ATV

Tag: Ballina

  • E konfirmuar: Ministrat e NATO-s sot do të diskutojnë edhe për Kosovën

    E konfirmuar: Ministrat e NATO-s sot do të diskutojnë edhe për Kosovën

    Në selinë e NATO-s në Bruksel, sot është duke u zhvilluar dita e dytë e takimeve të të gjithë ministrave të Mbrojtjes të Vendeve anëtare të NATO-s.

    Në takimin e mbajtur në orët e hershme të mëngjesit, sekretari i përgjithshëm i NATO-s, Jens Stoltenberg tha se gjatë ditës së sotme do të diskutohet edhe për Kosovë, raportoi në një lidhje të drejtpërdrejt nga Brukseli, gazetarja e ATV-së, Flaka Vitaku.

    Temë e diskutimit do të jetë siguria në Kosovë dhe në gjithë Ballkanin Perëndimor, më specifikisht për sulmin terrorist që ndodhi në Banjskë të Zveçanit më 24 shtator., ku është parë e arsyeshme që të rritet numri i pjesëtareve të misionit të NATO-s në Kosovë. /atvlive.tv

  • Kurti thotë se mund të ketë eskalim sërish në veri: Po inskenohen sulme për ta fajësuar Policinë

    Kurti thotë se mund të ketë eskalim sërish në veri: Po inskenohen sulme për ta fajësuar Policinë

    Kryeministri i Kosovës, Albin Kurti, tha se institucionet e sigurisë dhe inteligjencës kanë identifikuar inskenime për sulme të reja nga Serbia në mënyrë që fajësohet Policia e Kosovës, raporton Ekonomia Online.

    Para fillimit të mbledhjes së Qeverisë, Kurti u shpreh se ekziston rreziku për eskalim javët në vijim në veri.

    Lirimi i Milan Radojiçiqit në më pak se 24 orë, sipas Kurtit, është dëshmi dhe sinjal i potencialit për rigrupim dhe hakmarrje, “sepse më 24 shtator Beogradi zyrtar e militar dështoi”.

    “Institucionet e sigurisë së fundmi kanë hetuar rrezikun në rritje të inskenimit të sulmeve të dhunshme nga grupet e strukturave të Serbisë në Kosovë. Qëllimi i tyre kryesor është fajësimi i Policisë së Kosovës dhe paraqitja e saj si forcë shtypëse mbi serbët e Kosovës. Për ta arritur këtë nuk kanë vënë çmim në tavan. Nuk do të zgjedhin mjet. Mbështetja e grupit terrorist që ka marrë nga Serbia në njërën anë duke i trajtuar si heronj, në anën tjetër duke intensifikuar aktivitetet e ushtrisë pranë kufirit me Kosovën vetëm sa i inkurajuar ata”.

    “Deshën ta ndryshojnë realitetin në terren përmes organizimeve paramilitare, nuk ia arritën. Provuan ta keqpërdorën Manastirin e Banjskës, nuk ia arritën. Tani formacionet kriminale të sponsorizuara nga fqinji ynë verior në skenarin e tyre destabilizues, ka shumë të ngjarë që dallimet etnike t’i keqpërdorin për synime politike. Javën që lamë pas u shënua 23-vjetori i rrëzimit të Millosheviqit, 23 vjet pas asnjëherë më parë nuk i ka ngjarë më së shumti Serbisë së Millosheviqit ky pushtet në Serbi, në botëkuptime, në metoda, në sjellje e në veprime”.

    “Shumë çka është ndryshe prej asaj të diele. Gjithçka do të ishte ndryshe nëse grupi terrorist nuk do të neutralizoheshin që në natën e parë. Ata dështuan dhe kjo i ka dëshpëruar. Lirimi i Radojiçiqit më pak se 24 orë pas arrestimit është dëshmi e sinjalit për rigrupim dhe hakmarrje. Institucionet e tona të sigurisë dhe inteligjencës kanë identifikuar inskenimet. Qëllimi i tyre kryesor është fajësimi i Policisë së Kosovës”

    Fjalimi i plotë:

    Të nderuar zëvendëskryeministra, ministra dhe zëvendësministra,

    Të dashur qytetarë,

    Jemi 18 ditë pas sulmit paramilitar, terrorist dhe kriminal të 24 shtatorit. Shumëçka është ndryshe prej asaj të dielës. Gjithçka do të ishte ndryshe nëse grupi terrorist dhe planet e tyre për aneksim të katër komunave në veri të vendit nuk do të neutralizoheshin që në aktin e parë. Ata dështuan. Dhe kjo i ka bërë shumë të dëshpëruar.

