ATV

Tag: Ballina

  • Kontrata KEDS – “Elektrosever” mirëpritet, por nuk bëhet publike

    Kontrata KEDS – “Elektrosever” mirëpritet, por nuk bëhet publike

    Përgatiti: Fatlum Jashari

    Tri ditë nga nënshkrimi, Zyra e Rregullatorit për Energji ende nuk e ka pranuar zyrtarisht marrëveshjen komerciale ndërmjet KEDS-it dhe “Elektroseverit”.

    Ajo vazhdon të mbahet e pa-publikuar dhe, zyrtarisht, nuk dihet përmbajtja e saj.

    Nëse marrëveshja nuk parasheh afate të reja specifike, Elektrosever do të duhej të niste kontraktimin e energjisë në Janar, rrjedhimisht edhe faturimin.

    Por, kësaj duhet t’i paraprijë rregullimi i çështjes së njehsorëve dhe regjistrit të konsumatorëve.

    Në një përgjigje për ATV-në, ZRRE-ja shpjegoi se çfarë në parim rregullon dokumenti i nënshkruar.

    “Me datë 09.12.2023, është nënshkruar Marrëveshja Komerciale mes Elektrosever dhe KEDS-it për ofrimin e shërbimeve të distribuimit (faturim, mirëmbajtje dhe lidhje fizike të konsumatorëve), në katër komunat veriore me shumicë serbe, ashtu siç ishte përcaktuar me Nenin 5 të “Marrëveshjes për Energjinë” të vitit 2013. Kjo marrëveshje komerciale për kryerjen e këtyre shërbimeve nga Elektrosever mbart më vete kostot e shërbimit që duhet të jenë pjesë e marrëveshjes”, thuhet në përgjigjen e ZRRE-së për ATV-në.

    Kompania bijë e ndërmarrjes publike energjetike të Serbisë, e regjistruar dhe licencuar në Kosovë, do të ketë lirinë e plotë të përcaktimit të tarifave të energjisë elektrike në Mitrovicë të Veriut, Zveçan, Leposaviq dhe Zubin Potok.

    “Për sa i përket tarifave për Elektrosever, Korniza ligjore që rregullon sektorin e energjisë në Kosovë, promovon një treg të liberalizuar të energjisë elektrike. Prandaj, siç është e përcaktuar në kushtet e licencës, ky aktivitet i furnizimit nuk i nënshtrohet rregullimit apo miratimit të tarifave nga ZRRE-ja, si rrjedhojë, Elektrosever nuk ka ndonjë obligim për përgatitje të propozimit për tarifa për konsumatorët të cilët i shërben”, thuhet më tej në përgjigjen e ZRRE-së.

    Pa folur për përmbajtjen, zëvendëskryeministri Besnik Bislimi nënshkrimin e marrëveshjes e vlerësoi hap tutje drejt normalizimit.

    “Operimi edhe në veri, do të ndodhë brenda kornizës ligjore e rregullative të Republikës së Kosovës, ashtu siç në të gjithë territorin e vendit tonë. Tash duhet të ecet tutje edhe me hapat e tjerë të nevojshëm për t’i dhënë fund pas më shumë se 20 vitesh, ilegalitetit në mospagesë të rrymës”, tha Bislimi.

    Më 24 Qershor të vitit të kaluar, bazuar në Udhërrëfyesin e dakorduar në Bruksel, ZRRE-ja licencoi Elektroseverin.

    Sipas afateve në licencë, marrëveshja komerciale do të duhej të nënshkruhej më së largu 10 ditë pas licencimit, ndërsa ofrimi i qasjes në nënstacionin në Vallaq, gjë që nuk ka ndodhur ende, brenda 30 ditësh.

    Që nga Korriku 2022, dëmi buxhetor si pasojë e mosfaturimit të energjisë në katër komunat në veri, llogaritet të jetë rreth 60 milionë euro. Ndërkaq, nga paslufta, përfshirë këtë vit, rreth 350 milionë euro.

  • Blerim Isufaj rizgjidhet në krye të prokurorisë speciale edhe për katër vjet

    Blerim Isufaj rizgjidhet në krye të prokurorisë speciale edhe për katër vjet

    Përgatiti: Nora Luta

    Prokuroria Speciale e Kosovës do të vazhdojë të drejtohet edhe për katër vjetët e ardhshëm nga Blerim Isufaj.

