Tag: Ballina

Sot dhe nesër, në Kosovë do të qëndrojë për vizitë zyrtare një delegacion i Komitetit Ushtarak të NATO-së.

Me këtë rast Policia e Kosovës ka njoftuar se gjatë kësaj vizite do të kujdeset për ruajtjen e rendit dhe qetësisë publike si dhe rregullimin e trafikut, gjatë kohës së lëvizjes së eskortës dhe kohës së qëndrimit të delegacionit në Kosovë.

Për të mundësuar qarkullim të lirë të eskortës sipas itinerarit të lëvizjes si dhe zhvillimin e aktiviteteve sipas agjendës zyrtare të vizitës, Policia e Kosovës do të bëjë ndërprerje të përkohshme të qarkullimit të trafikut (në intervale të shkurtra kohore) të disa segmenteve rrugore (ku pritet të kalojë eskorta), ku edhe mund të ketë riorientim të trafikut në rrugë alternative.

“Policia e Kosovës kërkon mirëkuptim të plotë nga ana e qytetarëve dhe pjesëmarrësve në trafik”.

Ministri i Mbrojtjes, Ejup Maqedonci, ka bërë të ditur se ushtarakët e Forcës së Sigurisë së Kosovës (FSK) po vazhdojnë të shënojnë suksese në akademitë e vendeve të NATO-s.

Sipas tij, gjatë muajit prill, dy oficerë të FSK-së kanë diplomuar me sukses në Mbretërinë e Bashkuar dhe në Shtetet e Bashkuara të Amerikës, duke dëshmuar nivel të lartë profesionalizmi dhe përgatitjeje.

Maqedonci ka njoftuar se nëntoger Endi Sherifi ka përfunduar një nga trajnimet më sfiduese të këmbësorisë në Ushtrinë Britanike, PCBC (Platoon Commander Battle Course), në Brecon të Uellsit, ku për performancën e tij është vlerësuar me “Mirënjohje të Veçantë” nga komandanti i Shkollës së Këmbësorisë.

Ndërkaq, në SHBA, Ermonda Meshi ka diplomuar nga “The Adjutant General Basic Officer Leader Course (AGBOLC)”, trajnim i avancuar për përgatitjen e oficerëve në fushën e menaxhimit të personelit dhe mbështetjes administrative në operacione ushtarake. Për arritjet e saj, ajo është nderuar me medaljen “United States Diplomatic Medal”.

Ministri theksoi se këto rezultate janë dëshmi e përkushtimit të ushtarakëve të FSK-së, por edhe e investimeve të vazhdueshme të Ministrisë së Mbrojtjes në trajnim, edukim ushtarak dhe zhvillim profesional.

Ai shtoi se përmes zgjerimit të mundësive për shkollim dhe specializim në akademitë dhe qendrat më prestigjioze të vendeve partnere, Kosova po ndërton një ushtri gjithnjë e më profesionale dhe të përgatitur sipas standardeve të NATO-s.

Maqedonci u shpreh krenar për secilin ushtarak të FSK-së që, sipas tij, me punë, disiplinë dhe përkushtim po e përfaqëson me dinjitet Republikën e Kosovës në akademitë e vendeve aleate, duke nënvizuar se arritjet e tyre janë edhe arritje të shtetit dhe të rrugëtimit drejt forcimit të kapaciteteve mbrojtëse.

Komisioni Qendror i Zgjedhjeve (KQZ) do të mbajë mbledhjen e radhës më 27 prill 2026, duke filluar nga ora 13:30, në zyrat e institucionit në Prishtinë.

Sipas njoftimit zyrtar, mbledhja do të kryesohet nga kryesuesi i KQZ-së, Kreshnik Radoniqi, ndërsa në rend dite janë një sërë çështjesh që lidhen me funksionimin dhe aktivitetin zgjedhor.

Në kuadër të këshillit për operacione zgjedhore, anëtarët do të shqyrtojnë dhe miratojnë raportin vjetor të KQZ-së për vitin 2025, i cili më pas i dërgohet Kuvendit të Republikës së Kosovës.

Po ashtu, në rend dite janë edhe shqyrtimi i agjendës së punëtorisë lidhur me mësimet e nxjerra nga zgjedhjet lokale 2025 dhe zgjedhjet e parakohshme për kuvend, si edhe analizat e votave me asistencë për këto procese zgjedhore.