    Dokumentimi para syve të botës i përfshirjes së të paktën katër shtresave të shtetit serb, përkatësisht, Presidencës, Shërbimit të inteligjencës, Ministrisë së Mbrojtës dhe ushtrisë serbe, në frymëzimin, përgatitjen, furnizimin dhe pjesëmarrjen në sulmin terrorist në fshatin Banjskë, janë motiv shtesë për skenarë tjerë destabilizues.

    Lirimi i Millan Radoiçiq-it, më pak se 24 orë pas arrestimit, është dëshmi dhe sinjal i potencialit për ri-grupim dhe hakmarrje, sepse me 24 shtator, Beogradi zyrtar e militar dështoi. Institucionet tona të sigurisë dhe të inteligjencës së fundmi kanë hetuar rrezikun në rritje të inskenimeve të sulmeve të dhunshme nga grupe të strukturave kriminale të Serbisë në Kosovë. Qëllimi i tyre kryesor është fajësimi i Policisë së Kosovës dhe paraqitja e saj si forcë shtypëse mbi serbët e Kosovës. Për të arritur këtë, nuk kanë vënë çmim tavan. Nuk do të zgjedhin mjet.

    Fatkeqësisht, mbështetja që grupi terrorist ka marrë nga Serbia, në njërën anë duke i trajtuar ata si heronj dhe martirë, dhe në anën tjetër duke intensifikuar aktivitetet e ushtrisë përgjatë kufirit me Republikën tonë, vetëm sa e ka inkurajuar. Provuan ta ndryshojnë realitetin në terren përmes veprimeve të organizuara dhe koordinuara paramilitare. Nuk ia arritën. Keqpërdorën Manastirin e Banjskës me synimin që t’i japin ngjyrim fetar ngjarjeve të 24 shtatorit. Sërish nuk ia arritën. Tani, formacione kriminale të sponsorizuara nga fqinji ynë verior, në skenarët e tyre destabilizues ka shumë të ngjarë që dallimet etnike synojnë t’i keqpërdorin për qëllime politike. Për rastësi, javën që e lamë pas shënoi 23-vjetorin e rrëzimit të regjimit të Millosheviqit. E për fat të keq, 23 vjet pas 5 tetorit, regjimi aktual i Serbisë asnjëherë më parë nuk i ka përngjarë më shumë se sot, Serbisë së Millosheviqit.

    Në botëkuptim, e në synime, në sjellje, në metoda e në veprime. Andaj, ju bëj thirrje, veçanërisht juve të nderuar bashkëqytetarë serbë, që ditëve, javëve dhe muajve në vijim të jeni të vëmendshëm dhe të vetëpërmbajtur nga cytjet e aktet e dhunës të inskenuara dhe dashakeqe. Në Kosovë të gjithë jemi qytetarë të barabartë sepse shteti është ligjor dhe shoqëria është demokratike. Nuk ka komunitete të padëshiruara. Shqiptarët, serbët, boshnjakët, turqit, ashkalinjt, romët, egjiptianët, goranët dhe të gjithë të tjerët jetojnë e punojnë bashkë kudo në Kosovën tonë të dashur paqësore e proevropiane.

    Ata që po duan të na rrënojnë nuk do t’ia dalin. Sepse jemi të përgatitur. Sepse jemi bashkë, me motiv të lartë dhe qëllime fisnike, për paqe dhe siguri, për të drejta dhe demokraci. Kosova është shtet i sigurtë. Sipas Indeksit Global të Krimit të Organizuar, Kosova ka shkallën më të ulët të kriminalitetit në mesin e të gjitha shteteve të Ballkanit Perëndimor. Institucionet e vendit tonë, sidomos ato të sigurisë, janë në krye të detyrës, në shërbim dhe mbrojte të të gjithë qytetarëve, pa diskriminim e favorizim.