    Isufaj është rizgjedhur edhe për një mandat në këtë pozitë nga Këshilli Prokurorial i Kosovës me shumicë votash të hënën, pasi nga Komisioni Vlerësues ishte renditur si kandidati me më së shumti pikë.

    Nga dhjetë vota, vetëm një ishte kundër për Isufajn, i cili e udhëheq PSRK-në që nga viti 2019.

    E para se të vihej në votim emri i tij, nga Komisioni për Rishqyrtim treguan se ankesa patën kundërkandidatët Naim Abazi dhe Atdhe Dema, por u refuzuan.

    Isufaj ishte përzgjedhur nga KPK-ja edhe në pozitën e kryeprokurorit të shtetit, por nuk u dekretua nga presidentja.

    Ndërkohë, konkursi për pozitën në Prokurorinë Speciale ishte shpallur gjatë tetorit, ndërsa një muaj pas Komisioni kishte përfunduar intervistimin e katër kandidatëve, ku përveç Isufajt, Abazit e Demës, në garë ishte edhe zv.kryeprokurori Valdet Gashi.

    Ndërkohë, KPK-ja gjatë mbledhjes, të hënën ka përzgjedhur edhe kryeprokurorët e Prokurorisë Themelore të Prishtinës dhe asaj të Gjakovës.

    Besimin për t’i drejtuar këto dy institucione anëtarët e KPK-së ia dhanë Zejnullah Gashit dhe Enis Gashit.

    Sipas ligjit për KPK-në, kryeprokurorët e prokurorive emërohen nga Këshilli për një periudhë katërvjeçare, me mundësi vazhdimi edhe për një mandat shtesë.

  • Specialja vazhdon aksionet, intervistohet Haxhi Shala

    Specialja vazhdon aksionet, intervistohet Haxhi Shala

    Përgatiti: Donisa Fazliu

    njohur si komandant Topi, për më shumë se 8 orë, është intervistuar nga zyrtarët e zyrës së prokurorit të specializuar, në selinë e EULEX-it në Prishtinë.

    Përveç intervistimit, Zyra e Prokurorit të specializuar, ka kryer bastisje edhe në pronat e tij në Prishtinë dhe në Banjë të Malishevës.

    Ndonëse nuk pranoi të flasë para kamerave, bashkëshortja e Haxhi Shalës, tha për ATV-në, se nuk di detaje rreth intervistimit të tij dhe se Shala ende nuk ka avokat.

    Ndërkaq, sipas vëllait të Haxhi Shalës, Avni Shala, Komandant Topi dyshohet për pengim të drejtësisë.

    “Arsyet po thonë për pengim të drejtësisë, tjetër gjë nuk ka. Ai ka ardhur prej Prishtinës, sepse ka pasë me dergu babën në spital në Prizren, Ka pasur forca të shumta të EULEX-it, ka zgjatur rreth 30 minuta. Nuk kanë konfiskuar ndonjë gjë. Këto arrestime janë të paligjshme. Kjo gjykatë është e padrejtë. Shkojnë dhe i marrin njerëzit, veç pse kanë dhënë kontribut për vendin”, tha Shala.

    Sipas tij, Shala është intervistuar edhe më herët nga Specialja.

    “Telefoni i është konfiskuar verës, në Hagë ka qenë në intervistë më herët, qysh e kanë thirrë, iu është përgjigjë ftesës. Drejtësisë nuk i ikë, nuk kemi pse me ikë”, tha Shala.

    Për këto aksione, ka reaguar edhe ushtruesi i detyrës së kryetarit të OVL-UÇK-së, Faton Klinaku. Sipas tij, qëllimi i këtyre bastisjeve, është mbulimi i dështimit të Gjykatës Speciale.

    Në anën tjetër, përveç se aksionet janë të vazhdueshme, Zyra e Prokurorit të Specializuar nuk dha detaje të tjera për ATV-në, lidhur me bastisjet.

    Kjo nuk është hera e parë që Zyrtarët e Zyrës së Prokurorit të Specializuar kanë kryer bastisje.

