë edhe veprime reale. Këtë test e dha me shumë sukses është pritur kjo që do të ndodh një ditë. Nga kjo dolëm fitimtar u rrit edhe besimi i PK. U pa që Kosova ka kapacitet dhe potencial për ta mbrojtur vetën. U pa së sa është e rëndësishme bashkëveprimi më NATO-n, ShBA, BE-së, shihet sa i vlefshëm është kjo”.

    “Gjithë e dimë se siguria kombëtare mbështet në pesë shtylla, e para dhe më shumë rëndësi është politika e jashtme. Apeloj që diplomacia jonë të jetë bindës dhe shumë aktive. E dyta është ndërtimi i kapaciteteve, e treta është Policia, e katërta është inteligjenca që është kyçe në paralajmërimin e hershëm. E pesta është plani kombëtar i reagimit në çfarëdo lloj emergjence, çfarë do lloj emergjence. Këto janë pesë shtyllat që duhet të fuqizohen”, tha ai.

    Sheremet Ahmeti ish-drejtor i Policisë së Kosovës, tha se në këtë rast është shumë e nevojshme mbështetja materiale e PK, raporton EO.

    “Njësia Speciale i ka ë dhënë kapacitetet e veta të nevojshëm për të ndal atë sulm terrorist. PK ka mjete për t’u ballafaquar por jo mjaftueshëm. Për këto 24 vite ne nuk kemi helikopter. Kujdesi duhet që të jetë në nivelin e duhur. Në këtë kohë e dini që PK duhet mbështetur materialisht, sepse nuk i ka të rregulluar statusin, që 25 vite nuk ka sigurim, nuk ka shtesa, nevoja e pensionimit të parakohshme është e nevojshme”, tha ai.

    Profesori i çështjeve të sigurisë Avni Islami, tha se duke parë rrezikun në veriun e vendit do të duhet që të shikohet edhe një herë marrëveshja e ish-kryeministrit Thaçi, që e ndalon FSK-në që të patrullojë në veri.

    Sipas tij, kjo duhet që të diskutohet dhe FSK të lejohet në atë pjesë.

    “Ngjarja e fundit ka vënë në pah institucionet e Kosovës dhe ka vënë në provë institucionet e sigurisë. Kur një shtet është pjesëmarrës ky është një terrorizëm shtetëror i Serbisë i kryer në një vend tjetër, kjo e bënë drejtpërdrejt shtetin Serb fajtor. Institucionet e Kosovë s’duhet ta shikoj ë marrëveshjen e ish-peridentit Thaçi në atë kohë, që FSK të jetë në atë pjesë”, tha ai.

    Eksperti i sigurisë Nuredin Ibishi, tha se në këtë çështje duhet që të diskutohet edhe përfshirja e Rusisë, sipas tij, “Serbia është dorë e zgajtur e Rusisë”.

    Ai tha se gjendja e sigurisë në vend e mirë dhe se i gjithë suksesi për neutralizimin e sulmit terrorist i atribuohet Policisë së Kosovës.

    Drizan Shala, ekspert i sigurisë, tha se pas këtij sulmit duhet që të rritet vigjilenca dhe të analizohet çdo i huaj që hynë në Kosovë, pasi sipas tij, mund të ketë persona që mund të hyjnë që të marrin informacione.

  • ​Kurti: Çështja më urgjente sot është siguria për Kosovën dhe ndëshkimi për Serbinë

    ​Kurti: Çështja më urgjente sot është siguria për Kosovën dhe ndëshkimi për Serbinë

    Kryeministri i Kosovës, Albin Kurti, ka kërkuar nga bashkësia ndërkombëtare që të dënojë Serbinë për sulmin terrorist të 24 shtatorit në Banjskë të Zveçanit, ku mbeti i vrarë rreshteri policor, Afrim Bunjaku. Kurti nënvizoi se çështja me e rëndësishme dhe urgjente sot është siguria për Kosovën dhe ndëshkimi për Serbinë.

