ATV

Tag: Ballina

  • Maqedonci: O’Brien ma konfirmoi se ShBA-ja do të angazhohet për integrimin euro-atlantik të Kosovës

    Maqedonci: O’Brien ma konfirmoi se ShBA-ja do të angazhohet për integrimin euro-atlantik të Kosovës

    Ministri i Mbrojtjes i Kosovës, Ejup Maqedonci që ndodhet për një vizitë në Shtetet e Bashkuara, pati një takim të mërkurën me Ndihmës Sekretarin amerikan të Shtetit, Jim O’Brien, ku u diskutua për vazhdimin e bashkëpunimit mes dy vendeve.

    Maqedonci shprehu në një intervistë me Zërin e Amerikës, vlerësimin për mbështetjen e Shteteve të Bashkuara për zhvillimin e kapaciteteve mbrojtëse të Kosovës. Lidhur me kërkesën e Shteteve të Bashkuara për formimin e shpejtë të Asociacionit, ai tha se Marrëveshja e Ohrit duhet të zbatohet si nga Kosova dhe Serbia në tërësi dhe se çdo marrëveshje duhet të jetë në përputhje me Kushtetutën.

    Zëri i Amerikës: Zoti Maqedonci, cilat ishin çështjet kryesore që u ngritën në takimin me zotin O’Brien?

    Ejup Maqedonci: Vizitën time zyrtare në Shtetet e Bashkuara sot e fillova me takimin me Ndihmës Sekretarin e Shtetit për Çështjet e Evropës dhe Euroazisë. Do të kem edhe takime të tjera në ditët në vijim. Nesër do të takohem me Zëvendës Sekretarin e Mbrojtjes Sasha Baker dhe me zonjën Wallander, e cila është zëvendës ndihmës sekretare për çështjet ndërkombëtare. Në takimin me zotin O’Brien diskutuan për shumë gjëra, për shumë çështje të përbashkëta. Në veçanti, theksuam nevojën e vazhdimit të raporteve të shkëlqyera midis Shteteve të Bashkuara të Amerikës dhe Republikës së Kosovës dhe thellimin e këtyre të raporteve. Mora edhe një herë konfirmimin që Shtetet e Bashkuara të Amerikës dhe personalisht O’Brien do të angazhohen në mbështetjen e Kosovës në anëtarësimin në organizatat ndërkombëtare, me theks të veçantë integrimet euro-atlantike, programin e partneritetit të paqes dhe programe të tjera rajonale, ku Shtetet e Bashkuara të Amerikës kanë rol të veçantë. Sipas Ndihmës Sekretarit të Shtetit O’Brien, Shtetet e Bashkuara të Amerikës do të vazhdojnë të mbështesin zhvillimin e kapaciteteve mbrojtëse të vendit tonë. Zhvillimi i këtyre kapaciteteve është bërë tashmë për disa vite në bashkëpunim të plotë me Shtetet e Bashkuara dhe partnerë të tjerë të NATO-s.

    Zëri i Amerikës: Siç e dëgjuam edhe nga të rejat e fundit nga Prishtina, Shtetet e Bashkuara po kërkojnë themelimin sa më të shpejtë të Asociacionit. Si e vlerësoni këtë kërkesë?

    Ejup Maqedonci: Marrëveshja e Ohrit, e arritur mes Kryeministrit Kurti dhe autoriteteve të Serbisë, vlerësojmë dhe kjo është thënë edhe nga Kryeministri, që duhet të zbatohet nga të dyja palët, normalisht. Të gjitha marrëveshjet brenda marrëveshjes kryesore duhet të zbatohen pa përjashtim. Ne vazhdojmë të theksojmë faktin që çdo marrëveshje, që do të nënshkruhet, normalisht që bazë kryesore duhet të ketë kushtetutën e Kosovës. Pra, duhet të jetë e padiskutueshme çështja se do të jenë ato në përputhje me kushtetutën e vendit tonë. Pavarësisht se ky proces u dëmtua rëndë nga sulmi terrorist i 24 shtatorit ndaj sovranitetit dhe integritetit territorial të vendit tonë, qeveria e Kosovës vazhdon ta ketë në fokus dialogun si mjet i vetëm për zgjidhjen e çështjeve të diskutueshme mes dy vendeve.

    Zëri i Amerikës: Zoti ministër, sulmi i 24 shtatorit ndaj policisë së Kosovës në veri, nxiti shqetësime për situatën e sigurisë në rajon. Nga pikëpamja juaj si paraqitet kjo situatë aktualisht?