    Muajin e kaluar, ata bastisën në pronat e ish-bashkëpunëtorëve të Hashim Thaçit dhe ish-kryetarit të komunës së Malishevës, Isni Kilaj, derisa ky i fundit është arrestuar nën dyshimin për pengim të drejtësisë.

  • ”Thaçi e të tjerët”, dëshmitari pretendon se ishte arrestuar nga shqiptarë të armatosur

    ”Thaçi e të tjerët”, dëshmitari pretendon se ishte arrestuar nga shqiptarë të armatosur

    Përgatiti: Driton Sadiku

    Pa masa mbrojtëse dhe në një tjetër seancë publike, ka nisur të hënën dëshminë Dejan Jevtiq, në gjykimin ndaj Thaçit dhe të tjerëve.

    Zyra e Prokurorit të Specializuar pretendon se Jevtiq ishte arrestuar në korrik të 1998-s nga disa shqiptarë të uniformuar, dhe ishte mbajtur në fshatin Budakovë.

    “U arrestua së bashku me dy të afërm të tij afër… nga dy shqiptarë të armatosur me uniforma të zeza. Tre serbët janë dërguar në një shtëpi në Budakovë, ku u janë lidhur sytë dhe i kanë pasur duart e lidhura, më pas ata janë rrahur me pushkë dhe me zinxhirë dhe janë hedhur në një bunker, pas një shtëpie ku janë marrë në pyetje”, tha prokurori special, Cezary Michahlczuk.

    Jeftiq para trupit gjykues ka përmendur dy emra, të cilët pretendon se e arrestuan dy dekada më parë.

    Gjatë dëshmisë së tij në Hagë, dëshmitari Jevtiq tha se gjatë kohës sa kanë qenë të ndaluar e kanë menduar që të arratisën, mirëpo kjo, sipas tij, ka qenë e pamundur.

    “Në atë kohë Shukri Gashi jetonte në Muhlan sikurse edhe unë ndërkohë Sokol Kabashi jetonte në Krushicën e Poshtme. jo, nuk ishim në gjendje të largoheshim as nga atje. Kam deklaruar se pas keqtrajtimit dhe rrahjeve, ne po përpiqeshim të kuptonim se si mund të arratiseshim përmes oxhakut, por Tahir Kokollari që ishte i ndaluar me ne, na tha që ishte e pamundur që të arratiseshim për shkak se snajperët ishin të vendosur në shtëpinë përballë”, tha dëshmitari Jevtiq.

    Dëshmitari Dejan Jevtiq mohoi të ketë bërë rezistencë në momentin që është arrestuar, teksa për njërin nga personat që e arrestuan, tha se ishin fqinjë dhe kishin shkuar te njëri-tjetri.

    “Jo në asnjë çast nuk kemi rezistuar. Unë thjeshtë e pyeta komshiun tim Shukri Gashin se çfarë po ndodhë, në atë moment ai me tha se nuk ishte në gjendje të iu përgjigjej këtyre pyetjeve pasi ishte komandanti ai që do të vendoste se çfarë të bëhej me ne, nëse do të na mbanin të ndaluar apo do të na ndalonin”, tha ai.

    Paraprakisht, të hënën e ka vazhduar dëshminë zyrtarja e OSBE-së, Sandra Mitchell, e cila dëshmoi edhe javën e kaluar. Ajo në këtë seancë u përball me pyetjet shtesë nga mbrojtja e Thaçit.

    Jevtiq është dëshmitari i 39-të, teksa procesi gjyqësor ndaj Thaçit dhe të tjerëve do të vazhdojë edhe të martën.

  • I jepet lamtumira e fundit policit që vdiq në Jarinje

    I jepet lamtumira e fundit policit që vdiq në Jarinje

    Sot në fshatin Terllabuq të komunës së Vushtrrisë u mbajt ceremonia e varrimit të zyrtarit policor Rexhep Sejdiu.

    Gjatë ceremonisë së varrimit, policia njofton se aty dy vajzat e policit të ndjerë përmes poezive të dedikuara, me shumë emocion evokuan kujtime për babain e tyre.