KQZ-ja do të trajtojë edhe ndryshime dhe plotësime në disa rregullore zgjedhore, përfshirë ato për regjistrimin e votuesve jashtë Kosovës, qendrën e numërimit dhe rezultatet, votimin dhe menaxhimin e vendvotimeve, si dhe për vëzhguesit e zgjedhjeve.

Në këtë mbledhje pritet të shqyrtohet edhe raporti për realizimin e planit të punës së KQZ-së për vitin 2026.

Çmimi i naftës për ditën e sotme është 1.66 euro për litër.

Kështu është bërë e ditur nga Ministria e Industrisë, Ndërmarrësisë, Tregtisë dhe Inovacionit, e cila ka publikuar përditësimin e çmimeve të derivateve.

Sipas njoftimit, benzina kushton deri në 1.44 euro për litër, ndërsa gazi 0.86 euro.

Të njëjtat çmime kanë qenë në fuqi edhe dje, si dhe në ditën e parë të kësaj jave.

Nesër është dita e fundit e afatit kushtetues për zgjedhjen e presidentit të ri. Deri tash, partitë politike nuk kanë gjetur konsensus rreth një emri që do të siguronte pjesëmarrjen e së paku 80 deputetëve në procesin e votimit për president.

Lëvizja Vetëvendosje të shtunën doli me një propozim të ri, duke kërkuar nga PDK dhe LDK tre emra jopartiakë dhe njërin prej tyre të zgjedhin President.

Kreu i Vetëvendosjes, Albin Kurti u dha afat deri të dielën mbrëma kryetarit të PDK-së, Bedri Hamzës e atij të LDK-së, Lumir Abdixhikut për të propozuar tri emra për postin e presidentit. Por, ky afat tashmë ka kaluar dhe këto dy parti opozitare nuk kanë propozuar tre emra.

Ndërsa mbrëmë janë përplasur përmes deklaratave Vetëvendosje dhe LDK, shkruan Reporteri.net.

Shefja e Grupit Parlamentar të LVV, Arbërie Nagavci mbrëmë deklaroi se “akoma po presin emra konkretë nga dy partitë opozitare”.

“Për shkak të peshës së situatës dhe rëndësisë së afateve, ne mbesim në pritje të propozimeve konkrete edhe sonte (mbrëmë), dhe i ftojmë edhe njëherë PDK-në e LDK-në që të kontribuojnë në tejkalimin e situatës me propozimin e 3 emrave, dhe t’i vënë në dispozicion nënshkrimet e të gjithë deputetëve të tyre dhe t’i japim fund krizës dhe t’i ofrojmë qytetarëve stabilitetin institucional që vendi e meriton”, ka shkruar ndër tjerash Nagavci në Facebook.

Por, dy deputetët e LDK-së Jehona Lushaku dhe Besian Mustafa, të dielën pyetën pushtetin nëse i kanë 66 vota.

Shefja e Grupit Parlamentar të Lidhjes Demokratike të Kosovës (LDK), Jehona Lushaku, përmes një postimi në Facebook ka theksuar se tashmë emri është bërë i ditur, duke kërkuar nga shumica parlamentare të sqarojë nëse i ka votat e nevojshme.

“A deshët emra? Emrin e keni. Kallxoni a i keni 66 vota!”, ka shkruar shkurt Lushaku.

Kurse deputeti tjetër i LDK-së, Besian Mustafa, përmes një statusi ka pyetur VV-në se ku mbetën qato 66 vota.

“Ku mbetën qato 66 vota? A i keni a jo?”, ka shkruar ai.

Poashtu ka reaguar edhe deputeti tjetër i LDK-së Avdullah Hoti, i cili tha se janë dy ditët vendimtare, ku ose zgjedhet Presidenti apo mandati i kthehet deputetëve.

Kujtojmë se të shtunën kryetari i Lidhjes Demokratike të Kosovës (LDK), Lumir Abdixhiku, përmes një postimi në Facebook i bëri të qartë Kurtit duke i thënë se mund ta propozojnë edhe Vjosa Osmanin për presidente nëse Lëvizja Vetëvendosje i garanton 66 vota për të.

Abdixhiku theksoi se Kurti duhet të vendosë nëse synon bashkëpunim me LDK-në apo sigurimin e 90 votave në Kuvend edhe me përfshirjen e PDK-së.

Kurse, nga Partia Demokratike e Kosovës refuzuan ofertën e Vetëvendosjes.3

Kryetari i PDK-së, Bedri Hamza, i është kundërpërgjigjur Kurtit edhe përmes një videoadresimi publik.