    Puna dhe ligji na bashkojnë si shoqëri. Shumëllojshmëria kulturore dhe etnike na pasurojnë si vend. Ju ftoj që të mbështeteni në Policinë e Kosovës. T’i besoni profesionalizmit të saj. Të raportoni sjelljet e dyshimta të individëve në komunitetet tuaja.

    T’i përcjellni me vëmendjen njoftimet e institucioneve nëpër kanalet e tyre zyrtare. Të mos bini pre e raportimeve të pakonfirmuara dhe të dezinformatave. Të ruani qetësinë në çdo situatë. Andaj, bashkëqytetarë të dashur, Me këtë thirrje në të njëjtën kohë shpreh edhe një herë mirënjohjen gjithë juve dhe secilit prej juve, për besimin, bashkëpunimin, maturinë dhe vetëdijen e lartë qytetare.

    Ju faleminderit!

  • Kastrati i PDK-së: Është çudi si u lanë të ikin terroristët në Banjskë, është dashur të asgjësohen ose dorëzohen

    Kastrati i PDK-së: Është çudi si u lanë të ikin terroristët në Banjskë, është dashur të asgjësohen ose dorëzohen

    Deputeti i PDK-së, Ardian Kastrati, është i mendimit se në sulmin terrorist të 24 shtatorit në Banjskë, Kosova i ka lënë të lirë terroristët përmes një marrëveshjeje politike.

    Ai në emisionin DPT te Fidani, në ATV, ka thënë se si pasojë e kësaj tash terroristët serbë janë rrezik potencial për çdo natë i trupave të KFOR-it dhe Policisë së Kosovës në veri, shkruan Reporteri.net.

    “Kush i lëshoi Radojiçiqin me ata terroristat me ecë? Nuk i ka lëshu policia, është bo negociatë në nivel politik. Ata janë rrezik potencial prapa trupave të KFOR-it dhe policisë tonë çdo natë tash e tutje”.

    “Në situata të tilla kur një shtet të sulmon, një brigadë armatim e ka sjellë, ti duhesh ose me i asgjësu ose me i bo me u dorëzu”.

    Drejtori i Përgjithshëm i Policisë së Kosovës, Gazmend Hoxha, para një jave pati treguar se nuk ka pasur kurrfarë marrëveshje për krijimin e një korridori që do t’ua mundësonte ikjen terroristëve serbë.

    Ai ka thënë se është tentuar që të komunikohet me terroristët, në mënyrë që të dorëzohen, mirëpo se ata nuk u janë bindur kërkesave të policisë dhe janë përgjigjur me armë zjarri.

    Tutje ka shtruar pyetje edhe se si u la të hyjë në Manastirin e Banjskës armatimi që u përdor gjatë sulmit, e që u sekuestrua pas tij.

    “E dyta, si u fut gjithë ai armatim, u leju me ardhë deri te Manastiri i Banjskës prej një depoje? S’jemi t’u folë për katër kallashnikova por për armatim për një brigadë të tanë”.

    “A ka shpjegim dikush prej qeverisë? A ka dikush shpjegim pse janë liru ata? Ata ecshin si fëmija në ekskursion”.

    “Nuk po konstatoj, unë dyshoj që dikush është prapa gjithë aksionit. Policia nuk është në dijeni. Si u lanë ashtu me ikë ata 30 veta është kogja çudi”, ka thënë Kastrati i PDK-së.

  • Sanksionet ndaj Serbisë “gati të pamundura”, dialogu para paralizës totale dhe dhuna e sërishme në veri “pothuajse e sigurt”

    Sanksionet ndaj Serbisë “gati të pamundura”, dialogu para paralizës totale dhe dhuna e sërishme në veri “pothuajse e sigurt”

    Gjasat që Bashkimi Evropian (BE) t’i vendosë sanksione Serbisë konsiderohen pothuajse minimale për shkak të mungesës së konsensusit brenda BE-së, derisa njohësit e çështjeve politike shprehin paralelisht frikën se cikli i dhunës në pjesën veriore të Kosovës të banuar me serbë etnikë mund të kthehet sërish pas sulmit terrorist në Banjë të Zveçanit dhe bllokimit të procesit të dialogut Kosovë-Serbi.