    Derisa foli të martën në tryezën e Institutit të Prishtinës për Studime Politike (PIPS) për Procesin e Berlinit, Kurti tha se Serbia nuk është e interesuar për bashkëpunim rajonal dhe as anëtarësim në Bashkimin Evropian, derisa planifikon aneksimin e territorit të Kosovës.

    Ai bëri të ditur se nga informatat e para preliminare, shumica e sulmueseve të përfshirë në sulmin terrorist në veri janë pjesëtarë të organizatave “Mbrojta Civile” apo “Brigada Veriore”, të cilat janë shpallur terroriste nga qeveria më 29 qershor të këtij viti.

    “Çështja më e rëndësishme dhe urgjente sot është siguria për Kosovën e sulmuar dhe ndëshkimi për sulmuesit. Ndëshkimi për sulmuesit nënkupton, ndëshkimin e Serbisë e cila e mbështeti financiarisht, ushtarakisht, logjistikisht, politikisht, publikisht dhe zyrtarisht atë që ndodhi në Banjskë të Zveçanit të dielën e 24 shtatorit. Por të njëjtën kohë edhe ekstradimi dhe dorëzimi i të gjithë atyre që janë duke u përndjekur, sepse ikën nga vendi i krimit dhe shteti ynë. Gjithashtu më lejoni të iu përkujtoj se me 29 qershor ne kemi shpallur dy organizata terroriste “Mbrojtjen Civile” dhe “Brigadën Veriore” të cilat kanë vepruar dhe veprojnë në territorin e Kosovës në mënyrë ilegale dhe klandestine. Nëse diçka tregojnë informatat preliminare është se shumica dërrmuese e atyre të përfshirëve në këtë sulm terrorist dhe kriminal që rezultoi me vrasjen e rreshterit policor Afrim Bunjaku është se ata ishin pjesëtarë ose të “Mbrojtjes Civile” ose të “Brigadës Veriore” apo të dyja këtyre”, tha ai.

    Sipas tij, pas sulmit terrorist në veri në asnjë forum apo samit ndërkombëtar nuk duhet të vazhdohet sikur asgjë nuk ka ndodhur, por duhet të dënohet dhe ndëshkohet sjellja e Serbia.

    “Pas sulmit terrorist të Serbisë kundër Kosovës, por edhe marrëdhënies të tyre të hapur dhe bashkëpunimit gjithnjë më të ngushtë me Rusinë tregon se mungesa e bashkëpunimit rajonal është për shkak të dallimeve të vrazhda në orientimin strategjik. Derisa unë kam qenë në tavolinën e dialogut në Bruksel dhe në samitet e Procesit të Berlinit për të lidhur marrëveshjet për të ardhmen, siç kemi parë para një jave Serbia po punonte në plane ushtarake për aneksimin e territorit tonë. Kjo tregon që fqinji jonë në veri nuk është e interesuar për bashkëpunim rajonal, për anëtarësim në BE. Por, në vend të kësaj ka orientime alternative gjeopolitike të cilat janë në frymën e ambicieve hegjemonike ndaj fqinjëve. Është me rëndësi që pas sulmit terrorist të Serbisë ndaj Kosovës të mos vazhdon se asgjë nuk ka ndodhur. Duhet të ketë pasoja për këtë sjellje dhe të gjithë autorët duhet të mbahen llogaridhënës për frymëzimin, përgatitjen dhe pjesëmarrjen në këtë sulm terrorist”, tha Kurti.

    Dy javë para samitit të radhës të Procesit të Berlinit që pritet të mbahet në Tiranë, Kurti tha se bashkëpunimi rajonal duhet të bazohet në parimet e barazisë dhe reciprocitetit të palëve.

    Ai përmendi edhe tri marrëveshjet e vitit të kaluar të Procesit të Berlinit të cilat Kosova i ka miratuar, derisa tha se Bosnje Hercegovina nuk ka miratuar marrëveshjen për liri të lëvizjes me karta të identitetit.