    Ejup Maqedonci: Situata e sigurisë në atë zonë tashmë është shumë më e qetë. Ne kemi prani të vazhdueshme të shtetit në atë pjesë, veçanërisht të policisë së Kosovës, e cila në vazhdimësi edhe para sulmit të 24 shtatorit ka qenë e pranishme atje, duke mundësuar jetesën për qytetarët dhe mirëqenien e qytetarëve atje. Por gjithashtu, duke penguar zhvillimin e aktiviteteve të ndryshme ilegale dhe terroriste, përfshirë edhe në rrugët ilegale, të cilat janë përdorur nga shumë grupe atje për sjelljen e armatimit ilegal në Kosovë, që u përdor nga grupi i udhëhequr nga Rajdoiçiq në sulmin ndaj institucioneve të vendit tonë. Tani situata është më e qetë. Megjithatë rreziku vazhdon të jetë i pranishëm. Kërcënimi vazhdon të jetë i pranishëm, ndërsa vazhdon qasja hegjemoniste dhe agresive e Republikës së Serbisë në raport me vendin tonë dhe për aq sa vazhdon militarizimi i Serbisë, duke përfshirë edhe blerjet nga Kina dhe Rusia, që janë blerje të vazhdueshme që Serbia është duke realizuar. Por edhe duke pasur parasysh militarizimin e pjesës kufitare me Kosovën, ku Serbia tashmë ka të vendosura 48 baza të përparme operacionale.

    Zëri i Amerikës: A pati pasoja tek Forca e Sigurisë përjashtimi i Kosovës nga Defender Europe 2023?

    Ejup Maqedonci: Pavarësisht dëmtimit të imazhit me largimin nga “Defender Europe 23”, më saktësisht mund të them me pezullimin e ditës së vizitorëve të shquar, sepse gjithë procesi i trajnimit, të gjitha objektivat e “Defender Europe 23” të realizuar në Kosovë janë arritur. Ne kemi vazhduar edhe pas pezullimit bashkëpunimin me ekipet ushtarake amerikane për të validuar kapacitetet tona që kanë qenë të angazhuara në këtë ushtrim. Pra ushtrimi “Defender Europe 23” ka përfunduar me sukses pavarësisht pezullimit të ditës, që ka qenë pezullimi i ditës së vizitorëve të shquar, që është normalisht një aktivitet i rëndësishëm. Mirëpo me të vërtetë në përmbajtje nuk është dëmtuara fare.

    Zëri i Amerikës: Sekretari i Përgjithshëm i NATO-s Jens Stoltenberg, në të paktën dy raste pas 24 shtatorit ritheksoi se Forca e Sigurisë së Kosovës nuk duhet të vendoset në veriun e banuar me shumicë serbe, pa pëlqimin paraprak të komandantit të KFOR-it, duke iu referuar një marrëveshjeje me NATO-n. A e lë pa ndonjë rol në veri Forcën tuaj një gjë e tillë?

    Ejup Maqedonci: Në fakt ka qenë zotimi i vitit 2013 për mospërfshirje të Forcës së Sigurisë së Kosovës në operacione në veri të territorit të Kosovës, zotim i cili respektohet nga të gjithë ne sot. Normalisht, është çështje tjetër a pajtohemi apo nuk pajtohemi me atë zotim. Mirëpo ne jemi të vetëdijshëm për zotimet ndërkombëtare dhe vazhdojmë ta respektojmë zotimin e 2013-ës dhe do ta respektojmë në vazhdimësi. Në të saktësohet se Forca e Sigurisë së Kosovës do të mund të operojë në veri të vendit, duke bërë koordinim paraprak me forcat e KFOR-it, gjë që ne e bëjmë në vazhdimësi. Është për t’u theksuar se edhe pas zotimit të 2013-ës, ne kemi pasur në të kaluarën operacione në bashkëpunim me KFOR-in të njësive të veçanta, kryesisht të kërkim-shpëtimit në liqenin e Ujmanit. Pra ne pavarësisht kufizimit që e kemi në veri, në bashkëpunim me KFOR-in, jemi në koordinim të vazhdueshëm që në rast se cenohet territori dhe sovraniteti i vendit apo jeta e qytetarëve, ne do të jemi të gatshëm të mbështesim operacionet e policisë së Kosovës apo KFOR-it në veri të vendit. Gjithmonë duke pasur parasysh që do të bëhet në koordinim paraprak me KFOR-in. Përndryshe Forca e Sigurisë së Kosovës ka mandate të ushtrojë detyrat e saj në të gjithë territorin e vendit tonë dhe trajnohet, zhvillohet, përgatitet për të kryer tri detyrat kyçe të saj që është mbrojtja e territorit të vendit, mbështetja ushtarake për autoritetet civile si dhe pjesëmarrja në operacionet ndërkombëtare.