    Eksperti i politikës së jashtme të BE-së nga Këshilli i Politikave të Demokratizimit (DPC), Toby Vogel, në një prononcim për Albanian Post, thotë se kërkesa e Kosovës që njëherë t’i vendosen sanksione Serbisë e tek pastaj të procedohet tutje me procesin e dialogut për normalizimin e marrëdhënieve nën kujdesin e BE-së, në këtë moment është jorealiste, për shkak se kërkohet unanimitet në mesin e 27 shteteve anëtare.

    Vogel kujton se jo të gjitha vendet anëtare të BE-së mendojnë njësoj kur bëhet fjalë për ndërmarrjen e sanksioneve ndaj Serbisë, derisa përmend faktin se kryeministri hungarez Viktor Orban mbështet hapur presidentin serb Alesandër Vucic dhe, rrjedhimisht, refuzon të pajtohet për vendosjen e sanksioneve, ndonëse një pjesë e tyre tashmë janë skicuar dhe priten veprimet e radhës nga eurokratët në Bruksel.

    Hungaria nuk është problemi i vetëm, shton Vogel. Ai beson se ka edhe disa vende të tjera anëtare brenda unionit që mund t’i kundërshtojnë sanksionet ndaj shtetit serb, duke përfshirë Kroacinë dhe Sllovakinë. Megjithatë, ai thotë se ka hapa të tjerë që Përfaqësuesi i Lartë i BE-së për Politikë të Jashtme dhe Siguri Josep Borrell mund t’i ndërmarrë – njësoj sikurse në rastin e Kosovës në muajin qershor.

    “Llogaritjet ndryshojnë nëse ka prova të pakundërshtueshme të përfshirjes së qeverisë serbe në planifikimin dhe ekzekutimin e sulmit në Banjë. BE-ja thotë se nuk ka prova të tilla deri më tani – një pretendim që i bën sanksionet të pamundshme. Gjithsesi, ajo që Borrelli mund të bëj është e njëjtë me atë që bëri me Kosovën, ku në fakt nuk u konsultua me të gjitha shtetet anëtare dhe prapë doli dhe tha se 27 shtete vendosin sanksionet kundër Kosovës”.

    Jasmin Mujanoviç, analist politik, konsulent dhe kolumnist i shumë mediave të huaja, në një prononcim për Albanian Post, thotë se cështja e sanksioneve ka krijuar probleme politike brenda unionit, përtej çështjeve teknike të planit funksionalist të BE-së, ndërsa shton se përvec Hungarisë, ka indikacione se shtetet e tjera anëtare të BE-së – Austria dhe Qipro – ndoshta edhe Kroacia, janë kundër sanksioneve të BE-së.

    “Hungaria ka një ndikim të jashtëzakonshëm mbi politikën e Komisionit Evropian (KE) për Ballkanin Perëndimor dhe Orbani ka qenë shumë i qartë se do të vazhdojë të bllokojë sanksionet kundër Dodikut, njëjtë sikurse do të vazhdojë të bllokojë edhe idenë e sanksioneve visa-a-vis ndaj Vuçiçit dhe qeverisë në Beograd. Kjo pasqyron faktin që Vuçiçi dhe bashkëpunëtorët e tij kanë një audiencë simpatizuesish në një numër të konsiderueshëm kryeqytetesh evropiane”.

    Vogel nga ana tjetër jep një shpjegim tjetër se gjasat për vendosjen e sanksioneve ndaj Serbisë janë minimale. Ai thotë se përfaqësuesve evropianë iu duhet Vucici për të mos e bllokuar dialogun. Vogel argumenton se ideja e vijimësisë së procesit të dialogut është bërë qëllim në vetvete për diplomatët në Bruksel, derisa shton se presidenti serb e ka shfrytëzuar jashtëzakonisht mirë këtë kartë.

    “BE-ja dhe SHBA-të janë të dëshpëruar për të vazhduar qasjen e tyre aktuale, edhe pse dialogu nuk ka dhënë asgjë për shumë vite. Dialogu është abuzuar si mjet për menaxhimin e konfliktit apo menaxhimit të krizave dhe Serbia posacerisht e ka luajtur me shumë sukses këtë kartë. Ata prodhojnë kriza pastaj përdorin dialogun për të zbutur krizën”.