    “Qeveria jonë ka një qëndrim të qartë për bashkëpunimin rajonal. Ne besojmë që bashkëpunimi i tillë duhet të bazohet në parimet e barazisë dhe reciprocitetit të palëve. Duhet të bazohet në rregullat, vlerat dhe standardet e BE-së që do t’i mundësonte rajonit të lëvizë më shpejtë në Bashkimin Evropian. Bashkëpunimi rajonal nuk është zëvendësim për anëtarësim në BE, por është një proces komplementar për anëtarësim të plotë. Kjo është sesi Kosova e sheh këtë dhe angazhohet në këtë drejtim…Trembëdhjetë ditë para Samitit të Tiranës duhet të vëmë re se jo të gjitha vendet i kanë ratifikuar këto marrëveshje dhe është për keqardhje që Bosnje Hercegovina është përcaktuar që të miratojë vetëm dy nga tre marrëveshjet, që nuk përfshinë marrëveshjen për liri të lëvizjes me letërnjoftime”, tha Kurti.

    Samiti i radhës i Procesit të Berlinit do të mbahet në Tiranë më 16 tetor. Vitin e kaluar gjashtë vendet e Ballkanit Perëndimor kanë miratuar tri marrëveshje, ku përfshihet liria e lëvizjes në rajon, njohja e kualifikimit të arsimit të lartë në rajon si dhe njohja e kualifikime profesionale të mjekëve, stomatologëve dhe arkitektëve./KP

  • Serwer: ShBA-ja dhe BE-ja po mbyllin sytë ndaj veprimeve të Serbisë, kjo do të ketë pasoja

    Serwer: ShBA-ja dhe BE-ja po mbyllin sytë ndaj veprimeve të Serbisë, kjo do të ketë pasoja

    Përpjekjet e Serbisë për të destabilizuar Kosovën për të mos marrë kontrollin e veriut të saj me shumicë serbe duhet të jenë të dukshme për të gjithë sot, thotë Daniel Serwer, profesor në Shkollën e Studimeve të Avancuara Ndërkombëtare në Universitetin “Johns Hopkins” në Uashington.

    Server kujton se vitin e kaluar ka pasur tensione të shkaktuara nga vendimi targat, bojkoti i zgjedhjeve komunale në pranverë, trazirat pasuese kundër kryetarëve të zgjedhur joserbë, sulmi ndaj forcave paqeruajtëse të NATO-s në maj, kidnapimi i policëve të Kosovës – të gjitha këto thotë ai ishin preludi i rebelimit të penguar fundjavën e kaluar.

    Por Server thotë se Shtetet e Bashkuara të Amerikës dhe BE deri më tani nuk kanë arritur të nxjerrin përfundimet e nevojshme, transmeton gazeta online Reporteri.

    “Ata vazhdojnë të bëjnë thirrje për dialog pa asnjë pasojë për Beogradin. Madje, ambasadori amerikan në Beograd (Christopher Hill) mendoi se ishte me vend të sugjeronte që Serbia të anëtarësohej në NATO. Shumica dërrmuese e serbëve e refuzojnë këtë perspektivë. Brenda BE-së, është e vështirë të kërkohet llogari nga Serbia, sepse çdo vendim kërkon unanimitet. Hungaria pro-ruse e Viktor Orbanit është një prishës i zakonshëm. Rezultati i zgjedhjeve të së dielës në Sllovaki do ta bëjë Bratislavën e mikun e ardhshëm më të mirë të Moskës.

    Përpjekja e vazhdueshme dhe e pafrytshme e administratës Biden për ta kthyer Serbinë drejt Perëndimit po bllokon çdo rimendim serioz të politikës në Ballkan. Zyrtarët amerikanë thjesht nuk duan të pranojnë dështimin.

    Ata vazhdojnë të kërkojnë qetësim, janë të verbër ndaj keqbërjes së Beogradit”, shkruan ndër të tjera Server në blogun e tij.