    Njoftimi i plotë i policisë:

    Prishtinë, më 11 dhjetor 2023

    Sot më datën më 11 dhjetor 2023, në fshatin Terllabuq të komunës së Vushtrrisë u mbajt ceremonia e varrimit të zyrtarit policor Rexhep Sejdiu. Në ceremoninë mortore morën pjesë Ministri i Punëve të Brendshme z. Sveçla, drejtori i përgjithshëm i PK-së Kolonel Hoxha, përfaqësues të institucioneve vendore si dhe eprorë e kolegë nga Policia e Kosovës.

    Të pranishmëve në ceremoni me nga një fjalë rasti iu drejtuan Ministri i MBP-së, Drejtori i Përgjithshëm i PK-së, kryetari i Komunës së Vushtrrisë si dhe një familjar i zyrtarit Rexhep Sejdiu, të cilët folën për shëmbëlltyrën, punën profesionale dhe sakrificën e pakursyer të zyrtarit Sejdiu në ofrim të sigurisë, ruajtjen e rendit dhe mbrojtjen e kufirit shtetëror. Poashtu dy vajzat e kolegut Rexhep Sejdiu përmes poezive të dedikuara, me shumë emocion evokuan kujtime për babain e tyre në ceremoni.

    Lavdi jetës dhe veprës së zyrtarit policor Rexhep Sejdiu!

  • Kurti tregon se Kosova është bërë pjesë e një organizate rinore ndërkombëtare

    Kurti tregon se Kosova është bërë pjesë e një organizate rinore ndërkombëtare

    Kryeministri i vendit, Albin Kurti, ka bërë të ditur se Kosova është anëtarësuar në Organizatën Ndërkombëtare Shoqata Evropiane e Kartës Rinore (EYCA – European Youth Card Association).

    Kurti potencoi se EYCA bënë bashkë 30 shtete të Evropës të cilat lëshojnë Kartën Evropiane Rinore për mbi 7 milionë të rinj.

    “Me seli në Bruksel, EYCA bënë bashkë 30 shtete të Evropës të cilat lëshojnë Kartën Evropiane Rinore për mbi 7 milionë të rinj. Pas aplikimit të suksesshëm të Ministrisë së Kulturës, Rinisë dhe Sportit, Qeveria do ta ofrojë kartën pa pagesë për të gjithë të rinjtë nën moshën 30 vjeçare, pavarësisht gjinisë, përkatësisë etnike, aftësive apo statusit socio-ekonomik. Karta do të jetë e qasshme në formë digjitale, në të gjitha gjuhët zyrtare të vendit tonë”, shkroi Kurti në rrjetin social Facebook.

    Ai potencoi se karta do t’u jep qasje në mbi 60,000 zbritje dhe benefite në transport, akomodim, kulturë, sport, arsim, shërbime dhe produkte kudo në Evropë.

    “Për më tepër, Qeveria do të punojë së bashku me sektorin publik dhe privat të Kosovës për të ofruar zbritje dhe përfitime brenda Kosovës, të cilat do vlejnë edhe për vizitorët dhe turistët e rinj të huaj që vijnë në Kosovë”.

    “Nga viti 1991, EYCA është partner institucional i Këshillit të Evropës dhe në këtë cilësi merr pjesë në zbatimin e programit të Marrëveshjes së Pjesshme për Mobilitetin e Rinisë përmes Kartës Rinore”.

    “Me liberalizimin e vizave dhe me përparimin në procesin e anëtarësimit në Këshillin e Evropës, jemi në prag të lëvizjes së lirë dhe lidhjes më të afërt me Evropën. Ndërsa me masat si Skema Young Cells, bursat e Ministrisë së Arsimit, dhe grantet e mobilitetit të Ministrisë së Kulturës, Rinisë dhe Sportit, mijëra të rinjve po ju mundësohet mobiliteti në Evropë për përvoja arsimore, garuese dhe profesionale”.

    Kurti theksoi se nga viti që na pret, të pajisur me kartë, të rinjtë në Kosovë do kenë mundësi dhe përfitime të barabarta kudo në Evropë.

  • Petkoviqi takohet me Lajçakun në Bruksel: Diskutuam për marrëveshjet e arritura dhe Asociacionin

    Petkoviqi takohet me Lajçakun në Bruksel: Diskutuam për marrëveshjet e arritura dhe Asociacionin

    Kryenegociatori i Serbisë në dialogun Prishtinë-Beograd, Petar Petkoviq, ka takuar sot në Bruksel përfaqësuesin special të Bashkimit Evropian Miroslav Lajçak.