    Vogel nuk mendon se momentalisht ekziston vullnet as nga ana e kryeministrit kosovar Albin Kurti e as nga pala serbe për të ndërmarrë hapa drejt normalizimit të marrëdhënieve, derisa arsyeton kryeministrin Kurti që nuk e trajton dialogun prioritet të lartë, sepse sipas tij, sidoqoftë Kosova është e bllokuar dhe nuk ka shanse të njihet nga të paktën tre nga pesë shtetet mosnjohëse të BE-së – Spanja, Sllovakia, Greqia, Rumania dhe Qipro.

    “Kam frikë se fotografia është shumë e zymtë. Mendoj se dhuna e mëtejshme nuk është vetëm e mundur, por ndoshta e sigurt. Ajo që ndodhi në Banjë është jashtëzakonisht e turbullt… Për sa kohë që këto gjëra mbeten të errëta, mendoj se është shumë e vështirë të parashikohet se çfarë do të ndodhë, por nuk shoh ndonjë gjë pozitive të vijë pas zhvillimeve të fundit”, thotë Vogel.

    Optimist nuk shprehet as Mujanovici. Ai konsideron se BE-së do t’i atribuohet edhe një dështim tjetër që do të shkojë në dëm të Kosovës. Mujanovici nënvizon se është vetëm cështje kohe kur presidenti serb do të provojë përsëri të zbatojë modelin e njëjtë sikurse në Banjë.

    “Mendoj se është shumë e qartë se BE-ja do të dështojë në këtë test. Kjo do ta bëjë Kosovën më të pasigurt e situatën më të rrezikshme sepse Vuçiçi do të trimërohet dhe, kam frikë, do të jetë çështje kohe përpara se ai të testojë ujërat përsëri mbi një lloj dhune. Ai ka qenë shumë sistematikisht duke vjellur nxehtësi dhe duke normalizuar gjithnjë e më shumë si kërcënimet ashtu edhe përdorimin e dhunës”.

  • ​Kuvendi sot mban seancë të jashtëzakonshme

    ​Kuvendi sot mban seancë të jashtëzakonshme

    Deputetët e Kuvendit të Kosovës do të mblidhen sot (e enjte) në seancë të jashtëzakonshme.

    Në rend dite është shqyrtimi i Propozim-Rezolutës për mbështetjen urgjente financiare të Policisë së Kosovës.

    Sipas njoftimit, seanca do të nisë nga ora 11:00.

  • Sot Kuvendi diskuton për mbështetjen urgjente financiare të Policisë

    Sot Kuvendi diskuton për mbështetjen urgjente financiare të Policisë

    Deputetët e Kuvendit të Republikës së Kosovës do të mblidhen sot në një seancë të jashtëzakonshme.

    Në seancën që pritet të fillojë në orën 11:00 është vetëm një pikë në rendin e ditës, ku do të bëhet shqyrtimi i i Propozim-Rezolutës për mbështetjen urgjente financiare të Policisë së Kosovës.

    Kjo kërkesë për seancë të jashtëzakonshme është bërë nga shefi i Grupit Parlamentar të Partisë Demokratike të Kosovës , Abelard Tahiri, në emër të deputetëve nënshkrues.

    Dokumenti përmban edhe nënshkrimet e 33 deputetëve të: Grupit Parlamentar të PDK-së, të LDK-së dhe AAK-së.

    Kjo kërkesë ka ardhur pas situatës së krijuar në Banjskë, si pasojë e të cilës mbeti i vrarë polici Afrim Bunjaku.

    Gjatë atij aksioni, u shpërfaqën mungesat që kanë policët në punën e tyre, si mospagimi i shtesave të rrezikut, mungesa e Ligjit të Sigurimit Shëndetësor dhe çështje të tjera.

  • Serwer: ShBA-ja dhe BE s’kanë treguar ndonjë vullnet për të bllokuar ambiciet e Serbisë

    Serwer: ShBA-ja dhe BE s’kanë treguar ndonjë vullnet për të bllokuar ambiciet e Serbisë

    Njohësi i zhvillimeve politike dhe profesori amerikan, Daniel Serwer, ka reaguar ashpër ndaj deklaratës së zëdhënësit të BE-se, Peter Stano, për masat ndaj Kosovës, duke thënë se BE-ja ende s’ka parë veprime nga Kosova që çojnë në de-eskalim të plotë të situatës në veri.