  • Gati një vit nga Aplikimi i Kosovës për anëtarësim në BE

    Gati një vit nga Aplikimi i Kosovës për anëtarësim në BE

    Përgatiti: Benita Zeneli

    Më 15 dhjetor bëhet një vit prej kur kryeministri Albin Kurti dorëzoi aplikimin e Kosovës për anëtarësim në Bashkimin Evropian.

    Megjithatë, rruga drejt anëtarësimit edhe nga opozita, por edhe nga njohës të politikave të Bashkimit Evropian, vlerësohet të jetë e gjatë.

    “Minimumi duhen 18 muaj kohë, derisa komisioni ta dorëzojë në këshill e duhet më pas një unanimitet i të gjitha vendeve që janë pjesë e Bashkimit Evropian gjë të cilën nuk e ka Kosova këtë privilegj. Mandej nëse kalon një gjë e tillë duhet të kalojë në të gjitha parlamentet dhe më pas e autorizojnë komisionin për të shikuar nëse i kemi përmbushur kriteret”, tha profesori universitar, Dritëro Arifi.

    Përpos që ishte i vetmi shtet që aplikon për anëtarësim e njëkohësisht nuk njihet si shtet nga 5 shtete anëtare të BE-së, Kosova është larg anëtarësimit edhe në aspektin e politikës së brendshme.

    “Kriteri më i rëndësishëm është sundimi i ligjit e ne jemi larg. Edhe të gjitha raportet kanë kritika për sundimin e ligjit”, tha Arifi.

    Derisa, kryeministri e kishte quajtur ditë historike 15 dhjetorin e 2022-s, një vit pas rrugën drejt anëtarësimit e pengojnë edhe masat që Bashkimi Evropian vendosi ndaj Kosovës.

    “Nuk mund të flasim për anëtarësim kur prej vendeve që presim përkrahje jemi të sanksionuar. Anëtarësimi mund të jetë vetëm dëshirë aktualisht”, tha deputeti i PDK-së, Hajdar Beqa.

    “Kosova gjendet nën masat e BE-së, me ç’rast edhe më shumë është larguar Kosova nga rruga evropiane në qeverisjen Kurtit”, tha deputeti i LDK-së, Armend Zemaj.

    Në rrugën drejt anëtarësimit në Bashkimin Evropian në rajonin e Ballkanit Perëndimor, vetëm Kroacia dhe Mali i Zi mund të lavdërohen sa i përket progresit.

    Derisa Kroacisë iu deshën 10 vjet për anëtarësim të plotë, Mali i Zi qysh në vitin 2008 paraqiti kërkesën për anëtarësim. Deri më tani ka të hapur të gjithë 33 kapitujt e negociatave dhe zyrtarisht është shtet kandidat për anëtarësim.

  • Qeveria ndau nga 100 euro për fëmijët dhe pensionistët

    Qeveria ndau nga 100 euro për fëmijët dhe pensionistët

    Përgatiti: Arton Hamiti

    Mbledhjen me më së shumti vendime deri më tani dhe më të gjatën në 33 muaj qeverisje, kabineti qeveritar e mbajti këtë të mërkurë.

    Në mbledhjen e 178-të Qeveria miratoi nga 100 euro shtesa për fëmijët. Po ashtu, u miratua edhe ndarja e një shtese njëherëshe prej 100 eurove për pensionistët.

    “Është fjala për subvencionimin e të gjithë fëmijëve bazuar në të ardhurat e familjes. Besoj u kujtohet premtimi që çdo vit, secili fëmijë do të përfitojë 50, 100, apo 150 euro, varësisht nga të ardhurat e prindërve. Për të gjithë pension marrësit, këtë fundvit me qëllim të lehtësimit të kostos së jetesës, për këto kategori të cenueshme do të miratojmë shtesën e njëhershme prej 100 euro, përveç pensionit të rregullt mujor që marrin”, tha kryeministri i Kosovës, Albin Kurti.

    Për t’i marrë nga 100 euro, prindërit nuk kanë nevojë për aplikim, pasi mjetet do të kalojnë në xhirollogarinë e tyre.