    Ai ka bërë të ditur se kanë folur me Lajçakun për marrëveshjet e arritura deri më tani dhe për formimin e Asociacionit të Komunave me Shumicë Serbe.

    “Sot në Bruksel u takova me Përfaqësuesin Special të BE-së Miroslav Lajçak me të cilin kam diskutuar për të gjitha marrëveshjet e arritura deri më tani me theks të veçantë për formimin e Asociacionit, por edhe për deeskalimin e nevojshëm”, shkroi Petkoviq.

    “Ekspertët tanë si pjesë e delegacionit nga Beogradi morën pjesë në diskutimet për formimin e Asociacionit dhe hartimin e statutit, si dhe çështjen e të zhdukurve dhe tema të tjera të rëndësishme. Si gjithmonë, erdhëm në Bruksel të përgatitur mirë”.

  • Rohde e mirëpret arritjen e marrëveshjes mes KEDS-it dhe Elektroseverit

    Rohde e mirëpret arritjen e marrëveshjes mes KEDS-it dhe Elektroseverit

    Ambasadori i Gjermanisë në Kosovë, Jorn Rohde, e ka mirëpritur arritjen e marrëveshjes së KEDS-it dhe Eletroseverit.

    Në një postim në llogarinë e tij në platformën X, Rhode ka shkruajtur se ky është një lajm i mirë dhe se tani duhet të ketë zbatim pa vonesa.

    “Vërtet lajm i mirë, tani kemi nevojë për zbatim të qëndrueshëm pa vonesa të mëtejshme!”, është shprehur Rohde.

    Në anën tjetër, edhe Bashkimi Evropian ditë më parë e ka mirëpritur nënshkrimin kontratës komerciale ndërmjet kompanisë energjetike të Kosovës KEDS dhe kompanisë, Elektrosever.

    Miroslav Lajçak me anë të një komunikate e ka quajtur këtë si një hap të rëndësishëm për zbatimin e plotë të Udhërrëfyesit për Energjinë.

  • ​Kurti për takimin me Scholz: U dëshmuan marrëdhëniet e forta mes Kosovës e Gjermanisë

    ​Kurti për takimin me Scholz: U dëshmuan marrëdhëniet e forta mes Kosovës e Gjermanisë

    Kryeministri i Kosovës, Albin Kurti, ka njoftuar për vizitat që po i bën gjatë qëndrimit të tij në Berlin ku është takuar edhe me kancelarin gjerman, Olaf Scholz.

    Në llogarinë e tij në Facebook, Kurti tha se në takimin me shefin e qeverisë gjermane, u dëshmuan marrëdhëniet e forta dhe të shkëlqyeshme dypalëshe dhe vizionin e përbashkët si socialdemokrat për zhvillimin dhe rritjen e mirëqenies në të dy vendet.

    Në vizitën e tij në Berlin, Kurti njoftoi se ka marrë pjesë në pjesë në Kongresin e Partisë Socialdemokrate të Gjermanisë, SPD-së, për të cilën tha “fuqizimi i bashkëpunimit brenda familjes politike të spektrit të majtë socialdemokrat ishte fokus i bisedës”.

    “Kosova është shtet i së drejtës, demokracisë e barazisë për të gjithë. Biseduam dhe rreth dinamikës e situatës në rajonin e Ballkanit Perëndimor, procesin e dialogut e përkushtimin e Kosovës drejt integrimit evropian”, ka shkruar Kurti.

    I pari i Qeverisë gjithashtu njoftoi se gjatë qëndrimit në Gjermani ai është takuar edhe me mërgatën atje, të cilët tha se i ka informuar për zhvillimet në vend.

  • Haxhi Shala intervistohet nga Gjykata Speciale

    Haxhi Shala intervistohet nga Gjykata Speciale

    Ish-eprori i Ushtrisë Çlirimtare të Kosovës (UÇK), Haxhi Shala, është ftuar të hënën për intervistim nga Gjykata Speciale.

    Lajmin për Radion Evropa e Lirë e ka konfirmuar i biri i Shalës, Flakroni.

    Ai ka thënë se Haxhi Shala është duke u intervistuar në zyrat e Misionit të Bashkimit Evropian për Sundim të Ligjit (EULEX) në Fushë Kosovë.