  • Në Speciale paraqitet dëshmitari i ri i mbrojtjes në rastin Shala

    Në Speciale paraqitet dëshmitari i ri i mbrojtjes në rastin Shala

    Në Dhomat e Specializuara në Hagë vazhdon sot nga ora 09.30 procesi gjyqësor ndaj ish-pjesëtarit të UÇK-së, Pjetër Shala.

    Pas përfundimit të dëshmisë së dëshmitarit të dytë të Mbrojtjes, Bedri Dervishaj, sot në orën 09:30 fillon dëshminë dëshmitari i ri i mbrojtjes.

    Ndryshe Bedri Dervishaj, tha se gjatë luftës as nuk e ka takuar dhe as nuk e ka njohur ndonjë person me emrin Pjetër Shala.

    I pyetur se a ka dëgjuar gjatë luftës për nofkën “Ujku”, dëshmitari mohoi të ketë dëgjuar për këtë nofkë, por se për të kishte dëgjuar paslufte, dhe shtoi se për Pjetër Shalën ka dëgjuar përmes televizionit.

    Dëshmitari është pyetur për ndërtesën ku ai ka shkuar për të marrë injeksion, hapësirën e saj dhe personat që ka takuar aty. E lidhur me këtë, dëshmitari tha se ka kaluar kohë e gjatë dhe nuk i kujtohet saktësisht.

    “Djali po më kanos vazhdimisht”, denoncimi i nënës nga Prizreni
    Read more

  • Parlamenti Evropian sot diskuton për situatën në veri

    Parlamenti Evropian sot diskuton për situatën në veri

    Në Parlamentin Evropian sot (e martë) do të diskutohet për situatën e sigurisë në veri të Kosovës, pas sulmit terrorist të 24 shtatorit mbi Policinë e Kosovës, ku u vra rreshteri policor Afrim Bunjaku e dy te tjerë u plagosën.

    Ndërkaq gjatë muajit PE pritet të miratojë një rezolutë për marrëdhëniet në mes të Kosovës dhe Serbisë.

    Kjo është bërë e ditur nga deputeti kroat, Tonino Picula.

    Ai ka thënë se e dënojnë agresionin e fundit të një bande të armatosur kundër policëve të Kosovës.

    “Ne e dënojmë agresionin e fundit të terroristëve të armatosur ndaj oficerit të policisë së Kosovës. Të gjitha faktet për këtë sulm duhet të zbardhen dhe përgjegjësit të përballen me drejtësinë”, tha Picula.

  • Britania shton trupat në Kosovë, tani KFOR i ka rreth 5 mijë ushtarë

    Britania shton trupat në Kosovë, tani KFOR i ka rreth 5 mijë ushtarë

    Përgatiti: Fatlum Jashari

    Nga 41 ushtarë sa kishte në Korrik, Britania e Madhe do të ketë më shumë se 600 sish në kuadër të misionit të KFOR-it në Kosovë.

    Këtë e konfirmoi Ministria Britanike e Mbrojtjes, mbrëmjen e së dielës, pas zhvillimeve në veri të vendit.

    “Mbretëria e Bashkuar do të dërgojë rreth 200 ushtarë nga Batalioni i Parë i Regjimentit Mbretëror të Princeshës së Uellsit, në ditët në vijim për t’iu bashkuar kontingjentit britanik prej 400 trupash, të cilët tashmë janë në vend si pjesë e një stërvitjeje vjetore”, thuhet mes tjerash në njoftim.

    “Zgjerimi i mbështetjes tonë për Forcën e Kosovës – KFOR thekson përkushtimin tonë të palëkundur ndaj NATO-s dhe sigurisë në Ballkanin Perëndimor”, tha shefi i stafit të Mbrojtjes i Britanisë së Madhe, Tony Radakin.

    Ky kontingjent britanik do ta çojë në më shumë se pesë mijë numrin e përgjithshëm të ushtarëve të KFOR-it.