    Qeveria e Kosovës, gjithashtu, ndau edhe 4 milionë euro për bizneset dhe bujqit që u prekën nga përmbytjet gjatë shtatorit 2022 dhe janarit 2023. Në mbledhjen e parafundit për këtë vit, ekzekutivi shqyrtoi edhe projektligjin për kontrollin e kufirit shtetëror.

    Kabineti qeveritar votoi edhe për themelimin e një Mekanizmi që do të mbikëqyrë lëvizjet e qytetarëve të Kosovës pas liberalizimit të vizave.

  • Serbisë mund t’i shtohet një kusht i ri për anëtarësim në BE

    Serbisë mund t’i shtohet një kusht i ri për anëtarësim në BE

    Përgatiti: Fatlum Jashari

    Bashkimi Evropian ka bërë një hap drejt kushtëzimit të rrugës së anëtarësimit të Serbisë me zbatimin e Marrëveshjes së Brukselit dhe Shtojcës së Ohrit.

    Në konkluzionet për zgjerim, të miratuara të martën në Këshillin për Çështje të Përgjithshme, kërkohet që “Komisioni dhe Përfaqësuesi i Lartë urgjentisht t’i propozojnë Këshillit, para fundit të Janarit 2024, t’i ndryshojë kriteret në Kapitullin 35 të negociatave për anëtarësim të Serbisë, për të pasqyruara detyrimet e Serbisë, të cilat rrjedhin nga Marrëveshja dhe Shtojca për Zbatim.”

    Konkluzionet pritet t’u paraqiten për diskutim dhe miratim liderëve të shteteve anëtare në kuadër samitit të Këshillit Evropian, më 14 dhe 15 dhjetor.

    Përkundër paralajmërimeve për bllokim nga Hungaria të këtij propozimi, konkluzionet kaluan hapin e parë.

    Shtimi përfundimtar i këtij detyrimi në Kapitullin 35 të negociatave për Serbinë, sipas Fitim Mulollit, do të bënte të pashmangshëm zbatimin.

    “Në qoftë se do të kemi miratim final dhe këto obligime do t’i futen Serbisë në kapitullin 35 për anëtarësim në BE, atëherë i bën të gjitha debatet për nënshkrim apo mosnënshkrimit jorelevant, sepse Serbia detyrohet që të zbatojë të gjitha marrëveshjet që i ka arritur me Kosovën”, tha Mulolli.

    Kjo kërkesë-propozim, sipas politologut Fidan Ukaj, tregon se Bashkimi Evropian është i vendosur që ta detyrojë Serbinë në zbatim, përkundër taktizimeve të saj.

    “BE-ja po mundohet të gjejë mekanizma dhe forma për zbatimin e kësaj marrëveshje dhe tashmë e ka gjetë zgjidhjen duke e futur marrëveshjen e Brukselit dhe Ohrit në Kapitullin 35 dhe duke i treguar Serbisë se rruga për në BE është edhe zbatimi i marrëveshjes së Ohrit dhe Brukselit”, tha Ukaj.

    Javën e kaluar, presidenti serb Aleksandar Vucic tha se marrëveshja e 27 Shkurtit dhe shtojca e 18 Marsit, mund të shtohen si kushte për anëtarësimin e Serbisë në Bashkimin Evropian.

  • Vrasja e Marigona Osmanit, Krivaça dhe Sejdiu do të dalin edhe njëherë para gjykatës

    Vrasja e Marigona Osmanit, Krivaça dhe Sejdiu do të dalin edhe njëherë para gjykatës

    Me burgim të përjetshëm ishte dënuar Dardan Krivaça, i akuzuar për vrasjen e 18-vjeçares Marigona Osmani, ndërsa Arbër Sejdiu me 15 vjet burgim, për ndihmë në vrasje, vendim ky i shpallur nga Gjykata Themelore në Ferizaj, më 4 gusht të këtij viti.

    Mirëpo, ndaj këtij vendimi, është ankuar pala e të akuzuarve, me ç’rast Krivaça dhe Sejdiu, do të dalin edhe njëherë para gjykate, veçse kësaj radhe në Gjykatën e Apelit, në Prishtinë.

    Sipas njoftimit të siguruar nga ATV-ja, ballafaqimi i Krivaçës dhe Sejdiut me gjykatën, do të jetë me datë 11 janar 2024, me fillim nga ora 10:00.