    “E kanë ftuar për intervistim, deri më tani e kemi vetëm këtë informatë. Nuk i dimë arsyet, tani ndodhet në zyrat e EULEX-it në Fushë Kosovë”.

    Zyra e Prokurorit të Specializuar, me seli në Hagë, nuk ka dashur të komentojë këtë rast, por ka konfirmuar se janë duke u zhvilluar operacione në Kosovë.

    “Zyra e Prokurorit të Specializuar është duke zhvilluar operacione të vazhdueshme në Kosovë dhe nuk ka komente të mëtejme”, kanë thënë për Radion Evropa e Lirë (REL) nga kjo zyrë.

    Ndërkaq, kryetari i Organizatës së Veteranëve të Luftës së UÇK-së në Malishevë, Metush Kryeziu, i ka thënë REL-it se forcat e EULEX-it kanë mbërritur në mëngjes në shtëpinë e Haxhi Shalës në fshatin Banjë të Malishevës.

    Sipas tij, aty po zhvillohen bastisje.

    “Në mëngjes kanë ardhur forcat e EULEX-it në pronat e tij, si zakonisht Specialja siç bën, arsyet nuk i dimë. Bastisjet po vazhdojnë në shtëpinë në Banjë të Malishevës. Ai është marrë në pyetje, është dërguar në EULEX në Fushë Kosovë, për më shumë nuk dimë”, ka thënë Kryeziu.

    Së fundi, Specialja e ka arrestuar edhe ish-kryetarin e Malishevës, Isni Kilaj, nën dyshimin për pengim të drejtësisë.

    Ndërkaq në muajin tetor janë arrestuar dhe transferuar në objektin e paraburgimit në Hagë edhe Sabit Januzi dhe Ismet Bahtjari, të cilët, sipas Speciales “akuzohen për frikësim dhe tentim për pengim të personave zyrtarë në kryerjen e detyrave zyrtare, përfshirë përmes kërcënimit të rëndë”.

    Gjatë këtij viti, Specialja ka kryer bastisje në Kosovë.

    Pa dhënë shumë detaje, prokuroria në Hagë kishte bërë të ditur se operacionet janë zhvilluar në një proces hetimor që përqendrohet në vepra penale kundër administrimit të drejtësisë.

    Rastet tjera në këtë gjykatë

    Gjykata Speciale heton krimet e pretenduara të anëtarëve të Ushtrisë Çlirimtare të Kosovës kundër pakicave etnike dhe rivalëve politikë në periudhën janar 1998 – dhjetor 2000.

    Gjykata e ka selinë në Hagë të Holandës, por funksionon sipas ligjeve të Kosovës.

    Aktualisht, në Gjykatën Speciale është duke vazhduar gjyqi ish-pjesëtarëve të UÇK-së, njëherësh ish-presidentit të Kosovës Hashim Thaçi, ish-kryeparlamentarëve, Jakup Krasniqi dhe Kadri Veseli, si dhe ish-anëtarit të Shtabit të Përgjithshëm të Ushtrisë Çlirimtare të Kosovës, Rexhep Selimi, me akuzat për krime lufte dhe krime kundër njerëzimit.

    Të gjithë janë deklaruar si të pafajshëm.

    Ndaras, në një proces tjetër gjyqësor gjykohet ish-pjesëtari i UÇK-së, Pjetër Shala.

    Ai akuzohet për drejtimin e një burgu të improvizuar, ku supozohet se janë keqtrajtuar disa njerëz dhe njëri prej tyre është vrarë.

    Vetë Shala ka thënë se akuzat ndaj tij janë të fabrikuara.

    Në dhjetor të vitit të kaluar, Gjykata Speciale e ka shqiptuar dënimin e parë për krime lufte.

    Ish-komandanti i Ushtrisë Çlirimtare të Kosovës, Salih Mustafa, është dënuar me 26 vjet burgim për vrasje të paligjshme, ndalim arbitrar dhe torturë.

    Më herët, nga Dhomat e Specializuara në Hagë janë dënuar Hysni Gucati dhe Nasim Haradinaj, për pengim të administrimit të drejtësisë.

    Gucati është liruar ndërkohë, nën disa kushte. /REL