    Me rreth 700 trupa, kryesisht nga Turqia, të cilët u vendosën në Kosovë në Qershor, vetëm këtë vit KFOR-i ka shtuar kapacitetet për rreth 1300 ushtarë.

    Në misionin e KFOR-it, sipas rezolutës 1244, aktualisht janë të angazhuara 25 vende përfshirë Shqipërinë me 89 ushtarë.

    Në përbërjen aktuale, më së shumti ushtarë kanë Italia, rreth 850; pastaj Turqia, 780 sish; SHBA-ja rreth 680, përcjellë nga Hungaria, Austria, Polonia, Kroacia e me radhë.

    Numri dhe pjesëmarrja më e gjerë në misionin e KFOR-it ishte më 1999, kur kjo forcë paqeruajtëse numëronte rreth 50 mijë ushtarë me 39 shtete anëtare dhe jo-anëtare të NATO-s.

    Më 2008, ky mision kishte rreth 14 mijë ushtarë dhe numri i tyre u reduktua vit pas viti pas shpalljes së pavarësisë.

  • Kurti takon kryetarët e komunave, zotohet për investime pa diskriminim

    Kurti takon kryetarët e komunave, zotohet për investime pa diskriminim

    Përgatiti: Pranvera Krasniqi

    Investime kapitale pa diskriminim për të gjitha komunat, përfshirë ndërtimin e rrugëve, autostradave, shkollave, ka qenë zotimi i kryeministrit Albin Kurti para kryetarëve të komunave të Kosovës.

    Ai në këtë takim tha se granti i përgjithshëm për komunat për vitin 2024 është afro 285 milionë euro.

    “Granti i përgjithshëm për komunat për vitin 2024 kap shumën prej 284.7 milionë eurove e që paraqet vlerën më të madhe deri më tani, për këtë grant. Kjo vlerë rekorde e grantit të përgjithshëm vjen si rezultat i drejtpërdrejtë i rritjes së të hyrave në buxhetin e shtetit”, u shpreh ai.

    Kryeministri tha se asnjë komunë e asnjë komunitet nuk do të diskriminohet, duke shtuar se projekte do të përfitohen në bazë të meritave e jo preferencave.

    “Buxheti për komunat në vitin tjetër është 742 milionë euro. Po bëhet viti i dytë me radhë që rritja e buxhetit është në shifër dyshifrore. Investimet kapitale në komuna përfshijnë shumë sfera. Këto investime përfshijnë të gjitha komuna dhe pa diskriminuar asnjë komunitet. Kemi përgatitur legjislacionin që u mundëson komunave të përfitojnë jo sipas preferencave. Jemi të gatshëm që të ofrojmë zgjidhje”, tha Kurti.

    Kryetarëve, Kurti u foli edhe për organizimin e Lojërave Mesdhetare 2030, si një mundësi të mirë për të përfituar në rregullimin e infrastrukturës sportive.
    Megjithatë, në këtë takim kryeministri u përball me kritika rreth mënyrës së qasjes ndaj problemeve të komunave.

    Kryetari i Asociacionit të komunave të Kosovës, Agim Aliu, tha se Ligji për tatimin në pronë, tregon shembull të mosbashkëpunimit mes komunave dhe nivelit qendror.

    “Ne kryetarët kemi bindjen që duhet të ndryshojë qasja e komunikimit. I tillë ishte edhe Ligji për Vetëqeverisje për të cilin kryetarët e komunave u përjashtuan nga konsultimi. Edhe në pikëpamje të planifikimeve buxhetore tavanet e caktuara nga Ministria e Financave për vitin 2024 parashihet të ketë shkurtime të buxhetit në investime kapitale që karakterizon vitin 2024 me investime më pak kapitale”, tha Aliu.

    Në këtë takim, në të cilin nuk mori pjesë kryetari i Leposaviqit, Lulzim Hetemi, u mbajt një minutë heshtje për rreshterin e rënë në detyrë, Afrim Bunjaku.