    Sipas Serwer, “BE-ja është bërë një kundërshtar de-facto i sovranitetit dhe integritetit territorial të Kosovës”.

    “Ajo [BE] dëshiron të kufizojë dislokimet e policisë në përgjigje të një kërcënimi të qartë dhe aktual, si dhe të krijojë një strukturë të veçantë qeverisëse për popullatën serbe, të paktën në veri”, ka shkruar Serwer.

    Më tej profesori i Universitetit amerikan “John Hopkins”, ka shkruar se “SHBA-të po mbështesin BE-në në të dyja këto synime, ndërsa mohojnë se do të lejojnë arritjen e objektivit të fundit”.

    “Por as BE dhe as SHBA nuk kanë treguar ndonjë vullnet për të bllokuar ambiciet e Serbisë, siç tregohet nga dështimi për të reaguar ndaj tentativës së kryengritjes së Beogradit”, ka shkruar Serwer.

    Situata në veri e ka ndikuar edhe në mënyrë tjetër ekonominë e Kosovës, pasi Bashkimi Evropian ka ndërmarrë në fund të qershorit disa masa ndëshkuese ndaj vendit.

    Kjo, pasi Qeveria e Kosovës nuk u është bindur, sipas bashkësisë ndërkombëtare, kërkesave të saj për ta shtensionuar situatën në veri.

    Këto masa kanë përfshirë pezullimin e programimit të fondeve për Kosovën, përfshirë ato nga IPA – Instrumentet e Para-Anëtarësimit në BE – dhe nga Korniza Investuese e Ballkanit Perëndimor.

    Nga Zyra e Bashkimit Evropian në Kosovë kanë deklaruar se këto masa nuk pritet të kenë ndikim të drejtpërdrejtë negativ apo të prodhojnë humbje financiare për bizneset, por, megjithatë, “ato kanë pezulluar nënshkrimin e kontratave të reja, që do të kishin krijuar një vlerë potenciale për bizneset në Kosovë”.

  • Shqipëria, anëtare e Këshillit të të Drejtave të Njeriut në OKB

    Shqipëria, anëtare e Këshillit të të Drejtave të Njeriut në OKB

    Përgatiti: Benita Zeneli

    123 vende anëtare të Asamblesë së Përgjithshme të Organizatës së Kombeve të Bashkuara kanë votuar pro anëtarësimit të Shqipërisë në Këshillin e të Drejtave të Njeriut, nga 1 janari i vitit të ardhshëm.

    Mandati i Shqipërisë në këtë këshill do të vlejë deri më 31 dhjetor 2026, njoftoi në një komunikatë kryeministrit shqiptar, Edi Rama.

    “Shqipëria ulet në Këshillin e të Drejtave të Njeriut në OKB. Dje, 123 vende anëtare të Asamblesë së Përgjithshme të OKB-së votuan PRO SHQIPËRISË, si një prej 15 vendeve që do të ulen në KDNJ nga 1 janari 2024 deri në 31 dhjetor 2026:, tha Rama.

    Bashkë me Shqipërinë pjesë e këtij Këshilli do të jetë edhe Bullgaria, duke mbushur kështu dy vendet e rezervuara për shtetet e Evropës lindore.

    Anëtarësimi i Shqipërisë dhe i Bullgarisë ndodhi pasi Rusia nuk ia doli të rianëtarësohet në këshill nga ku ishte përjashtuar në prill të vitit të shkuar, pasi pushtoi Ukrainën.

    Rusia konkurronte me Bullgarinë dhe Shqipërinë, por mori vetëm 83 vota edhe pse raportohej se kishte udhëhequr fushatë të ashpër për rikthim në këshillë, duke iu premtuar shteteve të vogla grurë dhe armë në këmbim me votë.

    Por, në prag të votimit, ambasadori i Shqipërisë në OKB, Ferit Hoxha, kishte thënë se shtetet anëtare të këshillit duhet të dëshmojnë që nuk janë gati për rikthimin e Rusisë.