    “Njoftoheni që me datë 11.01.2024, në ora 10:00 në Gjykatën e Apelit-Pallati I Drejtësisë në Hajvali objekti 11D, është caktuar seanca e kolegjit në çështjen penale kundër të akuzuarit Dardan Krivaça për shkak të veprës penale dhunim nga neni 227 par.4 nënpar.4.1 lidhur me par.1 të Kodit Penal të Republikës së Kosovës dhe veprës penale të bashkëkryerje vrasje e rëndë nga neni 173 par.1 nënpar.1.3 dhe 1.4 të KPRK-së, si dhe kundër të akuzuarit Arbër Sejdiu për shkak të veprës penale ndihmë në kryerjen e dhunimit nga nen 227 ar.4 nënpar.4.1 lidhur me par.1 dhe nenin 33 të KPRK-së dhe e veprës penale të bashkëkryerje vrasje e rëndë nga neni 173 par.1 nënpar.1.3 dhe 1.4 lidhur me nenin 31 të KPRK-së, duke vendosur sipas ankesës së Prokurorisë Themelore në Ferizaj”, thuhet në dokument.

    Ndryshe, vendimi ndaj të akuzuarve Krivaça e Sejdiu, u shpall pothuajse 2 vjet pas vrasjes së Marigona Osmanit.

    Marigona, 18 vjeçe, u vra më 22 gusht të vitit 2021. Krivaça e Sejdiu e kishin lënë atë pa shenja jete te dyert e spitalit të Ferizajt.

    Sipas aktakuzës, Marigona ishte keqtrajtuar për më shumë se 72 orë. Gjykimi për vrasjen e saj filloi më 12 korrik të vitit të shkuar./atvlive.tv/

  • Haxhi Shala refuzon t’i komentojë akuzat

    Haxhi Shala refuzon t’i komentojë akuzat

    Ish-komandant Topi, Haxhi Shala ka refuzuar të komentojë mbi aktakuzën që i është konfirmuar.

    Ai refuzoi të deklarohet për fajësinë apo pafajësinë e tij, kështu duke e lënë për seancën tjetër.

    Në paraqitjen e parë në Hagë, Haxhi Shala tha se nuk mund të deklarohet lidhur me akuzat e tij, pa i marrë materialet nga Prokuroria

    I pyetur nëse ka çështje që dëshiron të diskutojë lidhur me arrestimin, transferimin dhe kushtet e paraburgimit, Shala tha se “gjithcka është në rregull”.

  • Presidentja Osmani kërkon nga BE-ja heqjen e masave ndaj Kosovës

    Presidentja Osmani kërkon nga BE-ja heqjen e masave ndaj Kosovës

    Presidentja e vendit, Vjosa Osmani, ka përsëritur thirrjen për largimin e masave ndëshkuese ndaj Kosovës.

    Përmes një shkrimi në llogarinë e saj në platformën X, Osmani ka falënderuar kryesuesit e komiteteve parlamentare të 13 shteteve evropiane që dolën me kërkesë për Përfaqësuesin e Lartë të BE-së për Politikë të Jashtme, Josep Borrell dhe me emisarin e BE-së për dialogun Kosovë – Serbi, Miroslav Lajçak.

    Ata përmes kësaj letre kanë kërkuar që masat ndëshkuese ndaj Kosovës të hiqen.

    Edhe Osmani ka thënë se masat e vendosura nga BE-ja ndaj Kosovës duhet të hiqen, për të cilat tha se janë të padrejta.

    “Faleminderit Alicia Kearns dhe gjithë kryesuesve tjerë nëpër Evropë për përkrahjen tuaj. Paqja dhe siguria lulëzojnë për përgjegjësia dhe drejtësia vihen në qendër të vëmendjes. Masat e padrejta ndaj Kosovës duhet të hiqen!”, ka shkruar Osmani.

  • Borrell: Samiti synon të krijojë lidhje të ngushta në mes të BE-së dhe Ballkanit Perëndimor

    Borrell: Samiti synon të krijojë lidhje të ngushta në mes të BE-së dhe Ballkanit Perëndimor

    Shefi i Diplomacisë së Bashkimit Evropian, Josep Borrell, ka folur për samitin e liderëve të Bashkimit Evropian dhe Ballkanit Perëndimor.

    Me anë të një postimi në llogarinë e tij në platformën “X”, Borrell ka thënë se ky samit synon të krijojë lidhje më të ngushta midis BE-së dhe rajonit.

    Sipas tij, zgjerimi është një investim gjeo-strategjik në paqe, siguri dhe prosperitet.