Hamza ka thënë se dje pamë një tentim tjetër nga Kurti për t’ia hedhur fajin opozitës lidhur me procesin e zgjedhjes së Presidentit të ri.

Ndryshe, një ditë para se Kuvendi të shpërndahet në rast se nuk zgjidhet presidenti, në Komisionin Qendror të Zgjedhjeve kanë thënë se janë gati për organizimin e zgjedhjeve të reja, të cilat, sipas afatit kushtetues do të duhej të mbaheshin më së voni më 7 qershor.

Në rast se zgjedhjet shpallen, ato do të ishin të pestat brenda 16 muajve.

Kryetarja e Grupit Parlamentar të Lëvizjes Vetëvendosje, Arbërie Nagavci, përmes një postimi në Facebook ka shkruar se nga PDK e LDK, deri më tani, nuk kanë pranuar zyrtarisht asnjë propozim konkret karshi ofertës së tyre për t’i dhënë vendit një president konsensual e unifikues.

Ajo tutje shkruan se për shkak të peshës së situatës dhe rëndësisë së afateve, mbesin në pritje të propozimeve konkrete edhe sonte, dhe i fton dy partitë opozitare të propozojnë tre emra për president.

Postimi i saj:

Lëvizja VETËVENDOSJE! dje e bëri edhe një hap tutje për të mundësuar tejkalimin e ngërçit në zgjidhjen e presidentit, duke hequr dorë nga kjo pozitë dhe duke ftuar dy partitë më të mëdha opozitare që të vijnë me 3 propozime të kandidaturave unifikuese jashtë skenës politike, me integritet e kontribut të dëshmuar.

Përtej deklaratave në media e rrjete sociale nga PDK e LDK, deri më tani, ne nuk kemi pranuar zyrtarisht asnjë propozim konkret karshi ofertës sonë për t’i dhënë vendit një president konsensual e unifikues.

Për shkak të peshës së situatës dhe rëndësisë së afateve, ne mbesim në pritje të propozimeve konkrete edhe sonte, dhe i ftojmë edhe njëherë PDK-në e LDK-në që të kontribuojnë në tejkalimin e situatës me propozimin e 3 emrave, dhe t’i vënë në dispozicion nënshkrimet e të gjithë deputetëve të tyre dhe t’i japim fund krizës dhe t’i ofrojmë qytetarëve stabilitetin institucional që vendi e meriton.

Qeveria e Kosovës ka njoftuar se ka zhvilluar sot një mbledhje elektronike.

Në këtë mbledhje, ekzekutivi ka miratuar vendimin për ndryshimin dhe plotësimin e vendimit për emërimin e anëtarëve të Komisionit për Dhënien e Provimit të Jurisprudencës.

“Qeveria e Republikës së Kosovës, ka zhvilluar sot mbledhje elektronike, në të cilën ka:Miratuar vendimin për ndryshimin dhe plotësimin e Vendimit të Qeverisë nr.24/11, të datës 20 prill 2026, për emërimin e anëtarëve të Komisionit për Dhënien e Provimit të Jurisprudencës”, thuhet në komunikatën për media.

Deputetja e Lidhjes Demokratike të Kosovës (LDK), Janina Ymeri, ka deklaruar se në Kosovë ekzistojnë dallime në çmimin e energjisë elektrike mes komunave veriore dhe pjesës tjetër të vendit.

Në një reagim publik, ajo ka thënë se “në Kosovë, nën pushtetin ‘cep m’cep’, nëse je në komunat veriore, rryma, gjegjësisht tarifa është deri në 18.3% më lirë sesa në pjesën ku jetojmë ne, me shumicë kosovare”.

Ymeri ka shtuar se “çdo faturë që e keni në shtëpi do të ishte më e lirë në Mitrovicën e Veriut dhe komunat tjera ku operon ElektroSeveri, brenda territorit të vendit”.

Ajo gjithashtu ka pretenduar se qytetarët në pjesët tjera të Kosovës mbajnë barrë shtesë, duke deklaruar se “ne paguajmë edhe shpenzime operative të KEDS-it për komunat veriore të Kosovës”.