  • Policia e Kosovës pranoi 7 dronë nga SHBA-ja

    Policia e Kosovës pranoi 7 dronë nga SHBA-ja

    Përgatiti: Krenare Mulliqi

    Këto pamje që dëshmuan pjesëmarrjen e Milan Radojiqiqit në sulmin në Banjskë të Zveçanit, u xhiruan me dronë të Policisë së Kosovës.

    Por ai dhe një tjetër që u përdor në aksionin e 24 shtatorit në veri të vendit, u shkatërruan nga grupi terrorist i udhëhequr nga Radojiciq.

    Mirëpo, nga kjo e mërkurë institucioni i Policisë së Kosovës do t’i ketë edhe 7 pajisje të tilla fluturuese, të cilat i pranoi nga Shtetet e Bashkuara të Amerikës.

    “7 dronë që i dhurojmë Policisë dhe IPK-së, do të ndihmojnë në luftimin e dukurive negative. Ne do të vazhdojmë të punojmë me Policinë e Kosovës për të çuar përpara përkushtimin tonë të përbashkët, për të ofruar shërbime transparente e të përgjegjshme të zbatimit të ligjit, nga të cilat përfitojnë të gjithë qytetarët e Kosovës”, tha ambasadori i SHBA-së në Kosovë, Jeffrey Hovenier.

    Falënderimet për këtë donacion nuk munguan, derisa Drejtori i Përgjithshëm i Policisë tha se dronët do të ndihmojë në ngritjen e kapaciteteve.

    Dronët do të ndihmojnë edhe në mbështetje të operacioneve të kërkim-shpëtimit, në menaxhimin e fatkeqësive, si dhe në monitorimin e turmave dhe të trafikut.

    Vetëm në pesë vitet e fundit, sipas ambasadorit Hovenier, ShBA-ja ka ofruar mbi 20 milionë dollarë mbështetje në forma të ndryshme për organizatat e policisë.

  • Pjesëtarë të organizatës ilegale serbe “Mbrojtja Civile”, ka kohë që nuk janë parë rrugëve të veriut

    Pjesëtarë të organizatës ilegale serbe “Mbrojtja Civile”, ka kohë që nuk janë parë rrugëve të veriut

    Përgatiti: Arton Hamiti

    Në territorin e Kosovës, kryesisht në katër komunat veriore, që nga përfundimi i luftës kanë operuar struktura ilegale, të mbështetura dhe të financuara nga Serbia.

    “Mbrojtja Civile” ishte njëra prej këtyre strukturave, e cila ka dalë publikisht në vitin 2011.

    Njerëz me uniforma të zeza, me mbishkrimin “Civilna zashtita” ishin parë në rrugët e Mitrovicës së Veriut, kohë më parë.

    Por, në kushte anonimiteti, banorët e Lagjes së Boshnjakëve, thanë se pjesëtarë të Mbrojtjes Civile më nuk janë prezentë. Gazetari Branislav Krstic i cili jeton dhe vepron në veri, pretendon se shumica prej tyre janë larguar për në Serbi me rekomandime nga Beogradi.

    Megjithatë, në tkurrjen e kësaj organizate vlerësohet të ketë ndikuar prania e njësive speciale në katër komunat veriore.

    Kryeministri Albin Kurti, më 3 tetor, deklaroi se shumica e personave të përfshirë në sulmin në Banjskë të Zveçanit, janë ose pjesëtarë të organizatës Mbrojtja Civile ose të Brigadës së Veriut – të dyja të shpallura terroriste në Kosovë.

    Sidoqoftë, gjatë këtyre viteve Kosova ka qenë e pafuqishme ta shuajë organizatën Mbrojtja Civile, teksa zhbërja e saj është paraparë me një marrëveshje, që Kosova dhe Serbia kanë arritur në Bruksel në vitin 2015.

    Kurse, më 13 qershor të këtij viti, si i dyshuar për sulme ndaj KFOR-it dhe vepra të tjera kriminale, ishte arrestuar serbi Millun Millenkoviq, në Mitrovicë të Veriut, i cili, sipas ministrit të Brendshëm, Xhelal Sveçla, është udhëheqës i formacionit Mbrojtja Civile.