    “Liderët e BE-së dhe Ballkanit Perëndimor do të takohen sot në Samiti. Ky Samit i rëndësishëm synon të krijojë lidhje më të ngushta midis BE-së dhe rajonit – anëtarëve tanë të ardhshëm të BE-së. Zgjerimi është një investim gjeo-strategjik në paqe, siguri dhe prosperitet”, shkroi Borrell.

  • Osmani sot në Bruksel, përfaqëson Kosovën në samitin e BE-së

    Osmani sot në Bruksel, përfaqëson Kosovën në samitin e BE-së

    Presidentja Vjosa Osmani ka udhëtuar për në Bruksel, ku do ta përfaqësojë sot Kosovën në samitin e liderëve të Bashkimit Evropian dhe Ballkanit Perëndimor.

    Osmani ka udhëtuar me ftesë të presidentit të Këshillit Evropian, Charles Michel.

    “Në takimin e liderëve të BE-së dhe Ballkanit Perëndimor, Presidentja Osmani do të diskutojë nevojën e përshpejtimit të procesit të integrimit në dritë të sfidave të vazhdueshme të sigurisë në rajon dhe më gjerë, duke filluar me mbështetjen për statusin e vendit kandidat për Republikën e Kosovës”, thuhet në njoftim.

    Tutje thuhet se liderë të BE-së dhe Ballkanit Perëndimor në Bruksel ndër të tjera do të diskutojnë për procesin e zgjerimit dhe perspektivën evropiane të vendeve të Ballkanit Perëndimor, bashkërendimin me politikën e përbashkët të jashtme dhe të sigurisë të BE-së, si dhe tejkalimin e sfidave të përbashkëta.

    Në kuadër të samitit, Osmani poashtu do t’i informojë krerët e shteteve të BE-së lidhur me situatën e sigurisë në vend, pas sulmit të agresionit të Serbisë më 24 shtator.

  • Haxhi Shala paraqitet sot para Gjykatës, aktakuza e tij lidhet me Januzin e Bahtijarin

    Haxhi Shala paraqitet sot para Gjykatës, aktakuza e tij lidhet me Januzin e Bahtijarin

    Haxhi Shala u arrestua të hënën, më 11 dhjetor 2023, në Kosovë, nga Zyra e Prokurorit të Specializuar, në bazë të fletarrestimit, urdhrit për transferim dhe Aktakuzës së Konfirmuar, të lëshuara nga Gjykatësi i Procedurës Paraprake i Dhomave të Specializuara të Kosovës.

    Haxhi Shala u transferua në objektin e paraburgimit të Dhomave të Specializuara të Kosovës në Hagë dje, më 12 dhjetor 2023.

    Gjykatësi i Procedurës Paraprake konfirmoi Aktakuzën kundër Haxhi Shalës më 4 dhjetor 2023. Versioni i redaktuar publik i Aktakuzës së Konfirmuar gjendet në faqen e internetit të DHSK-së. Ditën e arrestimit, i akuzuari mori një kopje të Aktakuzës në gjuhën e tij amtare. Sipas Aktakuzës së Konfirmuar, midis së paku 5 prillit 2023 dhe 12 prillit 2023, z. Shala, në bashkëkryerje me individë të tjerë, ndër të cilët Sabit Januzi dhe Ismet Bahtijari, u bashkërenduan si grup para dhe pas kontakteve personale të z. Januzi dhe z. Bahtijari me dëshmitarin 1.

    Në të thuhet gjithashtu se, me udhëzim të z. Shala, z. Januzi dhe z. Bahtijari u takuan secili më vete me dëshmitarin 1 në dy raste të veçanta për ta nxitur atë që të tërhiqte dëshminë, ose të mos jepte dëshmi në proceset zyrtare para Dhomave të Specializuara të Kosovës, ndër të cilat përmes kërcënimit të rëndë apo premtimit për përfitime.

    Sipas Aktakuzës, kjo sjellje tregon se z. Shala synonte ta frikësonte dëshmitarin 1 dhe të pengonte persona  zyrtarë, përfshirë prokurorë dhe hetues të Zyrës së Prokurorit të Specializuar, në kryerjen e detyrave zyrtare.

    Në Aktakuzën e Konfirmuar Haxhi Shala akuzohet për: (i) frikësim; dhe (ii) tentativë me anë të kërcënimit të rëndë për të penguar personat zyrtarë në kryerjen e detyrave zyrtare, individualisht dhe me anë të pjesëmarrjes në veprimin e përbashkët të një grupi.