LVV-ja kërkoi nga PDK-ja dhe LDK-ja tre emra për President, si propozim “konkret dhe përbashkues” për zgjidhjen e kësaj çështjeje që po rrezikon ta çojë vendin sërish në zgjedhje. Kryetari i LDK-së, Lumir Abdixhiku ia paraqiti Albin Kurtit emrin e Vjosa Osmanit. I kërkoi kryeministrit garanci se 66 deputetë të mazhorancës do ta votonin atë. Ende nuk ka ardhur asnjë reagim nga kryetari i LVV-së, ndërkohë që deputetë të partisë në pushtet i përmendin zgjedhjet e reja dhe përsërisin kërkesën për “tre emra”.

Mund të jetë dukur se, pas zgjedhjeve parlamentare të fundvitit të kaluar Kosova po ecte drejt një rrugëdaljeje nga ngërçi politik i cili e përcolli vendin gjatë gjithë vitit 2025.

Por tani vendi duket se po shkon drejt zgjedhjeve të reja, edhe një herë tjetër, për herë të tretë brenda rreth një viti e gjysmë.

Pas konstituimit të Kuvendit dhe formimit të qeverisë së re, ngecja tani erdhi te zgjedhja e Presidentit të ri. Partia e kryeministrit Albin Kurti nuk i dha mbështetjen presidentes Vjosa Osmani për edhe një mandat në karrigen e shefes së shtetit, ndërsa këtë përgjegjësi u mundua ta shpërndante edhe te partitë opozitare, të cilat u akuzuan se gjithashtu s’e donin rizgjedhjen e saj.

Në vend të Osmanit, për pozitën e shefit të shtetit, Kurti në mars vendosi ta kandidojë Glauk Konjufcën, zëvedësin e tij në parti dhe në qeveri.

Pasi diskutimet për zgjedhjen e Presidentit nuk shkuan siç deshi ai, Kurti iu drejtua qytetarëve me një video të publikuar në Facebook të premten.

Në diskutimet për zgjedhjen e Presidentit, Kurti të premten në mbrëmje i akuzoi partitë opozitare për bllokim. Tha se nuk po respektohej vullneti i shprehur në zgjedhje, ndërsa paralajmëroi bllokadë tjetër edhe pas zgjedhjeve të reja.

“Meqënëse problemi kryesor mbetet nevoja për 80 deputetë për kuorum te çështja e Presidentit, zgjedhjet nuk do të sjellin zgjidhje. Rezultati i zgjedhjeve duhet të pranohet dhe të respektohet, sepse ai përfaqëson vullnetin e qytetarëve dhe bazën e demokracisë. Lëvizja VETËVENDOSJE! (LVV) ka siguruar shumicën e votave dhe të deputetëve, prandaj kërkon që ky rezultat të merret parasysh në proceset politike dhe në vendimmarrje. Nëse shkojmë në zgjedhje në qershor, dhe LVV me partnerët (GUXO, Alternativa e pakicat) nuk i mbërrin 80 deputetë, atëherë do të shkojmë sërish në zgjedhje në vjeshtë a dimër. Kujt i konvenon kjo?!”, tha ai.

Kurti u kishte bërë oferta partive opozitare, duke ua ofruar pozitën e kryetarit të Kuvendit dhe që posti i Presidentit t’i takonte partisë së tij.

U ankua se Partia Demokratike e Kosovës dhe Lidhja Demokratike e Kosovës në takimet me të nuk ofruan asnjë emër për kandidat për President.

Atë mbrëmje të së premtes, LVV-ja mbajti një mbledhje të Kryesisë, dhe dje në mëngjes dolën me një ide tjetër: kërkuan nga PDK-ja dhe LDK-0ja që “së bashku të propozojnë tre emra, nga të cilët do të mund të zgjidhet Presidenti i ri nga legjislatura e 10-të”. Ky propozim u konsiderua “konkret dhe përbashkues”.

Kryetari i LDK-së, Lumir Abdixhiku, i kërkoi Kurtit dje pasdite që të përcaktohej se a do marrëveshje me këtë parti, apo “i doni 90 vota edhe me PDK-në”.

Më konkretisht, ai tha se mund ta propozojnë Vjosa Osmanin, nëse LVV-ja i garanton 66 votat e mazhorancës pë të.

“I nderuar Kryeministër Kurti, Meqë po komunikojmë në distancë, Ju lutem përcaktohuni a doni marrëveshje politike me LDK-në, apo i doni 90 vota edhe me PDK-në. Nëse është kjo e dyta dhe nuk mundeni pa ta, atëherë nuk mund t’ju ndihmojmë. Kur të merreni vesh, e trajtojmë. Por, nëse doni marrëveshje politike me LDK-në, atëherë flisni me ne. Presidentin e propozojmë ne me plot pergjegjësi. Mund ta propozojmë edhe Vjosa Osmanin, nëse na i garantoni 66 vota për të. Ju faleminderit!”, shkroi ai në një postim në Facebook.

Deputeti i LVV-së, Mefail Bajqinovci, reagoi i pari me një video ku i kërkonte sërish LDK-së dhe PDK-së “tre emra për president mbipartiak”.

“Tash është momenti. Dërgoni tre emra. Tre emra kërkohet nëse i keni. Ne i tërheqim emrat tanë”, tha ai në videon e publikuar mbrëmë në Facebook. Tha se “topi është te ju”, duke iu referuar dy partive më të mëdha opozitare.

Bashkëpartiakja e tij, deputetja tjetër e LVV-së, Arbëreshë Kryeziu, menjëherë pas Bajqinovcit i tha Abdixhikut se “nuk po e di se a do t’përgjigjet Kryeministri jonë Kurti dhe kur”.

E përsëriti vendimin e LVV-së për të kërkuar “tre emra” për President, ndërsa përmendi propozimin e tyre: Glauk Konjufcën. Në një situatë kur opozita do të propozonte tre emra dhe LVV-ja do ta mbante Konjufcën si kandidat, zëvendëskryeministri dhe nënkryetari i partisë në pushtet do t’i merrte 61 votat e nevojshme në rundin e tretë të votimit dhe do të zgjidhej President.

“3 emra që janë figura unifikuese, me integritet të lartë qytetar e kombëtar, me kontribut të dëshmuar në jetën profesionale dhe shoqërore, dhe jashtë skenës aktuale politike – Kjo ishte oferta e re e LVV’së. Ne jemi të bindur që pas zgjidhjes ideale, pra Murat Jashari, kandidati më i mirë dhe më i zoti dhe me mbështetje të gjerë popullore për President Republike është Glauk Konjufca, të cilin e votuan 318 mijë qytetarë – krahasojeni këtë me komplet votën e LDK’së, për të cilën votuan 126 mijë qytetarë, pra 2.5 herë më pak! Mirëpo meqë kjo po refuzohet sepse Glauku na qenka LVV (po çka tjetër?!), ne e ndërmorëm edhe një hap. Me 3 kandidatë në garë që ju do t’i propozonit bashkë me PDK’në si opozitë, do të ishim dukshëm mbi 80 deputetë si prag për kuorum. Kjo ishte ofertë që opozita ta merr bajrakun për gjetjen e 3 kandidatëve konsensual, me merita e vlera kombëtare, kurse Lëvizja duke ju mbështetur që ta realizoni këtë akt. Pra, ju bashkë propozimin e kandidatëve, ne mbështetjen. Kjo është oferta për zgjidhje, kurse çfardo refuzimi apo qëndrimi ndryshe tregon se nuk doni zgjidhje, por zgjedhje”, shkroi deputetja.

Shefja e grupit parlamentar të LDK-së, Jehona Lushaku, tha se LVV-ja, që i deshi emrat, e ka tashmë një emër – duke iu referuar Vjosa Osmanit – dhe e shtroi pyetjen se a do ta votojnë atë deputetët e mazhorancës.

“A deshtët emra? Emrin e keni. Kallxoni a i keni 66 vota!”, shkroi ajo mbrëmë në një postim në Facebook.

Elvis Hoxha, anëtar i LVV-së, tha në një video të publikuar sot në Facebook se LDK-ja “nuk i ka dhënë” votat për Vjosa Osmanin presidente.

Duke folur nga një kafene diku, ai i përmendi zgjedhjet e reja parlamentare si punë të kryer, ndërsa e quajti opozitën “depozita e bllokimit”.

I akuzoi edhe mediat, të cilat, sipas tij, “nuk duan kurrsesi që të ketë zhbllokim të politikës së Kosovës dhe të ketë qeverisje”.

Nëse deri të martën nuk zgjidhet Presidenti i ri, Kosova do të mbajë zgjedhje të reja brenda 45 ditësh.

Në mënyrë online ka nisur një peticion i titulluar “Murat Jashari për president”, përmes të cilit kërkohet që Jashari të jetë në krye të presidencës.

Deri më tani, mbi 1 mijë qytetarë kanë nënshkruar online një peticion publik përmes të cilit kërkohet që në procesin e zgjedhjes së Presidentit të merret seriozisht në konsideratë kandidatura e profesorit nga familja Jashari e Skenderajt, Murat Jashari.